លោកអភិបាលខេត្តកណ្ដាល បន្តថា៖ ក្រុមគ្រួសារវីរៈកងទ័ព បានលះបង់សាច់ញាតិ ពិសេសប្ដី ដែលនេះគឺជាការលះបង់មួយដ៏ធំធេង ហើយការលំបាករបស់កងទ័ពជួរមុខរបស់យើង គឺមានតែក្រុមគ្រួសារផ្ទាល់ទេ ដែលដឹងច្បាស់អំពីសុខទុក្ខរបស់ពួកគាត់ សម្រាប់ប្រជាពលរដ្ឋដែលមិនមានសាច់ញាតិជាកងទ័ពជួរជួរមុខ បានត្រឹមដឹងសុខទុក្ខតាមរយៈការបង្ហាញដោយសារព័ត៌មាន ឬវីដេអូសកម្មភាពផ្សេងៗ ដូចនេះមានតែក្រុមគ្រួសារវីរៈកងទ័ពជួរមុខនោះទេ ដែលមានការឈឺចាប់ខ្លាំងជាងបងប្អូនរបស់យើងផ្សេងទៀត ព្រោះថាការរំលោភបំពានទឹកដីពីសំណាក់យោធាថៃ និងការធ្វើឱ្យវីរៈកងទ័ពរបស់យើងទទួលរងគ្រោះថ្នាក់ផ្សេងៗ ដែលធ្វើឱ្យយើងជាក្រុមគ្រួសារវីរៈកងទ័ពជួបមុខ មានការឈឺចាប់បំផុត។

ដូច្នេះហើយទើបរាជរដ្ឋាភិបាលតែងតែណែនាំដល់អាជ្ញាធរគ្រប់លំដាប់ថ្នាក់ ត្រូវយកចិត្តទុកដាក់ចំពោះសុខទុក្ខរបស់គ្រួសារកងទ័ពជួរមុខនៅក្នុងមូលដ្ឋានរបស់ខ្លួន ដើម្បីឱ្យវីរៈកងទ័ពរបស់យើងដែលកំពុងឈរជើងការពារបូរណភាពទឹកដី នៅតាមខ្សែបន្ទាត់ព្រំដែនមានអារម្មណ៍ស្ងប់ ព្រោះថាក្រុមគ្រួសាររបស់គាត់ត្រូវបានយកចិត្តទុកដាក់ មើលការខុសត្រូវ និងមិនបោះបង់ពួកគាត់ចោលឡើយ នោះធ្វើអោយស្មារតីក្នុងការការពារបូរណភាពទឹកដីរបស់យើង កាន់តែអង់អាចក្លាហាន មោះមុត ក្នុងការការពារបូរណភាពទឹកដី។

ជាមួយគ្នានេះដែរឯកឧត្តម គួច ចំរើន អភិបាលខេត្តកណ្ដាល បាននាំនូវការផ្ដាំផ្ញើ សាកសួរសុខទុក្ខ ពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចគតិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដោយក្ដីនឹករលឹកបំផុត។

ក្នុងឱកាសនោះដែរ លោកអភិបាលខេត្តកណ្ដាល ក៏បានជម្រាបជូនដល់ក្រុមគ្រួសារវីរៈកងទ័ពជួរមុខ នៅពេលជួបបញ្ហាប្រឈម សំណូមពរ សូមរាយការណ៍ជូនអាជ្ញាធរដែលនៅជិតបំផុត ដើម្បីពួកគាត់ជួយសម្របសម្រួល និងដោះស្រាយបានទាន់ពេលវេលា ហើយក៏សូមឱ្យមានទំនាក់ទំនងល្អជាមួយអាជ្ញាធរដែលនៅជិតខ្លួន ដើម្បីមានភាពងាយស្រួលក្នុងការផ្ដល់ព័ត៌មាន ឬតម្រូវការចាំបាច់ណាមួយដែលបងប្អូនត្រូវការ ដើម្បីឱ្យពួកគាត់បានជួយផ្ដល់សេវាឱ្យបានលឿន រហ័ស និងប្រកបដោយការទទួលខុសត្រូវខ្ពស់៕ដោយ៖ អុឹងម៉េង

The post អភិបាលខេត្តកណ្ដាល ជួបសំណេះសំណាលជាមួយក្រុមគ្រួសារវីរៈកងទ័ពជួរមុខ នៅសាលាស្រុកកៀនស្វាយ appeared first on Kampuchea Thmey Daily.

ក្នុងឱកាសនោះ លោកអភិបាលខណ្ឌ បានពាំនាំនូវការផ្តាំផ្ញើសាកសួរសុខទុក្ខ និងការយកចិត្តទុកដាក់គួររំលឹកថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត និងសម្តេចតេជោ ហ៊ុន សែន ក៏ដូចជាថ្នាក់ដឹកនាំរាជធានីភ្នំពេញ ។ បានកំណត់យ៉ាងច្បាស់ថា មិនទុកចោលគ្រួសារកងទ័ព និងវីរយុទ្ធជនឡើយ ថ្នាក់ដឹកនាំតែងតែគិតគូរខ្ពស់ពីសុខទុក្ខ និងផ្តល់ការឧបត្ថម្ភគាំទ្រយ៉ាងដិតដល់បំផុត។ អាជ្ញាធរគ្រប់លំដាប់ថ្នាក់ ត្រូវបានណែនាំឱ្យយកចិត្តទុកដាក់ជួយទំនុកបម្រុងដល់ក្រុមគ្រួសារកងទ័ពដែលជួបការលំបាក ដើម្បីធានាថាពួកគាត់ទទួលបានការគាំទ្រ និងជំនួយចាំបាច់។

លោក ថេង សុថុល បានកោតសរសើរ និងថ្លែងអំណរគុណចំពោះកងកម្លាំងប្រដាប់អាវុធដែលបានលះបង់កម្លាំងកាយចិត្ត ក្នុងបុព្វហេតុការពារបូរណភាពទឹកដី សន្តិសុខ និងសុខសន្តិភាពជូនប្រជាពលរដ្ឋទូទាំងប្រទេស។

លោក ថេង សុថុល បានមានប្រសាសន៍ថា អាជ្ញាធរមូលដ្ឋានតែងតែយកចិត្តទុកដាក់ចំពោះសុខទុក្ខ និងជីវភាពរស់នៅរបស់គ្រួសារកងទ័ព ក៏ដូចជាប្រជាពលរដ្ឋដែលជួបការលំបាកក្នុងជីវភាពប្រចាំថ្ងៃ ដោយចាត់ទុកថា ការជួយឧបត្ថម្ភ និងលើកទឹកចិត្តដល់ពួកគាត់ គឺជាការចូលរួមចំណែកដ៏មានសារៈសំខាន់ក្នុងការពង្រឹងសាមគ្គីភាព និងស្មារតីដឹងគុណចំពោះ ពួកគាត់ដែលបានបម្រើជាតិមាតុភូមិ។

អំណោយដែលបានផ្តល់ជូននាពេលនោះ រួមមានស្បៀងអាហារ និងគ្រឿងឧបភោគបរិភោគ ថវិការមួយចំនួន ដើម្បីជួយសម្រាលការលំបាកក្នុងជីវភាពរស់នៅប្រចាំថ្ងៃ។

ជាការឆ្លើយតប ក្រុមគ្រួសារវីរកងទ័ពទទួលអំណោយបានសម្តែងនូវក្តីរំភើប និងថ្លែងអំណរគុណចំពោះការយកចិត្តទុកដាក់ពីសំណាក់អាជ្ញាធរខណ្ឌ ដែលតែងតែគិតគូរ និងចុះជួយដល់ប្រជាពលរដ្ឋជាប្រចាំ ជាពិសេសក្នុងគ្រាដែលពួកគាត់កំពុងជួបការលំបាកផ្នែកជីវភាព៕ អត្ថបទ ៖សំណាង

The post អាជ្ញាធរថ្នាក់មូលដ្ឋាន បន្តយកចិត្តទុកដាក់ដល់គ្រួសារវីរកងទ័ព គឺជាស្មារតីដឹងគុណដែលបានបម្រើជាតិមាតុភូមិ appeared first on Kampuchea Thmey Daily.

ក្នុងកិច្ចប្រជុំធ្វើបច្ចុប្បន្នភាពចំពោះជនបរទេសស្នាក់នៅក្នុងភូមិសាស្ត្រស្រុកអង្គរធំ និងការផ្ដល់សេវាសុខភាពជូនគ្រួសារវីរកងទ័ព កាលពីថ្ងៃទី ២ ខែឧសភា ឆ្នាំ ២០២៦ នៅស្រុកអង្គរធំ ខេត្តសៀមរាប លោក ម៉ក់ សីហា និង លោក គង្គ ប៊ុនធឿន អនុប្រធានក្រុមការងាររាជរដ្ឋាភិបាលចុះមូលដ្ឋានស្រុក បានណែនាំដល់អាជ្ញាធរ កងកម្លាំងប្រដាប់អាវុធ ត្រូវបន្តយកចិត្តទុកដាក់ក្នុងការជួយឧបត្ថម្ភគាំទ្រដល់វីរកងទ័ព និងគ្រួសារវីរកងទ័ព ដើម្បីជាការតបស្នងសងគុណដល់ពួកគាត់ ក្នុងកិច្ចការពារបូរណភាពទឹកដី។ ត្រូវផ្សារភ្ជាប់ទំនាក់ទំនងជាប់ជាប្រចាំជាមួយក្រុមគ្រួសារវីរកងទ័ព និងជនភៀសសឹក ស្វែងយល់ពីសុខទុក្ខ ជីវភាពប្រចាំថ្ងៃ និងការងារមុខរបររបស់ពួកគាត់ គ្រប់មណ្ឌលសុខភាព នៃឃុំទាំងបួន និងត្រូវផ្ដល់អាទិភាពពិសេសដល់ក្រុមគ្រួសារវីរកងទ័ពជួរមុខក្នុងការពិនិត្យព្យាបាលជំងឺផ្សេងៗ។

លោកទាំងពីរ ក៏បានណែនាំដល់ រដ្ឋបាលឃុំ មេភូមិ និងម្ចាស់ទីតាំងដែលជួលឱ្យជនបរទេសនៅក្នុងភូមិសាស្ត្ររបស់ខ្លួន ត្រូវពិនិត្យ និងអនុវត្តឱ្យស្របទៅតាមច្បាប់ នៃព្រះរាជាណាចក្រកម្ពុជា ក្នុងន័យធ្វើយ៉ាងណាត្រូវក្ដាប់ឱ្យបានបទល្មើសឆបោកតាមប្រព័ន្ធបច្ចេកវិទ្យា ដែលធ្វើឱ្យប៉ះពាល់ដល់វិស័យទេសចរណ៍ និងអ្នកវិនិយោគ ដោយខេត្តសៀមរាប ជាគោលដៅរបស់ភ្ញៀវទេសចរជាតិ-អន្តរជាតិ ចូលមកទស្សនាកម្សាន្ត និងអ្នកវិនិយោគចូលមកបណ្ដាក់ទុនទៅលើគ្រប់វិស័យ។ ផ្ដើមចេញពីការប្ដេជ្ញាចិត្តរបស់រាជរដ្ឋាភិបាល ក្រសួង-ស្ថាប័ន ពាក់ព័ន្ធ រដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ចនានា បានចូលរួមយ៉ាងសកម្មក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ព្រមទាំងធ្វើឱ្យបទល្មើសនេះត្រូវបានកាត់បន្ថយ និងលុបបំបាត់ចេញពីក្នុងភូមិសាស្ត្រសំខាន់ៗ ជាច្រើន ដែលធ្វើឱ្យសន្តិសុខក្នុងសង្គមកម្ពុជាទាំងមូលមានភាពល្អប្រសើរ។

លោកទាំងពីរ សង្កត់ធ្ងន់ថា អាជ្ញាធរមូលដ្ឋាន និងសមត្ថកិច្ច ត្រូវបន្តធ្វើការផ្សព្វផ្សាយឱ្យបានកាន់តែស៊ីជម្រៅទៅដល់ប្រជាពលរដ្ឋអំពីកលល្បិចការឆបោកតាមប្រព័ន្ធបច្ចេកវិទ្យា និងបន្តអនុវត្តឱ្យបានផុលផុសថែមទៀត ទៅតាមច្បាប់ស្ដីពីការប្រឆាំងការឆបោកតាមប្រព័ន្ធបច្ចេកវិទ្យា ដែលរាជរដ្ឋាភិបាលបានប្រកាសដាក់ឱ្យប្រើប្រាស់ កាលពីថ្ងៃទី ៦ ខែមេសា ឆ្នាំ ២០២៦ ឱ្យមានប្រសិទ្ធភាពខ្ពស់ សំខាន់លើការអប់រំប្រជាពលរដ្ឋ និងស្រទាប់យុវជន និងធ្វើការស្រាវជ្រាវកំណត់មុខសញ្ញាបទល្មើសឆបោកតាមប្រព័ន្ធបច្ចេកវិទ្យាដែលនៅសេសសល់ និងអ្នកមានការពាក់ព័ន្ធ ដើម្បីយកមកធ្វើការផ្ដន្ទាទោសតាមច្បាប់។

លោកទាំងពីរ ក៏បានវាយតម្លៃខ្ពស់ពីសកម្មភាពរបស់កងកម្លាំងសមត្ថកិច្ចដែលធ្វើការបង្ក្រាបបានទាន់ពេលវេលាចំពោះក្រុមជនជាតិចិនដែលរត់គេចខ្លួនពីសមត្ថកិច្ច ក្នុងការបោសសម្អាតការឆបោកតាមប្រព័ន្ធបច្ចេកវិទ្យា ចូលមកក្នុងភូមិសាស្ត្រស្រុកអង្គរធំ ដើម្បីធានាសន្តិសុខ សុវត្ថិភាព ជូនប្រជាពលរដ្ឋ ភ្ញៀវទេសចរជាតិ-អន្តរជាតិ ដែលមកកម្សាន្ត និងស្នាក់នៅក្នុងខេត្តសៀមរាប៕
អត្ថបទ ៖ គឿនវេត

The post ក្រុមការងារចុះមូលដ្ឋានស្រុកអង្គរធំ ជំរុញអ្នកពាក់ព័ន្ធ ត្រូវតាមដានលើបញ្ហា Online Scams និងបន្តយកចិត្តទុកដាក់លើសុខភាពគ្រួសារកងទ័ពជួរមុខ appeared first on Kampuchea Thmey Daily.

បើតាមសំណេររបស់អភិបាលខេត្តឧត្តរមានជ័យ បានឱ្យដឹងថា ក្រុមការងារបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទ បានប្រមូលកសិផលដែលបានដាំដុះក្នុងមូលដ្ឋាន ដើម្បីយកទៅចែកជូនដល់ប្រជាពលរដ្ឋ និងសិស្សានុសិស្សក្នុងជំរំសុវត្ថិភាព និងកងទ័ពវរៈ២៥២ កងពលតូចអន្តរាគមន៍លេខ៥ កងពលធំលេខ២ ដែកកំពុងបំពេញភារកិច្ចការពារបូរណភាពទឹកដី នៅទិសប្រាសាទតាក្របី ចំនួន ១,០៥០គីឡូក្រាម និងស៊ុតទាចំនួន ១,៦២០គ្រាប់។

លោក មាន ចាន់យ៉ាដា បញ្ជាក់ថា ការប្រមូលផលបន្លែក្នុងមូលដ្ឋាន និងការចែកស្បៀងជូនកងទ័ព និងពលរដ្ឋនៅជំរំសុវត្ថិភាពធ្វើឡើងចំនួន ២២លើករួចមកហើយ ពោល សរុបបានចំនួន ២២,២១០គីឡូក្រាម។ លោកសង្កត់ធ្ងន់ថា ទាំងនេះគឺជាកិច្ចខិតខំរបស់រដ្ឋបាលខេត្ត និងមន្ទីរជំនាញ ដើម្បីជំរុញវិស័យកសិកម្មក្នុងស្រុកឱ្យក្លាយជាបង្អែកស្បៀងដ៏សំខាន់ក្នុងការជួយដល់កងទ័ពជួរមុខ រួមទាំងពលរដ្ឋនៅជំរំសុវត្ថិភាព៕

The post កសិផលក្នុងមូលដ្ឋាននៅខេត្តឧត្តរមានជ័យ បន្តផ្គត់ផ្គង់យ៉ាងសកម្មជូនកងទ័ព និងពលរដ្ឋភៀសសឹក appeared first on Kampuchea Thmey Daily.

ក្នុងសារសរសេរជូនកងកម្លាំងនៅជួរមុខ លោកជំទាវ ពេជ ចន្ទមុន្នី ហ៊ុនម៉ាណែត បានសរសេរដូច្នេះ៖«ជូនចំពោះបងៗ និងប្អូនៗកងទ័ព និងប៉ូលិសនៅជួរមុខ។ ជាដំបូងបងសូមអរគុណដល់បងៗ និងប្អូនៗទាំងអស់ ដែលបានលះបង់ ចាកឆ្ងាយពីក្រុមគ្រួសារ ដើម្បីការពារប្រជាពលរដ្ឋ ការពារទឹកដី និងប្រទេសមួយនេះ។ អរគុណចំពោះការលះបង់គ្រប់យ៉ាង យកជីវិតឈរពាំងការពារពួកយើងដែលនៅជួរក្រោយ។ បងសូមផ្ញើការនឹករលឹក ការស្រឡាញ់ដល់បងប្អូន ដែលនៅជួរមុខទាំងអស់។ មានពាក្យពេចន៍ជាច្រើន ដែលបងស្រីម្នាក់នេះ ចង់អរគុណដល់បងប្អូនទាំងអស់គ្នា។ បងសង្ឃឹមថា ពេលដែលប្រទេសយើងមានសុខសន្តិភាពវិញ បងប្អូនត្រឡប់មកជួបជុំគ្រួសារវិញ។ យើងអាចនឹងជួបគ្នា ហើយពាក្យពេចន៍ទាំងនោះ បងអាចប្រាប់បងប្អូនដោយផ្ទាល់។ សូមឱ្យទេវតាឆ្នាំថ្មី តាមថែរក្សាបងប្អូនឱ្យមានសុវត្ថិភាព ឆាប់បានត្រឡប់មកជួបជុំគ្រួសារវិញ។»។

សាររបស់លោកជំទាវស្រ្តីទីមួយ បានទៅដល់របស់កងកម្លាំងដែលឈរជើងនៅជួរមុខហើយ នៅថ្ងៃទី៩ ខែមេសា នេះ។ យោធិនដែលឈរជើងនៅទិសព្រះវិហារ ឈ្មោះ វី រស្មី ឱ្យដឹងតាមរយៈគណនីហ្វេសប៊ុក ថា  លោកបានទទួលសំបុត្រពីលោកជំទាវ ពេជ ចន្ទមុន្នី ដែល​​ជា​សារ​ដ៏​មាន​អត្ថន័យ​​ ​​​​​នឹក​រឭក​ និង​ពាក្យ​ពេចន៍​ជូនពរដល់​កងកម្លាំង​ទាំង​អស់​គ្នា​​។ យោធិនរូបនេះ អះអាងថា បន្ទាប់ពីអានសាររបស់លោកជំទាវបណ្ឌិត ពេជ ចន្ទមុន្នី ហើយលោករំភើប​ ក្តុកក្តួល​ខ្លាំង​ណាស់។

យោធិន វី រស្មី បាន​អរគុណ​ និង​គោរព​ជូនពរលោកជំទាវ ពេជ ចន្ទមុន្នី និង​សម្តេច ហ៊ុន ម៉ាណែត ​ ព្រម​ទាំង​ក្រុម​គ្រួសារ​ និង​ក្រុមការងារ​ទាំងអស់​ ឱ្យជួបតែ​សុខ​សុវត្ថិភាព​គ្រប់ពេលវេលា និង​ពរ​ទាំង​អស់​បួន​ប្រការ​ អាយុ​ វណ្ណៈ​ សុខៈពលៈ​។

យោធិនរូបនេះ បានផ្ដាំផ្ញើមកកាន់ពលរដ្ឋកម្ពុជា ដែលនៅជួរក្រោយថា ៖«កុំបារម្មណ៍អី ជួរមុខនឹងការពារបងប្អូនគ្រប់ៗគ្នា។»៕

ដោយ៖ ង៉ិល ណារ៉ាត់

The post ភរិយាសម្ដេច ហ៊ុន ម៉ាណែត អរគុណយោធិនដែលលះបង់គ្រប់យ៉ាង យកជីវិតពាំងការពារអ្នកនៅជួរក្រោយ និងសង្ឃឹមថាពេលមានសន្តិភាព កងកម្លាំងត្រឡប់មកជួបជុំគ្រួសារវិញ appeared first on Kampuchea Thmey Daily.

ក្នុងការចែកជូននេះ បានផ្តល់ជូនដល់ក្រុមគ្រួសារកងទ័ពចំនួន ១៦ គ្រួសារ វីរកងទ័ព ៦៣ នាក់ និងសិស្សានុសិស្សជាកូនៗ របស់កងទ័ព ចំនួន ១៦ នាក់ ដើម្បីជួយសម្រាលបន្ទុកជីវភាព និងលើកទឹកចិត្តដល់កងកម្លាំងជួរមុខ។

ក្នុងឱកាសនោះផងដែរ លោក ហៃ វណ្ណា បានពាំនាំការសាកសួរសុខទុក្ខពី សម្ដេចតេជោ ហ៊ុន សែន ជូនដល់ក្រុមគ្រួសារកងទ័ព និងសិស្សានុសិស្ស ដោយបញ្ជាក់ពីការយកចិត្តទុកដាក់ និងការគាំទ្រយ៉ាងជ្រាលជ្រៅពីសំណាក់ថ្នាក់ដឹកនាំ ចំពោះកងទ័ពជួរមុខ និងគ្រួសាររបស់ពួកគាត់។

លោក ហៃ វណ្ណា បញ្ជាក់ថា សន្តិភាព និងស្ថិរភាពដែលប្រទេសជាតិទទួលបានសព្វថ្ងៃ គឺកើតចេញពីការខិតខំប្រឹងប្រែង និងការលះបង់យ៉ាងអស្ចារ្យរបស់វីរកងទ័ព ក្នុងការការពារអធិបតេយ្យភាព និងបូរណភាពទឹកដីកម្ពុជា។

ជាមួយគ្នានេះ លោកក៏បានថ្លែងអំណរគុណយ៉ាងជ្រាលជ្រៅចំពោះ លោកវីរសេនីយ៍ឯក ម៉ៅ សុវណ្ណ បញ្ជាការរង និងជានាយសេនាធិការ តំបន់ប្រតិបត្តិការសឹករងព្រះវិហារ តំណាង លោកឧត្តមសេនីយ៍ទោ ច័ន្ទ សុភ័ក្ត្រា មេបញ្ជាការតំបន់ប្រតិបត្តិការសឹករងព្រះវិហារ និងក្រុមការងារ ដែលបានជួយសម្របសម្រួល និងគាំទ្រការអនុវត្តបេសកកម្មនេះឲ្យប្រព្រឹត្តទៅដោយជោគជ័យ។

ជាចុងក្រោយ លោកបានថ្លែងអំណរគុណដល់សប្បុរសជនទាំងក្នុង និងក្រៅប្រទេស ដែលបានចូលរួមឧបត្ថម្ភធនធាន និងសម្ភារៈផ្សេងៗ តាមរយៈសមាគម ដើម្បីរួមចំណែកគាំទ្រដល់កងទ័ព និងសហគមន៍នៅតំបន់ជួរមុខ៕

The post ទីប្រឹក្សាសម្ដេចតេជោ ដឹកនាំក្រុមការងារមកពីជប៉ុន នាំយកអំណោយចែកជូនក្រុមគ្រួសារកងទ័ព និងវីរកងទ័ព នៅតំបន់ប្រតិបត្តិការខេត្តព្រះវិហារ appeared first on Kampuchea Thmey Daily.

តាមសេចក្តីអំពាវនាវរបស់រដ្ឋបាលរាជធានីភ្នំពេញបានឱ្យដឹងថា៖ រដ្ឋបាលរាជធានីភ្នំពេញ សូមជម្រាបជូនឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ អស់លោក លោកស្រី ជាពាណិជ្ជករ សិប្បករ វិនិយោគិន និងសប្បុរសជន លោក លោកស្រី អភិបាលខណ្ឌ ប្រធានមន្ទីរ អង្គភាពជុំវិញសាលារាជធានីភ្នំពេញមេត្តាជ្រាបថា៖ នៅចុងខែមីនា ឬដើមខែមេសា ឆ្នាំ២០២៦ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ខាងមុខនេះ រដ្ឋបាលរាជធានីភ្នំពេញ នឹងនាំយកអំណោយជាថវិកា ស្បៀងអាហារ និងសម្ភារប្រើប្រាស់ផ្សេងៗ ជូនដល់កងយោធពលខេមរភូមិន្ទ ដែលជាសម្ព័ន្ធមេត្រីភាពជាមួយ រដ្ឋបាលរាជធានីភ្នំពេញរួមមាន កងពលធំអន្តរាគមន៍លេខ៣ កងពលតូចអន្តរាគមន៍លេខ៩ វរនគរបាល ការពារព្រំដែនលេខ៧៩៣ ឈរជើងការពារនៅខ្សែក្រវាត់ព្រំដែន ប្រចាំទិសប្រាសាទព្រះវិហារ និងកងពលតូច អន្តរាគមន៍លេខ១២៨ ឈរជើងការពារនៅតំបន់អូរអាឡៃ ស្រុកសៀមប៉ាង ខេត្តស្ទឹងត្រែង។

ដើម្បីជាការលើកទឹកចិត្ត និងផ្សារភ្ជាប់នូវមនោសញ្ចេតនាដ៏ជ្រាលជ្រៅ រវាងសមរភូមិជួរក្រោយ និងវីរ យុទ្ធជនតាមបន្ទាត់ព្រំដែនជួរមុខ រដ្ឋបាលរាជធានីភ្នំពេញ សូមអំពាវនាវ ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ អស់លោក លោកស្រី ជាពាណិជ្ជករ សិប្បករ វិនិយោគិន និងសប្បុរសជន លោក លោកស្រី អភិបាលខណ្ឌ ប្រធានមន្ទីរ អង្គភាពចំណុះទាំងអស់ មេត្តាចូលរួមបរិច្ចាគអំណោយជាថវិកា ស្បៀងអាហារ ឬ សម្ភារប្រើប្រាស់ផ្សេងៗ តាមលទ្ធភាពនិងសទ្ធាជ្រះថ្លា ដើម្បីរួមចំណែកកសាងហេដ្ឋារចនាសម្ព័ន្ធយុទ្ធសាស្ត្រ រយៈពេលវែងនៅតាមបន្ទាត់ព្រំដែនជួរមុខ ក្នុងបុព្វហេតុការពារបូរណភាពទឹកដីពីសត្រូវឈ្លានពាន និងការ អភិវឌ្ឍន៍ តាមបន្ទាត់ព្រំដែន។

រដ្ឋបាលរាជធានីភ្នំពេញ សង្ឃឹមជឿជាក់លើស្មារតី និងទឹកចិត្តសប្បុរសធម៌ របស់ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោកជំទាវ អស់លោក លោកស្រី ដែលជាវប្បធម៌ នៃការចែករំលែកក្នុងស្មារតីភាតរភាពរបស់ ប្រជាជាតិយើង។

អំណោយទាំងអស់ សូមមេត្តាយកមកប្រគល់ជូននៅទីចាត់ការហិរញ្ញវត្ថុ សាលារាជធានីភ្នំពេញ រៀងរាល់ ម៉ោងធ្វើការ ទូរស័ព្ទលេខ ០៦១ ៧៩៩ ៩៩៧ / ០១៧ ៨៦៧ ៨៧២ ឬបង្វែរតាមគណនីធនាគារ ABAរបស់ រដ្ឋបាលរាជធានីភ្នំពេញ៖ PHNOM PENH CAPITAL HALL លេខ៖ 599 778 899 (KHR) និងលេខ៖ 399 778 899 (USD)៕

ដោយ ៖ ស្រីរ័ត្ន

The post ដើមខែមេសានេះរដ្ឋបាលរាជធានីនឹងនាំអំណោយទៅជូនកងយោធពលខេមរភូមិន្ទឈរជើងការពារខ្សែក្រវាត់ព្រំដែន appeared first on Kampuchea Thmey Daily.

លោក ជ្រុន ថេរ៉ាវ៉ាត បានពាំនាំប្រសាសន៍សួរសុខទុក្ខដ៍មានតម្លៃពី សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន រួមទាំងសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់ដល់កម្លាំងជួរមុខទិសឧត្ដរមានជ័យ។

លោក ជ្រុន ថេរ៉ាវ៉ាត បានបន្តថា ការឈ្លានពានពីសំណាក់យោធាថៃដោយខុសច្បាប់លើអធិបតេយ្យភាពរបស់កម្ពុជា បានបង្ហាញយ៉ាងច្បាស់នូវគំរូវីរភាពដ៏អង់អាចក្លាហានរបស់វីរៈកងទ័ពកម្ពុជា ជាពិសេសវីរៈកងទ័ពជួរមុខ ដែលបានបំពេញភារកិច្ចការពារជាតិយ៉ាងមុតមាំ ធ្វើឱ្យសត្រូវមានការភ័យខ្លាច។ ក្នុងពេលជាមួយគ្នានេះ ប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានបង្ហាញការគាំទ្រ និងជឿជាក់យ៉ាងពេញទំហឹងលើសមត្ថភាព បទពិសោធន៍ និងឆន្ទៈស្នេហាជាតិដ៏មោះមុតរបស់វីរៈកងទ័ពកម្ពុជា។ ជាមួយគ្នានេះ ប្រជាពលរដ្ឋបានរួបរួមសាមគ្គីគ្នា ពង្រឹងខឿនការពារជាតិរបស់ប្រជាជន និងគាំទ្ររាជរដ្ឋាភិបាល ដឹកនាំដោយសម្ដេចធិបតី ព្រមទាំងបានចូលរួមផ្ដល់ស្បៀងអាហារ សម្ភារ និងថវិកាជាច្រើន ដើម្បីជួយគាំទ្រវីរៈកងទ័ពជួរមុខ និងប្រជាពលរដ្ឋដែលភៀសខ្លួនពីសង្គ្រាម។

លោក ជ្រុន ថេរ៉ាវ៉ាត សំដែងនូវការអរគុណ ដឹងគុណ និងចងចាំជានិច្ចក្នុងក្រអៅបេះដូង ង់អាចក្លាហានរបស់វីរកងទ័ពកម្ពុជាដែលបានតស៊ូ ក្រាញននៀល ប្តេជ្ញា ក្នុងការការពារអធិបតេយ្យភាព បូរណភាពទឹកដី ប្រកបដោយឆន្ទៈមោះមុត និងហ៊ានពលីកម្មគ្រប់បែបយ៉ាងដើម្បីជាតិ មាតុភូមិ និងប្រជាជនកម្ពុជា និងសូមលំឱនកាយ គោរពចំពោះដួងវិញាណក្ខន្ធរបស់វីរៈកងទ័ពកម្ពុជា ដែលបានបូជាសាច់ស្រស់ ឈាមស្រស់ និងអាយុជីវិត ដើម្បីការពារបូរណភាពទឹកដី និងអាយុជីវិតរបស់ប្រជាជនកម្ពុជា និងសូមឲ្យដួង វិញ្ញាណក្ខន្ធរបស់វីរៈកងទ័ពទាំងអស់ បានទៅកាន់សុគតិភពកុំបីឃ្លៀងឃ្លាតឡើយ។

លោក ជ្រុន ថេរ៉ាវ៉ាត បានបញ្ជាក់ទៀតថា រាជរដ្ឋាភិបាលដែលដឹកនាំដោយសម្ដេចបវរធិបតី នាយករដ្ឋមន្ត្រី នឹងមិនរត់ចោលប្រទេស វីរៈកងទ័ព និងបងប្អូនប្រជាពលរដ្ឋភៀសសឹកណាម្នាក់ចោលឡើយពោលគឺនៅជាមួយប្រជាជនគ្រប់កាលៈទេសៈ និងតែងតែគិតគួរជាប់ជានិច្ច ហើយរាជរដ្ឋាភិបាល ក៏បាននិងកំពុងជួយសម្របសម្រួលឱ្យជនភៀសសឹកបានទៅផ្ទះសំបែងវិញ ការជួយដោះស្រាយហេដ្ឋារចនាសម្ព័ន្ធគាំទ្រដល់ការរស់នៅ ការជួយបោសសម្អាតអាវុធគ្រាប់យុទ្ធភ័ណ្ឌមិនទាន់ផ្ទុះ និងការស្តារជីវភាពរស់នៅប្រចាំថ្ងៃជាដើម។ ដូច្នេះបងប្អូនត្រូវតែជឿជាក់លើការដឹកនាំរបស់រាជរដ្ឋាភិបាល និងគណបក្សប្រជាជនកម្ពុជា។សូមបញ្ជាក់ផងដែរថា ស្បៀងដែលប្រគល់ជូនកម្លាំងជួរមុខនេះ រួមមាន៖ អង្ករ៖ ៩,២តោន, ត្រីខកំប៉ុង៖ ២២០កេស, សៀងផ្អែម៖ ១៤៨កេស, មីខ្លាឃ្មុំ៖ ៨៥០កេស, មីចម្រុះកញ្ចប់៖ ៥៥០កេស, មីសួរចម្រុះចាន៖ ៧០កេស, បាយតេជោរាយស៍៖ ៤៦កេស, នំសាគូរ៉ា៖ ២០កេស, ទឹកសុទ្ធ 350ml៖ ៣២០កេស៕

The post ស្បៀងជាអំណោយរបស់សម្ដេចធិបតី និងលោកជំទាវបណ្ឌិត ត្រូវបានប្រគល់ជូនដល់កម្លាំងជួរមុខទិសឧត្ដរមានជ័យ appeared first on Kampuchea Thmey Daily.