ការអំពាវនាវនេះ ធ្វើឡើងបន្ទាប់ពីមានករណីឧបទ្ទវហេតុលិចទូកស្មិច(ហៅទូកយ៉ៗ) បណ្តាលឱ្យម្តាយ និងកូនពីរនាក់ស្លាប់ (សរុបចំនួន៣នាក់) ខណៈចេញទៅរកងាវ។ ហេតុការណ៍ដ៏អាក្រក់នេះ កើតឡើងនៅថ្ងៃទី១៧ ខែឧសភា ឆ្នាំ២០២៦ វេលាម៉ោងប្រមាណ១២:៥០នាទីរសៀល មានករណីលិចទូកស្មាច់មួយគ្រឿង នៅចំណុចមុខឃ្លោងព្រែកសរសៀរ ស្ថិតក្នុងភូមិអូរក្រសារ សង្កាត់អូរក្រសារ ក្រុងកែប ខេត្តកែប។

តាមសេចក្តីរាយការណ៍ពីសមត្ថកិច្ច ក្នុងទូកមានមនុស្សចំនួន៤នាក់ ក្នុងនោះមានឪពុកឈ្មោះ រស់ សាម អាយុ៤០ឆ្នាំ បានរស់រានមានជីវិត។ ប៉ុន្តែប្រពន្ធអាយុ៣៨ឆ្នាំ និងកូនប្រុស២នាក់ ម្នាក់អាយុ១០ឆ្នាំ និងម្នាក់ទៀត អាយុ៨ឆ្នាំ បានបាត់បង់ជីវិត។

សូមជម្រាបថា ក្រោយទទួលបានដំណឹងភ្លាម លោក ហ៊ួរ មិថុនា អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តកែប បានដឹកនាំកម្លាំងចម្រុះចុះស្វែងរកជនរងគ្រោះ។ លុះព្រឹកឡើង នៅថ្ងៃទី១៨ ខែឧសភា ឆ្នាំ២០២៦ កម្លាំងចម្រុះបានរកឃើញសពជនរងគ្រោះទាំង៣នាក់ ហើយសពត្រូវបានយកទៅធ្វើបុណ្យតាមប្រពៃណី។

ក្នុងនាមអាជ្ញាធរខេត្ត លោកបានសម្តែងការចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសព និងអំពាវនាវដល់ប្រជាពលរដ្ឋដែលប្រកបរបរនៅលើផ្ទៃសមុទ្រ មេត្តាបង្កើនការប្រុងប្រយ័ត្នខ្ពស់ក្នុងអំឡុងរដូវវស្សា និងពេលមានអាកាសធាតុមិនអំណោយផល។

ជាការកត់សម្កាល់ រៀងរាល់រដូវវស្សាចូលមកដល់ រដ្ឋបាលខេត្តនៅជាប់សមុទ្ររួមមានខេត្ត ខេត្តកែប កំពត ព្រះសីហនុ និងកោះកុង តែងតែចេញសេចក្តីជូនដំណឹងឱ្យបង្កើនការប្រុងប្រយ័ត្នខ្ពស់ពេលចេញទូកនេសាទ នៅពេលមានកត្តាអាកាសធាតុមិនអំណោយផល ដូចជាព្យុះ ភ្លៀងធ្លាក់ខ្លាំង និងរលកសមុទ្រធំៗជាដើម៕

The post ក្រោយករណីលិចទូកស្លាប់ទាំងម្តាយនិងកូន!មន្រ្តីគ្រោះមហន្តរាយខេត្តកែប អំពាវនាវអ្នកប្រកបរបរលើផ្ទៃសមុទ្របង្កើនការប្រុងប្រយ័ត្នរដូវវស្សា appeared first on Kampuchea Thmey Daily.

តាមការឲ្យដឹងពីលោក ជួន ឧត្តម នាយប៉ុស្តិ៍នរគបាលរដ្ឋបាលកោះដាច់ ករណីនេះបានបង្កការភ្ញាក់ផ្អើលកាលពីវេលាម៉ោង១០និង៣០នាទីព្រឹក ថ្ងៃទី២៣ ខែមីនា ឆ្នាំ២០២៦ នៅចំណុចកណ្ដាលទន្លេ ភូមិក្បាលកោះ សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។

តាមការបញ្ជាក់ពីពលរដ្ឋបានឲ្យដឹងថា នៅលើទូកស្មាច់ដែលជិះឆ្លងទន្លេនេះមានមនុស្សចាស់ក្មេងសរុបចំនួន ១៤នាក់ រួមទាំងអ្នកបើកទូក។ ពួកគេបានចេញដំណើរពីមូលដ្ឋានខេត្តកណ្ដាល តាមទន្លេមកភូមិក្បាលកោះ សង្កាត់កោះដាច់។ ខណៈមកដល់កណ្ដាលទន្លេ ដោយសង្ស័យដឹកធ្ងន់ខ្លាំងពេក ព្រោះទូកស្មាច់មានសភាពតូចក៏បណ្ដាលឲ្យលិចទូកតែម្ដង បណ្ដាលអោយមនុស្សចំនួន០៨នាក់ (ស្រី ០៣នាក់មានមនុស្សធំ ០១នាក់ និងក្មេង ០៤នាក់) ត្រូវបានលិចបាត់ខ្លួន។ ខណៈ៦នាក់បានជួយសង្គ្រោះទាន់ពេលវេលា។

បន្ទាប់ពីទទួលបានដំណឹងនៃការលិចទូកនេះ កម្លាំងអាជ្ញាធររាជធានីភ្នំពេញ រួមជាមួយអាជ្ញាធរខណ្ឌជ្រោយចង្វារ បានចេញអូប័រ ដើម្បីជួយអន្តរាគមន៍សង្គ្រោះ និងស្វែងរកមនុស្សដែលបានបាត់ខ្លួន។

លោក ចេង ឌីណា អភិបាលនៃគណៈអភិបាលស្រុកខ្សាច់កណ្ដាល ដែលបានចុះអមដំណើរលោក គួច ចំរើន អភិបាលខេត្ត្កកណ្ដាល ក្នុងការអន្តរាគមន៍ជួយសង្គ្រោះបានលើកឡើងក្នុងបណ្ដាញហ្វេសប៊ុកផ្ទាល់ខ្លួនកាលពីថ្ងៃទី២៣មីនាថា ក្នុងចំណោមជនរងគ្រោះដែលក្នុងករណីលិចទូកស្លាប់ទាំង ៨នាក់ មាន៤នាក់ ជាអ្នករស់នៅឃុំពុកឬស្សី។

តាមការបញ្ជាក់ពីលោក ជួន ឧត្តម នាយប៉ុស្តិ៍នរគបាលរដ្ឋបាលកោះដាច់ គិតត្រឹមម៉ោង៩ព្រឹកថ្ងៃទី២៤ ខែមីនានេះ ជនរងគ្រោះដែលបាត់ខ្លួននៅមិនទាន់ឃើញបន្ថែមនោះទេ៕

អត្ថបទ៖ រដ្ឋា

The post ករណីលិចទូកនៅសង្កាត់កោះដាច់ មានជនរងគ្រោះសរុប១៤នាក់ ខណៈ៥នាក់កំពុងបាត់ខ្លួន appeared first on Kampuchea Thmey Daily.

ការ​រក​ឃើញ​នេះ​កាលពី​វេលា​ម៉ោង ៩ និង ៣០ នាទី​ព្រឹក ថ្ងៃ​ទី ២៨ ខែ​មិថុនា ឆ្នាំ ២០២៥ ដែល​មាន​ចម្ងាយ​ពី​កំពង់ចម្លង​កោះ​មាស ៣ គីឡូម៉ែត្រ ស្ថិត​នៅ​ភូមិ​កោះ​ប្រាក់ ឃុំ​ភូមិធំ ស្រុក​កៀនស្វាយ ខេត្ត​កណ្ដាល។

ជនរងគ្រោះ​ចំនួន ២ នាក់ រួមមាន ១-ឈ្មោះ ភោគ ផុន ភេទ​ប្រុស អាយុ ៧៧ ឆ្នាំ និង ឈ្មោះ ព្រុំ រ៉ុង ភេទ​ស្រី អាយុ ៧២ ឆ្នាំ មាន​ទីលំនៅ​កោះ​មាស ភូមិ​កោះ​ប្រាក់ ឃុំ​ភូមិធំ ស្រុក​កៀនស្វាយ ខេត្ត​កណ្តាល។ បច្ចុប្បន្ន សព​យាយ​តា​ទាំង ២ នាក់ ត្រូវ​បាន​យក​ទៅ​តម្កល់​នៅ​វត្ត​កោះ​ប្រាក់ ដើម្បី​ធ្វើ​បុណ្យ​តាម​ប្រពៃណី។

គួរ​បញ្ជាក់​ផង​ដែរ​ថា កាលពី​វេលា​ម៉ោង ២ រំលង​អធ្រាត្រ​ឈាន​ចូល​ថ្ងៃ​ទី ២៧ ខែ​មិថុនា ឆ្នាំ ២០២៥ មាន​ករណី​លិច​ទូកដ នៅ​កំពង់ចម្លង​កោះ​មាស បណ្តាល​ឲ្យ​បាត់​ខ្លួន​យាយ​តា​ចំនួន ២ នាក់ ដែល​បាន​គេង​សម្រាក​នៅ​លើ​នោះ៕

អត្ថបទ ៖ រដ្ឋា

The post រកឃើញសពម្ចាស់ទូកដ ២ នាក់ ប្ដីប្រពន្ធ បាត់ខ្លួនក្នុងហេតុការណ៍លិចទូក ម្សិលមិញ appeared first on Kampuchea Thmey Daily.

ប្រភពព័ត៌មានឲ្យដឹងថា ជនរងគ្រោះមានឈ្មោះ ភោគ ផុន ភេទប្រុស អាយុ ៧៧ឆ្នាំ និងឈ្មោះ ព្រុំ រ៉ុង ភេទស្រី អាយុ ៧២ឆ្នាំ មានលំនៅកោះមាស ភូមិកោះប្រាក់ ឃុំភូមិធំ ស្រុកកៀនស្វាយ ខេត្តកណ្តាល ។

ប្រភពព័ត៍មានពីប្រជាពលរដ្ឋបានអោយដឹងថា នៅយប់ថ្ញៃទី២៦ ខែមិថុនា ឆ្នាំ ២០២៥ ជនរងគ្រោះទាំងពីរនាក់ប្តីប្រពន្ធ តែងតែស្នាក់នៅលើទូកដជាប្រចាំ រហូតដល់វេលាម៉ោង ៣ទាបភ្លឺឈានចូលថ្ងៃទី២៧ ខែមិថុនា ឆ្នាំ២០២៥ ទើបក្មួយរបស់គាត់មកកំពង់ចម្លងដើម្បីចម្លងទូកដ ស្រាប់តែមកដល់ក៏ឃើញទូកដក្រឡាប់ទៅហើយ។ ភ្លាមៗ ក្មួយរបស់គាត់បានឆោឡោហៅប្រជាពលរដ្ឋលើកោះមាសមកជួយ ព្រមទាំងរាយការណ៍មកអាជ្ញាធរឃុំ និងប៉ុស្តិ៍រដ្ឋបាលភូមិធំ មកពិនិត្យរកវិធីសង្គ្រោះជនរងគ្រោះទាំងពីរនាក់។ ក្រោយពីបានទទួលដំណឹង និងបទបញ្ជារបស់លោកអធិការនគរបាលស្រុក កម្លាំងប៉ុស្តិ៍ បានសហការជាមួយអាជ្ញាធរឃុំ ភូមិ ប្រជាការពារ និងកម្លាំងប្រតិបត្តិការណ៍រុករក ៩១១ បានធ្វើការចុះរាវរកជនរងគ្រោះទាំងពីរ។ គិតត្រឹមម៉ោង១២ថ្ងៃត្រង់ទី២៧មិថុនា ក្រុមអន្តរាគមន៍៩១១ នៅមិនទាន់រកជនរគ្រោះទាំងនាក់ឃើញនៅឡើយទេ

បើតាមការបញ្ជាក់ក្រុមគ្រួសារពីសាច់ញាតិរបស់ជនរងគ្រោះបានឲ្យដឹងថា ទូកដចម្លងដែលលិចនេះ ជនរងគ្រោះបានទិញក្នុងអំឡុងឆ្នាំ២០១៩ មកពីខេត្តកំពង់ឆ្នាំង ប្រើប្រាស់ដល់ឆ្នាំ២០២៤ ក៏បានជួសជុលម្តង គឺប្តូរបន្ទះដែកមួយផ្ទាំង និងមានលិចរុនតូចៗ ប្រមាណជា ១០កន្លែង តែជនរងគ្រោះគ្រាន់តែយកក្រណាត់ញាត់ឲ្យជិតប៉ុណ្ណោះ រហូតមកដល់​យប់កើតហេតុជនរងគ្រោះទាំងពីរមកសម្រាកនៅក្នុងទូកក៏បានលិចបាត់ខ្លួនតែម្ដង៕

អត្ថបទ៖ រដ្ឋា

The post ម្ចាស់ទូកដវ័យជាង៧០ឆ្នាំពីរនាក់ប្ដីប្រពន្ធកំពុងបាត់ខ្លួនក្នុងហេតុការណ៍លិចទូក ខណៈក្រុមទ័ពពិសេស ៩១១ កំពុងចុះអន្តរាគមន៍ appeared first on Kampuchea Thmey Daily.

តាមរបាយការណ៍បញ្ជាក់ថា ទូកត្រូវលិចក្នុងលំហសមុទ្របាត់ទាំងស្រុង ជាទូករបស់ក្រុម ហ៊ុនស្ពីតហ្វឺរឺ​ ពណ៌​លឿង មានប្រវែង ២៦ម៉ែត្រ​ ទទឹង​៦ម៉ែត្រ​ មានគោលដៅពីផែកោះរ៉ុង ដាយសេនធឺ ទៅតាមកោះ​។ ក្នុងករណីនេះ បានខូចខាត ស៊ីម៉ងត៍២តោន ម៉ូតូ​Scopy​ ១គ្រឿង​ និងអីវ៉ាន់ចម្រុះជាច្រើនមុខទៀត។

ទោះបីយ៉ាងណា ក្រុមអ្នកទេសចរប្រុសស្រីសរុបចំនួន ១៨នាក់ ដែលរួមដំណើរលើទូកត្រូវបានជួយសង្គ្រោះដោយអូប័ររបស់ក្រុមហ៊ុនទេសចរណ៍ឧកញ៉ា ទៀ វិចិត្រ និងកងកម្លាំងសមត្ថកិច្ចក្រុងកោះរ៉ុងជួយសង្គ្រោះដោយសុវត្ថិភាព៕

The post ទូកទេសចរណ៍មួយគ្រឿងលិចបាត់ទាំងស្រុងក្នុងសមុទ្រកោះរ៉ុង appeared first on Kampuchea Thmey Daily.

សពជនរងគ្រោះមានឈ្មោះ បាវ ថៃ ភេទប្រុស អាយុ៤៣ឆ្នាំ មានទីលំនៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ។

គូសបញ្ជាក់ថា កាលពីវេលាម៉ោង១៤និង២០នាទីថ្ងៃទី២០ ខែកញ្ញា ឆ្នាំ២០២៤ មានហេតុការលិចទូកដឹកដំឡូងមី មួយគ្រឿងនៅចំណុចបឹងរាំង ក្នុងភូមិខ្នងពស់ ឃុំដារ ស្រុកចិត្តបុរី ខេត្តក្រចេះ បណ្តាលឲ្យមនុស្សប្រុសចំនួន៥នាក់ ធ្លាក់ចូលក្នុងទឹកបឹង។

ក្នុងនោះ បណ្តាលឲ្យមនុស្ស៣នាក់លង់ទឹកស្លាប់ ទី១.ឈ្មោះ បឹង ឆោម ភេទប្រុស អាយុ២៤ឆ្នាំមានទីលំនៅភូមិអញ្ចាញ ឃុំដារ (ស្លាប់) ទី២.ឈ្មោះ បឹង ឆៃម៉ាំង ភេទប្រុស អាយុ១៣ឆ្នាំ មានទីលំនៅភូមិអញ្ចាញ ឃុំដារ (ស្លាប់) និងទី៣.ឈ្មោះ បាវ ថៃ ភេទប្រុស អាយុ ៤៣ឆ្នាំ មានទីលំនៅភូមិអញ្ចាញ ឃុំដារ (ស្លាប់) ទើបរកឃើញ ៕

អត្ថបទ៖ ប្រុញ វិធិន

The post សមត្ថកិច្ចរកឃើញសពបុរសម្នាក់ទៀតព្រឹកនេះ ករណីលិចទូកនៅខេត្តក្រចេះ appeared first on Kampuchea Thmey Daily.

ការជំរុញនេះបានធ្វើឡើងបន្ទាប់ពីមានករណីលិចទូកដឹកសិស្សសាលាអនុវិទ្យាល័យឈូក ស្ថិតនៅភូមិឈួកគ្រោះ ឃុំឈូក ស្រុកប្រាសាទសំបូរ កាលពីថ្ងៃទី៨ មិថុនា ឆ្នាំ២០២៤ កន្លងទៅ ពេលសិស្សចេញពីរៀនត្រឡប់ទៅផ្ទះវិញ បានបណ្តាលឱ្យសិស្សស្រី អាយុ ១៣ ឆ្នាំ ស្លាប់ ក្នុងចំណោមសិស្សជិះលើទូកសរុប ១៥ នាក់ មានស្រី ១០ នាក់។

អ្នកស្រី ឃួន វិច្ឆិកា មានប្រសាសន៍ នៅព្រឹកថ្ងៃទី១០ ខែមិថុនា នេះថា កន្លងមក ក្រសួងអប់រំ យុវជន និងកីឡា តែងតែធ្វើការងារជាមួយអាជ្ញាធរដែនដី ក៏ដូចជា មន្ទីរអប់រំ យុវជន និងកីឡារាជធានីខេត្ត ដើម្បីផ្សព្វផ្សាយដល់សាលារៀន សិស្សានុសិស្ស និងមាតាបិតា ឱ្យបង្កើនការប្រុងប្រយ័ត្ន និងយកចិត្តទុកដាក់ក្នុងការធ្វើដំណើររបស់កូនៗ និងសិស្ស ហើយកន្លងមក ក្រសួងក៏ធ្លាប់បានផ្តល់អាវពោងសម្រាប់ទូកដចម្លងសិស្សនៅខេត្តកំពង់ធំដែរ។

អ្នកស្រីបានបន្តថា លើសពីនេះទៀត ពាក់ព័ន្ធវិធានការលើករណីនេះ ក្រសួងក៏បានចេញសេចក្តីណែនាំ កាលពីឆ្នាំ២០២២ ជំរុញបន្តពង្រឹង និងបង្កើនប្រសិទ្ធភាពក្នុងការអនុវត្ត ដើម្បីបង្ការ និងទប់ស្កាត់គ្រោះថ្នាក់ក្នុងពេលធ្វើដំណើរទៅមកសាលារៀនសម្រាប់បុគ្គលិកអប់រំ និងសិស្សានុសិស្ស។

អ្នកស្រីបានបន្តទៀតថា៖ “អ្វីដែលក្រសួងខិតខំបំពេញនោះ គឺការណែនាំដល់សាលារៀន មាតាបិតា សិស្សានុសិស្សក្នុងការឈ្វេងយល់បន្ថែមពីហានិភ័យដែលកើតចេញពីការមិនគោរពការណែនាំ ធ្វេសប្រហែស។ សាលាក៏នឹងធ្វើការជាមួយសហគមន៍ដើម្បីបញ្ជ្រាបចំណេះដឹង និងការចូលរួមនេះផងដែរ”។

យោងតាមសេចក្តីណែនាំ ស្តីពី វិធានការបង្ការ និងទប់ស្កាត់គ្រោះថ្នាក់ ក្នុងពេលធ្វើដំណើរទៅមកសាលារៀន សម្រាប់បុគ្គលិកអប់រំ និងសិស្សានុសិស្សរបស់ ក្រសួងអប់រំ កាលពី ឆ្នាំ២០២២ ក្រសួងបានណែនាំឱ្យ មន្ទីរអប់រំ សាលារៀនសហការជាមួយអង្គភាពពាក់ព័ន្ធ ចុះត្រួតពិនិត្យលក្ខណៈបច្ចេកទេសមធ្យោបាយដឹកជញ្ជូន (រួម) ដូចជាយានយន្ត ឬទូក កាណូត ដែលសិស្សានុសិស្ស និងបុគ្គលិកអប់រំប្រើប្រាស់រួមគ្នា និងក្នុងករណីដែលមធ្យោបាយដឹកជញ្ជូនទាំងនោះអាចបង្កជាហានិភ័យណាមួយ។ ណែនាំដល់ម្ចាស់អាជីវកម្ម និងអ្នកបញ្ជាមធ្យោបាយដឹកជញ្ជូនសិស្សានុសិស្ស និងបុគ្គលិក អប់រំ ឱ្យមានការប្រុងប្រយ័ត្នខ្ពស់ គោរពច្បាប់ចរាចរណ៍ និងមានការទទួលខុសត្រូវខ្ពស់ ត្រូវបំពាក់ឧបករណ៍សុវត្ថិភាព ឬអាវពោងសុវត្ថិភាពនៅលើ មធ្យោបាយដឹកជញ្ជូន និងកុំឱ្យដឹកលើសចំណុះ ឬបញ្ជាយានយន្តលើសល្បឿន។ អប់រំណែនាំដល់សិស្សានុសិស្សជាប់ជាប្រចាំអំពី ហានិភ័យដែល នឹងអាចកើតមានឡើងក្នុងអំឡុងពេលធ្វើដំណើរ ជាពិសេសត្រូវណែនាំសិស្សានុសិស្សឱ្យចេះគ្រប់គ្រងអារម្មណ៍ គ្រប់គ្រងស្ថានការណ៍ និងវិធីរំដោះខ្លួនចេញពីគ្រោះថ្នាក់ ក្នុងករណីមានហេតុការណ៍កើតឡើង និងសម្របសម្រួល ផ្តល់ និងទទួលព័ត៌មានរវាងសាលារៀន និងសហគមន៍ និងជំរុញការចូលរួម រាល់សកម្មភាពពាក់ព័ន្ធនឹងការបង្ការទប់ស្កាត់គ្រោះថ្នាក់នានា ជាពិសេសគ្រោះថ្នាក់ដែលពាក់ព័ន្ធ នឹងការធ្វើដំណើរ ឬមធ្យោបាយដឹកជញ្ជូនក៏ដូចជាសម្របសម្រួលជាមួយម្ចាស់អាជីវកម្មមធ្យោបាយដឹកជញ្ជូន ដើម្បីសម្រួលដល់ការធ្វើដំណើររបស់សិស្សានុសិស្ស និងបុគ្គលិកអប់រំ ឬកៀរគរ ឬចលនាធនធាន ដើម្បីឧបត្ថម្ភគាំទ្រដល់ការរៀបចំមធ្យោបាយធ្វើដំណើរ និងទិញសម្ភារ សម្រាប់ការធ្វើដំណើរទៅមកសាលារៀន ដូចជា យានយន្ត ទូក កាណូត ពោងហែលទឹក ប៊ីដុងជ័រ អាវពោងសុវត្ថិភាព មួកការពារសុវត្ថិភាព។ល។

រីឯមាតាបិតា អ្នកអាណាព្យាបាល ត្រូវណែនាំកូនចៅជាប់ជាប្រចាំឱ្យមានការប្រុងប្រយ័ត្ន និងជ្រើសរើសការប្រើប្រាស់មធ្យោបាយធ្វើដំណើរ ដែលមានសុវត្ថិភាព នៅតាមផ្លូវពីផ្ទះទៅមកសាលារៀន ពិនិត្យលទ្ធភាពទិញសម្ភារ និងឧបករណ៍ការពារសុវត្ថិភាពផ្សេងទៀតឱ្យកូនចៅនៅពេលធ្វើដំណើរទៅសាលារៀន និងត្រូវសហការជាមួយអាជ្ញាធរពាក់ព័ន្ធ ដូចជាការផ្តល់ព័ត៌មានអំពីម្ចាស់អាជីវកម្ម ឬមធ្យោបាយដឹកជញ្ជូន ដែលប្រឈមនឹងហានិភ័យ ឬដែលមិនគោរពតាមលក្ខខណ្ឌ និងគោលការណ៍ច្បាប់បានកំណត់ ត្រូវដឹកជញ្ជូនកូនចៅទៅសាលារៀនដោយផ្ទាល់ ក្នុងករណីចាំបាច់ ដោយកុំបណ្តោយឱ្យពួកគេធ្វើដំណើរដោយខ្លួនឯង ពិនិត្យលទ្ធភាពចូលរួមវិភាគទានជាមួយសាលារៀន ដើម្បីរៀបចំមធ្យោបាយដឹកជញ្ជូនកូនចៅធ្វើ ដំណើរទៅសាលារៀន៕

អត្ថបទ៖ សំអឿន

The post អ្នកនាំពាក្យអប់រំ ជំរុញបង្កើនសុវត្ថិភាពសិស្សពេលធ្វើដំណើរទៅរៀនតាមទូក appeared first on Kampuchea Thmey Daily.

ហេតុការណ៍នេះបានកើតឡើងនៅវេលាម៉ោង៤ល្ងាចថ្ងៃទី២៥ ខែកក្កដា ក្នុងពេលមេឃភ្លៀងធំលាយឡំខ្យល់កន្រ្តាក់ បណ្តាលឲ្យក្រឡាប់បាឡាស្មាច់១គ្រឿងលិចក្នុងទន្លេនៅចំណុចកោះកណ្តាល ក្នុងភូមិអន្លុងកញ្ចុះ ឃុំប្រឡាយមាស ស្រុកកំពង់លែង រហូតដល់ព្រឹកថ្ងៃទី២៦ ត្រឹមម៉ោង៧ព្រឹកនេះ ជនរងគ្រោះដែលបានបាត់ខ្លួននៅមិនទាន់រកឃើញនៅ ឡើយ។

លោកវរសេនីយ៍ឯក ប៉ាល់ ជឿន អធិការនគបាលស្រុកកំពង់លែង បានអោយដឹងនៅព្រឹកថ្ងៃទី២៦កក្កដានេះថា ក្នុងហេតុការណ៍ក្រឡាប់លិចបាឡាស្មាច់ខាងលើនេះ ជនរងគ្រោះទាំង៣នាក់ជិះលើបាឡាស្មាច់មាន ១.ឈ្មោះ រ៉េន រឹត ភេទ ប្រុស អាយុ៣៩ឆ្នាំ ត្រូវជាប្ដី និងជាអ្នកបើកបាឡាស្មាច់បានបាត់ខ្លួន។ ២.ឈ្មោះ អេង យីម ភេទស្រី អាយុ៤២ឆ្នាំ ត្រូវជាប្រពន្ធបានបាត់ខ្លួន។ និង៣.ឈ្មោះ ប៉ុន បញ្ញាសក្កិ ភេទប្រុស អាយុ១២ឆ្នាំ ត្រូវជាកូនបានហែលរួច ជនរងគ្រោះទាំង​៣នាក់មានទីលំនៅក្នុងភូមិដំណាក់កកោះ ឃុំពោធិ ស្រុកកំពង់លែង ខេត្តកំពង់ឆ្នាំង។

លោកអធិការនគបាលស្រុកកំពង់លែងបានអោយដឹងទៀតថា មុនពេលកើតហេតុអ្នកទាំង៣បានបើកកាណូតបាឡាស្មាច់ដើម្បីចេញទៅរកឆ្លុះចាប់សត្វគីង្គក់នៅពេលយប់យកមកលក់។ លុះមកដល់ចំណុចខាងលើដោយបើកបរក្នុងល្បឿនលឿនហើយបានបត់បាឡាជ្រុលទើបធ្វើឲ្យក្រឡាប់លិចតែម្ដង ខណះដែលមេឃកំពុងធ្លាក់ភ្លៀងធំ និងមានខ្យល់កន្ត្រាក់ផងដែរ ។

ក្រោយពេលកើតហេតុ ឯកឧត្តម ស៊ុន សុវណ្ណារិទ្ធិ អភិបាលខេត្ត និងលោកឧុត្តមសេនីយ៍ទោ ខូវ លី ស្នងការនគបាលខេត្ត បានបញ្ជារអោយអាជ្ញាធរសមត្ថកិច្ច រួមជាមួយបងប្អូនជនរងគ្រោះកំពុងស្វែងរកអ្នកដែលបាត់ខ្លួន មកដល់ព្រឹកថ្ងៃទី២៦កក្កដានេះនៅមិនទាន់រកឃើញអ្នកបាត់ខ្លួននៅឡើយទេ៕

អត្ថបទ៖ ឈៀងថារិទ្ធ

The post បាត់ខ្លួនប្ដីប្រពន្ធមួយគូក្នុងហេតុការណ៍លិចទូកបាឡាស្មាច់ ខណៈកូនអាយុ១២ឆ្នាំហែលរួច appeared first on Kampuchea Thmey Daily.