កីឡាសូហ្វតិន្នីស Archives - Kampuchea Thmey Daily

ឆាន ឈាវហួយ លេង ៥វិញ្ញាសាឈ្នះមេដាយទាំង ៥ ជាប់ជាកីឡាការិនីឆ្នើមប្រចាំកម្មវិធីនៅប្រទេសឥណ្ឌា

Sina Noun — Wed, 11 Feb 2026 07:37:17 +0000

កីឡាការិនីឆ្នើមរបស់កម្ពុជាលើប្រភេទកីឡាសូហ្វតិន្នីស ឆាន ឈាវហួយ លេងលើ ៥វិញ្ញាសាឈ្នះមេដាយ ៥គ្រឿង និងជាប់ជាកីឡាការិនីឆ្នើមទទួលពានមួយទៀតបន្ថែមក្នុងព្រឹត្តិការណ៍ជើងឯកយុវជនអាស៊ី លើកទី២ ឆ្នាំ២០២៦ (The 2nd Asian Junior Soft Tennis Championship 2026) ដែលធ្វើនៅឯប្រទេសឥណ្ឌា។

កីឡាការិនី ឆាយ ឈាវហួយ

លោក យី សារិន ដែលជាគ្រូបង្វឹកកីឡាសូហ្វតិន្នីសកម្ពុជា បានឲ្យដឹងថា ក្រុមយុវជនកម្ពុជាបានប្រកួតឈ្នះមេដាយសរុប ៥គ្រឿងក្នុងការប្រកួតនៅឯប្រទេសឥណ្ឌានេះ។ ដោយសារតែមានការភ្លាត់ស្នៀតបន្តិចទើបធ្វើឲ្យកម្ពុជាមិនអាចដណ្ដើមមេដាយមាសបាននៅវគ្គផ្ដាច់ព្រ័ត្រ។

កីឡាការិនី ឆាយ ឈាវហួយ

លោក យី សារិន

គ្រូបង្វឹកជើងចាស់រូបនេះលើកឡើងទៀតថា ការឈ្នះពានរង្វាន់ឆ្នើមប្រចាំកម្មវិធីរបស់កីឡាការិនី ឆាយ ឈាវហួយ នេះជាមោទកភាពមួយសម្រាប់កម្ពុជាផងដែរ។ កត្តាដែលនាំឲ្យរូបគេឈ្នះពានឆ្នើមនេះដោយសារតែ ឈាវហ៊ួយ ប្រកួតដោយស្មារតីមោះមុតមិនញញើតក្នុងការប្រកួត តស៊ូព្យាយាម អំណត់អត់ធ្មត់ និងប្រកួតដោយបច្ចេកទេស និងវាយសម្រុកខ្លាំង ការដាក់សម្ពាធទៅលើដៃគូជាច្រើនដងជាដើម។

ក្រុមយុវជនសូហ្វតិន្នីសកម្ពុជា

បញ្ជាក់ដែរថា មេដាយដែលកីឡាការិនី ឆាន ឈាវហួយ ឈ្នះទាំង ៥វិញ្ញាសារមានដូចជា

– កីឡាការិនី ឆាន ឈាវហួយ ឈ្នះមេដាយប្រាក់ ១គ្រឿង (វិញ្ញាសាវាយឯកត្តជនយុវនារីអាយុក្រោម ១៨ឆ្នាំ)

– កីឡាការិនី ឆាន ឈាវហួយ យ៉ន ឈុនលាភ ហ៊ីម ដារ៉ាពេជ្រ ទីម ច័ន្ទកក្កដា ឃុន ចន្ទរ៉ូសិកា និង ឈន ច័ន្ទកញ្ញា ឈ្នះមេដាយប្រាក់ ១គ្រឿង (វិញ្ញាសាវាយក្រុមចម្រុះ បុរស-នារី)

– កីឡាការិនី ឆាន ឈាវហួយ និង ឃុន ចន្ទរ៉ូសិកា ឈ្នះមេដាយសំរឹទ្ធ ១គ្រឿង (វិញ្ញាសាវាយគូយុវនារីក្រោម ២១ឆ្នាំ)

– កីឡាការិនី ឆាន ឈាវហួយ និងកីឡាការិនី ឈន ច័ន្ទកញ្ញា ឈ្នះមេដាយសំរឹទ្ធ ១គ្រឿង (វិញ្ញាសាវាយគូយុវនារីអាយុក្រោម ១៨ឆ្នាំ)

– កីឡាការិនី ឆាន ឈាវហួយ ឃុន ចន្ទរ៉ូសិកា និងកីឡាការិនី ឈន ច័ន្ទកញ្ញា ឈ្នះមេដាយសំរឹទ្ធ ១គ្រឿង (វិញ្ញាសាវាយក្រុមនារី)

បញ្ជាក់ដែរថា ព្រឹត្តិការណ៍ជើងឯកយុវជនអាស៊ីលើកទី២ (The 2nd Asian Junior Soft Tennis Championship 2026) នៅឯប្រទេសឥណ្ឌា នេះធ្វើឡើងចាប់ពីថ្ងៃទី៣ ដល់ ៩ ខែកុម្ភៈ ឆ្នាំ២០២៦។ ក្រុមយុវជនសូហ្វតិន្នីសកម្ពុជាបានវិលត្រឡប់មកដល់មាតុភូមិវិញហើយកាលពីព្រឹកថ្ងៃទី១១ កុមុម្ភៈ ឆ្នាំ២០២៦ ៕

ទិដ្ឋភាពមកដល់កម្ពុជាវិញ

អត្ថបទដោយ៖ នួន ស៊ីណា

The post ឆាន ឈាវហួយ លេង ៥វិញ្ញាសាឈ្នះមេដាយទាំង ៥ ជាប់ជាកីឡាការិនីឆ្នើមប្រចាំកម្មវិធីនៅប្រទេសឥណ្ឌា appeared first on Kampuchea Thmey Daily.

ក្រុមកីឡាសូហ្វតិន្នីសកម្ពុជា ចេញទៅប្រជែងមេដាយអន្តរជាតិនៅឥណ្ឌាប្រជុំដោយជើងខ្លាំងជាច្រើន

Sina Noun — Wed, 04 Feb 2026 07:57:21 +0000

ក្រុមកីឡាករ កីឡាការិនីសូហ្វតិន្នីសកម្ពុជា បានធ្វើដំណើទៅប្រទេសឥណ្ឌាហើយកាលថ្ងៃទី៣ ខែកុម្ភៈ ឆ្នាំ២០២៦ ដើម្បីចូលរួមការប្រកួតក្នុងព្រឹត្តិការណ៍ជើងឯកយុវជនទ្វីបអាស៊ី លើកទី២ ឆ្នាំ២០២៦ (The 2nd Asian Junior Soft Tennis Championship) ។

ក្រុមសូហ្វតិន្នីសកម្ពុជា

ព្រឹត្តិការណ៍អន្តរជាតិដែលធ្វើនៅឯប្រទេសឥណ្ឌានេះនឹងប្រព្រឹត្តទៅចាប់ពីថ្ងៃទី៣ ដល់ ៩ ខែកុម្ភៈ ឆ្នាំ២០២៦ នេះប្រជុំដោយប្រទេសខ្លាំងៗដូចជា ប្រទេសចិន ឥណ្ឌូនេស៊ី ជប៉ុន សាធារណរដ្ឋកូរ៉េ ឡាវ ថៃ ម៉ុងហ្គោលី និងម្ចាស់ផ្ទះ។

ដោយឡែកសម្រាប់ក្រុមសូហ្វតិន្នីសកម្ពុជាគឺដឹកនាំដោយគ្រូជើងចាស់

១. លោក យី សារិន គ្រូបង្វឹក

២. កីឡាការិនី ឃន ច័ន្ទរ៉ូសិកា

៣. កីឡាករិនី ឆាន ឈីវហួយ

៤. កីឡាការិនី ឈន ច័ន្ទកញ្ញា

៥. កីឡាករ យ៉ន ឈុនលៀប

៦. កីឡាករ ហ៊ីម ដារាពេជ្រ

៧. កីឡាករ ទឹម ចាន់កក្កដា

កុំភ្លេចតាមដាន និងលើកទឹកចិត្តក្រុមយុវជនកម្ពុជាក្នុងព្រឹត្តិការណ៍ប្រកួតជើងឯកយុវជនទ្វីបអាស៊ី លើកទី២ ឆ្នាំ២០២៦ (The 2nd Asian Junior Soft Tennis Championship) នេះទាំងអស់គ្នា។ ជូនពរក្រុមកម្ពុជាដណ្ដើមបានមេដាយជូនជាតិមាតុភូមិក្នុងការប្រកួតកម្រិតអន្តរជាតិមួយនេះ៕

ក្រុមសូហ្វតិន្នីសកម្ពុជា

អត្ថបទដោយ៖ នួន ស៊ីណា

The post ក្រុមកីឡាសូហ្វតិន្នីសកម្ពុជា ចេញទៅប្រជែងមេដាយអន្តរជាតិនៅឥណ្ឌាប្រជុំដោយជើងខ្លាំងជាច្រើន appeared first on Kampuchea Thmey Daily.

ការយល់ចិត្តគ្នាកីឡាការិនីក្រសួងមហាផ្ទៃ ២រូបដណ្ដើមបានមេដាយមាស ២គ្រឿងការប្រកួតជើងឯកថ្នាក់ជាតិ

Sina Noun — Sat, 11 Oct 2025 09:45:53 +0000

កីឡាការិនី យាន សុខឿន និង ជិន ស្រីឡូយ ថាកក្តាដែលធ្វើឲ្យអ្នកទាំងពីរអាចឈ្នះមេដាយមាសរហូតដល់ ២គ្រឿងនៃព្រឹត្តិការណ៍ជ្រើសរើសជើងឯកថ្នាក់ជាតិឆ្នាំ២០២៥ នេះដោយសារការលេងយល់ចិត្តគ្នា និងសហការគ្នាបានល្អទើបអាចយកឈ្នះដៃគូដែលជាជើងខ្លាំង។

ថ្លែងក្នុងកិច្ចសម្ភាស កីឡាការិនី យាន សុខឿន និង ជិន ស្រីឡូយ មានចិត្តសប្បាយរីករាយជាខ្លាំងដែលបានឈ្នះមេដាយមាសទាំងនេះ ព្រោះប៉ះដៃគូដែលមានសមត្ថភាពខ្លាំងៗ និងមានបទពិសោធច្រើន។ ការប្រកួតប្រជែងគឺតានតឹងខ្លាំងទម្រាំអាចយកឈ្នះបាន ដូច្នេះមេដាយដែលទទួលបាននេះពិតជារំភើប។

កីឡាការិនីទាំងពីរបន្តទៀតថា ជ័យជម្នះលើកនេះគឺដោយសារតែការសហការគ្នាបានល្អ យល់ចិត្តគ្នា និងមានអ្នកបច្ចេកទេសឈរចាំផ្ដាច់ខាងមុខទៀតនោះទើបអាចឈ្នះដៃគូបាននៅវគ្គផ្ដាច់ព្រ័ត្រនេះ។

បញ្ជាក់ដែរថា សហព័ន្ធកីឡាសូហ្វតិន្នីសបានបិទបញ្ចប់ការប្រកួតជ្រើសរើសជើងឯកថ្នាក់ប្រចាំឆ្នាំ២០២៥ របស់ខ្លួនហើយកាលពីថ្ងៃទី១០ ខែតុលា នៅពហុកីឡដ្ឋានជាតិ។ ការប្រកួតនេះធ្វើឡើងរយៈពេល ៥ថ្ងៃគឺចាប់ពីថ្ងៃទី៦ ដល់ ១០ តុលា ២០២៥។ ចំណាត់ថ្នាក់លេខ១ ៖សមាគមកីឡា ក្រសួងមហាផ្ទៃ (មាស ៥, ប្រាក់ ២, សំរឹទ្ធិ ១) ចំណាត់ថ្នាក់លេខ២ ៖ សមាគមកីឡា ក្រសួងការពារជាតិ (មាស ២, ប្រាក់ ៥, សំរឹទ្ធិ ៣) ចំណាត់ថ្នាក់លេខ៣ ៖ សមាគមកីឡា ខេត្តកំពង់ឆ្នាំង (មាស ២, ប្រាក់ ១, សំរឹទ្ធិ ៥) ចំណាត់ថ្នាក់លេខ៤ ៖ សមាគមកីឡា ខេត្តកណ្តាល (ប្រាក់ ១, សំរឹទ្ធិ៧) ចំណាត់ថ្នាក់លេខ៥ ៖ សមាគមកីឡា ខេត្តកំពង់ស្ពឺ (សំរឹទ្ធិ ៦)៕

អត្ថបទដោយ៖ នួន ស៊ីណា

The post ការយល់ចិត្តគ្នាកីឡាការិនីក្រសួងមហាផ្ទៃ ២រូបដណ្ដើមបានមេដាយមាស ២គ្រឿងការប្រកួតជើងឯកថ្នាក់ជាតិ appeared first on Kampuchea Thmey Daily.

លោក ម៉េត សម្បត្តិ មោទកភាពចំពោះកូនៗដែលអាចឈ្នះមេដាយ ១០គ្រឿងជូនប្រទេសកម្ពុជាកាលស៊ីហ្គេម ២០២៣

Sina Noun — Thu, 14 Aug 2025 02:27:07 +0000

គ្រូកីឡាជើងចាស់ ម៉េត សម្បត្តិ ថាលោកពិតជាមោទកភាពជាខ្លាំងចំពោះកូនៗទាំង៣នាក់ដែលអាចដណ្ដើមមេដាយជូនប្រទេសកម្ពុជារហូត ១០គ្រឿងក្នុងព្រឹត្តិការណ៍កីឡាស៊ីហ្គេម លើកទី៣២ កម្ពុជាម្ចាស់ផ្ទះ។

លោក ម៉េត សម្បត្តិ និង ម៉េត សុភក្រា

លោក ម៉េត សម្បត្តិ បានឲ្យដឹងថា លោកក៏មិននឹកស្មានថាកូនៗទាំងន៣នាក់របស់លោកបន្តចាប់អាជីពកីឡាដូចជារូបលោកនោះដែរ ថែមទាំងមានសមត្ថភាពល្អក្នុងការលេងកីឡារៀងៗខ្លួនទៅទៀត។ កូនស្រី ម៉េត ម៉ារីយ៉ាន់ ជាកីឡាការិនីឆ្នើមមួយក្នុងប្រភេទកីឡាសូហ្វតិស្នីស។ ចំណែក ម៉េត សារី និង ម៉េត សុភត្រា អ្នកទាំងពីរក៏ជាកីឡាករឆ្នើមលើប្រភេទកីឡាវូវីណាមផងដែរ។

ម៉េត សុភក្រា និងភរិយា

ជាប្រវត្តិសាស្ត្រដែលកម្ពុជាធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣ នោះកូនទាំង៣នាក់របស់លោកខាងលើនេះអាចដណ្ដើមមេដាយជូនប្រទេសជាតិរហូតដល់ ១០គ្រឿងឯណោះគឺលោកពិតជាសប្បាយរីករាយជាមួយលទ្ធផលដ៏អស្ចារ្យ និងមោទកភាពជាខ្លាំងចំពោះពួកគេ។ លោកពិតជាមិននឹកស្មានថាកូនៗអាចធ្វើបានល្អដ៏ថ្នាក់ហ្នឹងនោះឡើយ ព្រោះកាលវ័យនៅតូចៗជាកុមារដែលមកហាត់កីឡាលេងតាមឪពុកដែលកំពុងគេប៉ុណ្ណោះ។

កីឡាករ ម៉េត សារី

បញ្ជាក់ដែរថា លោក ម៉េត សម្បត្តិ ជាគ្រូកីឡាជើងចាស់ដែលមានសមត្ថភាពកីឡាយ៉ាងល្អ និងអាចបង្ហាត់បាល់ទាត់ អត្តពលកម្ម អប់រំកីឡាយ និងហែលទឹក។ លោកក៏ជាអតីតអាជ្ញាកណ្ដាលបាល់ទាត់ FIFA ជំនាន់ ១៩៩៩ ផងដែរ។ បច្ចុប្បន្ននេះលោកជាប្រធានការិយាល័យបណ្ដុះបណ្ដាល នៃមជ្ឈមណ្ឌលជាតិហ្វឹកហ្វឺនកីឡា។ កូនទាំង៣នាក់របស់លោកក៏ជាអ្នកកីឡាផងដែរ និងកំពុងជាប់ជម្រើសជាតិ គឺកីឡាករ ម៉េត សារី និង ម៉េត សុភក្រា លេងកីឡាវូវីណាម និងកីឡាការិនី ម៉េត ម៉ារីយ៉ាន់ ជាជម្រើសជាតិកីឡាសូហ្វតិន្នីសកម្ពុជា។ មេដាយដែលកូនរបស់លោកឈ្នះទាំងឈ្នះ១០គ្រឿងជូនជាតិនោះរួមមាន មាស ២ ប្រាក់ ៣ សំរឹទ្ធ ៥ ៕

ម៉េត ម៉ារីយ៉ាន់ ពេលឈ្នះមេដាយសំរឹទ្ធ ស៊ីហ្គេម 2023

ម៉េត សារី (ឆ្វេង) ប៉ាល់ ឆរស្ម៉ី ម៉េត សុភក្រា (ស្ដាំ)

កីឡាការិនី ម៉េត ម៉ារីយ៉ាន់

ក្រុមគ្រួសារលោក ម៉េត សម្បត្តិ

អត្ថបទដោយ៖ នួន ស៊ីណា

The post លោក ម៉េត សម្បត្តិ មោទកភាពចំពោះកូនៗដែលអាចឈ្នះមេដាយ ១០គ្រឿងជូនប្រទេសកម្ពុជាកាលស៊ីហ្គេម ២០២៣ appeared first on Kampuchea Thmey Daily.

មកស្គាល់គ្រូកីឡាជើងចាស់ ម៉េត សម្បត្តិ «ជំនាន់ឪពុកល្បីម្ដង ដល់ជំនាន់កូនល្បីម្តងទៀត»

Sina Noun — Tue, 12 Aug 2025 07:05:01 +0000

លោក ម៉េត សម្បត្តិ ជាគ្រូកីឡាជើងចាស់ល្បីឈ្មោះមួយរូបនៅកម្ពុជា និងធ្លាប់ជាកីឡាករដែលពោរពេញដោយសមត្ថភាពល្អលើប្រភេទកីឡាបាល់ទាត់ និងអត្តពលកម្មពីជំនាន់ឆ្នាំ ១៩៨០ ផងដែរ។ នៅជំនាន់លោកមានកេរ្តិ៍ឈ្មោះល្បីល្បាញហើយនោះមកដល់ជំនាន់កូនៗក៏បន្តធ្វើឲ្យវង្សត្រកូន ម៉េត របស់លោកកាន់តែល្បីឈ្មោះថែមទៀតតាមរយៈការឈ្នះមេដាយលើប្រភេទកីឡារៀងខ្លួន។ តោះ! មកដឹងពីប្រវត្តិលោក ម៉េត សម្បត្តិ ទាំងអស់គ្នា…

លោក ម៉េត សម្បត្តិ

លោក ម៉េត សម្បត្តិ កើតនៅឆ្នាំ១៩៦៦ ជាអ្នករាជធានីភ្នំពេញ និងបានរៀបការនៅឆ្នាំ១៩៩៤ ជាមួយលោកស្រី ប៉ុល ពេជ្រមន្នី ដែលជាអតីតកីឡាការិនីមួយរូប និងជាមន្ត្រីក្រសួងអប់រំ យុវជន និងកីឡា។ គ្រូកីឡាជើងចាស់រូបនេះមានកូន ៣នាក់គឺ កូនទី១ ឈ្មោះ ម៉េត សារី មានអាយុ ៣០ឆ្នាំ កូនទី២ ឈ្មោះ ម៉េត សុភត្ត្រា អាយុ ២៨ឆ្នាំ និងកូនស្រីពៅឈ្មោះ ម៉េត ម៉ារីយ៉ាន់ អាយុ ២៣ឆ្នាំ។

លោក ម៉េត សម្បត្តិ និងគ្រួសារ

បច្ចុប្បន្នលោកជាមន្ត្រីមជ្ឈមណ្ឌលជាតិហ្វឹកហ្វឺនកីឡា នៃក្រសួងអប់រំ យុវជន និងកីឡា ដែលកំពុងមើលការខុសត្រូវកីឡាករ កីឡាការិនីនៅពហុកីឡដ្ឋានមរតកតេជោ។ ចំណែកកូនទាំង ៣នាក់របស់លោកគឺ ២នាក់ជាកីឡាករវូវីណាម និងម្នាក់ជាកីឡាការិនីសូហ្វតិន្នីស។

ប្រវត្តិ នៃការចាប់លេងកីឡារបស់លោក ម៉េត សម្បត្តិ គឺចាប់រាប់ត្រឹមឆ្នាំ១៩៧៩ ដែលកាលនោះលោកកំពុងសិក្សានៅសាលាបាក់ទូក និងចាប់ផ្ដើមហ្វឹកហាត់រួមទាំងប្រកួតតំណាងឲ្យសាលាទទួលបានជ័យជម្នះជាបន្តបន្ទាប់។

លោក ម៉េត សម្បត្តិ ពេលប្រកួតបាល់ទាត់ជាមួយ សូវៀត

ក្រៅពីចេះលេងបាល់ទាត់ហើយមកលោក ម៉េត សម្បត្តិ ក៏ចាប់ផ្ដើមហាត់កីឡាអត្តពលកម្ម ជាអ្នកគ្រូ លឹម ផល្លា បន្ទាប់មកចាប់ផ្ដើមចូលហ្វឹកហាត់ជាក្រុមនៅពហុកីឡដ្ឋានជាតិជាមួយលោកគ្រូ ឡាច សៀងហី និងអ្នកគ្រូ មាស ខេង រួមជាមួយគ្រូបរទេសមកពីប្រទេសសូវៀត រហូតមានសមត្ថភាពលោកកម្ពស់បានដល់ 1.75 Cm លោតចម្ងាយបានដល់ 6.60 Cm និងលោតបណ្ដាក់ ៣ដង បានចម្ងាយ 13.60 Cm។

នៅឆ្នាំ១៩៩៦ លោកបានចូលលេងបាល់ទាត់តំណាងឲ្យក្រសួងអប់រំ យុវជន និងកីឡា បាន ១ឆ្នាំក្រុមនេះក៏រំសាយវិញដោយសារមិនមានថវិកាទ្រទ្រង់។ បន្ទាប់មកលោក ម៉េត សម្បត្តិ ក៏វិលត្រឡប់មកលេងបាល់ទាត់ឲ្យខណ្ឌ ៧មករា វិញដោយកាលនោះហ្វឹកហាត់ជាមួយលោកគ្រូ ប៊ូ ឡុង។ អំឡុងពេលនោះក្លឹបបាល់ទាត់ ៧មករា ចាប់ផ្ដើមល្បីដោយសារមានកីឡាករឆ្នើមៗដូចជាលោក នុត សូនី ធន់ វុទ្ធី ចាន់ ណារ៉ុនរ័ត្ន និងរូបលោកផ្ទាល់ បានយកឈ្នះលើក្រុមយុវជនវៀតណាម ចាញ់ រុស្សី ២-០ ស្មើ ១-១ ជាមួយ ឡាវ និងយកឈ្នះក្រុមវៀតណាម ដាណាំង ៣-០ ។

ក្រោយមកនៅឆ្នាំ១៩៩១ លោកក៏បានប្រឡងចេញធ្វើគ្រូ និងបានបង្រៀននៅសាលាកីឡារួចចាប់ផ្ដើមធ្វើជាអាជ្ញាកណ្ដាលរហូតដល់ឆ្នាំ១៩៩៩ បានជាប់ជាអាជ្ញាកណ្ដាល FIFA។ បន្ទាប់ពីធ្វើតេស្តជាប់នៅឆ្នាំ១៩៩៩ នោះ AFC បានចាត់តាំងឲ្យលោកទៅកាត់សេចក្ដី (ផ្លុំកាត់សេចក្ដី) នៅព្រឹត្តិការណ៍ស៊ីហ្គេម លើកទី១៩ នៅឯប្រទេសព្រុយណេ។ បន្ទាប់មកនៅឆ្នាំ២០០២ លោកទៅធ្វើតេស្តជាប់ម្ដងទៀត និងបាន AFC ចាត់តាំងឲ្យទៅកាត់សេចក្ដី (ផ្លុំកាត់សេចក្ដី) ការប្រកួតយុវជនអាយុក្រោម ២៣ឆ្នាំជាថ្មីនៅប្រទេសព្រុយណេ ដដែល។ ឆ្នាំ២០១១-២០១២ លោកក៏ឈប់ធ្វើជាអាជ្ញាកណ្ដាល និងក្លាយជាអ្នកវាយតម្លៃអាជ្ញាកណ្ដាលវិញម្ដងរហូតដល់ឆ្នាំ២០១៥ ដោយសារការងារមមាញឹកលោកក៏សុំឈប់ពីការងារវាយតម្លៃអាជ្ញាកណ្ដាលមួយនេះមកធ្វើការនៅអង្គភាព ព្រោះលោកជាប្រធានការិយាល័យផង និងត្រូវគ្រប់គ្រងក្រុមជម្រើសជាតិរួមផង។

ម៉េត សុភត្ត្រា កូនទី២

លោក ម៉េត សម្បត្តិ ចាប់ផ្ដើមចេញបង្រៀននៅសាលាកីឡាដំបូងលើ ៣ប្រភទកីឡាគឺ បាល់ទាត់ អត្តពលកម្ម និងផ្នែកអប់រំកាយ។ ក្រៅពីប្រភេទកីឡាខាងលើនេះលោកក៏ធ្លាប់ជាគ្រូបង្ហាត់ហែលទឹកដែរអំឡុងឆ្នាំ២០០៦ លោក ហែម ថុន បានហៅលោកឲ្យទៅជួយបង្ហាត់យុវជនថ្នាលនៅពេលនោះ។

គ្រូកីឡាជើងចាស់រូបនេះក៏ធ្លាប់ជាគ្រូបង្ហាត់យុវជនរបស់ក្លឹបបាល់ទាត់ព្រះខ័នរាជផងដែរជំនាន់ឯកឧត្ដម សៅ សុខា ជាប្រធានក្លឹប។ អាចថាជាការចៃដន្យនោះទេនៅពេលនោះគឺលោកទៅមើលគេហាត់លេងប៉ុណ្ណោះ ប៉ុន្តែដោយឃើញថាមិនមានគ្រូបង្ហាត់យុវជននៅទីនោះលោកក៏ទៅបង្ហាត់បាន ២ពេលរួចមកក៏ឈប់ទៅបង្ហាត់វិញ ព្រោះមានសិស្សធំៗគេបង្ហាត់យុវជនទាំងនោះហើយ។

ម៉េត សារី និង ម៉េត សុភក្ត្រា

ដោយឡែកដោយសារកាលនោះមានលោក អុត តារ៉ោ នៅទីនោះក៏បានហៅលោកឲ្យមកបង្ហាត់យុវជនចាប់ពីពេលនោះមក ព្រោះមិនមានគ្រូបង្ហាត់យុវជនទេ សិស្សធំៗជាប់ហាត់ និងលេងខ្លួនឯងដែរ។ បន្ទាប់មកលោកជាមួយលោក គិរី ហៅគ្រូណយ ចាប់បង្ហាត់យុវជននៅស្តាតរហូតដល់ផ្លាស់ប្ដូរទៅហាត់នៅមាត់ទន្លេ និងបន្ទាប់មកក្លឹបបានប្ដូរឈ្មោះទៅជាក្លឹបព្រះខ័នរាជស្វាយរៀង វិញ និងរំសាយការបង្ហាត់យុវជននៅពេលនោះទៅ។

ម៉េត សុភត្ត្រា កូនទី២

យ៉ាងណាដោយសារការស្រឡាញ់លើការបណ្ដុះបណ្ដាលក្មេងៗលោកផ្ទាល់រួមជាមួយលោក អ៊ុំ សាវង្ស លោក តាំម សារី ក៏សហការគ្នាបន្តទៅបង្ហាត់នៅទីលានបឹងកក និងបានសម្រេចដាក់ឈ្មោះថាក្លឹបយុវជននគររាជ (Norkorreach FC) រហូតដល់សព្វថ្ងៃនេះ៕

ម៉េត ម៉ារីយ៉ាន់ កូនស្រីពៅ

អត្ថបទដោយ៖ នួន ស៊ីណា

The post មកស្គាល់គ្រូកីឡាជើងចាស់ ម៉េត សម្បត្តិ «ជំនាន់ឪពុកល្បីម្ដង ដល់ជំនាន់កូនល្បីម្តងទៀត» appeared first on Kampuchea Thmey Daily.

ក្រុមកីឡាសូហ្វតិន្នីស ទទួលឱកាសពិសេសហ្វឹកហាត់នៅកូរ៉េ ៣សប្ដាហ៍មុនប្រកួតជើងឯកអាស៊ីនៅទីនោះ

Sina Noun — Tue, 24 Jun 2025 05:20:00 +0000

ក្រុមកីឡាករ កីឡាការិនី សូហ្វតិន្នីសកម្ពុជា ចំនួន ៦រូបទទួលបានការអនុញ្ញាតឲ្យទៅហ្វឹកហាត់នៅឯប្រទេសកូរ៉េ ចំនួន ៣សប្ដាហ៍មុនឈានដល់ការប្រកួតជ្រើសរើសជើងឯកអាស៊ី ដែលនឹងធ្វើឡើងនៅទីនោះអំឡុងខែកញ្ញា ឆ្នាំ២០២៥ នេះ។

ក្រុមសូហ្វតិន្នីសហ្វឹកហាត់កន្លងទៅ

លោក យី សារិន គ្រូបង្វឹកជម្រើសជាតិសូហ្វតិន្នីសកម្ពុជា បានប្រាប់ឲ្យដឹងថា ភាគីខាងប្រទេសកូរ៉េបានអនុញ្ញាតឲ្យក្រុមកម្ពុជាទាំង ៦រូបដែលនឹងត្រូវប្រកួតក្នុងកម្មវិធីជើងឯកអាស៊ីបានចេញទៅហ្វឹកហាត់ត្រៀមមុនរយៈពេល ៣សប្ដាហ៍។

គ្រូបង្វឹកជើងចាស់រូបនេះបន្ថែមទៀតថា ចំពោះការហ្វឹកហាត់នៅពេលរំសាយការប្រមូលផ្ដុំគឺកម្ពុជាបានត្រៀមជារៀងរហូតមកហើយគ្រាន់តែបន្ថយការហ្វឹកហាត់បន្តិចប៉ុណ្ណោះ។ ប៉ុន្តែនៅពេលចាប់ផ្ដើមប្រមូលផ្ដុំវិញនេះគឺបានពង្រឹងឡើងវិញបន្ថែមការហ្វឹកហាត់ និងចម្រាញ់គូណាត្រូវលេងជាមួយគូណាទៅលើវិញ្ញាសាអ្វីដើម្បីជាការរៀបចំឆ្ពោះទៅការប្រកួត។

ក្រុមសូហ្វតិន្នីសកន្លងទៅ

កន្លងទៅកម្ពុជាចូលរួមការប្រកួតនេះគឺតែងតែធ្វើបានល្អដូចជាឈ្នះមេដាយមាស ប្រាក់ សំរឹទ្ធ ស្របពេលវិញ្ញាសាថ្មីដែលគេគ្រោងនឹងដាក់ឲ្យប្រកួតនេះក្រុមកីឡាករ កីឡាការិនី សង្ឃឹមខ្ពស់នឹងទទួលបានជោគជ័យជូនប្រទេសជាថ្មី។

លោក យី សារិន

បញ្ជាក់ដែរថា សហព័ន្ធកីឡាសូហ្វតិន្នីសកម្ពុជានឹងចូលរួមប្រកួតប្រជែងកម្មវិធីជ្រើសរើសជើងឯកអាស៊ី នៅឯប្រទេសកូរ៉េខាងត្បូង ចាប់ពីថ្ងៃទី១ ដល់ ១០ ខែកញ្ញា ឆ្នាំ២០២៥។ ដោយឡែកក្រុមកម្ពុជានឹងចេញទៅហ្វឹកហាត់នៅទីនោះមុន៣សប្ដាហ៍នៃការប្រកួតបើកជាផ្លូវការ៕

អត្ថបទដោយ៖ នួន ស៊ីណា

The post ក្រុមកីឡាសូហ្វតិន្នីស ទទួលឱកាសពិសេសហ្វឹកហាត់នៅកូរ៉េ ៣សប្ដាហ៍មុនប្រកួតជើងឯកអាស៊ីនៅទីនោះ appeared first on Kampuchea Thmey Daily.

ស៊ីហ្គេម ឆ្នាំ២០២៣៖ សូហ្វតិន្នីសឈ្នះមេដាយ ៨គ្រឿង ប៉ុន្តែឆ្នាំនេះថៃមិនដាក់ឲ្យប្រកួតទេ

Sina Noun — Wed, 11 Jun 2025 08:33:37 +0000

ជារឿងសោកស្ដាយ និងបាត់បង់កំណើនមេដាយរបស់កម្ពុជាផងដែរដែលប្រភេទកីឡាសូហ្វតិន្នីសត្រូវបានម្ចាស់ផ្ទះថៃមិនដាក់ឲ្យប្រកួតនៅស៊ីហ្គេម លើកទី៣៣ ឆ្នាំ២០២៥ ក្នុងចំណោមទាំង ៥០ប្រភេទកីឡានោះទេ។

ការប្រកួតកន្លងទៅ

គ្រូកីឡាសូហ្វតិន្នីសជើងចាស់លោក យី សារិន ពិតជាសោកស្ដាយជាខ្លាំងដែលម្ចាស់ផ្ទះថៃមិនដាក់ប្រភេទកីឡាមួយនេះឲ្យប្រកួតប្រជែងនៅស៊ីហ្គេម ខែធ្នូ ឆ្នាំ២០២៥ នេះ។ កីឡាមួយនេះជាប្រភេទកីឡាមានសក្ដានុពលមួយរបស់កម្ពុជា និងបានរួមចំណែករកមេដាយបានជាច្រើនគ្រឿនរុញឲ្យកម្ពុជាជាប់ចំណាត់ថ្នាក់ទី៤ នៅស៊ីហ្គេម ឆ្នាំ២០២៣ ដែលធ្វើនៅកម្ពុជាកន្លងទៅ។

ការប្រកួតកន្លងទៅ

លោក យី សារិន បន្ថែមទៀតថា កម្ពុជាគឺសង្ឃឹមខ្ពស់ក្នុងការដណ្ដើមមេដាយបានច្រើនប្រសិនបើភាគីម្ចាស់ផ្ទះថៃដាក់បញ្ជូលកីឡាសូហ្វតេន្នីសនេះ។ ប៉ុន្តែដោយសារបញ្ហាផ្ទៃក្នុងថៃទើបមិនដាក់កីឡាមួយនេះឲ្យលេងលោកពិតជាស្ដាយខ្លាំង ព្រោះកីឡាករ កីឡាការិនីកម្ពុជាពោពេញដោយសមត្ថភាពល្អ។

លោក យី សារិន (ខាងស្ដាំ)

បញ្ជាក់ដែរថា ស៊ីហ្គេម លើកទី៣៣ ឆ្នាំ២០២៥ នៅឯប្រទេសថៃ ដែលមាន ៥០ ប្រភេទកីឡាត្រូវប្រកួតប្រជែងនេះមិនមានប្រភេទកីឡាសូហ្វតិន្នីសនោះទេ។ កាលស៊ីហ្គេម ឆ្នាំ២០២៣ កម្ពុជាជាម្ចាស់ផ្ទះកាលនោះប្រភេទកីឡាសូហ្វតិន្នីសនេះឈ្នះមេដាយសរុប ៨គ្រឿង មាស២ ប្រាក់៤ សំរឹទ្ធ២។ ការឈ្នះមេដាយរបស់សូហ្វតិន្នីសនេះជួយឲ្យប្រទេសកម្ពុជាជាប់ចំណាត់ថ្នាក់លេខ៤ នៅស៊ីហ្គេម លើកទី៣៣ ឆ្នាំ២០២៣៕

អត្ថបទដោយ៖ នួន ស៊ីណា

The post ស៊ីហ្គេម ឆ្នាំ២០២៣៖ សូហ្វតិន្នីសឈ្នះមេដាយ ៨គ្រឿង ប៉ុន្តែឆ្នាំនេះថៃមិនដាក់ឲ្យប្រកួតទេ appeared first on Kampuchea Thmey Daily.

លោក យី សារិន មន្ត្រីបច្ចេកទេស-អាជ្ញាកណ្ដាលមួយចំនួនអាចធ្វើជាអាជ្ញាកណ្ដាលធំគ្រប់គ្រងការប្រកួតបានហើយ

Sina Noun — Sat, 07 Jun 2025 01:00:00 +0000

លោក យី សារិន គ្រូជម្រើសជាតិកីឡាសូហ្វតិន្នីសកម្ពុជា បានឲ្យដឹងថា ក្រោយពីសហព័ន្ធបានរៀបចំវគ្គបណ្ដុះបណ្ដាលមន្ត្រីបច្ចេកទេស អាជ្ញាកណ្ដាល ពីមួយកម្រិតទៅមួយកម្រិតនៅពេលនេះទទួលបានលទ្ធផលជាបណ្ដើរៗហើយ។

លោក យី សារិន

ជាក់ស្ដែងក្រោយបញ្ចប់វគ្គបណ្ដុះបណ្ដាលថ្នាក់ជាតិរយៈពេល៥ថ្ងៃនេះមានសិក្ខាកាមមួយចំនួនអាចឡើងធ្វើជាអាជ្ញាកណ្ដាលធំ ឬហៅថាអាជ្ញាកណ្ដាលលើកៅអីបានហើយ។ ព្រោះកម្រិតនៃការយល់ដឹងច្បាស់ពីតួនាទីក្នុងការប្រកួត យល់ច្បាស់ពីការប្រែប្រួលនៃការប្រកួត និងអនុវត្តន៍លើការកាត់សេចក្ដីបានល្អ។

ទិដ្ឋភាពបិទវគ្គ

ការបណ្ដុះបណ្ដាលមន្ត្រីបច្ចេកទេស អាជ្ញាកណ្ដាល នេះគឺជារឿងសំខាន់របស់សហព័ន្ធដើម្បីបណ្ដុះធនធានឲ្យមានកាត់តែច្រើន និងសំបូរអ្នកមានសមត្ថភាពអាចគ្រប់គ្រងដឹកនាំការប្រកួតផ្សេងៗជាកត្តាជួយជំរុញអភិវឌ្ឍន៍ដល់វិស័យកីឡាសូហ្វតិន្នីសផងដែរ។

លោក សរ សិទ្ធិ និងលោក យី សារិន

បញ្ជាក់ដែរថា សហព័ន្ធកីឡាសូហ្វតិន្នីសកម្ពុជា បានបើកវគ្គបណ្ដុះបណ្ដាលមន្ត្រីបច្ចេកទេស អាជ្ញាកណ្ដាល ថ្នាក់ជាតិ ប្រចាំឆ្នាំ២០២៥ រយៈពេល ៥ថ្ងៃចាប់ពីថ្ងៃទី២ ដល់ ៦ ខែមិថុនា ឆ្នាំ២០២៥ នៅអគារសូហ្វតិន្នីសក្នុងពហុកីឡដ្ឋានជាតិ។ កាលពីរសៀលថ្ងៃទី៦ ម្សិលមិញនេះសហព័ន្ធបានបិទបញ្ចប់វគ្គបណ្ដុះបណ្ដាលនេះហើយក្រោមអធិបតីភាពលោក សរ សិទ្ធិ ប្រធានសហព័ន្ធ លោក យិត ភីរៈ អគ្គលេខាធិការ រួមទាំងគ្រូបង្វឹក សិក្ខាកាមជាច្រើនផងដែរ៕

អត្ថបទដោយ៖ នួន ស៊ីណា

The post លោក យី សារិន មន្ត្រីបច្ចេកទេស-អាជ្ញាកណ្ដាលមួយចំនួនអាចធ្វើជាអាជ្ញាកណ្ដាលធំគ្រប់គ្រងការប្រកួតបានហើយ appeared first on Kampuchea Thmey Daily.

កីឡាសូហ្វតិន្នីស Archives - Kampuchea Thmey Daily

លោក ម៉េត​ សម្បត្តិ មោទកភាព​ចំពោះ​កូនៗដែលអាច​​ឈ្នះ​មេដាយ​ ១០​គ្រឿង​ជូន​ប្រទេស​កម្ពុជាកាលស៊ីហ្គេម​ ២០២៣​

មកស្គាល់គ្រូកីឡាជើងចាស់ ម៉េត សម្បត្តិ «ជំនាន់ឪពុកល្បីម្ដង ដល់ជំនាន់កូនល្បីម្តងទៀត»

ស៊ីហ្គេម​ ​ឆ្នាំ​​២០២៣៖​ សូហ្វតិន្នីស​ឈ្នះ​មេដាយ​ ៨គ្រឿង​ ប៉ុន្តែ​ឆ្នាំ​នេះ​ថៃ​មិន​ដាក់​ឲ្យ​ប្រកួត​ទេ​

លោក ម៉េត សម្បត្តិ មោទកភាពចំពោះកូនៗដែលអាចឈ្នះមេដាយ ១០គ្រឿងជូនប្រទេសកម្ពុជាកាលស៊ីហ្គេម ២០២៣

ស៊ីហ្គេម ឆ្នាំ២០២៣៖ សូហ្វតិន្នីសឈ្នះមេដាយ ៨គ្រឿង ប៉ុន្តែឆ្នាំនេះថៃមិនដាក់ឲ្យប្រកួតទេ