កាល​ពី​ថ្ងៃ​ទី២៨ ខែ​មិថុនា ទូរទស្សន៍​ ABC News Australia បាន​ចេញ​វីដេអូ​ព័ត៌មាន​មួយ​ដែល​បាន​ចុះ​ទៅ​ដល់​ទីតាំង​អាគារ​មួយ​នៅ​ព្រំដែន​កម្ពុជា​ថៃ​និង​បាន​​រាយការណ៍​ថា​ជា​កន្លែង​ឆបោក​អនឡាញ​ដ៏​ធំ​មួយ ក្នុង​វីដេអូ​នោះ​កង​ទ័ព​ថៃ​បាន​នាំ​អ្នក​យក​ព័ត៌មាន​លោក​ស្រី Karishma Vyas ចុះមើល​និង​រាយការណ៍​​ទីតាំង​ប្រតិបត្តិការ និង​កន្លែង​ឃុំឃាំង​មនុស្ស​នៅ​ក្នុង​អាគារ​នោះ​ផង​ដែរ​។​

អ្នក​នាំពាក្យ​ក្រសួង​ព័ត៌មាន​លោក ទេព អស្នារិទ្ធ បាន​លើក​ឡើង​ថា​ ការ​រាយការណ៍​ព័ត៌មាន​នេះ​គឺ​លំអៀង និង​អតុល្យភាព​ព័ត៌មាន​ដែល​ជា​សកម្មភាព​បំពាន​ក្នុង​ក្របខ័ណ្ឌ​វិជ្ជាជីវៈ កំពុង​ធ្លាក់​ខ្លួន​ជា​ឧបករណ៍​ឃោសនា​របស់​ថៃ។

លោក​ថា៖ «គោលការណ៍គ្រឹះនៃវិជ្ជាជីវៈសារព័ត៌មាន គឺត្រូវរាយការណ៍ព័ត៌មានដោយមានតុល្យភាព ដោយតម្លាភាព មិនលម្អៀង។ ការចុះយកព័ត៌មានដោយទទួល ស្តាប់ និងដើរតាមតែការរៀបចំ និង​ការ​នាំរបស់ភាគីយោធាថៃតែម្ខាង ដោយគ្មានការសាកសួរ ឬសុំការបំភ្លឺពីអាជ្ញាធរ ឬប្រជាពលរដ្ឋ​កម្ពុជា ពោលគឺពុំបានផ្តល់សំឡេងលើប្រធានបទ ឱ្យដល់ភាគីពាក់ព័ន្ធនៅតំបន់នោះ បាន​បញ្ចេញ​មតិ​យោបល់​ខ្លួន គឺជាការបង្កើតការរាយការណ៍ព័ត៌មានដែលមានភាពលម្អៀង គ្មាន​ការ​ឆ្លុះបញ្ចាំង​ពី​តថភាព​ពិត​ជុំវិញ ជាការរាយការណ៍ព័ត៌មានខ្វះវិជ្ជាជីវៈ ដោយ​គ្មាន​ការ​ទទួល​ខុស​ត្រូវ»។

លោកបន្ថែម​ថា​ ក្នុងនាមជាសារព័ត៌មានអន្តរជាតិដ៏ធំរបស់អូស្ត្រាលី ABC គួរតែមានការសិក្សា ស្រាវជ្រាវ និងផ្ទៀងផ្ទាត់ព័ត៌មានជាមុន ឱ្យបានច្បាស់លាស់មុននឹងចុះទៅកាន់តំបន់ព្រំដែននេះ។ ការ​រាយការណ៍បែបនេះ ដោយអនុញ្ញាតឱ្យគេប្រើប្រាស់ឈ្មោះ និងកាមេរ៉ារបស់​ខ្លួន​ដើម្បី​ផលិត​ព័ត៌មាន​បែប​ប្រឌិតតាមការរៀបចំរបស់ភាគីថៃ ដើម្បីបង្កាច់បង្ខូច និងបង្កើតបញ្ហា គឺជាការ​ទម្លាក់​តម្លៃ​វិជ្ជាជីវៈខ្លួនឯងឱ្យទៅជាឧបករណ៍ឃោសនានយោបាយ និងយោធា​របស់​ប្រទេស​មួយ​ផ្សេង​ទៀត​។
លោក​បាន​ចាត់​ទុក​ថា​ ការ​រាយការណ៍​ព័ត៌មាន​នេះ​ជា​ការ​បំពាន​អព្យាក្រិតភាព​ផ្នែក​សារព័តមាន ព្រោះសារព័ត៌មានដែលមានក្រមសីលធម៌ មិនត្រូវធ្វើសកម្មភាពណាដែលអាចបង្កជាជម្លោះ ការអុចអាល នាំឱ្យកើតមានគ្រោះថ្នាក់ ឬបង្កអស្ថិរភាពដល់ប្រទេស ប្រជាជនក្នុង​តំបន់​ណាមួយ​ឡើយ​។

លោក​បន្ថែម​ថា​៖ «ដូច្នេះ​ការ​ចូល​មក​យក​ព័ត៌មាន​លើ​ទឹកដី​កម្ពុជា​ដោយ​ខុស​ច្បាប់​នៅ​ក្នុង​តំបន់​ព្រំដែន​បែប​នេះ ជាទង្វើអាចបង្កភាពតានតឹងរវាងប្រទេសទាំងពីរ ដែលនេះ​ជាការ​ផ្ទុយ​ពី​ទំនួលខុសត្រូវ​សង្គម​របស់អ្នកសារព័ត៌មាន»។

បើ​តាម​អ្នក​នាំពាក្យ​ក្រសួង​ព័ត៌មាន ការ​អនុវត្តន៍​សេរីភាព​សារ​ព័ត៌មាន​ត្រូវ​តែ​ដើរ​ទន្ទឹម​នឹង​ការ​គោរព​ច្បាប់​អន្តរជាតិ ច្បាប់ជាតិ និងភាពសុចរិតស្មោះត្រង់ មិនលម្អៀងក្នុងវិជ្ជាជីវៈ។ ទង្វើ​របស់​ ABC Australia គឺ​ជាការរំលោភ​ច្បាប់អន្តោប្រវេសន៍ និងអធិបតេយ្យភាពរបស់កម្ពុជាផង និងជា​ការបំពាន​ក្រម​សីលធម៌​សារព័ត៌មានយ៉ាងធ្ងន់ធ្ងរ ដែលធ្វើ​ឱ្យប៉ះពាល់ដល់កេរ្តិ៍ឈ្មោះ​ប្រព័ន្ធ​ផ្សព្វផ្សាយរបស់អូស្ត្រាលីផ្ទាល់លើឆាកអន្តរជាតិ៕

​អត្ថបទ​ដោយ ហ៊ុន សិរីវឌ្ឍន៍

The post អ្នកនាំពាក្យ​ក្រសួង​ព័ត៌មាន​ថា​សារព័ត៌មាន ABC អូស្ត្រាលី​ កំពុង​ក្លាយ​ជា​ឧបករណ៍​ឃោសនាព័ត៌មានមិនពិត​របស់​ថៃ appeared first on Kampuchea Thmey Daily.

កាលពីថ្ងៃទី២៦ ខែមិថុនា ឆ្នាំ២០២៦ យុទ្ធនាការជំហានទី២ ដែលដឹកនាំដោយក្រសួងព័ត៌មាន និងសម្របសម្រួលអនុវត្តដោយមន្ទីរព័ត៌មានខេត្តកំពត បានទៅដល់ស្រុកទឹកឈូ ដើម្បីពង្រឹងអក្ខរកម្មព័ត៌មាននិងប្រព័ន្ធផ្សព្វផ្សាយ ជូនដល់សិស្សានុសិស្សនៃវិទ្យាល័យត្រសេកកោង ក្នុងស្រុកទឹកឈូ ខេត្តកំពតចំនួនប្រមាណជាង ១ ៤០០ នាក់ ។

សិស្សានុសិស្សនៃវិទ្យាល័យត្រសេកកោងបានបង្ហាញក្តីរីករាយ និងថ្លែងអំណរគុណដល់ក្រសួង និងមន្ទីរព័ត៌មាន ក៏ដូចជាអាជ្ញាធរខេត្ត ស្រុក ដែលបានសហការរៀបចំយុទ្ធនាការដ៏មានសារៈសំខាន់នេះ និងបានផ្តល់ឱកាសដល់សិស្សនុសិស្សទទួលបានចំណេះដឹងអំពីរបៀបនៃការប្រើប្រាស់បណ្តាញសង្គមប្រកបដោយការទទួលខុសត្រូវ ព្រមទាំងយល់ដឹងកាន់តែច្បាស់ពីវិធីសាស្ត្រក្នុងការបង្ការ ទប់ស្កាត់ និងចូលរួមប្រឆាំងនឹងព័ត៌មានមិនពិត (Fake News) នៅក្នុងយុគសម័យឌីជីថល។

យុទ្ធនាការជំហានទី២នេះ មិនត្រឹមតែផ្តល់នូវចំណេះដឹងជាមូលដ្ឋានគ្រឹះដ៏រឹងមាំទប់ទល់នឹងផ្សាយបែបបំពុល បំផ្លើស បំភ្លៃប៉ុណ្ណោះទេ ប៉ុន្តែថែមទាំងបានបំផុសស្មារតីដល់យុវជនជំនាន់ក្រោយ ឱ្យក្លាយទៅជា «ភ្នាក់ងារសន្តិសុខឌីជីថល» ដ៏សកម្ម ក្នុងការផ្សព្វផ្សាយបន្តនូវព័ត៌មានពិត មានប្រភពច្បាស់លាស់ និងរួមចំណែកកសាងបរិយាកាសព័ត៌មានប្រកបដោយសុវត្ថិភាព និងទំនុកចិត្តនៅក្នុងសង្គមជាតិទាំងមូលផងដែរ។

ពីរាជធានីភ្នំពេញ ទៅកាន់ខេត្តព្រះវិហារ តាកែវ កំពង់ស្ពឺ កំពត និងបន្តទៅខេត្តនៅទូទាំងប្រទេសជាបន្តបន្ទាប់ យុទ្ធនាការជំហានទី២ បានកំពុងបោះជំហានយ៉ាងស្វាហាប់ឆ្ពោះទៅកាន់ការសម្រេចបាននូវគោលដៅយុទ្ធសាស្ត្រក្នុងការលើកកម្ពស់អក្ខរកម្មឌីជីថល និងការបង្កើនភាពស៊ាំរបស់ស្រទាប់យុវវ័យប្រឆាំងនឹងព័ត៌មានមិនពិត។

សកម្មភាពដ៏ផុលផុសនៅតាមបណ្តាវិទ្យាល័យនាពេលនេះ ឆ្លុះបញ្ចាំងយ៉ាងច្បាស់ពីការប្តេជ្ញាចិត្តរួមគ្នាក្នុងការចូលរួមក្នុងកិច្ចខិតខំដឹកនាំដោយក្រសួងព័ត៌មាន ដោយសហការជាមួយអាជ្ញាធរមូលដ្ឋាន និងគ្រឹះស្ថានសិក្សា ក្នុងការកសាងខែល«សុវត្ថិភាពព័ត៌មាន»ដ៏រឹងមាំក្នុងសង្គមកម្ពុជាផងដែរ៕

The post យុទ្ធនាការ​ផ្សព្វផ្សាយ «និយាយ​ថា​ទេ ចំពោះព័ត៌មានក្លែងក្លាយ» បន្ត​​បញ្ជ្រាបចំណេះដឹង​ដល់សិស្សានុសិស្ស ប្រមាណ ១ ៤០០ នាក់​ សិក្សា​នៅ​វិទ្យាល័យ​ត្រសេកកោង appeared first on Kampuchea Thmey Daily.

សិក្ខាសាលាស្តីពី “មន្ត្រីព័ត៌មាន និង អ្នកសារព័ត៌មាន មកពីបណ្តាប្រទេស នៃតំបន់ភាគខាងត្បូង (Seminar on News Officials and Journalists from the Global South) ត្រូវបានចាប់ផ្តើម កាលពីថ្ងៃទី ២៣​ ខែមិថុនា ឆ្នាំ ២០២៦ បន្ទាប់ពីសិក្ខាកាមទាំង ៧ រូប នៃក្រសួងព័ត៌មាន បានអញ្ជើញដល់រដ្ឋធានីប៉េកាំង សាធារណរដ្ឋប្រជាមានិតចិន ខណៈពិធីបើកសិក្ខាសាលានេះ ធ្វើឡើងក្រោមអធិបតីភាព លោកស្រី Zhou Jihong អគ្គនាយិកា នៃអគ្គនាយកដ្ឋានកិច្ចសហប្រតិបត្តិការអន្តរជាតិ នៃរដ្ឋបាលវិទ្យុ និង ទូរទស្សន៍ជាតិចិន (NRTA) រួមជាមួយលោក He Dongbo អនុប្រធានគ្រប់គ្រងទូទៅ នៃក្រុមហ៊ុន សហប្រតិបត្តិការសេដ្ឋកិច្ច និង បច្ចេកទេសផ្សព្វផ្សាយអន្តរជាតិ (CBIC)។

ក្នុងឱកាសនោះ លោក ជួន ចាន់ភារុណ បានលើកឡើងថា សិក្ខាសាលានេះ មានគោលបំណង លើកកម្ពស់ការប្រាស័្រយទាក់ទងគ្នា រវាងមន្ត្រីព័ត៌មាន និង អ្នកសារព័ត៌មាន មកពីបណ្តាប្រទេស Global South ដែលអាចធ្វើឱ្យទំនាក់ទំនងនេះ សម្រាប់ប៉ុន្មានថ្ងៃខាងមុខទៀត នឹងជួយឱ្យយល់ពីគ្នាទៅវិញទៅមក ជាពិសេសការប្រាស័យទាក់ទងគ្នា រវាងអ្នកចូលរួមមកពីបណ្តាប្រទេសទាំង ១២ ប្រទេស នៃតំបន់ភាគខាងត្បូង។

សំឡេង «សិក្ខាសាលានេះ ខ្ញុំសង្កេតឃើញថា គេបានបង្ហាញពាក់ព័ន្ធទ្រឹស្តី ផ្សារភ្ជាប់នឹងការអនុវត្ត ដោយខ្ញុំសង្ឃឹមថា មន្ត្រី នៃប្រទេសកម្ពុជាយើង នឹងយកបទពិសោធដែលយើងសិក្សាយកទៅអនុវត្តផ្ទាល់ ក្នុងស្ថាប័នរបស់ខ្លួន»។

សូមបញ្ជាក់ថា ក្រសួងព័ត៌មាន បានចាត់ថ្នាក់ដឹកនាំ និង មន្ត្រីចំនួន ៧ រូប ដើម្បីចូលរួមសិក្ខាសាលា ស្តីពី “មន្ត្រីព័ត៌មាន និង អ្នកសារព័ត៌មាន មកពីបណ្តាប្រទេស នៃតំបន់ភាគខាងត្បូង” (Seminar on News Officials and Journalists from the Global South) នៅរដ្ឋធានីប៉េកាំង សាធារណរដ្ឋប្រជាមានិតចិន ចាប់ពីថ្ងៃទី ២៣ ខែមិថុនា ដល់ថ្ងៃទី ៦ ខែកក្កដា ឆ្នាំ ២០២៦ ដែលរួមមាន ៖ ១-លោក ជួន ចាន់ភារុណ អគ្គនាយករង , ២-លោក ស្រី វ៉ានធា អគ្គនាយករង , ៣-លោក លី ចន្ថា អគ្គនាយករង , ៤-លោក ហុក សុខរិន ប្រធាននាយកដ្ឋាន , ៥-លោក ប៉ែន សុខុម ប្រធាននាយកដ្ឋាន , ៦-លោក កែវ ផាន់ណាន ប្រធានការិយាល័យ និង ៧-លោក ខាត់ ទេវីន ប្រធានការិយាល័យ៕

The post តំណាងមន្រ្តីព័ត៌មាន ៖ សិក្ខាសាលាថ្ងៃដំបូងនៅរដ្ឋធានីប៉េកាំង បានពង្រីកការ ប្រាស័្រយទាក់ទងគ្នា រវាងមន្ត្រីព័ត៌មាន និង អ្នកសារព័ត៌មាន នៃ Global South appeared first on Kampuchea Thmey Daily.

ការ​ណែនាំនេះ​ ធ្វើឡើងពេលដែល​លោក រួមជាមួយ​លោក សោម កុសល អនុរដ្ឋលេខាធិការដ្ឋានក្រសួងព័ត៌មានទទួលបន្ទុកការងារមន្ទីរព័ត៌មានខេត្តកំពតអញ្ជើញដឹកនាំ កិច្ចប្រជុំតម្រង់ទិសការងារព័ត៌មាន និងសាធារណមតិ ដល់ថ្នាក់ដឹកនាំមន្ទីររាជការ នៃមន្ទីរព័ត៌មានខេត្តកំពតកាលពីថ្ងៃទី១៩ ខែមិថុនា ឆ្នាំ២០២៦។

ក្នុងឱកាសនោះ លោក ទេព អស្នារិទ្ធ បានលើកទឹកចិត្តដល់មន្ត្រីព័ត៌មានត្រូវរៀបចំប្រតិទិនមាតិកា ដោយផ្តោតលើសមិទ្ធផលរបស់រដ្ឋបាលខេត្ត ការអភិវឌ្ឍមូលដ្ឋាន សក្តានុពលទេសចរណ៍ និងសកម្មភាពដោះស្រាយបញ្ហាជូនប្រជាពលរដ្ឋ។

លោក​បាន​ជំរុញ​ឱ្យមន្ត្រីជំនាញបង្កើនការផលិតវីដេអូខ្លីៗទម្រង់បញ្ឈរ (Short-form Video) សម្រាប់​ផ្សព្វផ្សាយ​លើ​បណ្តាញសង្គម TikTok, Reels និង YouTube Shorts។

ខ្លឹមសារត្រូវផ្តោតសំខាន់លើប្រសាសន៍ដឹកនាំ និងសារគន្លឹះៗរបស់ឯកឧត្តមអភិបាលខេត្ត ក៏ដូចជាសកម្មភាពរបស់រដ្ឋបាលខេត្ត និងមន្ទីរ-អង្គភាពជំនាញ។ ការងារនេះ មិនត្រឹមតែលើកកម្ពស់យុទ្ធសាស្ត្រ «បុរេសកម្ម» ប៉ុណ្ណោះទេ ប៉ុន្តែថែមទាំងធានាថា ប្រជាពលរដ្ឋទទួលបានព័ត៌មានពិតបានទូលំទូលាយ និងទប់ស្កាត់បានទាន់ពេលវេលានូវការផ្សព្វផ្សាយព័ត៌មានក្លែងក្លាយ ឬការញុះញង់ដែលមានចេតនាបង្កការយល់ច្រឡំលើការដឹកនាំរបស់រដ្ឋបាលខេត្ត។

ជាមួយគ្នានេះដែរ លោក សោម កុសល អនុរដ្ឋលេខាធិការដ្ឋានក្រសួងព័ត៌មានទទួលបន្ទុកការងារមន្ទីរព័ត៌មានខេត្តកំពត បានផ្តល់មតិយោបល់ថា ការផលិតព័ត៌មានឱ្យបានលឿន និងត្រឹមត្រូវ គឺជាកត្តាសំខាន់ដើម្បីលុបបំបាត់ព័ត៌មានមិនពិតបានទាន់ពេលវេលា។ លោក​បានសង្កត់ធ្ងន់ថា មិនគួរទុកឱ្យព័ត៌មានអវិជ្ជមានកើតមាននៅក្នុងខេត្ត ដោយគ្មានការឆ្លើយតបពីមន្ត្រីជំនាញនោះទេ ព្រោះមានតែការផ្សាយព័ត៌មានពិតប៉ុណ្ណោះ ទើបអាចបន្សាបព័ត៌មានក្លែងក្លាយបាន។

លោកស្រី ប៉ូ ចាន់រស្មី ប្រធានមន្ទីរព័ត៌មានខេត្តកំពតបានថ្លែងអំណរគុណថ្នាក់ដឹកនាំក្រសួងព័ត៌មាន ដែលបានផ្តល់ការណែនាំ និងតម្រង់ទិសដៅការងារយ៉ាងច្បាស់លាស់លើការងារព័ត៌មាន និងការងារសាធារណមតិ។

លោកស្រីបានប្តេជ្ញានឹងដឹកនាំមន្ត្រីក្រោមឱវាទឱ្យសម្រេចបានជោគជ័យតាមផែនការ ដើម្បីបម្រើមហាជន និងបំពេញតួនាទីជាសេនាធិការជូនរដ្ឋបាលខេត្ត និងក្រសួងព័ត៌មានប្រកបដោយប្រសិទ្ធភាព៕

The post អ្នកនាំពាក្យក្រសួងព័ត៌មាន ណែនាំ​មន្ទីរព័ត៌មានខេត្តកំពត​ត្រូវ​រៀប​ចំ​ផែន​ការ​គ្រប់គ្រងផលិតមាតិកាព័ត៌មានឱ្យច្បាស់លាស់ appeared first on Kampuchea Thmey Daily.

ការណែនាំនេះ បានធ្វើឡើងក្នុងឱកាសដែលលោក រួមជាមួយលោក អំ តារាវិទូ អនុរដ្ឋលេខាធិការទទួលបន្ទុកមន្ទីរព័ត៌មានខេត្តព្រះវិហារ បានអញ្ជើញដឹកនាំកិច្ចប្រជុំតម្រង់ទិសការងារព័ត៌មាន និងសាធារណមតិ ជូនដល់មន្ត្រីរាជការនៃមន្ទីរព័ត៌មានខេត្តព្រះវិហារ កាលពីរសៀលថ្ងៃទី១៧ ខែមិថុនា ឆ្នាំ២០២៦។

លោក ទេព អស្នារិទ្ធ បានមានប្រសាសន៍ថា ក្នុងអំឡុងពេល នៃការប៉ះទង្គិចដោយសារការឈ្លានពានរបស់យោធាថៃ និងការវិវត្តនៃសភាពការណ៍ជាបន្តបន្ទាប់នេះ ក្នុងនាមជាមន្រ្តីព័ត៌មានដែលជាសេនាធិការឱ្យខេត្ត ត្រូវស្វែងយល់ និងតាមដានចំពោះការផ្សាយព័ត៌មានបែបបំពុល ប្រឌិតក្លែងបន្លំ និងព័ត៌មានក្លែងក្លាយដែលបង្កការភាន់ច្រឡំពីសាធារណមតិជាតិ និងអន្តរជាតិ មកលើប្រទេស​កម្ពុជាដោយត្រូវឆ្លើយតប និងបំភ្លឺជាមួយព័ត៌មានឱ្យបានឆាប់តាមការណ៍ដែលអាចធ្វើទៅបាន។

លោកសង្កត់ធ្ងន់ថា «ក្នុងកាលៈទេសៈបច្ចុប្បន្ន សមរភូមិព័ត៌មាន និងសាធារណមតិ គឺជាការងារដ៏សំខាន់បំផុត គាំទ្រដល់សមរភូមិយោធា សមរភូមិច្បាប់ និងសមរភូមិការទូត។ មន្ត្រីព័ត៌មាន គឺជាកងទ័ពជួរមុខលើការងារសាធារណមតិ។ ដូច្នេះ ការបំពេញភារកិច្ចត្រូវតែមានស្មារតីទទួលខុសត្រូវខ្ពស់ និងមានភាពច្នៃប្រឌិត ដើម្បីឆ្លើយតបទៅនឹងការវិវត្តយ៉ាងឆាប់រហ័សនៃព័ត៌មាន និងបច្ចេកវិទ្យានាពេលបច្ចុប្បន្ន។»

ទន្ទឹមនឹងនេះ អ្នកនាំពាក្យក្រសួងព័ត៌មានបានអំពាវនាវដល់មន្ត្រីព័ត៌មាន អ្នកសារព័ត៌មាន និងអ្នកប្រើប្រាស់បណ្តាញសង្គមទាំងអស់ ឱ្យអនុវត្តក្រមសីលធម៌វិជ្ជាជីវៈឱ្យបានត្រឹមត្រូវ។ ត្រូវប្រកាន់ខ្ជាប់នូវតួនាទីភារកិច្ចតាមធម្មនុញ្ញវិជ្ជាជីវៈសារព័ត៌មាន និងមិនត្រូវផ្សព្វផ្សាយព័ត៌មានដែលបង្កផលប៉ះពាល់ដល់សន្តិសុខជាតិ ឬការសម្ងាត់ផ្នែកយោធាឡើយ។

នៅក្នុងឱកាសនោះ លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ បានសម្តែងការគាំទ្រយ៉ាងពេញទំហឹងចំពោះអនុសាសន៍នេះ ព្រមទាំងប្តេជ្ញាចិត្តដឹកនាំការងារឱ្យបានជាប្រចាំក្នុងភូមិសាស្ត្រខេត្ត ដើម្បីចូលរួមជាមួយថ្នាក់ដឹកនាំថ្នាក់ជាតិ និងថ្នាក់ខេត្ត ក្នុងបុព្វហេតុការពារសន្តិភាព ស្ថិរភាព និងផលប្រយោជន៍ជាតិទាំងមូល៕

The post ក្រសួងព័ត៌មាន ណែនាំមន្ត្រីព័ត៌មានខេត្តព្រះវិហារ​ឱ្យយកចិត្តទុកដាក់ខ្ពស់លើការងារតាមដានសភាពការណ៍ព្រំដែន និងសាធារណមតិ appeared first on Kampuchea Thmey Daily.

ការណែនាំនេះ បានធ្វើឡើងក្នុងឱកាសដែលលោក រួមជាមួយលោក អំ តារាវិទូ អនុរដ្ឋលេខាធិការទទួលបន្ទុកមន្ទីរព័ត៌មានខេត្តព្រះវិហារ បានអញ្ជើញដឹកនាំកិច្ចប្រជុំផ្សព្វផ្សាយ និង សម្រង់ទិសការងារព័ត៌មាន និង សាធារណមតិ ជូនដល់មន្ត្រីរាជការ នៃមន្ទីរព័ត៌មានខេត្តព្រះវិហារ កាលពីរសៀលថ្ងៃទី ១៧ ខែមិថុនា ឆ្នាំ ២០២៦។

ក្នុងឱកាសនោះ លោកអ្នកនាំពាក្យក្រសួងព័ត៌មាន បានលើកទឹកចិត្តដល់មន្ត្រីជំនាញ ឲ្យច្នៃប្រឌិតផលិតមាតិកាខ្លីៗ ដែលទាក់ទាញ អំពីសម្រស់ និង ប្រវត្តិសាស្ត្រ នៃបេតិកភណ្ឌខ្មែរ ដោយធ្វើការសម្ភាសន៍ ឬ សាកសួអ្នកជំនាញ ឲ្យពន្យល់បញ្ជាក់ ដើម្បីលើកកម្ពស់ការយល់ដឹងដល់សាធារណជនជាតិ និង អន្តរជាតិ តាមគ្រប់បណ្តាញផ្សព្វផ្សាយ។

លោកលើកឡើងថា ការផ្សព្វផ្សាយវប្បធម៌ជាតិបានយ៉ាងទូលំទូលាយ នឹងជួយជំរុញកំណើនទេសចរឲ្យកាន់តែខ្លាំងក្លា។ ទន្ទឹមនឹងនេះ ការចែករំលែកអត្ថបទ និង វីដេអូតាមបណ្តាញសង្គម ក៏ជាឱកាសមាសសម្រាប់យុវជនកម្ពុជាក្នុងការសិក្សាស្វែងយល់ និង រួមចំណែកអភិរក្សសម្បត្តិវប្បធម៌ជាតិឲ្យកាន់តែទូលាយ។

ជាមួយគ្នានេះ លោក ទេព អស្នារិទ្ធ បានណែនាំដល់មន្ត្រីព័ត៌មាន នៃមន្ទីរព័ត៌មានខេត្តព្រះវិហារ ឲ្យបង្កើនការផលិតមាតិកាផ្សព្វផ្សាយអំពីប្រាសាទព្រះវិហារ និង តំបន់បេតិកភណ្ឌវប្បធម៌ប្រវត្តិសាស្ត្រផ្សេងៗ ឲ្យបានច្រើនបន្ថែមទៀត។

លោកសង្កត់ធ្ងន់ថា ដោយសារប្រាសាទនេះជាមរតកដូនតាខ្មែរ ហើយកម្ពុជាធ្លាប់ទទួលបានជោគជ័យតាមផ្លូវច្បាប់ជាបន្តបន្ទាប់ក្នុងការការពារអធិបតេយ្យភាពលើប្រាសាទនេះ ទោះបីជាមានភាគីជិតខាងនៅតែមានមហិច្ឆតាឈ្លានពានក្តី ការផលិតមាតិកាព័ត៌មាន និង ឯកសារពាក់ព័ន្ធដើម្បីពង្រឹងការយល់ដឹងដល់សាធារណមតិ គឺជាកិច្ចការអាទិភាពដែលមន្ទីរព័ត៌មានត្រូវយកចិត្តទុកដាក់ខ្ពស់។

លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ បានសម្តែងការអរគុណយ៉ាងជ្រាលជ្រៅចំពោះថ្នាក់ដឹកនាំក្រសួងព័ត៌មាន ដែលបានឆ្លៀតពេលវេលាដ៏មមាញឹក និង ផ្តល់តម្លៃខ្ពស់ក្នុងការអញ្ជើញមកដឹកនាំកិច្ចប្រជុំផ្សព្វផ្សាយ និង តម្រង់ទិសការងារព័ត៌មាន និង សាធារណមតិ ជូនដល់មន្ត្រីរាជការ នៃមន្ទីរព័ត៌មានខេត្តព្រះវិហារ។

លោកស្រីប្រធានមន្ទីរ បានចាត់ទុកថា កិច្ចប្រជុំតម្រង់ទិសនេះ ពិតជាមានសារៈសំខាន់ខ្លាំងណាស់ ក្នុងការជួយបង្កើនសមត្ថភាពដល់មន្ត្រីជំនាញ ដើម្បីឲ្យមានមូលដ្ឋានកាន់តែរឹងមាំក្នុងការផលិតមាតិកាព័ត៌មានចំគោលដៅព័ត៌មាន និង សាធារណមតិ ឆ្លើយតបទៅនឹងតម្រូវការរបស់អ្នកអាន ក៏ដូចជាអ្នកទស្សនា ជាពិសេសដើម្បីរួមចំណែកលើកកម្ពស់វិស័យវប្បធម៌ និង ទេសចរណ៍នៅក្នុងខេត្តឲ្យកាន់តែទូលំទូលាយថែមទៀត៕

The post អ្នកនាំពាក្យក្រសួងព័ត៌មាន ជំរុញ មន្ទីរព័ត៌មាន និង អ្នកផលិតមាតិកា បង្កើនការផ្សព្វផ្សាយពីតម្លៃបេតិកភណ្ឌជាតិឲ្យបានទូលំទូលាយ appeared first on Kampuchea Thmey Daily.

ការអំពាវនាវនេះធ្វើឡើងក្នុងបរិបទដែលបច្ចុប្បន្ន ឧក្រិដ្ឋជនបច្ចេកវិទ្យាកំពុងប្រើប្រាស់រូបភាពថ្មីៗ និង កាន់តែទំនើប ដើម្បីល្បួង ឬ គំរាមកំហែងអ្នកប្រើប្រាស់បណ្តាញសង្គម ក្នុងគោលបំណងដកហូតប្រាក់កាស ឬ លួចយកទិន្នន័យផ្ទាល់ខ្លួនរបស់បុគ្គលណាមួយ។

ក្នុងឱកាសអញ្ជើញជាអធិបតីក្នុងពិធីផ្សព្វផ្សាយយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ នៅវិទ្យាល័យរវៀង ខេត្តព្រះវិហារ កាលពីព្រឹកថ្ងៃទី ១៧ ខែមិថុនា ឆ្នាំ ២០២៦ លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានមានប្រសាសន៍ថា ក្នុងសម័យបច្ចេកវិទ្យាទំនើបនេះ អំពើឆបោកតាមប្រព័ន្ធបច្ចេកវិទ្យា និង ព័ត៌មានក្លែងក្លាយ បានកើតមានឡើងយ៉ាងញឹកញាប់ក្នុងរូបភាពផ្សេងៗ គ្នា។ គោលបំណង នៃការឆបោកទាំងនេះ គឺដើម្បីលួចទិន្នន័យគណនី ឬ ឯកសារសម្ងាត់ផ្ទាល់ខ្លួនរបស់បុគ្គលម្នាក់ៗ ចំណែកឯការបង្កើតព័ត៌មានក្លែងក្លាយវិញ គឺដើម្បីបំពុលសង្គម ឬ មានចេតនានយោបាយមិនល្អណាមួយ។

លោកបញ្ជាក់ថា ប្រសិនបើអ្នកទទួលបានតំណភ្ជាប់ដែលមិនស្គាល់ប្រភពតាមរយៈ Facebook , Telegram ឬ បណ្ដាញសង្គមផ្សេងៗ សូមកុំចុចបើក និង កុំចែកចាយបន្តជាដាច់ខាត ហើយគួរលុបតំណភ្ជាប់ទាំងនោះចោលភ្លាមៗ ព្រោះការចុចចូលនឹងធ្វើឲ្យជនឆបោកអាចលួចចូលគ្រប់គ្រងគណនី ឬ លួចយកព័ត៌មានសម្ងាត់ពីក្នុងទូរស័ព្ទរបស់យើងបាន។ មួយវិញទៀត សូមកុំផ្ដល់អត្តសញ្ញាណប័ណ្ណ ឬ ព័ត៌មានអត្តសញ្ញាណប័ណ្ណសញ្ជាតិខ្មែរ ឬ បើកគណនីធនាគារឲ្យអ្នកដទៃប្រើប្រាស់ជាដាច់ខាត ទោះបីជាពួកគេផ្តល់ប្រាក់កម្រៃបន្តិចបន្តួចក៏ដោយ។ ជនឆបោក នឹងប្រើប្រាស់គណនីរបស់យើង ដើម្បីធ្វើសកម្មភាពខុសច្បាប់ផ្សេងៗ។

ដោយឡែកជុំវិញការប្រយុទ្ធប្រឆាំងនឹងព័ត៌មានក្លែងក្លាយ អ្នកនាំពាក្យក្រសួងព័ត៌មាន បានសង្កត់ធ្ងន់ថា មុននឹងជឿ ឬ ចែកចាយព័ត៌មានណាមួយ អ្នកប្រើប្រាស់ត្រូវតែផ្ទៀងផ្ទាត់ប្រភពឲ្យបានច្បាស់លាស់ពីស្ថាប័នផ្លូវការជាមុនសិន ដើម្បីជៀសវាងការចាញ់បោក ឬ ការចែកចាយព័ត៌មានមិនពិត ដែលបង្កផលប៉ះពាល់ដល់សង្គម។

ទន្ទឹមនឹងនេះ លោក ទេព អស្នារិទ្ធ ក៏បានអំពាវនាវជាថ្មី និង ក្រើនរំលឹកយ៉ាងទទូចដល់ស្រទាប់យុវវ័យ ត្រូវប្រកាន់ខ្ជាប់នូវគោលការណ៍ «៣កុំ ១ការពារ» ដោយត្រូវអនុវត្ត «៣កុំ» គឺ កុំទាន់ជឿភ្លាមតាមអារម្មណ៍ ឬ ការរំជើបរំជួលនៅពេលឃើញព័ត៌មានប្លែក ដោយត្រូវផ្អាក ហើយគិតសិន , កុំទាន់ចែករំលែក (Share) ប្រភពមិនច្បាស់លាស់ ដើម្បីជៀសវាងការចែកចាយមេរោគ នៃព័ត៌មានក្លែងក្លាយ , និង កុំប្រហែសពេលប្រើប្រាស់បណ្តាញសង្គម ដោយត្រូវមានស្មារតីប្រុងប្រយ័ត្នខ្ពស់ចំពោះព័ត៌មានហូរចូល និង មិនត្រូវចុចលើតំណភ្ជាប់ (link) ចម្លែក ឬ មានភាពទាក់ទាញហួសហេតុឡើយ រួមផ្សំនឹង «១ការពារ» គឺ ការពារសន្តិសុខព័ត៌មានខ្លួនឯង តាមរយៈការពង្រឹងអក្ខរកម្មព័ត៌មាន រួចយកចំណេះដឹងនេះទៅចែករំលែកបន្តដល់មិត្តភក្តិ គ្រួសារ និង មនុស្សជុំវិញខ្លួន ឲ្យបានយល់ដឹងទាន់ល្បិចកល នៃព័ត៌មានក្លែងក្លាយ។ ការពារសន្តិសុខព័ត៌មានខ្លួនឯង ៖ តាមរយៈការពង្រឹងអក្ខរកម្មព័ត៌មាន និង យកចំណេះដឹងនេះទៅចែករំលែកបន្តដល់មិត្តភក្តិ គ្រួសារ និង មនុស្សជុំវិញខ្លួនឲ្យបានយល់ដឹងទាន់ល្បិចកល នៃព័ត៌មានក្លែងក្លាយ»៕

The post លោក ទេព អស្នារិទ្ធ ក្រើនរំលឹកពីគ្រោះថ្នាក់ នៃព័ត៌មានក្លែងក្លាយ និង ការឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

ការណែនាំនេះក្នុងឱកាស លោក ទេព អស្នារិទ្ធ អញ្ជើញជាអធិបតី ក្នុងពិធីផ្សព្វផ្សាយយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ នៅវិទ្យាល័យរវៀង ខេត្តព្រះវិហារ កាលពីព្រឹកថ្ងៃទី ១៧ ខែមិថុនា ឆ្នាំ ២០២៦ ដោយមានការចូលរួមពី លោក ណុប វុធ្ធី អភិបាលរងខេត្តព្រះវិហារ  លោកអភិបាលរងស្រុករវៀង លោកស្រីប្រធានមន្ទីរព័ត៌មានខេត្ត លោកនាយក លោកគ្រូ អ្នកគ្រូ និង សិស្សានុសិស្សប្រមាណជាង ១,០០០ នាក់។

លោក ទេព អស្នារិទ្ធ បានផ្តល់ដំបូន្មានដល់សិស្សានុសិស្សកម្រិតអនុវិទ្យាល័យ និង វិទ្យាល័យ ឲ្យប្រើប្រាស់បច្ចេកវិទ្យា ដើម្បីទទួលចំណេះដឹងតាមប្រព័ន្ធឌីជីថល ដែលក្រសួងអប់រំ យុវជន និង កីឡា បានបង្កើតឡើង និង ទទួលព័ត៌មានវិជ្ជមានពីបណ្តាញសង្គមផ្សេងៗ សម្រាប់ការសិក្សា និង ធ្វើលំហាត់អនុវត្តជាក់ស្តែងឲ្យបានចំគោលដៅ។ «នៅពេលដែលយើងប្រើប្រាស់បច្ចេកវិទ្យាបានត្រឹមត្រូវតាមគោលដៅ វានឹងផ្ដល់ផលប្រយោជន៍ និង ផ្តល់តម្លៃមកឲ្យយើងវិញ។ យើងអាចទទួលបាននូវចំណេះដឹងបន្ថែម ក្រៅពីអ្វីដែលបានរៀននៅក្នុងថ្នាក់ និង អ្វីដែលលោកគ្រូអ្នកគ្រូបានផ្ដល់ឲ្យ។ តាមរយៈមធ្យោបាយឌីជីថលនៅលើដៃរបស់យើងនេះ យើងអាចបង្កើនចំណេះដឹងបានជាប្រចាំថ្ងៃ។ ពេលខ្លះ នៅពេលដែលយើងធ្វើការស្រាវជ្រាវលើប្រធានបទណាមួយ យើងត្រូវប្រើប្រាស់ទូរស័ព្ទ ដើម្បីស្វែងរកព័ត៌មានដែលក្រសួងអប់រំផ្ដល់ឲ្យ។ នៅក្នុងកម្មវិធី (App) របស់ក្រសួងអប់រំ មានចំណេះដឹងជាច្រើន ដែលជួយបង្កើនពុទ្ធិ និង ចំណេះដឹងបន្ថែម។ ដូច្នេះ សូមឲ្យការប្រើប្រាស់បច្ចេកវិទ្យាឲ្យត្រូវគោលដៅបែបនេះ ដើម្បីបម្រើឲ្យប្រយោជន៍ នៃការសិក្សារបស់យើងឆ្ពោះទៅរកអនាគតដ៏ភ្លឺស្វាង និង ប្រសើរជាងមុន»។

ជាមួយគ្នានេះដែរ លោកអ្នកនាំពាក្យក្រសួងព័ត៌មាន បានព្រមានថា ការប្រើប្រាស់បច្ចេកវិទ្យាឌីជីថលខុសគោលដៅ ដូចជាការលេងហ្គេមមិនចេះគិត ឬ ការចែកចាយព័ត៌មានមិនពិត នឹងនាំឲ្យបាត់បង់ពេលវេលា និង ថវិកា ព្រមទាំងប៉ះពាល់ដល់អនាគត ហើយងាយក្លាយជាជនរងគ្រោះ នៃការឆបោកតាមប្រព័ន្ធអនឡាញផងដែរ។ ក្នុងន័យនេះ លោកបានក្រើនរំលឹកដល់យុវជនឲ្យមានការប្រុងប្រយ័ត្នខ្ពស់មុននឹងចែករំលែក (Share) ព័ត៌មានណាមួយ។ ការពិនិត្យផ្ទៀងផ្ទាត់ប្រភពឲ្យបានច្បាស់លាស់មុននឹងចុចចែករំលែក គឺជាទង្វើដ៏សំខាន់ដើម្បីទប់ស្កាត់ការផ្សព្វផ្សាយព័ត៌មានមិនពិត ឬ ព័ត៌មានដែលមានលក្ខណៈបំភាន់ ដែលអាចបង្កផលប៉ះពាល់ដល់សន្តិសុខសង្គម និង កិត្តិយសបុគ្គល។ លោកបានអំពាវនាវដល់យុវជនកម្ពុជាទាំងអស់ ឲ្យប្រែក្លាយខ្លួនជាកម្លាំងចលករប្រកបដោយមនសិការ និង ការទទួលខុសត្រូវក្នុងសង្គមឌីជីថល។

លោកសង្កត់ធ្ងន់ថា «ការរួមគ្នាបញ្ចប់ការចែករំលែកព័ត៌មានមិនពិត និង ការចូលរួមផ្សព្វផ្សាយតែអ្វីដែលជាការពិត វិជ្ជមាន និង មានប្រយោជន៍សម្រាប់សហគមន៍ គឺជាការរួមចំណែកក្នុងការការពារសន្តិភាព ស្ថិរភាព និង ការអភិវឌ្ឍប្រទេសជាតិ ឲ្យកាន់តែមានភាពរីកចម្រើន ជាមួយបរិយាកាសរស់នៅប្រកបដោយសុវត្ថិភាព និង លំហព័ត៌មានមានគុណភាព»។

លោក ណុប វុធ្ធី អភិបាលរងខេត្តព្រះវិហារ មានប្រសាសន៍ថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ ដែលដឹកនាំដោយក្រសួងព័ត៌មាននេះ ពិត​ជា​មាន​សារៈសំខាន់​ខ្លាំង​ណាស់ ក្នុងបរិបទដែលបច្ចេកវិទ្យាឌីជីថល និង​ បណ្តាញ​ទំនាក់​ទំនង​សង្គម​កំពុង​រីក​ចម្រើន​យ៉ាង​ឆាប់រហ័ស។ សព្វថ្ងៃនេះ ប្រជាពលរដ្ឋ ជាពិសេសយុវជន និង សិស្សានុសិស្ស អាច​ទទួល​បាន​ព័ត៌មាន​លឿន រហ័ស ងាយស្រួល និង ទូលំទូលាយជាងពេលណាៗ ទាំងអស់។ នេះ​ជា​ឱកាស​ដ៏​ល្អ​សម្រាប់ការសិក្សា ស្រាវជ្រាវ ការទំនាក់ទំនង និង ការអភិវឌ្ឍចំណេះដឹង។

សិស្សានុសិស្ស​ទាំង​អស់​ នៅវិទ្យាល័យរវៀង ​បាន​ប្តេជ្ញា​ចិត្ត​យ៉ាងមោះមុតក្នុង​ការ​ចូល​រួម​ជា​មួយ​ក្រសួង​ព័ត៌មាន​ ក្នុង​ការ​​ទប់​ស្កាត់​ព័ត៌មាន​ក្លែង​ក្លាយ។ ពួកគេ​សូម​ប្តេជ្ញា​ចិត្ត «​និយាយ​ថា​ទេ​ចំពោះ​ព័ត៌មានក្លែង​ក្លាយ» និង​ ចូល​រួម​លើក​កម្ពស់​ចំណេះ​ដឹងក្នុង​ការ​​​ប្រើ​ប្រាស់​បណ្តាញ​ទំនាក់​ទំនង​សង្គម​ប្រកប​ដោយ​ការ​ទទួល​ខុស​ត្រូវ​ខ្ពស់ និង​ ពង្រឹង​ចំណេះ​ដឹង​ព័ត៌មាន និង​ ប្រព័ន្ធ​ផ្សព្វ​ផ្សាយ​នៅក្នុង​សាលា​រៀន និង សហគមន៍​យើង។​​

សូមបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»ត្រូវបានប្រកាសដាក់ឲ្យដំណើរការជាផ្លូវការ កាលពីថ្ងៃទី ១៨ ខែឧសភា ឆ្នាំ ២០២៦ នៅវិទ្យាល័យ សម្តេច ហ៊ុន សែន ប៊ុន រ៉ានី វត្តភ្នំ ក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន។ យុទ្ធនាការជំហានទី ២ នេះ បាននិងកំពុងធ្វើដំណើរទៅតាមបណ្តាវិទ្យាល័យ អនុវិទ្យាល័យ ក្នុងរាជធានីភ្នំពេញ ខេត្តព្រះវិហារ តាកែវ កំពង់ស្ពឺ កំពត និង បន្តទៅខេត្តផ្សេងៗ ទៀត ជាបន្តបន្ទាប់ នៅទូទាំងប្រទេស ក្នុងឆ្នាំ ២០២៦ នេះ៕

The post លោក ទេព អស្នារិទ្ធ ណែនាំយុវជនប្រើបច្ចេកវិទ្យាឲ្យចំគោលដៅ និង ប្រុងប្រយ័ត្នចំពោះព័ត៌មានក្លែងក្លាយ appeared first on Kampuchea Thmey Daily.