កិច្ចសហប្រតិបត្តិការមេគង្គ-ឡានឆាង Archives - Kampuchea Thmey Daily

ភ្នំពេញនឹងទទួលជំនួយកាមេរ៉ាសម្គាល់ទម្រង់មុខមនុស្សពីចិនជិត៥០០គ្រឿងដើម្បីលើកកម្ពស់សន្តិសុខ

hun sirivadh — Thu, 18 Jun 2026 03:05:53 +0000

រដ្ឋមន្ត្រីក្រសួងមហាផ្ទៃកម្ពុជា លោក ស សុខា បានចុះហត្ថលេខាលើកិច្ចព្រមព្រៀងមួយជាមួយចិនលើអនុវត្តន៍គម្រោងអភិវឌ្ឍន៍នគរបាលវៃឆ្លាត ដែលនឹងបំពាក់ប្រព័ន្ធដំណើរការ និងវិភាគវីដេអូ នៅរាជធានីភ្នំពេញ។ តាមគម្រោងនេះចិននឹងផ្ដល់កាមេរ៉ាដែលអាចសម្គាល់ទម្រង់មុខមនុស្ស និងស្លាកលេខយានយន្ត ៤៨៧គ្រឿង ដើម្បីបំពាក់នៅរាជធានីភ្នំពេញ។

ពិធីចុះហត្ថលេខាលើកិច្ចព្រមព្រៀងនេះធ្វើនៅក្រសួងមហាផ្ទៃកម្ពុជាកាលពីថ្ងៃទី១៦ ខែមិថុនា ឆ្នាំ២០២៦ រវាងរដ្ឋមន្ត្រីមហាផ្ទៃលោក ស សុខា និងអគ្គលេខាធិការនៃមជ្ឈមណ្ឌលកិច្ចសហប្រតិបត្តិការសន្តិសុខនិងសមាហរណកម្មអនុវត្តន៍ច្បាប់មេគង្គ-ឡានឆាង លោក យូ ស៊ាវវិន។

រដ្ឋមន្ត្រីក្រសួងមហាផ្ទៃលោក ស សុខា បានគូសបញ្ជាក់ថា ការដាក់ឱ្យដំណើរការប្រព័ន្ធ «នគរបាលវៃឆ្លាត» នេះគឺជាការអនុវត្តជាក់ស្ដែងនៃគោលនយោបាយសន្តិសុខរបស់រាជរដ្ឋាភិបាលកម្ពុជា ដើម្បីធានាបាននូវភាពសុខសាន្តជូនប្រជាពលរដ្ឋ និងភ្ញៀវទេសចរ។

គម្រោងអភិវឌ្ឍន៍នគរបាលឆ្លាតវៃនេះនឹងមកជាមួយមជ្ឈមណ្ឌលបញ្ជាការដែលមានសមត្ថភាពខ្ពស់ក្នុងការគ្រប់គ្រង និងឆ្លើយតបចំពោះស្ថានភាពអាសន្នបានទាន់ពេលវេលាមួយទៀតផងដែរ។

អគ្គលេខាធិការនៃមជ្ឈមណ្ឌលកិច្ចសហប្រតិបត្តិការសន្តិសុខនិងសមាហរណកម្មអនុវត្តន៍ច្បាប់មេគង្គ-ឡានឆាង លោក យូ ស៊ាវវិន បានសន្យាថាចិននឹងបន្តពង្រីកវិសាលភាពនៃការបំពាក់កាមេរ៉ា និងបណ្ដុះបណ្ដាលមន្ត្រីនគរបាលកម្ពុជាលើផ្នែកបច្ចេកវិទ្យាឌីជីថល សំដៅរួមចំណែកក្នុងការពង្រឹងវិស័យសន្តិសុខនៅកម្ពុជាបន្ថែមទៀត។

ប្រធានវិទ្យាស្ថានប្រជាធិបតេយ្យកម្ពុជាលោកបណ្ឌិត ប៉ា ច័ន្ទរឿន បានបង្ហាញការយល់ឃើញថាការបំពាក់ប្រព័ន្ធកាមេរ៉ាទំនើបនេះអាចជួយសម្រួលដល់ការងាររបស់នគរបាលរៀបចំសណ្ដាប់ធ្នាប់ កាត់បន្ថយបទល្មើស ងាយស្រួលស្វែងរកជនសង្ស័យ និងគ្រោះថ្នាក់ចរាចរណ៍ជាដើម។ ទោះជាយ៉ាងណាលោកក៏បានបង្ហាញក្ដីបារម្ភផងដែរ ទាក់ទងសិទ្ធិសេរីភាព និងឯកជនភាពរបស់ប្រជាពលរដ្ឋ ហើយប្រសិនជាការគ្រប់គ្រងខ្វះចន្លោះណាមួយទិន្នន័យដែលនគរបាលមានអាចធ្លាក់ទៅជនទី៣ ដែលអាចបង្កបញ្ហាបាន។

លោកថា៖ «សម្រាប់ខ្ញុំៗមិនយល់ទាស់ទេចំពោះការប្រើប្រាស់បច្ចេកវិទ្យាកាមេរ៉ា AI ដើម្បីបង្កើនកិច្ចការងារធានាសន្តិសុខសង្គម ប៉ុន្ដែដូចខ្ញុំបានលើកអ៊ីចឹងថាឧបករណ៍អេឡិចត្រូនិក AI នេះជាអាវុធមុខ២ សំខាន់យើងត្រូវបានប្រើប្រាស់វាឱ្យបានត្រឹមត្រូវ»។

លោកបានផ្ដល់អនុសាសន៍ថា ក្នុងពេលដែលមានរៀបចំនេះរដ្ឋាភិបាលគួរបង្កើតច្បាប់ការពារទិន្នន័យផ្ទាល់ខ្លួនរបស់ពលរដ្ឋ និងត្រូវធានាពីតម្លាភាព គណនេយ្យភាពរបស់នគរបាលដោយមិនត្រូវប្រើប្រាស់ដើម្បីគំរាមកំហែងឬកៀបសង្កត់ដល់ការអនុវត្តន៍សិទ្ធិរបស់ប្រជាជននោះទេ ជាមួយគ្នានេះការដាក់ស្លាកសញ្ញាឱ្យពលរដ្ឋដឹងថាមានបំពាក់កាមេរ៉ាចាប់ផ្ទៃមុខក៏សំខាន់ផងដែរ។ អ្វីដែលសំខាន់នោះគឺរដ្ឋត្រូវធានាថា ប្រព័ន្ធគ្រប់គ្រងកាមេរ៉ាចាប់ផ្ទៃមុខ និងស្លាកលេខយានយន្តនេះមិនត្រូវស្ថិតក្រោមការគ្រប់គ្រងពីបរទេសណាមួយឡើយ ដើម្បីធានានូវអធិបតេយ្យភាពទិន្នន័យ និងសន្តិសុខជាតិទាំងមូលផងដែរ៕

អត្ថបទដោយ ហ៊ុន សិរីវឌ្ឍន៍

The post ភ្នំពេញនឹងទទួលជំនួយកាមេរ៉ាសម្គាល់ទម្រង់មុខមនុស្សពីចិនជិត៥០០គ្រឿងដើម្បីលើកកម្ពស់សន្តិសុខ appeared first on Kampuchea Thmey Daily.

កម្ពុជាបន្តទទួលបានមូលនិធិពិសេសពីភាគីចិន ក្រោមគម្រោងកិច្ចសហប្រតិបត្តិការមេគង្គ-ឡានឆាង

Thoeun Vansong — Thu, 04 Jun 2026 09:14:15 +0000

រដ្ឋាភិបាលចិន តាមរយៈស្ថានទូតប្រចាំភ្នំពេញ បានបន្តផ្ដល់មូលនិធិពិសេសដល់កម្ពុជាសម្រាប់គម្រោងចំនួន៧ ក្រោមកិច្ចសហប្រតិបត្តិការមេគង្គ-ឡានឆាង។ មូលនិធិនេះត្រូវបានចុះហត្ថលេខាជាផ្លូវការ នៅថ្ងៃទី៤ ខែមិថុនា ឆ្នាំ២០២៦ ដោយរដ្ឋមន្ត្រីការបរទេសកម្ពុជា លោក ប្រាក់ សុខុន និងឯកអគ្គរដ្ឋទូតចិន លោក វ៉ាង វិនពីន នៅទីស្ដីការក្រសួងការបរទេស ក្នុងរាជធានីភ្នំពេញ។

កិច្ចព្រមព្រៀងកម្ពុជានិងចិនស្តីពីមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៦នេះ មានទឹកប្រាក់ប្រមាណ ១.៩៨០.០០០ ដុល្លារអាម៉េរិក។ តាមការឱ្យដឹងដោយក្រសួងការបរទេសកម្ពុជា គម្រោងទាំង៧ ដែលកម្ពុជាទទួលបានពីភាគីចិន រួមមាន ១.សហគ្រាសកសិករផលិតផ្សិតដើម្បីកាត់បន្ថយភាពក្រីក្រនៅខេត្តកណ្តាល ២.ការរួមបញ្ចូលគ្នានៃការធ្វើពិពិធកម្មសេដ្ឋកិច្ចជនបទ និងចែកចាយទឹកស្អាត ដំណាក់កាលទី២ គម្រោងទី៣គឺជាការពង្រីកលទ្ធភាពឈានចូលទីផ្សារតំបន់តាមរយៈនវានុវត្តន៍សំបកវេចខ្ចប់នៅក្នុងបណ្តាប្រទេសមេគង្គ-ឡានឆាង។

រីឯគម្រោងទី៤ គឺជាគម្រោងលុបបំបាត់ជំងឺរលាកថ្លើម គម្រោងទី៥ គឺផ្ដោតលើឌីជីថលូបនីយកម្មទេសចរណ៍សហគមន៍មេគង្គ-ឡានឆាង ក្នុងការត្រៀមខ្លួនសម្រាប់ទទួលភ្ញៀវទេសចរចិន និងគម្រោទី៦ គឺជួយការពង្រឹងសមត្ថភាពបច្ចេកវិទ្យាបៃតង និងបរិវត្តកម្មឌីជីថលសម្រាប់វិស្វករក្នុងបណ្តាប្រទេសអនុតំបន់មេគង្គ ខណៈគម្រោងទី៧ ជាគម្រោងលើកកម្ពស់សមត្ថភាពទិន្នន័យទឹក និងកិច្ចសន្ទនាថ្នាក់តំបន់ ក្រោមក្របខ័ណ្ឌកិច្ចសហប្រតិបត្តិការឡានឆាង-មេគង្គ។

ក្រសួងការបរទេសចាត់ទុកគម្រោងទាំងនេះនឹងរួមចំណែកដល់ការជំរុញការអភិវឌ្ឍជាតិជាអាទិភាពរបស់កម្ពុជាលើវិស័យផ្សេងៗ រួមមានការកាត់បន្ថយភាពក្រីក្រ ការអភិវឌ្ឍជនបទ សុខាភិបាល ទេសចរណ៍ និងបរិវត្តកម្មឌីជីថល។

គួរឱ្យដឹងថា ចាប់តាំងពីឆ្នាំ២០១៧ កម្ពុជាទទួលបានការគាំទ្រថវិកាសម្រាប់គម្រោងចំនួន១១៣ ក្រោមមូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង។ ការអនុវត្តគំនិតផ្ដួចផ្ដើមទាំងនេះដោយជោគជ័យ ក្រសួង ថា បានបង្ហាញពីការប្ដេជ្ញាចិត្តរបស់កម្ពុជា និងចិន ក្នុងការកសាងសហគមន៍វាសនារួមនៃសន្តិភាព វិបុលភាព និងការអភិវឌ្ឍប្រកបដោយចីរភាពសម្រាប់បណ្ដាប្រទេសមេគង្គ-ឡានឆាងទាំងអស់៕

The post កម្ពុជាបន្តទទួលបានមូលនិធិពិសេសពីភាគីចិន ក្រោមគម្រោងកិច្ចសហប្រតិបត្តិការមេគង្គ-ឡានឆាង appeared first on Kampuchea Thmey Daily.

ប្រទេសសមាជិកមហាអនុតំបន់មេគង្គជួបជជែកគ្នានៅភ្នំពេញ សម្រាប់យុទ្ធនាការប្រឆាំងព័ត៌មានក្លែងក្លាយ

Thoeun Vansong — Tue, 02 Jun 2026 07:23:12 +0000

នៅព្រឹកថ្ងៃទី២ ខែមិថុនា ឆ្នាំ២០២៦នេះ ក្រសួងព័ត៌មានកម្ពុជា បានរៀបចំវេទិកាពិភាក្សាមហាអនុតំបន់មេគង្គសម្រាប់យុទ្ធនាការប្រឆាំងព័ត៌មានក្លែងក្លាយ ដែលវេទិកានេះ ត្រូវបានរៀបចំឡើងក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន។ វេទិកាពិភាក្សាកម្រិតអនុតំបន់នេះ គឺផ្ដោតលើប្រធានបទ «ការកសាងទំនុកចិត្តក្នុងតំបន់ ភាពធន់នឹងប្រព័ន្ធឌីជីថល និងការចែករំលែកព័ត៌មានប្រកបដោយការទទួលខុសត្រូវ»។

ក្នុងវេទិកានេះមានការចូលរួមពីតំណាងស្ថានទូតចិន និងស្ថានទូតនៃបណ្តាប្រទេសអាស៊ានប្រចាំកម្ពុជា មន្ត្រីនាំពាក្យរាជរដ្ឋាភិបាល អ្នកនាំពាក្យគ្រប់ក្រសួងស្ថាប័ន និងរាជធានីខេត្ត ប្រតិបត្តិករក្នុងវិស័យព័ត៌មាន អ្នកសារព័ត៌មាន សមាគមអ្នកសារព័ត៌មាន អ្នកផលិតមាតិកា ជាពិសេសតំណាងមកពីប្រទេសជាសមាជិកមហាអនុតំបន់មេគង្គ រួមមាន៖ ចិន ឡាវ វៀតណាម និងមីយ៉ាន់ម៉ា។

បើតាមលោក ប្រាក់ ថាវអមិដា អនុរដ្ឋលេខាធិការក្រសួងព័ត៌មាន វេទិកានេះត្រូវបានរៀបចំឡើងក្នុងគោលបំណង ដើម្បីពិភាក្សាផ្លាស់ប្តូរបទពិសោធគ្នាទៅវិញទៅមករវាងវាគ្មិនមកពីប្រទេសជាសមាជិកមហាអនុតំបន់មេគង្គពាក់ព័ន្ធនឹងប្រភេទនៃព័ត៌មានក្លែងក្លាយ ដែលបាននិងកំពុងរីករាលដាលនៅក្នុងប្រទេសជាសមាជិក បញ្ហាប្រឈមក្នុងការទប់ស្កាត់ព័ត៌មានក្លែងក្លាយ យន្តការលើកកម្ពស់អក្ខរកម្មព័ត៌មាន និងប្រព័ន្ធផ្សព្វផ្សាយ ក៏ដូចជាអក្ខរកម្មឌីជីថល ក្នុងចំណោមប្រជាជននៃប្រទេសមហាអនុតំបន់មេគង្គ។ ម្យ៉ាង គឺដើម្បីលើកកកម្ពស់តួនាទីរបស់អ្នកសារព័ត៌មាន អង្គភាពសារព័ត៌មាន និងអ្នកប្រើប្រាស់បណ្តាញទំនាក់ទំនងសង្គម ក្នុងការទប់ស្កាត់ និងប្រឆាំងព័ត៌មានក្លែងក្លាយ ជាពិសេសវិធានការយុទ្ធសាស្ត្រក្នុងការលើកកម្ពស់កិច្ចសហប្រតិបត្តិការក្នុងតំបន់ ដើម្បីប្រយុទ្ធប្រឆាំងព័ត៌មានក្លែងក្លាយក្នុងមហាអនុតំបន់មេគង្គ។

លោក បន្តថា វេទិកានេះទទួលបានការគាំទ្រពីមូលនិធិពិសេសក្រោមកិច្ចសហប្រតិបត្តិការមេគង្គ-ឡានឆាង ពីភាគីចិន តាមរយៈស្ថានទូតចិនប្រចាំកម្ពុជា និងការសម្របសម្រួលពីក្រសួងការបរទេសកម្ពុជា។

ថ្លែងបើកវេទិកាខាងលើ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានលើកឡើងថា វេទិកានេះ នឹងរួមចំណែកដល់ការលើកកម្ពស់នូវកិច្ចសហប្រតិបត្តិការរវាងប្រទេសនិងប្រទេស ក៏ដូចជាការផ្សារភ្ជាប់រវាងប្រជាជននិងប្រជាជននៅក្នុងតំបន់ និងសកលលោក តាមរយៈការកសាងទំនុកចិត្តគ្នាទៅវិញទៅមក ពង្រឹងភាពធន់របស់ប្រជាពលរដ្ឋទៅនឹងភាពរីកចម្រើន យ៉ាងឆាប់រហ័សនៃបច្ចេកវិទ្យាឌីជីថល និងការចែករំលែកព័ត៌មានប្រកបដោយទទួលខុសត្រូវខ្ពស់។

លោក បានគូសបញ្ជាក់ពីការត្រៀមខ្លួនជាស្រេចរបស់កម្ពុជាក្នុងការធ្វើការយ៉ាងជិតស្និទ្ធជាមួយដៃគូមេគង្គទាំងអស់ ដើម្បីពង្រឹងសុចរិតភាពព័ត៌មាន លើកកម្ពស់ការចែករំលែកព័ត៌មានប្រកបដោយការទទួលខុសត្រូវ និងកសាងភាពធន់ឌីជីថលនៅទូទាំងតំបន់។ ពីវេទិកានេះ លោករដ្ឋមន្ត្រី ក៏បានថ្លែងអំណរគុណដល់រដ្ឋាភិបាលចិន ចំពោះការគាំទ្រប្រកបដោយទឹកចិត្តសប្បុរស តាមរយៈមូលនិធិពិសេសមេគង្គ-ឡានឆាង ដោយលោក ថា ការគាំទ្ររបស់ចិនមានសារៈសំខាន់យ៉ាងខ្លាំងក្នុងការជំរុញឱ្យយុទ្ធនាការតំបន់នេះប្រព្រឹត្តទៅបានដោយរលូន និងពង្រឹងកិច្ចសហប្រតិបត្តិការរវាងបណ្តាប្រទេសមេគង្គ-ឡានឆាង ក្នុងវិស័យព័ត៌មាន និងប្រព័ន្ធផ្សព្វផ្សាយ៕

ដោយ៖ ធឿន វ៉ាន់សុង

The post ប្រទេសសមាជិកមហាអនុតំបន់មេគង្គជួបជជែកគ្នានៅភ្នំពេញ សម្រាប់យុទ្ធនាការប្រឆាំងព័ត៌មានក្លែងក្លាយ appeared first on Kampuchea Thmey Daily.

ចិនផ្ដល់ថវិកា ១៧ ម៉ឺនដុល្លារ សម្រាប់លើកកម្ពស់ផលិតភាព និងបរិវត្តកម្មឌីជីថល ក្រោមកិច្ចសហប្រតិបត្តិការមេគង្គ-ឡានឆាង

deth leng — Mon, 11 May 2026 02:25:24 +0000

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅថ្ងៃទី ៨ ឧសភា ២០២៦ បានប្រកាសដាក់ឱ្យអនុវត្តគម្រោងថ្មីមួយ ក្រោមក្របខ័ណ្ឌកិច្ចសហប្រតិបត្តិការមេគង្គ-ឡានឆាង ដើម្បីលើកកម្ពស់ផលិតភាព និងការចាប់យកឌីជីថល ក្នុងចំណោមសហគ្រាសធុនមីក្រូ តូច និងមធ្យម (MSMEs) នៅក្នុងប្រទេសកម្ពុជា ឡាវ និងវៀតណាម តាមរយៈការគាំទ្រគោលនយោបាយ និងការចែករំលែកចំណេះដឹងក្នុងតំបន់។

ពិធីប្រកាសដាក់ឱ្យអនុវត្តគម្រោងនេះបានធ្វើឡើងក្រោមវត្តមានលោក ហែម វណ្ណឌី រដ្ឋមន្ត្រីក្រសួងឧស្សាហកម្ម និងលោក Wang Wenbin ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា។

គម្រោងថ្មីនេះទទួលបានការគាំទ្រថវិកាប្រមាណ ១៧០.០០០ ដុល្លារ ពីរដ្ឋាភិបាលនៃសាធារណរដ្ឋប្រជាមានិតចិន តាមរយៈមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង សម្រាប់រយៈពេល ១៥ ខែ ដោយផ្តោតលើការជំរុញបរិវត្តកម្មឌីជីថល ក្នុងចំណោមសហគ្រាសធុនមីក្រូ តូច និងមធ្យម ជាពិសេសសម្រាប់សហគ្រាសដឹកនាំដោយស្ត្រី និងអាជីវកម្មដែលមាននិរន្តរភាពបរិស្ថាន។

លោក ហែម វណ្ណឌី បានរំលេចពីតួនាទីសំខាន់របស់សហគ្រាសធុនមីក្រូ តូច និងមធ្យម ដែលជាឆ្អឹងខ្នងដ៏សំខាន់នៃសេដ្ឋកិច្ចជាតិ ដែលមិនត្រឹមតែបង្កើតការងារ និងបង្កើនប្រាក់ចំណូលប៉ុណ្ណោះទេ ប៉ុន្តែថែមទាំងជាតួអង្គស្នូលក្នុងការជំរុញនវានុវត្តន៍ និងការអភិវឌ្ឍប្រកបដោយបរិយាបន្ន។

លោក ហែម វណ្ណឌីបញ្ជាក់ថា៖ “ក្នុងបរិបទសេដ្ឋកិច្ចពិភពលោកដែលកំពុងផ្លាស់ប្តូរយ៉ាងរហ័ស បច្ចេកវិទ្យាឌីជីថល និងនវានុវត្តន៍ បានក្លាយជាកាតាលីករក្នុងការកំណត់សមត្ថភាពប្រកួតប្រជែងរបស់សហគ្រាសធុនមីក្រូ តូច និងមធ្យម ក៏ដូចជាភាពធន់របស់សេដ្ឋកិច្ចជាតិ និងតំបន់។“

សហគ្រាសធុនមីក្រូ តូច និងមធ្យម មានប្រមាណពី ៨៨,៨% ដល់ ៩៩,៩% នៃចំនួនសហគ្រាសទាំងអស់ក្នុងតំបន់អាស៊ាន។ សហគ្រាសជាច្រើនកំពុងប្រឈមនឹងបញ្ហា ដូចជាផលិតភាពនៅមានកម្រិត ជំនាញឌីជីថល ការចាប់យកច្ចេកវិទ្យាឌីជីថល និងបច្ចេកវិទ្យាថ្មីៗ នៅមិនទាន់ទូលំទូលាយ។

លោកឯកអគ្គរដ្ឋទូត វ៉ាង វិនពីន បានលើកឡើងថា ឆ្នាំនេះគឺជាខួបទី១០ នៃក្របខ័ណ្ឌកិច្ចសហប្រតិបត្តិការមេគង្គ-ឡានឆាង ដែលបានក្លាយជាគំរូនៃកិច្ចសហប្រតិបត្តិការ និងការអភិវឌ្ឍក្នុងតំបន់។

លោក វ៉ាង វិនពីន បន្ថែមថា៖ “រដ្ឋាភិបាលចិនប្តេជ្ញាបន្តធ្វើការជិតស្និទ្ធជាមួយបណ្តាប្រទេសនៃតំបន់មេគង្គ ដើម្បីពង្រឹងក្របខ័ណ្ឌកិច្ចសហប្រតិបត្តិការមេគង្គ-ឡានឆាង ជំនាន់ទី២ (LMC 2.0) ប្រកបដោយសាមគ្គីភាព និងបើកចំហដោយឈរលើគោលការណ៍ឈ្នះ-ឈ្នះ នវានុវត្តន៍បៃតង សន្តិភាព និងភាពសុខុដុមរមនា ដើម្បីរួមគ្នាកសាងនូវទសវត្សរ៍មាសថ្មីនៃកិច្ចសហប្រតិបត្តិការ មេគង្គ-ឡានឆាង។”

ចាប់តាំងពីឆ្នាំ២០១៧ កម្ពុជាបានទទួលផ្លៃផ្កាជាច្រើនពីក្របខ័ណ្ឌកិច្ចសហប្រតិបត្តិការនេះ រួមទាំងគម្រោងជាង ១០៦ គម្រោង ដែលទទួលបានថវិកាពីមូលនិធិពិសេសនៃកិច្ចសហប្រតិបត្តិការមេគង្គ-ឡានឆាង៕

The post ចិនផ្ដល់ថវិកា ១៧ ម៉ឺនដុល្លារ សម្រាប់លើកកម្ពស់ផលិតភាព និងបរិវត្តកម្មឌីជីថល ក្រោមកិច្ចសហប្រតិបត្តិការមេគង្គ-ឡានឆាង appeared first on Kampuchea Thmey Daily.

គម្រោងកិច្ចសហប្រតិបត្តិការ មេគង្គ-ឡានឆាង ត្រូវបានបិទបញ្ចប់ដោយជោគជ័យ

Din Thary — Fri, 19 Dec 2025 07:20:12 +0000

នៅថ្ងៃទី១៨ ខែធ្នូ ឆ្នាំ២០២៥ គម្រោងលើកកម្ពស់សមត្ថភាពផលិតកម្ម តាមរយៈការពង្រឹងសមត្ថភាពសហគ្រាសធុនតូច និងមធ្យម និងកិច្ចសហប្រតិបត្តិការបច្ចេកទេស ក្រោមបរិបទឧស្សាហកម្មជំនាន់ទី៤ នៅប្រទេសកម្ពុជា ឡាវ និងមីយ៉ាន់ម៉ា ត្រូវបានបិទបញ្ចប់ដោយជោគជ័យ ជាមួយនឹងពិធីប្រគល់ពានរង្វាន់នវានុវត្តន៍សម្រាប់ការអភិវឌ្ឍផលិតផលម្ហូបអាហាររបស់ក្រុមនិស្សិត។

កម្មវិធីនេះបានធ្វើឡើងក្រោមសហអធិបតីភាព លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង លោក វ៉ាង វិនពីន ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា។ គម្រោងនេះត្រូវបានអនុវត្តរយៈពេល ១៨ ខែ នៅក្នុងប្រទេសកម្ពុជា ឡាវ និងមីយ៉ាន់ម៉ា ក្រោមក្របខ័ណ្ឌកិច្ចសហប្រតិបត្តិការមេគង្គ-ឡានឆាង។

លោក ហែម វណ្ណឌី បានលើកឡើងថា “គម្រោងបានផ្តល់ជាលទ្ធផលជាក់ស្តែង ក្នុងការលើកកម្ពស់សមត្ថភាពសហគ្រាសធុនតូច និងមធ្យម ជំរុញការចាប់យកបច្ចេកវិទ្យាថ្មីៗ បង្កើនផលិតភាព និងភាពប្រកួតប្រជែង។ គម្រោងក៏បានបង្ហាញផ្លែផ្កានៃកិច្ចសហប្រតិបត្តិការបច្ចេកទេស និងការចែករំលែកចំណេះដឹង ក្នុងចំណោម ប្រទេសមេគង្គ-ឡានឆាងទាំងបី ក្នុងការឆ្លើយតបនឹងបញ្ហាប្រឈម និងកាលានុវត្តភាពនៃឧស្សាហកម្ម ៤.០។”

នាឱកាសនោះដែរលោករដ្ឋមន្ត្រី បានលើកទឹកចិត្តឱ្យភាគីពាក់ព័ន្ធទាញយកអត្ថប្រយោជន៍ពីលទ្ធផលនៃគម្រោង ដោយបន្ថែមថា ខណៈដែលគម្រោងត្រូវបានបញ្ចប់ ចំណេះដឹង ភាពជាដៃគូ និងជំនាញដែលបានអភិវឌ្ឍ តាមរយៈកិច្ចសហប្រតិបត្តិការនេះ គួរត្រូវបានបន្តអនុវត្ត និងពង្រីកបន្ថែមទៀត ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម សម្រាប់រយៈពេលវែងទៅមុខ។

ជាមួយគ្នានោះ ឯកអគ្គរដ្ឋទូតចិន លោក វ៉ាង វិនពីន បានកត់សម្គាល់ថា បណ្តាប្រទេស មេគង្គ-ឡានឆាង បានបង្កើនការចាប់យកបច្ចេកវិទ្យា និងនវានុវត្តន៍កាន់តែច្រើន ដើម្បីគាំទ្រការអភិវឌ្ឍសេដ្ឋកិច្ច និងបង្កើនសមត្ថភាពផលិតកម្មរបស់ខ្លួន។

លោក វ៉ាង វិនពីន បានលើកឡើងថា ប្រទេសចិនបាន និងកំពុងដើរតួនាទីយ៉ាងសកម្ម ក្នុងការចែករំលែកបទពិសោធន៍អភិវឌ្ឍន៍ ជំនាញបច្ចេកទេស និងធនធានជាមួយបណ្តាប្រទេស មេគង្គ-ឡានឆាង ជួយពង្រឹងសមត្ថភាព ជំរុញកិច្ចសហប្រតិបត្តិការជាក់ស្តែង និងត្រួសត្រាយផ្លូវសម្រាប់សមាហរណកម្មតំបន់កាន់តែស៊ីជម្រៅ និងកំណើនប្រកបដោយចីរភាព។

កម្មវិធីនេះក៏មានការប្រគល់ពានរង្វាន់ជ័យលាភីស្តីពី “ថ្នាលបណ្តុះអាជីវកម្មកម្ពុជា សម្រាប់ការអភិវឌ្ឍផលិតផលម្ហូបអាហារ” ដែលជាសកម្មភាពសំខាន់មួយរបស់គម្រោង ផ្តោតលើការជំរុញនវានុវត្តន៍ក្នុងការកែច្នៃផលិតផលម្ហូបអាហារដោយប្រើប្រាស់វត្ថុធាតុដើមក្នុងស្រុក៕

The post គម្រោងកិច្ចសហប្រតិបត្តិការ មេគង្គ-ឡានឆាង ត្រូវបានបិទបញ្ចប់ដោយជោគជ័យ appeared first on Kampuchea Thmey Daily.

បិទសិក្ខាសាលាថ្នាក់តំបន់ស្ដីពីសកម្មភាពមីនក្នុងតំបន់មេគង្គ-ឡានឆាង ដើម្បីបង្កើនកិច្ចសហប្រតិបត្តិការរួមគ្នាដោះស្រាយបញ្ហាមីន

អ៊ិន ពិសី — Thu, 30 Oct 2025 08:11:04 +0000

អង្គសិក្ខាសាលាថ្នាក់តំបន់ស្ដីពីសកម្មភាពមីនក្នុងតំបន់មេគង្គ-ឡានឆាង ប្រព្រឹត្តទៅអស់រយៈពេល ៣ ថ្ងៃ ចាប់ពីថ្ងៃទី ២៧ ដល់ថ្ងៃទី ២៩ ខែតុលា ឆ្នាំ ២០២៥ នៅសណ្ឋាគារអង្គរភែលេសរីហ្សត និង ស្ប៉ា ខេត្តសៀមរាប ដើម្បីបង្កើនកិច្ចសហប្រតិបត្តិការរួមគ្នាឆ្ពោះទៅសម្រេចបានតំបន់មេគង្គ-ឡានឆាង ដែលមិនមានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម ត្រូវបានបិទកាលពីរសៀលម្សិលមិញ ក្រោមអធិបតីភាព លោក លី បញ្ញារិទ្ធិ៍ អគ្គលេខាធិការអាជ្ញាធរមីន តំណាងដ៏ខ្ពង់ខ្ពស់របស់ លោកបណ្ឌិត លី ធុជ ទេសរដ្ឋមន្ត្រី អនុប្រធានទី ១ អាជ្ញាធរមីន និងវត្តមានរបស់លោកស្រី ញ៉ែម មរកត រដ្ឋលេខាធិការក្រសួងកិច្ចការនារី។

អង្គសិក្ខាសាលានេះ គឺជាផ្នែកមួយ នៃគម្រោង «កិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន» ដែលគាំទ្រដោយមូលនិធិពិសេសរបស់សាធារណរដ្ឋប្រជាមានិតចិន ក្នុងគោលបំណងលើកកម្ពស់កិច្ចសហប្រតិបត្តិការក្នុងតំបន់ និងការចែករំលែកចំណេះដឹង និងជំនាញ ក្នុងវិស័យសកម្មភាពមីន រវាងប្រទេសនានានៅក្នុងតំបន់មេគង្គ-ឡានឆាង។

សិក្ខាសាលានេះមានការចូលរួមពីអ្នកជំនាញមកពីអង្គការអន្តរជាតិ និងតំណាងស្ថាប័នជាតិ ដែលបម្រើការងារពាក់ព័ន្ធនឹងវិស័យសកម្មភាពមីនរបស់ប្រទេសក្នុងតំបន់មេគង្គ-ឡានឆាង រួមមាន ចិន ឡាវ មីយ៉ាន់ម៉ា វៀតណាម និងកម្ពុជា។

លោក លី បញ្ញារិទ្ធិ៍ លើកឡើងថា សិក្ខាសាលាបានប្រព្រឹត្តទៅរយៈពេល ៣ ថ្ងៃ ដោយគណៈប្រតិភូចាប់ផ្ដើមការអញ្ជើញទៅទស្សនកិច្ចសារមន្ទីរតេជោសន្តិភាព ដែលជាផ្នែកប្រវត្តិសាស្ត្រ និងផ្នែកមនុស្សធម៌ នៃសកម្មភាពមីននៅកម្ពុជា។ ការទស្សនកិច្ចទៅកាន់សារមន្ទីរសន្តិភាពតេជោ បានរំលឹកឲ្យចងចាំអំពីដំណើរដ៏វែងឆ្ងាយ និងឈឺចាប់ពីសង្គ្រាមទៅសន្តិភាព ជាដំណើរមួយដែលប្រទេសទាំងអស់នៅក្នុងតំបន់បានចែករំលែកគ្នា។ ការទស្សនាប្រាសាទអង្គរវត្តនៅពេលរសៀល បានផ្តល់ឲ្យគណៈប្រតិភូបានឃើញអរិយធម៌បុរាណរបស់កម្ពុជា ដែលជាភស្តុតាងរស់រានថា សន្តិភាព និងវប្បធម៌ អាចរស់រួមគ្នា និងរីកចម្រើនទៅជាមួយគ្នាបាន។

លោកបានបន្តថា សិក្ខាសាលាបានដំណើរការពិភាក្សា ដោយមានការផ្លាស់ប្ដូរបច្ចេកទេស និងការចែករំលែកចំណេះដឹងដែលផ្ដោតលើប្រធានបទគ្របដណ្ដប់លើវិស័យសកម្មភាពមីនយ៉ាងទូលំទូលាយ រួមមាន ការជួយសង្គ្រោះជនរងគ្រោះដោយសារមីន ការអប់រំអំពីគ្រោះថ្នាក់ដោយសារយុទ្ធភណ្ឌគ្រឿងផ្ទុះ ការបោសសម្អាតមីន ការគ្រប់គ្រងព័ត៌មាន និងបញ្ហាបរិស្ថានក្នុងសកម្មភាពមីន។

លោកក៏បានបង្ហាញនូវការអរគុណ និងដឹងគុណយ៉ាងជ្រាលជ្រៅជូនចំពោះរដ្ឋាភិបាលសាធារណរដ្ឋប្រជាមានិតចិន ដែលបានផ្តល់ជំនួយថវិកាក្នុងការរៀបចំសន្និសីទនេះ នៅក្រោមក្របខណ្ឌ នៃកិច្ចសហប្រតិបត្តិការឡានឆាង-មេគង្គ និងអរគុណចំពោះក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ដែលបានជួយសម្របសម្រួលការងារសម្រាប់ព្រឹត្តិការណ៍នេះផងដែរ៕

អត្ថបទ ៖ គឿន វេត

The post បិទសិក្ខាសាលាថ្នាក់តំបន់ស្ដីពីសកម្មភាពមីនក្នុងតំបន់មេគង្គ-ឡានឆាង ដើម្បីបង្កើនកិច្ចសហប្រតិបត្តិការរួមគ្នាដោះស្រាយបញ្ហាមីន appeared first on Kampuchea Thmey Daily.

កម្ពុជា និងប្រទេសនៅតំបន់មេគង្គ-ឡានឆាង បង្កើនកិច្ចសហការរួមគ្នាដោះស្រាយបញ្ហាមីន

Samean Lay — Wed, 29 Oct 2025 07:39:39 +0000

កម្ពុជា ធ្វើជាម្ចាស់ផ្ទះក្នុងការរៀបចំសិក្ខាសាលាស្តីពីសកម្មភាពមីនក្នុងតំបន់មេគង្គ-ឡានឆាង ដើម្បីបង្កើនកិច្ចសហប្រតិបត្តិការរួមគ្នាឆ្ពោះទៅសម្រេចបានតំបន់មេគង្គ-ឡានឆាង ដែលមិនមានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។ សិក្ខាសាលា ត្រូវបានរៀបចំឡើងពីថ្ងៃទី២៧-២៩ ខែតុលា ឆ្នាំ២០២៥ នៅខេត្តសៀមរាប ក្រោមអធិបតីភាព ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន មានការចូលរួមពីអ្នកជំនាញមកពីអង្គការអន្តរជាតិ និងតំណាងស្ថាប័នជាតិ ដែលបម្រើការងារពាក់ព័ន្ធនឹងវិស័យសកម្មភាពមីន របស់ប្រទេសក្នុងតំបន់មេគង្គ-ឡានឆាង រួមមាន ចិន ឡាវ មីយ៉ាន់ម៉ា វៀតណាម និងរួមទាំងកម្ពុជា។

សិក្ខាសាលានេះ គឺជាផ្នែកមួយនៃគម្រោង «កិច្ចសហប្រតិបត្តិការមេគង្គ-ឡានឆាង ក្នុងសកម្មភាពមីន» ដែលគាំទ្រដោយមូលនិធិពិសេសរបស់សាធារណរដ្ឋប្រជាមានិតចិន ក្នុងគោលបំណង លើកកម្ពស់កិច្ចសហប្រតិបត្តិការក្នុងតំបន់ និងការចែករំលែកចំណេះដឹង និងជំនាញ ក្នុងវិស័យសកម្មភាពមីន រវាងប្រទេសនានានៅក្នុងតំបន់មេគង្គ-ឡានឆាង។

ក្នុងឱកាសនោះ លោក លី ធុជ ថ្លែងអំណរគុណ ជូនចំពោះគណៈប្រតិភូពីប្រទេសក្នុងតំបន់មេគង្គ-ឡានឆាង និងភាគីពាក់ព័ន្ធសកម្មភាពមីន ដែលបានចូលរួមក្នុងសិក្ខាសាលាថ្នាក់តំបន់នេះ ដែលបានបង្ហាញពីឆន្ទៈក្នុងការបង្កើនកិច្ចសហប្រតិបត្តិការ ដើម្បីរួមគ្នាឆ្ពោះទៅសម្រេចបានតំបន់មេគង្គ-ឡានឆាង ដែលមិនមានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។

ទេសរដ្ឋមន្រ្តី លី ធុជ

លោកបញ្ជាក់ទៀតថា៖« កម្ពុជា រួមទាំងប្រទេសក្នុងតំបន់មេគង្គ-ឡានឆាង ទទួលបានសមិទ្ធផលជាទីកត់សម្គាល់ក្នុងសកម្មភាពមីន ក៏ប៉ុន្តែការគំរាមកំហែងដោយសារមីន និងសំណល់ជាតិផ្ទុះពីសង្គ្រាម នៅតែបន្តមានដែលទាមទារឱ្យបង្កើនកិច្ចសហប្រតិបត្តិការតំបន់កាន់តែខ្លាំងក្លា ជាពិសេសតាមរយៈការចែករំលែកបទពិសោធន៍ និងចំណេះដឹងរវាងគ្នានិងគ្នា។ ដរាបណាស្លាកស្នាមសង្គ្រាមមិនទាន់បាត់រសាត់ ការប្តេជ្ញាចិត្តរបស់យើងនៅតែមានជានិច្ច»។

លោកក៏បានលើកឡើងពីសារសំខាន់នៃទន្លេមេគង្គ គឺជាប្រភពនៃជីវិត និងជាអត្តសញ្ញាណនៃសន្តិភាព និងកិច្ចសហប្រតិបត្តិការ ហេតុនេះ យើងត្រូវរួមគ្នា ដើម្បីធានាថាតំបន់មេគង្គ-ឡានឆាង មានសុខសន្តិភាព និងសុវត្ថិភាព តាមរយៈការលុបបំបាត់កេរ្តិ៍ដំណែលសង្គ្រាម និងបន្សល់ទុកកេរ្តិ៍ដំណែលក្តីសង្ឃឹមនិងឱកាស។

តំណាងភាគីចិន

តាងនាមឱ្យរាជរដ្ឋាភិបាលកម្ពុជា លោកទេសរដ្ឋមន្រ្តី លី ធុជ បានថ្លែងអំណរគុណចំពោះប្រទេសចិន ដែលបានរួមចំណែកយ៉ាងសំខាន់ក្នុងសកម្មភាពមីនមនុស្សធម៌នៅកម្ពុជា និងទូទាំងពិភពលោក។ ក្រៅពីសកម្មភាពមីន ចិនបានចូលរួមចំណែកក្នុងដំណើរការអភិវឌ្ឍសេដ្ឋកិច្ច-សង្គម ការកសាងហេដ្ឋារចនាសម្ព័ន្ធ ការលើកកម្ពស់សន្តិភាព ស្ថិរភាព និងវិបុលភាពទាំងក្នុងតំបន់ និងពិភពលោក៕

The post កម្ពុជា និងប្រទេសនៅតំបន់មេគង្គ-ឡានឆាង បង្កើនកិច្ចសហការរួមគ្នាដោះស្រាយបញ្ហាមីន appeared first on Kampuchea Thmey Daily.

ប្រទេសដៃគូមេគង្គ-ឡានឆាង បានបើកកិច្ចប្រជុំកម្រិតខ្ពស់របស់ខ្លួននៅថ្ងៃនេះ ក្នុងប្រទេសចិន

Thoeun Vansong — Fri, 15 Aug 2025 05:19:55 +0000

នៅព្រឹកថ្ងៃទី១៥ ខែសីហា ឆ្នាំ២០២៥នេះ បណ្ដាប្រទេសកិច្ចសហប្រតិបត្តិការមេគង្គ-ឡានឆាង បានចាប់ផ្ដើមកិច្ចប្រជុំរដ្ឋមន្ត្រីការបរទេសរបស់ខ្លួន នៅទីក្រុងអាននីង ខេត្តយូណាន ប្រទេសចិន ក្រោមវត្តមានដឹកនាំរបស់រដ្ឋមន្ត្រីការបរទេសចិន លោក វ៉ាង យី ដោយមានការចូលរួមពីរដ្ឋមន្ត្រីការបរទេសកម្ពុជា ឡាវ ថៃ វៀតណាម និងមីយ៉ាន់ម៉ា។

កិច្ចសន្ទនានយោបាយ និងការទូតកម្រិតខ្ពស់នេះ ដើរតួជាវេទិកាដ៏សំខាន់សម្រាប់ប្រទេសក្នុងតំបន់ទន្លេមេគង្គទាំងអស់ ដើម្បីជំរុញសមាហរណកម្មសេដ្ឋកិច្ច ការតភ្ជាប់ និងការអភិវឌ្ឍប្រកបដោយចីរភាព។ កិច្ចប្រជុំរដ្ឋមន្ត្រីការបរទេសមេគង្គ-ឡានឆាង លើកទីនេះ បានរៀបចំឡើងក្រោមមូលបទ «ទសវត្សរ៍មាស៖ ការប្តេជ្ញាចិត្តខ្ជាប់ខ្ជួន ដើម្បីកសាងសហគមន៍កាន់តែប្រសើរ តាមរយៈសាមគ្គីភាព» ក្នុងគោលដៅប្រទេសសមាជិកមេគង្គអាចរួមគ្នាកសាងតំបន់មួយដ៏រឹងមាំ ប្រកបដោយបរិយាបន្ន និងភាពធន់ ដែលអាចផ្តល់ប្រយោជន៍ដល់ប្រជាជននៅក្នុងអនុតំបន់មេគង្គ។

ក្នុងកិច្ចប្រជុំនៅថ្ងៃនេះ គឺដើម្បីវាយតម្លៃទៅលើវឌ្ឍនភាព ដែលសម្រេចបានក្រោមផែនការសកម្មភាព ៥ឆ្នាំនៃកិច្ចសហប្រតិបត្តិការមេគង្គ-ឡានឆាង កំណត់ទិសដៅអនាគតសម្រាប់ការពង្រីកកិច្ចសហប្រតិបត្តិការ និងពង្រឹងចំណងមិត្តភាពនិងការគាំទ្រទៅវិញទៅមករវាងប្រទេសសមាជិកមេគង្គ-ឡានឆាង ក្នុងស្មារតីលើកកម្ពស់ការអភិវឌ្ឍដោយចីរភាព និងការតភ្ជាប់ផ្នែកសង្គម និងវប្បធម៌ នៅក្នុងអនុតំបន់មេគង្គ-ឡានឆាង។

ចំពោះវត្តមានលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា ជាមួយនឹងការចូលរួមកិច្ចប្រជុំខាងលើ ក៏បានទទួលជួបពិភាក្សាទ្វេភាគីជាមួយរដ្ឋមន្ត្រីការបរទេសចិន លោក វ៉ាង យី និងរដ្ឋមន្ត្រីការបរទេសផ្សេងទៀត រាប់ទាំងការជួបជាត្រីភាគីជាមួយលោក ម៉ារីត សាងៀមផុង្ស រដ្ឋមន្ត្រីការបរទេសថៃ ក្រោមការសម្របសម្រួលរៀបចំឡើងដោយរដ្ឋមន្រ្តីការបរទេសចិន លោក វ៉ាង យី ផងដែរ៕

The post ប្រទេសដៃគូមេគង្គ-ឡានឆាង បានបើកកិច្ចប្រជុំកម្រិតខ្ពស់របស់ខ្លួននៅថ្ងៃនេះ ក្នុងប្រទេសចិន appeared first on Kampuchea Thmey Daily.