កិច្ចប្រជុំអាយប៉ា Archives - Kampuchea Thmey Daily

ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ

hun sirivadh — Tue, 26 May 2026 09:14:36 +0000

ប្រធានសភាកម្ពុជា សម្ដេចសភាធិបតី ឃួន សុដារី បានជំរុញឱ្យមានការពង្រឹងតួនាទីរបស់ស្ថាប័ននានាធ្វើឱ្យការប្ដេជ្ញាចិត្តផ្នែកបរិស្ថានទៅជាសកម្មភាពជាក់ស្ដែង។ សម្ដេចថាច្បាប់និងគោលនយោបាយនានាដែលអនុវត្តដាច់ខាតត្រូវយកប្រជាជនជាស្នូល ធានាការពារជីវភាពរស់នៅ គាំទ្រសហគមន៍ងាយរងគ្រោះបំផុត ដើម្បីលើកកម្ពស់កំណើនបៃតង និងមិនបោះបង់នរណាម្នាក់ចោលឡើយ។

សម្ដេចលើកឡើងបែបនេះក្នុងជំនួបមួយជាមួយប្រតិភូនៃសមាជិកអាយប៉ា និងវាគ្មិនអន្តរជាតិដែលបានចូលជួបសម្ដែងការគួរសម មុនពេលបើកសន្និសីទសភាជាតិស្ដីពីអភិបាលកិច្ចអាកាសធាតុដែលរៀបចំឡើងដោយរដ្ឋសភាកម្ពុជានៅព្រឹកថ្ងៃទី២៦ ខែឧសភា ឆ្នាំ២០២៦នេះ។

ក្នុងជំនួបនោះសម្ដេចសភាធិបតី ឃួន សុដារី បានទាញចំណាប់អារម្មណ៍លើសកម្មភាពឆ្លើយតបនឹងការប្រែប្រួលអាកាសធាតុដោយថាគ្រប់ការអនុវត្តទាំងអស់គឺដាច់ខាតត្រូវយកប្រជាជនជាស្នូល។ សម្ដេចបន្ថែមថាសម្រាប់ស្ថាប័នសភាតំណាងឱ្យប្រជាពលរដ្ឋ ការរួមចំណែកជួយដល់ពលរដ្ឋ គឺធ្វើឡើងតាមរយៈការរៀបចំនិងអនុម័តច្បាប់ស្ដីពីការប្រែប្រួលអាកាសធាតុប្រកបដោយប្រសិទ្ធភាព ការអនុម័តនិងតម្រង់ទិសកញ្ចប់ថវិកាជាតិឆ្ពោះទៅរកការវិនិយោគបៃតង ការពង្រឹងការត្រួតពិនិត្យ ការលើកកម្ពស់តម្លាភាពលើការអនុវត្តរបស់រដ្ឋាភិបាល ព្រមទាំងការកសាងទំនុកចិត្ត និងកៀរគរការចូលរួមយ៉ាងទូលំទូលាយពីសាធារណជន។

សម្ដេចថា៖ «សកម្មភាពឆ្លើយតបនឹងការប្រែប្រួលអាកាសធាតុមិនអាចជោគជ័យបានឡើយ ប្រសិនបើគ្មានការរួមគ្នារវាងរដ្ឋាភិបាល វិស័យឯកជន សង្គមស៊ីវិល សហគមន៍មូលដ្ឋាន និងយុវជន។ ភាពជាដៃគូដ៏រឹងមាំនេះ គឺជាគន្លឹះក្នុងការប្រែក្លាយច្បាប់ និងគោលនយោបាយនានា ទៅជាការអនុវត្តជាក់ស្តែង ដោយដាច់ខាតត្រូវយកប្រជាជនជាស្នូល ធានាការការពារជីវភាពរស់នៅ គាំទ្រសហគមន៍ងាយរងគ្រោះបំផុត លើកកម្ពស់កំណើនបៃតង និងមិនបោះបង់នរណាម្នាក់ចោលឡើយ»។

អនុប្រធានសភាប្រឹក្សាប្រជាជននៃសាធារណរដ្ឋឥណ្ឌូណេស៊ី និងជាតំណាងឱ្យគណៈប្រតិភូអាយប៉ាដែលបានចូលជួបសម្ដេចសភាធិបតីព្រឹកថ្ងៃអង្គារនេះលោក Eddy Soeparno បានគាំទ្រចំពោះទស្សនវិស័យសម្ដេចប្រធានសភាដោយថាពេលនេះបណ្ដាប្រទេសនៅតំបន់អាស៊ានត្រួវទទួលស្គាល់ថាបញ្ហាអាកាសធាតុក្នុងតំបន់នេះវាបានឈានហួសពីពាក្យថាការប្រែប្រួលអាកាសធាតុហើយ។

លោកថា៖ «បញ្ហាអាកាសធាតុនៅក្នុងតំបន់អាស៊ីអាគ្នេយ៍បច្ចុប្បន្ន បានឈានហួសពីពាក្យ «ការប្រែប្រួលអាកាសធាតុ» ហើយវាបានក្លាយជា «វិបត្តិអាកាសធាតុ» ដ៏ស្រួចស្រាវ ដែលទាមទារឱ្យគ្រប់បណ្តាប្រទេសក្នុងតំបន់អាស៊ានទទួលស្គាល់ការពិត និងដាក់ចេញនូវភារកិច្ចពិសេសរៀងៗខ្លួនដើម្បីជម្នះវិបត្តិនេះ»។

លោក Eddy ក៏វាយតម្លៃខ្ពស់ចំពោះគំនិតផ្ដួចផ្ដើមរបស់សភាកម្ពុជាក្នុងការរៀបចំសន្និសីទស្ដីពីអភិបាលកិច្ចអាកាសធាតុនៅថ្ងៃនេះដោយថាជាវេទិកាដ៏មានតម្លៃក្នុងការបន្តកិច្ចសន្ទនា និងពង្រឹងកិច្ចសហប្រតិបត្តិការក្នុងតំបន់ទាំងលើការបន្ស៊ាំ និងការកាត់បន្ថយ ឥទ្ធិពលនៃវិបត្តិអាកាសធាតុជាសាកលនេះផងដែរ។

សូមជម្រាបថា សន្និសីទសភាជាតិស្តីពីអភិបាលកិច្ចអាកាសធាតុ មានការអញ្ជើញចូលរួមពីសមាជិក សមាជិកាព្រឹទ្ធសភា រដ្ឋសភា ដៃគូអភិវឌ្ឍន៍ស្ថាប័នស្រាវជ្រាវ គ្រឹះស្ថានឧត្តមសិក្សា និងថ្នាក់ដឹកនាំ និងមន្រ្តីជំនាញនៃអគ្គលេខាធិការដ្ឋានសភាទាំងពីរ ក្រោមកិច្ចសហការរៀបចំ និងឧបត្ថម្ភដោយអគ្គលេខាធិការដ្ឋានរដ្ឋសភា លេខាធិការដ្ឋានអាយប៉ា និងមូលនិធិប្រែប្រួលអាកាសធាតុ (Tara Climate Change) ៕

អត្ថបទដោយ ហ៊ុន សិរីវឌ្ឍន៍

The post ប្រធានសភាថា ប្រជាជនគឺជាស្នូលនៃការគិតគូរទាំងអស់ដោយមិនត្រូវបោះបង់អ្នកណាម្នាក់ចោលឡើយ appeared first on Kampuchea Thmey Daily.

បណ្ឌិត ចែម វីឌ្យ៉ា នឹងចាប់ផ្ដើមអាណត្តិជាអគ្គលេខាធិការនៅស្ថាប័នសភាអាស៊ាន នៅដើមឆ្នាំ២០២៦

Thoeun Vansong — Wed, 19 Nov 2025 08:50:40 +0000

លោកបណ្ឌិត ចែម វីឌ្យ៉ា នឹងចាប់ផ្តើមអាណត្តិរបស់លោកជាអគ្គលេខាធិការអន្តរសភាអាស៊ាន (AIPA) នៅខែមករា ឆ្នាំ២០២៦ សម្រាប់រយៈពេល៣ឆ្នាំ ដែលលោកជាបេក្ខភាពពីកម្ពុជា ដែលអន្តរសភាអាស៊ានសម្រេចជ្រើសតាំងជាអគ្គលេខាធិការ ដោយមហាសន្និបាតលើកទី៤៦ នៅទីក្រុងគូឡាឡាំពួ ប្រទេសម៉ាឡេស៊ី កាលពីថ្ងៃទី២០ ខែកញ្ញា។

អាណត្តិរបស់លោកបណ្ឌិត ចែម វីឌ្យ៉ា គឺជាការជំនួសកៅអីពីលោកស្រី Ar. Siti Rozaimeriyanty Dato Haji Abdul Rahman ដែលជាជនជាតិព្រុយណេ ហើយត្រូវចប់អាណត្តិការងារ ក្រោយលោកស្រីបំពេញតួនាទីនេះ រយៈពេល៣ឆ្នាំ ពីឆ្នាំ២០២២ ដល់២០២៥។

មុនចូលកាន់តំណែងជាផ្លូវការ នៅឆ្នាំក្រោយ អនាគតអគ្គលេខាធិការអាយប៉ា លោកបណ្ឌិត ចែម វីឌ្យ៉ា កាលពីថ្ងៃទី១៧ ខែវិច្ឆិកា ឆ្នាំ២០២៥ បានអញ្ជើញធ្វើទស្សនកិច្ចការងារនៅអគ្គលេខាធិការដ្ឋានអាយប៉ា ដែលមានស្នាក់ការកណ្ដាលនៅទីក្រុងហ្សាកាតា ប្រទេសឥណ្ឌូណេស៊ី។ ក្នុងនោះ លោកបានជួបពិភាក្សាការងារជាមួយអគ្គលេខាធិការអាយប៉ាបច្ចុប្បន្ន ជួបសន្ទនាជាមួយអគ្គរដ្ឋទូតហ្វីលីពីនប្រចាំឥណ្ឌូណេស៊ី និងប្រធានគណៈកម្មាធិការកិច្ចការបទេសនៃសភាឥណ្ឌូណេស៊ី ព្រមទាំងចូលជួបអគ្គលេខាធិការអាស៊ាន លោកបណ្ឌិត កៅ គឹមហួន នៅទីស្នាក់ការកណ្តាលអាស៊ាន។

លោកបណ្ឌិត កៅ គឹមហួន អគ្គលេខាធិការអាស៊ាន បានស្វាគមន៍និងអបអរសាទរចំពោះលោកបណ្ឌិត ចែម វីឌ្យ៉ា ដែលត្រូវបានជ្រើសតាំងអគ្គលេខាធិការអាយប៉ា ដោយលោកបានបញ្ជាក់ពីការទន្ទឹងរង់ចាំការពង្រឹងកិច្ចសហការរវាងអាស៊ាន និងអាយប៉ា ជាពិសេសក្នុងការគាំទ្រដល់ការអនុវត្តចក្ខុវិស័យសហគមន៍អាស៊ាន ក៏ដូចជាក្នុងការជំរុញកិច្ចសហប្រតិបត្តិការក្នុងតំបន់។

ជាការកត់សម្គាល់ លោកបណ្ឌិត កៅ គឹមហួន និងលោកបណ្ឌិត ចែម វីឌ្យ៉ា ជាឥស្សរជនខ្មែរ ដែលបានទៅកាន់តំណែងជាន់ខ្ពស់នៅស្ថាប័នអាស៊ាន ពោលគឺតំណែងជាអគ្គលេខាធិការអាស៊ាន និងតំណែងជាអគ្គលេខាធិការអន្តរសភាអាស៊ាន ហៅកាត់ថា អាយប៉ា (AIPA)។

អគ្គលេខាធិការអាស៊ាន មានអាណត្តិ៥ឆ្នាំ ខណៈអគ្គលេខាធិការអាយប៉ា មានអាណត្តិ៣ឆ្នាំ។ ក្នុងន័យនេះ ទាំងលោក កៅ គឹមហួន ទាំងលោក ចែម វីឌ្យ៉ា នឹងត្រូវផុតអាណត្តិការងារនៅឆ្នាំ២០២៨ដូចគ្នា ដោយអាណត្តិលោក កៅ គឹមហួន ពីឆ្នាំ២០២៣ ដល់២០២៨ រីឯលោក ចែម វីឌ្យ៉ា នឹងចាប់ផ្ដើមអាណត្តិពីថ្ងៃទី១ ខែមករា ឆ្នាំ២០២៦ រហូតដល់ថ្ងៃទី១ ខែធ្នូ ឆ្នាំ២០២៨។ បច្ចុប្បន្នលោក ចែម វីឌ្យ៉ា កំពុងកាន់ជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃព្រឹទ្ធសភា (គណៈកម្មការទី៥) ហើយក៏ជាអ្នកការទូតចាស់វស្សា ប្រកបដោយសមត្ថភាព បទពិសោធន៍ និងចំណេះដឹងកម្រិតអន្តរជាតិ ដែលធ្លាប់បំពេញតួនាទីជាឯកអគ្គរាជទូតកម្ពុជាប្រចាំនៅប្រទេសជាច្រើន៕

អត្ថបទ៖ ធឿន វ៉ាន់សុង

The post បណ្ឌិត ចែម វីឌ្យ៉ា នឹងចាប់ផ្ដើមអាណត្តិជាអគ្គលេខាធិការនៅស្ថាប័នសភាអាស៊ាន នៅដើមឆ្នាំ២០២៦ appeared first on Kampuchea Thmey Daily.

អាយប៉ាជ្រើសតាំងលោក ចែម វីឌ្យ៉ា ជាអគ្គលេខាធិការផ្លូវការ

hun sirivadh — Sun, 21 Sep 2025 03:05:20 +0000

អន្តរសភាអាស៊ានហៅកាត់ថា អាយប៉ា បានសម្រេចជ្រើសតាំងលោក ចែម វីឌ្យ៉ា បេក្ខភាពមកពីកម្ពុជាជាផ្លូវការនៅក្នុងមហាសន្និបាតលើកទី៤៦ នៅទីក្រុងគូឡាឡាំពួ ប្រទេសម៉ាឡេស៊ី កាលពីថ្ងៃទី២០ ខែកញ្ញា។ លោកគឺជាកូនខ្មែរទី២ដែលកាន់ដំណែងជាន់ខ្ពស់ស្ថាប័នអាស៊ានបន្ទាប់ពីលោក កៅ គឹមហួន ដែលត្រូវបានជ្រើសតាំងជាអគ្គលេខាឌិការអាស៊ានកាលពីឆ្នាំ២០២៣។

រដ្ឋសភាជាតិនៅថ្ងៃទី២១ ខែកញ្ញានេះបានឱ្យដឹងថាលោក ចែម វីឌ្យ៉ា នឹងចាប់ផ្ដើមការងារលោកចាប់ពីខែមករាឆ្នាំ២០២៦ទៅ។

អាណត្តិរបស់លោក ចែម វីឌ្យ៉ា នឹងបន្តពីលោកស្រី Ar. Siti Rozaimeriyanty Dato Haji Abdul Rahman មានរយៈពេល៣ឆ្នាំ ដែលត្រូវបានជ្រើសរើសដោយប្រធានអន្តរសភាអាស៊ាន និងទទួលយកដោយមហាសន្និបាតអាយប៉ា។ ការជ្រើសរើសអគ្គលេខាធិការអាយប៉ាគឺធ្វើឡើងដោយផ្អែកលើលំដាប់អក្សរក្រមនៃប្រទេសសមាជិក។

ផ្ដើមចេញពីមន្ត្រីដែលបម្រើការងារនៅការិយាល័យបកប្រែនៃរណសិរ្សសាមគ្គីសង្រោះជាតិកម្ពុជា លោក ចែម វីឌ្យ៉ា បានវិវត្តខ្លួនជាបន្តបន្ទាប់ ពិសេសការងារច្បាប់ ការទូត និងទំនាក់ទំនងអន្តរជាតិ។ នៅអំឡុងឆ្នាំ១៩៩៣ ក្រោយការបោះឆ្នោតជាសកលដែលរៀបចំឡើងដោយអង្គការសហប្រជាជាតិ គឺសភាធម្មនុញ្ញកម្ពុជា ក៏ត្រូវបានបង្កើតឡើង ហើយពេលនោះដែរ លោកទទួលបានតួនាទីជាអគ្គលេខាធិការរងនៃសភាធម្មនុញ្ញកម្ពុជា។ ដល់ខែតុលា ឆ្នាំ១៩៩៣ លោកបានផ្លាស់មកកាន់តួនាទីជាអគ្គលេខាធិការនៃក្រសួងការបរទេស។

បម្រើការនៅក្រសួងការបរទេសនេះ លោក ចែម វីឌ្យ៉ា បានទទួលតួនាទីជាឧត្តមមន្រ្តីអាស៊ានកម្ពុជា ហើយក្រោយមក ដោយផ្អែកលើសមត្ថភាព និងបទពិសោធការងារ លោក ចែម វីឌ្យ៉ា ត្រូវបានចាត់តាំងឱ្យទៅបំពេញបេសកកម្មកនៅក្រៅប្រទេស ក្នុងតួនាទីជាតំណាងអចិន្រ្តៃយ៍កម្ពុជាប្រចាំនៅអង្គការសហប្រជាជាតិ និងជាឯកអគ្គរាជទូតកម្ពុជាប្រចាំប្រទេសកាណាដា។ បន្តទៅ គឺជាឯកអគ្គរាជទូតកម្ពុជាប្រចាំនៅសហព័ន្ធអាល្លឺម៉ង់ ស្លូវេនី ឆែក ប៉ូឡូញ ស្លូវ៉ាគី ហុងគ្រី ម៉ាល់តា និងស៊ីប។

នៅឆ្នាំ២០១៦ លោក ចែម វីឌ្យ៉ា ក៏បានធ្វើជាឯកអគ្គរាជទូតកម្ពុជាប្រចាំនៅប្រទេសបារាំង នៅអង់ឌ័រ ស៊ីប ក្រិក អ៊ីតាលី ម៉ាល់តា ព័រទុយហ្កាល់ ស៊ែប៊ី និងអេស្ប៉ាញ និងតំណែងជារដ្ឋលេខាធិការក្រសួងការបរទេស មុនមកកាន់តំណែងនៅព្រឹទ្ធសភា ក្នុងនីតិកាលទី៥នេះ តបតាមតម្រូវការចាំបាច់របស់សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា។ លោកអាចប្រើប្រាស់ភាសាបរទេសចំនួន៥ភាសាគឺ អង់គ្លេស បារាំង រុស្ស៊ី អាល្លឺម៉ង់ និងអេស្ប៉ាញ៕

អត្ថបទដោយ ហ៊ុន សិរីវឌ្ឍន៍

The post អាយប៉ាជ្រើសតាំងលោក ចែម វីឌ្យ៉ា ជាអគ្គលេខាធិការផ្លូវការ appeared first on Kampuchea Thmey Daily.

ថៃឡាំប៉ាមិនឱ្យអាយប៉ាចេញសេចក្ដីថ្លែងការណ៍រួមលើរឿងជម្លោះព្រំដែនជាមួយកម្ពុជា

hun sirivadh — Thu, 18 Sep 2025 03:09:13 +0000

ប្រតិភូសភាកម្ពុជាដែលដឹកនាំដោយប្រធានសភាកម្ពុជា សម្ដេចសភាធិបតី ឃួន សុដារី បានបង្ហាញការពិតនៃបញ្ហាព្រំដែនកម្ពុជា-ថៃទៅកាន់ថ្នាក់ដឹកនាំសភានៅតំបន់អាស៊ាន និងដៃគូ បង្កើតបានជាសំឡេងគាំទ្រមួយចំពោះកម្ពុជា ខណៈថៃឡាំប៉ាមិនឱ្យចេញសេចក្ដីថ្លែងការណ៍រួមនោះទេ។

ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានរដ្ឋសភាលោក សួស យ៉ារ៉ា បានថ្លែងក្នុងវីដេអូពិសេសនៅថ្ងៃទី១៧ ខែកញ្ញាថា ពេលនេះសំឡេងត្រូវការសន្ដិភាពរបស់ពលរដ្ឋកម្ពុជាត្រូវបានអាស៊ាន និងប្រទេសជាមិត្តអាស៊ានបានដឹងឮព្រមទាំងបានឡើងថ្លែងជាបន្តបន្ទាប់ពីចំណាប់អារម្មណ៍ពួកគេលើបញ្ហាព្រំដែនកម្ពុជា ហើយមានតែថៃមួយទេដែលជំទាស់មិនឱ្យចេញសេចក្ដីថ្លែងការណ៍រួម។

លោកថា៖ «បណ្ដាប្រទេសដែលជាសមាជិកសភាអាស៊ានឯកឧត្តមលោកជំទាវដែលជាសមាជិកផ្សេងៗលោកបានថ្លែងគាំទ្រធ្វើមិចឱ្យប្រទេសទាំងពីររក្សាបទបាញ់ឱ្យបានជាគោលការណ៍ ហើយនិងអនុវត្តន៍បទឈប់បាញ់ឱ្យបាននៅតំបន់។ មិនគួរមានព្រឹត្តិការណ៍កើតឡើងដូចថ្ងៃនេះបន្តទៀតទេ! ពួកគេនឹងបន្តការយកចិត្តទុកដាក់ទោះបីជាមានការប្រកែកនិងជំទាស់ពីប្រតិភូថៃក្នុងការចេញនូវសេចក្ដីថ្លែងការណ៍រួមក៏័ដោយ»។

បើទោះបីជាមិនអាចចេញសេចក្ដីថ្លែងការណ៍រួមក្ដីបើតាមលោក សួស យ៉ារ៉ា ថាបញ្ហានេះនឹងត្រូវសមាជិកសភាតំបន់អាស៊ាននឹងបន្តយកចិត្តទុកដាក់។

ប្រតិកម្មរបស់សមាជិកសភាអាស៊ានលើថៃនេះកើតឡើងស្របពេលដែលទាហានថៃបាញ់ចូលមករាយលួសបន្លា បាញ់គ្រាប់ជ័រ និងឧស្ម័នបង្ហូរទឹកភ្នែកលើពលរដ្ឋខ្មែរនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យកាលពីថ្ងៃ១៧ ខែកញ្ញាម្សិលមិញផងដែរ។ លោក សួស យ៉ារ៉ា ថាពេលនេះភាពអត់ធ្មត់របស់ប្រជាពលរដ្ឋខ្មែរចំពោះបញ្ហាព្រំដែនត្រូវបានទទួលស្គាល់នូវតម្លៃពិសេស ហើយអន្តរជាតិកំពុងតែចូលរួមនិងតាមដានលើករណីនេះហើយ។

អ្នកតាមដានភូមិសាស្ត្រនយោបាយលោកបណ្ឌិត ជ័យ តិច ប្រាប់កម្ពុជាថ្មីថាថ្វីត្បិតតែអាស៊ានមានគោលការណ៍កុងសង់ស៊ីសដែលត្រូវការសំឡេងរួមដើម្បីចេញសេចក្ដីថ្លែងការណ៍ តែសកម្មភាពរបស់ថៃបានបង្ហាញថាប្រទេសនេះកំពុងខ្លាចស្រមោលខ្លួនឯង និងព្យាយាមមិនឱ្យអន្តរជាតិដឹងឮនោះទេ។

លោកថា៖ «ដូច្នេះពេលនេះអន្តរជាតិអាចមើលឃើញហើយថា ភាគីណាជាអ្នកគោរពនូវច្បាប់អន្តរជាតិគោរពនូវកិច្ចព្រមព្រៀង។ [..] កម្ពុជាជាប្រទេសដែលគោរពនូវច្បាប់អន្តរជាតិ និងកិច្ចព្រមព្រៀងហើយតែងតែលើកបញ្ហានេះទៅភាគីទី៣ និងអន្តរជាតិដើម្បីចូលរួមដោះស្រាយទាំងអស់គ្នាតែថៃផ្ទុយពីនេះ»។

គួរឱ្យដឹងផងដែរ ប្រធានសភាកម្ពុជា សម្ដេចសភាធិបតី ឃួន សុដារី បានដឹកនាំប្រតិភូកម្ពុជាទៅចូលរួមមហាសន្និបាតអន្តរសភាអាស៊ាន (អាយប៉ា) លើកទី៤៦ នៅទីក្រុងគួឡាឡាំពួរ ប្រទេសម៉ាឡេស៊ីចាប់ពីថ្ងៃទី១៧ ដល់ថ្ងៃទី២១ ខែកញ្ញានេះ។ ថ្លែងក្នុងកិច្ចប្រជុំគណៈកម្មាធិការប្រតិបត្តិអាយប៉ាសម្ដេចបានឡើងថ្លែងដោយជំរុញដល់អាយប៉ាគួរតែមានភាពរហ័សរហួនដើម្បីដោះស្រាយបញ្ហាប្រឈមថ្មីៗឱ្យមានប្រសិទ្ធភាព ខណៈសម្ដេចស្នើឱ្យអាយប៉ាដាក់បញ្ជូល ការលើកកម្ពស់សន្ដិភាព និងសន្ដិសុខ សាមគ្គីភាពទៅក្នុងសេចក្ដីសម្រេចរបស់មហាសន្និបាតផងដែរ៕

អត្ថបទដោយ ហ៊ុន សិរីវឌ្ឍន៍

The post ថៃឡាំប៉ាមិនឱ្យអាយប៉ាចេញសេចក្ដីថ្លែងការណ៍រួមលើរឿងជម្លោះព្រំដែនជាមួយកម្ពុជា appeared first on Kampuchea Thmey Daily.

សភាកម្ពុជាដាក់សេចក្ដីព្រាងឱ្យមហាសន្និបាតអាយប៉ាចាប់អារម្មណ៍បញ្ហាជម្លោះកម្ពុជា-ថៃ

hun sirivadh — Wed, 17 Sep 2025 09:08:01 +0000

សភាកម្ពុជាបានដាក់សេចក្ដីព្រាងបន្ថែមឱ្យមហាសន្និបាតអន្តរសភាអាស៊ាន (អាយប៉ា) លើកទី៤៦ ងាកមកចាប់អារម្មណ៍បញ្ហាសន្ដិសុខ សាមគ្គីភាព ក្នុងតំបន់បន្ទាប់ពីថៃនៅតែបង្កបញ្ហាជាបន្តបន្ទាប់ជាមួយប្រទេសកម្ពុជា។ សម្ដេចប្រធានសភាបានថ្លែងថា «អាយប៉ាចាំបាច់ត្រូវមានភាពរហ័សរហួន សម្របខ្លួន និងមានគំនិតច្នៃប្រឌិត ដើម្បីដោះស្រាយបញ្ហាប្រឈមថ្មីៗទាំងនេះប្រកបដោយប្រសិទ្ធភាព»។

ថ្លែងក្នុងកិច្ចប្រជុំគណៈកម្មាធិការប្រតិបត្តិអាយប៉ាយ លើកទី៤៦ នៅទីក្រុងគូឡាឡាំពួ សម្ដេចសភាធិបតី ឃួន សុដារី បានបញ្ជាក់ពីជំហរនិងឆន្ទៈរបស់កម្ពុជាក្នុងការលើក កម្ពស់សន្តិភាព សុខដុមនីយកម្មនៅក្នុងអាស៊ាន តាមរយៈការដោះស្រាយជម្លោះព្រំដែនកម្ពុជានិងថៃដោយសន្តិវិធី។ សម្ដេចបានលើកឡើងថា កម្ពុជាគោរពបទឈប់បាញ់យ៉ាងម៉ឹងម៉ាត់ គោរពធម្មនុញ្ញអាស៊ាន ធម្មនុញ្ញអង្គការសហប្រជាជាតិ ច្បាប់អន្តរជាតិនានា ដោះស្រាយបញ្ហាតាមរយៈការចរចាដោយសន្តិវិធីឈរលើយន្តការដែលមានស្រាប់ដើម្បីធ្វើយ៉ាងណាឱ្យស្ថានភាពព្រំដែនកម្ពុជានិងថៃវិលទៅរកភាពប្រក្រតីឡើងវិញ។

សម្ដេចថា៖ «សុខសន្តិភាពតាមបន្ទាត់ព្រំដែនកម្ពុជានិងថៃ ក៏ជាសុខសន្តិភាពរបស់សហគមន៍អាស៊ាន ឈានឆ្ពោះទៅសម្រេចបាននូវចក្ខុវិស័យអាស៊ានឆ្នាំ២០៤៥ ក្នុងការកសាងសហគមន៍រួម ប្រកបដោយចីរភាពនិងបរិយាបន្នដោយយកពលរដ្ឋជាស្នូល»។

កិច្ចប្រជុំគណៈកម្មាធិការប្រតិបត្តិអាយប៉ាលើកទី៤៦ បានប្រារព្ធធ្វើឡើងនៅព្រឹក ថ្ងៃទី១៧ ខែកញ្ញា ឆ្នាំ២០២៥ នេះ ដើម្បីពិភាក្សា អនុម័តកម្មវិធីនិងរបៀបវារៈនៃមហាសន្និបាតលើកទី៤៦ និងសកម្មភាពការងារមួយចំនួនទៀតរបស់លេខាធិការដ្ឋានអាយប៉ា។

សភាកម្ពុជាបានផ្ដួចផ្ដើមសេចក្ដីព្រាងសេចក្ដីសម្រេចមួយចំនួនសម្រាប់ដាក់ជូនមហាសន្និបាតពិភាក្សាអនុម័តមានដូចជា ការបង្កើតវេទិកាថ្នាក់ដឹកនាំអាយប៉ា ការបង្កើតភាពជាដៃគូអាយប៉ា និងការលើកកម្ពស់សុខសន្តិភាព សាមគ្គីភាពនៅក្នុងតំបន់អាស៊ាន។

សម្តេចរដ្ឋសភាធិបតី ឃួន សុដារី មានប្រសាសន៍ថា៖ «អាយប៉ាចាំបាច់ត្រូវមានភាពរហ័សរហួន សម្របខ្លួន និងមានគំនិតច្នៃប្រឌិត ដើម្បីដោះស្រាយបញ្ហាប្រឈមថ្មីៗទាំងនេះប្រកបដោយប្រសិទ្ធភាព»។

សូមជម្រាបថា កិច្ចប្រជុំគណៈកម្មាធិការប្រតិបត្តិអាយប៉ា ដឹកនាំដោយប្រធានរដ្ឋសភាប្រទេសម៉ាឡេស៊ី និងជាប្រធានអន្តរសភាអាស៊ាន(អាយប៉ា/AIPA) លើកទី៤៦ លោក តាន់ស៊ី ដាតូ ហ្សូហារី ប៊ីន អាប់ឌុល (Tan Sri Dato (Dr.) Johari Bin Abdul) ដោយមានការអញ្ជើញចូលរួមពីប្រធានគណៈប្រតិភូសភាសមាជិកអាយប៉ា រួមមាន ព្រុយណេដារូស្សាឡាម ព្រះរាជាណាចក្រកម្ពុជា ម៉ាឡេស៊ី ឥណ្ឌូណេស៊ី ហ្វីលីពីន សឹង្ហបូរី ថៃ វៀតណាម និងឡាវ។

ក្រៅពីការពិភាក្សានិងអនុម័តលើកម្មវិធីនិងរបៀបវារៈមហាសន្និបាតលើកទី៤៦ហើយ កិច្ចប្រជុំគណៈកម្មាធិការប្រតិបត្តិអាយប៉ា បានស្តាប់របាយការណ៍សកម្មភាពការងាររបស់អគ្គលេខាធិកាដ្ឋានអាយប៉ាប្រចំាឆ្នាំ២០២៤-ឆ្នាំ២០២៥ និងពិភាក្សានិងអនុម័តផែនការបន្តរបស់អាយប៉ាផងដែរ។

អន្តរសភាអាស៊ាន ហៅកាត់ (អាយប៉ា/AIPA) ជាវេទិកាសភានៃបណ្ដាប្រទេសជាសមាជិកអាស៊ាន ដែលតំណាងឱ្យប្រជាពលរដ្ឋប្រមាណជិត៧០០លាននាក់ ។ ក្នុងក្របខ័ណ្ឌនីតិប្បញ្ញត្តិ មហាសន្និបាតប្រចាំឆ្នាំរបស់អាយប៉ា រៀបចំឡើងក្នុងគោលបំណងលើកកម្ពស់យន្តការសភា បង្កើនកិច្ចសហប្រតិបត្តិការជាមួយអាស៊ានដើម្បីសម្រេចបានចក្ខុវិស័យសហគមន៍មួយ ដែលយកប្រជាពលរដ្ឋជាស្នូល៕

អត្ថបទដោយ ហ៊ុន សិរិវឌ្ឍន៍

The post សភាកម្ពុជាដាក់សេចក្ដីព្រាងឱ្យមហាសន្និបាតអាយប៉ាចាប់អារម្មណ៍បញ្ហាជម្លោះកម្ពុជា-ថៃ appeared first on Kampuchea Thmey Daily.

លោក ចែម វីឌ្យ៉ា នឹងក្លាយជាកូនខ្មែរទី២ដែលកាន់តួនាទីជាន់ខ្ពស់ក្នុងស្ថាប័នអាស៊ាន

hun sirivadh — Thu, 17 Jul 2025 04:20:10 +0000

អគ្គលេខាធិការអន្តរសភាអាស៊ាន(អាយប៉ា)បច្ចុប្បន្នលោកស្រី អាស៊ីទី រ៉ូសាយ មេរីយ៉ានទី ដាតូ ហាជី អាបឌុល រ៉ាម៉ាន់ បានឱ្យដឹងថាអ្នកដែលត្រូវជំនួសលោកស្រីនៅខែកញ្ញាខាងមុខគឺសមាជិកព្រឹទ្ធសភាកម្ពុជាលោក ចែម វីឌ្យ៉ា។ ការលើកឡើងនេះគឺនៅក្នុងជំនួបរវាងលោកស្រី និងសម្ដេចប្រធានរដ្ឋសភាកម្ពុជាកាលពីរសៀលថ្ងៃទី១៧ ខែកក្កដា ឆ្នាំ២០២៥។

ថ្លែងក្នុងជំនួបនៅវិមានសភាកម្ពុជា លោកស្រី អាស៊ីទី រ៉ូសាយ បានជម្រាបសម្ដេចប្រធានសភាកម្ពុជាថា អាណត្តិរបស់លោកស្រីនឹងត្រូវបញ្ចប់នាខែកញ្ញាខាងមុខហើយនឹងជំនួសដោយលោក ចែម វីឌ្យ៉ា ដែលមកពីកម្ពុជា។

លោក ចែម វីឌ្យ៉ា បច្ចុប្បន្នជាប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃព្រឹទ្ធសភាកម្ពុជា។ លោកត្រូវបានសម្ដេចតេជោ ហ៊ុន សែន ជ្រើសរើស ដើម្បីស្នើសុំការគាំទ្រក្នុងចំណោមមេដឹកនាំសភានៃបណ្ដាប្រទេសសមាជិកអាស៊ាន សម្រាប់តួនាទីជាអគ្គលេខាធិការអាស៊ានពីឆ្នាំ២០២៥ដល់ឆ្នាំ២០២៨។ បេក្ខភាពលោកនឹងត្រូវអនុម័តជាផ្លូវការដោយមហាសន្និបាតអាស៊ានអាយប៉ានៅពាក់កណ្ដាលខែកញ្ញា ឆ្នាំ២០២៥ខាងមុខ នៅប្រទេសម៉ាឡេស៊ី។

លោក ចែម វីឌ្យ៉ា នឹងក្លាយជាឥស្សរជនខ្មែរទី២ ដែលបានទៅកាន់តំណែងជាន់ខ្ពស់នៅស្ថាប័នអាស៊ាន បន្ទាប់ពីលោក កៅ គឹមហួន ជាឥស្សរជនខ្មែរទី១ ដែលបច្ចុប្បន្នកំពុងកាន់តំណែងជាអគ្គលេខាធិការអាស៊ាន។

អត្ថបទដោយ ហ៊ុន សិរីវឌ្ឍន៍

The post លោក ចែម វីឌ្យ៉ា នឹងក្លាយជាកូនខ្មែរទី២ដែលកាន់តួនាទីជាន់ខ្ពស់ក្នុងស្ថាប័នអាស៊ាន appeared first on Kampuchea Thmey Daily.

ប្រធានសភាជំរុញសមាជិកអាស៊ានការពារប្រព័ន្ធរបស់អង្គការសហប្រជាជាតិក្នុងកិច្ចប្រជុំ AIPA Caucus

hun sirivadh — Tue, 15 Jul 2025 07:57:49 +0000

ប្រធានសភាកម្ពុជា សម្ដេចសភាធិបតី ឃួន សុដារី បានរម្លឹកពីភាពចាំចាប់ក្នុងការគោរពធម្មនុញ្ញអង្គការសហប្រជាជាតិ និងការពារប្រព័ន្ធអង្គការសហប្រជាជាតិដើម្បីធានានូវសណ្ឋាប់ធ្នាប់អន្តរជាតិផ្អែកលើច្បាប់។ ការលើកឡើងនេះស្របពេលដែលកម្ពុជាបានប្ដឹងថៃករណីព្រំដែន៤ចំណុចទៅកាន់តុលាការយុត្តិធម៌អន្តរជាតិ។

ថ្លែងក្នុងពិធីបើកកិច្ចប្រជុំកិច្ចប្រជុំអ្នកនយោបាយអាយប៉ាលើកទី១៦ នៅសាលាសន្និសីទសភាព្រឹកថ្ងៃទី១៥ ខែកក្កដា ឆ្នាំ២០២៥នេះ សម្ដេចសភាធិបតី ឃួន សុដារី បានលើកឡើងថា វាជាការចាំបាច់បំផុតដែលអាស៊ានត្រូវរក្សាគុណតម្លៃ និងគោលការណ៍រួមរបស់ខ្លួន ត្រូវក្លាហានប្រឆាំងនិងឯកតោភាគីនិយមដើម្បីលើកម្ពស់សន្ដិភាពក្នុងតំបន់។

សម្ដេចបន្ថែមថា ការគោរពដល់ធម្មនុញ្ញអង្គការសហប្រជាជាតិ និងការពារប្រព័ន្ធអង្គការសហប្រជាជាតិក៏ជារឿងសំខាន់ដែរក្នុងពេលដែលពិភពកំពុងប្រឈមមុខនឹងការប្រកួតប្រជែងភូមិសាស្ត្រនយោបាយ ការបែកខ្ញែក វិវាទអធិបតេយ្យ និងជម្លោះប្រដាប់អាវុធដូចបច្ចុប្បន្ននេះ។

សម្ដេចថា៖ «យើងត្រូវរួមគ្នាច្រានចោលនូវ ឯកតោភាគីនិយម ឥរិយាបទអនុត្តរភាព និងការគាំពារនិយម ដែលធ្វើឱ្យអន្តរាយដល់ អភិបាលកិច្ចសកល និងច្បាប់អន្តរជាតិ ជាពិសេសប្រព័ន្ធពាណិជ្ជកម្មអន្តរជាតិ ដែល ផ្អែកលើច្បាប់។ យើងត្រូវមានភាពរឹងមាំ និងសេចក្តីក្លាហាន ដើម្បីការពារគោលបំណង និងគោលការណ៍នៃធម្មនុញ្ញអង្គការសហប្រជាជាតិឱ្យបានខ្ជាប់ខ្ជួន»។

ការលើកឡើងរបស់សម្ដេចប្រធានសភានៅពេលនេះស្របពេលដែលបញ្ហាព្រំដែនកម្ពុជា-ថៃកំពុងកើនកម្ដៅ ហើយកម្ពុជាបានសម្រេចយកបញ្ហាប្រាសាទតាមាន់ធំ តាមាន់តូច តាក្របី និងតំបន់មុំបីទៅកាន់តុលាការយុត្តិធម៌អន្តរជាតិដើម្បីដោះស្រាយ ខណៈថៃប្រកាសថាមិនទទួលស្គាល់យុត្តាធិការរបស់តុលាការដែលជាប្រព័ន្ធរបស់អង្គការសហប្រជាជាតិមួយនេះទេ។

ប្រទេសថៃជាប្រទេសចុះហត្ថលេខានឹងដៃ តែលុបវិញនឹងជើង ដោយបានបំពានដល់អនុស្សារណៈរបស់ខ្លួនបានចុះហត្ថលេខាជាមួយកម្ពុជាឆ្នាំ២០០០ ដែលព្រមព្រៀងជាក្នុងការទទួលយកសន្ធិសញ្ញាបារាំង-សៀមឆ្នាំ១៩០៤ និង១៩០៧ មកដោះស្រាយព្រំដែន តែជាក់ស្ដែងថៃបានយកផែនទីដែលគូសដោយខ្លួនឯងមកប្រើប្រាស់ទៅវិញ។

ជាង១ខែហើយដែលកម្ពុជាមានភាពតានតឹងព្រំដែនជាមួយគ្នាបន្ទាប់ពីថៃបានលួចចូលដីខ្មែរបាញ់សម្លាប់ទាហានខ្មែរម្នាក់កាលពីថ្ងៃទី២៨ ខែឧសភា និងបង្ករឿងលើព្រំដែនជាបន្តបន្ទាប់រហូតដល់បិទព្រំដែនដោយខ្លួនឯងកាលពីថ្ងៃទី៧ ខែមិថុនា ថែមទៀត ខណៈកម្ពុជាបានឆ្លើយតបទៅវិញជាបន្តបន្ទាប់ទាំងផ្លូវតុលាការអន្តរជាតិ នយោបាយ សេដ្ឋកិច្ច និងយោធា៕

អត្ថបទដោយ ហ៊ុន សិរីវឌ្ឍន៍

The post ប្រធានសភាជំរុញសមាជិកអាស៊ានការពារប្រព័ន្ធរបស់អង្គការសហប្រជាជាតិក្នុងកិច្ចប្រជុំ AIPA Caucus appeared first on Kampuchea Thmey Daily.

កម្ពុជាគ្មានជំនួបដាច់ដោយឡែកណាជាមួយថៃក្នុងកិច្ចប្រជុំ AIPA Caucus ទេ

hun sirivadh — Tue, 15 Jul 2025 07:17:52 +0000

នាយខុទ្ទកាល័យប្រធានសភា និងជាអគ្គលេខាធិការរងរដ្ឋសភាជាតិលោក កែវ ពិសិដ្ឋ បានបញ្ជាក់ថា ពុំមានជំនួបក្រៅផ្លូវការណាមួយរវាងអ្នកនយោបាយកម្ពុជា និងថៃក្នុងកិច្ចប្រជុំ AIPA Caucus ដែលកម្ពុជាធ្វើជាម្ចាស់ផ្ទះនោះទេ។

ថ្លែងប្រាប់អ្នកយកព័ត៌មាននៅវេលាថ្ងៃត្រង់ថ្ងៃទី១៥ ខែកក្កដា ឆ្នាំ២០២៥នៅវិមានរដ្ឋសភា លោក កែវ ពិសិដ្ឋ បានឱ្យដឹងថាក្រៅពីប្រជុំផ្លូវការដើម្បីពិនិត្យលើវឌ្ឍនភាពនិងទិសដៅទៅមុខរបស់ AIPA Caucus នោះគ្មានទេការជួបប្រជុំដាច់ដោយឡែកណាមួយជាមួយភាគីថៃ។

លោកថា៖ «យើងគ្មានជំនួបក្រៅផ្លូវការអីទេ! យើងគ្រាន់តែជជែកគ្នាក្នុងក្របខណ្ឌគ្រួសារអាស៊ានលើការងារសេចក្ដីសម្រេចដែលបានជជែកកាលពីឆ្នាំមុន»។

រដ្ឋសភាកម្ពុជាបានធ្វើជាម្ចាស់ផ្ទះនឹងកិច្ចប្រជុំអ្នកនយោបាយអាយប៉ាលើកទី១៦ ពីថ្ងៃទី១៤ដល់ថ្ងៃទី១៧ ខែកក្កដា ឆ្នាំ២០២៥ នៅវិមានរដ្ឋសភា ដោយមានការអញ្ជើញចូលរួមពីថ្នាក់ដឹកនាំ សមាជិកសមាជិកាព្រឹទ្ធសភា រដ្ឋសភា រាជរដ្ឋាភិបាល និងគណៈប្រតិភូសមាជិកអន្តរសភាអាស៊ាន (អាយប៉ា/AIPA) ប្រទេសសង្កេតការណ៍អាយប៉ា និងប្រទេសជាភ្ញៀវរបស់សភាកម្ពុជា ដែលជាម្ចាស់ផ្ទះ និងដៃគូអភិវឌ្ឍន៍ សរុបមានចំនួនប្រមាណជិត ៣០០នាក់។ តំណាងប្រទេសថៃគឺលោកស្រី ភីយ៉ារ៉ាត់ ធីយ៉ាផារ៉ាត់ (Piyarat TIYAPAIRT ) ដែលជាលេខាធិការគណៈកម្មាធិការអចិន្ត្រៃយ៍ស្តីពីទំនាក់ទំនង ទូរគមនាគមន៍ និងសេដ្ឋកិច្ចឌីជីថលនៃរដ្ឋសភាថៃ។

ថ្លែងក្នុងពិធីបើកកិច្ចប្រជុំ AIPA Caucus ព្រឹកថ្ងៃទី១៥ ខែកក្កដានេះ សម្ដេចសភាធិបតី ឃួន សុដារី មានប្រសាសន៍ថា បច្ចុប្បន្នក្នុងតំបន់អាស៊ានកំពុងប្រឈមនឹងបញ្ហានៃការប្រកួតប្រជែងភូមិសាស្ត្រនយោបាយ ការចុះខ្សោយនៃប្រព័ន្ធពហុភាគីនិយម បែកខ្ញែកសេដ្ឋកិច្ច វិវាទនៃអធិបតេយ្យ និងជម្លោះប្រដាប់អាវុធដែលត្រូវរកមធ្យោបាយរួមគ្នាទប់ស្កាត់។

សម្ដេចបន្ថែមដោយរម្លឹកនូវតម្លៃរួមរបស់អាស៊ាន ដោយជំរុញនូវការប្រកាន់ខ្ជាប់ធម្មនុញ្ញអាស៊ាន គោរពសន្ធិសញ្ញាមិត្តភាព និងកិច្ចសហប្រតិបត្តិការ និងសេចក្ដីប្រកាសស្ដីពីតំបន់សន្ដិភាព សេរីភាព និងអព្យាក្រឹត ព្រមទាំងគោរពដល់អង្គការសហប្រជាតិ និងការពារប្រព័ន្ធអង្គការសហប្រជាជាតិជាចាំបាច់ផងដែរ។

សម្ដេចថា៖ «វាគឺជាការចាំបាច់បំផុត ដែលអាស៊ានត្រូវរក្សាគុណតម្លៃ និងគោលការណ៍រួមរបស់យើងទាំងអស់នេះ»។

គួរឱ្យដឹងផងដែរថាកិច្ចប្រជុំក្រុមអ្នកនយោបាយអាយប៉ាលើកទី១៦ដែលធ្វើឡើងនៅកម្ពុជាឆ្នាំនេះធ្វើឡើងក្រោមប្រធានបទ «សន្តិភាពតាមរយៈការសន្ទនា៖ មាគ៌ាឆ្ពោះទៅមុខរបស់សភា»។ ការរៀបចំប្រធានបទនេះគឺក្នុងពេលដែលបញ្ហាក្នុងពិភពលោក និងតំបន់បានបង្កផលប៉ះពាល់ជាខ្លាំងដល់ស្ថិរភាព និងសន្ដិភាព ហើយកម្ពុជានិងថៃក៏កំពុងប្រឈមនឹងបញ្ហាព្រំដែនជាមួយគ្នាផងដែរ៕

អត្ថបទដោយ ហ៊ុន សិរីវឌ្ឍន៍

The post កម្ពុជាគ្មានជំនួបដាច់ដោយឡែកណាជាមួយថៃក្នុងកិច្ចប្រជុំ AIPA Caucus ទេ appeared first on Kampuchea Thmey Daily.

កិច្ចប្រជុំអាយប៉ា Archives - Kampuchea Thmey Daily

បណ្ឌិត ចែម វីឌ្យ៉ា នឹងចាប់ផ្ដើមអាណត្តិជាអគ្គលេខាធិការនៅស្ថាប័នសភាអាស៊ាន នៅដើមឆ្នាំ២០២៦

អាយប៉ាជ្រើសតាំងលោក ចែម វីឌ្យ៉ា ជាអគ្គលេខាធិការផ្លូវការ

ថៃ​ឡាំប៉ាមិនឱ្យអាយប៉ា​ចេញ​សេចក្ដី​ថ្លែង​ការណ៍​រួមលើរឿង​ជម្លោះព្រំដែនជាមួយ​កម្ពុជា

សភាកម្ពុជាដាក់សេចក្ដីព្រាងឱ្យមហាសន្និបាតអាយប៉ាចាប់អារម្មណ៍បញ្ហា​ជម្លោះកម្ពុជា-ថៃ

លោក ចែម វីឌ្យ៉ា នឹងក្លាយជា​កូន​ខ្មែរទី២​ដែលកាន់​តួនាទីជាន់ខ្ពស់​ក្នុង​ស្ថាប័នអាស៊ាន

ប្រធានសភាជំរុញសមាជិកអាស៊ាន​ការពារ​ប្រព័ន្ធ​របស់​អង្គការសហប្រជាជាតិក្នុង​កិច្ចប្រជុំ AIPA Caucus

កម្ពុជា​គ្មាន​ជំនួប​ដាច់ដោយឡែកណាជាមួយថៃក្នុងកិច្ចប្រជុំ AIPA Caucus ទេ

ថៃឡាំប៉ាមិនឱ្យអាយប៉ាចេញសេចក្ដីថ្លែងការណ៍រួមលើរឿងជម្លោះព្រំដែនជាមួយកម្ពុជា

សភាកម្ពុជាដាក់សេចក្ដីព្រាងឱ្យមហាសន្និបាតអាយប៉ាចាប់អារម្មណ៍បញ្ហាជម្លោះកម្ពុជា-ថៃ

លោក ចែម វីឌ្យ៉ា នឹងក្លាយជាកូនខ្មែរទី២ដែលកាន់តួនាទីជាន់ខ្ពស់ក្នុងស្ថាប័នអាស៊ាន

ប្រធានសភាជំរុញសមាជិកអាស៊ានការពារប្រព័ន្ធរបស់អង្គការសហប្រជាជាតិក្នុងកិច្ចប្រជុំ AIPA Caucus

កម្ពុជាគ្មានជំនួបដាច់ដោយឡែកណាជាមួយថៃក្នុងកិច្ចប្រជុំ AIPA Caucus ទេ