ព័ត៌មានជាតិ

រាល់គម្រោងវិនិយោគតាមបណ្តាកោះក្នុងខេត្តព្រះសីហនុ បើគ្មានសកម្មភាពអភិវឌ្ឍ រដ្ឋនឹងសើរើដកហូតវិញ

បានផុស

២ years មុន

នៅ

ថ្ងៃចន្ទ ២៣ ធ្នូ ២០២៤

ដោយ

រាល់គម្រោងវិនិយោគនៅតាមបណ្តាកោះក្នុងដែនសមុទ្រខេត្តព្រះសីហនុ ដែលក្រុមហ៊ុនឯកជនទទួលសិទ្ធិវិនិយោគពីរដ្ឋាភិបាល បើគ្មានសកម្មភាពអភិវឌ្ឍទេនឹងប្រឈមការពិនិត្យសើរើដកហូតមកវិញ។ នេះបើតាមការគូសបញ្ជាក់ពីលោក ឡុង ឌីម៉ង់ អភិបាលរងខេត្តព្រះសីហនុ ក្នុងឱកាសដែលលោករួមជាមួយអ្នកសារព័ត៌មានជាង ៣០ ស្ថាប័ន ទៅទស្សនានៅក្រុងកោះរ៉ុងក្នុងខេត្តព្រះសីហនុកាលពីសប្តាហ៍មុននេះ។

ផ្តល់បទសម្ភាសន៍ដល់ក្រុមអ្នកសារព័ត៌មាននៅលើកោះរ៉ុង លោក ឡុង ឌីម៉ង់ បានបញ្ជាក់ថា នៅតាមបណ្តាកោះមួយចំនួនក្នុងខេត្តព្រះសីហនុ រដ្ឋាភិបាលបានផ្តល់សិទ្ធិដល់ក្រុមហ៊ុនឯកជនដើម្បីវិនិយោគអភិវឌ្ឍជាគោលដៅទេសចរណ៍។ យ៉ាងណាមិញ ការផ្តល់សិទ្ធិវិនិយោគនេះត្រូវតែមានការអភិវឌ្ឍ ហើយបើគ្មានសកម្មភាពអភិវឌ្ឍអីទេ រដ្ឋាភិបាលនឹងពិចារណាដកហូតយកមកគ្រប់គ្រងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេត្តព្រះសីហនុមានកោះសរុបចំនួន ៣០ ថ្មដុះចំនួន ០២ និងថ្មប៉ប្រះទឹកចំនួន ០៥។ ក្នុងចំណោមកោះនៅក្រោមការគ្រប់គ្រងរបស់រដ្ឋបាលខេត្តព្រះសីហនុ មានកោះចំនួន ១៩ ដែលរាជរដ្ឋាភិបាលផ្តល់គោលការណ៍វិនិយោគដល់ក្រុមហ៊ុនឯកជនចំនួន ២៤ ក្រុមហ៊ុន។

ក្នុងនោះក៏មានកោះចំនួន ៥ កំពុងអភិវឌ្ឍនិងដំណើរការអាជីវកម្ម ក្នុងនោះមានកោះសង្សារ (កោះអូនកោះបង) កោះក្របី កោះតាកៀវ កោះឬស្សី និងកោះរ៉ុង៕