កីឡាសិស្សបឋម Archives - Kampuchea Thmey Daily

អ៊ឹម មណីរាជសម្បត្តិ លេងកីឡាបាល់បោះបានធ្វើឲ្យខ្លួនលូតកម្ពស់ និងមានសុខភាពល្អជាងមុន

Sina Noun — Wed, 20 May 2026 09:03:09 +0000

កុមារា អ៊ឹម មណីរាជសម្បត្តិ ដែលប្រកួតតំណាងខេត្តកំពត ថាការលេងកីឡាបាល់បោះនេះបានផ្ដល់អត្ថប្រយោជន៍ច្រើនដូចជាបានលូតកម្ពស់ខ្ពស់ជាងមុន និងមានសុខភាពល្អរឹងមាំ មិនចំណាយពេលជាមួយឧបករណ៍អេឡិចត្រូនិចឥតប្រយោជន៍ផ្សេងៗ។

អ៊ឹម មណីរាជសម្បត្តិ (ខ្ពស់ជាងគេ)

ម្ចាស់មេដាយមាសកីឡាសិស្សបឋមសិក្សាថ្នាក់ជាតិ ឆ្នាំ២០២៦ អ៊ឹម មណីរាជសម្បត្តិ បានឲ្យដឹងថា រូបគេបានចូលហ្វឹកហាត់កីឡាបាល់បោះនេះប្រហែលមួយឆ្នាំមកហើយ និងទទួលបានអត្ថប្រយោជន៍ច្រើនចំពោះសុខភាពរាងកាយ។ បន្ទាប់ពីហ្វឹកហាត់អំឡុងពេលមួយឆ្នាំមកនេះបានធ្វើឲ្យរូបគេលូតកម្ពស់ខ្ពស់ជាងមុន និងទទួលបានបទពិសោធថ្មីៗ ចេះសាមគ្គីគ្នាជាក្រុម។

ទិដ្ឋភាពប្រកួតកន្លងទៅ

កុមារាប្រកួតតំណាងឲ្យខេត្តកំពតរូបនេះលើកឡើងទៀតថា តទៅមុខទៀតចង់ឲ្យសហព័ន្ធកីឡាបាល់បោះ សាលារៀនផ្សេងៗបង្កើតកម្មវិធីប្រកួតឲ្យបានច្រើន។ នេះជាការផ្ដល់ឱកាសដល់ខ្លួនរួមទាំងអ្នកផ្សេងៗទៀតដែលបានហ្វឹកហាត់កន្លងមកនេះមានឱកាសប្រកួតសន្សំបទពិសោធ និងពង្រឹងសមត្ថភាពដើម្បីអាចបន្តវេនកីឡាបាល់បោះនេះនៅថ្ងៃអនាគត។

ទិដ្ឋភាពប្រកួតកន្លងទៅ

មណីរាជសម្បត្តិ ប្រាប់ពីក្ដីស្រមៃនៅថ្ងៃអនាគតចង់ជាប់ជាកីឡាករជម្រើសជាតិកម្ពុជា និងប្រកួតដណ្ដើមមេដាយឲ្យបានច្រើនជាងនេះជូនជាតិមាតុភូមិ។ រូបគេបានផ្ដាំផ្ញើទៅកុមារផ្សេងៗគួរយកពេលទំនេរមកហ្វឹកហាត់កីឡាឲ្យបានច្រើនដើម្បីទទួលបានសុខភាពល្អ និងជៀសវៀងការមើលទូរសព្ទឥតប្រយោជន៍។

បញ្ជាក់ដែរថា កុមារា មណីរាជសម្បត្តិ ជាកីឡាករតំណាងឲ្យខេត្តកំពត និងបានប្រកួតឈ្នះមេដាយមាសក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ២០២៦ ដែលទើបបញ្ចប់កាលពីពេលថ្មីៗនេះនៅរាជធានីភ្នំពេញ៕

ខេត្តកំពតឈ្នះមេដាយមាសទាំងផ្នែកកុមារា និងកុមារី

អត្ថបទដោយ៖ នួន ស៊ីណា

The post អ៊ឹម មណីរាជសម្បត្តិ លេងកីឡាបាល់បោះបានធ្វើឲ្យខ្លួនលូតកម្ពស់ និងមានសុខភាពល្អជាងមុន appeared first on Kampuchea Thmey Daily.

ជាធនធានបន្តវេនមែនៗវ័យត្រឹម ១១ឆ្នាំស្គាល់កីឡាករល្បីៗស្រុកខ្មែរជាច្រើន និងចង់ល្បីដូច សួន ចាន់ណារ៉ូ

Sina Noun — Tue, 12 May 2026 01:55:22 +0000

កុមារា ភន សិរីវឌ្ឍនា ថាស្រឡាញ់ចូលចិត្តខ្លាំងលើកីឡាបាល់ទះនេះរហូតលេងជាប្រចាំនៅឯខេត្តព្រៃវែង និងមានក្ដីស្រមៃចង់ហ្វឹកហាត់នៅក្លឹបវិសាខា និងចង់ល្បីឈ្មោះដូចរៀមច្បង សួន ចាន់ណារ៉ូ ក្នុងវិស័យកីឡាមួយនេះនៅថ្ងៃអនាគត។

កុមារា ភន សិរីវឌ្ឍនា(ខាងឆ្វេងគេ)

ម្ចាស់មេដាយមាសកីឡាបឋមសិក្សាថ្នាក់ជាតិ ២០២៦ ភន សិរីវឌ្ឍនា បានឲ្យដឹងថារូបគេស្រឡាញ់ និងចូលចិត្តវិស័យកីឡាបាល់ទះនេះខ្លាំង និងលេងជាប្រចាំនៅពេលទំនេរនៅឯស្រុកកំណើត។ រូបគេលេងក្នុងតំណែងជាប៉ះសេជួយក្រុមក្នុងការប្រកួតកីឡាសិស្សបឋមសិក្សាថ្នាក់ជាតិឈ្នះមេដាយមាសទើបតែបញ្ចប់ទៅនេះ។

កុមារាវ័យ ១១ឆ្នាំរូបនេះមិនមែនស្រឡាញ់តែនៅហ្នឹងមាត់នោះទេ ពោលរូបគេមានសមត្ថភាពដក់បាល់បានល្អ និងជួយក្រុមបានច្រើនរហូតឈ្នះមេដាយមាស។ លើលពីនេះរូបគេស្គាល់កីឡាករល្បីៗឈ្មោះនៅស្រុកខ្មែរច្រើនដូចជា សួន ចាន់ណារ៉ូ គួន ម៉ុម មឿន ម៉េងឡាយ ធី ម៉េងហួង សឿន ហេង សេង គឹមហាប់ ឆោម ទីណា ប៊ន ណារិទ្ធ និងកីឡាករមួយចំនួនទៀតផងដែរ។

ក្រុមខេត្តព្រៃវែង

ភន សិរីវឌ្ឍនា សរសើររៀមច្បង សួន ចាន់ណារ៉ូ ថាលេងបាល់ល្អ និងលេងបាល់លឿន។ ពេលរៀមច្បងរូបនេះបោះបាល់ម្ដងៗគឺញ៉ាក់ដាច់បាំង ញ៉ាក់ដាច់ស្មាត់ជាដើម។ ក្ដីស្រមៃរបស់កុមារារូបនេះចង់ល្បីឈ្មោះដូច សួន ចាន់ណារ៉ូ និងចង់ហ្វឹកហាត់នៅក្លឹបវិសាខានៅថ្ងៃខាងមុខ។

ក្រុមខេត្តព្រៃវែង

បញ្ជាក់ដែរថា ភន សិរីវឌ្ឍនា ជាកុមារាប្រកួតតំណាងឲ្យខេត្តព្រៃវែង និងបានដណ្ដើមមេដាយមាសជូនខេត្តទៀតផងក្នុងការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ នេះ។ រូបគេលេងបាល់ជាប្រចាំនៅតាមតារាងក្នុងស្រុកភូមិឯខេត្តព្រៃវែង៕

ខេត្តព្រៃវែងពេលឈ្នះមេដាយមាស

អត្ថបទដោយ៖ នួន ស៊ីណា

The post ជាធនធានបន្តវេនមែនៗវ័យត្រឹម ១១ឆ្នាំស្គាល់កីឡាករល្បីៗស្រុកខ្មែរជាច្រើន និងចង់ល្បីដូច សួន ចាន់ណារ៉ូ appeared first on Kampuchea Thmey Daily.

ឡាំគីមណា ស៊ីសុរក្សា ការតាំងចិត្ត និងការតស៊ូហ្វឹកហាត់រហូតឈ្នះមេដាយមាសក្នុងការប្រកួតកីឡាសិស្សបឋម

Sina Noun — Mon, 11 May 2026 08:08:16 +0000

កុមារា ឡាំគីមណា ស៊ីសុរក្សា ផ្នែកកីឡាវាយកូនឃ្លីលើតុតំណាងរាជធានីភ្នំពេញ តាមរយៈការតាំងចិត្តខ្ពស់ និងការខិតខំប្រឹងប្រែងហ្វឹកហាត់តស៊ូរយៈ ៣-៤ឆ្នាំមកនេះ ឥលូវអាចដណ្ដើមមេដាយមាសបានហើយក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ២០២៦។

ឡាំគីមណា ស៊ីសុរក្សា អំឡុងពេលប្រកួត

លោក ឡាំ ស៊ីដាវុទ្ធ អាណាព្យាបាលរបស់កុមារា ឡាំគីមណា ស៊ីសុរក្សា បានឲ្យដឹងថា លោកមានចិត្តសប្បាយរីករាយដោយឃើញកូនប្រុសខំរៀនសូត្រ និងខិតខំហាត់កីឡាដំណាលគ្នាយ៉ាងសកម្មបែបនេះ។ បើទោះជាមិនសូវមានពេលទំនេរច្រើន និងត្រូវការបែងចែកម៉ោងគ្នាយ៉ាងណាក្ដី ប៉ុន្តែកូនរបស់លោកមិនបង្ហាញពីការលំបាក ឬនឿយហត់នោះឡើយ។

កុមារា ឡាំគីមណា ស៊ីសុរក្សា និងឪពុក

ឪពុករបស់ ស៊ីសុរក្សា បន្ថែមទៀតថា នេះជាលើកទី១ ហើយសម្រាប់រូបគេដែលបានឈ្នះមេដាយមាសក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិនេះ។ កូនប្រុសរបស់លោកបានចូលរួមកម្មវិធីទូទាំងប្រទេសនេះ ៣-៤ដងមកហើយដែរ ប៉ុន្តែសមត្ថភាពនៅមានកម្រិតទើបមិនអាចឈ្នះមេដាយមាស។ យ៉ាងណាការតស៊ូព្យាយាមហ្វឹកហាត់ដោយមានគោលដៅច្បាស់លាស់ និងមិនបោះបង់បានធ្វើឲ្យរូបគេមានសមត្ថភាពកើនឡើងជាបន្តបន្ទាប់ និងឈ្នះមេដាយសំខាន់ៗផងដែរពេលថ្មីៗនេះ។

កុមារា ឡាំគីមណា ស៊ីសុរក្សា ក៏បានបង្ហាញអារម្មណ៍សប្បាយ និងពេញចិត្តជាខ្លាំងចំពោះការហ្វឹកហាត់កីឡាវាយកូនឃ្លីលើតុជាប្រចាំថ្ងៃដូចនេះ។ ការហ្វឹកហាត់កីឡាមួយនេះបានធ្វើឲ្យរូបគេមានសុខភាពល្អ មានការប្រាស្រ័យទាក់ទងជាមួយមនុស្សជុំវិញខ្លួន និងបានកាត់បន្ថយការមើលទូរសព្ទជាដើម។

កុមារា ឡាំគីមណា ស៊ីសុរក្សា

បញ្ជាក់ដែរថា កុមារា ឡាំគីមណា ស៊ីសុរក្សា ជាកីឡាករផ្នែកកីឡាវាយកូនឃ្លីលើតុតំណាងឲ្យរាជធានីភ្នំពេញ ក្នុងការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ នេះ។ រូបគេប្រកួតឈ្នះមេដាយមាស ១គ្រឿងលើវិញ្ញាសាវាយគូក្នុងព្រឹត្តិការណ៍សិស្សបឋមដែលទើបបញ្ចប់។ ក្រៅពីជ័យជម្នះមួយនេះរូបគេក៏ជាជើងឯកលេខ១ ទាំង ២វិញ្ញាសារគឺវិញ្ញសាវាយគូ និងវិញ្ញាសាឯកត្តជន ក្នុងការប្រកួតកម្រិតសាលាបឋមសិក្សាប្រចាំរាជធានីភ្នំពេញ អំឡុងឆ្នាំ២០២៦ កន្លងទៅ៕

ឡាំគីមណា ស៊ីសុរក្សា ពេលឈ្នះមេដាយមាស

អត្ថបទដោយ៖ នួន ស៊ីណា

The post ឡាំគីមណា ស៊ីសុរក្សា ការតាំងចិត្ត និងការតស៊ូហ្វឹកហាត់រហូតឈ្នះមេដាយមាសក្នុងការប្រកួតកីឡាសិស្សបឋម appeared first on Kampuchea Thmey Daily.

លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត

Sina Noun — Mon, 11 May 2026 01:54:20 +0000

លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក ថាលោកចង់ឲ្យមានការប្រកួតសម្រាប់កុមារតូចៗបែបនេះឲ្យបានច្រើនថែមទៀត ព្រោះជាការបណ្ដុះមូលដ្ឋានផ្នែកកីឡានេះល្អណាស់ និងជាការរួមចំណែកបង្កើនធនធានកីឡាករ កីឡាការិនីនៅថ្ងៃអនាគត។

ទិដ្ឋភាពប្រកួត

អគ្គលេខាធិការលោក ហែម គីរី បានឲ្យដឹងថា នេះជាលើកទី៣ ហើយដែលកីឡាហែលទឹកត្រូវបានដាក់បញ្ចូលក្នុងកម្មវិធីប្រកួតកីឡាសិស្សបឋមសិក្សាថ្នាក់ជាតិ។ ការរៀបចំពីមួយឆ្នាំទៅមួយឆ្នាំចំនួនកីឡាករ កីឡាការិនីដែលជាកុមារៗចូលរួមកាន់តែច្រើនឡើងៗ។

ទិដ្ឋភាពប្រកួត

ក្នុងនាមសហព័ន្ធចង់ឲ្យមានការប្រកួតបែបកុមារនេះឲ្យបានច្រើនថែមទៀត ព្រោះការប្រកួតនេះបណ្ដុះនូវមូលដ្ឋានគ្រឹះដល់ពួកគេ។ កីឡាហែលទឹកនេះត្រូវការបណ្ដុះបណ្ដាលរយៈពេលវែង និងត្រូវការបំផុតអ្នកដែលមានមូលដ្ឋានពីវ័យក្មេងៗទើបឈានទៅរកការហ្វឹកហាត់ស្ដង់ដាពីមួយកម្រិតទៅមួយកម្រិតទៀតបាន។

ទិដ្ឋភាពប្រកួត

បញ្ជាក់ដែរថា សហព័ន្ធខ្មែរកីឡាហែលទឹកបានបិទបញ្ចប់ការប្រកួតរបស់ខ្លួនដោយរលូន និងជោគជ័យកាលពីថ្ងៃទី៨ ខែឧសភា ឆ្នាំ២០២៦ ក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិ។ ចំណាត់ថ្នាក់លេខ១ បានលើខេត្តព្រៃវែង ឈ្នះមេដាយសរុប ៦គ្រឿង មាស២ ប្រាក់៣ សំរឹទ្ធ១។ លេខ២ បានលើរាជធានីភ្នំពេញ ឈ្នះមេដាយសរុប ៤គ្រឿង មាស២ ប្រាក់២។ លេខ៣ បានលើខេត្តកណ្ដាល ឈ្នះមេដាយសរុប ៣គ្រឿង មាស២ សំរឹទ្ធ១៕

ទិដ្ឋភាពប្រកួត

អត្ថបទដោយ៖ នួន ស៊ីណា

The post លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត appeared first on Kampuchea Thmey Daily.

កីឡាគុនល្បក្កតោ៖ វិញ្ញាសាខ្លះលំបាក ប៉ុន្តែកុមារា-កុមារីអាចធ្វើបានដែលនេះបង្ហាញពីទេពកោសល្យ

Sina Noun — Fri, 08 May 2026 08:15:40 +0000

លោក អ៊ូ តារា អគ្គលេខាធិការសហព័ន្ធគុនល្បុក្កតោ ថាការប្រកួតកីឡាសិស្សបឋមសិក្សានេះមានវិញ្ញាសាខ្លះគឺមានភាពលំបាកក្នុងការប្រកួត ប៉ុន្តែកុមារា-កុមារី ដែលមកចូលរួមខ្លះអាចធ្វើបានដែលនេះបង្ហាញពីទេពកោសល្យ និងការខិតខំប្រឹងប្រែង។

លោក អ៊ូ តារា

អគ្គលេខាធិការសហព័ន្ធគុនល្បុក្កតោ លោក អ៊ូ តារា បានឲ្យដឹងថា តាមអ្វីដែលលោកមើលឃើញពីការប្រកួតកីឡាសិស្សបឋមថ្នាក់ជាតិរយៈពេល ២ថ្ងៃនេះគឺកុមារដែលចូលរួមទាំងនេះបានបង្ហាញពីទឹកចិត្តស្រឡាញ់ប្រភេទកីឡាមួយនេះដុះចេញពីចិត្តតែម្ដង។

លោកបន្ថែមទៀតថា វិញ្ញាសាខ្លះគឺសម្រាប់អ្នកមានវ័យច្រើនជាងនេះ ឬជាយុវជនទើបអាចធ្វើបានល្អ។ ប៉ុន្តែកុមារា-កុមារីមួយចំនួនអាចធ្វើបាន និងមានការខំប្រឹងខ្ពស់។ នេះជាការបង្ហាញនូវទេពកោសល្យល្អខាងផ្នែកល្បុក្កតោ និងបង្ហាញពីការខិតខំប្រឹងប្រែងហ្វឹកហាត់នាពេលកន្លង។

ថ្នាក់ដឹកនាំសំខាន់ក្នុងសហព័ន្ធរូបនេះបន្ថែមទៀតថា តាមរយៈការរីកសាយភាយ និងស្មារតីគុនល្បុក្កតោមានភាពរីកចម្រើននៅពេលនេះជាអ្វីដែលព្រឹទ្ធាចារ្យក្រមាមាស សាន គឹមស៊ាន ធ្លាប់បានបណ្ដុះកន្លងមក និងជាអ្វីដែលលោកចង់ឃើញបំផុត។ ក្នុងនាមអ្នកជំនាន់ក្រោយនឹងបន្តលើកិច្ចការពង្រីកផ្សព្វផ្សាយនូវស្មារតីរបស់ព្រឹទ្ធាចារ្យបន្តទៅទៀតដើម្បីឲ្យក្បាច់គុនបុរាណរបស់ខ្មែរមួយនេះកាន់តែមានការគាំទ្របន្ថែមទៀត។

រូបភាពលើផេកសហព័ន្ធ

បញ្ជាក់ដែរថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ លើប្រភេទកីឡាគុនល្បុក្កតោនេះបានបិទបញ្ចប់ទៅហើយថ្ងៃទី៨ ខែឧសភា ឆ្នាំ២០២៦ ក្រោយរៀបចំអស់រយៈពេល ២ថ្ងៃកន្លងទៅ។ ខេត្តឈ្នះមេដាយច្រើនជាងគេចំណាត់ថ្នាក់លេខ១ ខេត្តរតៈគិរី មាស៧ ប្រាក១ សរុប ៨គ្រឿង។ លេខ២ ខេត្តកំពង់ស្ពឺ មាស១ ប្រាក់៣ សំរឹទ្ធ១ សរុប ៥គ្រឿង។ លេខ៣ ខេត្តកំពង់ឆ្នាំ មាស១ ប្រាក់២ សំរឹទ្ធ២ សរុប ៥គ្រឿង។ ការប្រកួតកីឡាល្បុក្កតោ ក្នុងព្រឹត្តិការណ៍កីឡាសិស្សបឋមសិក្សានេះធ្វើនៅសកលវិទ្យាល័យភូមិន្ទភ្នំពេញ ចាប់ពីថ្ងៃទី៧ ដល់ ៨ ខែឧសភា ២០២៦ ៕

រូបភាពលើផេកសហព័ន្ធ

អត្ថបទដោយ៖ នួន ស៊ីណា

The post កីឡាគុនល្បក្កតោ៖ វិញ្ញាសាខ្លះលំបាក ប៉ុន្តែកុមារា-កុមារីអាចធ្វើបានដែលនេះបង្ហាញពីទេពកោសល្យ appeared first on Kampuchea Thmey Daily.

ខ្លាំងដូចការប្ដេជ្ញាមែន! ក្រុមបាល់ទះបឋមសិក្សាខេត្តព្រៃវែង ឈ្នះមេដាយមាស និងបិទដៃគូឲ្យបានតែជាង ១០ពិន្ទុប៉ុណ្ណោះ

Sina Noun — Fri, 08 May 2026 03:32:13 +0000

ក្រុមបាល់ទះខេត្តព្រៃវែង បានយកឈ្នះក្រុមខេត្តកំពង់ស្ពឺដោយងាយៗក្នុងវគ្គផ្ដាច់ព្រ័ត្រការប្រកួតកីឡាបឋមសិក្សាថ្នាក់ជាតិ ឆ្នាំ២០២៦ នេះដោយលទ្ធផល ២-០ ខណៈពិន្ទុនោះវិញបិទដៃគូឲ្យបានត្រឹមជាង ១០ពិន្ទុប៉ុណ្ណោះយកមេដាយមាសជូនខេត្តរបស់ខ្លួន។

ក្រុមបាល់ទះតំណាងខេត្តព្រៃវែង

ខ្លាំងដូចការប្ដេជ្ញាចិត្តកាលពីថ្ងៃទី៧ ឧសភា ២០២៦ ម្សិលមិញអីចឹងថាខេត្តព្រៃវែងរបស់ខ្លួននឹងឈ្នះ ១០០% ក្នុងការប្រកួតវគ្គផ្ដាច់ព្រ័ត្រដណ្ដើមមេដាយមាសនេះ។ ការប្រកួតវគ្គផ្ដាច់ព្រ័ត្រដែលទើបបញ្ចប់នៅមុននេះគឺក្រុមបាល់ទះខេត្តព្រៃវែងយកឈ្នះ ២-០ លើក្រុមខេត្តកំពង់ស្ពឺតែម្ដង។ សិនទី១ ព្រៃវែង ២៥-១០ កំពង់ស្ពឺ សិតទី២ ព្រៃវែង ២៥-១៤ កំពង់ស្ពឺ។ ឆ្លងកាត់ ២សិតនេះក្រុមកំពង់ស្ពឺមានពិន្ទុខ្ពស់បំផុតត្រឹម ១៤ពិន្ទុប៉ុណ្ណោះ។

ក្រុមខេត្តព្រៃវែងពិតជាខ្លាំង និងប្រកួតល្អមែនក្នុងព្រឹត្តិការណ៍កីឡាសិស្សបឋមសិក្សានេះ។ កីឡាករម្នាក់ៗរឹងល្អ និងលេងប្រកបដោយបច្ចេកទេសស្មើដៃគ្នាទាំងអស់។ ការចាប់សេវា ប៉ះសេ និងស្មាត់ សុទ្ធតែលេងតាមតួនាទីបានល្អ និងស្អិតដូចគ្នាមិនងាយបាត់បាល់នោះឡើយ។

ក្រុមបាល់ទះតំណាងខេត្តព្រៃវែង

បញ្ជាក់ដែរថា ការប្រកួតប្រភេទកីឡាបាល់ទះក្នុងព្រឹត្តិការណ៍កីឡាសិស្សបឋមសិក្សាថ្នាក់ជាតិ ឆ្នាំ២០២៦ នេះបានបញ្ចប់ការប្រកួតនៅព្រឹកថ្ងៃទី៨ ខែឧសភា នេះហើយ។ ក្រុមបាល់ទះខេត្តព្រៃវែង ទទួលបានមេដាយមាស បន្ទាប់ពីយកឈ្នះខេត្តកំពង់ស្ពឺនៅវគ្គផ្ដាច់ព្រ័ត្រ។ ផ្នែកកុមារីគឺខេត្តកំពង់ស្ពឺទទួលបានមេដាយមាស ខណៈមេដាយប្រាក់បានលើខេត្តកំពង់ធំ៕

ការប្រកួតផ្ដាច់ព្រ័ត្រ

អត្ថបទដោយ៖ នួន ស៊ីណា

The post ខ្លាំងដូចការប្ដេជ្ញាមែន! ក្រុមបាល់ទះបឋមសិក្សាខេត្តព្រៃវែង ឈ្នះមេដាយមាស និងបិទដៃគូឲ្យបានតែជាង ១០ពិន្ទុប៉ុណ្ណោះ appeared first on Kampuchea Thmey Daily.

ក្រុមបាល់ទះខេត្តព្រៃវែង មានទំនុកចិត្តដល់ទៅ ១០០% ផ្ដួលកំពង់ស្ពឺយកមេដាយមាសកីឡាបឋមសិក្សាថ្នាក់ជាតិ

Sina Noun — Thu, 07 May 2026 03:24:17 +0000

ក្រុមបាល់ទះបឋមសិក្សាខេត្តព្រៃវែង មានទំនុកចិត្តលើក្រុមខ្លួនឯងខ្ពស់មែនទែនរហូតដល់ ១០០% នឹងយកឈ្នះលើក្រុមខេត្តកំពង់ស្ពឺ ដណ្ដើមមេដាយមាសវគ្គផ្ដាច់ព្រ័ត្រ នៃការប្រកួតកីឡាបឋមសិក្សាថ្នាក់ជាតិ ឆ្នាំ២០២៦ ស្របពេលកីឡាករក្នុងក្រុមលេងស្មើដៃគ្នា និងមានស្មាត់ល្អថែមទៀត។

ក្រុមបាល់ទះខេត្តព្រៃវែង

កុមារា ភន សិរីវឌ្ឍនា និងមិត្តរួមក្រុមបាល់ទះខេត្តព្រៃវែងបានឲ្យដឹងថា ការប្រកួតនៅវគ្គផ្ដាច់ព្រ័ត្រដណ្ដើមមេដាយមាសស្អែកនេះដាក់ក្ដីសង្ឃឹម ១០០% តែម្ដងនឹងយកឈ្នះលើក្រុមខេត្តកំពង់ស្ពឺ។ បើទោះជាដឹងថាក្រុមកំពង់ស្ពឺមានស្មាត់ល្អ និងរឹងជើងក្រោមបែបណាក្ដី ប៉ុន្តែរូបគេនៅតែជឿជាក់ថាអាចយកឈ្នះបាន។

ក្រុមបាល់ទះខេត្តព្រៃវែង

កីឡាករវ័យ ១១ឆ្នាំមកពីព្រៃវែងខាងលើបន្ថែមទៀតថា ការសង្ឃឹមឈ្នះមេដាយមាសខ្ពស់បែបនេះដោយសារតែកូនក្រុមរបស់ខ្លួនលេងសាមគ្គីគ្នាបានល្អ និងលេងស្អិតស្មើដៃគ្នា។ ក្រុមព្រៃវែងរបស់ខ្លួននេះមានស្មាត់ល្អពីររូបដែលលេចធ្លោ និងជួយក្រុមបានច្រើន ស្របពេលខ្លួនជាអ្នកប៉ះសេបានល្អថែមទៀតរឹតតែបង្ហាញថាខេត្តព្រៃវែងសង្ឃឹមឈ្នះមេដាយមាសស្អែកនេះ។

ក្រុមបាល់ទះខេត្តព្រៃវែង

បញ្ជាក់ដែរថា នៅវគ្គពាក់កណ្ដាលផ្ដាច់ព្រ័ត្រកីឡាបឋមសិក្សាថ្នាក់ជាតិ ២០២៦ ព្រឹកមិញនេះគូទី២ ក្រុមបាល់ទះខេត្តព្រៃវែង បានយកឈ្នះលើក្រុមខេត្តតាកែវ ដោយលទ្ធផល ២-០ ឡើងទៅវគ្គផ្ដាច់ព្រ័ត្រប៉ះក្រុមបាល់ទះខេត្តកំពង់ស្ពឺ។ ស្អែកព្រឹករវាងក្រុមខេត្តព្រៃវែង និង ខេត្តកំពង់ស្ពឺ អ្នកណាឈ្នះនឹងទទួលបានមេដាយមាស នៃការប្រកួតកីឡាបឋមសិក្សាថ្នាក់ជាតិ ២០២៦ នេះ៕

អត្ថបទដោយ៖ នួន ស៊ីណា

The post ក្រុមបាល់ទះខេត្តព្រៃវែង មានទំនុកចិត្តដល់ទៅ ១០០% ផ្ដួលកំពង់ស្ពឺយកមេដាយមាសកីឡាបឋមសិក្សាថ្នាក់ជាតិ appeared first on Kampuchea Thmey Daily.

កីឡាសិស្សបឋមសិក្សា៖ មាន ១២ប្រភេទកីឡា និងត្រូវប្រកួត ១០ទីតាំងធំៗនៅក្នុងរាជធានីភ្នំពេញ

Sina Noun — Thu, 23 Apr 2026 05:59:42 +0000

ការប្រកួតកីឡាសិស្សបឋមសិក្សាថ្នាក់ជាតិ ប្រចាំឆ្នាំ២០២៦ នេះនឹងចាប់ផ្ដើមឡើងពីថ្ងៃទី១ ដល់ ៩ ខែឧសភា លើ ១២ប្រភេទកីឡា និងត្រូវប្រកួតនៅ ១០ទីតាំងផ្សេងៗក្នុងរាជធានីភ្នំពេញ ស្របពេលព្រឹកថ្ងៃទី២៣ មេសា នេះក្រសួងអប់រំបានបើកកិច្ចប្រជុំផ្សព្វផ្សាយ និងចាប់ពូលរួចរាល់ផងដែរ។

លោក ហួត សេងទ្រី

លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡា បានឲ្យដឹងថា នៅព្រឹកថ្ងៃទី២៣ មេសា ឆ្នាំ២០២៦ នេះក្រសួងអប់រំបានជួបប្រជុំស្ដីពីការត្រៀមរៀបចំការប្រកួតកីឡាសិស្សបឋមសិក្សាថ្នាក់ជាតិឆាប់ៗខាងមុខនេះ។ ក្នុងកិច្ចប្រជុំនោះដែរបានជម្រាបជូនភាគីពាក់ព័ន្ធពីការហូបចុកស្នាក់នៅ ការធ្វើដំណើរ និងសន្តិសុខជាដើម។ នៅថ្ងៃទី១ ឧសភា ប្រតិភូ គ្រូបង្វឹក កីឡាករ កីឡាការិនី នឹងមកដល់រាជធានីភ្នំពេញ និងថ្ងៃបន្ទាប់ផ្ដើមប្រកួតចាប់ពីពេលព្រឹករួចហើយនៅពេលរសៀលបន្តប្រារព្ធពិធីបើកជាផ្លូវការ។

ទិដ្ឋភាពប្រជុំ

ការប្រកួតនៅឆ្នាំនេះមាន ១២ប្រភេទកីឡាគឺ បាល់ទាត់ បាល់ទះ បាល់បោះ អត្តពលកម្ម វាយសី វាយកូនឃ្លីលើតុ តេក្វាន់ដូ WT ប៊ូល និងប៉េតង់ គុនល្បក្កតោ ហែលទឹក គុនដាវ ចំបាប់ សរុបវិញ្ញាសាទាំងអស់មាន ៦២វិញ្ញសា។ ទីកន្លែងធំៗដែលនឹងត្រូវប្រកួតនោះរួមមាន ពហុកីឡដ្ឋានជាតិ វិទ្យាស្ថានជាតិអប់រំកាយ និងកីឡា មជ្ឈមណ្ឌលជាតិហ្វឹកហ្វឺនកីឡា វិទ្យាល័យជាស៊ីម បឹងកេងកង ទីលានបាល់ទះស្នងការរាជធានីភ្នំពេញ សកលវិទ្យាល័យភូមិន្ទភ្នំពេញ វិទ្យាល័យជាស៊ីម ជ្រោយចង្វារ វិទ្យាល័យវត្តកោះ វិទ្យាល័យច្បារអំពៅ និងផ្សារទំនើបអូឡាំព្យា។

បញ្ជាក់ដែរថា ការប្រកួតកីឡាសិស្សបឋមសិក្សាថ្នាក់ជាតិ ឆ្នាំ២០២៦ នេះនឹងចាប់ផ្ដើមពីថ្ងៃទី១ ដល់ ៩ ខែឧសភា តទៅនៅរាជធានីភ្នំពេញ។ ការប្រកួតនេះមាន ១២ប្រភេទកីឡា និងសរុបប្រតិភូ គ្រូបង្វឹក កីឡាករ កីឡាការិនីមានទាំងអស់ ២៦៨៩នាក់៕

អត្ថបទដោយ៖ នួន ស៊ីណា

The post កីឡាសិស្សបឋមសិក្សា៖ មាន ១២ប្រភេទកីឡា និងត្រូវប្រកួត ១០ទីតាំងធំៗនៅក្នុងរាជធានីភ្នំពេញ appeared first on Kampuchea Thmey Daily.

កីឡាសិស្សបឋម Archives - Kampuchea Thmey Daily

អ៊ឹម​ មណីរាជសម្បត្តិ​ លេង​កីឡា​បាល់​បោះ​បាន​ធ្វើ​ឲ្យ​ខ្លួន​លូត​កម្ពស់​ និង​មាន​សុខភាព​ល្អ​ជាង​មុន​

លោក​ ហែម​ គីរី​ ចង់​ឲ្យ​មាន​កម្មវិធី​ប្រកួត​សម្រាប់​កុមារ​ៗ​បែប​នេះ​ឲ្យ​បាន​ច្រើនទៀត

កីឡា​សិស្សបឋម​សិក្សា៖ មាន​ ១២​ប្រភេទ​កីឡា​ និង​ត្រូវ​ប្រកួត​ ១០ទីតាំងធំៗនៅ​ក្នុង​រាជធានីភ្នំពេញ​

អ៊ឹម មណីរាជសម្បត្តិ លេងកីឡាបាល់បោះបានធ្វើឲ្យខ្លួនលូតកម្ពស់ និងមានសុខភាពល្អជាងមុន

លោក ហែម គីរី ចង់ឲ្យមានកម្មវិធីប្រកួតសម្រាប់កុមារៗបែបនេះឲ្យបានច្រើនទៀត

កីឡាសិស្សបឋមសិក្សា៖ មាន ១២ប្រភេទកីឡា និងត្រូវប្រកួត ១០ទីតាំងធំៗនៅក្នុងរាជធានីភ្នំពេញ