កម្ពុជា ជាប្រទេសមួយក្នុងចំណោមប្រទេសចំនួនពីរនៅតំបន់អាស៊ីអាគ្នេយ៍ ដែលបានលុបចោលទោសប្រហារជីវិត។ កម្ពុជាបានលុបទោសប្រហារជីវិត ចាប់តាំងពីឆ្នាំ១៩៨៩ ដូចមានចែងក្នុងរដ្ឋធម្មនុញ្ញកម្ពុជាឆ្នាំ១៩៨៩ និងរដ្ឋធម្មនុញ្ញឆ្នាំ១៩៩៣។

ការលុបទោសប្រហារជីវិតនេះ មានតម្លៃជាគោលការណ៍ដែលមានចែងក្នុងរដ្ឋធម្មនុញ្ញ ហើយការកំណត់នៅក្នុងរដ្ឋធម្មនុញ្ញនេះ គឺជាការផ្ដល់តម្លៃទៅដល់សិទ្ធិរស់រានមានជីវិត និងការគោរពសេចក្ដីថ្លៃថ្នូររបស់មនុស្ស ស្របតាមច្បាប់អន្តរជាតិ និងបរិបទសង្គម និងប្រវត្តិសាស្ត្ររបស់កម្ពុជា ដែលធ្លាប់បានឆ្លងកាត់នូវរបបប្រល័យពូជសាសន៍ ដែលធ្វើឱ្យបាត់បង់ជីវិតមនុស្សរាប់លាននាក់។

លោក កើត រិទ្ធ បានបញ្ជាក់អំពីជំហររបស់រាជរដ្ឋាភិបាលកម្ពុជាក្នុងការគាំទ្រ និងរៀបចំនីតិវិធីផ្ដល់សច្ចាប័នលើពិធីសារបន្ថែមទី២ លើកតិកាសញ្ញាអន្តរជាតិស្ដីពីសិទ្ធពលរដ្ឋនិងសិទ្ធិនយោបាយ ក្នុងគោលបំណងលុបបំបាត់ទោសប្រហារជីវិត។ ការផ្តល់សច្ចាប័ននេះ លោក ថា ជាជំហានថ្មីមួយ ដែលស្របជាមួយនឹងរដ្ឋធម្មនុញកម្ពុជា និងការអនុវត្តនៅកម្ពុជាជាង ៣ទសវត្សរ៍កន្លងមក និងក៏ជាការប្តេជ្ញាចិត្តដ៏មោះមុតរបស់កម្ពុជានៅលើឆាកអន្តរជាតិចំពោះការលុបបំបាត់ទោសប្រហារជីវិត និងការលើកកម្ពស់សិទ្ធិមនុស្ស យុត្តិធម៌ និងសេចក្តីថ្លៃថ្នូររបស់មនុស្សគ្រប់រូប។

ក្រោយពីការផ្ដល់សច្ចាប័នលើពិធីសារបន្ថែមនេះ កម្ពុជានឹងមានកាតព្វកិច្ចជាអន្តរជាតិ ដោយមិនត្រូវបង្កើតឱ្យមានទោសប្រហារជីវិតឡើងវិញឡើយនាពេលអនាគត។ ឧបនាយករដ្ឋមន្ត្រី កើត រិទ្ធ លើកឡើងបន្ថែមដូច្នេះក្នុងវេទិកានៅឯប្រទេសបារាំង។

គួរឱ្យដឹងថា លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានអញ្ជើញដឹកនាំគណៈប្រតិភូក្រសួងយុត្តិធម៌ចូលរួមសន្និសីទលើកទី៩ ស្ដីពីការប្រឆាំងទោសប្រហារជីវិត ដែលត្រូវបានប្រព្រឹត្តទៅចាប់ពីថ្ងៃទី៣០ ខែមិថុនា ដល់ថ្ងៃទី២ ខែកក្កដា ឆ្នាំ២០២៦ នៅទីក្រុងប៉ារីស ប្រទេសបារាំង។ សន្និសីទនេះ មានការចូលរួមពីតំណាងជាន់ខ្ពស់នៃប្រទេស និងអង្គការអន្តរជាតិធំៗចំនួន១៩ និងមានការចូលរួមឡើងថ្លែងមតិពីសំណាក់លោក Emmanuel Macron ប្រធានាធិបតីបារាំងផងដែរ៕

The post កម្ពុជានៅតែប្ដេជ្ញាចិត្តចំពោះការលុបបំបាត់ទោសប្រហារជីវិត appeared first on Kampuchea Thmey Daily.

ភ្នំពេញ ៖ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងលោកសន្តិបណ្ឌិត ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គ.ប.ឆ.ប. បានអញ្ជើញដឹកនាំកិច្ចប្រជុំដើម្បីពង្រឹងវិធានការអនុវត្តច្បាប់ ស្តីពី ការប្រឆាំងការឆបោកតាមប្រព័ន្ធបច្ចេកវិទ្យា ។

ក្នុងកិច្ចប្រជុំធ្វើឡើងនៅថ្ងៃទី១៦ ខែមិថុនា ឆ្នាំ២០២៦ បានពិនិត្យ និងពិភាក្សាលើការអនុវត្តច្បាប់ប្រឆាំងការឆបោកតាមប្រព័ន្ធបច្ចេកវិទ្យានាពេលកន្លងមក ដើម្បីស្វែងយល់ឱ្យកាន់តែច្បាស់អំពីការអនុវត្តច្បាប់ជាក់ស្តែង និងបញ្ហាប្រឈមចំពោះមុខក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ។

ក្នុងកិច្ចប្រជុំក៏បានដាក់ចេញនូវដំណោះស្រាយ និងវិធានការចាំបាច់នានា ក្នុងការពង្រឹងវិធានការអនុវត្តច្បាប់ឱ្យកាន់តែមានប្រសិទ្ធភាព នៅតាមសាលាជម្រះក្តី និងអង្គការអយ្យការអមសាលាជម្រះក្តី សំដៅធានាឱ្យបាននូវភាពជោគជ័យក្នុងការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យាពីកម្ពុជា និងទប់ស្កាត់កុំឱ្យឧក្រិដ្ឋកម្មក្នុងទ្រង់ទ្រាយធំវិលត្រឡប់មកកម្ពុជាវិញ ដែលជាគោលនយោបាយអាទិភាពររបស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

សូមបញ្ជាក់ថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានរដ្ឋសភានៃព្រះរាជាណាចក្រកម្ពុជាអនុម័តកាលពីថ្ងៃទី៣០ ខែមីនា ឆ្នាំ២០២៦ ហើយដែលព្រឹទ្ធសភាបានពិនិត្យចប់សព្វគ្រប់លើទម្រង់ និងគតិច្បាប់នេះទាំងស្រុងកាលពីថ្ងៃទី៣ ខែមេសា ឆ្នាំ២០២៦ នាសម័យប្រជុំព្រឹទ្ធសភាជាវិសាមញ្ញ នីតិកាលទី៥នោះ ត្រូវបានប្រកាសដាក់ឱ្យប្រើប្រាស់ជាផ្លូវការនៅក្នុងខែមេសា ឆ្នាំ២០២៦ ដើម្បីបង្កើនប្រសិទ្ធភាពក្នុងការបង្ការ ទប់ស្កាត់ និងបង្ក្រាបបទល្មើសបោកប្រាស់តាមអនឡាញ (Online Scams) ។ ច្បាប់នេះ ក៏កំណត់វិធានផ្នែកព្រហ្មទណ្ឌដើម្បីលើកកម្ពស់ប្រសិទ្ធភាពនៃការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា សំដៅការពារសន្តិសុខ សណ្តាប់ធ្នាប់សាធារណៈ និងសេដ្ឋកិច្ចជាតិ៕

The post ក្រសួងយុត្តិធម៌ និងលេខាធិការដ្ឋាន គ.ប.ឆ.ប. ជំរុញពង្រឹងការអនុវត្តច្បាប់ប្រឆាំងការឆបោកតាមប្រព័ន្ធបច្ចេកវិទ្យា appeared first on Kampuchea Thmey Daily.

នៅក្នុងជំនួបពិភាក្សាការងារជាមួយលោក KIM Chang Yong ឯកអគ្គរដ្ឋទូតកូរ៉េខាងត្បូងប្រចាំនៅកម្ពុជា កាលពីរសៀលថ្ងៃទី២០ ខែឧសភា ឆ្នាំ២០២៦ លោក កើត រិទ្ធ បានគូសបញ្ជាក់យ៉ាងច្បាស់ពីការប្ដេជ្ញាចិត្ត និងកិច្ចខិតខំប្រឹងប្រែងយ៉ាងខ្លាំងរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងបទល្មើសឆបោកតាមប្រព័ន្ធបច្ចេកវិទ្យា។ខណៈបទល្មើសប្រភេទនេះបានក្លាយជាបញ្ហាសកល ហើយកម្ពុជាជាប្រទេសមួយដែលរងគ្រោះ និងបានខូចឈ្មោះនៅលើឆាកអន្តរជាតិដោយតែ Online Scam នេះ។

លោកឧបនាយករដ្ឋមន្ត្រី កើត​ រិទ្ធ និងលោកឯកអគ្គរដ្ឋទូត KIM Chang Yong ក៏បានពិភាក្សាពីការពង្រឹងកិច្ចការងារមួយចំនួនបន្ថែមទៀត ជាពិសេសពាក់ព័ន្ធការស្វែងរកនូវកិច្ចសហប្រតិបត្តិការផ្នែកច្បាប់ឱ្យកាន់តែជិតស្និទ្ធរវាងកម្ពុជា និងកូរ៉េ និងបញ្ហាឧក្រិដ្ឋកម្មឆ្លងដែន រាប់តែបទល្មើស Online Scam។ ភាគីទាំងពីរបានបញ្ជាក់ពីការត្រៀមខ្លួនរួចជាស្រេចក្នុងការបន្ត និងពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែស៊ីជម្រភ និងរឹងមាំឡើង។

ទាក់ទងបញ្ហា Online Scams ជាការកត់សម្គាល់ កម្ពុជា និងកូរ៉េខាងត្បូង តាមរយៈកងកម្លាំងអនុវត្តច្បាប់នៃប្រទេសទាំងពីរ បានចាប់ដៃគ្នាយ៉ាងស្អិតរមួតក្នុងការការបង្ការ ទប់ស្កាត់ និងបង្ក្រាបបទល្មើសប្រភេទនេះ ពិសេសដែលកើតមានក្នុងប្រទេសកម្ពុជា។ ប៉ូលិសជាតិកម្ពុជា និងប៉ូលិសជាតិកូរ៉េ បានបង្កើតក្រុមការងាររួមមួយដោយផ្ដោតលើប្រយុទ្ធប្រឆាំងឧក្រិដ្ឋកម្មឆ្លងដែននានា រាប់ទាំងបទល្មើសឆបោកតាមប្រព័ន្ធបច្ចេកវិទ្យា ដែលពាក់ព័ន្ធជាមួយជនជាតិកូរ៉េនៅកម្ពុជា។ ជាលទ្ធផលជាក់ស្ដែង មានជនជាតិកូរ៉េខាងត្បូងមួយចំនួន ដែលសង្ស័យពាក់ព័ន្ធនៅក្នុងបទល្មើសនេះត្រូវបានបញ្ជូនចេញពីកម្ពុជា៕

ដោយ៖​ ធឿន វ៉ាន់សុង

The post រដ្ឋមន្ត្រីក្រសួងយុត្តិធម៌បន្តប្រាប់កូរ៉េពីការឆន្ទៈរដ្ឋាភិបាលកម្ពុជាក្នុងការបោសសម្អាត Online Scam appeared first on Kampuchea Thmey Daily.

លោក បានផ្ដាំថា ត្រូវខិតខំរៀនសូត្រ និងក្រេបយកចំណេះដឹងពីវគ្គបណ្តុះបណ្តាលនេះដោយយកចិត្តទុកដាក់ខ្ពស់ ទាំងក្នុងក្របខ័ណ្ឌផ្នែកបច្ចេកទេស ទាំងក្នុងក្របខ័ណ្ឌផ្នែកអនុវត្តជាក់ស្តែង ទាំងលើការពង្រឹងវិន័យ និងក្រមសីលធម៌វិជ្ជាជីវៈ ដើម្បីឱ្យខ្លួនឯងមានសមត្ថភាពខ្ពស់នៅពេលចេញទៅបម្រើការងារក្នុងវិជ្ជាជីវៈរបស់ខ្លួន។

ទន្ទឹមនឹងការខិតខំរៀនសូត្រ លោក កើត រិទ្ធ បានណែនាំឱ្យយកចិត្តទុកដាក់ក្នុងការតាមដាន និងក្តាប់ឱ្យបាននូវទិសដៅការងារកែទម្រង់របស់រាជរដ្ឋាភិបាល ជាពិសេសការងារកែទម្រង់ និងការវិវត្តនានាក្នុងវិស័យយុត្តិធម៌។ លោក បានប្រាប់ទៅកាន់សិស្សវិជ្ជាជីវៈក្នុងវិស័យតុលាការទាំងនោះថា រាជរដ្ឋាភិបាលអាណត្តិទី៧ បានកំណត់យកគោលការណ៍“គុណាធិបតេយ្យ” ជាគោលការណ៍ក្នុងការតែងតាំងមុខតំណែងទទួលខុសត្រូវនានា ដែលគោលការណ៍នេះក៏ត្រូវបានអនុវត្តនៅក្នុងវិស័យយុត្តិធម៌ផងដែរ ជាពិសេសក្នុងការចាប់ប៉ុស្តិ៍ទៅបំពេញការងារនៅពេលបញ្ចប់ការបណ្តុះបណ្តាល។

គួរឱ្យដឹងថា សិស្សប្រមាណជិត៣០០រូប ដែលរួមមាន សិស្សចៅក្រម សិស្សព្រះរាជអាជ្ញា សិស្សក្រឡាបញ្ជី សិស្សអាជ្ញាសាលា និងសិស្សសារការី​ ត្រូវបញ្ជូនទៅបណ្ដុះបណ្ដាលបន្ថែមនៅបណ្ឌិត្យសភាភូមិន្ទយុត្តិធម៌កម្ពុជា បន្ទាប់ពីបានខិតខំប្រឹងប្រែងឆ្លងកាត់ការប្រឡងប្រជែងយ៉ាងស្វិតស្វាញ តឹងរឹង ត្រឹមត្រូវ និងប្រកបដោយតម្លាភាព ហើយបានជាប់ជាស្ថាពរ កាលពីពេលកន្លងទៅ។

លោករដ្ឋមន្ត្រី កើត រិទ្ធ ថ្លែងចាត់ទុកនេះជារបត់សំខាន់មួយក្នុងជីវិត ក្នុងការបោះជំហានជាបណ្តើរៗក្លាយខ្លួនជាចៅក្រម ព្រះរាជអាជ្ញា ក្រឡាបញ្ជី អាជ្ញាសាលា និងសារការី ដើម្បីបម្រើឱ្យវិស័យយុត្តិធម៌ ក៏ដូចជាសង្គមជាតិ។

នៅពេលបញ្ចប់វគ្គបណ្តុះបណ្តាលដោយជោគជ័យ ហើយចេញទៅប្រកបវិជ្ជាជីវៈ លោក កើត រិទ្ធ ផ្ដាំបន្ថែមថា ត្រូវខិតខំបំពេញមុខងាររបស់ខ្លួនឱ្យបានត្រឹមត្រូវ និងឱ្យអស់ពីសមត្ថភាពប្រកបដោយភាពស្មោះត្រង់ និងស្មារតីទទួលខុសត្រូវខ្ពស់ ព្រមទាំងប្រកាន់ខ្ជាប់ឱ្យបានម៉ឺងម៉ាត់នូវវិន័យ ក្រមសីលធម៌វិជ្ជាជីវៈ និងឧត្តមគតិ។

លោក សង្កត់ធ្ងន់ថា “ក្នុងនាមជាមន្ត្រីយុត្តិធម៌ត្រូវធ្វើខ្លួនជាបង្អែកដ៏កក់ក្តៅសម្រាប់ប្រជាពលរដ្ឋ ជាពិសេសសម្រាប់ប្រជាពលរដ្ឋ ដែលទទួលរងការរំលោភបំពានដោយអយុត្តិធម៌”។ លោកថា ការប្រកាន់ខ្ជាប់នូវស្មារតីនេះនឹងរួមចំណែកក្នុងការលើកកម្ពស់គុណភាពសេវាយុត្តិធម៌ និងគុណភាពនៃយុត្តិធម៌ជូនប្រជាពលរដ្ឋ ក៏ដូចជាលើកកម្ពស់កិត្តិយស និងសេចក្តីថ្លៃថ្នូររបស់មន្រ្តីនៅក្នុងវិស័យយុត្តិធម៌៕

The post រដ្ឋមន្ត្រីក្រសួងយុត្តិធម៌ផ្ដាំសិស្សវិជ្ជាជីវៈក្នុងវិស័យតុលាការ ត្រូវអភិវឌ្ឍសមត្ថភាពឱ្យខ្លាំង ពេលចេញបម្រើការងារ appeared first on Kampuchea Thmey Daily.

តាមក្រសួងយុត្តិធម៌ អគ្គនាយកដ្ឋានកិច្ចការទោសព្រហ្មទណ្ឌ ដាក់ឱ្យដំណើរការនូវប្រព័ន្ធ Hotline មួយខ្សែ ដែលមានលេខទំនាក់ទំនង 014 511 111 ដែលក្រសួង បានអះអាងថា ប្រព័ន្ធនេះ នឹងបង្កលក្ខណៈងាយស្រួលក្នុងការសាកសួរព័ត៌មានពីសេវាព្រឹត្តិបត្រថ្កោលទោសឱ្យកាន់តែលម្អិត ឆាប់រហ័សប្រកបដោយមានប្រសិទ្ធភាពខ្ពស់។

ក្នុងការពង្រឹងពង្រីកសេវាព្រឹត្តិបត្រថ្កោលទោសនេះ កិច្ចប្រជុំក្រុមការងារជំនាញរបស់ក្រសួងយុត្តិធម៌ ក៏បានពិភាក្សា និងរៀបចំធ្វើបច្ចុប្បន្នភាពប្រព័ន្ធព្រឹត្តិបត្រថ្កោលទោសឌីជីថលឱ្យកាន់តែមានភាពងាយស្រួលសម្រាប់អ្នកនៅបរទេស។ការធ្វើបច្ចុប្បន្នភាពប្រព័ន្ធទំនើបនេះ ត្រូវបានក្រសួង បញ្ជាក់ថា នឹងផ្តល់ការអនុញ្ញាតឱ្យអ្នកនៅបរទេសមានការស្នើសុំព្រឹត្តិបត្រថ្កោលទោស និងទូទាត់សេវាថ្កោលទោស ព្រមទាំងសេវាប្រៃសណីយ៍សម្រាប់ការផ្ញើទៅកាន់អាសយដ្ឋានរបស់ខ្លួន នៅបរទេសតាមរយៈ online តែម្តង។

គួរជម្រាបថា ការធ្វើព្រឹត្តិបត្រថ្កោលទោសនៅកម្ពុជា គឺក្នុង​គោលបំណង​​​បញ្ជាក់ភាពស្អាតស្អំ ឬគ្មានទោសរបស់សាមីជន ដែលចូលមកសុំព្រឹត្តិបត្រថ្កោលទោស ដើម្បី​យក​ទៅប្រើ​ប្រាស់តាមតម្រូវការ។ បុគ្គលដែលមានសិទ្ធិទទួលបានសេវានេះ គឺប្រជាពលរដ្ឋខ្មែរ ឬជនបរទេស ដែលចូលមកស្នាក់នៅក្នុងប្រទេសកម្ពុជាដោយស្របច្បាប់ និងនីតិបុគ្គលឯកជន។

លើកិច្ចការងារនេះ កន្លងមក ក្រសួង​យុត្តិធម៌ ​បាន​​ដាក់ឱ្យដំណើរការសេវាព្រឹត្តិបត្រថ្កោលទោសតាមប្រព័ន្ធឌីជីថល ដើម្បីបង្កើនភាពងាយស្រួល និង​ឆាប់​រហ័ស​បន្ថែម​ទៀត​ដល់​សាធារ​ណៈជន ដោយភ្ជាប់ឯកសារមួយចំនួនតាមអនឡាញ ព្រមទាំង​អាច​ទូទាត់​ប្រាក់​សេវា​តាម​ប្រព័ន្ធ​អេឡិចត្រូនិច​ (E-payment)។

ជាក់ស្ដែង CR-MOJ គឺជា App ដែលត្រូវបានដាក់ឱ្យប្រើដោយក្រសួងយុត្តិធម៌ ដើម្បីអនុញ្ញាតឱ្យប្រជាពលរដ្ឋខ្មែរអាចស្នើសុំលិខិតថ្កោលទោសបានយ៉ាងងាយស្រួល ដោយពុំចាំបាច់ធ្វើដំណើរទៅស្នើសុំដោយផ្ទាល់ឡើយ៕

ដោយ៖ ធឿន វ៉ាន់សុង

The post ក្រសួងយុត្តិធម៌ពង្រីកសេវាលិខិតថ្កោលទោស ខណៈប្រព័ន្ធ Hotline សាកសួរព័ត៌មានដាក់ឱ្យប្រើជាផ្លូវការ appeared first on Kampuchea Thmey Daily.

ដើម្បីពន្លឿនលើការងារនេះ ក្រុមការងារចំពោះកិច្ចក្រសួងយុត្តិធម៌ បានរៀបចំកិច្ចប្រជុំជាច្រើនលើកមកហើយគិតចាប់ពីខែកុម្ភៈ ឆ្នាំ ២០២៥ មក ដោយមានការចង្អុលបង្ហាញពីឧបនាយករដ្ឋមន្រ្តី កើត រិទ្ធ រដ្ឋមន្រ្តីក្រសួងយុត្តិធម៌។

លោក គឹម សន្តិភាព រដ្ឋលេខាធិការក្រសួងយុត្តិធម៌ និងជាប្រធានគណៈកម្មការជាតិដោះលែងដោយមានលក្ខខណ្ឌ កាលពីថ្ងៃទី ០៤ ខែឧសភា ឆ្នាំ ២០២៦ បានដឹកនាំកិច្ចប្រជុំពិនិត្យរៀបចំគោលការណ៍ណែនាំលើការងារខាងលើនេះ និងប្រមូលធាតុចូលបន្ថែម ដើម្បីត្រៀមអនុវត្តឱ្យបានឆាប់តាមដែលអាចធ្វើបាន។

“ទោសការងារសហគមន៍” ត្រូវបានអនុញ្ញាតដោយក្រមព្រហ្មទណ្ឌដែលបានដាក់ឱ្យប្រើប្រាស់តាំងពីឆ្នាំ២០០៩មកម្លេះ តែដោយសារបញ្ហាមួយចំនួនដូចជា សាធារណជនមិនទាន់យល់ និងខ្វះដៃគូរទទួលយកទណ្ឌិតទៅធ្វើការងារសហគមន៍ទើបការអនុវត្តន៍ទោសនេះត្រូវបានអូសបន្លាយមកដល់ពេលនេះ។ អ្នកនាំពាក្យក្រសួងយុត្តិធម៌លោក សេង ឌីណា ធ្លាប់ប្រាប់កម្ពុជាថ្មីថា ៖«ទោសការងារសហគមន៍នេះគឺអនុវត្តន៍បានតែចំពោះបទល្មើសស្រាលៗតែប៉ុណ្ណោះ ដែលអាចជួយឱ្យទណ្ឌិតក្នុងការធ្វើសមាហរណកម្មចូលទៅក្នុងសង្គមជាតិផង និងជួយដោះស្រាយភាពចង្អៀតណែននៅក្នុងពន្ធនាគារផងដែរ»។

សូមជម្រាបថា ចំពោះនីតិវិធីដាក់ឱ្យអនុវត្តទោសការងារសហគមន៍ ត្រូវបានអង្គសង្គមស៊ីវិល ដូចជាអង្គការលីកាដូ ដែលធ្វើការលើផ្នែកសិទ្ធិមនុស្ស បានស្វាគមន៍ចំពោះយន្តការនេះ។ គិតត្រឹមឆ្នាំ២០២៤ ពន្ធនាគារកម្ពុជាមានអ្នកទោសជាង ៥ម៉ឺននាក់ ខណៈអគ្គនាយកដ្ឋានពន្ធនាគារមានគម្រោងសាងសង់ពន្ធនាគារបន្ថែម ឬពង្រីកបន្ទប់ឱ្យធំជាងមុខដើមដោះស្រាយបញ្ហាប្រឈម ហើយវិធានការផ្ទេរអ្នកទោសពីពន្ធនាគារមួយទៅពន្ធនាគារមួយទៀតក៏ត្រូវធ្វើឡើងជាបន្តបន្ទាប់ផងដែរ៕

The post ក្រសួងយុត្តិធម៌ កំពុងពន្លឿននីតិវិធី ដើម្បីដាក់ឱ្យដំណើរការអនុវត្តទោសការងារសហគមន៍ សម្រាប់សំណុំរឿងព្រហ្មទណ្ឌ appeared first on Kampuchea Thmey Daily.

នាយករដ្ឋមន្ត្រី សម្តេចធិបតី ហ៊ុន ម៉ាណែត កាលពីពេលថ្មីៗនេះ បានណែនាំឱ្យរដ្ឋមន្ត្រីក្រសួងយុត្តិធម៌ លោក កើត រិទ្ធ នាយឧត្តមសេនីយ៍ ស ថេត អគ្គស្នងការនគរបាលជាតិ និងនាយឧត្តមសេនីយ៍ វង្ស ពិសេន អគ្គមេបញ្ជាការកងទ័ព ធ្វើការសិក្សាលើទិដ្ឋភាពផ្លូវច្បាប់ដើម្បីយកក្មេងទំនើង ដែលកំពុងជាប់ឃុំទៅធ្វើការងារដែលបម្រើឱ្យសមរភូមិមុខ ដូចជាការដាំបន្លែ និងចាក់បេតុងលេណដ្ឋាន ជាដើម។

អនុវត្តតាមការណែនាំនេះ លោកស្រី ឌី ម៉ូឡានី អ្នកនាំពាក្យក្រសួងយុត្តិធម៌ បានប្រាប់«កម្ពុជាថ្មី»នៅថ្ងៃទី៤ ខែឧសភា ឆ្នាំ២០២៦នេះ ថា កិច្ចការនេះ ក្រសួងកំពុងពិនិត្យសិក្សានៅកម្រិតបច្ចេកទេស ដោយគូសបញ្ជាក់ថា ក្រុមការងារដែលមានការពាក់ព័ន្ធកំពុងតែពិនិត្យសិក្សាឱ្យបានច្បាស់លាស់ និងដោយប្រុងប្រយ័ត្នលើកិច្ចការនេះ។ តែយ៉ាងណា អ្នកនាំពាក្យរូបនេះ ពុំទាន់អាចកំណត់នូវរយៈពេលជាក់លាក់ណាមួយនោះទេសម្រាប់ការពិនិត្យសិក្សាលើទិដ្ឋភាពច្បាប់នេះ។

ជាការកត់សម្គាល់កាលពីថ្ងៃទី២៩ ខែមេសា ឆ្នាំ២០២៦ លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានដឹកនាំកិច្ចប្រជុំមួយ ដែលមានការចូលរួមពីសំណាក់មន្រ្តីជំនាញក្រសួងយុត្តិធម៌ ព្រមទាំងព្រះរាជអាជ្ញាអមសាលាជម្រះក្តីមួយចំនួន ដើម្បីពិនិត្យលើក្របខ័ណ្ឌច្បាប់ពាក់ព័ន្ធនឹងវិធានការដែលត្រូវអនុវត្តចំពោះករណីក្មេងទំនើង។

ជុំវិញបំណងបញ្ជូនក្មេងទំនើងទៅសមរភូមិនេះ ក៏មានមតិលើកឡើងផ្សេងៗគ្នាជាច្រើន រាប់ទាំងការរិះគន់ផងដែរ ប៉ុន្តែសម្តេចធិបតី បានចេញមកបញ្ជាក់ថា ក្មេងទំនើងមិនបញ្ជូនទៅកាន់អាវុធនៅសមរភូមិជួរមុខនោះទេ គឺសម្រាប់បម្រើសកម្មភាពសមរភូមិជួរមុខ ដូចជាការចាក់បេតុងប៉ុណ្ណោះ។

សម្ដេចធិបតីបានលើកឡើងក្នុងពិធីសំណេះសំណាល​ជាមួយមន្ត្រីរាជការ បុគ្គលិក កម្មករកំពង់ផែស្វយ័តក្រុងព្រះសីហនុ កាលពីថ្ងៃទី១ ខែឧសភា ឆ្នាំ២០២៦ ថា គ្មានគោលការណ៍ឱ្យធ្វើច្បាប់ថ្មីទេ គឺឱ្យសិក្សាច្បាប់ចាស់ ហើយការឱ្យយកក្មេងទំនើងទៅបម្រើសកម្មភាពនៅសមរភូមិមុខ មិនមែនបញ្ជូនទៅសមរភូមិមុខទេ។ សម្ដេច បានគូសបញ្ជាក់យ៉ាងច្បាស់ថា មិនយកក្មេងទំនើងទៅកាន់កាំភ្លើង ដែលអាចធ្វើឱ្យខូចសណ្តាប់ធ្នាប់កងទ័ពនោះទេ។

តាមការបញ្ជាក់របស់សម្តេចធិបតី ជាគោលគំនិត ក្មេងទំនើងប្រព្រឹត្តខុសច្បាប់ត្រូវអនុវត្តច្បាប់ជាធរមាន ខណៈការបញ្ជូនក្មេងទំនើងទៅបម្រើការនៅសមរភូមិមុខ ជាការគិតគូរពីវិធានការដែលផ្តោតលើការអប់រំ កែប្រែ និងស្តារនីតិសម្បទារបស់ក្មេងទំនើង សំដៅធានាការធ្វើសមាហរណកម្មវិលត្រឡប់ចូលសង្គមវិញរបស់ពួកគេ ជាជាងការជាប់ឃុំនៅក្នុងពន្ធនាគារដោយឥតប្រយោជន៍។ ម្យ៉ាង ក៏ជាការដាស់តឿនដល់ក្រុមក្មេងទំនើងឱ្យដឹងពីការលះបង់របស់កងទ័ពក្នុងកិច្ចការពារជាតិនៅតាមព្រំដែន ក្នុងពេលដែលពួកគេជាយុវជននេះបែរជាបង្កការអុកឡុកក្នុងសង្គមទៅវិញ៕

ដោយ៖ ធឿន វ៉ាន់សុង

The post ក្រសួងយុត្តិធម៌កំពុងពិនិត្យដោយប្រុងប្រយ័ត្នលើផ្លូវច្បាប់ពាក់ព័ន្ធការយកក្មេងទំនើងទៅបម្រើការនៅសមរភូមិមុខ appeared first on Kampuchea Thmey Daily.

កម្មវិធីបណ្ដុះបណ្ដាលនេះបានបើកជាផ្លូវការនាព្រឹកថ្ងៃទី២៤ ខែមេសា ឆ្នាំ២០២៦ ក្រោមវត្តមានរបស់ឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ នៅឯបណ្ឌិត្យសភាភូមិន្ទយុត្តិធម៌កម្ពុជា។

គួរកត់សម្គាល់ថា មន្ត្រីទាំង៣០រូបនេះ ជាអតីតបេក្ខជនដែលត្រូវបានជ្រើសរើសដោយផ្ទាល់ពីសំណាក់លោកឧបនាយករដ្ឋមន្រ្តី កើត រិទ្ធ តាមរយៈការធ្វើសម្ភាសផ្ទាល់មាត់ កាលពីថ្ងៃទី៦ ខែកុម្ភៈ ឆ្នាំ២០២៦ ដើម្បីឱ្យចូលបម្រើការងារជាមន្ត្រីជាប់កិច្ចសន្យាបច្ចេកទេសជំនាញច្បាប់នៅក្រសួងយុត្តិធម៌ ហើយនេះជាមន្ត្រីកិច្ចសន្យាជំនាន់ទី២ ក្នុងចំណោមបេក្ខជនដែលបានដាក់ពាក្យប្រឡងប្រជែងសរុបចំនួន២៧១រូប។

សម្រាប់កម្មវិធីបណ្តុះបណ្តាលពេលនេះ ក្រសួងយុត្តិធម៌ បញ្ជាក់ថា រៀបចំឡើងក្នុងគោលបំណងពង្រឹងសមត្ថភាព និងចំណេះដឹង ក៏ដូចជាតម្រង់ទិសដល់មន្រ្តីជាប់កិច្ចសន្យាបច្ចេកទេសទាំង ៣០រូប ដើម្បីត្រៀមលក្ខណៈទៅបំពេញការងារនៅតាមអង្គភាពនានាចំណុះក្រសួងយុត្តិធម៌ ដោយផ្ដោតការបណ្ដុះបណ្ដាលពីរចនាសម្ព័ន្ធរបស់ក្រសួងយុត្តិធម៌ មុខងារ និងក្រមសីលធម៌មន្ត្រី ការងារជំនាញតាមអង្គភាពចំណុះ ការរៀបចំ និងការតាក់តែងលិខិតបទដ្ឋានគតិយុត្ត ព្រមទាំងការងារពាក់ព័ន្ធផ្សេងៗទៀត។

កម្មវិធីបណ្តុះបណ្តាលសម្រាប់មន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ នេះ នឹងប្រព្រឹត្តទៅរយៈពេល១ ខែ នៅបណ្ឌិត្យសភាភូមិន្ទយុត្តិធម៌កម្ពុជា។ 

លោក កើត រិទ្ធ បានលើកឡើងនៅក្នុងពិធីបើកកម្មវិធីបណ្ដុះបណ្ដាលនេះ ដោយបានគូសបញ្ជាក់ដល់មន្ត្រីជាប់កិច្ចសន្យាទាំង៣០រូប អំពីគោលការណ៍នៃការជ្រើសរើសមន្ត្រី ដែលបានកំណត់យកគោលការណ៍ “គុណាធិបតេយ្យ” គឺ “អ្នកមានសមត្ថភាព ត្រូវបំពាក់សមត្ថកិច្ច ហើយអ្នកមានសមត្ថកិច្ច ត្រូវបំពាក់សមត្ថភាព”។ ក្នុងន័យនេះ លោក ក៏បានណែនាំថា នេះជាឱកាសមួយដែលអនុញ្ញាតឱ្យមន្ត្រីជាប់កិច្ចសន្យាបានបង្ហាញនូវសមត្ថភាពរបស់ខ្លួន និងអាចចូលរួមជាមួយវិស័យយុត្តិធម៌ក្នុងការបម្រើប្រជាពលរដ្ឋបាន៕

ដោយ៖ ធឿន វ៉ាន់សុង

The post រដ្ឋមន្ត្រីក្រសួងយុត្តិធម៌ជួបមន្ត្រីកិច្ចសន្យាដែលទើបប្រឡងជាប់ ដោយជំរុញឱ្យខិតខំធ្វើការអស់ពីសមត្ថភាព appeared first on Kampuchea Thmey Daily.