កីឡាយានយន្ត Archives - Kampuchea Thmey Daily

ព្រឹត្តិការណ៍បង្ហាញបច្ចេកទេសយានយន្ត Blackhawk Tire Trip Show អបអរស្តូបឈ្នះឈ្នះ នៅកោះកុង ចាប់ផ្តើមថ្ងៃនេះ

chean virakbot — Wed, 27 May 2026 01:51:45 +0000

សហព័ន្ធកីឡាយានយន្តកម្ពុជាគ្រោង រៀបចំកម្មវិធីការបង្ហាញបច្ចេកទេសយានយន្តដ៏ទាក់ទាញបំផុត ដែលឱ្យឈ្មោះថា Blackhawk Tire Trip Show រយៈពេល៥ថ្ងៃ ចាប់ផ្តើមពីថ្ងៃទី២៧ និងបញ្ចប់នៅថ្ងៃទី៣១ ខែឧសភា ឆ្នាំ២០២៦ ដើម្បីចូលរួមអបអរសាទរពិធីសម្ពោធស្តូបនយោបាយឈ្នះឈ្នះ នៅខេត្តកោះកុង។

លោក ទៀ ស្យាម អនុប្រធានសហព័ន្ធកីឡាយានយន្តកម្ពុជាបានលើកឡើងថា សហព័ន្ធតែងតែជំរុញផ្សព្វផ្សាយវិស័យកីឡាយានយន្តឱ្យមានដំណើរការអភិវឌ្ឍកាន់តែល្អប្រសើរ។ ជាក់ស្តែងនៅក្នុងទីលានហ្វឹកហាត់ នៃពហុកីឡដ្ឋានជាតិមរតកតេជោ តែងតែមានកីឡាករចូលរួមហាត់សមបច្ចេកទេស ដើម្បីបង្កើនស្នាដៃកីឡាករខ្មែរឲ្យកាន់តែល្អ ក៏ដូចជាត្រៀមចូលរួមបង្ហាញបច្ចេកទេស ក្នុងពិធីសម្ពោធស្តូបឈ្នះឈ្នះ នៅខេត្តកោះកុងផងដែរ។

លោកមានប្រសាសន៍ថា នៅក្នុងកម្មវិធីសម្តែងបង្ហាញបច្ចេកទេសយានយន្ត ដែលជាព្រឹត្តិការណ៍កីឡាអមពិធីសម្ពោធស្តូបនយោបាយឈ្នះឈ្នះ នៅខេត្តកោះកុង សហព័ន្ធបានត្រៀមរថយន្ត ៤ គ្រឿង និងមានកីឡាករមួយចំនួនទៀតនឹងចូលរួមក្នុងព្រឹត្តិការណ៍កីឡាយានយន្តនេះ។

លោកថ្លែងថា ៖«សម្រាប់ការចូលរួមបង្ហាញបច្ចេកទេសកីឡាយានយន្ត ដើម្បីចូលរួមអបអរសាទរពិធីសម្ពោធស្តួបឈ្នះឈ្នះ នៅខេត្តកោះកុង គឺជាមោទនភាពជាតិរបស់យើងទាំងអស់គ្នា ដោយពិធីសម្ពោធជាផ្លូវការថ្ងៃទី៣០ ខែឧសភា ឆ្នាំ២០២៦។ ក្រុមកីឡាយានយន្តគ្រោងនឹងធ្វើដំណើរកម្សាន្តពីវិមានឈ្នះឈ្នះ រាជធានីភ្នំពេញ ឆ្ពោះទៅស្តូបឈ្នះឈ្នះ នៅខេត្តកោះកុង ហើយក៏មានកម្មវិធីបង្ហាញជាច្រើនទៀត នៅខេត្តកោះកុង»។

កម្មវិធីកីឡាយានយន្តឆ្ពោះទៅចូលរួមនៅខេត្តកោះកុងទទួលបានការឧបត្ថម្ភគាំទ្រពីក្រុមហ៊ុនផលិតផលសម្បកកង់ Blackhawk Tire ។

ជុំវិញវិស័យកីឡាយានយន្ត លោក ទៀ ស្យាម លើកឡើងថា ដោយសារប្រទេសជាតិមានបញ្ហាព្រំដែន វិស័យកីឡាយានយន្តក៏ស្ងប់ស្ងាត់មិនសូវមានសកម្មភាពប្រកួតនោះឡើយ ខណៈការចូលរួមប្រកួតអន្តរជាតិ នៅក្រៅប្រទេសក៏បានលុបចោលមិនបានចូលរួមដែរ។

សម្រាប់ឆ្នាំ២០២៦ សហព័ន្ធបានចាប់ផ្តើមស្តារសកម្មភាពកីឡាយានយន្តខ្លះៗឡើងវិញ ជាពិសេសពីព្រឹត្តិការណ៍កីឡាយានយន្ត រយៈពេល៥ថ្ងៃ នៅខេត្តកោះកុងជាដើមនោះ គឺជាដំណើរការស្តារវិស័យកីឡាយានយន្តឡើងវិញ ដើម្បីជំរុញការអភិវឌ្ឍជំនាញកីឡាមួយនេះឱ្យមានភាពល្អប្រសើរឡើងវិញជាមួយព្រឹត្តិការណ៍មួយចំនួនទៀតនឹងកើតមានឡើងជាបន្តបន្ទាប់។ កាលពីថ្ងៃសៅរ៍-អាទិត្យ ចុងសប្តាហ៍នេះ ក៏មានកម្មវិធីការបង្ហាញ Off Road មួយដែរ ដែលបានបញ្ចប់ជាមួយនឹងការគាំទ្រពីប្រជាពលរដ្ឋ និងបងប្អូនជាអ្នកស្រឡាញ់វិស័យកីឡាយានយន្តផងដែរ៕

អត្ថបទ៖ វិរបុត្រ

The post ព្រឹត្តិការណ៍បង្ហាញបច្ចេកទេសយានយន្ត Blackhawk Tire Trip Show អបអរស្តូបឈ្នះឈ្នះ នៅកោះកុង ចាប់ផ្តើមថ្ងៃនេះ appeared first on Kampuchea Thmey Daily.

មិនចង់ជឿក៏ត្រូវតែជឿដែរត្រើយទាញរថយន្ត OFF ROAD របស់ក្រុម VKH ១ដើមតម្លៃជាង៧,០០០ដុល្លារ

Sina Noun — Thu, 20 Nov 2025 08:59:17 +0000

ឡានប្រណាំងឆ្លងកាត់ឧបសគ្គ (OFF ROAD) រហ័ស្សនាម អាខ្លាឃ្លោក របស់ក្រុម VKH Racing Team ពិតជាមិនធម្មតាដោយបំពាក់គ្រឿងបន្លាស់ និងឧបករណ៍ថ្លៃៗដូចជាត្រើយសម្រាប់ទាញនៅពេលជាប់ផុង ១ដើមតម្លៃខ្ទង់ជាង ៧,០០០ដុល្លារឯណោះ។

ត្រើយ Gigglepin

លោក វង្ស គឹមហួត បានឲ្យដឹងថា ត្រើយដែលត្រូវបំពាក់លើរថយន្តឈ្មោះ អាខ្លាឃ្លោក នេះគឺម៉ាក Gigglepin ដែលជាផលិតផលល្បីឈ្មោះរបស់ប្រទេសអង់គ្លេស។ ចំពោះតម្លៃរបស់ Gigglepin ដែលលោកដាក់សម្រាប់ចូលទីលានប្រណាំងនេះ ១ដើមតម្លៃខ្ទង់ជាង ៧,០០០ដុល្លារ។ ដោយឡែក អាខ្លាឃ្លោក នេះលោកត្រូវបំពាក់រហូតដល់ទៅ ២ដើមឯណោះគឺដាក់នៅផ្នែកខាងមុខ ១ដើម និងផ្នែកកណ្ដាលឡាន ១ដើមទៀត។ សាគួរត្រើយធម្មតា ១ដើមទៀតនៅផ្នែកខាងក្រោយ។

ត្រើយ Gigglepin

ដូច្នេះប្រសិនបើបូកសរុបត្រើយ Gigglepin ២ដើមដែលបំពាក់សម្រាប់ចេញប្រណាំងនេះតម្លៃសរុបជាង ១៤,០០០ដុល្លារទៅហើយ។ កីឡាករ OFF ROAD រូបនេះបន្ថែមទៀតថា លើទីផ្សារនៅមានត្រើយថ្លៃៗជាងនេះទៅទៀត។ ត្រើយម៉ាក Gigglepin នេះគឺមានគុណភាពល្អប្រើ ម៉ូទ័រវិលលឿន និងធនបានល្អ។ ការប្រណាំងរថយន្តឆ្លងកាត់ឧបសគ្គនេះគឺត្រូវការលឿនដើម្បីបានថិរវេលាកាន់តែតិចឈានទៅជាប់ចំណាត់ថ្នាក់។

បញ្ជាក់ដែរថា ឡានប្រណាំងឆ្លងកាត់ឧបសគ្គរហ័ស្សនាម អាខ្លាឃ្លោក របស់លោក វង្ស គឹមហួត នៃក្រុម VKH Racing Team នេះត្រូវបានគេដឹងថាទិញដំបូងតម្លៃខ្ទង់ ៣,០០០ដុល្លារ និងកែច្នៃរួចឡើងតម្លៃសរុបជិត ៦០,០០០ដុល្លារឯណោះ។ អាខ្លាឃ្លោក នេះក៏បានទៅចូលរួមការប្រកួតនៅឯប្រទេសឡាវ កាលពីថ្ងៃទី៦ ដល់ ៩ វិច្ឆិកា ឆ្នាំ២០២៥ ផងដែរ៕

ពេលកំពុងប្រើត្រើយ

លោក វង្ស គឹមហួត

អត្ថបទដោយ៖ នួន ស៊ីណា

The post មិនចង់ជឿក៏ត្រូវតែជឿដែរត្រើយទាញរថយន្ត OFF ROAD របស់ក្រុម VKH ១ដើមតម្លៃជាង៧,០០០ដុល្លារ appeared first on Kampuchea Thmey Daily.

រថយន្តប្រណាំងប្រចាំខេត្តព្រះវិហារ កណ្ដុរក្រហមភ្នំត្បែង ទិញដំបូង ៣,០០០ដុល្លារកែច្នៃរួចអស់ជិត ៦០,០០០ដុល្លារ

Sina Noun — Tue, 18 Nov 2025 08:44:46 +0000

រថយន្តប្រណាំង OFF ROAD ប្រចាំខេត្តព្រះវិហារគឺរហ័ស្សនាម កណ្ដុរក្រហមភ្នំត្បែង កាលទិញមកដំបូងតម្លៃត្រឹម ៣,០០០ដុល្លារប៉ុណ្ណោះ ប៉ុន្តែក្រោយកែច្នៃ និងបំពាក់គ្រឿងបន្លាស់ថ្លៃៗរួចមកតម្លៃឡើងរហូងជិត ៦០,០០០ដុល្លារឯណោះ។

កណ្ដុរក្រហមភ្នំត្បែង ពេលមិនទាន់កែច្នៃ

លោក គីម សំអឿន ដែលជាម្ចាស់រថយន្តប្រណាំង កណ្ដុរក្រហមភ្នំត្បែង បានឲ្យដឹងថា រថយន្តមួយនេះម៉ាក Toyota Hilux ផលិតឡើងក្នុង 1994 ។ កាលលោកទិញបន្តពីអ៊ំប្រុសម្នាក់នោះក្នុងតម្លៃ ៣,០០០ដុល្លារ និងជាប្រភេទឡានស្អាតម្ចាស់ដើមប្រើប្រាស់ថែទាំបានល្អ។

កីឡាករប្រចាំខេត្តព្រះវិហារខាងលើបន្តទៀតថា ដោយសារតែលោកមិនចេះកែច្នៃរថយន្ត ដូច្នេះលោកបានជួលជាងជំនាញទាំងស្រុងតែម្ដងដើម្បីរៀបចំរថយន្តនេះឲ្យក្លាយជារថយន្តដែលមានស្ដង់ដាត្រឹមត្រូវអាចយកទៅប្រកួតបាន។

កណ្ដុរក្រហមភ្នំត្បែង ពេលមិនទាន់កែច្នៃ

រថយន្តដែលមានរហ័ស្សនាម កណ្ដុរក្រហមភ្នំត្បែង នេះបន្ទាប់ពីកែច្នៃរួចរាល់ហើយតម្លៃប្រហែលអស់សរុបខ្ទង់ជិត ៦០,០០០ដុល្លារ។ តម្លៃខ្ពស់បែបនេះដោយសារតែរថយន្តសម្រាប់ប្រណាំងត្រូវគ្រឿងបន្លាស់ៗល្អមានគុណភាពខ្ពស់ មានសុវត្តិភាពត្រឹមត្រូវនៅពេលប្រណាំង។ គ្រឿងបន្លាស់ដែលល្អៗ និងខ្លាំងគឺសុទ្ធសឹងតែមានតម្លៃខ្ពស់។ មួយវិញទៀតដោយសារតែការកែច្នៃនេះត្រូវជួលជាងធ្វើទាំងស្រុងផងនោះទើបតម្លៃឡានខ្ពស់បែបនេះ។

កណ្ដុរក្រហមភ្នំត្បែង ពេលមិនទាន់កែច្នៃ

បញ្ជាក់ដែរថា រថយន្តប្រណាំងឆ្លងកាត់ឧបសគ្គ (OFF ROAD) ដែលមានរហ័ស្សនាម កណ្ដុរក្រហមភ្នំត្បែង នេះជារថយន្តរបស់លោក គីម សំអឿន មកពីក្រុមភ្នំត្បែងរីសត ខេត្តព្រះវិហារ។ រថយន្តនេះត្រូវបានគេដឹងថាឆ្លងកាត់ការប្រកួតច្រើនទីលានមកហើយរួមទាំងការប្រកួតថ្មីៗនេះនៅឯប្រទេសឡាវទៀតផង៕

កណ្ដុរក្រហមភ្នំត្បែង ពេលកែច្នៃរួច

លោក គឹម សំអឿន (ខាងឆ្វេង)

កណ្ដុរក្រហម អាខ្លាឃ្លោក និងអាហេរ៉ូ ៥៥៥ កាលប្រណាំងនៅឡាវ

អត្ថបទដោយ៖ នួន ស៊ីណា

The post រថយន្តប្រណាំងប្រចាំខេត្តព្រះវិហារ កណ្ដុរក្រហមភ្នំត្បែង ទិញដំបូង ៣,០០០ដុល្លារកែច្នៃរួចអស់ជិត ៦០,០០០ដុល្លារ appeared first on Kampuchea Thmey Daily.

បេសកកម្មលើកទង់ជាតិខ្មែរនៅការប្រកួត OFF ROAD ឯប្រទេសឡាវបញ្ចប់ដោយជោគជ័យ

Sina Noun — Wed, 12 Nov 2025 02:27:17 +0000

ការប្រកួតប្រណាំងរថយន្តឆ្លងកាត់ឧបសគ្គ (OFF ROAD) ដែលជាបេសកកម្មលើកទង់ជាតិខ្មែរលើឆាកអន្តរជាតិ និងពង្រីកវិសាលភាពវិស័យកីឡាមួយនេះដល់ឯប្រទេសឡាវបានបញ្ចប់ដោយជោគជ័យ ខណៈរថយន្តទាំងបីគ្រឿងបានវិលត្រឡប់មកកាន់កម្ពុជាវិញហើយ។

លោក ព្រំ រស្មី ហៅ ពូស៊ី

លោក ព្រំ រស្មី ហៅ ពូស៊ី បានឲ្យដឹងថា ការប្រកួត OFF ROAD នេះបានបញ្ចប់ទៅហើយស្របពេលដែលក្រុមកីឡាករ ក្រុមការងារទាំងអស់បានវិលត្រឡប់មកកាន់ប្រទេសកម្ពុជាវិញហើយក្នុងចម្ងាយផ្លូវជាង ៨០០គីឡូម៉ែត្រ។

ដូចទៅហ្នឹងការលើកឡើងពីមុនមកថា ការប្រកួតនេះជាបេសកកម្មលើកទង់ជាតិខ្មែរលើឆាកអន្តរជាតិតាមរយៈវិស័យកីឡា OFF ROAD។ យ៉ាងណាចំពោះលទ្ធផលវិញគឺមិនល្អគាប់ប្រសើរដូចអ្វីដែលរំពឹងទុក្ខនោះទេ។

កីឡាករចាស់វស្សាផ្នែករថយ OFF ROAD រូបនេះបន្តទៀតថា ការប្រកួតនៅឯប្រទេសឡាវលើកនេះគឺប្លែក ព្រោះមើលឃើញថារថយន្តដែលមកចូលរួមភាគច្រើនជារថយន្តទើបរៀបចំថ្មី និងមានបច្ចេកទេសនៃការកែច្នៃទំនើបប្រកបដោយប្រសិទ្ធភាពកាន់តែខ្ពស់។ ងាកមកការបើកបរ ឬសមត្ថភាពកីឡាករគឺមិនលើសពីក្រុមកម្ពុជានោះឡើយ។ ការប្រកួតមួយនេះគឺពិតជាបទពិសោធថ្មីមួយទៀតហើយសម្រាប់ក្រុមកម្ពុជាចំពោះបច្ចេកទេសថ្មីដែលត្រូវអភិវឌ្ឍន៍បន្តទៅទៀត។

រូបភាពផេក VKH

បញ្ជាក់ដែរថា ការប្រកួតប្រណាំងរថយន្តឆ្លងកាត់ឧបសគ្គ (OFF ROAD) នេះបានបញ្ចប់ទៅហើយកាលពីថ្ងៃទី៩ ខែវិច្ឆិកា ឆ្នាំ២០២៥។ វិញ្ញាសា HARDCOR ដែលក្រុមកម្ពុជាចូលរួមប្រកួតទាំងបីរថយន្តនេះគឺមាន ១៨គ្រឿង ប្រណាំងលើ ៩ SS ។ ក្រុមកម្ពុជាទាំងបីនោះគឺ ១រថយន្តជាប់លេខ១១ ជាប់លេខ១២ និងជាប់លេខ១៥ នៃការប្រកួត៕

រូបភាពផេក VKH

អត្ថបទដោយ៖ នួន ស៊ីណា

The post បេសកកម្មលើកទង់ជាតិខ្មែរនៅការប្រកួត OFF ROAD ឯប្រទេសឡាវបញ្ចប់ដោយជោគជ័យ appeared first on Kampuchea Thmey Daily.

បន្ទាប់ពីធ្វើពិធីបើកជាផ្លូវការរួចហើយនោះក្រុម OFF ROAD ទាំងអស់ចាប់ផ្ដើមប្រកួតថ្ងៃត្រង់នេះ

Sina Noun — Fri, 07 Nov 2025 04:08:33 +0000

បន្ទាប់ពីធ្វើពិធីបើកជាផ្លូវការរួចរាល់ និងការដង្ហែរបង្ហាញរថយន្តពីបណ្ដាប្រទេសចូលរួម និងប្រជុំបច្ចេកទេសហើយនោះក្រុមរថយន្ត OFF ROAD ទាំងអស់នឹងចាប់ផ្ដើមប្រកួតនៅពេលថ្ងៃត្រង់ នៃថ្ងៃទី៧ ខែវិច្ឆិកា ឆ្នាំ២០២៥ នៅឯប្រទេសឡាវ។

កីឡាករតំណាងក្រុមទាំង៣

ក្រុមកម្ពុជាទាំង ៣ក្រុមកំពុងត្រៀមខ្លួនរួចរាល់ហើយសម្រាប់ការប្រកួតនៅថ្ងៃទី១ នៃការប្រកួត OFF ROAD នៅឯប្រទេសឡាវលើកនេះ។ ក្នុងថ្ងៃទី៧ វិច្ឆិកា ២០២៥ ដែលជាថ្ងៃប្រកួតទី១ កម្រិត HARDCOR នេះក្រុមទាំងអស់នឹងត្រូវប្រកួតចំនួន 2SS ខណៈថ្ងៃទី២ នឹងប្រកួត 4SS និងថ្ងៃទី៣ ចុងក្រោយប្រកួត 3SS សរុប 9SS។

រថយន្ត HERO 555 របស់ពូស្មី

កីឡាករតំណាងក្រុមនិមួយៗរួមមានលោក ព្រំ រស្មី (ពូស្មី) លោក វង្ស គឹមហួត លោក គីម សំអឿន សូមឲ្យមហាជនចូលរួមតាមដាន និងលើកទឹកចិត្តកីឡាករកម្ពុជាក្នុងបេសកកម្មផ្សព្វផ្សាយវិស័យកីឡា OFF ROAD និងស្វែងរកជ័យជម្នះជូនជាតិមាតុភូមិនៅពេលនេះ។

រថយន្តអាខ្លាឃ្លោក របស់លោក វង្ស គឹមហួត

បញ្ជាក់ដែរថា ក្រុម OFF ROAD របស់កម្ពុជាទាំង ៣ក្រុមដែលចូលរួមប្រកួតនៅឯប្រទេសឡាវនេះរួមមាន ក្រុម Cambodia OFF Road Team by Siamprototype ដែលបើកបរដោយលោក ពូស្មី, ក្រុម VKH Racing Team បើកបរដោយលោក វង្ស គឹមហួត, ក្រុម Phnom Tbaeng Resort បើកបរដោយលោក គីម សំអឿន។ ការប្រកួតនេះចាប់ផ្ដើមពីថ្ងៃទី៦ ដល់ ៩ ខែវិច្ឆិកា ២០២៥ នៅឯប្រទេសឡាវ៕

រថយន្តកណ្ដុរក្រហមភ្នំត្បែង របស់លោក គឹម សំអឿន

អត្ថបទដោយ៖ នួន ស៊ីណា

The post បន្ទាប់ពីធ្វើពិធីបើកជាផ្លូវការរួចហើយនោះក្រុម OFF ROAD ទាំងអស់ចាប់ផ្ដើមប្រកួតថ្ងៃត្រង់នេះ appeared first on Kampuchea Thmey Daily.

នេះហើយរថយន្តទី៣ រហ័ស្សនាម «កណ្ដុរក្រហមភ្នំត្បែង» ដែលទៅប្រកួត OFF ROAD នៅឡាវ

Sina Noun — Tue, 04 Nov 2025 01:00:00 +0000

បន្ទាប់ពី កម្ពុជាថ្មី បានបង្ហាញរថយន្តទី១ ទី២ រួចមកឥលូវនេះជារថយន្ត OFF ROAD ទី៣ «កណ្ដុរក្រហមភ្នំត្បែង» ដែលជាគ្រឿងចុងក្រោយហើយត្រូវចូលរួមប្រកួតក្នុងព្រឹត្តិការណ៍ Gold Sepon OFF Road challenge ពីថ្ងៃទី៦ ដល់ ៩ ខែវិច្ឆិកា ២០២៥ នៅឯប្រទេសឡាវ។

«កណ្ដុរក្រហមភ្នំត្បែង»

លោក គីម សំអឿន ដែលជាម្ចាស់រថយន្ត និងជាអ្នកបើកបរផ្ទាល់បានឲ្យដឹងថា ឡានដែលលោកយកទៅចូលរួមការប្រកួតនៅឡាវលើកនេះគឺប្រភេទ Toyota Hilux 1994 ដែលបានកែឆ្នៃ និងបំពាក់គ្រឿងបន្លាស់ក្លាយជារថយន្តសម្រាប់ប្រណាំងរួចរាល់ហើយ។

«កណ្ដុរក្រហមភ្នំត្បែង»

កីឡាករមកពីខេត្តព្រះវិហារខាងលើបន្តទៀតថា រថយន្តរហ័ស្សនាម «កណ្ដុរក្រហមភ្នំត្បែង» មួយនេះពីមួយប្រកួតទៅមួយប្រកួតគឺតែងតែកែច្នៃ និងបំពាក់គ្រឿងបន្លាស់ឲ្យកាន់តែសមស្របឡើងៗដើម្បីឲ្យដំណើរការប្រកួតទទួលបានលទ្ធផលកាន់តែល្អ។

យ៉ាងណាសម្រាប់ការចេញទៅប្រកួតនៅឡាវនេះរូបលោក និងក្រុមការងារបានត្រៀមខ្លួនរួចរាល់ហើយក្នុងការប្រជែងយកជ័យជម្នះជូនជាតិមាតុភូមិ។ មិនថាសម្ភារ គ្រឿងបន្លាស់ និងផ្នែកជួលជុល (Support) គឺបានត្រៀមជាស្រេចមិនមានបញ្ហាចោទអ្វីនោះឡើយ។ ចំពោះរូបលោកផ្ទាល់គឺមានអារម្មណ៍ថាចង់ឲ្យការប្រកួតកាន់តែឆាប់មកដល់ដើម្បីបានប្រកួតសាកល្បងសមត្ថភាពជាមួយឡានខ្លាំងៗរបស់ប្រទេសដទៃផង និងចង់ដឹងពីចំណុចខ្លាំង ចំណុចខ្វះខាតរបស់ក្រុមលោកផង។

«កណ្ដុរក្រហមភ្នំត្បែង»

បញ្ជាក់ដែរថា រថយន្ត OFF ROAD ក្រុមទី៣ នេះគឺឈ្មោះថា ភ្នំត្បែងរីសត ខេត្តព្រះវិហារ ដែលបើកបរដោយលោក គីម សំអឿន និងជំនួយការបើកបរលោក នា ឧត្ដម។ ក្រុមទាំង៣គឺបានធ្វើដំណើរទៅដល់ប្រទេសឡាវហើយរង់ចាំការប្រកួតមកដល់ចាប់ពីថ្ងៃទី៦ ដល់ ៩ ខែវិច្ឆិកា ឆ្នាំ២០២៥។ តាមដានទាំងអស់គ្នាថាក្រុមប្រណាំងរថយន្តឆ្លងកាត់ឧបសគ្គ (OFF ROAD) របស់កម្ពុជាចូលរួមប្រកួតនៅឡាវលើកនេះទទួលបានលទ្ធផលយ៉ាងណា៕

គីម សំអឿន និងក្រុមការងារចេញទៅឡាវ

អត្ថបទដោយ៖ នួន ស៊ីណា

The post នេះហើយរថយន្តទី៣ រហ័ស្សនាម «កណ្ដុរក្រហមភ្នំត្បែង» ដែលទៅប្រកួត OFF ROAD នៅឡាវ appeared first on Kampuchea Thmey Daily.

កីឡាករជើងចាស់ ព្រំ រស្មី សង្ឃឹមទទួលបានជោគជ័យខ្ពស់ក្នុងការប្រកួតប្រណាំងរថយន្តនៅឡាវ

Sina Noun — Mon, 03 Nov 2025 02:13:37 +0000

កីឡាករជើងចាស់ប្រចាំវិស័យប្រណាំងរថយន្ត OFF ROAD លោក ព្រំ រស្មី សង្ឃឹមថានឹងទទួលបានជ័យជម្នះ ឬចំណាត់ថ្នាក់ TOP 3 ក្នុងការប្រកួតកម្រិតអន្តរជាតិនៅឯប្រទេសឡាវ ថ្ងៃទី៦ ដល់ ៩ ខែវិច្ឆិកា ឆ្នាំ២០២៥។

លោក ព្រំ រស្មី (ឆ្វេង)

កីឡាករ ព្រំ រស្មី បានឲ្យដឹងថា ការប្រកួតនៅឯប្រទេសឡាវនេះគឺលោកសង្ឃឹមខ្ពស់ថានឹងទទួលបានជ័យជម្នះ ឬស្ថិតក្នុងលំដាប់ TOP 3។ ព្រោះលើប្រភេទវិញ្ញាសា HARDCOR នេះបេក្ខភាពចូលរួមលោកសុទ្ធតែស្គាល់ និងដឹងពីសមត្ថភាពប្រកួត និងធ្លាប់ប្រកួតប្រជែងជាមួយគ្នាជាច្រើនដងច្រើនលើករួចហើយ។ តាមរយៈបទពិសោធ និងការរៀបចំរថយន្តរបស់លោកនៅពេលនេះគឺកាន់តែមានភាពជឿជាក់ក្នុងការប្រកួតនេះ។

ឡានដែលត្រូវទៅប្រណាំង

តំណាងក្រុម Cambodia OFF Road Team by Siamprototype រូបនេះបន្ថែមទៀតថា ការប្រកួតមួយនេះគឺពិតជាមានសារសំខាន់ចំពោះក្រុមទាំងអស់ ព្រោះជាការពង្រីកវិសាលភាពក្រុមប្រណាំងរថយន្តឆ្លងកាត់ឧបសគ្គ (OFF ROAD) របស់កម្ពុជាមួយកម្រិតទៀតដល់ប្រទេសឡាវដែលពីមុនមកមិនដែលបានចូលរួមឡើយ។ លោកក៏សូមអរគុណដល់សហព័ន្ធកីឡាយានយន្តខាងប្រទេសឡាវផងដែរដែលបានអញ្ជើញកម្ពុជាចូលរួមការប្រកួតកម្រិតអន្តរជាតិមួយនេះ។

លោក ព្រំ រស្មី (ឆ្វេង) និងជំនួយការបើកបរ

បញ្ជាក់ដែរថា ក្រុមរថយន្ត OFF ROAD ទាំង៣ ក្រុម Cambodia OFF Road Team by Siamprototype ដែលបើកបរដោយលោក ពូស្មី, ក្រុម VKH Racing Team បើកបរដោយលោក វង្ស គឹមហួត, ក្រុម Phnom Tbaeng Resort បើកបរដោយលោក គីម សំអឿន ។ ក្រុមប្រណាំងរថយន្តឆ្លងកាត់ឧបសគ្គរបស់កម្ពុជាទាំង៣នេះនឹងចូលរួមការប្រកួតនៅប្រទេសឡាវ ចាប់ពីថ្ងៃទី៦ ដល់ ៩ ខែវិច្ឆិកា ២០២៥៕

អត្ថបទដោយ៖ នួន ស៊ីណា

The post កីឡាករជើងចាស់ ព្រំ រស្មី សង្ឃឹមទទួលបានជោគជ័យខ្ពស់ក្នុងការប្រកួតប្រណាំងរថយន្តនៅឡាវ appeared first on Kampuchea Thmey Daily.

ជើងខ្លាំង OFF ROAD ពូស្មី យករថយន្តសំណព្វចិត្តផលិតតាំងពីឆ្នាំ១៩៨៩ ទៅប្រណាំងនៅឡាវលើកនេះ

Sina Noun — Fri, 31 Oct 2025 13:04:59 +0000

ក្រុមឡានទី២ ដែលបើកបរដោយជើងខ្លាំង OFF ROAD ពូស្មី នឹងយករថយន្តសំណព្វចិត្តដែលផលិតតាំងពីឆ្នាំ១៩៨៩ និងធ្លាប់ទទួលបានជោគជ័យជាច្រើនទីលានដើម្បីទៅប្រកួតនៅឯប្រទេសឡាវ ចាប់ពីថ្ងៃទី៦ ដល់ ៩ ខែវិច្ឆិកា ឆ្នាំ២០២៥។

រថយន្តត្រូវទៅប្រណាំងរបស់ ពូស្មី

លោក ព្រំ រស្មី ឬមហាគ្រួសារ OFF ROAD តែងហៅថា ពូស្មី បានឲ្យដឹងថា ឡានដែលលោកយកទៅចូលរួមការប្រកួត Gold Sepon OFF Road challenge ឯប្រទេសឡាវនេះគឺ Toyota Hilux Hero ដែលផលិតនៅឆ្នាំ១៩៨៩។ ឡាននេះដែរគឺជាឡានសំណព្វចិត្តរបស់លោក និងធ្លាប់ឈ្នះពាននៅប្រទេសថៃ និងលើកចុងក្រោយឈ្នះជើងឯកការប្រកួតអន្តរជាតិដែលធ្វើឡើងនៅខេត្តព្រះសីហនុ។ ឡានមួយនេះធ្លាប់ឆ្លងកាត់ជាច្រើនទីលានប្រកួតទាំងនៅកម្ពុជា និងប្រទេសវៀតណាម ថៃ ជាដើម។

រថយន្តត្រូវទៅប្រណាំងរបស់ ពូស្មី

នៅពេលនេះក្រុមការងារបានរៀបចំផ្លាស់ប្ដូរគ្រឿងបន្លាស់ និងរៀបចំគ្រឿងសម្រាប់ជួសជុលដែលត្រូវប្រើនៅពេលប្រកួតរួចរាល់ហើយត្រៀមលើកដាក់លើរថយន្តតែប៉ុណ្ណោះ។ ការងារទាំងស្រុកដូចជារួចរាល់ហើយមិនមានអ្វីដែលត្រូវធ្វើទៀតនោះទេ។

ជើងចាស់ក្នុងវិស័យប្រណាំងរថយន្តរូបនេះបន្ថែមទៀតថា ការចេញទៅនៅអន្តរជាតិនេះជាក្ដីស្រមៃក្នុងនាមលោកជាខ្មែរ និងជាមហាគ្រួសារ OFF ROAD ចង់លើកទង់ជាតិប្រទេសកម្ពុជាឲ្យបរទេសបានស្គាល់តាមអ្វីដែលអាចធ្វើទៅបាន។ ដូច្នេះការទៅចូលរួមនៅប្រទេសឡាវជាលើកទី១ នេះជាសមិទ្ធផលថ្មីមួយទៀតហើយសម្រាប់ក្រុមគ្រួសាររថយន្ត OFF ROAD របស់កម្ពុជា។

រថយន្តត្រូវទៅប្រណាំងរបស់ ពូស្មី

បញ្ជាក់ដែរថា ការប្រកួតប្រណាំងរថយន្តឆ្លងកាត់ឧបសគ្គ (OFF ROAD) Gold Sepon OFF Road challenge នៅឯប្រទេសឡាវ ធ្វើឡើងចាប់ពីថ្ងៃទី៦ ដល់ ៩ ខែវិច្ឆិកា ឆ្នាំ២០២៥ ។ ខាងកម្ពុជាមាន ៣ក្រុមដែលនឹងទៅចូលរួមគឺក្រុម Cambodia OFF Road Team by Siamprototype ដែលបើកបរដោយលោក ពូស្មី, ក្រុម VKH Racing Team បើកបរដោយលោក វង្ស គឹមហួត, ក្រុម Phnom Tbaeng Resort។ ក្រុមទាំង ៣នឹងធ្វើដំណើរចេញពីកម្ពុជានៅថ្ងៃទី២ វិច្ឆិកា ២០២៥ នេះហើយ៕

ពូស្មី (ខាងស្ដាំ)

វីដេអូសម្ភាស៖

អត្ថបទដោយ៖ នួន ស៊ីណា

The post ជើងខ្លាំង OFF ROAD ពូស្មី យករថយន្តសំណព្វចិត្តផលិតតាំងពីឆ្នាំ១៩៨៩ ទៅប្រណាំងនៅឡាវលើកនេះ appeared first on Kampuchea Thmey Daily.

កីឡាយានយន្ត Archives - Kampuchea Thmey Daily

ព្រឹត្តិការណ៍​បង្ហាញ​បច្ចេកទេស​យានយន្ត​ Blackhawk Tire Trip Show អបអរ​ស្តូបឈ្នះឈ្នះ នៅ​កោះកុង ចាប់ផ្តើមថ្ងៃនេះ

មិន​ចង់​ជឿ​ក៏​ត្រូ​វ​តែ​​ជឿ​ដែរ​ត្រើយ​​ទាញ​​រថយន្ត​ OFF ROAD​ របស់​ក្រុម​ VKH ១ដើម​តម្លៃជាង​៧,០០០ដុល្លារ​

បេសកកម្ម​លើក​ទង់ជាតិ​ខ្មែរ​នៅ​ការ​ប្រកួត​ OFF ROAD​ ឯ​ប្រទេសឡាវ​បញ្ចប់​ដោយ​ជោគជ័យ​

នេះ​ហើយ​រថយន្ត​ទី៣​ រហ័ស្សនាម​ «កណ្ដុរក្រហមភ្នំត្បែង» ដែល​ទៅ​ប្រកួត​ OFF ROAD នៅ​ឡាវ​

កីឡាករ​ជើង​ចាស់​ ព្រំ​ រស្មី​ សង្ឃឹម​ទទួល​បាន​ជោគជ័យ​ខ្ពស់​ក្នុងការ​ប្រកួត​ប្រណាំង​រថយន្ត​នៅ​ឡាវ​

ជើង​ខ្លាំង​ OFF ROAD​ ពូស្មី​ យក​រថយន្ត​សំណព្វចិត្ត​ផលិត​តាំង​ពី​ឆ្នាំ​១៩៨៩​ ទៅ​ប្រណាំង​នៅ​ឡាវ​លើក​នេះ​

ព្រឹត្តិការណ៍បង្ហាញបច្ចេកទេសយានយន្ត Blackhawk Tire Trip Show អបអរស្តូបឈ្នះឈ្នះ នៅកោះកុង ចាប់ផ្តើមថ្ងៃនេះ

មិនចង់ជឿក៏ត្រូវតែជឿដែរត្រើយទាញរថយន្ត OFF ROAD របស់ក្រុម VKH ១ដើមតម្លៃជាង៧,០០០ដុល្លារ

បេសកកម្មលើកទង់ជាតិខ្មែរនៅការប្រកួត OFF ROAD ឯប្រទេសឡាវបញ្ចប់ដោយជោគជ័យ

នេះហើយរថយន្តទី៣ រហ័ស្សនាម «កណ្ដុរក្រហមភ្នំត្បែង» ដែលទៅប្រកួត OFF ROAD នៅឡាវ

កីឡាករជើងចាស់ ព្រំ រស្មី សង្ឃឹមទទួលបានជោគជ័យខ្ពស់ក្នុងការប្រកួតប្រណាំងរថយន្តនៅឡាវ

ជើងខ្លាំង OFF ROAD ពូស្មី យករថយន្តសំណព្វចិត្តផលិតតាំងពីឆ្នាំ១៩៨៩ ទៅប្រណាំងនៅឡាវលើកនេះ