កីឡា
កម្ពុជាសម្រេចជាឯកច្ឆន្ទប្រើពាក្យ«គុនខ្មែរ»ជាផ្លូវការនៅស៊ីហ្គេម២០២៣
កម្ពុជាក្នុងនាមជាម្ចាស់ផ្ទះបានសម្រេចជាឯកច្ឆន្ទក្នុងការប្រើឈ្មោះ«គុនខ្មែរ»ជាផ្លូវការសម្រាប់ការប្រកួតកីឡាស៊ីហ្គេម លើកទី៣២ ឆ្នាំ២០២៣ ចាប់ពីថ្ងៃទី៥ ដល់ទី១៧ ខែឧសភា។
កន្លងមក គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានប្រើពាក្យ គុនខ្មែរ ភ្ជាប់ជាមួយពាក្យ «មួយ គឺ Kun Khmer (Muay)» ដែលបានធ្វើឲ្យអ្នកគាំទ្រប្រដាល់គុនខ្មែរ ផ្ទុះការរិះគន់ខ្លាំង និងសុំឲ្យដកពាក្យ Muay ចេញ ដោយសារ Muay គឺជាកម្លាយពាក្យចេញពីកីឡា Muay Thai របស់ថៃ។
ទោះបីជាយ៉ាងណា នៅពេលនេះកម្ពុជាបានប្រើគោលជំហរជាឯកច្ឆន្ទក្នុងនាមជាម្ចាស់ផ្ទះកីឡាស៊ីហ្គេម លើកទី៣២ ឆ្នាំ២០២៣ ប្រើពាក្យ «គុនខ្មែរ» ផ្តាច់មុខ ដោយបានផ្តល់ដំណឹងជាលាយលក្ខណ៍អក្សរទៅគណៈកម្មាធិការជាតិ (NOC) នៃប្រទេសអាស៊ានទាំង ១០ នៅក្នុងតំបន់អាស៊ីអាគ្នេយ៍រួចហើយ។
លោក វ៉ាត់ ចំរើន អគ្គលេខាធិការ CAMSOC និងគណៈកម្មាធិការជាតិអូឡាំពិកកម្ពុជា (NOCC) បានប្រាប់ថា ការសម្រេចប្រើពាក្យ គុនខ្មែរ ជាផ្លូវការ នៅស៊ីហ្គេម ឆ្នាំ ២០២៣ នេះ គឺត្រូវបានធ្វើឡើង ទៅតាមឆន្ទៈរបស់កម្ពុជា។ ការប្រើ «Kun Khmer»គឺ សម្រាប់ការប្រកួតកីឡា Muay ក្នុងកីឡាស៊ីហ្គេម នៅប្រទេសកម្ពុជា។
លោកបានបន្ថែមថា ៖«យើងមិនខ្វល់ថា អ្នកណាគិតយ៉ាងម៉េចនោះទេ សំខាន់យើងបានប្រាប់ទៅកាន់បណ្តាប្រទេសជាសមាជិករួចហើយថា យើងប្រើប្រាស់ពាក្យ«គុនខ្មែរ» ក្នុងនាមជាម្ចាស់ផ្ទះ។ ការប្រកាន់ជំហរ ប្រើប្រាស់ពាក្យ គុនខ្មែរ នេះ ដើម្បីកុំឱ្យមានការច្របូកច្របល់ និងមតិយោបល់របស់មហាជនយើង ប្រកាន់រឿងពាក្យ Muay ហ្នឹងទៀត។ វាជាកិត្តិយស ក្នុងនាមយើងជាម្ចាស់ក្បាច់គុន និងជាម្ចាស់ផ្ទះស៊ីហ្គេម ដោយយើងបានប្រឹងប្រែងទាំងអស់គ្នា ដើម្បីសម្រេចក្តីប្រាថ្នា ក្នុងការប្រើប្រាស់ពាក្យ គុនខ្មែរ នៅក្នុងស៊ីហ្គេម»។
លោកបានសង្កត់ធ្ងន់ថា ៖«នេះជាជោគជ័យដ៏ធំមួយ ដែលនឹងធ្វើឱ្យប្រជាពលរដ្ឋរបស់យើង កាន់តែមានទឹកចិត្ត និងឆន្ទៈដ៏ពិតប្រាកដ ក្នុងការចូលរួមជាមួយរាជរដ្ឋាភិបាល ក៏ដូចជា CAMSOC សម្រាប់ដំណើរការធ្វើជាម្ចាស់ផ្ទះស៊ីហ្គេមនេះ ដើម្បីធ្វើឱ្យព្រឹត្តិការណ៍ជាប្រវត្តិសាស្រ្ត លើកដំបូងនៅកម្ពុជានេះ ប្រព្រឹត្តទៅដោយរលូន និងទទួលបានជោគជ័យ សម្រាប់ជាមុខមាត់ និងកិត្តិយសជាតិ នៅលើឆាកអន្តរជាតិ»។
កីឡា Muay Thai ឬ Muay ត្រូវបានដាក់ក្នុងកីឡាស៊ីហ្គេម តាំងពីឆ្នាំ ២០០៧ ដោយកាលនោះថៃ ធ្វើជាម្ចាស់ផ្ទះ ហើយប្រទេសឡាវ ហ្វីលីពីន មីយ៉ាន់ម៉ា សិង្ហបុរី និងឥណ្ឌូនេស៊ី បានចូលរួមប្រកួតប្រជែងលើប្រភេទកីឡាមួយនេះ។
ក្នុងនាមជាម្ចាស់ផ្ទះកីឡាស៊ីហ្គេម ឆ្នាំ ២០២៣ សហព័ន្ធកីឡាប្រដាល់គុនខ្មែរបានរៀបចំលក្ខន្តិកៈ និងបទបញ្ជានៃប្រកួតដោយខ្លួនឯង ព្រមទាំងបានត្រៀមមន្រ្តីអាជ្ញាកណ្តាល និងចៅក្រម របស់ខ្លួនរួចរាល់សម្រាប់រៀបចំការប្រកួត៕
អត្ថបទ៖ វីរបុត្រ
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៧ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង