កម្មការិនី Archives - Kampuchea Thmey Daily

ព្រឹកនេះ កម្មករ-កម្មការិនីរោងចក្រ ហេន ៧ ហ្គាម៉ិន បានចូលធ្វើការជាធម្មតាវិញ

អ៊ិន ពិសី — Thu, 12 Mar 2026 03:49:40 +0000

នាព្រឹកថ្ងៃទី ១២ ខែមីនា ឆ្នាំ ២០២៦ នេះ កម្មករ-កម្មការិនី នៃរោងចក្រ ហេន ៧ ហ្គាម៉ិន ដែលមានទីតាំងស្ថិតនៅតាមបណ្តោយផ្លូវជាតិលេខ ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ បានចូលបម្រើការងារជាធម្មតាវិញហើយ បន្ទាប់ពី ក្រសួងការងារ និងបណ្ដុះបណ្ដាលវិជ្ជាជីវៈ ដោះស្រាយបញ្ចប់ការទាមទាររបស់ពួកគាត់ចប់សព្វគ្រប់ កាលពីថ្ងៃម្សិលមិញ។

លោក ស៊ុន មេសា អ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ ឲ្យដឹងថា «នៅព្រឹកថ្ងៃទី ១២ ខែមីនា ឆ្នាំ ២០២៦ នេះ បងប្អូនកម្មករ-កម្មការិនី នៃរោងចក្រ ហេន ៧ ហ្គាម៉ិន បានចូលបម្រើការងារជាធម្មតាវិញហើយ បន្ទាប់ពីមន្ត្រីជាន់ខ្ពស់ក្រសួងការងារ បានដោះស្រាយករណីទាមទាររបស់ពួកគាត់ចប់សព្វគ្រប់ និងយ៉ាងលឿនរហ័ស ក្រោមការយកចិត្តទុកដាក់ខ្ពស់»។

អ្នកនាំពាក្យដដែលរូបនេះ បានអះអាងថា រាល់បញ្ហានានារបស់ កម្មករ-និយោជិត មិនថាតែក្នុងវិស័យកាត់ដេរ ឬវិស័យផ្សេងទៀតនោះទេ គឺ ក្រសួងការងារ តែងតែយកចិត្តទុកដាក់ដោះស្រាយដោយលឿនរហ័ស និងប្រកបដោយប្រសិទ្ធភាព ដោយមិនព្រងើយកន្តើយនោះឡើយ។ បន្ថែមពីនេះ កម្មករ-និយោជិត ទាំងអស់ អាចប្តឹង ឬផ្តល់ដំណឹងមកលេខHotline “១២៨៦” ដើម្បីឲ្យមន្ត្រីជំនាញរបស់ក្រសួងដោះស្រាយបញ្ហាជូន៕

វីដេអូ ៖ កម្មករ-កម្មការិនីរោងចក្រ ហេន ៧ ហ្គាម៉ិន បានចូលធ្វើការជាធម្មតាវិញ

The post ព្រឹកនេះ កម្មករ-កម្មការិនីរោងចក្រ ហេន ៧ ហ្គាម៉ិន បានចូលធ្វើការជាធម្មតាវិញ appeared first on Kampuchea Thmey Daily.

អ្នកនាំពាក្យ៖ ក្រសួងការងារ បានដោះស្រាយដោយយកចិត្តទុកដាក់ករណីដួលសន្លប់ និងមរណភាពកម្មការិនីនៅខេត្តកណ្តាល

Ken Malis — Sat, 28 Feb 2026 07:22:16 +0000

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២៨ ខែកុម្ភៈនេះ បានគូសបញ្ជាក់ពីការយកចិត្តទុកដាក់ខ្ពស់របស់ក្រសួងការងារ និងបណ្តុះបណ្តាលវិជ្ជាជីវៈក្នុងនាមជាអណាព្យាបាលចំពោះករណីដួលសន្លប់កម្មករ ២០រូប និងមរណភាព ១រូប នៃរោងចក្រខេមបូ យូនីសូលក្នុងស្រុកខ្សាច់កណ្តាល ខេត្តកណ្តាល។

លោក ស៊ុន មេសា ថា «ក្រសួងសូមចូលរួមសោកស្តាយ និងរំលែកទុក្ខយ៉ាងក្រៀមក្រំចំពោះមរណភាពនៃកម្មការិនី យឹម រីន ដែលបានទទួលមរណភាព។ ជាមួយគ្នានេះ ខ្ញុំសូមជម្រាបថា ភ្លាមៗក្រោយទទួលបានដំណឹងចំពោះការដួលសន្លប់ភ្លាម មន្ត្រីជំនាញរបស់ក្រសួងការងារ និងបណ្តុះបណ្តាលវិជ្ជាជីវៈ បានចុះពិនិត្យភ្លាមៗទីតាំងរោងចក្រ និងពិនិត្យមើលបញ្ហានេះយ៉ាងយកចិត្តទុកដាក់បំផុត»។

អ្នកពាក្យរូបនេះ បានពន្យល់ពីដើមហេតុដំបូងនៃការសន្លប់ និងការឈាន់ដល់ករណីស្លាប់ ១ករណី ថា ដំបូងនៃគ្រោះថ្នាក់គឺផ្ដើមចេញពីការមើលព័ត៌មានស្តីពីគ្រោះថ្នាក់ចរាចរណ៍ជាមួយកម្មករក្នុងផ្នែកដូចគ្នានៅម៉ោង៧ និង១៥នាទីព្រឹកដែលធ្វើឱ្យកម្មការិនីយឹម រីនមានការតក់ស្លុត និងភិតភ័យដែលធ្វើឱ្យទន់ដៃ ទន់ជើងនិងដួលធ្លាក់ពីតុម៉ាស៊ីនដេរដោយបែកពពុះមាត់ និងបញ្ឈរភ្នែក និងបានបាត់បងជីវិតមុនទៅដល់មន្ទីរពេទ្យ។

ចំពោះករណីនេះ មន្ត្រីជំនាញបញ្ជាក់ថា សម្ពាធឈាមរបស់កម្មការិនី យឹម រីនបានឡើងខ្លាំងដែលធ្វើឱ្យដាច់សរសៃឈាមក្នុងខួរក្បាលដែលបណ្តាលឱ្យបាត់បង់ជីវិត។ ដោយឡែកកម្មករ២០រូបផ្សេងទៀត ឃើញការអការៈរបស់កម្មការិនី យឹម រីន ក៏មានអារម្មណ៍ភិតភ័យសន្លប់តែម្តងប៉ុន្តែជាករណីស្រាលប៉ុណ្ណោះ ហើយបច្ចុប្បន្នបានទៅសម្រាកនៅតាមគេហដ្ឋានរៀងខ្លួនហើយ។

សម្រាប់ករណីមរណភាពរបស់កម្មការិនី យឹម រីន បេឡាជាតិសន្តិសុខសង្គម (ប.ស.ស.)នៃក្រសួងការងារ បានផ្តល់វិភាជន៍បូជាសពចំនួន ១០លានរៀល និងអង្កេតដើម្បីផ្តល់អត្ថប្រយោជន៍ផ្សេងទៀតជូនកម្មករយោងតាមច្បាប់ជាធរមាន។ នេះបើតាមលោកស៊ុន មេសាដដែល។

សូមបញ្ជាក់ថា បច្ចុប្បន្ន សពជនរងគ្រោះ បានកំពុងធ្វើបុណ្យតាមប្រពៃណី នៅភូមិមេលូង ឃុំព្រៃស្នៀត ស្រុកពារាំង ខេត្តព្រៃវែង។

ជាមួយនឹងអន្តរាគមន៍លឿនរហ័ស និងយកចិត្តទុកដាក់ អ្នកនាំពាក្យក្រសួងការងារ លោក ស៊ុន មេសា បានស្នើកុំឱ្យជនឆ្លៀតឱកាសមួយចំនួនប្រើប្រាស់ការស្លាប់ និងសន្លប់របស់កម្មករនៅក្នុងរោងចក្រខេត្តកណ្តាលធ្វើជាអាជីវកម្ម និងប្រជាប្រិយភាពផ្ទាល់ខ្លួន៕

The post អ្នកនាំពាក្យ៖ ក្រសួងការងារ បានដោះស្រាយដោយយកចិត្តទុកដាក់ករណីដួលសន្លប់ និងមរណភាពកម្មការិនីនៅខេត្តកណ្តាល appeared first on Kampuchea Thmey Daily.

ព្រឹកនេះ កម្មករ-កម្មការិនីរោងចក្រ យូ ជា ឆេង ចូលធ្វើការជាធម្មតាវិញ

អ៊ិន ពិសី — Thu, 08 Jan 2026 03:45:29 +0000

នៅព្រឹកថ្ងៃទី ៨ ខែមករា ឆ្នាំ ២០២៦ នេះ កម្មករ-កម្មការិនី នៃរោងចក្រ យូ ជា ឆេង ដែលមានទីតាំងស្ថិតនៅតាមបណ្ដោយផ្លូវជាតិលេខ ៣ ក្នុងស្រុកគងពិសី ខេត្តកំពង់ស្ពឺ បានចូលបម្រើការងារជាធម្មតាវិញហើយ បន្ទាប់ពី ក្រសួងការងារ និងបណ្ដុះបណ្ដាលវិជ្ជាជីវៈ បានដោះស្រាយករណីតវ៉ារបស់ពួកគាត់បញ្ចប់សព្វគ្រប់ កាលពីម្សិលមិញ។

លោក ស៊ុន មេសា អ្នកនាំពាក្យ នៃក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា «នៅព្រឹកថ្ងៃទី ៨ ខែមករា ឆ្នាំ ២០២៦ នេះ បងប្អូនកម្មករ-កម្មការិនី នៃរោងចក្រ យូ ជា ឆេង បានចូលបម្រើការងារជាធម្មតាវិញហើយ បន្ទាប់ពីមន្ត្រីជាន់ខ្ពស់ក្រសួងការងារ បានដោះស្រាយករណីតវ៉ារបស់ពួកគាត់ចប់សព្វគ្រប់ និងយ៉ាងលឿនរហ័ស ក្រោមការយកចិត្តទុកដាក់ខ្ពស់»។

អ្នកនាំពាក្យដដែលរូបនេះ បានអះអាងថា រាល់បញ្ហានានារបស់កម្មករ-និយោជិត មិនថាតែក្នុងវិស័យកាត់ដេរ ឬវិស័យផ្សេងទៀតនោះទេ គឺ ក្រសួងការងារ តែងតែយកចិត្តទុកដាក់ដោះស្រាយដោយលឿនរហ័ស និងប្រកបដោយប្រសិទ្ធភាពដោយមិនព្រងើយកន្តើយនោះឡើយ។ បន្ថែមពីនេះ កម្មករ-និយោជិត ទាំងអស់ អាចប្តឹង ឬផ្តល់ដំណឹងមកលេខ Hotline “១២៨៦” ដើម្បីឱ្យមន្ត្រីជំនាញរបស់ក្រសួងដោះស្រាយបញ្ហាជូន៕

The post ព្រឹកនេះ កម្មករ-កម្មការិនីរោងចក្រ យូ ជា ឆេង ចូលធ្វើការជាធម្មតាវិញ appeared first on Kampuchea Thmey Daily.

អាជ្ញាធរខណ្ឌកំបូល ចុះបាញ់ថ្នាំកម្ចាត់មូស បង្ការជំងឺគ្រុនឈាមនៅតាមបណ្ដាលំនៅឋាន និងបន្ទប់ជួលកម្មករ-កម្មការិនី

អ៊ិន ពិសី — Tue, 05 Aug 2025 01:54:34 +0000

កាលពីល្ងាចថ្ងៃទី ០៤ ខែសីហា ឆ្នាំ ២០២៥ លោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានចាត់ ក្រុមការងារ ធ្វើប្រតិបត្តិការចុះបាញ់ថ្នាំកម្ចាត់មូស ដើម្បីបង្ការ និងទប់ស្កាត់ជំងឺគ្រុនឈាម នៅតំបន់ដែលមានប្រជាជនស្នាក់នៅដូចជា ភូមិប្រទះឡាង និងភូមិភា ក្នុងសង្កាត់កំបូល ខណ្ឌកំបូល រាជធានីភ្នំពេញ។

សកម្មភាពនេះជាការសហការរវាងមន្ត្រីការិយាល័យសង្គមកិច្ច និងសុខុមាលភាពសង្គម , កម្លាំងសន្តិសុខសណ្តាប់ធ្នាប់ខណ្ឌ និងអាជ្ញាធរមូលដ្ឋានសង្កាត់-ភូមិ ដោយបានកំណត់តំបន់គោលដៅសំខាន់ៗ ជាពិសេសតំបន់មានបន្ទប់ជួលសម្រាប់កម្មករ-កម្មការិនី ដែលជាកន្លែងងាយរងគ្រោះចំពោះជំងឺគ្រុនឈាម។

ក្រៅពីការបាញ់ថ្នាំកម្ចាត់មូស ក្រុមការងារ នៅតែបានអនុវត្តការផ្សព្វផ្សាយចំណេះដឹងជាសាធារណៈដល់ប្រជាពលរដ្ឋអំពីវិធានការបង្ការជំងឺគ្រុនឈាម ដូចជា ៖ ការលាងធុងទឹក និងបិទបាំងឲ្យជិតល្អ , ចៀសវាងការរក្សាទុកទឹកក្លាយជាជម្រកមូសបាន និង សម្អាតបរិស្ថានជុំវិញទីកន្លែងស្នាក់នៅជាប្រចាំ។

រដ្ឋបាលខណ្ឌកំបូល បានអំពាវនាវឲ្យប្រជាពលរដ្ឋទាំងអស់រួមចំណែកសកម្មក្នុងការរក្សាអនាម័យបរិស្ថាន និងពង្រឹងការពារផ្ទាល់ខ្លួនជាប្រចាំ ដើម្បីចូលរួមទប់ស្កាត់ការរីករាលដាល នៃជំងឺគ្រុនឈាមដែលអាចបង្កផលប៉ះពាល់ដល់សុខភាពសាធារណៈ និងសុវត្ថិភាពសង្គម៕

អត្ថបទ ៖ សំណាង

The post អាជ្ញាធរខណ្ឌកំបូល ចុះបាញ់ថ្នាំកម្ចាត់មូស បង្ការជំងឺគ្រុនឈាមនៅតាមបណ្ដាលំនៅឋាន និងបន្ទប់ជួលកម្មករ-កម្មការិនី appeared first on Kampuchea Thmey Daily.

ត្រឹមខែឧសភា រាជរដ្ឋាភិបាល ចំណាយថវិកាជាង ៨៥ លានដុល្លារ ជូនកម្មការិនីមានផ្ទៃពោះ និងកូនអាយុក្រោម ២ ឆ្នាំ

អ៊ិន ពិសី — Wed, 04 Jun 2025 06:42:40 +0000

គិតមកត្រឹមខែឧសភា ឆ្នាំ ២០២៥ នេះ រាជរដ្ឋាភិបាល បានចំណាយថវិកាជាង ៨៥ លានដុល្លារ ជូនកម្មការិនីមានផ្ទៃពោះ និងកូនអាយុក្រោម ២ ឆ្នាំ ប្រមាណជាង ១ លាន ៣ សែននាក់។

មានសមាជិក ប.ស.ស ជាស្ត្រីមានផ្ទៃពោះ ទទួលបានប្រាក់ឧបត្ថម្ភរាជរដ្ឋាភិបាល ចំនួន ៦៥០ ៥៨៦ នាក់ និងកូនចំនួន ៦៧៧ ២៩៣ នាក់ គិតជាទឹកប្រាក់ចំណាយសរុបចំនួន ៣៤១ ពាន់ ០៨៩ លានរៀល ឬប្រមាណជាង ៨៥ លានដុល្លារ។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ៤ មិថុនា នេះថា ចាប់ពីអនុវត្តក្នុងឆ្នាំ ២០១៨ រហូតដល់ខែឧសភា ឆ្នាំ ២០២៥ មានសមាជិក ប.ស.ស ទទួលបានប្រាក់ឧបត្ថម្ភរាជរដ្ឋាភិបាល ជាស្ត្រីមានផ្ទៃពោះចំនួន ៦៥០ ៥៨៦ នាក់ និងកូនចំនួន ៦៧៧ ២៩៣ នាក់ គិតជាទឹកប្រាក់ចំណាយសរុបចំនួន ៣៤១ ពាន់ ០៨៩ លានរៀល ឬប្រមាណជាង ៨៥ លានដុល្លារ។

រាជរដ្ឋាភិបាល បានផ្តល់កម្មវិធីឧបត្ថម្ភសាច់ប្រាក់ជូនកម្មករ-និយោជិតស្ត្រីមានផ្ទៃពោះ និងកុមារក្រោមអាយុ ២ ឆ្នាំ ទាំងមុនសម្រាល ពេលសម្រាល និងក្រោយសម្រាល ក្នុងនោះ មុនពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភ ដោយកូន ១ ទទួលបានថវិកា ៨០ ម៉ឺនរៀល កូនភ្លោះ ២ ទទួលបាន ១ លាន ២ សែនរៀល និងកូនភ្លោះ ៣ ទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

លោកបណ្ឌិត បានបន្តទៀតថា ក្រោយពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ១០ លើក ដោយ ១ លើក ទទួលបាន ៨ ម៉ឺនរៀល ក្នុងនោះ ៣ លើក នៅពេលទៅទទួលសេវាពិនិត្យសុខភាព ក្រោយពេលសម្រាលកូន និង ៧ លើកទៀត នៅពេលយកកូនទៅទទួលថ្នាំបង្ការរហូតដល់អាយុ ២ ឆ្នាំ។

លោកបណ្ឌិត ហេង សុផាន់ណារិទ្ធ បានបញ្ជាក់ថា គិតត្រឹមខែឧសភា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ១៣៨ ៨២២ នាក់ ស្រី ១ ៧២៩ ៥៨៨ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥១២ ៨៦៤ នាក់ ស្រី ១៥៣ ៣៦២ នាក់ បុគ្គលស្ថិតក្នុងវិស័យឯកជន ចំនួន ១ ៩១៨ ៧៣៣ នាក់ ស្រី ១ ១៥២ ០៤៤ នាក់ បុគ្គលស្វ័យនិយោជន៍ចំនួន ៥១២ ៤០៥ នាក់ ស្រី ៣១១ ៩២២ នាក់ និងអ្នកក្នុងបន្ទុកសមាជិក ប.ស.ស ចំនួន ១៩៤ ៨២០ នាក់ ស្រី ១១២ ២៦០ នាក់៕

អត្ថបទ ៖ សំអឿន

The post ត្រឹមខែឧសភា រាជរដ្ឋាភិបាល ចំណាយថវិកាជាង ៨៥ លានដុល្លារ ជូនកម្មការិនីមានផ្ទៃពោះ និងកូនអាយុក្រោម ២ ឆ្នាំ appeared first on Kampuchea Thmey Daily.

កម្មករ-កម្មការិនី ត្រូវរាយការណ៍ជាបន្ទាន់បើឃើញក្រុមហ៊ុនរោងចក្រណា មិនចុះបញ្ជីជាមួយ ប.ស.ស

អ៊ិន ពិសី — Fri, 23 May 2025 08:43:43 +0000

បេឡាជាតិសន្តិសុខសង្គម(ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានណែនាំដល់កម្មករ-កម្មការិនី ត្រូវរាយការណ៍មក ប.ស.ស. ឱ្យបានឆាប់បំផុត ប្រសិនបើក្រុមហ៊ុន រោងចក្រ សហគ្រាស គ្រឹះស្ថានដែលពួកគាត់កំពុងបម្រើការងារនោះមិនបានចុះបញ្ជីជាមួយ ប.ស.ស. ទេនោះ ដើម្បីឱ្យក្រសួងមានចាត់វិធានការទៅតាមច្បាប់។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា កម្មករ-កម្មការិនីដែលស្ថិតនៅក្នុងច្បាប់ការងារ ត្រូវទទួលបាន ប.ស.ស ដែលមានចែងនៅក្នុងច្បាប់។ ប៉ុន្តែប្រសិនបើមិនមានទេ ក្រសួងលើកទឹកចិត្តដល់កម្មករ-កម្មការិនីទាំងអស់ ប្តឹងមកក្រសួងតាមរយៈឃ្យូអកូដ(បណ្តឹងអនាមិក) តាមផេកផ្លូវការរបស់ក្រសួង ឬផេករដ្ឋមន្ត្រី ក៏ដូចជាអ្នកនាំពាក្យក្រសួង ដើម្បីចុះធ្វើការងារភ្លាមៗ ព្រោះថាក្រសួងជាសេនាធិការរបស់រាជរដ្ឋាភិបាល ហើយរាជរដ្ឋាភិបាលអាណត្តិទី ៧ នេះ នៅតែបន្តយកចិត្តទុកដាក់ចំពោះកម្មករ ដើម្បីលើកកម្ពស់សុខុមាលភាពពួកគាត់ មិនអនុញ្ញាតឱ្យមានការកេងបន្លំ ឬបង់ ប.ស.ស.ដល់កម្មករកម្មការិនីនោះទេ ព្រោះវាជាកាតព្វកិច្ច។

លោកបានបន្តថា រោងចក្រសហគ្រាស ត្រូវមានកាតព្វកិច្ចចុះបញ្ជីបុគ្គលិក ឬកម្មករ-និយោជិតរបស់ខ្លួនជាមួយ ប.ស.ស. និងបង់ភាគទានជូនពួកគាត់ទៅលើរបបសន្តិសុខសង្គមផងដែរ។ ក្នុងនោះថៅកែ ឬម្ចាស់សហគ្រាស គ្រឹះស្ថាន ត្រូវបង់ភាគទានជូនបុគ្គលិក និងកម្មករ-និយោជិតរបស់ខ្លួនទៅលើផ្នែកថែទាំសុខភាព ផ្នែកហានិភ័យការងារ និងផ្នែកប្រាក់សោធន បង់ ៤ ភាគរយ ក្នុងនោះ ថៅកែ ឬម្ចាស់សហគ្រាស គ្រឹះស្ថានបង់ ២ ភាគរយ និងសាមីខ្លួនផ្ទាល់បង់ ២ ភាគរយ។

លោកបានបន្តទៀតថា «នៅពេលបងប្អូនកម្មករ-និយោជិត បានចុះបញ្ជិកាជាមួយ ប.ស.ស. និងបានបង់ភាគទានប្រចាំខែមក ប.ស.ស. ហើយបានស្នើសុំប័ណ្ណ ប.ស.ស. រួចរាល់ នោះពួកគាត់នឹងមានសិទ្ធិប្រើប្រាស់សេវានៅមន្ទីរពេទ្យដៃគូ ប.ស.ស. ដោយឥតគិតថ្លៃ ដែលជាការជួយកាត់បន្ថយចំណាយរបស់សាមីខ្លួន រួមទាំងទទួលបានអត្ថប្រយោជន៍ផ្សេងៗ ពី ប.ស.ស. ផងដែរ»។

គួរបញ្ជាក់ថា គិតមកត្រឹមខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៦០ ៣៩២ នាក់ ស្រី ១ ៦៨៦ ៨៨៧ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥០៨ ៦៦៩ នាក់ ស្រី ១៥០ ៩០៨ នាក់ បុគ្គលដែលស្ថិតក្នុងវិស័យឯកជន ចំនួន ១ ៨៦៦ ១២២ នាក់ ស្រី ១១២៤ ៨០១ នាក់ បុគ្គលស្វ័យនិយោជន៍ចំនួន ៤៩៨ ៥៤៦ នាក់ ស្រី ៣០៣ ៤១៩ នាក់ និងអ្នកក្នុងបន្ទុក១៨៧ ០៥៥ នាក់ ស្រី ១០៧ ៧៥៩ នាក់៕

អត្ថបទ ៖ សំអឿន

The post កម្មករ-កម្មការិនី ត្រូវរាយការណ៍ជាបន្ទាន់បើឃើញក្រុមហ៊ុនរោងចក្រណា មិនចុះបញ្ជីជាមួយ ប.ស.ស appeared first on Kampuchea Thmey Daily.

កម្មករ-កម្មការិនីរោងចក្រប្រមាណ ២៥០ នាក់ តវ៉ាបិទផ្លូវ ២១៧ ខណ្ឌដង្កោ ដោយសំណូមពរ ៥ ចំណុច

អ៊ិន ពិសី — Tue, 20 May 2025 04:45:31 +0000

នៅវេលាម៉ោង ៧ និង ១៥ នាទីព្រឹក ថ្ងៃទី ២០ ខែឧសភា ឆ្នាំ ២០២៥ នេះ កម្មករ-កម្មការិនីរោងចក្រគល័រស្តារ (កាត់ដេរសម្ភារៈផ្ទះបាយ និងសម្ភារៈការិយាល័យ) បានធ្វើការតវ៉ានៅខាងមុខរោងចក្រ ស្ថិតនៅផ្លូវ ២១៧ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ ដោយសំណូមពរទាមទារចំនួន ៥ ចំណុច។

ហេតុការណ៍តវ៉ានៅខាងមុខរោងចក្រនេះ ដោយសារតែថៅកែរោងចក្រគល័រស្តារ បានផ្លាស់ប្ដូរពីទីតាំងចាស់ទៅទីតាំងថ្មីនៅខេត្តតាកែវវិញ និងមិនទាន់បានបើកប្រាក់ខែចុងក្រោយ ធ្វើឲ្យកម្មករ-កម្មការិនីប្រមាណ ២៥០ នាក់ នាំគ្នាបិទផ្លូវតវ៉ាទាមទារឲ្យមានដំណោះស្រាយជូនពួកគាត់។

ក្នុងការបិទផ្លូវតវ៉ាខាងលើនេះដែរ ក្រុមកម្មករ-កម្មការិនី បានសំណូមពរទាមទារចំនួន ៥ ចំណុច រួមមាន ៖ ទី១/សូមឲ្យរោងចក្រគិតប្រាក់ខែចុងក្រោយ។ ទី២/សូមឲ្យរោងចក្រគិតប្រាក់បំណាច់ឆ្នាំនៅសល់។ ទី៣/សូមឲ្យរោងចក្រគិតប្រាក់អតីតភាពដែលមាន។ ទី៤/សូមរោងចក្រគិតប្រាក់ការជូនដំណឹង(រោងចក្របានជូនដំណឹងហើយ) និងទី៥/សូមឲ្យរោងចក្រគិតប្រាក់សងជំងឺចិត្ត(កិច្ចសន្យាការងារ។

ជាមួយគ្នានេះ ដោយមានការសម្របសម្រួលពីក្រសួងការងារ បានឯកភាពគ្នាបានចំនួន ៤ ចំណុច នៅសល់តែ ១ ចំណុចចុងក្រោយ ខាងរោងចក្រ និងខាងតំណាងកម្មករ-កម្មការិនី សូមលើកយកទៅពិភាក្សាបន្តនៅពេលខាងមុខ។

បើតាម លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា គិតត្រឹមម៉ោង ៩ និង ៣០ នាទី ថ្ងៃដដែល កម្មករ នៃរោងចក្រ គល័រស្តារ ប្រមាណ ១០០ នាក់ ក្នុងចំណោម ៥០០ នាក់ បានបើកផ្លូវវិញហើយ។ ក្រសួង កំពុងបន្តដោះស្រាយយ៉ាងយកចិត្តទុកដាក់ និងធានាអត្ថប្រយោជន៍ជូនកម្មករស្របតាមច្បាប់កំណត់។

គួរជម្រាបថា ក្រសួងការងារ និងបណ្ដុះបណ្ដាលវិជ្ជាជីវៈ បានចុះដោះស្រាយម្តងរួចហើយ លើបញ្ហាខាងលើនេះ កាលពីថ្ងៃទី ១៩ ខែឧសភា ឆ្នាំ ២០២៥ ម្សិលមិញ។ ចំពោះបញ្ហានេះដែរ ដោយសារតែ កម្មករ-កម្មការិនី បារម្ភ ព្រោះតែរោងចក្រគល័រស្តារ គ្រោងនឹងផ្លាស់ប្ដូរទីតាំងរបស់ខ្លួន ពីទីតាំងបច្ចុប្បន្ន ទៅទីតាំងនៅខេត្តតាកែវវិញ។

ករណីនេះ ក្រសួង ក៏បានចុះទៅដោះស្រាយ និងឯកភាពគ្នាចំនួន ២ ចំណុចធំៗ គឺ ប្រសិនបើ កម្មករ-កម្មការិនី ដែលមកពីខេត្តតាកែវ ចង់ទៅធ្វើការនៅទីតាំងថ្មី ក្រុមហ៊ុន ទទួលយកដដែល។ បន្ថែមនេះ បើមានកម្មករ-កម្មការិនី មិនអាចទៅធ្វើការនៅទីតាំងថ្មីបាន ក្រុមហ៊ុន នឹងទូទាត់តាមច្បាប់៕

អត្ថបទ ៖ សុខា

The post កម្មករ-កម្មការិនីរោងចក្រប្រមាណ ២៥០ នាក់ តវ៉ាបិទផ្លូវ ២១៧ ខណ្ឌដង្កោ ដោយសំណូមពរ ៥ ចំណុច appeared first on Kampuchea Thmey Daily.

ត្រឹមខែមេសានេះ រាជរដ្ឋាភិបាល ចំណាយថវិកាជាង ៨០ លានដុល្លារ ជូនកម្មការិនីមានផ្ទៃពោះ និងកូនអាយុក្រោម ២ ឆ្នាំ

អ៊ិន ពិសី — Wed, 07 May 2025 03:32:21 +0000

គិតត្រឹមខែមេសា ឆ្នាំ ២០២៥ នេះ រាជរដ្ឋាភិបាល តាមរយៈ ប.ស.ស បានឧបត្ថម្ភសាច់ប្រាក់ជូនដល់ស្រីមានផ្ទៃពោះ និងកូនអាយុក្រោម ២ ឆ្នាំ ប្រមាណជាង ៨០ លានដុល្លារអាមេរិក ដែលបានជួយលើកកម្ពស់សុខភាព និងជីវភាពគ្រួសាររបស់កម្មករ-និយោជិត និងកូនៗ កាន់តែប្រសើរឡើងបន្ថែមទៀត។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ៧ ឧសភា នេះថា ចាប់ពីអនុវត្តក្នុងឆ្នាំ ២០១៨ រហូតដល់ខែមេសា ឆ្នាំ ២០២៥ នេះ មានសមាជិក ប.ស.ស ទទួលបានប្រាក់ឧបត្ថម្ភរាជរដ្ឋាភិបាល ជាស្ត្រីមានផ្ទៃពោះចំនួន ៦៤៣ ១២១ នាក់ និងកូនចំនួន ៦៦៤ ៤៨២ នាក់ គិតជាទឹកប្រាក់សរុបចំនួន ៣៣២ ពាន់ ៣១៥ លានរៀល ឬប្រមាណជាង ៨៣ លានដុល្លារអាមេរិក។

លោកបណ្ឌិត បានបន្តថា រាជរដ្ឋាភិបាល បានផ្តល់កម្មវិធីឧបត្ថម្ភសាច់ប្រាក់ជូនកម្មករ-និយោជិតស្ត្រីមានផ្ទៃពោះ និងកុមារក្រោមអាយុ ២ ឆ្នាំ ទាំងមុនសម្រាល ពេលសម្រាល និងក្រោយសម្រាល ក្នុងនោះ មុនពេលសម្រាលកូនកម្មករ-និយោជិតស្ត្រីមានផ្ទៃពោះទទួលបានប្រាក់ឧបត្ថម្ភចំនួន ៤ លើក ដោយ ១ លើក ទទួលបានថវិកា ៨ ម៉ឺនរៀល។ ពេលសម្រាលកូន ទទួលបានប្រាក់ឧបត្ថម្ភ ដោយកូន ១ ទទួលបានថវិកា ៨០ ម៉ឺនរៀល កូនភ្លោះ ២ ទទួលបាន ១ លាន ២ សែនរៀល និងកូនភ្លោះ ៣ ទទួលបាន ១ លាន ៦ សែនរៀល និងទទួលបានការឧបត្ថម្ភពិសេសបន្ថែមពី សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ចំនួន ៥ លានរៀល ទៀតផងដែរ។

លោកបណ្ឌិត ហេង សុផាន់ណារិទ្ធ បានបញ្ជាក់ថា គិតត្រឹមខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៦០ ៣៩២ នាក់ ស្រី ១ ៦៨៦ ៨៨៧ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥០៨ ៦៦៩ នាក់ ស្រី ១៥០ ៩០៨ នាក់ បុគ្គលស្ថិតក្នុងវិស័យឯកជនចំនួន ១ ៨៦៦ ១២២ នាក់ ស្រី ១ ១២៤ ៨០១ នាក់ បុគ្គលស្វ័យនិយោជន៍ចំនួន ៤៩៨ ៥៤៦ នាក់ ស្រី ៣០៣ ៤១៩ នាក់ និងអ្នកក្នុងបន្ទុក ១៨៧ ០៥៥ នាក់ ស្រី ១០៧ ៧៥៩ នាក់៕

អត្ថបទ ៖ សំអឿន

The post ត្រឹមខែមេសានេះ រាជរដ្ឋាភិបាល ចំណាយថវិកាជាង ៨០ លានដុល្លារ ជូនកម្មការិនីមានផ្ទៃពោះ និងកូនអាយុក្រោម ២ ឆ្នាំ appeared first on Kampuchea Thmey Daily.