ថ្ងៃចូលឆ្នាំចិនពលរដ្ឋខ្លះ នៅតែបំពានបម្រាមដុតផាវ​របស់សាលារាជធានីភ្នំពេញ

នៅថ្ងៃសែនបុណ្យចូលឆ្នាំចិន និងវៀតណាម​កន្លងទៅថ្មីៗ​នេះគេបានឮស្នូរសំឡេងផ្ទុះ​ដោយការ​ដុតផាវ​មានតូចមានធំដោយពុំគោរពតាមការណែនាំរបស់សាលារាជធានីភ្នំពេញ។

​ជាក់ស្តែងនៅវេលាម៉ោង ២៣ យប់ថ្ងៃទី ២១ ខែមករា ដែលជាថ្ងៃសែនទទួលទេវតា ចិន វៀតណាម ប្រជាពលរដ្ឋបាន​ថតវីដេអូនៅសកម្មភាពដុតកាំជ្រូច​ និងផាវធំតូចចម្រុះលាន់ឡើង​ទ្រហឹងចេញពីភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

ទាក់ទិនទៅករណីដុតផាវខាងលើ លោក ជា សុខៃ ចៅសង្កាត់ចាក់អង្រែក្រោម​បានប្រាប់កម្ពុជាថ្មីតាមទូរស័ព្ទនាព្រឹកថ្ងៃទី ២៣ ខែមករានេះថា លោកទទួលស្គាល់​ថាពិតជា​មានការ​ដុតផាវសឹងគ្រប់កន្លែង ខណៈនោះលោកកំពុងឈរនៅលើកំណាត់ផ្លូវជាតិលេខ២​ មុខវត្ត​ចាក់អង្រែក្រោម ស្ថិតក្នុងភូមិសាស្ត្រសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។

លោកចៅសង្កាត់បានអះអាងទៀតថា ការដុតផាវ និងកាំជ្រូចគឺលាន់ឮគ្រប់កន្លែង​ហើយពុំ​ត្រឹមតែ​សង្កាត់​ចាក់អង្រែក្រោមប៉ុណ្ណោះទេបើក្រឡេក​ទៅទន្លេម្ខាង ស្ថិត​ក្នុងភូមិសាស្រ្ត​ ខណ្ឌច្បារអំពៅ​ក៏លាន់​ស្នូរផ្ទុះផងដែរ។

​លោកចៅសង្កាត់បានបញ្ជាក់យ៉ាងខ្លីថា មុនថ្ងៃបុណ្យចូលឆ្នាំចិន និងវៀតណាម​នេះលោក​បានធ្វើ​ការ​ផ្សព្វផ្សាយ​សេចក្តីណែនាំរបស់សាលារាជធានីភ្នំពេញ​ស្តីពីការលក់​ និងដុតផាវពិសេស​គ្រឿងផ្ទុះ​ព្រមទាំងល្បែងស៊ីសងគ្រប់ប្រភេទ។ ប៉ុន្តែទីបញ្ចប់នៅតែកើតមានករណីដុតផាវដដែល លើកលែងល្បែងស៊ីសងហាក់ស្ងប់ស្ងាត់៕

(វីដេអូ)

អត្ថបទ៖ នរា