កីឡាទោចក្រយាន Archives - Kampuchea Thmey Daily

២០០នាក់ពី ៩ ប្រទេស ជិះកង់ដោយជោគជ័យពីភ្នំពេញ ទៅ សៀមរាប ដើម្បីមន្ទីរពេទ្យកុមារអង្គរ

chean virakbot — Mon, 01 Jun 2026 01:26:15 +0000

កីឡាករ កីឡាការិនីចំនួន ២០០ នាក់ មកពី ៩ ប្រទេសផ្សេងគ្នាបាននាំគ្នាជិះកង់ដោយជោគជ័យពីរាជធានីភ្នំពេញ ទៅ ទីរួមខេត្តសៀមរាប ដើម្បីប្រមូលថវិកាជួយដល់មន្ទីរពេទ្យកុមារអង្គរ កាលពីថ្ងៃសៅរ៍ ទី៣០ ខែឧសភា ឆ្នាំ ២០២៦ លើចម្ងាយផ្លូវ ៣១០ គីឡូម៉ែត្ររៀបចំដោយសហព័ន្ធកីឡាទោចក្រយានកម្ពុជា ក្រោមជជំនួយឧបត្ថម្ភគាំទ្រដោយ សម្ព័ន្ធកីឡាទោចក្រយានអន្តរជាតិ (UCI)។

លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានឲ្យដឹងថា នេះជាលើកទី៣ ដែលព្រឹត្តិការណ៍ជិះកង់ដើម្បីទាំងអស់គ្នា លើកទី៣ ឆ្នាំ២០២៦ ក្រោមប្រធានបទ «ជិះកង់ដើម្បីកុមារកម្ពុជាអបអរទិវាជិះកង់ពិភពលោក និងទិវាកុមារអន្តរជាតិ»។ ចំនួនអ្នកជិះកង់ចុះឈ្មោះចូលរួមត្រឹមតែ ១៨០ នាក់នេះ ប៉ុន្តែមានអ្នកចូលរួមដែលមិនបានចុះឈ្មោះរហូតដល់ ២០០នាក់។ ពេលទៅដល់ខេត្តសៀមរាប មានអ្នកចូលរួមជិះកង់អមដំណើរកាន់តែច្រើនថែមទៀត។

លោក នូ ចំរើន បានបញ្ជាក់ថា ចំពោះគោលបំណងចម្បងនៃការរៀបចំព្រឹត្តិការណ៍ជិះកង់ ដើម្បីទាំងអស់គ្នានេះធ្វើឡើងដើម្បីអបអរសាទរទិវាជិះកង់ពិភពលោក ៣ មិថុនា និងទិវាកុមារអន្តរជាតិ ១ មិថុនា ព្រមទាំងការជិះកង់ដើម្បីសហគម និងជួយរៃអង្គាសថវិកា សម្ភារជួយដល់មន្ទីរពេទ្យកុមារអង្គរ ខេត្តសៀមរាប ព្រមទាំងបន្តបំផុសការផ្សព្វផ្សាយឱ្យកាន់តែទូលំទូលាយជូនដល់កីឡាករ កីឡាការិនី និងមហាជនឱ្យចូលរួមលេងកីឡាជិះកង់ ដើម្បីសុខភាព មិត្តភាព សាមគ្គីភាពឱ្យកាន់តែល្អប្រសើរឡើងបន្ថែមទៀត។

តាមរយៈការរៀបចំនេះ សហព័ន្ធចង់ឱ្យក្រុមជិះកង់នៅខេត្តបានចូលរួមសហការគ្នា ក្នុងដំណើរជិះកង់កម្សាន្ត ដើម្បីគោលដៅសប្បុរសធម៌ និងការជិះកង់ចម្ងាយឆ្ងាយទៅកាន់ខេត្តសៀមរាប ក៏ដូចជាគោលដៅរួមចំណែកដល់ការផ្សព្វផ្សាយវិស័យកីឡាជិះកង់ និងវិស័យទេសចរណ៍នៅខេត្តសៀមរាបផងដែរ។ តំណាងសហព័ន្ធបានចាត់ទុក ព្រឹត្តិការណ៍ជិះកង់ដ៏ធំនេះជាការលើកស្ទួយវិស័យកីឡាទោចក្រយានកម្ពុជាឱ្យមានសកម្មភាពកាន់តែផុសផុលឡើងបន្ថែមទៀត។

ជាមួយគ្នានេះ លោក នូ ចំរើន សូមថ្លែងអំណរគុណដល់ថ្នាក់អាជ្ញាធរមូលដ្ឋានទាំងអស់ដែលមានចាប់ពីរាជធានីភ្នំពេញ ខេត្តកណ្តាល កំពង់ចាម កំពង់ធំ និងខេត្តសៀមរាប ដែលបានសម្រួលចរាចរណ៍ប្រកបដោយសុវត្ថិភាព ហើយក៏សូមអរគុណដល់ប្រជាពលរដ្ឋដែលទទួលស្វាគមន៍នៅតាមដងផ្លូវ។

លោក នូ ចំរើន ប្រគល់ថវិកាដល់មន្ទីរពេទ្យកុមារអង្គរ

អត្ថបទ៖ វិរបុត្រ

The post ២០០នាក់ពី ៩ ប្រទេស ជិះកង់ដោយជោគជ័យពីភ្នំពេញ ទៅ សៀមរាប ដើម្បីមន្ទីរពេទ្យកុមារអង្គរ appeared first on Kampuchea Thmey Daily.

ឱកាសល្អ ជិះកង់ដើម្បី ទេសចរណ៍ ចូលរួមដោយសេរី ពីភ្នំពេញ ទៅ ខេត្តតាកែវ

chean virakbot — Fri, 27 Feb 2026 02:37:31 +0000

ក្រសួងទេសចរណ៍នឹងរៀបចំព្រឹត្តិការណ៍ជិះកង់ដើម្បីទេសចរណ៍ចាប់ពីរាជធានីភ្នំពេញ ទៅកាន់ ខេត្តតាកែវ ដែលមានចម្ងាយ ៧៨ គីឡូម៉ែត្រ ក្នុងគោលបំណងជំរុញវិស័យទេសចរណ៍ឲ្យលូតលាស់ក្នុងសន្តិភាព។

ព្រឹត្តិការណ៍នឹងប្រព្រឹត្តទៅនៅថ្ងៃទី ៨ ខែមីនា ឆ្នាំ ២០២៦ ដើម្បីរួមចំណែកអបអរសាទរ ទិវានារីអន្តរជាតិ ៨ មីនា ផង និងដើម្បីជំរុញការផ្សព្វផ្សាយពីតំបន់គោលដៅទេសចរណ៍ប្រាសាទ ភ្នំជីសូរ្យ និងបង្ហាញពីការឯកភាពជាតិ សាមគ្គីភាពផ្ទៃក្នុងរឹងមាំ ព្រមទាំងឧបត្ថម្ភសម្ភារសិក្សាដល់សិស្សានុសិស្សខ្វះខាត។

សម្រាប់អ្នកចុះឈ្មោះចូលរួមនោះមិនតម្រូវឲ្យបង់ថវិកាឡើយពោលគឺអាចចូលរួមដោយសេរី។ ជាពិសេស អ្នកចុះឈ្មោះចូលរួម ៧០០ នាក់ដំបូង នឹងទទួលបានអាវយឹតចំនួន ១ ហើយសម្រាប់អ្នកចុះឈ្មោះចាប់ពី ៧០១ ឡើងទៅមិនទទួលបានអាវយឹតទេ។ បន្ថែមលើនេះ អ្នកចូលរួមទទួលបានអាហារសម្រន់ពេលព្រឹក ភេសជ្ជៈ និងអាហារថ្ងៃត្រង់។

ចំពោះអ្នកចុះឈ្មោះចំនួន ៧០០ នាក់ ដំបូងអាចទៅទទួលយកអាវយឹត នៅថ្ងៃទី៦ ខែមីនា ឆ្នាំ ២០២៦ ចាប់ពីម៉ោង ៩ ព្រឹករហូតដល់ ម៉ោង ៥ ល្ងាច នៅទីស្តីការក្រសួងទេសចរណ៍។ អ្វីដែលអ្នកចូលរួមត្រូវត្រៀមគឺ មានស្បែកជើងប៉ាតាសម្រាប់ឡើងភ្នំជីសូរ្យ និងត្រៀមកង់សម្រាប់ជិះដោយខ្លួនឯង។

សូមបញ្ជាក់ថា កន្លែងជួបជុំចេញដំណើរនៅទីស្តីការក្រសួងទេសចរណ៍ ដែលត្រូវចេញដំណើរនៅវេលាម៉ោង ៥ ព្រឹក ថ្ងៃទី៨ ខែមីនា ឆ្នាំ ២០២៦៕

អត្ថបទ៖ វិរបុត្រ

The post ឱកាសល្អ ជិះកង់ដើម្បី ទេសចរណ៍ ចូលរួមដោយសេរី ពីភ្នំពេញ ទៅ ខេត្តតាកែវ appeared first on Kampuchea Thmey Daily.

សហព័ន្ធកីឡាទោចក្រយាន គ្រោងនឹងរៀបចំកម្មវិធីសប្បុរសធម៌ «ជិះកង់ដើម្បីកុមារកម្ពុជា» ជាលើកទី៣

Sina Noun — Thu, 26 Feb 2026 08:29:55 +0000

សហព័ន្ធកីឡាទោចក្រយានកម្ពុជា គ្រោងនឹងរៀបចំកម្មវិធីសប្បុរសធម៌ «ជិះកង់ដើម្បីកុមារកម្ពុជា» ជាលើកទី៣ នៅថ្ងៃសៅរ៍ ទី៣០ ខែឧសភា ឆ្នាំ២០២៦ ខាងមុខនេះដើម្បីរៃអង្គាសថវិកឧបត្ថម្ភទៅកាន់មន្ទីរពេទ្យកុមារអង្គរជួយសម្រួលដល់ការព្យាបាលកុមារក្រីក្រ។

រូបភាពតំណាង (ផេកសហព័ន្ធ)

នេះមិនមែនជាលើកមួយសម្រាប់សហព័ន្ធកីឡាទោចក្រយានកម្ពុជា និងអ្នកស្រឡាញ់កីឡាជិះកង់នោះឡើយ ពោលសកម្មភាពសប្បុរសធម៌ផ្សេងៗ និងរួមទាំងការរៃអង្គាសថវិកាជួយដល់សង្គម មន្ទីរពេទ្យ គឺមានជាច្រើនលើកមកហើយនាពេលកន្លង។ ជាថ្មីទៀតនេះសហព័ន្ធរួមទាំងសប្បរសជនជាច្រើនទៀតនឹងរៀបចំកម្មវិធីជិះកង់ដើម្បីកុមារកម្ពុជា ជាលើកទី៣ នៅថ្ងៃទី៣០ ឧសភា ២០២៦ ខាងមុខនេះ។ ដូច្នេះសាធារណៈជន និងសប្បុរសជនដែលចង់ចូលរួមជិះកម្សាន្តសប្បាយផង និងចង់ជួយជាថវិកាអាចទំនាក់ទំនងមកកាន់ហ្វេសបុកផេកសហព័ន្ធផ្ទាល់ដើម្បីទទួលដំណឹងឲ្យបានកាន់តែច្បាស់អំពីកម្មវិធីនេះ។

ចំពោះថវិកាដែលនឹងប្រមូលបានពីសប្បរសជនគឺត្រូវប្រគល់ជូនទៅមន្ទីរពេទ្យកុមារអង្គរ ខេត្តសៀមរាប ដើម្បីសម្រួលដល់ការជួយពិនិត្យព្យាបាលជំងឺកុមារៗដោយមិនគិតថវិកា។ ការចូលរួមរបស់សាធារណៈជនគឺជាការជួយសង្គ្រោះអាយុជីវិតកុមារក្រីក្រលំបាក។

បញ្ជាក់ដែរថា កម្មវិធីជិះកង់ដើម្បីកុមារកម្ពុជានេះនឹងធ្វើឡើងនៅថ្ងៃទី៣០ ឧសភា ២០២៦ ដោយត្រូវជិះពីរាជធានីភ្នំពេញទៅកាន់ខេត្តសៀមរាប។ បើចាប់អារម្មណ៍អាចទំនាក់ទំនងទៅកាន់ហ្វេសបុកផេកសហព័ន្ធកីឡាទោចក្រយានកម្ពុជា៕

អត្ថបទដោយ៖ នួន ស៊ីណា

The post សហព័ន្ធកីឡាទោចក្រយាន គ្រោងនឹងរៀបចំកម្មវិធីសប្បុរសធម៌ «ជិះកង់ដើម្បីកុមារកម្ពុជា» ជាលើកទី៣ appeared first on Kampuchea Thmey Daily.

សហព័ន្ធកីឡាទោចក្រយាន បើកការចុះឈ្មោះអ្នកចង់ចូលរួមការប្រកួតព្រឹត្តិការណ៍កីឡាទេសចរណ៍ វប្បធម៌ និងពាណិជ្ជកម្ម

Sina Noun — Fri, 26 Dec 2025 09:34:26 +0000

សហព័ន្ធកីឡាទោចក្រយាន បានប្រកាសដល់សាធារណៈជនពិសេសអ្នកដែលស្រឡាញ់ចូលចិត្តកីឡាប្រណាំងកង់អាចចុះឈ្មោះចូលរួមប្រកួតលើវិញ្ញាសាកង់គួកផ្នែកបុរសទូទៅ (Men Road Bike Open) ថ្ងៃទី១០ ខែមករា ឆ្នាំ២០២៦ នៅឯខេត្តព្រះសីហនុ។

ផ្លូវត្រូវប្រណាំង

នៅខេត្តព្រះសីហនុ នឹងរៀបចំព្រឹត្តិការណ៍កីឡាទេសចរណ៍ វប្បធម៌ និងពាណិជ្ជកម្ម អំឡុងថ្ងៃទី៩ ដល់ ១៣ ខែមករា ឆ្នាំ២០២៥ ខាងមុខនេះ។ ព្រឹត្តិការណ៍នេះធ្វើឡើងក្នុងគោលបំណងផ្សព្វផ្សាយដើម្បីបង្ហាញពិភពលោកថាកម្ពុជាជាព្រះរាជាណាចក្រអច្ឆរិយៈ ផ្តល់ភាពកក់ក្តៅ និងសុវត្ថិភាពដល់មនុស្សគ្រប់គ្នា។ ព្រឹត្តិការណ៍ខាងលើនឹងប្រព្រឹត្តទៅចាប់ពីថ្ងៃទី៩ ដល់ទី១៣ ខែមករា ឆ្នាំ២០២៦ ។

វិញ្ញាសាកង់គួក

ជាមួយគ្នាក្នុងនោះផងដែរដោយទទួលបានកិច្ចសហការរៀបចំព្រឹត្តិការណ៍កីឡាទេសចរណ៍ ដែលមានរដ្ឋបាលខេត្តព្រះសីហនុ និងមន្ទីរទេសចរណ៍ខេត្ត សហព័ន្ធកីឡាទោចក្រយានកម្ពុជា ជម្រាបជូនដល់អ្នកស្នេហាកីឡាទោចក្រយានទាំងអស់មេត្តាជ្រាបថា សហព័ន្ធនឹងរៀបចំការប្រណាំងកង់លើវិញ្ញាសាកង់គួកផ្នែកបុរសទូទៅ (Men Road Bike Open) ចម្ងាយផ្លូវ ៧២គីឡូម៉ែត្រ (ចំនួន ២ជុំក្នុង ១ជុំចម្ងាយ ៣៦គីឡូម៉ែត្រ)។

ការចុះឈ្មោះចូលរួមប្រកួតមិនមានបង់ប្រាក់នោះទេចាប់ពីថ្ងៃនេះរហូតដល់ថ្ងៃទី៨ ខែមករា ឆ្នាំ២០២៦ និងអាចទំនាក់ទំនងសួរព័ត៌មានតាមរយៈលេខទូរសព្ទ-តេលេក្រាម 086 684 015។

ប្រាក់រង្វាន់ជយលាភី៖

-លេខ១ ពាន១ និងប្រាក់រង្វាន់អម ២,០០០,០០០៛

-លេខ២ ពាន១ និងប្រាក់រង្វាន់អម ១,២០០,០០០៛

-លេខ៣ ពាន១ និងប្រាក់រង្វាន់អម ៨០០,០០០៛៕

អត្ថបទដោយ៖ នួន ស៊ីណា

The post សហព័ន្ធកីឡាទោចក្រយាន បើកការចុះឈ្មោះអ្នកចង់ចូលរួមការប្រកួតព្រឹត្តិការណ៍កីឡាទេសចរណ៍ វប្បធម៌ និងពាណិជ្ជកម្ម appeared first on Kampuchea Thmey Daily.

អ្នកចុះឈ្មោះចូលរួមការប្រកួតប្រណាំងកង់ «កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា» បានជិត១០០នាក់ហើយ

Sina Noun — Tue, 09 Sep 2025 02:05:39 +0000

សហព័ន្ធកីឡាទោចក្រយានបានឲ្យដឹងថា គិតមកដល់ពេលនេះអ្នកចុះឈ្មោះចូលរួមការប្រកួតប្រណាំងកង់ក្នុងព្រឹត្តិការណ៍ «កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា» បានជិត ១០០នាក់ហើយ ស្របពេលការទទួលចុះឈ្មោះនៅតែបន្ត។

អគ្គលេខាធិការសហព័ន្ធកីឡាទោចក្រយាន លោក នូ ចំរើន បានឲ្យដឹងថា ព្រឹត្តិការណ៍លើកស្ទួយវិស័យទេសចរណ៍នៅខេត្តព្រះសីហនុមានអ្នកចុះឈ្មោះបានប្រហែលជិត ១០០នាក់ហើយនៅពេលនេះ។ សហព័ន្ធជឿជាក់ថានឹងមានអ្នកចុះឈ្មោះចូលរួមប្រកួតបន្ថែមទៀត ពីព្រោះសន្ទុះនៃការគាំទ្រវិស័យកីឡាទោចក្រយានបានកំពុងកើនឡើង និងជាព្រឹត្តិការណ៍កម្សាន្តសប្បាយលើកស្ទួយវិស័យទេសចរណ៍ផង។

សហព័ន្ធក៏នៅតែបន្តទទួលការចុះឈ្មោះពីមហាជនផងដែរដែលមានបំណងចូលរួមប្រកួតប្រជែងក្នុងព្រឹត្តិការណ៍ដែលនឹងធ្វើនៅខេត្តព្រះសីហនុលើកនេះ។ ចូលរួមលើកស្ទួយវិស័យកីឡាក្នុងស្រុកឲ្យកាន់តែផុលផុស និងបង្កើនការផ្សព្វផ្សាយឲ្យបានដល់ភ្ញៀវជាតិ-អន្តរជាតិបន្ថែមទៀត។

ប្រសិនបើមហាជនចង់ចុះឈ្មោះចូលរួមការប្រកួតប្រណាំងកង់ភ្នំ ចម្ងាយ ៣០គីឡូម៉ែត្រអាចទាក់ទងទៅកាន់សហព័ន្ធបាន។ ការចុះឈ្មោះចូលរួមមិនតម្រូវឲ្យបង់ថវិកានោះទេស្របពេលអ្នកឈ្នះទទួលបានប្រាក់រង្វាន់លើកទឹកចិត្តទៀតផង។ ព្រឹត្តិាករណ៍ «កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា» ខាងផ្នែកប្រណាំងកង់ភ្នំនេះនឹងធ្វើឡើងនៅព្រឹកថ្ងៃសុក្រ ទី១៩ ខែកញ្ញា ឆ្នាំ២០២៥៕

ផ្នែកកង់ភ្នំ

អត្ថបទ៖ នួន ស៊ីណា

The post អ្នកចុះឈ្មោះចូលរួមការប្រកួតប្រណាំងកង់ «កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា» បានជិត១០០នាក់ហើយ appeared first on Kampuchea Thmey Daily.

“កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា” ប្រកាសទទួលចុះឈ្មោះអ្នកចង់ចូលរួមប្រណាំងកង់នៅខេត្តព្រះសីហនុ

Sina Noun — Fri, 29 Aug 2025 06:44:56 +0000

សហព័ន្ធកីឡាទោចក្រយានកម្ពុជា ប្រកាសទទួលចុះឈ្មោះចាប់ពីពេលនេះតទៅសម្រាប់អ្នកដែលចង់ចូលរួមការប្រកួតប្រណាំងកង់ភ្នំ (Men Mountain Bike Open) ចម្ងាយ ៣០Km ដែលនឹងប្រព្រឹត្តិទៅនៅខេត្តព្រះសីហនុ នាព្រឹកថ្ងៃសុក្រ ទី១៩ ខែកញ្ញា ឆ្នាំ២០២៥ ខាងមុខនេះ។

សេចក្ដីប្រកាសការប្រកួត

នេះបើតាមសេចក្ដីប្រកាសលើផេកផ្លូវការរបស់សហព័ន្ធកីឡាទោចក្រយាន នៅថ្ងៃនេះបានបញ្ជាក់ថា ដោយទទួលបានការអនុញ្ញាត និងសហការរៀបចំព្រឹត្តិការណ៍កីឡាទេសចរណ៍ ដែលមានក្រសួងទេសចរណ៍ រដ្ឋបាលខេត្តព្រះសីហនុ គណៈកម្មាធិការជាតិអូឡាំពិកកម្ពជា សហព័ន្ធកីឡាទោចក្រយានកម្ពុជា សូមជម្រាបជូនដល់អ្នកស្នេហាកីឡាទោចក្រយានទាំងអស់មេត្តាជ្រាបថា សហព័ន្ធនឹងរៀបចំកីឡាប្រណាំងទោចក្រយាន លើវិញ្ញាសាកង់ភ្នំបុរសទូទៅ (Men Mountain Bike Open) ចម្ងាយផ្លូវ ៣០គីឡូម៉ែត្រ ទីតាំងជួបជុំកីឡាករនៅទីលានឆ្នេរតេជោ ខេត្តព្រះសីហនុ នាវេលាព្រឹកថ្ងៃសុក្រ ទី១៩ ខែកញ្ញា ឆ្នាំ២០២៥ ខាងមុខ។

រូបភាពលើផេកសហព័ន្ធ

ការទទួលចុះឈ្មោះចាប់ពីថ្ងៃផ្សាយជូនដំណឹងនេះរហូតដល់ថ្ងៃទី១៥ ខែកញ្ញា ឆ្នាំ២០២៥ វេលាម៉ោង ៥:០០ល្ងាច។ បញ្ជាក់:ការចុះឈ្មោះចូលរួមប្រកួតនេះគឺកីឡាករមិនមានការបង់ប្រាក់នោះទេ។ លក្ខខណ្ឌចូលរួម៖

-កីឡាករជាតិ និងអន្តរជាតិ

-កីឡាករត្រូវមានអាយុចាប់ពី ១៥ឆ្នាំឡើងទៅ

-កីឡាករត្រូវមានកង់ភ្នំ មានប៊ូមខាងមុខ, មានសំបក់កង់ចាប់ពី 1.90 ឡើងទៅ និងមានថាសខាងមុខមិនលើសពី 40T ឡើយ។

រូបភាពលើផេកសហព័ន្ធ

បញ្ជាក់ដែរថា ប្រសិនបើកីឡាករចាប់អារម្មណ៍ ឬចង់ចុះឈ្មោះចូលរួមព្រឹត្តិការណ៍កីឡាទេសចរណ៍នៅខេត្តព្រះសីហនុនេះអាចទំនាក់ទំនងទៅលេខទូរសព្ទ ឬតេឡេក្រាមនេះ 086 684 015 ។ ក្រៅតែពីការចូលរួមប្រកួតទទួលបានភាពសប្បាយរីករាយហើយនោះអ្នកជាប់ចំណាត់ថ្នាក់ពីលេខ១ ដល់ ៣ នឹងទទួលបានប្រាក់រង្វាន់ចាប់ពី ៨០ម៉ឺនរៀលរហូតដល់ ២លានរៀលទៀតផង៕

អត្ថបទដោយ៖ នួន ស៊ីណា

The post “កីឡាដើម្បីទេសចរណ៍ ទេសចរណ៍ដើម្បីទាំងអស់គ្នា” ប្រកាសទទួលចុះឈ្មោះអ្នកចង់ចូលរួមប្រណាំងកង់នៅខេត្តព្រះសីហនុ appeared first on Kampuchea Thmey Daily.

សហព័ន្ធកីឡាទោចក្រយានកម្ពុជា ចូលរួមព្រឹត្តិការណ៍កីឡាធំនៅម៉ាឡេស៊ីអបអរប្រទេសនេះជាប្រធានអាស៊ាន 2025

Sina Noun — Mon, 11 Aug 2025 02:29:37 +0000

សហព័ន្ធកីឡាទោចក្រយានកម្ពុជា បានចូលរួមព្រឹត្តិការណ៍កីឡាធំមួយ Cycling Tour Solidarity 2025 នៅប្រទេសម៉ាឡេស៊ី ដែលមានអ្នកចូលរួមប្រមាណ ៦០០០នាក់ ជាការអបអរសារទរដែលប្រទេសមួយនេះក្លាយជាប្រធានអាស៊ាន ឆ្នាំ២០២៥។

រូបភាពផ្ដល់ជូន

លោក នូ ចំរើន អគ្គលេខាធិការសហព័ន្ធទោចក្រយានកម្ពុជា បានឲ្យដឹងថា កម្មវិធីដែលម្ចាស់ផ្ទះម៉ាឡេស៊ីបានរៀបចំនេះមានបណ្ដាប្រទេសក្នុងតំបន់អាស៊ានចូលរួមទាំងអស់សរុបប្រមាណជាង ៦០០០នាក់លេងលើប្រភេទកីឡាជិះកង់ រត់ប្រណាំង និងដើរ។

រូបភាពផ្ដល់ជូន

ព្រឹត្តិការណ៍ធំ Cycling Tour Solidarity 2025 ម្ចាស់ផ្ទះម៉ាឡេស៊ីរៀបចំឡើងក្នុងគោលបំណងបណ្ដុះស្មារតីយុវជនឲ្យលេងកីឡា ផ្សព្វផ្សាយតំបន់ទេសចរណ៍ផង និងជាការអបអរសារទរដែលប្រទេសរបស់គេក្លាយជាប្រធានអាស៊ានក្នុងឆ្នាំ ២០២៥ នេះ។

រូបភាពផ្ដល់ជូន

បញ្ជាក់ដែរថា សហព័ន្ធកីឡាទោចក្រយានកម្ពុជា បានទៅចូលរួមព្រឹត្តិការណ៍ធំ Cycling Tour Solidarity 2025 នេះចំនួន ២នាក់គឺលោក នូ ចំរើន អគ្គលេខាធិការ និងគ្រូបង្វឹកមួយរូបទៀត។ កម្មវិធីនេះបិទបញ្ចប់ទៅកាលពីថ្ងៃទី៩ ខែសីហា ឆ្នាំ២០២៥ កន្លងទៅនេះ៕

រូបភាពផ្ដល់ជូន

អត្ថបទដោយ៖ នួន ស៊ីណា

The post សហព័ន្ធកីឡាទោចក្រយានកម្ពុជា ចូលរួមព្រឹត្តិការណ៍កីឡាធំនៅម៉ាឡេស៊ីអបអរប្រទេសនេះជាប្រធានអាស៊ាន 2025 appeared first on Kampuchea Thmey Daily.

សហព័ន្ធកីឡាទោចក្រយាន៖ ROAD TRAINING CAMP គ្រូបង្វឹក កីឡាករកម្ពុជាទៅហាត់នេះផ្ដោតលើជំនាញកម្រិតខ្ពស់

Sina Noun — Tue, 08 Jul 2025 08:55:35 +0000

សហព័ន្ធកីឡាទោចក្រយានកម្ពុជា បានបញ្ជូនគ្រូបង្វឹក ១រូប និងកីឡាករ ១រូបដើម្បីចូលរួមបោះជំរុំហ្វឹកហាត់ផ្នែកវិញ្ញាសាកង់គួកបុរស (ROAD TRAINING CAMP) រយៈពេល ១៦ថ្ងៃនៅឯប្រទេសកូរ៉េខាងត្បូង និងចូលរួមការប្រកួតបន្ទាប់ពីរៀនចប់ផងដែរ។

គ្រូបង្វឹក និងកីឡាករ

លោក នូ ចំរើន អគ្គលេខាធិការសហព័ន្ធបានឲ្យដឹងមកថា គ្រូបង្វឹក ១រូបដែលបញ្ជូនទៅនេះឈ្មោះថា សាន ណាម៉ា និងកីឡាករ ១រូបឈ្មោះ សាត រីដេវីត។ គ្រូបង្វឹក និងកីឡាកររូបនេះនឹងត្រូវរៀនសូត្រពីការបង្វឹក និងការហ្វឹកហាត់កម្រិតខ្ពស់។

គ្រូបង្វឹក និងកីឡាករ

បន្ទាប់ពីបញ្ចប់វគ្គ គ្រូបង្វឹក និងកីឡាករ ទាំងពីរនឹងត្រូវចូលរួមក្នុងការប្រកួតមួយជាមួយកម្មវិធីប្រកួតនៅប្រទេសកូរ៉េ ដែលមានក្រុមប្រហែល ១០ប្រទេស និងក្រុមរបស់ប្រទេសកូរ៉េផងដែរ។ គ្រូបង្វឹកអាចទទួលបានសញ្ញាប័ត្រកម្រិត១ ឬកម្រិត២ តាមការវាយតម្លៃរបស់គ្រូឧទ្ទេសវគ្គកម្រិតពិភពលោក WORLD CYCLING CENTER របស់សាលាហ្វឹកហាត់ជាតិកូរ៉េ KOREA CYCLING CENTER។

លោក នូ ចំរើន អគ្គលេខាធិការសហព័ន្ធ

បញ្ជាក់ដែរថា ការបោះជំរុំហ្វឹកហាត់នេះមានរយៈ១៦ថ្ងៃ ក្រោមជំនួយឧបត្ថម្ភពី WORLD CYCLING CENTER របស់ UCI និងពីសហព័ន្ធកីឡាទោចក្រយានកូរ៉េ KCF និងសាលាហ្វឹកហាត់ជាតិកូរ៉េ KOREA CYCLING CENTER។ ការហ្វឹកហាត់នេះធ្វើឡើងនៅទីក្រុងពុងហ្គី សាធារណរដ្ឋកូរ៉េខាងត្បូង៕

អត្ថបទដោយ៖ នួន ស៊ីណា

The post សហព័ន្ធកីឡាទោចក្រយាន៖ ROAD TRAINING CAMP គ្រូបង្វឹក កីឡាករកម្ពុជាទៅហាត់នេះផ្ដោតលើជំនាញកម្រិតខ្ពស់ appeared first on Kampuchea Thmey Daily.

កីឡាទោចក្រយាន Archives - Kampuchea Thmey Daily

២០០​នាក់​ពី ៩ ប្រទេស​ ជិះ​កង់ដោយ​ជោគជ័យពី​ភ្នំពេញ ទៅ សៀមរាប ដើ​ម្បីមន្ទីរ​ពេទ្យ​កុមារ​អង្គរ

ឱកាស​ល្អ ជិះ​កង់ដើម្បី​ ទេសចរណ៍ ចូល​រួម​ដោយ​សេរី ​ពី​ភ្នំពេញ​ ទៅ ខេត្តតាកែវ​

សហព័ន្ធ​កីឡា​ទោចក្រយាន៖​ ROAD TRAINING CAMP ​គ្រូ​បង្វឹក​ កីឡាករ​កម្ពុជា​ទៅ​ហាត់​នេះ​ផ្ដោត​លើ​ជំនាញ​កម្រិត​ខ្ពស់

២០០នាក់ពី ៩ ប្រទេស ជិះកង់ដោយជោគជ័យពីភ្នំពេញ ទៅ សៀមរាប ដើម្បីមន្ទីរពេទ្យកុមារអង្គរ

ឱកាសល្អ ជិះកង់ដើម្បី ទេសចរណ៍ ចូលរួមដោយសេរី ពីភ្នំពេញ ទៅ ខេត្តតាកែវ

សហព័ន្ធកីឡាទោចក្រយាន៖ ROAD TRAINING CAMP គ្រូបង្វឹក កីឡាករកម្ពុជាទៅហាត់នេះផ្ដោតលើជំនាញកម្រិតខ្ពស់