ជនភៀសខ្លួន អាហ្វហ្គានីស្ថាន ច្រើននាក់តេស្តវិជ្ជមានកូវីដ ហើយសុទ្ធតែមិនបញ្ចេញរោគសញ្ញា

ប្រព័ន្ធផ្សព្វផ្សាយក្នុងស្រុកបានរាយការណ៍នៅថ្ងៃពុធនេះថា ជនភៀសខ្លួនចំនួន ១៦ នាក់មកពីអាហ្វហ្គានីស្ថានបានធ្វើតេស្តវិជ្ជមានជំងឺកូវីដ ១៩ ។

មនុស្សទាំង ១៦ នាក់ដែលតេស្តវិជ្ជមានកូវីដ ១៩ ស្ថិតក្នុងចំណោមមនុស្ស ៧៨ នាក់ដែលបានចុះចតនៅទីក្រុងញូវដេលីកាលពីថ្ងៃអង្គារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍បាននិយាយថា អ្នកដំណើរទាំងអស់ត្រូវបានដាក់ឲ្យចត្តាឡីស័ក ដើម្បីជាវិធានការបង្ការ ខណៈការធ្វើតេស្តនេះត្រូវបានធ្វើឡើង នៅពេលពួកគេមកដល់អាកាសយានដ្ឋានអន្តរជាតិ Indira Gandhi ក្នុងទីក្រុងញូវដេលី ។

របាយការណ៍ប្រព័ន្ធផ្សព្វផ្សាយបាននិយាយថា “អ្នកវិលត្រឡប់ទាំង ១៦ នាក់ដែលតេស្តវិជ្ជមានកូវីដ សុទ្ធតែមិនបញ្ចេញរោគសញ្ញា” ។

រហូតមកដល់ពេលនេះ មនុស្ស ៦២៦ នាក់ក្នុងនោះមានពលរដ្ឋឥណ្ឌា ២២៨ នាក់ និងជនជាតិអាហ្វហ្គានីស្ថាន ៧៧ នាក់នៃសហគមន៍ Sikh ត្រូវបានជម្លៀសចេញពីអាហ្វហ្គានីស្ថាន ។

ទន្ទឹមនោះ ក្រសួងសុខាភិបាលសហព័ន្ធឥណ្ឌាកាលពីថ្ងៃចន្ទបាននិយាយថា មនុស្សដែលធ្វើដំណើរមកពីអាហ្វហ្គានីស្ថាន នឹងត្រូវឆ្លងកាត់ការធ្វើចត្តាឡីស័ករយៈពេល ១៤ ថ្ងៃ ។

មន្រ្តីបាននិយាយថា រដ្ឋាភិបាលឥណ្ឌាកំពុងធ្វើការយ៉ាងជិតស្និទ្ធជាមួយសហរដ្ឋអាមេរិក ដែលកងកម្លាំងរបស់ពួកគេគ្រប់គ្រងផ្នែកខាងក្នុងនៃអាកាសយានដ្ឋានក្រុងកាប៊ុល ដើម្បីជួយសម្រួលដល់ការវិលត្រឡប់របស់ពលរដ្ឋរបស់ខ្លួនដែលជាប់គាំង ។

គួរបញ្ជាក់ថា ទីក្រុងកាប៊ុលបានធ្លាក់ទៅលើដៃក្រុមតាលីបង់កាលពីថ្ងៃទី ១៥ ខែសីហា បន្ទាប់ពីប្រធានាធិបតីលោក Mohammad Ashraf Ghani បានភៀសខ្លួនចេញពីប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ងាកមកមើលស្ថានភាពកូវីដនៅ អាហ្វហ្គានីស្ថាន បន្តិចមើល ដល់ណាហើយ?