លោក Avichay Adraee អ្នកនាំពាក្យយោធាអ៊ីស្រាអែលខាង​ភាសាអារ៉ាប់ បានប្រកាស​ល់ើបណ្តាញ​សង្គម​​ X កាល​ថ្ងៃចន្ទថា កងទ័ពអ៊ីស្រាអែល​កំពុងវិលត្រឡប់ទៅកាន់​ការ​ «ប្រយុទ្ធជាមួយកម្លាំងដ៏មហិ​​​​មា​​» នៅ Rafah ដែលជាទីក្រុងធំ​បំផុតមួយរបស់ហ្គាហ្សានិងតំបន់ជុំវិញ។

លោក​បាន​អំពាវនាវ​ឲ្យ​ប្រជាជន​ប៉ាឡេស្ទីន​នៅ al-Mawasi ក្នុងក្រុង Rafah ផ្លាស់​ទី​ជម្រក​ជា​បន្ទាន់​ ខណៈតំបន់​នេះ​បាន​ស្ថិត​ក្រោម​ការ​បាញ់​ប្រហារ​របស់​អ៊ីស្រាអែល​ជា​ប្រចាំ​ក្នុង​អំឡុង​ពេល​សង្រ្គាម​នៅ​ហ្គាហ្សា បើ​ទោះ​បី​ជា​ត្រូវ​បាន​គេ​កំណត់​ថា​ជា «តំបន់​សុវត្ថិភាព» ក៏ដោយ។

ភ្លាមៗបន្ទាប់ពីការប្រកាសបញ្ជា​ឲ្យ​មាន​ការ​ជម្លៀសចេញ សារព័ត៌មាន Al Jazeera Arabic បានរាយការណ៍ថា យ៉ាង​ហោចណាស់​មនុស្ស ២​នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលទៅលើលំនៅដ្ឋានតង់ដែលបានផ្លាស់​ទីលំនៅនៅ Rafah ផងដែរ។

សូមបញ្ជាក់ថា កាលពីសប្តាហ៍មុន ទីភ្នាក់ងារមនុស្សធម៌របស់អង្គការសហប្រជាជាតិ (OCHA) បានរាយការណ៍ថា មនុស្សជាង​​១៤ម៉ឺន​​នាក់ ត្រូវបានផ្លាស់ទីលំនៅចាប់តាំងពីអ៊ីស្រាអែលបាន​​ទម្លាក់​ចោល​បទឈប់បាញ់និងបន្តសង្រ្គាមឡើងវិញលើតំបន់ជុំវិញកាលពីថ្ងៃទី១៨ខែមីនា។

ក្រសួងសុខាភិបាលនៅហ្គាហ្សាបានរាយការណ៍ថា មនុស្សជាង ៩០០នាក់ត្រូវបានសម្លាប់ចាប់តាំងពីការទម្លាក់គ្រាប់បែកជាថ្មី​របស់អ៊ីស្រាអែល ដែលនាំឲ្យចំនួនអ្នកស្លាប់ចាប់តាំងពីសង្រ្គាមនៅក្នុងខែតុលាឆ្នាំ ២០២៣ កើនដល់ជាង ៥ម៉ឺន​នាក់។ ​ចំពោះការវាយប្រហារកាលពីថ្ងៃទី ៧ខែតុលា របស់ក្រុមហាម៉ាសលើតំបន់ហ្គាហ្សាភាគខាងត្បូងបានសម្លាប់មនុស្ស ១១៣៩ នាក់ ហើយប្រហែល ២៥០នាក់ត្រូវបានចាប់ជាចំណាប់ខ្មាំង ដែលវាបានបញ្ឆេះការវាយលុករបស់អ៊ីស្រាអែល៕

អត្ថបទ៖ ប៊ុន សុភាព

The post អ៊ីស្រាអែល​បញ្ជា​ឲ្យ​ជម្លៀសប្រជាជននៅ​ក្រុង Rafah ខណៈខ្លួន​នឹងវាយលុក​​​ដ៏ខ្លាំង​ appeared first on Kampuchea Thmey Daily.

ទីភ្នាក់ងារមនុស្សធម៌របស់អង្គការសហប្រជាជាតិ (OCHA) បានឲ្យដឹងថា ជនជាតិប៉ាឡេស្ទីន១៤២០០០ នាក់បានផ្លាស់ទីលំនៅដោយបង្ខំចាប់តាំងពីអ៊ីស្រាអែលបានបន្តសង្រ្គាមរបស់ខ្លួនម្ដងទៀតនៅលើតំបន់ហ្គាហ្សានៅថ្ងៃទី១៨ខែមីនា។ បើតាមភ្នាក់ងារនេះ មនុស្សជាច្រើននាក់កំពុងស្នាក់នៅតាមដងផ្លូវ ហើយត្រូវការអាហារ ទឹកស្អាត និងទីជម្រកជាចាំបាច់។

ក្នុងរយៈពេល១៤ម៉ោង ក្រសួងសុខាភិបាលនៅតំបន់​ហ្គាហ្សា បានឲ្យដឹងថា ការវាយប្រហាររបស់អ៊ីស្រាអែលបានសម្លាប់មនុស្សយ៉ាងហោចណាស់៣៩នាក់ រួមទាំងកុមារនិង១២៤នាក់ បានរងរបួសនៅទូទាំងតំបន់ហ្គាហ្សា។ ការ​វាយ​ប្រហារ​ត្រូវ​​បាន​គេ​រាយការណ៍​នៅ​ទូទាំង​តំបន់​ហ្គាហ្សា​រួម​ទាំង​នៅ​ភាគ​ខាង​ជើង​នៃ​តំបន់ Jabalia ព្រម​ទាំងតំបន់ Khan Younis និង Rafah។ យោងតាម ​​OCHA របស់អង្គការសហប្រជាជាតិ ប្រជាជនប៉ាឡេស្ទីនរាប់ពាន់នាក់ទៀតត្រៀមជម្លៀសផងដែរ។

លើសពីចំនួនជនស៊ីវិលដែលបានបាត់បង់ជីវិត OCHA បាននិយាយថា យ៉ាងហោចណាស់បុគ្គលិកជំនួយ៨នាក់ត្រូវបានសម្លាប់នៅហ្គាហ្សា ចាប់តាំងពីអ៊ីស្រាអែលបានបន្តសង្គ្រាមកាលពីសប្តាហ៍មុន ដែលនាំឱ្យចំនួនមនុស្សសរុបដែលត្រូវបានសម្លាប់ចាប់តាំងពីការរំលោភបទឈប់បាញ់កើនដល់៣៩៩នាក់។

ចាប់តាំងពីអ៊ីស្រាអែលចាប់ផ្តើមសង្រ្គាមឡើងវិញ យោធារបស់ខ្លួនបានចេញសេចក្តីជូនដំណឹងចំនួន៦លើក ដោយដាក់ប្រហែល១៥ភាគរយនៃតំបន់ហ្គាហ្សាស្ថិតនៅក្រោមការជម្លៀសខ្លួន។ ស្របពេលជាមួយគ្នានេះជំនួយមនុស្សធម៌ក៏កំពុងខ្វះខាត​យ៉ាងខ្លាំង​ដោយប្រព័ន្ធទឹកដែលនៅសេសសល់របស់ហ្គាហ្សាស្ថិតក្នុងគ្រោះថ្នាក់ ហើយនឹងដួលរលំទាំងស្រុង ប្រសិនបើការផ្គត់ផ្គង់ប្រេងឥន្ធនៈអស់ ខណៈការបិទផ្លូវដាក់ទណ្ឌកម្មរបស់អ៊ីស្រាអែលបានឈានដល់ថ្ងៃទី២៥មីនា​៕

អត្ថបទ៖ ប៊ុន សុភាព

The post UN៖ ​ប្រជាជនហ្គាហ្សា​ភៀសខ្លួន​ជាថ្មី ដោយត្រឹមមួយសប្តាហ៍មានជាង១៤ម៉ឺន​នាក់ appeared first on Kampuchea Thmey Daily.

ប្រធាន ​ទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) លោក Philippe Lazzarini បាននិយាយថា ៨៦ភាគរយនៃតំបន់ឡោមព័ទ្ធកំពុងស្ថិតនៅក្រោមការបញ្ជាជម្លៀសចេញដោយយោធាអ៊ីស្រាអែល។ ប្រជាជនប៉ាឡេស្ទីនរាប់ពាន់នាក់បានភៀសខ្លួនចេញពីជំរុំជនភៀសខ្លួន Bureij និង Nuseirat បន្ទាប់ពីកងទ័ពអ៊ីស្រាអែលបានចេញបញ្ជាឲ្យមានការជម្លៀសចេញ​​ជា​​ថ្មីទៅកាន់តំបន់កណ្តាលហ្គាហ្សា បន្ទាប់មកទៅរ៉ាហ្វាហ៍ នៅ​ជិត​​ព្រំដែនប្រទេស​​អេហ្ស៊ីប​​​។

ប្រជាជនភាគច្រើន​ផ្លាស់ទីលំនៅធ្វើដំណើរទៅកាន់ទីក្រុង Deir el-Balah ដែលសំបូរទៅដោយគ្រួសារផ្លាស់ទីលំនៅ ហើយមិនមានកន្លែង ឬធនធានគ្រប់គ្រាន់សម្រាប់​ផ្តល់​ជូន​ឱ្យ​អ្នក​ផ្តាស់​ទី​​​ដ៏​ច្រើន​នោះទេ​​។ លើសពីនេះ សាលារៀន​ដែល​បាន​ប្រែក្លាយ​ទៅជា​កន្លែង​ស្នាក់​អាស្រ័យ​​​សម្រាប់​ជនភៀសខ្លួន​ត្រូវ​បាន​កំណត់​គោលដៅ​​វាយ​ប្រហារ​​ ខណៈការវាយប្រហារលើសាលារៀនក្នុងរយៈពេលពីរថ្ងៃកន្លងមកនេះបានធ្វើឱ្យបាត់ទំនុកចិត្តអំពីសុវត្ថិភាពដែលនៅសេសសល់របស់ប្រជាជនប៉ាឡេស្ទីន និងបានរុញច្រានប្រជាជនឱ្យចូលទៅក្នុងការផ្លាស់ទីលំនៅដោយបង្ខំបន្ថែមទៀត ដោយ​រក​ទីកន្លែងសុវត្ថិភាព​គ្នា​​។

ទន្ទឹមនឹងនេះដែរ មនុស្សយ៉ាងហោចណាស់បីនាក់ត្រូវបានសម្លាប់ និងផ្សេងទៀតបានរងរបួស នៅពេលដែលកងទ័ពអ៊ីស្រាអែលបានទម្លាក់គ្រាប់បែកនៅតំបន់ al-Mawasi ដែលជាតំបន់មួយនៅភាគខាងត្បូងហ្គាហ្សា ដែលពីមុនបានប្រកាសជា «តំបន់សុវត្ថិភាព» ដោយភាគី​អ៊ីស្រាអែល។ ជនជាតិប៉ាឡេស្ទីន៣៣នាក់ត្រូវបានសម្លាប់កាលពីថ្ងៃចន្ទនៅទូទាំងតំបន់នេះ ខណៈដែលការស្លាប់សរុបចាប់តាំងពីខែតុលាឆ្នាំ​មុន ត្រូវបានរាយការណ៍ថា មានចំនួន ៣៩,៣៦៣ នាក់ និងរង​របួស​ជាង ៩ម៉ឺន​នាក់ផ្សេងទៀត។

លើសពីនេះ ការវាយលុករបស់អ៊ីស្រាអែលមិនឈប់ឈរក៏បានធ្វើឱ្យភាពអាសន្នផ្នែកសុខភាពកាន់តែ​អាក្រក់​​នៃ​​ប្រជាជន​​តំបន់​ហ្គាហ្សា ដោយ​ក្រសួងសុខាភិបាលប៉ាឡេស្ទីន​កាលពីថ្ងៃចន្ទ បានប្រកាសថាវាជា«តំបន់ជំងឺគ្រុនស្វិតដៃជើង»។

អង្គការសុខភាពពិភពលោក (WHO) ក៏បានបញ្ជាក់អំពីការរីករាលដាលនៃមេរោគ polio ដែលគំរាមកំហែងដល់អាយុជីវិត។ មេរោគនេះ​​ត្រូវ​បាន​ពិសោធន៍​​ឃើញនៅក្នុងសំណាកទឹកស្អុយដែល​មាន​នៅ​គ្រប់ទីកន្លែង​ ចំពេល​ការផ្គត់ផ្គង់ទឹកស្អាតនៅតំបន់ហ្គាហ្សាដែលមានប្រជាជនច្រើនកំពុងប្រឈមនឹងហានិភ័យនៃការឆ្លងមេរោគដោយសារប្រជាជន​ប៉ាឡេស្ទីន បានរស់នៅក្នុង​តង់​បណ្តោះ​អាសន្ន ដោយគ្មានបន្ទប់ទឹក គ្មានអនាម័យ គ្មានអនាម័យ។ WHO ក៏កំពុងបញ្ជូនវ៉ាក់សាំងការពារជំងឺស្វិតដៃជើងជាងមួយលានដូសទៅកាន់តំបន់ហ្គាហ្សាដើម្បីការពារកុមារពីការឆ្លងសម្រាប់​ការ​គ្រងក្នុងរយៈពេលប៉ុន្មានសប្តាហ៍ខាងមុខនេះ។

គួរបញ្ជាក់ថា អ៊ីស្រាអែលនិងក្រុមហាម៉ាស់បានធ្វើការស្តីបន្ទោសគ្នាចំពោះការខ្វះវឌ្ឍនភាពក្នុងការឈានដល់កិច្ចព្រមព្រៀងឈប់បាញ់ និងដោះលែងចំណាប់ខ្មាំងនៅតំបន់ហ្គាហ្សាទោះបីជាមានការសម្របសម្រួលពីអន្តរជាតិក៏ដោយ។

ក្រុមហាម៉ាស់បានចោទប្រកាន់នាយករដ្ឋមន្ត្រីអ៊ីស្រាអែល លោក Benjamin Netanyahu ពីការបន្ថែមលក្ខខណ្ឌ និងការទាមទារថ្មីចំពោះសំណើបទឈប់បាញ់ដែលគាំទ្រដោយសហរដ្ឋអាមេរិក។ ទោះបីជាយ៉ាងណាក៏ដោយ លោក Netanyahu បានបដិសេធមិនធ្វើការផ្លាស់ប្តូរណាមួយឡើយ ហើយបាននិយាយថា ក្រុមហាម៉ាសគឺជាអ្នកទទូចលើការផ្លាស់ប្តូរជាច្រើនចំពោះសំណើដើម៕

អត្ថបទ៖ ប៊ុន សុភាព

The post UN ៖៨៦ភាគរយនៃតំបន់ហ្គាហ្សាឥឡូវនេះស្ថិតនៅក្រោមការបញ្ជាជម្លៀសរបស់អ៊ីស្រាអែល appeared first on Kampuchea Thmey Daily.

រូបភាពដ៏រំជួលចិត្តជាច្រើនបានបង្ហាញពីម្តាយ ព កូនតូចៗ នៅពេលពួកគេភៀសខ្លួនទៅកាន់ប្រទេសមួយចំនួនដូចជាអារ៉ាប៊ីសាអូឌីត ខណៈការប្រយុទ្ធគ្នានៅស៊ូដង់ បានអូសបន្លាយពេលជាង១០ថ្ងៃមកហើយ។

រូបភាពទាំងនោះក៏បង្ហាញស្ត្រីជាម្តាយកំពុងយំផងដែរ រីឯកងទ័ពជើងទឹក បីទារកដែលដណ្តប់ទង់ជាតិ ក្នុងប្រតិបត្តិការជួយសង្គ្រោះនៅកំពង់ផែសមុទ្រ Jeddah នៃប្រទេសអារ៉ាប៊ីសាអូឌីត។

គួរបញ្ជាក់ថា នាវាបានដឹកជនស៊ីវិលជាតិសាសន៍ផ្សេងៗគ្នាចំនួន ១៦៨៧នាក់ ដែលភៀសខ្លួនចេញពីអំពើហិង្សា ហើយការជម្លៀសនេះ គឺតំណាងឲ្យកិច្ចខិតខំប្រឹងប្រែងជម្លៀសមនុស្សទ្រង់ទ្រាយធំបំផុតរបស់អារ៉ាប៊ីសាអូឌីត គិតត្រឹមពេលបច្ចុប្បន្ន។

ទោះបីជាយ៉ាងណាក៏ដោយ ក៏មានរូបភាពរំភើបផងដែរ ដោយម្តាយម្នាក់ត្រូវបានគេឃើញសប្បាយចិត្ត នៅពេលនាងទៅដល់អាកាសយានដ្ឋាន Casablanca Mohammed V ក្នុងប្រទេសម៉ារ៉ុក។

ខាងក្រោមនេះ គឺជារូបភាពបង្ហាញពីប្រតិបត្តិការជម្លៀសកុមារតូចៗចេញពីប្រទេសស៊ូដង់៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ មេទ័ពស៊ូដង់ យល់ព្រមចូលតុចរចា ជាមួយគូសត្រូវ

The post កុមារតូចៗ ត្រូវបានជម្លៀសចេញពីស៊ូដង់ ដោយសារប្រទេសកំពុងវឹកវរ appeared first on Kampuchea Thmey Daily.

សហរដ្ឋអាមេរិក និងចក្រភពអង់គ្លេស បានប្រកាសកាលពីថ្ងៃអាទិត្យទី២៣ខែមេសាថា ពួកគេបានជម្លៀសអ្នកការទូតចេញពីប្រទេសស៊ូដង់រួចរាល់ហើយ។

អាជ្ញាធរអាមេរិកនិយាយថា ពួកគេបានបើកប្រតិបត្តិការជម្លៀសមនុស្សប្រហែល១០០នាក់តាមឧទ្ធម្ភាគចក្រ Chinook ចំនួន៣គ្រឿងកាលពីព្រឹកថ្ងៃអាទិត្យ។

ស្របពេលជាមួយគ្នានោះ រដ្ឋាភិបាលទីក្រុងឡុងដ៍ បានរៀបចំយន្តហោះដើម្បីដឹកអ្នកការទូតអង់គ្លេស និងក្រុមគ្រួសាររបស់ពួកគេចេញពីប្រទេសស៊ូដង់ នៅក្នុងអ្វីដែលត្រូវបានពណ៌នាថាជាប្រតិបត្តិការ “ស្មុគស្មាញ និងរហ័ស”។

លើសពីនេះ ប្រទេស​ផ្សេង​ទៀត​ដែល​បាន​រៀបចំ​ការ​ជម្លៀស រួមមាន ​បារាំង អាល្លឺម៉ង់ អ៊ីតាលី ​អេស្ប៉ាញ​ ហូឡង់ និងកាណាដា។

ដោយឡែក ប្រទេសមួយចំនួនទៀត បានជម្លៀសប្រជាជនដោយជោគជ័យកាលពីថ្ងៃសៅរ៍ រីឯមនុស្សជាង១៥០នាក់ ដែលភាគច្រើនជាពលរដ្ឋនៃបណ្តាប្រទេសឈូងសមុទ្រ ក៏ដូចជាអេហ្ស៊ីប ប៉ាគីស្ថាន ផងដែរ គឺត្រូវបានជម្លៀសតាមសមុទ្រទៅកាន់កំពង់ផែ Jeddah នៃប្រទេសអារ៉ាប៊ីសាអូឌីត។

ក្រៅពីនេះ និស្សិតបរទេសជាច្រើននាក់ មកពីទ្វីបអាហ្រ្វិក អាស៊ី និងមជ្ឈិមបូព៌ា បានអំពាវនាវសុំជំនួយ ខណៈពួកគេកំពុងជាប់គាំងនៅក្នុងរដ្ឋធានី ខាទុំ។

យោងតាមអង្គការសុខភាពពិភពលោក បានបញ្ជាក់ថា ការប្រយុទ្ធគ្នាបានសម្លាប់មនុស្សជាង ៤០០ នាក់ និងរាប់ពាន់នាក់រងរបួស ប៉ុន្តែចំនួនអ្នកស្លាប់ត្រូវបានគេជឿថា អាចមានច្រើនជាងនេះ ដោយសារតែមនុស្សជាច្រើនមិនអាចចូលព្យាបាលរបួសក្នុងមន្ទីរពេទ្យបាន៕

ប្រែសម្រួល៖ Vann Vann

ប្រភព៖ BBC

ចុចអាន៖ កងកម្លាំងគាំទ្ររហ័សស៊ូដង់ ប្រកាសបើកអាកាសយានដ្ឋាន សម្រាប់ការជម្លៀស

The post ប្រទេសជាច្រើន ញាប់ដៃញាប់ជើង ជម្លៀសអ្នកការទូតនិងពលរដ្ឋ ចេញពី ស៊ូដង់ appeared first on Kampuchea Thmey Daily.

បេសកជនអាល្លឺម៉ង់ប្រចាំប្រទេសអាហ្វហ្គានីស្ថានលោក Markus Potzel ដែលកំពុងចរចាជាមួយក្រុមតាលីបង់នៅទីក្រុងដូហា បាននិយាយនៅលើបណ្តាញសង្គម Twitter ថា “ប្រធានការិយាល័យនយោបាយរបស់តាលីបង់លោក Sher Mohammad Abbas Stanekzai ធានាខ្ញុំថា ជនជាតិអាហ្វហ្គានីស្ថានដែលមានឯកសារស្របច្បាប់ នឹងបន្តមានឱកាសធ្វើដំណើរតាមជើងហោះហើរពាណិជ្ជកម្ម បន្ទាប់ពីថ្ងៃទី ៣១ ខែសីហា” ។

លោក Potzel ដែលបានចរចាទ្រង់ទ្រាយធំជាមួយតាលីបង់នាពេលកន្លងមក បានបន្ថែមថា “យើងបាននិយាយអំពីតម្រូវការបន្ទាន់សម្រាប់អាកាសយានដ្ឋាននៅកាប៊ុល ជាតម្រូវការចម្បងសម្រាប់វត្តមានការទូត និងអង្គការក្រៅរដ្ឋាភិបាលនៅក្នុងប្រទេសអាហ្វហ្គានីស្ថាន” ។

បើយោងតាមទីភ្នាក់ងារសារព័ត៌មាន REUTERS បានឲ្យដឹងថា តាលីបង់បានសុំជំនួយពីប្រទេសទួរគីសម្រាប់ជំនួយបច្ចេកទេស ក្នុងការដំណើរការអាកាសយានដ្ឋានទីក្រុងកាប៊ុល បន្ទាប់ពីការចាកចេញរបស់កងកម្លាំងបរទេស ប៉ុន្តែបានទទូចថា យោធារបស់ទីក្រុងអង់ការ៉ាក៏ត្រូវតែដកចេញវិញផងដែរ ត្រឹមថ្ងៃផុតកំណត់ទី ៣១ ខែសីហា ។

ទន្ទឹមនោះ ក្រសួងការពារជាតិទួរគីកាលពីថ្ងៃពុធបាននិយាយថា ពួគេបានចាប់ផ្តើមជម្លៀសកងទ័ពចេញពីអាហ្វហ្គានីស្ថាន ខណៈអាកាសយានដ្ឋានអន្តរជាតិក្រុងកាប៊ុល ត្រូវបានការពារដោយកងទ័ពអាមេរិក និងអង់គ្លេស ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ ជនភៀសខ្លួន អាហ្វហ្គានីស្ថាន ច្រើននាក់តេស្តវិជ្ជមានកូវីដ ហើយសុទ្ធតែមិនបញ្ចេញរោគសញ្ញា

The post ពលរដ្ឋ អាហ្វហ្គានីស្ថាន ដែលមានឯកសារស្របច្បាប់ សង្ឃឹមជម្លៀសចេញពីប្រទេស ក្រោយដាច់ខែនេះ appeared first on Kampuchea Thmey Daily.

ការប្រកាសនេះបានធ្វើឡើង បន្ទាប់ពីការលើកឡើងរបស់លោក Joe Biden ។ ប្រធានាធិបតីអាមេរិកបានប្រកាសថា សហរដ្ឋអាមេរិកកំណត់ពេលវេលាសម្រាប់ការដកកងទ័ពចេញពីអាហ្វហ្គានីស្ថាន នៅថ្ងៃទី ៣១ ខែសីហា ប្រសិនបើតាលីបង់មិនរំខានដល់ប្រតិបត្តិការជម្លៀស ឬរំខានដល់ការធ្វើដំណើរទៅកាន់ព្រលានយន្តហោះ ។

ទន្ទឹមនោះលោក Zabiullah Mujahid អ្នកនាំពាក្យតាលីបង់បាននិយាយកាលពីថ្ងៃអង្គារថា មានតែជនបរទេសប៉ុណ្ណោះត្រូវបានអនុញ្ញាតឲ្យធ្វើដំណើរទៅអាកាសយានដ្ឋាន ។ ជនជាតិអាហ្វហ្គានីស្ថានដែលប្រមូលផ្តុំគ្នានៅជុំវិញអាកាសយានដ្ឋាន គួរតែត្រលប់ទៅផ្ទះវិញដើម្បីកុំឲ្យពួកគេទទួលទណ្ឌកម្ម ។

លោក Mujahid បាននិយាយថា “ផ្លូវទៅព្រលានយន្តហោះឥឡូវនេះត្រូវបានបិទ ។ ប្រជាជនអាហ្វហ្គានីស្ថានមិនគួរយកផ្លូវនេះទៅព្រលានយន្តហោះទេ ប៉ុន្តែជនបរទេសនៅតែអាចធ្វើដំណើរទៅព្រលានយន្តហោះបាន ។ យើងនឹងមិនអនុញ្ញាតឲ្យមានការជម្លៀសប្រជាជនអាហ្វហ្កានទៀតទេ” ។

ស្របពេលជាមួយគ្នានេះ លោក Mujahid ក៏បានជំរុញឲ្យវេជ្ជបណ្ឌិត និងអ្នកសិក្សានៅអាហ្វហ្គានីស្ថានស្នាក់នៅ និងធ្វើការនៅក្នុងប្រទេស ជំនួសឲ្យការផ្លាស់ប្តូរចេញពីប្រទេសនេះ ។

គួរបញ្ជាក់ថា មនុស្សជាច្រើននៅក្នុងក្រុមដែលបានជម្លៀសចេញ គឺជាមនុស្សដែលបានទទួលការអប់រំ ដោយសារតែតាលីបង់ធ្លាប់បានហាមស្ត្រីមិនឲ្យធ្វើការ និងទទួលការអប់រំពេញលេញក្នុងការដឹកនាំប្រទេសចុងក្រោយរបស់ពួកគេពីឆ្នាំ ១៩៩៦ ដល់ឆ្នាំ ២០០១ ៕

ប្រែសម្រួលដោយ ៖ ជីវ័ន្ត

ប្រភព ៖ CNN

ចុចអាន ៖ តាលីបង់ រំលោភសាកសព ហើយឆែកឆេរតាមផ្ទះ យកស្រ្តីធ្វើជាទាសករផ្លូវភេទ

The post តាលីបង់ ហាមផ្ដាច់ប្រជាជនអាហ្វហ្គានីស្ថានមិនឲ្យម្នាក់ណាទៅព្រលានយន្តហោះក្រុងកាប៊ុល appeared first on Kampuchea Thmey Daily.

ប្រទេសអាល្លឺម៉ង់ដែលមានក្រុមយោធាធំជាងគេទី ២ នៅអាហ្វហ្កានីស្ថាន បន្ទាប់ពីសហរដ្ឋអាមេរិក ចង់ដឹកជញ្ជូនជនជាតិអាហ្វហ្គានីស្ថានរាប់ពាន់នាក់ ក៏ដូចជាសកម្មជនសិទ្ធិមនុស្ស មេធាវី និងមនុស្សដែលបានធ្វើការជាមួយកងកម្លាំងបរទេសជាដើម ។

ទន្ទឹមនោះ រដ្ឋមន្រ្តីក្រសួងការពារជាតិលោកស្រី Annegret Kramp-Karrenbauer បាននិយាយថា យន្តហោះដឹកជញ្ជូនធុន A400M បានធ្វើការចុះចតជាបន្ទាន់កាលពីល្ងាចថ្ងៃចន្ទ ដោយមានគោលបំណងចម្បងរបស់ខ្លួនក្នុងការនាំយកទាហានអាល្លឺម៉ង់ដើម្បីធានាការជម្លៀស ។

លោកស្រីបានប្រាប់ទូរទស្សន៍ ARD ថា “យើងមានស្ថានភាពវឹកវរ គ្រោះថ្នាក់ និងស្មុគស្មាញនៅព្រលានយន្តហោះ ហើយមានតែមនុស្ស ៧ នាក់ប៉ុណ្ណោះដែលយន្តហោះរបស់យើងបានដឹកជញ្ជូន និងបានចាកចេញយ៉ាងលឿន ខណៈជនជាតិអាល្លឺម៉ង់ផ្សេងទៀតមិនអាចចូលទៅក្នុងអាកាសយានដ្ឋាន ដោយគ្មានការការពារពីទាហានអាល្លឺម៉ង់បាននោះទេ ។

ជាមួយនឹងទាហានចំនួន ៦០០ នាក់ដែលនឹងចូលរួមក្នុងការជម្លៀស ប្រទេសអាល្លឺម៉ង់សង្ឃឹមថានឹងអាចមានមនុស្សចេញពីប្រទេសអាហ្វហ្គានីស្ថានបន្ថែមទៀត នៅប៉ុន្មានម៉ោងខាងមុខនេះ ។

ជើងហោះហើរបានចាប់ផ្តើមឡើងវិញនៅព្រឹកថ្ងៃអង្គារនេះ បន្ទាប់ពីការជម្លៀសត្រូវបានផ្អាកមួយថ្ងៃ មុនពេលដែលហ្វូងមនុស្សជាច្រើនកកកុញព្យាយាមរត់លើផ្លូវយន្តហោះ ដើម្បីរត់គេចខ្លួន បន្ទាប់ពីក្រុមបះបោរតាលីបង់បានដណ្តើមអំណាច ។

ជាចុងក្រោយលោកស្រី Kramp-Karrenbauer សង្ឃឹមថា ព្រលានយន្តហោះនេះអាចត្រូវបានបើកដំណើរការជាច្រើនថ្ងៃ ដើម្បីឲ្យមនុស្សជាច្រើនតាមដែលអាចធ្វើទៅបាន ត្រូវបានជម្លៀសចេញពីប្រទេសអាហ្វហ្គានីស្ថាន ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ព្រះអើយ! ពលរដ្ឋអាហ្វហ្គានីស្ថាន សុខចិត្តតោងកង់យន្តហោះអាមេរិក ឲ្យតែបានចេញពីប្រទេស មានអីធ្លាក់ស្លាប់ម្តងមួយៗ

The post ខ្លាចមានអ្នកតោងដូចយន្តហោះអាមេរិក យោធា អាល្លឺម៉ង់ ជម្លៀសមនុស្សតែ ៧ នាក់ប៉ុណ្ណោះចេញពីក្រុងកាប៊ុល appeared first on Kampuchea Thmey Daily.