ជាក់ស្តែងនៅថ្ងៃទី ០៧ និងទី០៨ ខែកក្កដា ឆ្នាំ២០២៦ រដ្ឋបាលខណ្ឌសែនសុខ បានដាក់ពង្រាយគ្រឿងចក្រធុនធ្ងន់ និងរថយន្តឈូសឆាយ ដើម្បីចុះយុទ្ធនាការសម្អាត ប្រមូល និងលុបបំបាត់គំនរសំរាមអនាធិបតេយ្យ ០២ទីតាំងផ្សេងគ្នា ដែលស្ថិតក្នុងភូមិពោងពាយ និង ភូមិឧកញ្ញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

លោក ហួរ ម៉ុម ពលរដ្ឋដែលឧស្សាហ៍ជិះកាត់តំបន់ខាងលើលើកឡើងថា គាត់ធ្លាប់ជិះកាត់តំបន់ទាំង០២នេះ គឺមានក្លិនស្អុយខ្លាំង ដែលជាហេតុពេលជិះកាត់ម្តងៗ ត្រូវយកម៉ាសមកពាក់ទើបទប់ក្លិនស្អុយនេះបាន ។ ប្រសិននៅពេលមានភ្លៀងធ្លាក់មកម្តងៗ កាកសំណល់ដែរស្អុយរលួយបានហូរលាយលំជាមួយទឹកដកលើផ្លូវជះក្លិន បង្កអោយអ្នករស់នៅតំបន់ទាំង០២ខាងលើ ពិបាកធ្វើដំណើរឆ្លងកាត់តែម្តង ។ ក្នុងនោះគាត់បានឃើញម្តងម្កាលដែរ មានពលរដ្ឋមួយចំនួន និងអ្នកធ្វើដំណើរឆ្លងកាត់ ខ្វះការទទួលខុសត្រូវ បោះចោលសម្រាមយ៉ាងអនាធិបតេយ្យធ្វើឱ្យប៉ះពាល់យ៉ាងធ្ងន់ធ្ងរ ដល់បរិស្ថាន។

ពលរដ្ឋបន្តថា ពួកគាត់ត្រេកអរយ៉ាងក្រៃលែង ពេលបានឃើញអាជ្ញាធរមូលដ្ឋាន យកចិត្តទុកដាក់ ចំពោះក្តីកង្វល់របស់ប្រជាពលរដ្ឋ ដែលកំពុងជួបការលំបាកលើបញ្ហាផលប៉ះពាល់ដល់សុខភាព ដែលសាយភាយក្លិនស្អុយ ដល់ផ្លូវដង្ហើមពិបាករស់នៅ និងឆ្លងកាត់។

តាមការបញ្ជាក់ពីអាជ្ញាធរសង្កាត់ បានអោយដឹងថា រដ្ឋបាលខណ្ឌសែនសុខ បានសហការជាមួយសហគ្រាសគ្រប់គ្រងសំរាម សំណល់រឹងទីប្រជុំជន រាជធានីភ្នំពេញ និងក្រុមហ៊ុនប្រមូលសំរាម ៨០០ Super ដើម្បីសម្អាតកន្លែងចាក់សម្រាមអនាធិបតេយ្យ គោលបំណងកែលម្អបរិស្ថានជុំវិញ និងលុបបំបាត់ភាពមិនរៀបរយតាមដងផ្លូវសាធារណៈ ក៏ដូចជាទប់ស្កាត់ការធំក្លិនស្អុយ ដែលជាប្រភពបង្កជំងឺដល់ប្រជាពលរដ្ឋរស់នៅជិតខាងផងដែរ បានចំនួន ០២ទីតាំងហើយ ដោយនៅចំណុចផ្លូវបេតុង ភូមិពោងពាយ និងភូមិឧកញ្ញ៉ាវាំង។

អាជ្ញាធរបានបញ្ជាក់បន្ថែមថា សូមអំពាវនាវដល់ប្រជាពលរដ្ឋទាំងអស់ មិនត្រូវចោលសំរាមពាសវាលពាសកាល បន្តទៀតនោះឡើយ ត្រូវវេចខ្ចប់អោយបានត្រឹមត្រូវ និងដាក់តាមម៉ោងពេលដែលក្រុមហ៊ុនប្រមូលសំរាមកំណត់ ។ ហើយត្រូវនាំគ្នាចូលរួមថែរក្សាអនាម័យ នៅតាមខាងមុខផ្ទះរៀងៗ ខ្លួន និងតាមទីសាធារណៈ ដើម្បីទីក្រុងស្អាត សុខភាពល្អ និងមានសោភ័ណភាពគួរឱ្យចង់រស់នៅ ៕ អត្ថបទ ៖ រដ្ឋា

The post រយៈពេល០២ថ្ងៃ អាជ្ញាធរខណ្ឌសែនសុខបានដាក់គ្រឿងចក្រសម្អាត កន្លែងចាក់សំរាមអនាធិបតេយ្យចំនួន០២ទីតាំង appeared first on Kampuchea Thmey Daily.

ថ្លែងបន្តក្នុងពិធីអបអរសាទរ ទិវាជាតិទីក្រុងស្អាតលើកទី១៣ ឆ្នាំ២០២៦ ក្រោមប្រធានបទ សាមគ្គីដើម្បីទីក្រុងស្អាត នៅវិហារឥស្លាមភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង លោកស្រីអភិបាលខេត្តកោះកុង រំលេចទៀតថា បុគ្គលម្នាក់ៗគប្បីធ្វើជាគំរូដល់អ្នកដ៏ទៃចូលរួមសម្អាតអនាម័យបរិស្ថានទាំងនៅផ្ទះ ឬទីសាធារណៈ។ ជាក់ស្តែងភ្ញៀវទេសចរមកលេងកម្សាន្តនៅទីក្រុង ឬទីតាំងទេសចរណ៍ ឃើញមានបញ្ហាខ្វះអនាម័យបរិស្ថានក៏គេលែងចង់មកលេងដែរ។

លោកស្រីអភិបាលខេត្ត បានបន្តថា ការរស់នៅមានបរិស្ថានអនាម័យស្អាតល្អ បានជួយលើកកម្ពស់សុខុមាលភាពប្រកបដោយគុណភាព និងបង្កើនការទាក់ទាញភ្ញៀវទេសចរមកលេងកម្សាន្តនៅក្នុងទីក្រុង។ ដូច្នេះសូមបន្តយកចិត្តទុកដាក់ចូលរួមទាំងអស់គ្នា ដើម្បីផ្ទះយើង និងទីក្រុងរបស់យើងស្អាតល្អទាក់ទាញ។

លោក សុខ ច័ន្ទគ្រឹះស្នា ប្រធានមន្ទីរទេសចរណ៍ខេត្តកោះកុង ឱ្យដឹងថា ទិវាទីក្រុងស្អាតឆ្នាំ២០២៦នេះ មានគោលបំណងផ្តោតទៅលើយុទ្ធនាការ ទីក្រុងស្អាត រមណីយដ្ឋានស្អាត សេវាល្អ បដិបណ្ឋារកិច្ចល្អ ដោយផ្សព្វផ្សាយបញ្រ្ចាបការយល់ដឹងអនាម័យបរិស្ថានភាពស្អាត បៃតង និងធានាបាននូវសន្តិសុខ សុវត្ថិភាព ដើម្បីជាការរួមចំណែកដ៏សំខាន់ក្នុងការចូលរួមប្រឡងប្រណាំងទីក្រុងស្អាត ហើយចលនាប្រឡងប្រណាំងទីក្រុងស្អាតនេះ ជាការបំផុសគំនិតដល់មន្រ្តីរាជការ និងប្រជាពលរដ្ឋមូលដ្ឋាន ពិសេសប្រតិបត្តិករទេសចរណ៍ឱ្យកាន់តែជ្រាបច្បាស់ពីការថែរក្សាបរិស្ថានទុកដាក់សំរាមមានសណ្តាប់ធ្នាប់។

បើតាមលោក សុខ ច័ន្ទគ្រឹះស្នា កន្លងមក ក្រសួងទេសចរណ៍បានដាក់ចេញនូវប្រធានបទជាច្រើន ដូចជាសំអាតផ្ទះយើងថ្ងៃនេះ ខ្ញុំមិនប្រើថង់ប្លាស្ទិក ផ្លូវថ្នល់ស្អាត ជាដើម ដើម្បីអប់រំណែនាំដល់ប្រជាពលរដ្ឋអោយកាន់តែយល់ដឹងពីបញ្ហាអនាម័យបរិស្ថាន និងសុខភាពរស់នៅ។

ដោយឡែក លោក ភូថង សេរីវុឌ្ឍី អភិបាលក្រុងខេមរភូមិន្ទ ពន្យល់ដែរថា បញ្ហាសំរាមជាការទទួលខុសត្រូវរបស់យើងទាំងអស់មិនមែនត្រឹមតែប្រជាពលរដ្ឋ ឬអាជ្ញាធរទេ ប៉ុន្តែវាជាកាតព្វកិច្ចដ៏សំខាន់មួយដែលមិនអាចជៀសបាន។ កន្លងទៅ គ្រប់ភាគីពាក់ព័ន្ធបានចូលរួមយ៉ាងសកម្មក្នុងការសំអាតបរិស្ថាន ដូចជាការបោសសម្អាតផ្លូវ ប្រមូលសំរាមរឹងរាវគ្រប់ប្រភេទ និងការរៀបចំសណ្តាប់ធ្នាប់សាធារណៈ៕

អត្ថបទ៖ សិរីវឌ្ឍនៈ

The post អភិបាលខេត្តកោះកុង ជំរុញដល់ពលរដ្ឋត្រូវធ្វើអនាម័យបរិស្ថានជាប្រចាំថ្ងៃ ដើម្បីភាពរស់នៅស្អាត appeared first on Kampuchea Thmey Daily.

ថ្លែងក្នុងកិច្ចប្រជុំបូកសរុបលទ្ធផលការងារអនាម័យបរិស្ថានប្រចាំឆ្នាំ២០២៥ របស់រដ្ឋបាលក្រុង-ស្រុក ឃុំ-សង្កាត់ កាលពីថ្ងៃទី៤ ខែមីនា ឆ្នាំ២០២៦ នៅសាលសន្និសិទ្ធបូកគោ លោក មឿង គង្គា អភិបាលរងខេត្តកំពត តំណាងដ៏ខ្ពង់ខ្ពស់លោក ម៉ៅ ធនិន អភិបាលខេត្តកំពត បានណែនាំឲ្យរដ្ឋបាលក្រុង-ស្រុកទាំងអស់ក្នុងភូមិសាស្ត្រខេត្ត ត្រូវគិតគូររៀបចំទីលានទុកដាក់សំរាមឲ្យបានត្រឹមត្រូវតាមលក្ខណៈបច្ចេកទេស ជាពិសេសបណ្តាក្រុង-ស្រុកដែលមិនទាន់មានទីតាំងសមស្រប ត្រូវស្វែងរកទីកន្លែងសមរម្យ ដើម្បីទុកដាក់ និងគ្រប់គ្រងសំណល់ឲ្យមានប្រសិទ្ធភាព។

លោកអភិបាលរងបានបញ្ជាក់ថា ការទុកដាក់សំរាម ការគ្រប់គ្រងសំណល់រឹង និងសំណល់ប្លាស្ទិកឲ្យបានត្រឹមត្រូវ គឺជាកត្តាសំខាន់ក្នុងការរក្សាបរិស្ថានឲ្យស្អាត និងលើកកម្ពស់វិស័យទេសចរ ដើម្បីសម្រេចគោលដៅនេះ ត្រូវមានរការចូលរួមពីភាគីពាក់ព័ន្ធទាំងអស់ រួមមាន រដ្ឋបាលខេត្ត រដ្ឋបាលក្រុង-ស្រុក មន្ទីរ អង្គភាពជំនាញ ក្រុមហ៊ុនប្រមូលសំរាម ព្រមទាំងប្រជាពលរដ្ឋ និងសហគមន៍ទេសចរណ៍ ក្នុងការទុកដាក់សំរាមឲ្យបានត្រឹមត្រូវ ទាំងនៅតាមទីសាធារណៈ រមណីយដ្ឋាន និងតាមដងផ្លូវ។

បច្ចុប្បន្ន មន្ទីរបរិស្ថានខេត្ត និងរដ្ឋបាលក្រុង-ស្រុក ឃុំ-សង្កាត់ បាននិងកំពុងពង្រឹងការងារសម្អាតអនាម័យជាប្រចាំ បន្ថយការប្រើប្រាស់ប្លាស្ទិក និងរៀបចំផែនការសកម្មភាពច្បាស់លាស់ ដើម្បីធានាថា ភូមិសាស្ត្រខេត្តកំពតមានភាពស្អាត គ្មានសំរាមរាយប៉ាយ និងមានសោភ័ណភាពសមរម្យសម្រាប់ទទួលភ្ញៀវទេសចរ។

ក្នុងឆ្នាំ២០២៥ កន្លងទៅ ខេត្តកំពតទទួលបានភ្ញៀវទេសចរជាង២លាននាក់ ដែលបានជួយជំរុញសេដ្ឋកិច្ចមូលដ្ឋាន និងធ្វើឲ្យជីវភាពប្រជាពលរដ្ឋមានភាពល្អប្រសើរឡើងគួរឱ្យកត់សម្គាល់។ ខេត្តកំពតដោយមានកំណើនភ្ញៀវទេសចរកើនឡើងច្រើន ហើយក្រុមហ៊ុនប្រមូលសំរាមក៏បានបន្ថែមរថយន្ត និងកម្លាំងការងារ ដើម្បីធានាការប្រមូលដឹកជញ្ជូនសំរាមបានទាន់ពេលវេលា ជៀសវាងការកកស្ទះ និងបញ្ហាក្លិនស្អុយប៉ះពាល់ដល់បរិស្ថាន។

លោក មឿង គង្គា អភិបាលរងខេត្តកំពត បានអំពាវនាវឲ្យអ្នកពាក់ព័ន្ធទាំងអស់ បន្តអនុវត្តផែនការសកម្មភាពរបស់ខ្លួនឲ្យមានប្រសិទ្ធភាព និងជំរុញការផ្សព្វផ្សាយអប់រំសាធារណៈ ដើម្បីបង្កើនការយល់ដឹងរបស់ប្រជាពលរដ្ឋ ក្នុងការចូលរួមថែរក្សាអនាម័យបរិស្ថាន និងទុកដាក់សំណល់តាមលក្ខណៈបច្ចេកទេស។

ដោយមានការយកចិត្តទុកដាក់លើបញ្ហាសំរាម និងបរិស្ថាន មិនត្រឹមតែជាការរក្សាភាពស្អាតប៉ុណ្ណោះទេ ប៉ុន្តែជាកត្តាគន្លឹះក្នុងការកសាងរូបភាពខេត្តកំពតបានធ្វើឲ្យក្លាយជាកន្លែងគោលដៅទេសចរស្អាត បៃតង និងមានចីរភាពសែនស្រស់បំព្រង៕

អត្ថបទ៖ សឹង រ៉ាត់

The post អាជ្ញាធរខេត្តកំពត ជំរុញឲ្យយកចិត្តទុកដាក់លើការងារគ្រប់គ្រងសំរាមឲ្យបានល្អដើម្បីទាក់ទាញភ្ញៀវទេសចរ appeared first on Kampuchea Thmey Daily.

ជាក់ស្ដែងនៅថ្ងៃទី១២ ខែធ្នូ ឆ្នាំ២០២៥ លោក តោ វីរូ អភិបាលរង នៃគណៈអភិបាលខណ្ឌកំបូល តំណាងលោក ឃឹម ស៊ុនសូដា អភិបាល នៃគណៈអភិបាលខណ្ឌកំបូល បានដឹកនាំមន្រ្តីរាជការ នៃរដ្ឋបាលខណ្ឌកំបូល រួមជាមួយរដ្ឋបាលសង្កាត់កំបូល និងរដ្ឋបាលសង្កាត់កន្ទោក សហការជាមួយមន្ទីរបរិស្ថានរាជធានីភ្នំពេញ បានរៀបចំយុទ្ធនាការ «កម្ពុជាស្អាត ខ្មែរធ្វើបាន» និងយុទ្ធនាការ «ផ្លូវជាតិគ្មានសំរាម និងសំណល់ប្លាស្ទិក» នៅផ្លូវជាតិលេខ៤ ក្នុងភូមិសាស្រ្តខណ្ឌកំបូល រាជធានីភ្នំពេញ។

ក្នុងនោះដោយមើលឃើញថា នៅមានប្រជាពលរដ្ឋមួយចំនួននៅមិនទាន់យល់ដឹងពីបញ្ហា ការចោលសំរាមពាសវាល ពាសកាល វេចខ្ចប់ទុកដាក់ក្នុងធុងសំរាមមិនបានត្រឹមត្រូវ ធើ្វអោយនៅតាមដងផ្លូវទីសាធារណៈបាត់បង់សោភ័ណ្ឌភាពដងផ្លូវ នឹង ប៉ះពាល់បរិស្ថាន និងបានបំផុសពលរដ្ឋបញ្ឈប់ការប្រើប្រាស់ និងការវេចខ្ចប់ដោយប្លាស្ទិក កាលបើធ្លាក់ចូលលូ ប្រឡាយ នាំឱ្យស្ទះទឹកហូរ បង្កទៅជាការជន់លិច នារដូវវស្សា។

ជាមួយគ្នាផងដែរអភិបាលរងសំណូមពរដល់បងប្អូនប្រជាពលរដ្ឋ ទាំងអស់ សូមវេចខ្ចប់ ទុកដាក់សំរាម កាកសំណល់ផ្សេងៗអោយបានត្រឹមត្រូវ បញ្ឈប់ ឬ កាត់បន្ថយការប្រើប្រាស់ថង់ប្លាស្ទិក៕

The post អាជ្ញាធរខណ្ឌកំបូល ធ្វើយុទ្ធនាការ កម្ពុជាស្អាត ខ្មែរធ្វើបាន ផ្លូវជាតិគ្មានសំរាមប្លាស្ទិក appeared first on Kampuchea Thmey Daily.

ថ្លែងទៅកាន់អង្គសន្និបាតបូកសរុបការងារឆ្នាំ២០២៥ និងទិសដៅការងារបន្តឆ្នាំ២០២៦ រៀបចំនាព្រឹកថ្ងៃទី៩ ខែធ្នូ លោក អ៊ាង សុផល្លែត បានគូសបញ្ជាក់ឱ្យដឹងថា  យុទ្ធនាការពន្លកបៃតង គឺជាគម្រោងដាំដើមឈើដ៏ធំមួយ ដែលត្រូវបានក្រសួងបរិស្ថានចាប់ផ្ដើមឡើង ដើម្បីជំរុញការពង្រីភាពបៃតង។ ជាមួយគ្នានេះ ក្រសួងបរិស្ថានបានពង្រឹងការអនុវត្តច្បាប់តឹងរ៉ឹង និងបានចែកកូនឈើដល់ប្រជាពលរដ្ឋ ក៏ដូចជាសាធារណជនយកទៅដាំដោយឥតគិតថ្លៃ បានចំនួនជាង ៣លាន៤សែនដើមផងដែរ។

តាមរដ្ឋមន្ត្រីក្រសួងបរិស្ថាន សម្រាប់ឆ្នាំ២០២៦ខាងមុខនេះ ក្រសួង បានពង្រីកការចែកកូនឈើនេះ តាមរយៈថ្នាលថ្នាក់តំបន់ដែលបានសាងសង់ហើយ ដែលមាននៅខេត្តចំនួន៥ គឺខេត្តកំពង់ស្ពឺ ខេត្តកោះកុង ខេត្តសៀមរាប ខេត្តមណ្ឌលគីរី និងខេត្តត្បូងឃ្មុំ ដែលថ្នាលថ្នាក់តំបន់នៅខេត្តទាំង៥នេះ អាចផលិតកូនឈើបាន៥លានដើម។ យុទ្ធនាការនេះ ឆ្លើយតបទៅនឹងគោលនយោបាយអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា និងបង្ហាញពីការខិតខំប្រឹងប្រែងក្នុងការបង្កើនគម្របបៃតង ក៏ដូចជាការពារបរិស្ថានផងដែរ។

គួរឱ្យដឹងថា សម្រាប់អង្គសន្និបាតនៅឆ្នាំនេះ ក្រសួងបរិស្ថានបានជ្រើសរើស និងដាក់ចេញនូវប្រធានសំខាន់ៗតាមជំនាញ រួមមាន៖ ១-ភាពស្អាត ២-ការដាំស្តារឡើងវិញ និងការពង្រឹងការអនុវត្តច្បាប់ ៣-ការអភិវឌ្ឍសេដ្ឋកិច្ចបៃតងដើម្បីលើកកម្ពស់ជីវភាពសហគមន៍មូលដ្ឋាន ៤-ពង្រីកការអប់រំផ្សព្វផ្សាយដើម្បី ជំរុញប្រតិបត្តិមេត្រីភាពបរិស្ថាន និងទី៥-ការកសាងរដ្ឋបាលឌីជីថល៕

The post មនុស្ស១៥លាននាក់បានចូលរួមយុទ្ធនាការរបស់ក្រសួងបរិស្ថាន ហើយចូលរួមកាត់បន្ថយថង់ប្លាស្ទិកបាន៨៤% appeared first on Kampuchea Thmey Daily.

កាលពីពេលថ្មីៗនេះ មានការផ្សព្វផ្សាយតាមបណ្តាញសង្គម ក៏ដូចជាបណ្តាញសារព័ត៌មានមួយចំនួន ស្តីពីសកម្មភាពរបស់បុគ្គលចំនួន ២នាក់ ដោយម្នាក់ជាអ្នកបើកបរម៉ូតូសណ្តោងរ៉ឺម៉ក ដឹកស្បោងសំរាម សំណល់រឹង និងបុគ្គលម្នាក់ទៀត បានយកសំរាមក្នុងស្បោងសំរាមជាច្រើននៅលើរ៉ឺម៉ក បោះចូលទៅក្នុងស្ទឹងព្រែកត្នោត ចំណុចស្ពានព្រែកហូរ ក្នុងភូមិសាស្រ្តក្រុងតាខ្មៅ ខេត្តកណ្តាល។ ករណីនេះនាំឲ្យមានការរិះគន់យ៉ាងខ្លាំងពីសាធារណជន។

ក្រសួងបរិស្ថានបានថ្កោលទោសចំពោះបុគ្គល ដែលបានបោះសំរាមចោលក្នុងទឹកស្ទឹងព្រែត្នោត ជាមួយគ្នានេះក្រសួងបរិស្ថាន ស្នើសុំការអន្តរាគមន៍ពីរដ្ឋបាលខេត្តកណ្តាល និងអាជ្ញាធរមានសមត្ថកិច្ច ចាត់វិធានការច្បាប់ ចំពោះអ្នកដែលបានប្រព្រឹត្តល្មើសច្បាប់។

អ្នកនាំពាក្យក្រសួងបរិស្ថាន លោក ខ្វៃ អាទិត្យា កាលពីរសៀលថ្ងៃទី២២ ខែវិច្ឆិកា ឆ្នាំ២០២៥ បានឱ្យដឹងថា ចំពោះករណីខាងលើនេះ ក្រសួងបរិស្ថានបានសហការ ជាមួយរដ្ឋបាលក្រុងតាខ្មៅ និងអាជ្ញាធរមូលដ្ឋាន ដើម្បីស្វែងរកបុគ្គល ដែលបានប្រព្រឹត្តល្មើសច្បាប់ យកមកធ្វើការអប់រំនិងចាត់ការតាមនីតិវិធីច្បាប់។

ជាមួយគ្នានេះអ្នកនាំពាក្យក្រសួងបរិស្ថាន ស្នើសុំឱ្យបុគ្គលដែលបានប្រព្រឹត្តល្មើស ចេញមកសារភាព និងទទួលស្គាល់កំហុសចំពោះមុខអាជ្ញាធរមានសមត្ថកិច្ច និងបញ្ឈប់ការដឹកសំណល់រឹង ទៅចោលផ្តេសផ្តាស ដូចជាបោះចូលទៅក្នុងប្រព័ន្ធទឹកសាធារណៈ ដែលនាំឱ្យមានការបំពុលទឹក ប៉ះបាល់ដល់ការរស់នៅរបស់ប្រជាពលរដ្ឋ និងបរិស្ថានជាបន្តទៀត។

តាមអ្នកនាំពាក្យ បុគ្គលបោះចោលសំរាមផ្តេសផ្តាស់ ចូលទៅក្នុងទន្លេ បានប្រព្រឹត្តល្មើសច្បាប់ ជាមួយអនុក្រឹត្យលេខ ១១៣ ស្តពី«ការគ្រប់គ្រងសំរាម សំណល់រឹងនៅទីប្រជុំជន» ។ ក្រមបរិស្ថាននិងធនធានធម្មជាតិ ត្រង់មាត្រា២៣០ ចំណុច១ ហាមឃាត់បណ្ដាច់ខាតការចោលសម្រាប់ប្លាស្ទិកនៅតាមផ្លូវទីសាធារណៈ ទីវាល ប្រព័ន្ធលូ ប្រភពទឹកសាធារណៈ។ មាត្រា២១៨ ត្រង់ចំណុច១ នៃក្រមបរិស្ថាននិងធនធានធម្មជាតិក៏មានចែង ហាមឃាត់ដាច់ខាតការបោះចោលសំរាម សំណល់រឹងទីប្រជុំជន នៅតាមដងផ្លូវ ទីសាធារណៈ និងទីវាល ប្រព័ន្ធទឹកលូប្រឡាយទឹក ប្រភពទឹកសាធារណៈឬក្នុងដីកម្មសិទ្ធិ ដែលមិនត្រូវបានអនុញ្ញាត ជាកន្លែងស្តុកទុកសំរាម ជាបណ្ដោះអាសន្នឬជាកន្លែងទុកដាក់ចុងក្រោយ៕

The post ក្រសួងបរិស្ថានសហការជាមួយអាជ្ញាធរតាមរកបុគ្គលបោះសំរាមចោលក្នុងទឹកស្ទឹងព្រែកត្នោត នៅក្រុងតាខ្មៅ មកចាត់ការតាមច្បាប់ appeared first on Kampuchea Thmey Daily.

សមាជិក​ក្រុម​ប្រឹក្សា​ និង​ជា​ជំនួយ​ការ​សាលា​សង្កាត​ច្បារ​អំពៅ​ទី​២ លោក ជូន វ៉ាននី បាន​ឱ្យ​ដឹង​ថា​សំរាម​ទាំង​នេះ​ភាគ​ច្រើន​បង្កើត​ឡើង​ដោយ​អ្នក​ដើរ​លេង​ពេល​យប់​ និង​បន្សល់​ទុក​ឱ្យ​ឃើញ​ជា​រៀង​រាល់​ព្រឹក​។

លោក​ថា​៖ « បើពុំបានប្រមូលសំរាមលើសួននេះទេគឺសំរាមច្បាស់ជាគរពាសវាលពាសកាល។ហើយអ្នករអែងចោលសំរាមលើសួនភាគច្រើនអ្នកដើរលេងពេលយប់តែម្តង»។

កំពុង​ដឹក​នាំ​កម្លាំង​ប្រជាការពារ​ប្រមូល​សំរាម​បណ្ដើរ​ក៏​ចូលរួម​រើស​បណ្ដើរ​ផង​នោះ​លោក វ៉ាន់នី បាន​សំណូម​ពរ​ដល់​ពលរដ្ឋ​បញ្ឈប់​ការ​បោះសំរាម​លើ​សួន​បន្ត​ទៀត ​សូម​គិត​ថា​ទី​តាំង​សាធារណៈ​ទាំង​នេះ​គឺ​ជា​របស់​ពលរដ្ឋ​ទាំង​អស់​គ្នា​ដូច​ជា​ផ្ទះ​របស់​ពួកគេ​ផងដែរ​។

លោក​បន្ថែម​ថា៖ «សុំបញ្ឈប់ការបោះសំរាមលើសួនទៀតទៅអាក្រក់មើលណាស់»។

ការ​ទុក​ដាក់​សំរាម​គឺ​ជា​ផ្នែក​មួយ​នៃ​ឥរិយាបថ ចំណេះ​ដឹង​ សីលធម៌​នៃ​ការ​រស់​នៅ​របស់​ពលរដ្ឋ​ក្នុង​សង្គម​។ ខណៈ​ដែល​កម្ពុជា​កំពុង​ឈាន​ទៅ​កាន់​ប្រទេស​មាន​ប្រាក់​ចំណូល​មធ្យម​កម្រិត​ខ្ពស់ ២០៣០​នោះ​ ការ​អប់រំ​ពី​ការ​ទុក​ដាក់​សំរាម​ពិត​ជា​មាន​សារៈ​សំខាន់​។ ក្រសួង​បរិស្ថាន​ជា​និច្ច​កាល​តែង​តែ​ផ្សព្វផ្សាយ​ជំរុញ​ការ​ចូលរួម​របស់​ពលរដ្ឋ​យក​ចិត្ត​ទុក​ដាក់​លើ​បញ្ហា​សំរាម​នេះ​ផងដែរ។

រដ្ឋមន្ត្រី​បរិស្ថាន​លោក អ៊ាង សុផល្លែត ធ្លាប់​បាន​លើក​ឡើង​ដោយ​ជំរុញ​ដល់​ពលរដ្ឋ​​ទាំង​អស់​រៀបចំ​ទុក​ដាក់​សំណល់​សំរាម​ឱ្យ​បាន​ត្រឹម​ត្រូវ​ និង​បញ្ឈប់​ការ​ចោល​សំរាម​តាម​ទី​សាធារណៈ​ហើយ​បែរ​មក​ទុកដាក់​ឱ្យ​បាន​ត្រឹម​ត្រូវ​ជា​ពិសេស​អនុវត្ត​វិធាន​ 4Rs ដែល​មាន​ដូច​ជា​ការ​បដិសេធ ការកាត់បន្ថយ ការ​ប្រើប្រាស់​ឡើង​វិញ និង​ការ​កែ​ច្នៃ​ឡើង​វិញ៕

ដោយ​៖ នរា

The post អា​ជ្ញា​ធរ​សង្កាត់​ច្បារ​អំពៅ​២​សំណូម​ពរ​ពលរដ្ឋ​បញ្ឈប់​ការ​ចោល​សំរាម​ពាលវាលពាសកាល appeared first on Kampuchea Thmey Daily.

ក្រសួងបរិស្ថាន នាព្រឹកថ្ងៃទី២៥ ខែតុលា បានបើកយុទ្ធនាការផ្សព្វផ្សាយជំរុញសកម្មភាពដើម្បីបរិស្ថាន ក្រោមប្រធានបទ៖ «ការបណ្តុះគំនិតស្អាត និងបៃតងនៅតាមសហគមន៍មូលដ្ឋាន» ដល់សិស្សានុសិស្សនៅវិទ្យាល័យកែវសីមា ក្នុងស្រុកកែវសីមា ខេត្តមណ្ឌលគិរី ក្នុងបំណងឱ្យសិស្សានុសិស្សនិងពលរដ្ឋ មានស្មារតី និងផ្លាស់ប្តូរឥរិយាបទងាកមកចេះស្រឡាញ់ ថែរក្សា និងជាពិសេសការសម្អាតអនាម័យបរិស្ថានឲ្យបានស្អាត ថែរក្សាធនធានធម្មជាតិ។

អភិបាលរងខេត្តមណ្ឌលគីរី លោក   ងិន សុវិមាន ជឿជាក់ថា ការបើកយុទ្ធនាការផ្សព្វផ្សាយជំរុញសកម្មភាពដើម្បីបរិស្ថាន ក្រោមប្រធានបទ៖ «ការបណ្តុះគំនិតស្អាត និងបៃតងនៅតាមសហគមន៍មូលដ្ឋាន»នេះ និងក្លាយជាចលករដែលជំរុញឲ្យមានការផ្តើមសកម្មភាពមេត្រីភាពបរិស្ថានចេញពីបុគ្គលម្នាក់ៗក្នុងការចេះទទួលខុសត្រូវ សម្អាតបរិស្ថាន និងរក្សាភាពបៃតង នៅតាមអង្គភាព សហគមន៍ រៀងៗខ្លួន។

រដ្ឋលេខាធិការក្រសួងបរិស្ថានលោក ជួប ប៉ារីស៍ ឱ្យដឹងថា រយៈពេលពីរឆ្នាំកន្លងមកនេះ ដើម្បីគាំទ្រដល់គោលនយោបាយ និងយុទ្ធសាស្រ្តរបស់រាជរដ្ឋាភិបាលកម្ពុជា ជាពិសេសការចង្អុលបង្ហាញពីប្រមុខរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងបរិស្ថានដាក់ចេញយុទ្ធសាស្រ្តចក្រាវិស័យបរិស្ថាន អនុលោមតាមយុទ្ធសាស្រ្តបញ្ចកោណ ដំណាក់កាលទី១ នៃរាជរដ្ឋាភិបាល នីតិកាលទី៧ នៃរដ្ឋសភា ដែលមានសសរស្តម្ភ៣គឺ ភាពស្អាត ភាពបៃតង និងចីរភាព។ យុទ្ធសាស្រ្តចក្រាវិស័យបរិស្ថាន បានកំណត់ទិសដៅអាទិភាព គឺការលើកកម្ពស់​ការ​យល់ដឹង និងការចូលរួមរបស់ប្រជាពលរដ្ឋ សំដៅផ្លាស់ប្តូរឥរិយាបទ និងទម្លា​​​ប់ការរស់នៅរបស់​ប្រជាពលរដ្ឋកម្ពុជា ក្នុងការរស់នៅស្អាត មានបរិស្ថានបៃតង និងការអភិវឌ្ឍប្រកបដោយចីរភាព។ ជាមួយគ្នានេះក្រសួងបរិស្ថាន បានដាក់ចេញគោលដៅនៃការអប់រំ និងការ​ផ្លាស់​ប្តូរ​ទម្លាប់ នៃការរស់នៅជាចម្បង គឺផ្តោតលើការអប់រំសិស្សានុសិស្ស នៅតាមសា​លា​រៀន ដែលមានលទ្ធភាពក្នុងការជួយពង្រីកការអប់រំ​ដល់​សមាជិក​គ្រួសារ និងសង្គមផងដែរ។

លោក ជួប ប៉ារីស៍ គូសបញ្ជាក់ថា ការ​ថែរក្សាការពារបរិស្ថាន មិនមែនត្រឹមតែជាកាតព្វកិច្ចនោះទេ តែគឺជាការចូលរួមដោយក្ដីស្រឡាញ់ និងមានចិត្តស្មោះចាប់ផ្តើមពីពលរដ្ឋទាំងអស់គ្នា ធ្វើឱ្យកម្ពុជា​កាន់តែមានបរិស្ថាន​​ស្អាត ការរស់នៅប្រកប​ដោយ​ផាសុកភាព ប្រជាជនមានសុខភាពល្អ និងមូលដ្ឋានមានសោភ័ណភាព។

មន្ត្រីជាន់ខ្ពស់រូបនេះ ដាស់តឿន ណែនាំសិស្សានុសិស្ស ក្នុងស្រុកកែវសីម៉ា នៃខេត្តមណ្ឌលគីរី ខេត្តគោលដៅអេកូទេសចរណ៍លំដាប់អន្តរជាតិ  ត្រូវចេះស្រឡាញ់ គិតគូរអំពីបរិស្ថាន កាត់បន្ថយការប្រើប្រាស់ប្លាស្ទិកក្នុងជីវភាពរស់នៅប្រចាំថ្ងៃឱ្យបានមកនៅតិចបំផុត  រក្សាភាពស្អាត បៃតងឱ្យបានជាប់ជាប្រចាំ ជួយឱ្យខេត្តកាន់តែមានសោភ័ណភាពស្រស់បំព្រងទាក់ទាញភ្ញៀវទេសចរណ៍ឲ្យមកកំសាន្តក្នុងខេត្តកាន់តែច្រើន និងចូលរួមដាំកូនឈើ ថែរក្សាដើមឈើ ដើម្បីទ្រទ្រង់បរិស្ថានទាំងមូល និងទប់ស្កាត់ការប្រែប្រួលអាកាសធាតុ។

បន្ថែមពីនេះ លោក ជួប ប៉ារីស៍ គូសបញ្ជាក់ថា កម្មវិធីផ្សព្វផ្សាយជំរុញសកម្មភាពដើម្បីបរិស្ថាន ក្រោមប្រធានបទ៖ «ការបណ្តុះគំនិតស្អាត និងបៃតងនៅតាមសហគមន៍មូលដ្ឋាន»  គឺជាសក្ខីភាព នៃការគាំទ្រនៃកិច្ចសហការដល់ក្រសួងបរិស្ថានគឺការចូលរួមក្នុងការជំរុញសកម្មភាពដើម្បីកម្ពុជាមានភាពស្អាត ទប់ស្កាត់ការបំពុលបរិស្ថានចេញពីសំរាមនិងសំណល់ប្លាស្ទិក  ការបញ្ចេញឧស្ម័នផ្ទះកញ្ចក់ ដែលទាមទារការចូលរួមទទួលខុសត្រូវ និងមានការផ្លាស់ប្តូរទម្លាប់នៅក្នុងការរស់នៅ ការធ្វើអាជីវកម្ម និងផលិតកម្ម ដោយប្រកាន់ខ្ជាប់នូវកាតព្វកិច្ច ជាពលរដ្ឋល្អក្នុងការចូលរួមគ្រប់គ្រងសំរាម តាមលំនៅដ្ឋាន ភូមិឋាន វត្តអារាម ទីសាធារណៈ តាមផ្លូវជាតិនានា ការធ្វើអនាម័យបរិស្ថាន ថែរក្សាបរិស្ថានក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» យុទ្ធនាការ «កម្ពុជាស្អាត ខ្មែធ្វើបាន» និង «ផ្លូវជាតិ គ្មានសំរាម សំណល់ប្លាស្ទិក» ដែលជាបុរេលក្ខខណ្ឌកំណត់ភាពជោគជ័យនៃភូមិ ឃុំ សង្កាត់ ទាំងអស់ទទួលបានបរិស្ថានស្អាត សោភ័ណភាពល្អ ដែលជាចលកររុញច្រានកំណើនសេដ្ឋកិច្ចមូលដ្ឋានរបស់ខេត្ត ក៏ដូចជាលើកស្ទួយជីវភាពរស់នៅរបស់ប្រជាពលរដ្ឋ និងសុខមាលភាពសាធារណៈ តាមរយៈការ លើកស្ទួយវិស័យទេសចរណ៍ និងទីផ្សារផលិតផលនៅក្នុងមូលដ្ឋាន។

មន្ត្រីជាន់ខ្ពស់ក្រសួងបរិស្ថានដដែល អះអាងថា ក្រសួងបរិស្ថានលើកទឹកចិត្ត ដល់គ្រប់ស្ថាប័នទាំងនៅថ្នាក់ជាតិ ថ្នាក់ក្រោមជាតិ និងមូលដ្ឋាន ត្រូវយកចិត្តទុកដាក់អនុវត្តយុទ្ធនាការដែលបានដាក់ចេញជាជំហានៗ ដើម្បីជំរុញភាពស្អាត ភាពបៃតង ដែលឆ្លើយតបនឹងការប្រែប្រួលអាកាសធាតុ លើកកម្ពស់សុខុមាលភាពរបស់ប្រជាជនកម្ពុជា ការអភិវឌ្ឍវិស័យសេដ្ឋកិច្ច សង្គម និងបរិស្ថានប្រកបដោយចីរភាព។

ទន្ទឹមនេះ ក្រសួងបរិស្ថាននឹងបន្តចូលរួមយ៉ាងស៊ីជម្រៅក្នុងយុទ្ធសាស្ត្រដើម្បីកម្ពុជាស្អាត ដោយកាត់បន្ថយការប្រើប្រាស់ថង់ប្លាស្ទិកជាបណ្តើរៗ ចាត់ចែងគ្រប់គ្រងសំណល់រឹង និងរាវឱ្យបានសមស្រប ការដាំដើមឈើយ៉ាងហោចណាស់ ១លានដើមក្នុងមួយឆ្នាំៗ ឆ្ពោះទៅការពង្រីកគម្របព្រៃឈើឱ្យបានច្រើននៅឆ្នាំ២០៥០៕

ដោយ ង៉ិល ណារ៉ាត់

The post ក្រសួងបរិស្ថានបណ្តុះគំនិតស្អាត និងបៃតងដល់សិស្សានុសិស្សក្នុងខេត្តមណ្ឌលគិរី  ដើម្បីឲ្យចេះស្រឡាញ់ ថែរក្សា សម្អាតបរិស្ថាន ធនធានធម្មជាតិ appeared first on Kampuchea Thmey Daily.