មិនធម្មតា! ឡៅ ចន្ទ្រា​ ចេញទៅ នូវែលសេឡង់ ត្រូវជួបដៃគូទើបឈ្នះខ្សែក្រវាត់ 8 Men

កីឡាករ ឡៅ ចន្ទ្រា គឺ​ជា​កីឡាករ​ម្នាក់ ក្នុងចំណោមកីឡាករគុនខ្មែរទាំង ៥ នាក់ ដែលត្រូវចេញទៅប្រកួតនៅប្រទេស នូវែលសេឡង់ នាថ្ងៃទី ២១ ខែ មិថុនា សប្តាហ៍ក្រោយ។

កីឡាករគុនខ្មែរទាំង ៥ រូប ដែលត្រូវចេញទៅប្រកួតនៅទីនោះ រួមមាន ឡៅ ចន្ទ្រា, លន បញ្ញា, ធន់ វណ្ណា, ថៃ រ៉េត និង ធន់ ចាន់តាក់។

យ៉ាងណា បន្ទាប់ពីប្រកាសគូប្រកួតនីមួយៗ ក្រៅអំពីដៃ​គូរបស់ លន បញ្ញា កីឡាករ Daniel Ruwanga គឺមានកីឡាករ Suran Juanmiry ម្នាក់ទៀត ដែលជាដៃគូរបស់ ឡៅ ចន្ទ្រា ត្រូវបានគេចាត់ទុក ជាជើងខ្លាំងមួយរូបប្រចាំសង្វៀន King in the Ring និងប្រទេស នូវែលសេឡង់។

បង្ហាញ​ពី​ប្រវត្តិត្រួសៗ កីឡាករ Suran Juanmiry ដែលមានសញ្ជាតិ នូវែលសេឡង់ គឺជាម្ចាស់ខ្សែក្រវាត់ ៤ ស្ថាប័នរួមមាន 8 Men King in the Ring, ខ្សែ​ក្រវាត់ KITR Champion, ខ្សែ​ក្រវាត់ ISKA Kickboxing Champion និងខ្សែ​ក្រវាត់ WMAF Kickboxing Champion។ បន្ថែមពីនោះទៀត កីឡាករ​ធ្លាប់ឈ្នះហ្គង់​ដៃ​មាស Golden Glove boxing Champion និងមេដាយមាសរបស់ GAMMA ផងដែរ។

កីឡាករ Suran ធ្លាប់ឆ្លងកាត់ការប្រកួតបានចំនួន ៣០ ដង ក្នុងនោះឈ្នះ ២៣ ដង ចាញ់ ៥ ដង និងស្មើ ២ ដង។ ការប្រកួតចុងក្រោយរបស់អ្នកលេងរហស្សនាមកុមារមាសរូបនេះ គឺ​បានឈ្នះកីឡាករ Daniel Ruwanga ដែលជាដៃគូ លន បញ្ញា ដោយពិន្ទុ នៅក្នុងការប្រកួតវគ្គផ្តាច់ព្រ័ត្រដណ្តើមខ្សែក្រវាត់ 8 Men King in the Ring។

គួរបញ្ជាក់ថា ការប្រកួតរវាង ឡៅ ចន្ទ្រា និង Suran ក៏នឹងមានការដណ្តើមខ្សែក្រវាត់ផងដែរ គឺខ្សែក្រវាត់ពិភពលោក GAMMA៕

អត្ថបទ៖ សេម កុសល