កោះរ៉ុង Archives - Kampuchea Thmey Daily

លោក សាយ សំអាល់ ជំរុញឲ្យបង្កើនល្បឿនអ៊ីនធឺណិតបន្ថែម ខណៈកោះរ៉ុងក្លាយជាគោលដៅទេសចរដ៏ល្បីមួយរបស់ពិភពលោក

Dy Bunnara — Sat, 08 Nov 2025 07:16:20 +0000

កោះរ៉ុងរំពឹងក្លាយជាគោលដៅទេសចរណ៍កំពូលមួយលើពិភពលោក ខណៈមានការអភិវឌ្ឍន៍ទាក់ទាញទេសចរចម្រុះជាតិសាសន៍មកសម្រាកលំហែ។

ដោយសារមើលឃើញពីកំណើនទេសចរមកកម្សាន្តនៅកោះឋានសួគ៌នេះ រួមទាំងតម្រូវការប្រើប្រាស់បច្ចេកវិទ្យាជាចាំបាច់នោះ លោក សាយ សំអាល់ ជំរុញឲ្យបង្កើនល្បឿនអ៊ីនធឺណិតនៅលើកោះ ដើម្បីបង្កើនការទំនាក់ទំនងឲ្យកាន់តែប្រសើរថែមទៀត។

ថ្លែងនៅក្នុងពិធីបញ្ចុះបឋមសិលាបើកការដ្ឋានសាងសង់អគារសណ្ឋាគារកម្ពស់ ១១ ជាន់នៅលើកោះទេសចរណ៍កោះរ៉ុងកាលពីថ្ងៃ ២៧ តុលាឆ្នាំ ២០២៥ លោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់បានបញ្ជាក់ថា ក្រោយលោកបានធ្វើដំណើរមកទស្សនកិច្ចនៅកោះរ៉ុងជាច្រើនដង លោកមើលឃើញសក្ដានុពលនៃកោះឋានសួគ៌នេះ ដែលថ្ងៃខាងមុខនឹងក្លាយជាគោលដៅទេសចរកម្រិតខ្ពស់ ខណៈបច្ចុប្បន្នមានការអភិវឌ្ឍ មានការសាងសង់ហេដ្ឋារចនាសម្ព័ន្ធគាំទ្រយ៉ាងច្រើនសម្រាប់បម្រើដល់វិស័យទេសចរណ៍។

«ឥឡូវនេះយើងឃើញមានអ្នកធ្វើការផ្នែកបច្ចេកវិទ្យាធំៗមកកោះរ៉ុង ក្រៅពីមកដើម្បីសម្រាកលំហែ អ្នកខ្លះមានភ្ជាប់មកជាមួយកុំព្យូទ័រដើម្បីធ្វើកិច្ចការងារផ្សេងៗទៀត»។ លោករដ្ឋមន្ត្រីបន្ថែម។

ដើម្បីគាំទ្រដល់ការអភិវឌ្ឍកោះរ៉ុងប្រែក្លាយគោលដៅទេសចរណ៍ប្រណិត លោកសាយ សំអាល់ នឹងជួបជជែកពិភាក្សាជាមួយលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដើម្បីជំរុញបង្កើនល្បឿនអ៊ីនធឺណិតឲ្យលឿនជាងមុន ឬក៏ត្រូវអូសខ្សែកាបក្រោមបាតសមុទ្រ ដើម្បីសម្រួលដល់ការបំពេញការងាររបស់ទេសចរធុរកិច្ចបច្ចេកវិទ្យាធំៗ។

កោះរ៉ុងបានក្លាយជាគោលដៅទេសចរសម្រាកលំហែកម្រិតខ្ពស់ ក្រោយកោះឋានសួគ៌នេះមានការអភិវឌ្ឍទៅជាគោលដៅទេសចរណ៍ដ៏ល្បីល្បាញមួយនៅក្នុងខេត្តតំបន់ឆ្នេររបស់ប្រទេសកម្ពុជា។

កោះឋានសួគ៌នេះមានឆ្នេរខ្សាច់ដ៏ស្រស់ស្អាត រួមទាំងមានបរិយាកាសធម្មជាតិដ៏ស្រស់ត្រកាលទាក់ទាញទេសចរមកសម្រាកលំហែ។

កាលពីពេលថ្មីៗនេះ អគារសណ្ឋាគារដ៏ប្រណីតដែលមានកម្ពស់ ១១ ជាន់ បានបើកការដ្ឋានសាងសង់នៅលើកោះរ៉ុង ដែលគ្រោងបញ្ចប់ការសាងសង់នៅប្រមាណ ២ ឆ្នាំទៀតនេះ។

លោកស្រី IWONA MAGDA KMIECIK នាយិកាប្រតិបត្តិក្រុមហ៊ុន M.B.I.S Development បានបញ្ជាក់ថា គម្រោងសាងសង់អគារពហុមុខងារ និងសណ្ឋាគារដ៏ប្រណិត Port Yves Palace កម្ពស់ ១១ ជាន់នេះ តាមផែនការគ្រោងបញ្ចប់ការសាងសង់នៅអំឡុងឆ្នាំ ២០២៧ ខាងមុខ។

លោកស្រីបញ្ជាក់ថា គម្រោងវិនិយោគនេះមិនមែនជាចេតនាបង្ហាញពីអំណាចនោះទេ ប៉ុន្តែចង់បង្ហាញអំពីតុល្យភាពនិងភាពសុខដុមរមនាចុះសម្រុងជាមួយពិភពលោកជុំវិញខ្លួន។ តាមរយៈគម្រោង Port Yves Palace ក៏នឹងទាក់ទាញភ្ញៀវទេសចរមកកម្ពុជាកាន់តែច្រើន បង្កើតអនុស្សាវរីយ៍ល្អៗសម្រាប់ភ្ញៀវទេសចរជាតិ និងអន្តរជាតិ។ បន្ថែមពីនេះ គម្រោងនេះនឹងនាំមកនូវជីវិតថ្មីដល់កោះនេះ រួមទាំងកសាងស្ពានវប្បធម៌ ស្ពានយោគយល់ និងគោរពគ្នាទៅវិញទៅមក៕

The post លោក សាយ សំអាល់ ជំរុញឲ្យបង្កើនល្បឿនអ៊ីនធឺណិតបន្ថែម ខណៈកោះរ៉ុងក្លាយជាគោលដៅទេសចរដ៏ល្បីមួយរបស់ពិភពលោក appeared first on Kampuchea Thmey Daily.

កោះរ៉ុងកាន់តែអភិវឌ្ឍ អនាគតជាគោលដៅសម្រាកលំហែកាយអ្នកជំនួញបច្ចេកវិទ្យាធំៗ

Dy Bunnara — Fri, 07 Nov 2025 02:49:31 +0000

កោះរ៉ុងរំពឹងនឹងក្លាយជាគោលដៅទេសចរសម្រាកលំហែកម្រិតខ្ពស់ ក្រោយកោះឋានសួគ៌នេះមានការអភិវឌ្ឍផ្លាស់ប្តូរពីភូមិនេសាទ ទៅជាគោលដៅទេសចរណ៍ដ៏ល្បីល្បាញមួយនៅក្នុងខេត្តតំបន់ឆ្នេររបស់ប្រទេសកម្ពុជា។

លោក សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានថ្លែងថា ប្រទេសកម្ពុជាមានកន្លែងដើរលេងប្រមាណ ៣០០ កន្លែង។ ដោយឡែកកោះរ៉ុងនៅក្នុងខេត្តព្រះសីហនុមានលក្ខណៈពិសេស ដែលបានទាក់ទាញទេសចរចម្រុះជាតិសាសន៍មកពីជុំវិញពិភពលោក ដោយសារកោះនេះមានឆ្នេរខ្សាច់ដ៏ស្រស់ស្អាត រួមទាំងមានបរិយាកាសធម្មជាតិដ៏ស្រស់ត្រកាលទាក់ទាញទេសចរមកសម្រាកលំហែ។

ថ្លែងនៅក្នុងពិធីបញ្ចុះបឋមសីលា បើកការដ្ឋានសាងសង់អគារសណ្ឋាគារកម្ពស់ ១១ ជាន់នៅលើកោះទេសចរណ៍កោះរ៉ុងកាលពីថ្ងៃ ២៨ តុលាឆ្នាំ ២០២៥ លោក សាយ សំអាល់ បានអះអាងថា ក្រោយពេលលោកបានធ្វើដំណើរមកទស្សនកិច្ចកោះរ៉ុងជាច្រើនដង លោកមើលឃើញសក្ដានុពលនៃកោះឋានសួគ៌នេះ ដែលថ្ងៃខាងមុខនឹងក្លាយជាគោលដៅទេសចរកម្រិតខ្ពស់ ខណៈបច្ចុប្បន្នមានការអភិវឌ្ឍ មានការសាងសង់ហេដ្ឋារចនាសម្ព័ន្ធគាំទ្រយ៉ាងច្រើនសម្រាប់បម្រើដល់វិស័យទេសចរណ៍។

«ឥឡូវនេះយើងឃើញមានអ្នកធ្វើការផ្នែកបច្ចេកវិទ្យាធំៗមកកោះរ៉ុង ក្រៅពីមកដើម្បីសម្រាកលំហែ អ្នកខ្លះមកមានទាំងកាន់កុំព្យូទ័រដើម្បីមកធ្វើកិច្ចការងារផ្សេងៗ»។ លោករដ្ឋមន្រ្តីបន្ថែម។

ដើម្បីគាំទ្រដល់ការអភិវឌ្ឍកោះរ៉ុងប្រែក្លាយគោលដៅទេសចរណ៍ប្រណិត លោកសាយ សំអាល់ បានគូសបញ្ជាក់ថា លោកនឹងជជែកពិភាក្សាជាមួយលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដើម្បីជំរុញបង្កើនល្បឿនស់អ៊ីនធឺណិត ឬត្រូវអូសខ្សែកាបក្រោមបាតសមុទ្រដើម្បីសម្រួលដល់ការបំពេញការងាររបស់ទេសចរធុរកិច្ចធំៗ។

លោកស្រី IWONA MAGDA KMIECIK វិនិយោគិនមួយរូបបានប្រដូចកោះរ៉ុងទៅនឹងកោះឋានសួគ៌ ដែលពិបាករកនៅកន្លែងណាផ្សេងអាចប្រដូចបាន។

លោកស្រី IWONA MAGDA KMIECIK ដែលមានសញ្ជាតិដើមប៉ូឡូញ និងទើបទទួលបានសញ្ជាតិកម្ពុជាផងនោះ កាលពីពេលថ្មីៗនេះបានបើកការដ្ឋានសាងសង់អគារពហុមុខងារ និងសណ្ឋាគារដ៏ប្រណីតនៅលើកោះរ៉ុង ដើម្បីផ្តល់សេវាកម្មស្នាក់នៅសម្រាប់ទេសចរកម្រិតខ្ពស់។

លោកស្រី IWONA MAGDA KMIECIK ដែលជាម្ចាស់រមណីយដ្ឋាន Apsara Resort លើកោះរ៉ុងផងនោះបានបញ្ជាក់ថា អគារស្នាក់នៅដ៏ប្រណិតកម្ពស់ ១១ នេះ នឹងលេចរូបរាងនៅលើកោះឋានសួគ៌កោះរ៉ុងនៅប៉ុន្មានឆ្នាំទៀតនេះ ខណៈតាមផែនការគ្រោងបញ្ចប់ការសាងសង់នៅអំឡុងឆ្នាំ ២០២៧៕

បន្តចុចអាន៖ ទៅលេងកោះរ៉ុង កោះរ៉ុងសន្លឹម កុំភ្លេចឆែកមើលកន្លែងស្នាក់នៅទាំងនេះ

បន្តចុចអាន៖ មកកម្សាន្តកោះរ៉ុង ចាយស្នាក់នៅ ហូបចុក ធ្វើដំណើរ មួយយប់យ៉ាងហោចណាស់ម្នាក់ ១៥០ ដុល្លារ

The post កោះរ៉ុងកាន់តែអភិវឌ្ឍ អនាគតជាគោលដៅសម្រាកលំហែកាយអ្នកជំនួញបច្ចេកវិទ្យាធំៗ appeared first on Kampuchea Thmey Daily.

លោក សាយ សំអាល់ ជំរុញរៀបចំផែនការដាំដុះបន្លែនៅនឹងកន្លែង ផ្គត់ផ្គង់ទេសចរលើកោះរ៉ុង

Dy Bunnara — Thu, 30 Oct 2025 04:54:54 +0000

លោក សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានជំរុញអាជ្ញាធរគិតគូរលើការរៀបចំផែនការពង្រីកការដាំដុះបន្លែ និងការចិញ្ចឹមសត្វដើម្បីផ្គត់ផ្គង់ដល់ទេសចរ និងពលរដ្ឋរស់នៅលើកោះរ៉ុង បញ្ចៀសការចំណាយថវិកាច្រើនលើការដឹកជញ្ជូនបន្លែសាច់ផ្គត់ផ្គង់ពីដីគោក។

លើកឡើងក្នុងពិធីបញ្ចុះបឋមសីលា បើកការដ្ឋានសាងសង់អគារសណ្ឋាគារកម្ពស់ ១១ ជាន់នៅលើកោះទេសចរណ៍កោះរ៉ុងកាលពីថ្ងៃ ២៨ តុលាឆ្នាំ ២០២៥ លោក សាយ សំអាល់ បានបញ្ជាក់ថា ការរៀបចំផែនការនេះគឺដើម្បីពិនិត្យលទ្ធភាពដំណាំណាអាចដាំដុះបាន ហើយដំណាំណាដែលចាំបាច់បំផុតដែលត្រូវដឹកពីដីគោក។

«សូម្បីតែដូងបើអាចគួរដាំឲ្យបានច្រើននៅលើកោះ ដែលជាតម្រូវការរបស់ភ្ញៀវទេសចរមកកម្សាន្ត។ យើងត្រូវមានរបស់ហូប របស់ប្រើប្រាស់បរិបូណ៌ ដែលចាំបាច់ត្រូវមានការរៀបចំឲ្យបានលម្អិត។ លោក សាយ សំអាល់ បញ្ជាក់បន្ថែម។

ក្រៅពីដាំដុះបន្លែបង្ការដើម្បីផ្គត់ផ្គង់ លោករដ្ឋមន្រ្តីក៏ជំរុញឲ្យមានការចិញ្ចឹមសត្វថែមទៀត។ លោក សាយ សំអាល់បានបញ្ជាក់ថា បើត្រូវការជំនួយ ក្រសួងនឹងផ្តល់ការគាំទ្រតាមលទ្ធភាពនិងភាពជាក់ស្តែង។

រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏កត់សម្គាល់ពីវប្បធម៌ចេះជួយគ្នារបស់ពលរដ្ឋនៅកោះរ៉ុង។ បើតាមលោករដ្ឋមន្រ្តី អ្នកមកកម្សាន្តកោះនេះមិនមែនមកផ្សងព្រេងនោះទេ គឺមកស្វែងរកជីវិតថ្មី។

សក្ដានុពលកោះរ៉ុងមិនត្រឹមតែជាគោលដៅទេសចររយៈពេលខ្លី បច្ចុប្បន្នក៏ឃើញមានអ្នកជំនួយធំៗដែលមកស្នាក់នៅរយៈពេលយូរ ហើយមានការវិនិយោគផ្សេងៗ។

លោកសាយ សំអាល់ ណែនាំដល់អាជ្ញាធរក៏គួររៀបចំចាប់យកសក្តានុពលតាមសហគមន៍ដូចជា ការកែច្នៃម្ហូបអាហារផ្សេងៗ ដើម្បីទាក់ទាញសម្រាប់ភ្ញៀវមកកម្សាន្ត។

ពាក់ព័ន្ធការជំរុញការដាំដុះបន្លែនិងការផ្គត់ផ្គង់ត្រីសាច់នៅលើកោះរ៉ុង លោក រាជ សុវណ្ណ អភិបាលក្រុងកោះរ៉ុងបានឲ្យកម្ពុជាថ្មីថា បច្ចុប្បន្ននៅលើកោះមិនទាន់មានដាំដុះបន្លែធំដុំទេ គឺពលរដ្ឋដាំដុះបន្លែបន្តិចបន្តួច ដើម្បីផ្គត់ផ្គង់ការរស់នៅប្រចាំថ្ងៃ រួមទាំងបម្រើមួយផ្នែកដល់វិស័យទេសចរ។ លោកបានលើកឡើងមូលហេតុគឺមកពីបញ្ហាដីធ្លីមិនទាន់ដោះស្រាយដាច់ស្រេចពាក់ព័ន្ធជាមួយក្រុមហ៊ុនវិនិយោគ ខណៈអាជ្ញាធរកំពុងជំរុញការដោះស្រាយបញ្ចប់ឲ្យបានឆាប់។

កោះរ៉ុងបានប្រែក្លាយជាគោលដៅទេសចរណ៍ដ៏ទាក់ទាញ និងត្រូវបានគេប្រដូចកោះម៉ាល់ឌីវ ហើយដែលទេសចរមកលេងខេត្តព្រះសីហនុ មិនអាចរំលងមកសម្រាកលំហែនៅលើកោះឋានសួគ៌នេះ។

ក្រុងកោះរ៉ុងមានភូមិសាស្រ្តគ្របដណ្តប់លើកោះតូចធំចំនួន ១៨ ហើយបច្ចុប្បន្នមានពលរដ្ឋប្រមាណ ១ ៣៥១ គ្រួសាររស់នៅកកកុញលើកោះធំៗចំនួនពីរគឺកោះរ៉ុង និងកោះរ៉ុងសន្លឹម។

ដោយឡែកកោះរ៉ុងដែលជាទីប្រជុំជនមានពលរដ្ឋរស់នៅយ៉ាងច្រើនកុះករ ហើយជាគោលដៅទេសចរណ៍ចម្រុះជាតិសាសសន៍មកកម្សាន្ត ខណៈនៅប៉ុន្មានឆ្នាំចុងក្រោយនេះមានការអភិវឌ្ឍហេដ្ឋារចនាសម្ព័ន្ធ ដោយមានសាងសង់បណ្ដាញផ្លូវបេតុងខ្វាត់ខ្វែង ខណៈប្រព័ន្ធភ្លើងអគ្គិសនីរបស់រដ្ឋត្រូវបានតភ្ជាប់អាចប្រើប្រាស់ ២៤/២៤ ម៉ោង។ នៅលើកោះមានសំណង់រីសត ផ្ទះសំណាក់តូចធំ ដែលតម្លៃមានចាប់ពី ១៥ ដុល្លារ អាចដល់រាប់រយ ឬរាប់ពាន់ដុល្លារក្នុងមួយយប់។

វឌ្ឍនភាពថ្មីមួយទៀត ក្រុមហ៊ុនឯកជនក្នុងស្រុកមួយក៏កំពុងអភិវឌ្ឍអាកាសយានដ្ឋាននៅលើកោះ ដែលនឹងបង្កើតបណ្តាញតភ្ជាប់សម្រួលការធ្វើដំណើរសម្រាប់ភ្ញៀវទេសចរពីគ្រប់គោលដៅមកកម្សាន្តនៅលើកោះរ៉ុងកាន់តែងាយស្រួល៕

The post លោក សាយ សំអាល់ ជំរុញរៀបចំផែនការដាំដុះបន្លែនៅនឹងកន្លែង ផ្គត់ផ្គង់ទេសចរលើកោះរ៉ុង appeared first on Kampuchea Thmey Daily.

លោក ឡុង ឌីម៉ង់ ប្រៀបធៀបសក្ដានុពលទេសចរណ៍កោះបាលីប្រទេសឥណ្ឌូណេស៊ី និងកោះរ៉ុងខេត្តព្រះសីហនុ

Dy Bunnara — Thu, 26 Dec 2024 02:30:05 +0000

លោក ឡុង ឌីម៉ង់ អភិបាលរងខេត្តព្រះសីហនុ បានលើកពីសក្ដានុពលទេសចរណ៍នៃកោះបាលីប្រទេសឥណ្ឌូណេស៊ី និងកោះរ៉ុងនៅខេត្តព្រះសីហនុ ដោយលោកប្រៀបធៀបថា កោះរ៉ុងមានធនធានសំបូរបែបប៉ុន្តែខ្វះការកែច្នៃ ខណៈដែលកោះបាលីមានការរៀបចំហេដ្ឋារចនាសម្ព័ន្ធល្អប្រសើរជាង បើទោះបីកោះទេសចរណ៍ដ៏ល្បីនេះ មិនសូវសំបូរធនធានធម្មជាតិដូចកោះរ៉ុងក៏ដោយ។

ក្នុងដំណើរនាំអ្នកសារព័ត៌មានជាង ៣០ ស្ថាប័ន ចុះទៅទស្សនកិច្ចនៅកោះរ៉ុងកាលពីសប្ដាហ៍មុននេះ លោក ឡុង ឌីម៉ង់បានប្រៀបធៀបសម្រស់កោះទាំងពីរនេះ ដោយលោកនៅតែពេញចិត្តសម្រស់ធម្មជាតិរបស់កោះរ៉ុង ខណៈលោកទទួលស្គាល់ថា កោះបាលីមានការអភិវឌ្ឍលើហេដ្ឋារចនាសម្ព័ន្ធគាំទ្រលើវិស័យទេសចរណ៍ ដែលមានរីសតធំៗកម្រិតពិភពលោកបានបោះទីតាំងវិនិយោគដែលជាផ្នែកមួយបានទាក់ទាញទេសចរទៅកម្សាន្ត៕

The post លោក ឡុង ឌីម៉ង់ ប្រៀបធៀបសក្ដានុពលទេសចរណ៍កោះបាលីប្រទេសឥណ្ឌូណេស៊ី និងកោះរ៉ុងខេត្តព្រះសីហនុ appeared first on Kampuchea Thmey Daily.

កោះរ៉ុងប្រែក្លាយពីភូមិនេសាទ ក្លាយជាកោះឋានសួគ៌ក្នុងខេត្តព្រះសីហនុ

Dy Bunnara — Tue, 24 Dec 2024 04:24:27 +0000

កាលពីសប្តាហ៍មុនេះ ក្រុមអ្នកសារព័ត៌មានចំនួន ៣០ ស្ថាប័ន ដែលដឹកនាំដោយក្លិបអ្នកកាសែតកម្ពុជា បានចំណាយពេលពេញមួយថ្ងៃសម្រាប់ដំណើរទៅកម្សាន្តនៅកោះរ៉ុងក្នុងខេត្តព្រះសីហនុ។

កោះរ៉ុង ដែលពីមុនគ្រាន់តែជាទីសំចតរបស់អ្នកនេសាទ បានកែប្រែមុខមាត់ក្លាយជាកោះឋានសួគ៌សម្រាប់ភ្ញៀវទេសចរ។

នៅលើកោះមានការអភិវឌ្ឍហេដ្ឋារចនាសម្ព័ន្ធ មានបណ្ដាញផ្លូវបេតុងស្ថាបនាឡើងខ្វាត់ខ្វែង ខណៈប្រព័ន្ធភ្លើងអគ្គិសនីរបស់រដ្ឋត្រូវបានតភ្ជាប់អាចប្រើប្រាស់ ២៤/២៤ ម៉ោង សម្រួលដល់ការរស់នៅរបស់ពលរដ្ឋជាង ១ ៣០០ គ្រួសារនៅលើកោះ។

នៅលើកោះមានការសាងសង់រីសត ផ្ទះសំណាក់តូចធំ ដែលតម្លៃមានចាប់ពី ១៥ ដុល្លារ អាចដល់រាប់រយ ឬរាប់ពាន់ដុល្លារក្នុងមួយយប់។

វឌ្ឋនភាពថ្មីមួយទៀត ក្រុមហ៊ុនឯកជនក្នុងស្រុកមួយក៏កំពុងអភិវឌ្ឍអាកាសយានដ្ឋាននៅលើកោះ ដែលនឹងបង្កើតបណ្តាញតភ្ជាប់សម្រួលការធ្វើដំណើរសម្រាប់ភ្ញៀវទេសចរពីគ្រប់គោលដៅធ្វើដំណើរមកកម្សាន្តនៅលើកោះរ៉ុងកាន់តែងាយស្រួល។

ក្នុងដំណើរបេសកកម្មចុះទៅកោះរ៉ុង ក្រុមអ្នកសារព័ត៌មានក៏មានឱកាសបានដើរទស្សនាពីភូមិមួយទៅភូមិ ដោយបានមើលឃើញពីការអភិវឌ្ឍន៍និងជីវភាពរស់នៅរបស់ពលរដ្ឋមានការផ្លាស់ប្តូរច្រើន ខណៈពលរដ្ឋជាង ៨០% នៅលើកោះផ្លាស់ប្តូរមុខរបរពីអ្នកនេសាទ ដោយពឹងអាស្រ័យលើវិស័យទេសចរណ៍។

ក្នុងការផ្តល់បទសម្ភាសន៍ជាង ១៥ នាទី លោក នួន ប៊ុនថុល អភិបាលក្រុងកោះរ៉ុងបានបង្ហាញពីភូមិសាស្រ្តរួមជាមួយសក្តានុពលជាច្រើន ដែលធ្វើឲ្យកោះរ៉ុងបានប្រែក្លាយជាគោលដៅទេសចរណ៍ដ៏ទាក់ទាញ និងត្រូវបានគេប្រដូចកោះម៉ាល់ឌីវ ហើយដែលទេសចរដែលមកកម្សាន្តក្នុងខេត្តព្រះសីហនុមិនអាចរំលេងបាន សម្រាប់ការចំណាយពេលមកកម្សាន្តនៅកោះឋានសួគ៌នេះ៕

The post កោះរ៉ុងប្រែក្លាយពីភូមិនេសាទ ក្លាយជាកោះឋានសួគ៌ក្នុងខេត្តព្រះសីហនុ appeared first on Kampuchea Thmey Daily.

រាល់គម្រោងវិនិយោគតាមបណ្តាកោះក្នុងខេត្តព្រះសីហនុ បើគ្មានសកម្មភាពអភិវឌ្ឍ រដ្ឋនឹងសើរើដកហូតវិញ

Dy Bunnara — Mon, 23 Dec 2024 08:13:24 +0000

រាល់គម្រោងវិនិយោគនៅតាមបណ្តាកោះក្នុងដែនសមុទ្រខេត្តព្រះសីហនុ ដែលក្រុមហ៊ុនឯកជនទទួលសិទ្ធិវិនិយោគពីរដ្ឋាភិបាល បើគ្មានសកម្មភាពអភិវឌ្ឍទេនឹងប្រឈមការពិនិត្យសើរើដកហូតមកវិញ។ នេះបើតាមការគូសបញ្ជាក់ពីលោក ឡុង ឌីម៉ង់ អភិបាលរងខេត្តព្រះសីហនុ ក្នុងឱកាសដែលលោករួមជាមួយអ្នកសារព័ត៌មានជាង ៣០ ស្ថាប័ន ទៅទស្សនានៅក្រុងកោះរ៉ុងក្នុងខេត្តព្រះសីហនុកាលពីសប្តាហ៍មុននេះ។

ផ្តល់បទសម្ភាសន៍ដល់ក្រុមអ្នកសារព័ត៌មាននៅលើកោះរ៉ុង លោក ឡុង ឌីម៉ង់ បានបញ្ជាក់ថា នៅតាមបណ្តាកោះមួយចំនួនក្នុងខេត្តព្រះសីហនុ រដ្ឋាភិបាលបានផ្តល់សិទ្ធិដល់ក្រុមហ៊ុនឯកជនដើម្បីវិនិយោគអភិវឌ្ឍជាគោលដៅទេសចរណ៍។ យ៉ាងណាមិញ ការផ្តល់សិទ្ធិវិនិយោគនេះត្រូវតែមានការអភិវឌ្ឍ ហើយបើគ្មានសកម្មភាពអភិវឌ្ឍអីទេ រដ្ឋាភិបាលនឹងពិចារណាដកហូតយកមកគ្រប់គ្រងវិញ។

ខេត្តព្រះសីហនុមានកោះសរុបចំនួន ៣០ ថ្មដុះចំនួន ០២ និងថ្មប៉ប្រះទឹកចំនួន ០៥។ ក្នុងចំណោមកោះនៅក្រោមការគ្រប់គ្រងរបស់រដ្ឋបាលខេត្តព្រះសីហនុ មានកោះចំនួន ១៩ ដែលរាជរដ្ឋាភិបាលផ្តល់គោលការណ៍វិនិយោគដល់ក្រុមហ៊ុនឯកជនចំនួន ២៤ ក្រុមហ៊ុន។

ក្នុងនោះក៏មានកោះចំនួន ៥ កំពុងអភិវឌ្ឍនិងដំណើរការអាជីវកម្ម ក្នុងនោះមានកោះសង្សារ (កោះអូនកោះបង) កោះក្របី កោះតាកៀវ កោះឬស្សី និងកោះរ៉ុង៕

The post រាល់គម្រោងវិនិយោគតាមបណ្តាកោះក្នុងខេត្តព្រះសីហនុ បើគ្មានសកម្មភាពអភិវឌ្ឍ រដ្ឋនឹងសើរើដកហូតវិញ appeared first on Kampuchea Thmey Daily.

មកកម្សាន្តកោះរ៉ុង ចាយស្នាក់នៅ ហូបចុក ធ្វើដំណើរ មួយយប់យ៉ាងហោចណាស់ម្នាក់ ១៥០ ដុល្លារ

Dy Bunnara — Sat, 21 Dec 2024 04:02:27 +0000

បើតាមអភិបាលក្រុងកោះរ៉ុងបានបង្ហើបឲ្យដឹងថា ទេសចរដែលមកកម្សាន្តមកកោះរ៉ុងត្រូវចំណាយយ៉ាងហោចណាស់ម្នាក់ ១៥០ ដុល្លារ សម្រាប់ការស្នាក់នៅ ហូបចុក និងការធ្វើដំណើរ។

លោក នួន ប៊ុនថុល អភិបាលក្រុងកោះរ៉ុងបានគូសបញ្ជាក់ថា កោះរ៉ុងបានក្លាយជាដែកឆក់ដែលទេសចរចម្រុះជាតិសាសន៍តែងតែជ្រើសរើសជាគោលដៅទៅកកម្សាន្ត ពេលមកលេងនៅខេត្តព្រះសីហនុ។

លោកលើកឡើងពីសក្ដានុពលទេសចរណ៍កោះឋានសួគ៌នេះ ដែលមានឆ្នេរខ្សាច់សដ៏ស្រស់ស្អាត ខណៈលោកទទួលស្គាល់ថា ភ្ញៀវទេសចរដែលមកកម្សាន្តដែនកោះឋានសួគ៌នេះត្រូវចំណាយថ្លៃបន្តិច ដោយភ្ញៀវទេសចរម្នាក់ត្រូវចាយលើការស្នាក់នៅ ហូបចុក និងការធ្វើដំណើរមួយយប់យ៉ាងហោចណាស់ត្រូវចំណាយអស់ ១៥០ ដុល្លារ។

កោះរ៉ុងត្រូវបានរដ្ឋាភិបាលបានរៀបចំបង្កើតជាក្រុងដោយមានពីរសង្កាត់គឺសង្កាត់កោះរ៉ុង និងសង្កាត់កោះរ៉ុងសន្លឹម។ ធ្លាប់ជាទីសំចតរបស់អ្នកនេសាទ បច្ចុប្បន្នកោះរ៉ុងបានប្រែក្លាយជាកោះឋានសួគ៌ដ៏ទាក់ទាញទាំងទេសចរជាតិនិងអន្តរជាតិទៅកម្សាន្ត ខណៈហេដ្ឋារចនាសម្ព័ន្ធត្រូវបានអភិវឌ្ឍទាំងផ្លូវទឹកភ្លើង សម្រាប់សម្រួលការរស់នៅរបស់ប្រជាជននិងភ្ញៀវទេសចរ។

បច្ចុប្បន្ននេះក្រុមហ៊ុនរ៉ូយ៉ាល់គ្រុប ក៏កំពុងអភិវឌ្ឍអាកាសយានដ្ឋាននៅលើកោះ ដែលនឹងសម្រួលដល់ការធ្វើដំណើរនិងបង្កើតបណ្តាញតភ្ជាប់ទៅគោលដៅទេសចរណ៍ផ្សេងទៀត៕

The post មកកម្សាន្តកោះរ៉ុង ចាយស្នាក់នៅ ហូបចុក ធ្វើដំណើរ មួយយប់យ៉ាងហោចណាស់ម្នាក់ ១៥០ ដុល្លារ appeared first on Kampuchea Thmey Daily.

ក្រុមហ៊ុនចាប់ផ្តើមឈូសឆាយសម្អាតដីមួយផ្នែកនៅទីតាំងសង់ព្រលានយន្តហោះអន្តរជាតិលើកោះរ៉ុង

Sophal Tuon — Thu, 18 Jan 2024 07:10:20 +0000

ក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង បានធ្វើការឈូសឆាយសម្អាតដីមួយចំនួនហើយ ដើម្បីសាងសង់អាកាសយានដ្ឋានអន្តរជាតិកោះរ៉ុង នៅលើតំបន់អភិវឌ្ឍន៍កោះរ៉ុង ក្រុងកោះរ៉ុង ខេត្តព្រះសីហនុ។ នេះបើតាមការបញ្ជាក់របស់លោក ស៊ីន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិលកម្ពុជា។

លោក ស៊ីន ចាន់សេរីវុត្ថា បានបញ្ជាក់ថា បច្ចុប្បន្ននេះ ក្រុមហ៊ុនបាននិងកំពុងសម្អាត បង្ហាប់ ពង្រាបដីឱ្យរាបស្មើ និងជីកដីស្អុយចេញធ្វើទៅតាមបច្ចេកទេសរបស់ជំនាញ។ ជាមួយគ្នានេះក្រុមហ៊ុនក៏បន្តដោះស្រាយផលប៉ះពាល់ដែលនៅសេសសល់ផងដែរ ដើម្បីពន្លឿនគម្រោងនេះ។

រដ្ឋលេខាធិការដ្ឋានអាកាសចរណ៍ស៊ីវិលកម្ពុជា និងក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡុបមេន ខមភេនី បានរៀបចំពិធីចុះហត្ថលេខាលើអនុស្សរណៈនៃកិច្ចព្រមព្រៀង និងអនុម័តប្លង់មេសាងសង់អាកាសយានដ្ឋានអន្តរ ជាតិកោះរ៉ុង នៅលើតំបន់អភិវឌ្ឍន៌កោះរ៉ុង ក្រុងកោះរ៉ុង ខេត្តព្រះសីហនុ កាលពីខែ មករា ឆ្នាំ ២០២៣។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានលើកឡើងតាមរយៈសុន្ទរកថាកន្លងមកថា ការចូលរួមក្នុងភាពជាដៃគូពីក្រុមហ៊ុន Royal Group បានបង្ហាញពីសញ្ញាវិជ្ជមានមួយ សម្រាប់ជំរុញឱ្យមានកំណើន និងការទ្រទ្រង់ចីរភាពនៃកំណើនសេដ្ឋកិច្ចកម្ពុជាសម្រាប់រយៈពេលវែង ជាពិសេសបង្កើនសមត្ថភាពប្រកួតប្រជែងក្នុងការដឹកជញ្ជូនអ្នកដំណើរ និងទំនិញក្នុងស្រុក-ក្រៅស្រុក តាមផ្លូវអាកាសរបស់កម្ពុជា ក្នុងបរិការណ៍នៃសមាហរណកម្មសេដ្ឋកិច្ច តំបន់ និងពិភពលោក។

លោកបណ្ឌិត បានបន្តថា អាកាសយានដ្ឋានដែលបម្រុងនឹងធ្វើការសាងនេះ ជាអាកាសយានដ្ឋានអន្តរជាតិថ្មីទី៤ (4th NewGreenfield Airport) ដែលបានធ្វើការវិនិយោគដោយមានការចូលរួមពីវិស័យឯកជន បន្ទាប់ពីអាកាសយានដ្ឋានអន្តរជាតិតារាសាគរ, អាកាសយានដ្ឋានអន្តរជាតិសៀមរាប-អង្គរ និងអាកាសយានដ្ឋានអន្តរជាតិតេជោ។

អ្នកឧកញ៉ា គិត ម៉េង ប្រធានក្រុមហ៊ុន រ៉ូយ៉ាល់ គ្រុប កោះរ៉ុង ឌីវេឡបមេន ខមភេនី បានបញ្ជាក់ពីការប្តេជ្ញាចិត្តសាងសង់អាកាសយានដ្ឋានអន្តរជាតិកោះរ៉ុង (លំដាប់ 4C) នៅលើតំបន់អភិវឌ្ឍន៍កោះរ៉ុងនេះ ឱ្យសម្រេចតាមផែនការមេ ដែលបានចុះហត្ថលេខានៅថ្ងៃទី១៨ ខែមករា ឆ្នាំ២០២៣។

គម្រោងសាងសង់អាកាសយានដ្ឋានអន្តរជាតិកោះរ៉ុងនៅលើតំបន់អភិវឌ្ឍន៍ កោះរ៉ុង គ្រោងចំណាយថវិកាប្រមាណ ៣០០លានដុល្លារសហរដ្ឋអាមេរិក នឹងត្រូវបញ្ចប់ការសាងសង់ក្នុងរយៈពេល ៥ឆ្នាំ។

កាលពីថ្ងៃទី២៨ ខែកុម្ភៈ ឆ្នាំ២០០៨ ក្រុមហ៊ុនរ៉ូយ៉ាល់ គ្រុប ខូអិលធីឌី បានចុះហត្ថលេខាជួលកោះរ៉ុង ជាមួយក្រុមប្រឹក្សាអភិវឌ្ឍន៍កម្ពុជា ដែលជាភាគីតំណាងឱ្យរាជរដ្ឋាភិបាលកម្ពុជា ដើម្បីអភិវឌ្ឍជាតំបន់អភិវឌ្ឍន៍ពាណិជ្ជកម្ម រមណីយដ្ឋានទេសចរធម្មជាតិ រួមទាំងអាកាសយានដ្ឋានផងដែរ៕

The post ក្រុមហ៊ុនចាប់ផ្តើមឈូសឆាយសម្អាតដីមួយផ្នែកនៅទីតាំងសង់ព្រលានយន្តហោះអន្តរជាតិលើកោះរ៉ុង appeared first on Kampuchea Thmey Daily.

កោះរ៉ុង Archives - Kampuchea Thmey Daily

កោះរ៉ុងកាន់តែអភិវឌ្ឍ អនាគតជាគោលដៅសម្រាកលំហែកាយអ្នកជំនួញបច្ចេកវិទ្យាធំៗ

​លោក សាយ សំអាល់ ជំរុញ​រៀបចំ​ផែនការ​ដាំដុះ​បន្លែ​នៅនឹង​កន្លែង ​ផ្គត់ផ្គង់​ទេសចរ​លើ​កោះរ៉ុង​

លោក ឡុង ឌីម៉ង់ ប្រៀបធៀប​សក្ដានុពល​ទេសចរណ៍​កោះ​បាលី​ប្រទេស​ឥណ្ឌូណេស៊ី និង​កោះរ៉ុង​ខេត្ត​ព្រះសីហនុ

កោះរ៉ុង​ប្រែក្លាយ​ពី​ភូមិ​នេសាទ​ ក្លាយ​ជា​កោះ​ឋានសួគ៌​ក្នុង​ខេត្ត​ព្រះសីហនុ

មក​កម្សាន្ត​កោះរ៉ុង ចាយ​ស្នាក់នៅ ​ហូប​ចុក ធ្វើ​ដំណើរ​ មួយ​យប់​យ៉ាង​ហោច​ណាស់​ម្នាក់ ១៥០ ដុល្លារ

ក្រុមហ៊ុនចាប់ផ្តើមឈូសឆាយសម្អាតដីមួយផ្នែកនៅទីតាំងសង់ព្រលានយន្តហោះអន្តរជាតិលើកោះរ៉ុង

លោក សាយ សំអាល់ ជំរុញរៀបចំផែនការដាំដុះបន្លែនៅនឹងកន្លែង ផ្គត់ផ្គង់ទេសចរលើកោះរ៉ុង

លោក ឡុង ឌីម៉ង់ ប្រៀបធៀបសក្ដានុពលទេសចរណ៍កោះបាលីប្រទេសឥណ្ឌូណេស៊ី និងកោះរ៉ុងខេត្តព្រះសីហនុ

កោះរ៉ុងប្រែក្លាយពីភូមិនេសាទ ក្លាយជាកោះឋានសួគ៌ក្នុងខេត្តព្រះសីហនុ

មកកម្សាន្តកោះរ៉ុង ចាយស្នាក់នៅ ហូបចុក ធ្វើដំណើរ មួយយប់យ៉ាងហោចណាស់ម្នាក់ ១៥០ ដុល្លារ