ការបង្រៀនកូនៗ Archives - Kampuchea Thmey Daily

ជាឪពុកម្ដាយ ត្រូវធ្វើបែបណា នៅពេលដែលកូននិយាយកុហក

សាង ស្រីល័ក្ខ — Thu, 26 May 2022 04:53:49 +0000

ការនិយាយកុហក បានកើតឡើងជាទូទៅហើយក្នុងសង្គមបច្ចុប្បន្ននេះ។ មិនថាតែក្មេងៗ សូម្បី មនុស្សធំក៏មានទម្លាប់និយាយកុហក រហូតក្មេងយកតម្រាប់តាម។

ប៉ុន្តែតើយើងយល់យ៉ាងណា និងគួរធ្វើយ៉ាងណា ពេលកូននិយាយកុហក? តើដោះស្រាយ និងបង្រៀនក្មេងៗដោយរបៀបណាទើបរកមូលហេតុពិតឃើញ?

ហេតុអ្វីបានជាក្មេងៗកុហក កុមារតូចៗ ជាធម្មតានៅអាយុក្រោម ៦ ឆ្នាំ ច្រើនដង ពួកគេនៅតែមិនអាចបែងចែកយ៉ាងច្បាស់ រវាងការស្រមើលស្រមៃ និងការពិត។ ការកុហក អាចជាការបង្ហាញនៃការស្រមើលស្រមៃ។ ចំពោះកុមារដែលមានអាយុច្រើនគួរសម ការកុហក អាចត្រូវបានប្រើប្រាស់ដើម្បីចៀសវាងបញ្ហាមួយចំនួន។

ហេតុផលទូទៅដូចជា៖

-ការភ័យខ្លាចនៃការផ្ដន្ទាទោស
-ចៀសវាងអ្វីដែលមិនចង់ធ្វើ ដូចជាកិច្ចការផ្ទះ ការសម្អាត
-មិនចង់ឲ្យឪពុកម្ដាយខកចិត្ត ទើបកុហក
-មានអារម្មណ៍មិនសប្បាយចិត្ត ជាមួយនឹងអ្វីមួយនៅក្នុងជីវិត
-ចង់ឲ្យនរណាម្នាក់យកចិត្តទុកដាក់ មកលើគេ។

អ្វីដែលត្រូវធ្វើ នៅពេលក្មេងនិយាយកុហក កុំដាក់ទោសដោយហឹង្សា ការដាក់ទណ្ឌកម្ម បានជះឥទ្ធិពលដល់ពួកគេមិនសូវនិយាយការពិត។ ជំនួសឲ្យហិង្សា សូមស្វែងរកមូលហេតុនៃបញ្ហា។ ក្នុងនាមជាឪពុកម្ដាយ ឬអាណាព្យាបាល អ្នកត្រូវដឹងពីមូលហេតុដែលកុមារនិយាយពាក្យកុហក មកកាន់អ្នកសិន។ ដូច្នេះ ត្រូវធ្វើឲ្យកុមារមានអារម្មណ៍ស្រួលក្នុងការនិយាយជាមួយ។ ស្ដាប់ដោយប្រុងប្រយ័ត្ន ចំពោះបញ្ហា ហើយបង្រៀនពួកគេឲ្យស្គាល់ពីផលវិបាកនៃការកុហក។ ជាឧទាហរណ៍ កូនរបស់អ្នកប្រហែលជាត្រូវផ្ដល់សំណងដោយការធ្វើការងារផ្ទះ ដែលសមស្របនឹងអាយុរបស់ពួកគេ។

ម៉្យាងអ្នកក៏អាចបង្រៀន និងពន្យល់ពីគុណវិបត្តិនៃការនិយាយកុហករបស់ក្មេងបានដែរ។ ទន្ទឹមនោះ ការសរសើរ អាចបង្កើតគំនិតល្អ ដើម្បីលើកទឹកចិត្តឲ្យមានភាពស្មោះត្រង់ ពេលកូនជ្រើសរើសនិយាយការពិត។

ត្រូវចងចាំថា ការនិយាយកុហករបស់កុមារម្នាក់ៗ អាចជាហេតុផលខុសៗគ្នានៅក្នុងការបកស្រាយអ្វីមួយ។ ជាពិសេសក្នុងនាមជាឪពុកម្ដាយ ត្រូវសិក្សានិងស្វែងយល់ឲ្យច្បាស់ពីបញ្ហា ចៀសវាងឲ្យកុមារមានការភិតភ័យ និងតក់ស្លុតឡើងមក៕

ប្រែសម្រួល៖ សាង ស្រីល័ក្ខ

ចុចអាន៖ជំនាញសង្គមទាំង ៥ ឪពុកម្ដាយគួរ បង្រៀនកូនៗឲ្យចេះចាំ

ចុចអាន៖ហេតុអ្វីបានជាកុមារ ប្រើពាក្យអាសអាភាស នៅក្នុងប្រព័ន្ធផ្សព្វផ្សាយតាមអ៉ីនធឺណិត?

The post ជាឪពុកម្ដាយ ត្រូវធ្វើបែបណា នៅពេលដែលកូននិយាយកុហក appeared first on Kampuchea Thmey Daily.

តើការអប់រំកូនដោយប្រើដៃជើង ពិតជាមាន ប្រសិទ្ធភាព?

សាង ស្រីល័ក្ខ — Fri, 04 Feb 2022 06:40:35 +0000

ការវាយកូន ដោយសម្អាងថា ដើម្បីឲ្យកូនល្អ គឺជាប្រធានបទមួយដែលត្រូវបានលើកមកវែកញែកយ៉ាងទូលំទូលាយក្នុងចំណោមគ្នាយើងដែលជាម៉ាក់ប៉ាគេ។ អ្នកជំនាញភាគច្រើនណែនាំមិនឲ្យប្រើការដាក់ទណ្ឌកម្មលើរាងកាយកូនទេ ប៉ុន្តែម៉ាក់ប៉ាមួយចំនួនជឿថា ការអប់រំកូនដោយការវាយ ឬប្រើដៃជើង គឺជាយុទ្ធសាស្ត្រវិន័យ ពត់លត់ដំកូនឲ្យត្រង់ដ៏មានប្រសិទ្ធភាព។

ម៉ាក់ប៉ាអាចពឹងផ្អែកទៅលើការវាយ ឬប្រើហិង្សាដើម្បីកែលម្អបញ្ហាអាកប្បកិរិយាមិនស្ដាប់បង្គាប់ ឬច្រឡើសបើសរបស់កូនដោយមិនទាន់ព្យាយាមប្រើវិធីសាស្ត្រផ្សេងសម្រាប់ដាក់វិន័យលើកូន។ ចុះការអប់រំកូនដោយប្រើហិង្សាពិតជាអាក្រក់ដូចដែលអ្នកជំនាញជាច្រើនលើកឡើងមែនឬអត់?

យោងតាមការស្រាវជ្រាវជាច្រើនអះអាងថា ការអប់រំកូនដោយការដាក់ទណ្ឌកម្មលើរាងកាយអាចមានប្រសិទ្ធភាពបានមួយរយៈពេលខ្លី ដើម្បីបញ្ឈប់កាយវិការមិនសមរម្យរបស់ក្មេង ព្រោះក្មេងៗខ្លាចឈឺពេលម៉ាក់ប៉ាវាយម្ដងៗ។ ប៉ុន្តែ បើគិតពីផលប៉ះពាល់រយៈពេលវែងវិញ គឺការប្រើដៃជើងកាន់តែធ្វើឲ្យកុមារឆេវឆាវ មានរបួសរាងកាយ ចរិតកោងកាច និងអាចប្រឈមកើតបញ្ហាផ្លូវចិត្តផងដែរ។

ម៉្យាងវិញទៀត ការអប់រំកូនដោយការដាក់ទណ្ឌកម្មលើរាងកាយ នឹង បង្រៀនក្មេងៗថា ការប្រើហិង្សាមិនមែនជាបញ្ហាទេសម្រាប់មនុស្សដែលមានមាឌធំជាងខ្លួន ឬមានកម្លាំងខ្លាំងជាងខ្លួន ឬប្រើហិង្សាលើមនុស្សទន់ខ្សោយដែលពួកគេមិនចូលចិត្ត។ ការអប់រំកូនដោយប្រើហិង្សាក៏បង្កើនភាពអាម៉ាស់ និងបំបាក់ទឹកចិត្តកូនជាជាងជួយរកដំណោះស្រាយសមស្របនៃដើមចមរបស់បញ្ហា។ លើសពីនេះ ពេលកូនកាន់តែវិវត្តចូលវ័យជំទង់ ការប្រើដៃប្រើជើងដើម្បីអប់រំកូនកាន់តែលែងមានប្រសិទ្ធភាព និងអាចក្លាយជាគំរូអាក្រក់ក្នុងការចិញ្ចឹមកូនទៀតផង។

ក្នុងការចិញ្ចឹមកូនម្នាក់ៗឲ្យធំពេញវ័យពិតជាមិនស្រួលដូចបកចេកមែន ប៉ុន្តែម៉ាក់ប៉ាត្រូវតែមានភាពអត់ធ្មត់ខ្លាំង និងត្រូវស្វែងរកតិចនិកដាក់វិន័យកូនត្រឹមត្រូវដែលស័ក្ដិសមសម្រាប់ក្រុមគ្រួសារដោយមិនបង្កហិង្សា៕

អត្ថបទផ្ដល់ដោយ៖ Hello Krupet

ចុចអាន៖ប៉ាម៉ាក់ផ្ដល់ការស្រឡាញ់មិនស្មើគ្នា អាចប៉ះពាល់ការលូតលាស់របស់កូន

ចុចអាន៖ចង់ឲ្យកូនក្លាយជាអ្នកពូកែរកស៊ី មកដឹងគន្លឹះ បង្រៀនប៉ុន្មានក្បាច់នេះ

The post តើការអប់រំកូនដោយប្រើដៃជើង ពិតជាមាន ប្រសិទ្ធភាព? appeared first on Kampuchea Thmey Daily.

ប៉ាម៉ាក់ផ្ដល់ការស្រឡាញ់មិនស្មើគ្នា អាចប៉ះពាល់ការលូតលាស់របស់កូន

សាង ស្រីល័ក្ខ — Tue, 25 Jan 2022 06:35:27 +0000

ការស្រឡាញ់កូនមិនស្មើគ្នា តែងតែកើតមានក្នុងរង្វង់គ្រួសារ។ ប៉ាម៉ាក់អាចស្រឡាញ់កូនណាមួយជាងគេ ដោយសារភាពវៃឆ្លាត ភាពរួសរាយ ឬចេះស្ដាប់បង្គាប់ជាដើម។ ជួនកាលប៉ាម៉ាក់អាចលំអៀងលើកូនម្នាក់ ហើយមិនសូវយកចិត្តទុកដាក់លើកូនផ្សេងទៀតទេ។ តើការស្រឡាញ់កូនមិនស្មើគ្នាជះឥទ្ធិពលអ្វីខ្លះដល់កូន? ប៉ាម៉ាក់គួរធ្វើបែបម៉េច? តើអាចប៉ះពាល់ការលូតលាស់របស់កូនបែបណា?

១. កូនអាចក្លាយជាក្មេងខូច ឬទំនើង

ជាទូទៅ ដោយសារប៉ាម៉ាក់ស្រឡាញ់ខ្លាំង អូនតូចអាចបញ្ចេញអារម្មណ៍មិនល្អបានគ្រប់ពេល ទារកាដូ ឬរបស់របរបានច្រើន។ លើសពីនេះទៅទៀត អូនតូចតែងតែបានចិត្ត ហើយគិតថាខ្លួនអាចបំពានច្បាប់ទម្លាប់គ្រួសារបាន ឬទារអ្វីក៏បាន។ កត្តាទាំងនេះអាចប៉ះពាល់ដល់សមត្ថភាពរបស់អូនតូចក្នុងការរក្សាទំនាក់ទំនងជាមួយអ្នកនៅជុំវិញខ្លួន រួមទាំងអ្នកផ្ទះ មិត្តរួមថ្នាក់ មិត្តរួមការងារ ឬជីវិតគូនៅថ្ងៃអនាគត។

២. ជំរុញការប្រជែងគ្នារវាងបងប្អូនបង្កើត

អូនតូចដែលប៉ាម៉ាក់មិនសូវស្រឡាញ់អាចច្រណែន និងមានចិត្តប្រកួតប្រជែងជាមួយបងប្អូនដែលប៉ាម៉ាក់ស្រឡាញ់ខ្លាំងដើម្បីទទួលបានការសរសើរ និងការស្រឡាញ់ពីប៉ាម៉ាក់។ យូរៗទៅអាអូនអាចលែងស្រឡាញ់បង ឬប្អូន ឬមិនសូវមានមនោសញ្ចេតនាជាមួយបងប្អូនឯង។

៣. ប៉ះពាល់ផ្លូវចិត្តកូន

អាអូននឹងមិនអាចបំភ្លេចបានទេថា ខ្លួនមិនទទួលបានភាពស្មើគ្នា ឬភាពយុត្តិធម៌ពីប៉ាម៉ាក់ ហើយក៏កើតចិត្តស្អប់ មិនពេញចិត្ត ឬគុំកួននឹងប៉ាម៉ាក់ ឬបងប្អូន។ ម្យ៉ាងទៀត អាអូនអាចនឹងបញ្ចេញអាកប្បកិរិយាមិនសមរម្យនៅក្នុងសាលា ឬជាមួយបង ឬប្អូនដែលប៉ាម៉ាក់ស្រឡាញ់ខ្លាំង។

ការខ្វះក្តីស្រឡាញ់ និងភាពយកចិត្តទុកដាក់នឹងបន្សល់ទុកនូវចន្លោះប្រហោងក្នុងជីវិតរបស់អាអូន និងអាចបណ្តាលឱ្យកូនមានជំងឺបាក់ទឹកចិត្តនៅពេលធំឡើង។

៤. រារាំងទេពកោសល្យកូន

តាមការសិក្សាបានឱ្យដឹងថា កុមារដែលមានសុខភាពផ្លូវចិត្តល្អនឹងចង់បង្ហាញទេពកោសល្យរបស់គេ ហើយរៀនឆាប់ចេះ។ ដូច្នេះប៉ាម៉ាក់ត្រូវតែឧស្សាហ៍លើកសរសើរកូនគ្រប់គ្នា កុំលើកទឹកចិត្ត ឬសរសើរតែកូនម្នាក់។

នៅពេលប៉ាម៉ាក់សរសើរកូនណាម្នាក់ថាពូកែខ្លាំងជាងគេក្នុងចំណោមកូនទាំងអស់នឹងបណ្តាលកូនដែលប៉ាម៉ាក់មិនសូវស្រឡាញ់លាក់ ឬមិនបញ្ចេញទេពកោសល្យរបស់គេទេ ព្រោះគិតថាធ្វើមិនល្អដូចបង ឬប្អូន ឬដោយសារខ្វះការគាំទ្រពីប៉ាម៉ាក់ ហើយចាប់ផ្តើមសង្ស័យពីសមត្ថភាពខ្លួនឯង ហើយយូរៗទៅទេពកោសល្យរបស់កូននឹងត្រូវកប់ទុកចោល។

៥. កូនខ្វះជំនឿចិត្តលើខ្លួនឯង

អារម្មណ៍ ឬការយល់ឃើញថាជាកូនដែលប៉ាម៉ាក់មិនសូវចូលចិត្ត ឬស្រឡាញ់អាចបណ្តាលឱ្យអាអូនមិនឱ្យតម្លៃខ្លួនឯង។ ឧទាហរណ៍ ការនិយាយថាកូនម្នាក់នេះឆ្លាត និងពូកែជាងគេក្នុងចំណោមកូនទាំងអស់អាចបណ្តាលឱ្យកូនផ្សេងទៀត ជាពិសេសកូនដែលរៀនខ្សោយជាងគិតថាខ្លួនអន់ ឬមិនពូកែ។ ពេលធំឡើង អាអូនអាចខ្វះជំនឿចិត្តលើខ្លួនឯង និងមិនអាចបំពេញការងារបានល្អក្នុងជីវិត។

ការស្រឡាញ់កូនមិនស្មើគ្នាអាចប៉ះពាល់ដល់ផ្លូវចិត្ត និងការអភិវឌ្ឍរបស់កូន។ ប៉ុន្តែមិនអាចទៅរួចទេដែលប៉ាម៉ាក់ស្រឡាញ់កូនស្មើៗគ្នា ដូច្នេះដើម្បីបង្ការបញ្ហា ប៉ាម៉ាក់គួរចៀសវាងការរើសអើង ហើយត្រូវផ្តល់ភាពស្មើគ្នា និងព្យាយាមរក្សាភាពយុត្តិធម៌តាមដែលអាចធ្វើទៅបាន ព្រោះកូនៗទាំងអស់ត្រូវការការយកចិត្តទុកដាក់ និងក្តីស្រឡាញ់ស្មើៗគ្នាពីប៉ាម៉ាក់។ ឧទាហរណ៍ បើមិនមែនក្នុងឱកាសខួបកំណើតទេ ហើយប៉ាម៉ាក់ចង់ទិញអាវថ្មីឱ្យកូន ប៉ាម៉ាក់ត្រូវទិញឱ្យកូនស្មើៗគ្នា និងមានតម្លៃប្រហាក់ប្រហែលគ្នា ទើបកូនមិនតូចចិត្ត ឬច្រណែនគ្នា៕

អត្ថបទផ្ដល់ដោយ៖ Hello Krupet

ចុចអាន៖ប្រើពាក្យអវិជ្ជមាន ប៉ះពាល់ការលូតលាស់កូនច្រើនយ៉ាង ម៉ាក់ប៉ាគួរដឹង

ចុចអាន៖ទម្លាប់ប្រើហិង្សា ឬដាក់ទណ្ឌកម្ម អាចបំផ្លាញ ផ្លូវចិត្តកូន

The post ប៉ាម៉ាក់ផ្ដល់ការស្រឡាញ់មិនស្មើគ្នា អាចប៉ះពាល់ការលូតលាស់របស់កូន appeared first on Kampuchea Thmey Daily.

ហេតុផល ៦ យ៉ាង ម៉ាក់ប៉ាគួរឲ្យកូនតូចៗរៀនហែលទឹក

សាង ស្រីល័ក្ខ — Fri, 29 Oct 2021 00:56:00 +0000

បើម៉ាក់ប៉ាចង់ឲ្យកូនហាត់ប្រាណ ម៉ាក់ប៉ាគួរពិចារណាកីឡាហែលទឹក ព្រោះក្មេងៗចូលចិត្តលេងទឹកណាស់។ ការហែលទឹកមិនត្រឹមតែជាកីឡាដែលសប្បាយទេ ថែមទាំងធ្វើឱ្យក្មេងៗមានសុខភាពល្អ និងជួយឱ្យក្មេងៗអភិវឌ្ឍផ្នែកផ្សេងៗទៀតជាច្រើន។ ខាងក្រោមនេះជាហេតុផលទាំង ៦ ដែលកូនតូចៗគួររៀនហែលទឹក។

១. ហែលទឹកជួយការពារការលង់ទឹក

យោងតាមរបាយការណ៍អត្រាមរណភាពកុមាររបស់អង្គការសុខភាពពិភពលោក (WHO) នៅប្រទេសកម្ពុជាការលង់ទឹក គឺជាបុព្វហេតុចម្បងនៃការស្លាប់របស់កុមារបន្ទាប់ពីទារក។ ការចេះហែលទឹករួមទាំងការមានចំណេះដឹងអំពីរបៀបមានសុវត្ថិភាពនៅក្នុងទឹកអាចកាត់បន្ថយហានិភ័យនៃការលង់ទឹករបស់ក្មេងៗបាន។

២. ហែលទឹកជាកីឡាដែលមានផលប៉ះពាល់ទាប

ហែលទឹកគឺជាកីឡាដែលមានផលប៉ះពាល់ទាប បើប្រៀបធៀបទៅនឹងកីឡាពេញនិយមផ្សេងទៀតដូចជា បាល់បោះ បាល់ទាត់ វាយសី…។ យោងតាមសាកលវិទ្យាល័យ Bucknell រាងកាយនឹងអណ្តែត ៩០ % នៅពេលដែលស្ថិតនៅក្នុងទឹកជម្រៅត្រឹមក ដូច្នេះកូនៗនឹងមិនដួល ប៉ះទង្គិច របួសជង្គង់ គ្រេចកជើង របួសស្មា គ្រេចកដៃ ឬឈឺសន្លាក់ដូចកីឡានៅលើគោកឡើយ។

៣. ហែលទឹកជាការហាត់ប្រាណពេញរាងកាយ

ការហែលទឹកជួយបង្កើនកម្លាំង ភាពបត់បែន ភាពអត់ធន និងធ្វើឱ្យរាងកាយមានតុល្យភាព។ វាគឺជាលំហាត់ប្រាណបេះដូង និងសួត ព្រោះវាជួយបង្កើនការស៊ូទ្រាំដង្ហើម និងជួយបង្កើនប្រសិទ្ធភាពរាងកាយក្នុងការប្រើអុកស៊ីសែន។ ឯសាច់ដុំដៃ ជើង និងខ្នងក៏ត្រូវបានប្រើក្នុងពេលដំណាលគ្នាដែរ ដែលជួយដុតបំផ្លាញកាឡូរី។ ការហែលទឹកស័ក្ដិសមបំផុតសម្រាប់កុមារធាត់។

៤. ការហែលទឹកជួយក្មេងៗអភិវឌ្ឍលឿន

ការរៀនហែលទឹកតាំងពីក្មេងជួយអភិវឌ្ឍប្រាជ្ញាក្មេងៗ។ សាស្ត្រាចារ្យ Robyn Jorgensen អ្នកដឹកនាំស្រាវជ្រាវលើគម្រោងដែលសិក្សារយៈពេល ៤ ឆ្នាំលើកុមារជាង ៧ ០០០ នាក់បង្ហាញថា “កុមារដែលហែលទឹកមានការយល់ដឹងខ្ពស់ជាងកុមារក្នុងវ័យស្របាលគ្នាដែលមិនហែលទឹក ៦ ទៅ ១៥ ខែ លើជំនាញយល់ដឹង ការដោះស្រាយចំណោទគណិតវិទ្យា ការរាប់ ការរៀនភាសា និងការធ្វើតាមការណែនាំ។

៥. ការហែលទឹកជួយបង្កើនទំនុកចិត្តដល់ក្មេងៗ

ការហែលទឹកផ្តល់ឱកាសឱ្យក្មេងតូចៗប្រកួតប្រជែងលក្ខណៈមិត្តភាព និងទទួលបានរង្វាន់ដែលជួយកុមារឱ្យមានទំនុកចិត្តលើ និងជឿជាក់លើសមត្ថភាពរបស់ខ្លួនឯង។ យោងតាមការស្រាវជ្រាវវិទ្យាសាស្ត្របានបង្ហាញថា កុមារដែលហែលទឹកតាំងពីក្មេងអាចសម្របខ្លួនបានលឿនក្នុងបរិស្ថានថ្មី មានសមត្ថភាព មានភាពជឿជាក់លើខ្លួនឯង និងឯករាជ្យជាងក្មេងៗក្នុងវ័យស្រករគ្នាដែលមិនហែលទឹក។

៦. ការហែលទឹកផ្តល់ឱកាសឱ្យកូនតូចៗរាប់អានមិត្តថ្មី

អាងហែលទឹកក៏ជាកន្លែងដ៏ល្អសម្រាប់កូនតូចៗជួបមិត្តភ័ក្តថ្មីៗក្រៅពីមិត្តភ័ក្តជិតខាងផ្ទះ និងក្នុងថ្នាក់រៀនដែលផ្តល់ឱ្យពួកគេនូវបទពិសោធន៍កាន់តែទូលំទូលាយនិងរង្វង់សង្គមធំទូលាយ។

ក្មេងតូចៗគួររៀនហែលទឹកនៅអាយុ ៤ ឆ្នាំព្រោះនៅអាយុនេះអាអូនអាចសម្របសម្រួលចលនាដើម្បីហែល និងធាក់ទឹកដែលជាជំនាញសំខាន់ក្នុងការហែលទឹក និងរៀនជំនាញមូលដ្ឋានដូចជា ការបណ្តែតខ្លួនលើទឹកជាដើម៕

អត្ថបទផ្ដល់ដោយ៖ Hello Krupet

ចុចអាន៖ដាក់វិន័យឲ្យកូន មានផលល្អទៅថ្ងៃក្រោយ ឪពុកម្ដាយមួយចំនួនគួរដឹង

The post ហេតុផល ៦ យ៉ាង ម៉ាក់ប៉ាគួរឲ្យកូនតូចៗរៀនហែលទឹក appeared first on Kampuchea Thmey Daily.

ចង់ឲ្យកូនក្លាយជាអ្នកពូកែរកស៊ី មកដឹងគន្លឹះ បង្រៀនប៉ុន្មានក្បាច់នេះ

សាង ស្រីល័ក្ខ — Mon, 25 Oct 2021 01:47:04 +0000

ម៉ាក់ប៉ាទូទៅតែងមានក្ដីស្រមៃ ចង់ឲ្យកូនដែលខ្លួនបីបាច់តាំងពីតូច មានរបរ ឬជំនាញទៅជាអ្វីមួយ មិនថា ពេទ្យ គ្រូបង្រៀន មេធាវី ឬអ្នករកស៊ី ជាដើម។ ដើម្បីក្លាយជាសហគ្រិន ឬអ្នកជំនួញ មិនមែនជារឿងងាយដែលមនុស្សគ្រប់គ្នាសុទ្ធតែធ្វើបានទេ ព្រោះដើម្បីឈានដល់ជោគជ័យ សហគ្រិនគ្រប់រូបតែងប្រឈមឧបសគ្គជាច្រើន និងយកឈ្នះភាពលំបាកឲ្យទាល់តែបាន។

ប៉ុន្តែ ចំណុចមួយសហគ្រិនភាគច្រើនមានដូចគ្នា គឺធំដឹងក្តីក្នុងមជ្ឈដ្ឋានសមរម្យមួយ អាចជួយបង្កើតឲ្យមានការច្នៃប្រឌិត និងមានភាពជាអ្នកដឹកនាំ។ អត្ថបទ “Hello គ្រូពេទ្យ” នឹងបង្ហើបទម្លាប់ខ្លះៗនៃសហគ្រិនវ័យក្មេង គួរប៉ាម៉ាក់យកទៅបង្រៀនកូនៗដើម្បីឈានដល់អនាគតត្រចះត្រចង់។

១- រៀនគិតខ្លួនឯង៖ យុគសម័យនេះជាសម័យបច្ចេកវិទ្យា ព័ត៌មានចំណេះដឹងគ្រប់យ៉ាងស្ថិតនៅចុងម្រាមដៃរបស់យើងប៉ុណ្ណោះ ម៉្លោះហើយគួរបង្រៀនកូនៗចេះសួរនាំ “ហេតុអ្វី?” “ម៉េចបានចឹង?” ឲ្យបានច្រើន និងឲ្យគេព្យាយាមរកចម្លើយដោយខ្លួនឯង។ បើទោះបីជាកូនយើងអាចរងសម្ពាធបន្តិចមែន តែសំណួរនោះនឹងនាំពួកគេទៅរកចម្លើយដោយខ្លួនឯង និងអាចដោះស្រាយបញ្ហាបានដោយមានការជួយបន្តិចបន្តួចពីយើង។

២- ហ៊ានសម្រេចចិត្ត៖ សហគ្រិនម្នាក់ៗសុទ្ធតែអាចបង្ហាញភាពជឿជាក់ និងឯករាជ្យរបស់ខ្លួន ចំណុចទាំង២នេះ គឺជារឿងដែលយើងអាចបង្រៀនកូនៗពីវ័យក្មេងទៅ តាមរយៈការឲ្យគេរើសសម្លៀកបំពាក់ និងរបស់លេងដោយខ្លួនពួកគេផ្ទាល់។ ក្នុងកាលៈទេសៈកូនមិនអាចសម្រេចចិត្តដោយសារជម្រើសច្រើនពេក យើងក៏អាចកំណត់ជម្រើសឲ្យកូនដូចគ្នា។ ឬការសម្រេចចិត្តសាមញ្ញៗ តើកូនឯងចង់ទៅលេងទោងនៅសួន ឬទៅមើលកុន (រើសតែមួយ)។

៣- បណ្តុះគំនិតរឹងមាំ៖ គ្រប់សហគ្រិនសុទ្ធតែប្រថុយគ្រោះថ្នាក់ ភាពបរាជ័យ ប៉ុន្តែអ្វីកត្តាសំខាន់ គឺជឿជាក់ក្នុងការប្រឈមជាមួយលទ្ធផល បើទោះជាលទ្ធផលវិជ្ជមាន ឬអវិជ្ជមានក៏ដោយ។ ទាន់ពេលកូនយើងនៅក្មេង អនុញ្ញាតឲ្យសាកល្បងសមត្ថភាព និងភាពភ័យខ្លាចរបស់គេ បើកូនមិនគោរពវិន័យ យើងត្រូវណែនាំកូនឲ្យដឹងពីលទ្ធផលកើតឡើងក្រោយទង្វើគ្រប់យ៉ាង តែចាំថាអាចជាទង្វើនៃការប្រថុយប្រថានសម្រាប់កូនដូចគ្នា។

៤- បំផុសគំនិតលើកទឹកចិត្ត៖ ក្មេងៗធម្មតាពោរពេញដោយគំនិតប្លែកថ្មី បើចឹងយើងគួរតែទុកពេលសម្រាប់កូនៗមានឱកាសបង្ហាញគំនិតទាំងនោះ។ បង្រៀនកូនចេះមានការស្រមើស្រមៃ ក៏អាចជួយកូនចេះដោះស្រាយបញ្ហាបានដោយមិនដឹងខ្លួនផងដែរ។

៥- ស្គាល់ភាពបរាជ័យ៖ ក្នុងនាមជាប៉ាម៉ាក់ ត្រូវបង្រៀនកូនឲ្យស្គាល់ភាពបរាជ័យ ស្វែងយល់ និងព្យាយាមម្តងទៀត។ ទាំងនេះជាមូលដ្ឋានគ្រឹះនៃសហគ្រិន ជាពិសេសពេលដែលក្មេងមានកំហុស ត្រូវគិតថាជាឱកាសដើម្បីរៀន ហើយកុំស្តីបន្ទោសពួកគេឲ្យសោះ ពិគ្រោះជាមួយកូនរកជំហានបន្ទាប់ត្រូវធ្វើ។ គន្លឹះល្អសម្រាប់លើកទឹកចិត្ត សរសើរទោះមុន ឬក្រោយយើងផ្តល់យោបល់ណាមួយទៅកូន ធ្វើបែបនេះឲ្យកូនមានគំនិតវិជ្ជមាន។

៦- ចេះដោះស្រាយបញ្ហាខ្លួនឯង៖ បើយើងចង់ឲ្យកូនក្លាយជាសហគ្រិនក្នុងថ្ងៃអនាគត ត្រូវចាប់ផ្តើមពីបញ្ហាដែលក្មេងៗជួបប្រទះប្រចាំថ្ងៃជាមុន ផ្តល់ឱកាសឲ្យអូនអូនដោះស្រាយបញ្ហាខ្លួនឯង មិនត្រូវចូលខ្លួនទៅដោះស្រាយ មុនកូនត្រូវការជំនួយនោះទេ។ បើប៉ាម៉ាក់ចង់ជួយពួកគេពីក្រោយ ត្រូវបង្រៀនហេតុផលវិធីវែកញែករកបញ្ហា ប្រមូលគំនិតជាដំណោះស្រាយ ប្រាប់ពីផលវិបាក និងគុណប្រយោជន៍ រួចទុកឲ្យកូនជ្រើសយកដំណោះស្រាយណាមួយគេគិតថាល្អបំផុត។

៧- ស្គាល់ស្ថានភាពសង្គម៖ បង្រៀនកូនពីក្បួនច្បាប់ក្នុងសង្គមជាអ្វី សម្រាប់សហគ្រិន គួរមាន។ អនុញ្ញាតឲ្យសួរនាំរឿងរ៉ាវកំពុងកើតឡើងជុំវិញខ្លួន ឲ្យកូនដឹងថាអ្វីគួរផ្លាស់ប្ដូរ អ្វីអាចប្រសើរជាងនេះ? ឲ្យឧទាហរណ៍ ឬពីស្ថានភាពជាក់ស្ដែង ពីក្រុមហ៊ុន ឬរបរល្អៗមួយចំនួន បើមានពេលនៅជាមួយគេ។ អ្វីដែលគេគួរដឹង គឺម៉េចបានក្រុមហ៊ុន/របរហ្នឹងល្អ? ចុះចំណុចអត់ល្អ ធៀបនឹងដៃគូប្រកួតប្រជែង (ក្រុមហ៊ុន/របរស្រដៀង) ផ្សេង…ជាដើម។

៨- ស្គាល់និងចេះរកលុយ៖ ជាអ្នកជំនួញ ឬថៅកែទៅថ្ងៃក្រោយ ចៀសមិនផុតពីការប្រើប្រាស់ និងបង្វិលលុយ។ អ្វីដែលគួរធ្វើ ត្រូវបង្វឹកការគិតរបស់កូន ឲ្យស្ដាប់ ឮច្រើនដងពីសារៈសំខាន់នៃការប្រើប្រាស់លុយក្នុងជំនួញ ស្គាល់ពីអ្វីដែលចាំបាច់ (មិនចេះតែទាមទារតាមចង់) ថ្លឹងថ្លែងឲ្យស្គាល់ចំណេញខាត…។ល។ ប៉ាម៉ាក់ត្រូវជំរុញចិត្តកូនស្វែងរកវិធីរកលុយខ្លួនឯងពីលើប្រាក់ប្រចាំថ្ងៃគេទទួលបានពីយើង ដូចជា ចាប់ផ្តើមពីការងារក្នុងផ្ទះធម្មតាដែលពួកគេមិនដែលធ្វើ ហើយនៅពេលកូនៗអាចជួយយើងបានតិចតួច រង្វាន់គួរតែមានជាលើកទឹកចិត្ត។

កូនមានអាយុច្រើនបន្តិចអាចធ្វើការក្នុងគម្រោងផ្សេងៗជាផ្នែកមួយជួយអភិវឌ្ឍជំនាញពួកគេផងដែរ ហើយក្មេងជំទង់ចេះច្រើនភាសាវិញ គួរតែជំរុញឲ្យចេះរកប្រាក់ ដូចជា បកប្រែ បង្រៀនក្មេងតូចៗជាដើម ព្រោះចំណូលពួកគេទទួលបាន គឺជាបទពិសោធបង្រៀនក្មេងៗខិតខំប្រឈមភាពលំបាកក្នុងការងារ។

អ្នកមានយោបល់ ឬគំនិតអីផ្សេងទៀតអត់?

អត្ថបទផ្ដល់ដោយ៖ Hello Krupet

ចុចអាន៖គន្លឹះ ៥ យ៉ាង ជួយឲ្យមានកូនតាមចិត្តចង់បាន

ចុចអាន៖បើក្មេងក្ដៅខ្លួនដល់កម្រិតនេះហើយ ត្រូវនាំកូនទៅជួបពេទ្យឲ្យលឿន

The post ចង់ឲ្យកូនក្លាយជាអ្នកពូកែរកស៊ី មកដឹងគន្លឹះ បង្រៀនប៉ុន្មានក្បាច់នេះ appeared first on Kampuchea Thmey Daily.