ការដោះលែងអ្នកទោស Archives - Kampuchea Thmey Daily

ក្រោយឡើងជាប្រធានាធិបតីមីយ៉ាន់ម៉ា មីន អ៊ុងឡាំង ដោះលែងអ្នកទោសជាង ៤ពាន់នាក់

Minea Neu — Fri, 17 Apr 2026 05:08:24 +0000

ប្រធានាធិបតីថ្មីរបស់ប្រទេសមីយ៉ាន់ម៉ា លោក មីន អ៊ុងឡាំង (Min Aung Hlaing) បានអនុម័តការលើកលែងទោសដល់អ្នកជាប់ឃុំចំនួន ៤ ៣៣៥ នាក់ ដែលជាការសម្រេចលើកទីបីក្នុងរយៈពេល ៦ខែកន្លងមក។ នេះបើយោងតាមទូរទស្សន៍រដ្ឋ MRTV រាយការណ៍នៅថ្ងៃសុក្រនិងចុះផ្សាយបន្តដោយភ្នាក់ងារសារព័ត៌មានរ៉យទ័រថ្ងៃទី១៧ ខែមេសា ឆ្នាំ២០២៦ ។

ការលើកលែងទោសចំពោះអ្នកជាប់ឃុំក្នុងប្រទេសមីយ៉ាន់ម៉ាជាធម្មតាធ្វើឡើងជារៀងរាល់ឆ្នាំ ដើម្បីអបអរសាទរទិវាឯករាជ្យរបស់ខ្លួននៅខែមករា និងថ្ងៃចូលឆ្នាំថ្មីក្នុងខែមេសា។

ប្រធានាធិបតីប្រទេសមីយ៉ាន់ម៉ា លោក Min Aung Hlaing ។ រូបភាព៖ Reuters

ទូរទស្សន៍ MRTV លើកឡើងថា ក្នុងចំណោមអ្នកទោស ៤ ៣៣៥ នាក់ត្រូវបានដោះលែង មានជនបរទេសចំនួន ១៧៩ នាក់នឹងត្រូវនិរទេសចេញពីប្រទេសមីយ៉ាន់ម៉ា។

ការរាយការណ៍ខាងលើក៏បានលើកឡើងពីការបន្ថយទោសប្រហារជីវិតមកត្រឹមជាប់ទោសអស់មួយជីវិត ការជាប់ពន្ធនាគារអស់មួយជីវិត មកត្រឹម ៤០ ឆ្នាំ និងការកាត់បន្ថយទោសមួយភាគ ៦ សម្រាប់អ្នកទោសផ្សេងទៀត ដោយមិនបានពន្យល់លម្អិតឡើយ។

ចំណែកសមាគមជំនួយអ្នកទោសនយោបាយដែលជាក្រុមសិទ្ធិមនុស្សនិយាយថា៖ « មនុស្សជាង ៣០ ០០០ នាក់ត្រូវបានឃុំខ្លួនពីបទចោទប្រកាន់ខាងនយោបាយ ចាប់តាំងពីការដឹកនាំដោយអតីតរបបយោធាមីយ៉ាន់ម៉ា ដែលមានលោក Min Aung Hlaing ជាអ្នកដឹកនាំ ធ្វើរដ្ឋប្រហារប្រឆាំងនឹងរដ្ឋាភិបាលជាប់ឆ្នោតក្នុងឆ្នាំ ២០២១ មក»។

គួរបញ្ជាក់ថា អតីតរបបយោធាមីយ៉ាន់ម៉ានិយាយកាលពីខែវិច្ឆិកាថាខ្លួននឹងលើកលែងទោសឬទម្លាក់ចោលបទចោទប្រកាន់ប្រឆាំងនឹងមនុស្ស ៨ ៦៦៥នាក់ ចំណែកកាលពីខែមករាប្រកាសថាអ្នកទោសជាង ៦ ០០០នាក់ នឹងត្រូវបានដោះលែងក្នុងឱកាសបុណ្យឯករាជ្យជាតិ៕

ប្រែសម្រួល៖ ណឺ មិនា

The post ក្រោយឡើងជាប្រធានាធិបតីមីយ៉ាន់ម៉ា មីន អ៊ុងឡាំង ដោះលែងអ្នកទោសជាង ៤ពាន់នាក់ appeared first on Kampuchea Thmey Daily.

វ៉េណេស៊ុយអេឡា ដោះលែងអ្នកប្រឆាំងជាន់ខ្ពស់ ចំនួន ២រូប និងមេធាវីម្នាក់

Minea Neu — Mon, 09 Feb 2026 09:40:36 +0000

អង្គការសិទ្ធិមនុស្ស និងក្រុមគ្រួសាររបស់គណបក្សប្រឆាំងឱ្យដឹងថា ប្រទេសវ៉េណេស៊ុយអេឡា បានដោះលែងអ្នកទោសនយោបាយ ដែលមកពីបក្សប្រឆាំងចំនួនពីររូប និងមេធាវីដ៏ល្បីម្នាក់ពីពន្ធនាគារ កាលពីថ្ងៃអាទិត្យ។ នេះជាការដោះលែងកម្រិតខ្ពស់ចុងក្រោយបំផុត របស់រដ្ឋាភិបាល ធ្វើឡើងនៅទីក្រុងការ៉ាកាស។

លោក Juan Pablo Guanipa និង លោកស្រី Maria Corina Machado។ រូបភាព៖ បណ្តាញសង្គម X លោក ស្រី Machado។

យោងតាមការចុះផ្សាយរ៉យទ័រ នៅថ្ងៃទី៩ ខែកុម្ភៈ ឱ្យដឹងថាក្រោមសម្ពាធកាន់តែខ្លាំងពីសហរដ្ឋអាមេរិក ប្រទេសវ៉េណេស៊ុយអេឡាបានដោះលែងអ្នកទោសនយោបាយ ប្រហែល ៣៥នាក់ កាលពីថ្ងៃអាទិត្យ និងកំពុងផ្ទៀងផ្ទាត់ពីករណីបន្ថែមទៀត។ នេះបើតាមអង្គការសិទ្ធិមនុស្ស Foro Penal ។

អង្គការសិទ្ធិមនុស្ស Foro Penal បានបញ្ជាក់លើកមុនថាអ្នកទោសនយោបាយ ៣៨៣ នាក់ត្រូវបានដោះលែងចាប់តាំងពី រដ្ឋាភិបាលវ៉េណេស៊ុយអេឡាបានប្រកាសនៅថ្ងៃទី ៨ ខែមករា ថាខ្លួននឹងចាប់ផ្តើមដោះលែងអ្នកទោសទាំងនោះឱ្យមានសេរីភាពវិញ។

គួរបញ្ជាក់ថា អ្នកទោសនយោបាយបក្សប្រឆាំងមាន លោក Juan Pablo Guanipa និង Freddy Superlano រួមទាំងលោកមេធាវី Perkins Rocha ផងដែរ។

លើសពីនេះ លោក Guanipa, Rocha និង លោក Superlano គឺជាមិត្តជិតស្និទ្ធរបស់អ្នកឈ្នះរង្វាន់ណូបែលសន្តិភាព របស់មេដឹកនាំខាងប្រឆាំង លោកស្រី Maria Corina Machado ។

លោក Rocha ដែលជាមេធាវីរបស់ចលនាប្រឆាំង Vente Venezuela ត្រូវបានឃុំខ្លួនក្នុងខែសីហា ឆ្នាំ ២០២៤ ពីបទភេរវកម្ម និងការចោទប្រកាន់ដែលពាក់ព័ន្ធផ្សេងទៀត។

គួរឱ្យដឹងថា អ្នកប្រឆាំង និងក្រុមសិទ្ធិមនុស្សរបស់ប្រទេសវ៉េណេស៊ុយអេឡា បានតស៊ូមតិអស់រយៈពេលច្រើនឆ្នាំមកហើយថា រដ្ឋាភិបាលសង្គមនិយមរបស់ប្រទេសនេះ ប្រើសិទ្ធិការឃុំខ្លួនរបស់ពួកគេ ដើម្បីលុបបំបាត់ការប្រឆាំង។

យ៉ាងណារដ្ឋាភិបាល អតីតមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ បដិសេធថាមិនបានចាប់អ្នកទោសនយោបាយនោះទេ ហើយលើកឡើងថា អ្នកជាប់ទោសទាំងនោះបានប្រព្រឹត្តបទឧក្រិដ្ឋ។ ក្រុមមន្ត្រីបានឱ្យដឹងថា មនុស្សជិត ៩០០ នាក់ ត្រូវបានដោះលែង ប៉ុន្តែពួកគេមិនច្បាស់ពីពេលវេលាឡើយ។ ចំណែករដ្ឋាភិបាលមិនបានផ្តល់បញ្ជីផ្លូវការណាមួយនៃចំនួនអ្នកទោសប៉ុន្មាននាក់ ដែលត្រូវដោះលែង ឬបង្ហាញអត្តសញ្ញាណរបស់ពួកគេនោះទេ៕

ប្រែសម្រួល៖ ណឺ មិនា

The post វ៉េណេស៊ុយអេឡា ដោះលែងអ្នកប្រឆាំងជាន់ខ្ពស់ ចំនួន ២រូប និងមេធាវីម្នាក់ appeared first on Kampuchea Thmey Daily.

វ៉េណេស៊ុយអេឡាដោះលែងអ្នកទោសនយោបាយជាង១០០នាក់ទៀត ក្រោយចាប់ម៉ាឌូរ៉ូ៣សប្តាហ៍

Minea Neu — Mon, 26 Jan 2026 07:17:10 +0000

អាជ្ញាធរប្រទេសវ៉េណេស៊ុយអេឡា បានដោះលែងមនុស្សជាង១០០នាក់ ដែលជាអ្នកទោសនយោបាយ។ នេះយោងតាមក្រុមសិទ្ធិមនុស្ស រួមទាំងមេធាវីដែលត្រូវបានជាប់ពន្ធនាគារក្នុងឆ្នាំ ២០២៤ បន្ទាប់ពីពួកគេបានទៅសួរសុខទុក្ខកូនក្តី នៅឯមន្ទីរឃុំឃាំង។

អ្នកទោសវ៉េណេស៊ុយអេឡា ត្រូវបានដោះលែង។ Reuters

យោងតាម Al Jazeera, មន្ត្រីមន្ទីរឃុំឃាំង Foro Penal ដែលមានមូលដ្ឋាននៅទីក្រុងការ៉ាកាស [Caracas] បានឱ្យដឹងថា អ្នកទោសយ៉ាងហោចណាស់១០៤នាក់ត្រូវបានដោះលែងកាលពីថ្ងៃអាទិត្យ ហើយចំនួនអ្នកទោសដែលគ្រោងដោះលែងអាចកើនឡើងបន្តទៀត។

លោក Tejeda ដែលជាមេធាវី និងជាសកម្មជនសិទ្ធិមនុស្ស ត្រូវបានគេឃើញវត្តមានចុងក្រោយរបស់លោកនៅថ្ងៃទី២ ខែសីហា ឆ្នាំ២០២៤ នៅពេលដែលមេធាវីរូបនេះ បានទៅមើលមណ្ឌលឃុំឃាំងក្នុងរដ្ឋការ៉ាបូបូ [ Carabobo] ដើម្បីផ្តល់ជំនួយផ្នែកច្បាប់ដល់អ្នកទោសនយោបាយ។ នេះបើយោងតាមអង្គការក្រៅរដ្ឋាភិបាល។

ចំណែក លោក Gonzalo Himiob អនុប្រធានមន្ទីរឃុំឃាំង Foro Penal បាននិយាយថា ចំនួននៃការចេញផ្សាយគឺ «មិនទាន់ច្បាស់លាស់» ហើយអាចកើនឡើង។

ប្រធានាធិបតីបណ្តោះអាសន្នវ៉េណេស៊ុយអេឡា លោកស្រី Delcy Rodriguez បានសន្យាថានឹងដោះលែងអ្នកទោសដែលត្រូវបានឃុំខ្លួនក្រោមការដឹកនាំរបស់អតីតប្រធានាធិបតី នីកូឡាស ម៉ាឌូរ៉ូ [Nicolas Maduro] នៅក្នុងសន្និសីទសារព័ត៌មានលើកដំបូងរបស់លោកស្រី បន្ទាប់ពីការចាប់ខ្លួនរបស់អតីតមេដឹកនាំ លោកម៉ាឌូរ៉ូ ដោយកងកម្លាំងពិសេសរបស់សហរដ្ឋអាមេរិកកាលពីដើមខែនេះ។

មិនតែប៉ុណ្ណោះ លោកស្រី Rodriguez បាននិយាយថា ចំណាត់ការដោះលែងអ្នកទោសរាប់រយនាក់ ដែលភាគច្រើនត្រូវបានចាប់នៅក្នុងការបង្រ្កាបលើការប្រឆាំង បន្ទាប់ពីការបដិសេធរបស់លោក ម៉ាឌូរ៉ូ ក្នុងការទទួលយកការបោះឆ្នោតប្រធានាធិបតីឆ្នាំ២០២៤ ដោយបានចាប់ផ្តើមនៃ «ពេលវេលានយោបាយថ្មី» ដែលអនុញ្ញាតឱ្យមានភាពចម្រុះផ្នែកនយោបាយ និងអ្នកប្រកួតប្រជែងច្រើន។

យ៉ាងណា មន្ទីរឃុំឃាំង Foro Penal បានឱ្យដឹងថាមានអ្នកទោសនយោបាយចំនួន ៧៧៧ នាក់ នៅក្នុងពន្ធនាគារប្រទេសវ៉េណេស៊ុយអេឡាគិតត្រឹមថ្ងៃទី១៩ ខែមករា៕

ប្រែសម្រួល៖ ណឺ មិនា

The post វ៉េណេស៊ុយអេឡាដោះលែងអ្នកទោសនយោបាយជាង១០០នាក់ទៀត ក្រោយចាប់ម៉ាឌូរ៉ូ៣សប្តាហ៍ appeared first on Kampuchea Thmey Daily.

របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល

Minea Neu — Mon, 05 Jan 2026 08:04:42 +0000

របបយោធាមីយ៉ាន់ម៉ាដោះលែងអ្នកទោស ៦ ០០០នាក់ទូទាំងប្រទេសក្នុងនោះមានទាំងអ្នកទោសជាតិ អន្តរជាតិ និងអ្នកទោសនយោបាយផង ឱ្យមានសេរីភាព ខណៈដែលប្រទេសប្រទេសនេះប្រារព្ធទិវាបុណ្យឯករាជ្យលើកទី៧៨ និងការរៀបចំការបោះឆ្នោតលើកដំបូងក្រោយរដ្ឋប្រហារ៦ឆ្នាំ។ បើតាមប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃអាទិត្យ។

លោក Min Aung Hlaing. Reuters

អ្នកទោសនយោបាយជាង ៣ ០០០នាក់ ត្រូវបានដោះលែងមុនការបោះឆ្នោតខែធ្នូរួចហើយ។ ប្រព័ន្ធផ្សព្វផ្សាយក្នុងស្រុក Eleven បានរាយការណ៍ថា ក្រុមប្រឹក្សាការពារជាតិ និងសន្តិសុខបានចេញដីកាលើកលែងទោសដល់ទណ្ឌិត និងអ្នកជាប់ឃុំចំនួន ៦ ១៣៤នាក់ ដូចជានៅក្នុងពន្ធនាគារ មណ្ឌលឃុំឃាំង និងជំរុំនានាទូទាំងប្រទេស។

សេចក្តីសម្រេចបានបន្តថា ការសម្រេចនេះត្រូវបានធ្វើឡើងក្នុងការរំឭកដល់ទិវាបុណ្យឯករាជ្យជាតិ ក្នុងគោលបំណង ផ្តល់សន្តិភាពផ្លូវចិត្ត គំនិតរបស់ប្រជាជន និងគោរពមនុស្សជាតិ។

ប្រធានាធិបតីស្តីទីរបស់មីយ៉ាន់ម៉ាក៏បានលើកលែងទោស និងនិរទេសអ្នកទោសបរទេសចំនួន ៥២នាក់ រួមទាំងពលរដ្ឋចិនដែលកំពុងជាប់ទោសនៅក្នុងពន្ធនាគារ និងមណ្ឌលឃុំឃាំងផ្សេងៗ។

បទបញ្ជានេះបាននិយាយថា វិធានការនេះត្រូវបានធ្វើឡើងដើម្បីប្រារព្ធទិវាឯករាជ្យ និងដើម្បីរក្សាទំនាក់ទំនងមិត្តភាពរវាងប្រទេស និងបន្តឱ្យមានការគោរពមនុស្សធម៌។

យ៉ាងណាកាលពីខែវិច្ឆិកា របបយោធាមីយ៉ាន់ម៉ាក៏បានផ្តល់ការលើកលែងទោសដល់អ្នកទោសនយោបាយជាង ៣ ០០០នាក់ ដោះលែងពួកគេមុនការបោះឆ្នោតខែធ្នូ និងទម្លាក់ការចោទប្រកាន់លើមនុស្ស ៥ ៥៨០នាក់ ដោយរបបនេះបញ្ជាឱ្យដោះលែងពួកគេ។

គួរឱ្យដឹងផងដែរថា ការកាន់កាប់ដោយយោធានៅឆ្នាំ២០២១ របស់ប្រទេសនេះបានបណ្តេញរដ្ឋាភិបាលជាប់ឆ្នោតដែលដឹកនាំដោយគណបក្សសម្ព័ន្ធជាតិដើម្បីប្រជាធិបតេយ្យ (NLD) ប៉ុន្តែរដ្ឋប្រហារត្រូវបានកើតឡើងជាមួយនឹងភាពចលាចលរបស់ប្រជាពលរដ្ឋរីករាលដាលក្នុងប្រទេស។

ជាក់ស្តែងរបបយោធាបានគាបសង្កត់ការតវ៉ានានាដោយហិង្សា ហើយមនុស្សរាប់ពាន់នាក់ត្រូវបានចាប់ដាក់គុក រួមទាំងមេដឹកនាំគណបក្ស សម្ព័ន្ធជាតិដើម្បីប្រជាធិបតេយ្យ លោកស្រី អ៊ុងសានស៊ូជី [Aung San Suu Kyi] ដែលត្រូវបានកាត់ទោសឱ្យជាប់ពន្ធនាគារសរុបចំនួន ៣៣ឆ្នាំ៕

ប្រែសម្រួល៖ ណឺ មិនា

The post របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល appeared first on Kampuchea Thmey Daily.

មីយ៉ាន់ម៉ាសុខចិត្តដោះលែងអ្នកទោសនេសាទថៃ៤នាក់ ក្រោយសម្របសម្រួលជិតកន្លះឆ្នាំ

Bun sopheap — Sat, 29 Mar 2025 00:07:27 +0000

អ្នកនេសាទថៃ៤នាក់ដែលត្រូវបានចាប់ខ្លួនដោយកងទ័ពជើងទឹកមីយ៉ាន់ម៉ាពីបទនេសាទខុសច្បាប់ចូលដែនទឹកមីយ៉ាន់ម៉ា នៅជិតខេត្ត Ranong របស់ប្រទេសថៃកាលពីថ្ងៃទី៣០ខែវិច្ឆិកា ឆ្នាំ២០២៤ ត្រូវបានដោះលែងឲ្យមានសេរីភាពវិញ។ នេះបើយោងតាមការចេញផ្សាយរបស់សារព័ត៌មាន The Nation នៅថ្ងៃទី២៨ខែមីនានេះ។

(រូបភាព៖ The Nation)

នៅថ្ងៃទី២៨ខែមីនា អ្នកសារព័ត៌មានបានបញ្ជាក់ថា ក្រុមប្រឹក្សារដ្ឋបាលរដ្ឋរបស់មីយ៉ាន់ម៉ា (SAC) បានចេញដីកាសម្រេចកាលថ្ងៃទី២៧ខែមីនា លើកលែងទោសចំពោះអ្នកនេសាទថៃទាំង៤នាក់ ដោយអនុញ្ញាតឱ្យពួកគេចាកចេញពីប្រទេស។

ការចុះផ្សាយនោះ បានឲ្យដឹងថា ប្រធាន SAC បានដោះលែងអ្នកទោសជនជាតិថៃបួននាក់ដែលឃុំខ្លួននៅពន្ធនាគារ Kawthaung រួមជាមួយនឹងជនជាតិហ្វីលីពីនបីនាក់ដែលកំពុងជាប់ឃុំក្នុងពន្ធនាគារ Hpa-An។ បុគ្គលទាំងនោះក៏នឹងត្រូវនិរទេសចេញពីប្រទេសមីយ៉ាន់ម៉ាផងដែរ ដោយឆ្លុះបញ្ចាំងពីការពិចារណាលើទំនាក់ទំនងទ្វេភាគី និងកត្តាមនុស្សធម៌។

(រូបភាព៖ The Nation)

គួររម្លឹកថាកាលពីថ្ងៃទី៣០ ខែវិច្ឆិកា ឆ្នាំ២០២៤ នាវាចម្បាំងមីយ៉ាន់ម៉ាបានបើកការបាញ់ប្រហារលើនាវានេសាទថៃចំនួន៣គ្រឿងដែលកំពុងប្រតិបត្តិការក្នុងដែនទឹកថៃក្បែរកោះPhayam។ ការវាយប្រហារនេះបានបណ្តាលឲ្យសមាជិកនាវិកម្នាក់ស្លាប់ និង ៣១ នាក់ផ្សេងទៀតចាប់ខ្លួន ក្នុងនោះមានជនជាតិថៃ ៤ នាក់ និងជនជាតិមីយ៉ាន់ម៉ា ២៧ នាក់ផងដែរ។

របាយការណ៍បង្ហាញថា នៅពេលកប៉ាល់កងទ័ពជើងទឹកមីយ៉ាន់ម៉ាចូលជិត អ្នកនេសាទថៃបានព្យាយាមរត់គេចខ្លួនដោយកាត់អួន និងបង្កើនល្បឿនម៉ាស៊ីនទូករបស់ពួកគេ។ ទូកនេសាទថៃពីរគ្រឿងឈ្មោះ Ranong 333 និង Charoenchai 8 ត្រូវបានចាប់យកចូលក្នុងដែនទឹកមីយ៉ាន់ម៉ា។ ជាមួយគ្នានេះដែរ សមាជិកនាវិកពីរនាក់នៅលើទូក បានរងរបួស ដោយម្នាក់ដោយសារគ្រាប់កាំភ្លើង និងម្នាក់ទៀតដោយសារឆក់ខ្សែភ្លើង។

គួរបញ្ជាក់ថាការដោះលែងអ្នកនេសាទថៃ ធ្វើឡើងមុនកិច្ចប្រជុំកំពូលរបស់ប្រទេសថៃ នៃគំនិតផ្តួចផ្តើមឈូងសមុទ្រ Bengal សម្រាប់កិច្ចសហប្រតិបត្តិការបច្ចេកទេស និងសេដ្ឋកិច្ចពហុវិស័យ (BIMSTEC) ចាប់ពីថ្ងៃទី ២-៤ ខែមេសា។ ព្រឹត្តិការណ៍នេះត្រូវបានគេរំពឹងថានឹងទាក់ទាញការយកចិត្តទុកដាក់ការទូតយ៉ាងសំខាន់ ជាពិសេសទាក់ទងនឹងថាតើឧត្តមសេនីយឯក Min Aung Hlaing (មីន អ៊ុងលាំង)មេដឹកនាំរដ្ឋាភិបាលយោធាមីយ៉ាន់ម៉ានឹងចូលរួមដែរឬយ៉ាងណា៕

(រូបភាព៖ Bangkok Post)

(រូបភាព៖ The Nation)

អត្ថបទ៖ ប៊ុន សុភាព

The post មីយ៉ាន់ម៉ាសុខចិត្តដោះលែងអ្នកទោសនេសាទថៃ៤នាក់ ក្រោយសម្របសម្រួលជិតកន្លះឆ្នាំ appeared first on Kampuchea Thmey Daily.

ក្រុមហាម៉ាស ដោះលែងចំណាប់ខ្មាំងនៅរស់៦នាក់និងប្រគល់សាកសព៦នាក់បន្ថែមទៀត

Bun sopheap — Wed, 19 Feb 2025 09:02:45 +0000

ក្រុមហាម៉ាសនឹងដោះលែងចំណាប់ខ្មាំងអ៊ីស្រាអែលនៅរស់ចំនួនប្រាំមួយនាក់នៅថ្ងៃសៅរ៍ ហើយនឹងប្រគល់សាកសព៤នាក់ទៀតនៅថ្ងៃព្រហស្បតិ៍ ដែលជាការពន្លឿនដោះលែងដ៏គួរឱ្យភ្ញាក់ផ្អើល។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៩ខែកុម្ភៈឆ្នាំ២០២៥។

(រូបភាព៖ AP)

អ្នកទាំងប្រាំមួយគឺជាចំណាប់ខ្មាំងនៅរស់ចុងក្រោយដែលនឹងត្រូវដោះលែងក្នុងដំណាក់កាលដំបូងនៃបទឈប់បាញ់ជាថ្នូរនឹងជនជាតិប៉ាឡេស្ទីនរាប់រយនាក់ដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែល។

យោងតាមសេចក្តីប្រកាសរបស់មេដឹកនាំក្រុមហាម៉ាសលោក Khalil al-Hayya កាលពីថ្ងៃអង្គារ, សពដែលនឹងប្រគល់រួមមានទាំង «គ្រួសារ Bibas» ដែលមានក្មេងប្រុសពីរនាក់និងម្តាយរបស់ពួកគេផងដែរ។ អ៊ីស្រាអែលបានសម្តែងការព្រួយបារម្ភយ៉ាងខ្លាំងអំពី Shiri Bibas និងកូនប្រុសរបស់នាង Kfirអាយុ៩ខែជាចំណាប់ខ្មាំងក្មេងជាងគេ និង Ariel ដែលក្រុមហាម៉ាសបានអះអាងថាត្រូវបានសម្លាប់ក្នុងការវាយប្រហារតាមអាកាសរបស់អ៊ីស្រាអែល។ ប្តីនិងជាឪពុកលោក Yarden Bibas ត្រូវបានចាប់ពង្រត់ដោយឡែកពីគ្នា ហើយត្រូវបានដោះលែងក្នុងខែនេះ។ អ៊ីស្រាអែលមិនបានបញ្ជាក់ពីការស្លាប់របស់ពួកគេទេ ហើយការិយាល័យនាយករដ្ឋមន្ត្រីបានជំរុញសាធារណជនកុំឱ្យចែកចាយ «រូបថត ឈ្មោះ និងពាក្យចចាមអារ៉ាម»។

ចំណែកចំណាប់ខ្មាំងទាំងប្រាំមួយនាក់ដែលគ្រោងនឹងដោះលែងគឺមាន Eliya Cohen អាយុ២៧ឆ្នាំ, Omer Shem Tov អាយុ២២ឆ្នាំ, Omer Wenkert អាយុ២៣ឆ្នាំ ត្រូវបានចាប់ពង្រត់ពីមហោស្រពតន្ត្រី។ Hisham Al-Sayed អាយុ ៣៦ឆ្នាំ និង Avera Mengistuអាយុ ៣៩ឆ្នាំ អ្នកទាំងពីរត្រូវបានឃុំខ្លួនចាប់តាំងពីមុនការវាយប្រហារថ្ងៃទី ៧ ខែតុលា ឯTal Shoham ត្រូវបានចាប់ចេញពីសហគមន៍ Kibbutz Beeri ។

(រូបភាព៖ CNN)

ការដោះលែងអ្នកទាំងប្រាំមួយក្នុងសប្តាហ៍នេះ នឹងបង្ហាញពីការបង្កើនល្បឿននៃកិច្ចព្រមព្រៀងឈប់បាញ់ ដែលបានអំពាវនាវឱ្យក្រុមហាម៉ាសដោះលែងចំណាប់ខ្មាំងបីនាក់នៅថ្ងៃសៅរ៍ ហើយបីនាក់ទៀតនឹងត្រូវបានដោះលែងមួយសប្តាហ៍ក្រោយមក។ អ៊ីស្រាអែលត្រូវបានគេរំពឹងថានឹងបន្តដោះលែងអ្នកទោសប៉ាឡេស្ទីនរាប់រយនាក់ទៀត។

គួរបញ្ជាក់ថាដំណាក់កាលទីមួយនៃកិច្ចព្រមព្រៀងនេះ អំពាវនាវឱ្យក្រុមហាម៉ាសដោះលែងជាបណ្តើរៗ ចំណាប់ខ្មាំងអ៊ីស្រាអែលចំនួន ៣៣ នាក់ ដែលក្នុងនោះ៨ បានស្លាប់។ រហូតមកដល់ពេលនេះ ចំណាប់ខ្មាំងជនជាតិអ៊ីស្រាអែលចំនួន ១៩ នាក់ត្រូវបានដោះលែងក្នុងដំណាក់កាលបច្ចុប្បន្ន រួមទាំងកម្មករកសិករថៃ ៥ នាក់ដែលត្រូវបានចាប់ពង្រត់។ ដំណាក់កាលបច្ចុប្បន្ននៃបទឈប់បាញ់បន្តរហូតដល់ដើមខែមីនា ហើយការពិភាក្សាលើដំណាក់កាលទីពីរនឹងចាប់ផ្តើមនៅដើមខែមីនា៕

(រូបភាព៖ AP)

អត្ថបទ៖ ប៊ុន សុភាព

The post ក្រុមហាម៉ាស ដោះលែងចំណាប់ខ្មាំងនៅរស់៦នាក់និងប្រគល់សាកសព៦នាក់បន្ថែមទៀត appeared first on Kampuchea Thmey Daily.

របបយោធាមីយ៉ាន់ម៉ាដោះលែងអ្នកទោសរាប់ពាន់នាក់អាចរួមមានអ្នកនេសាទថៃផង

Bun sopheap — Sat, 04 Jan 2025 08:39:13 +0000

មេដឹកនាំរបបយោធារបស់ប្រទេសមីយ៉ាន់ម៉ាដោះលែងអ្នកទោសជាប់ឃុំចំនួនច្រើនរហូតដល់ ៥៨៦៤នាក់ រួមទាំងជនបរទេសចំនួន១៨០នាក់ ក្នុងថ្ងៃប្រារព្ធខួបលើកទី៧៧នៃទិវាឯករាជ្យ ដែលមីយ៉ាន់ម៉ាទទួលបានពីការគ្រប់គ្រងរបស់ប្រទេសអង់គ្លេស។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី៤ខែធ្នូនេះ។

(រូបភាព៖ AP)

យោងការផ្សាយរបស់ទូរទស្សន៍រដ្ឋ MRTV របបយោធាបានបញ្ជាឱ្យដោះលែង ដោយហេតុផលមនុស្សធម៌ និងមេត្តាធម៌ ហើយនឹងកាត់បន្ថយការកាត់ទោសមួយជីវិតរបស់អ្នកទោស១៤៤នាក់មកត្រឹម១៥ឆ្នាំវិញ។ ប៉ុន្តែព័ត៌មានលម្អិតពីការកាត់ទោសនិងសញ្ជាតិរបស់អ្នកទោសបរទេសដែលត្រូវបានកំណត់ឱ្យនិរទេសនៅពេលដោះលែងនោះ មិនត្រូវបានប្រកាសឲ្យដឹងនោះទេ។

ទោះយ៉ាងណាបើតាមទីភ្នាក់ងារសារព័ត៌មាន Associated Press បាននិយាយថា ជនបរទេសដែលត្រូវដោះលែងអាចរួមមានអ្នកនេសាទថៃ៤នាក់ ដែលត្រូវបានចាប់ខ្លួនដោយកងទ័ពជើងទឹកមីយ៉ាន់ម៉ាកាលពីចុងខែវិច្ឆិកា បន្ទាប់ពីទូកល្បាតមីយ៉ាន់ម៉ាបានបើកការបាញ់ប្រហារលើនាវានេសាទថៃនៅក្នុងដែនទឹកជិតព្រំដែនសមុទ្រ Andaman ខណៈនាយករដ្ឋមន្ត្រីថៃធ្លាប់បាននិយាយដោយរំពឹងថា អ្នកទាំងបួននឹងត្រូវដោះលែងនៅថ្ងៃបុណ្យឯករាជ្យនេះ។

គួររម្លឹកថា មីយ៉ាន់ម៉ាតែងតែផ្តល់ការលើកលែងទោសដល់មនុស្សរាប់ពាន់នាក់ ដើម្បីរំលឹកថ្ងៃបុណ្យ ឬពិធីបុណ្យព្រះពុទ្ធសាសនា។ កាលពីឆ្នាំមុន រដ្ឋាភិបាលយោធាក៏បានប្រកាសដោះលែងអ្នកទោសជាង៩០០០នាក់ ដើម្បីប្រារព្ធពិធីឯករាជ្យនេះផងដែរ។

(រូបភាព៖ AP)

ក្នុងចំណោមអ្នកដែលនៅតែជាប់ពន្ធនាគារមានអតីតមេដឹកនាំប្រទេសគឺអ្នកឈ្នះរង្វាន់ណូបែលលោកស្រី Aung San Suu Kyi អាយុ៧៩ឆ្នាំដែលជាអ្នកនយោបាយដ៏លេចធ្លោរមួយរួប។ ស្រ្តីរូបនេះកំពុងជាប់ពន្ធនាគាររយៈពេល២៧ ឆ្នាំពីបទចោទប្រកាន់ព្រហ្មទណ្ឌចំនួន១៤ករណីដែលធ្វើឡើងដោយយោធារបស់លោកស្រី រាប់ចាប់ពីការញុះញង់ និងការក្លែងបន្លំការបោះឆ្នោត រហូតដល់អំពើពុករលួយ បើទោះបីលោកស្រីបានបដិសេធរាល់ការចោទប្រកាន់នេះក៏ដោយ។

ពិធីបុណ្យឯករាជ្យនៅឆ្នាំនេះត្រូវបានធ្វើឡើងនៅក្នុងរដ្ឋធានី Naypyidaw របស់មីយ៉ាន់ម៉ា ហើយមានតំណាងរដ្ឋាភិបាល និងយោធាចំនួន ៥០០ នាក់ចូលរួម។ សុន្ទរកថារបស់ប្រមុខយោធាមីយ៉ាន់ម៉ា នាយឧត្តមសេនីយ៍ Min Aung Hlaing ដែលមិនមានវត្តមាននៅក្នុងព្រឹត្តិការណ៍នោះ ត្រូវបានថ្លែងជំនួសដោយឧបនាយករដ្ឋមន្ត្រី និងឧត្តមសេនីយ៍កងទ័ព Soe Win។ នៅក្នុងសុន្ទរកថា លោកបានអំពាវនាវដល់ក្រុមប្រដាប់អាវុធជនជាតិភាគតិច ដែលបានប្រឆាំងនឹងការគ្រប់គ្រងរបស់យោធារយៈពេល ៤ ឆ្នាំចុងក្រោយនេះ ឱ្យទម្លាក់អាវុធរបស់ពួកគេ និង ដោះស្រាយបញ្ហានយោបាយតាមរយៈមធ្យោបាយសន្តិវិធី។

គួរបញ្ជាក់ថា ប្រទេសមីយ៉ាន់ម៉ាបានស្ថិតក្នុងភាពចលាចលចាប់តាំងពីដើមឆ្នាំ២០២១ ដោយសារយោធាបានផ្តួលរំលំរដ្ឋាភិបាលស៊ីវិល ហើយបានបង្ក្រាបយ៉ាងហិង្សាលើការតវ៉ាគាំទ្រលទ្ធិប្រជាធិបតេយ្យ ដែលនាំឱ្យមានការបះបោរប្រដាប់អាវុធទូទាំងប្រទេសដែលបានធ្វើឱ្យមានការកើនឡើងយ៉ាងខ្លាំងប្រឆាំងនឹងយោធានៅលើសមរភូមិ៕

(រូបភាព៖ AP)

(រូបភាព៖ AP) លោក Min Aung Hlaing មេដឹកនាំរបបសឹកមីយ៉ាន់ម៉ា

អត្ថបទ៖ ប៊ុន សុភាព

The post របបយោធាមីយ៉ាន់ម៉ាដោះលែងអ្នកទោសរាប់ពាន់នាក់អាចរួមមានអ្នកនេសាទថៃផង appeared first on Kampuchea Thmey Daily.

លោក Maduro បញ្ជាឲ្យដោះលែងមនុស្សជាង១០០នាក់ ដែលត្រូវចោទអំឡុងការបោះឆ្នោត

Bun sopheap — Fri, 13 Dec 2024 05:30:36 +0000

រដ្ឋាភិបាលរបស់ប្រធានាធិបតីវ៉េណេស៊ុយអេឡា លោក Nicolas Maduro បានដោះលែងមនុស្ស១០៣នាក់ ដែលជាប់ពន្ធនាគារ អំឡុងការតវ៉ានៅពេលរបោះឆ្នោតកាលពីខែកក្កដា ខណៈក្រុមប្រឆាំងចោទប្រកាន់ថា លោក Maduro បានលួចសន្លឹកឆ្នោតនាពេលនោះ។

(រូបភាព៖ AP)

សារព័ត៌មាន Aljazeera បានផ្សាយថា លោករដ្ឋមន្ត្រីសន្តិសុខជាតិ លោក Diosdado Cabello បានប្រកាសពីការដោះលែងអ្នកទោសនៅក្នុងសេចក្តីថ្លែងការណ៍ជាលាយលក្ខណ៍អក្សរកាលពីថ្ងៃព្រហស្បតិ៍ថា លោក Maduro បានណែនាំរដ្ឋាភិបាលឱ្យពិនិត្យឡើងវិញ «ករណីទាំងអស់ទាក់ទងនឹងអំពើហិង្សានិងឧក្រិដ្ឋកម្មដែលបានប្រព្រឹត្តនៅក្នុងក្របខ័ណ្ឌនៃការបោះឆ្នោត»។

អ្នកទោស១០៣នាក់ត្រូវបានដោះលែងក្នុងអំឡុងពេល៧២ម៉ោងចាប់ពីថ្ងៃអង្គារដល់ថ្ងៃព្រហស្បតិ៍។ ចំណែកអ្នកទោសចំនួន២២៥នាក់ផ្សេងទៀតក៏ត្រូវបានដោះលែងដែរ ប៉ុន្តែតម្រូវឱ្យពួកគេបង្ហាញខ្លួននៅចំពោះមុខតុលាការរៀងរាល់ ៣០ ថ្ងៃម្តង។ នេះបើយោងតាមការិយាល័យអគ្គមេធាវីតំណាងពួកគេ។

គួរបញ្ជាក់ថា ប៉ុន្មានម៉ោងបន្ទាប់ពីការបោះឆ្នោតថ្ងៃទី ២៨ខែកក្កដា អាជ្ញាធរបោះឆ្នោតវេណេស៊ុយអេឡាបានប្រកាសថាលោក Maduro ជាអ្នកឈ្នះឆ្នោតអាណត្តិទី៣ បើទោះបីជាការស្ទង់មតិមុនការបោះឆ្នោតដែលបង្ហាញថាគាត់តាមពីក្រោយមេដឹកនាំបក្សប្រឆាំងលោក Edmundo Gonzalez ។

ប៉ុន្តែអ្នករិះគន់ថាមន្ត្រីនៅក្នុងតំបន់សំខាន់ៗមួយចំនួនបានបដិសេធមិនបញ្ចេញតារាងសន្លឹកឆ្នោតដែលជាផ្នែកស្តង់ដារនៃដំណើរការបោះឆ្នោតនៅវ៉េណេស៊ុយអេឡា។ ហើយរដ្ឋាភិបាលបានឆ្លើយតបនឹងការបង្រ្កាបយ៉ាងតឹងរ៉ឹងទាំងបាតុករ និងសមាជិកបក្សប្រឆាំង។ យ៉ាងហោចណាស់មនុស្ស ២៨ នាក់បានស្លាប់ និងជិត ២០០ នាក់បានរងរបួស ខណៈដែលកងកម្លាំងសន្តិសុខបានប៉ះទង្គិចជាមួយក្រុមអ្នកតវ៉ាទូទាំងប្រទេស។ ក្នុងនោះតួលេខរបស់រដ្ឋាភិបាលបង្ហាញថាមនុស្សប្រហែល ២ ពាន់នាក់ត្រូវបានចាប់ខ្លួន៕

(រូបភាព៖ AP)

អត្ថបទ៖ ប៊ុន សុភាព

The post លោក Maduro បញ្ជាឲ្យដោះលែងមនុស្សជាង១០០នាក់ ដែលត្រូវចោទអំឡុងការបោះឆ្នោត appeared first on Kampuchea Thmey Daily.

ការដោះលែងអ្នកទោស Archives - Kampuchea Thmey Daily

ក្រោយ​ឡើង​ជា​ប្រធានាធិបតីមីយ៉ាន់​ម៉ា មីន ​អ៊ុងឡាំង​ ដោះ​លែង​អ្នក​ទោស​ជាង​ ៤ពាន់​នាក់​

វ៉េណេស៊ុយ​អេឡា ដោះ​លែងអ្នកប្រឆាំង​ជាន់​ខ្ពស់​ ចំនួន​​​ ​២រូប​​ និង​មេធាវី​ម្នាក់​​

​វ៉េណេស៊ុយ​អេឡា​ដោះលែង​​អ្នក​ទោស​នយោបាយជាង១០០​នាក់​ទៀត ក្រោយ​ចាប់ម៉ាឌូរ៉ូ​​​៣សប្តាហ៍​

របបសឹក​មីយ៉ាន់ម៉ាដោះ​លែង​អ្នកទោស​​ជាង​៦០០០​នាក់​​​មុនបោះឆ្នោត​​​​​សកល

មីយ៉ាន់ម៉ា​​សុខចិត្ត​ដោះលែង​អ្នក​ទោស​នេសាទ​ថៃ​៤នាក់​ ក្រោយសម្របសម្រួល​ជិតកន្លះឆ្នាំ​​

ក្រុមហាម៉ាស ដោះលែងចំណាប់ខ្មាំងនៅរស់៦នាក់និងប្រគល់សាកសព៦នាក់បន្ថែមទៀត

របប​យោធា​មីយ៉ាន់ម៉ា​ដោះលែង​អ្នក​ទោស​រាប់​ពាន់​នាក់អាច​​រួម​មានអ្នកនេសាទថៃ​ផង

លោក Maduro បញ្ជា​​ឲ្យ​ដោះលែងមនុស្សជាង​១០០នាក់ ដែលត្រូវ​ចោទ​អំឡុងការបោះឆ្នោត

ក្រោយឡើងជាប្រធានាធិបតីមីយ៉ាន់ម៉ា មីន អ៊ុងឡាំង ដោះលែងអ្នកទោសជាង ៤ពាន់នាក់

វ៉េណេស៊ុយអេឡា ដោះលែងអ្នកប្រឆាំងជាន់ខ្ពស់ ចំនួន ២រូប និងមេធាវីម្នាក់

វ៉េណេស៊ុយអេឡាដោះលែងអ្នកទោសនយោបាយជាង១០០នាក់ទៀត ក្រោយចាប់ម៉ាឌូរ៉ូ៣សប្តាហ៍

របបសឹកមីយ៉ាន់ម៉ាដោះលែងអ្នកទោសជាង៦០០០នាក់មុនបោះឆ្នោតសកល

មីយ៉ាន់ម៉ាសុខចិត្តដោះលែងអ្នកទោសនេសាទថៃ៤នាក់ ក្រោយសម្របសម្រួលជិតកន្លះឆ្នាំ

របបយោធាមីយ៉ាន់ម៉ាដោះលែងអ្នកទោសរាប់ពាន់នាក់អាចរួមមានអ្នកនេសាទថៃផង

លោក Maduro បញ្ជាឲ្យដោះលែងមនុស្សជាង១០០នាក់ ដែលត្រូវចោទអំឡុងការបោះឆ្នោត