ក្នុងដំណើរការនៃការធ្វើជំរឿននៅក្រសួងអធិការកិច្ច លោករដ្ឋមន្រ្តី បានអញ្ជើញចូលរួមធ្វើជំរឿនដោយផ្ទាល់ ព្រមទាំងមានការអញ្ជើញចូលរួមពីថ្នាក់ដឹកនាំ និងមន្រ្តីរាជការគ្រប់ជាន់ថ្នាក់នៃក្រសួងអធិការកិច្ចជាបន្តបន្ទាប់ ដើម្បីធ្វើជំរឿនដោយផ្ទាល់ តាមការកំណត់ដោយគណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធ និងក្រុមការងារចុះជំរឿនរបស់ក្រសួងអធិការកិច្ច។

សូមជម្រាបថា ការធ្វើជំរឿនមន្ត្រីជាក់ស្តែង នៅទីស្តីការក្រសួងអធិការកិច្ច មានរយៈពេល ២ថ្ងៃ គឺថ្ងៃទី២៦ និងទី២៧ ខែឧសភា ឆ្នាំ២០២៦ នៅទីស្តីការក្រសួង។ ដំណើរការចុះជំរឿនរយៈពេល ២ថ្ងៃនេះ គឺធ្វើឡើងដើម្បីអនុវត្តតាមការណែនាំរបស់រាជរដ្ឋាភិបាល ក្នុងការជំរុញការធ្វើជំរឿនមន្ត្រីរាជការស៊ីវិលទូទាំងប្រទេសរបស់ក្រសួងមុខងារសាធារណៈ សំដៅផ្ទៀងផ្ទាត់ទិន្នន័យក្នុងប្រព័ន្ធព័ត៌មាន ឱ្យស្របនឹងចំនួនមន្ត្រីដែលកំពុងបំពេញភារកិច្ចជាក់ស្តែង។

ការធ្វើជំរឿននេះ មិនត្រឹមតែជាការចូលរួមចំណែកក្នុងយុទ្ធសាស្ត្រកំណែទម្រង់រដ្ឋបាលសាធារណៈរបស់រាជរដ្ឋាភិបាលប៉ុណ្ណោះទេ ប៉ុន្តែថែមទាំងជាគ្រឹះដ៏សំខាន់ក្នុងការធ្វើបច្ចុប្បន្នភាពរចនាសម្ព័ន្ធផ្ទៃក្នុង ដើម្បីធានាបាននូវតម្លាភាព គណនេយ្យភាព និងបង្កើនប្រសិទ្ធភាពនៃការគ្រប់គ្រងធនធានមនុស្សរបស់ក្រសួងផងដែរ។

គួរឱ្យដឹងដែរថា ក្រសួងអធិការកិច្ច ជាក្រសួងទី៨ ដែលគណៈកម្មការជំរឿន​ បានធ្វើជំរឿនមន្ត្រីជាក់ស្តែង បន្ទាប់ពីក្រសួងការបរទេស និងសហប្រតិបត្តិការអន្តរជាតិ៕

The post លោក សុខ សូកេន ចូលរួមធ្វើជំរឿនដោយផ្ទាល់ ក្នុងសកម្មភាពជំរឿនមន្ត្រីជាក់ស្តែងរបស់ក្រសួងអធិការកិច្ច appeared first on Kampuchea Thmey Daily.

យោងតាមសេចក្តីប្រកាសព័ត៌មានរបស់ក្រសួង ក្នុងអំឡុងពេលនៃជំនួបពិភាក្សា រដ្ឋមន្ត្រីក្រសួងអធិការកិច្ច បានសម្តែងការស្វាគមន៍យ៉ាងកក់ក្តៅ និងបានអបអរសាទរចំពោះ លោកអគ្គរដ្ឋទូត ដែលត្រូវបានតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសិង្ហបុរីប្រចាំព្រះរាជាណាចក្រកម្ពុជា។

ទន្ទឹមនេះលោករដ្ឋមន្ត្រី បានបង្ហាញនូវការពេញចិត្តចំពោះចំណងមិត្តភាពដ៏យូរអង្វែង និងកិច្ចសហប្រតិបត្តិការលើគ្រប់វិស័យរវាងកម្ពុជា និងសិង្ហបុរី ដែលបានបង្កើតឡើងតាំងពីឆ្នាំ១៩៦៥ ហើយបាននិងកំពុងបន្តរីកចម្រើនយ៉ាងស៊ីជម្រៅលើវិស័យជាច្រើន រួមមាន៖ ពាណិជ្ជកម្ម វិនិយោគ សន្តិសុខ អប់រំ ទេសចរណ៍ និងនវានុវត្តន៍ឌីជីថល។

ជាមួយគ្នានេះ លោកបានបង្ហាញនូវបំណងក្នុងការសហការយ៉ាងជិតស្និទ្ធជាមួយ លោកឯកអគ្គរដ្ឋទូត ដើម្បីពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំបន្ថែមទៀត ជាពិសេសការជំរុញកិច្ចសហប្រតិបត្តិការក្នុងវិស័យអធិការកិច្ច។

ជាការឆ្លើយតប លោកឯកអគ្គរដ្ឋទូត បានថ្លែងអំណរគុណយ៉ាងជ្រាលជ្រៅចំពោះលោករដ្ឋមន្រ្តី និងបានបញ្ជាក់ពីការគាំទ្រចំពោះគំនិតផ្តួចផ្ដើមយុទ្ធសាស្ត្ររបស់ក្រសួង ព្រមទាំងបាន បញ្ជាក់ពីការប្តេជ្ញាចិត្តក្នុងការពង្រឹងកិច្ចសហប្រតិបត្តិការក្នុងវិស័យអធិការកិច្ច ជាពិសេសកិច្ចសហប្រតិបត្តិការរវាង ក្រសួងអធិការកិច្ច ជាមួយស្ថាប័នពាក់ព័ន្ធនៅប្រទេសសិង្ហបុរី និងបានលើកឡើងអំពីយន្តការអភិបាលកិច្ចក្នុងវិស័យសាធារណៈរបស់ប្រទេសសិង្ហបុរីផងដែរ។

បន្ថែមពីនេះ ភាគីទាំងពីរក៏បានផ្លាស់ប្តូរមតិយោបល់លើបញ្ហាតំបន់ និងសកល ដែលជាក្តីបារម្ភរួមគ្នា និងវឌ្ឍនភាព ក្នុងក្របខណ្ឌនៃកិច្ចសហប្រតិបត្តិការអាស៊ានផងដែរ។

ជាកិច្ចបញ្ចប់ ភាគីទាំងពីរបានបញ្ជាក់ជាថ្មីនូវការប្ដេជ្ញាចិត្តក្នុងការបន្តពង្រឹងកិច្ចសហប្រតិបត្តិការរវាង កម្ពុជា និងសិង្ហបុរី ក្នុងវិស័យអធិការកិច្ច ដើម្បីជាប្រយោជន៍ទៅវិញទៅមកសម្រាប់ប្រទេសទាំងពីរ និងពង្រីកទំនាក់ទំនងរវាងប្រទេសទាំងពីរឱ្យកាន់តែប្រសើរឡើងបន្ថែមទៀត៕

The post កម្ពុជា-សិង្ហបុរី ពង្រឹងចំណងមិត្តភាព និងជំរុញកិច្ចសហប្រតិបត្តិការលើវិស័យអធិការកិច្ច appeared first on Kampuchea Thmey Daily.

លោក ចាន់ កុលបុត្រ មានប្រសាសន៍ថា «ដោយសារតែការគ្រប់គ្រង ដោយសារតែភាពឈ្លាសវៃ នៃការដឹកនាំរបស់រាជរដ្ឋាភិបាលរបស់យើងក្នុងអាណត្តិទី៧នេះ ដែលជាកត្តាធ្វើឱ្យមានសុខសន្តិភាពនៅក្នុងប្រទេសកម្ពុជាយ៉ាងពេញលេញ ទើបធ្វើឱ្យមានវត្តមានរបស់បងប្អូនទាំងអស់គ្នាបានអង្គុយជួបជុំគ្នានៅកន្លែងតែមួយ ពិភាក្សារឿងទុក្ខកង្វល់ បញ្ហាផ្សេងៗ របស់បងប្អូនប្រជាពលរដ្ឋ ក៏ដូចជាបញ្ហាទូទៅក្នុងឃុំសំបួរ ស្រុករមាសហែក»។

ក្នុងឱកាសនោះ លោករដ្ឋលេខាធិការ បានបើឱ្យមានការលើកឡើងសំណូមពរ ទុក្ខលំបាកពីប្រជាពលរដ្ឋដែលបានចូលរួមនៅក្នុងកម្មវិធីនោះ និងដោះស្រាយជូនរាល់បញ្ហារបស់ប្រជាពលរដ្ឋ។

រាល់មតិយោបល់ បញ្ហាប្រឈម និងសំណូមពរដែលបានលើកឡើងក្នុងវេទិកានាថ្ងៃនេះ បើក្នុងករណីដោះស្រាយបានភ្លាមៗ អាជ្ញាធរក៏ដូចជា មន្ទីរពាក់ព័ន្ធ នឹងធ្វើការដោះស្រាយជូនភ្លាមៗ។ ដោយឡែកចំពោះករណីមិនអាចដោះស្រាយបានភ្លាមៗ នោះអាជ្ញាធរស្រុក មន្ទីរពាក់ព័ន្ធ នឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា និងសំណូមពរចោល ឬគេចវេសពីបញ្ហាដែលបានលើកឡើងក្នុងវេទិកានេះឡើយ។ សូមបញ្ជាក់ដែរថា សម្រាប់វេទិកាសាធារណៈនៅឃុំសំបួរ ថ្ងៃនេះទទួលបានសំណូមពរពីប្រជាពលរដ្ឋចំនួន ៧៦សំណូមពរ៕

ដោយ៖ភក្ដី

The post មន្ត្រីជាន់ខ្ពស់ក្រសួងអធិការកិច្ច ចុះសិក្សាស្វែងយល់ពីកង្វល់ និងសំណូមពរពលរដ្ឋ នៅឃុំសំបួរ ស្រុករមាសហែក appeared first on Kampuchea Thmey Daily.

វេទិកាសាធារណៈនេះ ត្រូវបានរៀបចំឡើងកាលពីថ្ងៃទី​០៥ ខែកញ្ញា ឆ្នាំ ២០២៥ ដោយដោយមានការចូលរួមពីលោក សុខ ខារ៉ាម អភិបាលរងខេត្ត តំណាងអភិបាលខេត្តស្វាយរៀង លោកស្រីអភិបាលរងស្រុក កងកម្លាំងប្រដាប់អាវុធ មន្រ្តីរាជការ ​និងបងប្អូនប្រជាពលរដ្ឋជាច្រើននាក់ទៀត។

នាឱកាសនោះ លោក ចាន់ កុលបុត្រ រដ្ឋលេខាធិការក្រសួងអធិការកិច្ច បានមានប្រសាសន៍ថា វេទិកានាថ្ងៃនេះធ្វើឡើងដើម្បីប្រមូលមតិយោបល់ បញ្ហាប្រឈម និងសំណូមពរនានារបស់ប្រជាពលរដ្ឋ យកមកពិភាក្សាស្រាយបំភ្លឺ និងធ្វើការដោះស្រាយឱ្យចំគោលដៅ ប្រកបដោយប្រសិទ្ធិភាព និងទាន់ពេលវេលា។ លោកបញ្ជាក់ទៀតថា វេទិកានេះបានបង្ហាញឱ្យឃើញពីការប្តេជ្ញាចិត្តចូលរួមសហការយ៉ាងខ្លាំងក្លានៅក្នុងដំណើរការនៃការគាំទ្រ និងជំរុញការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិស្របតាមក្របខ័ណ្ឌយុទ្ធសាស្ត្រស្តីពីកំណែទម្រង់វិមជ្ឍការ និងវិសហមជ្ឍការ ឱ្យកាន់តែទទួលបានលទ្ធផលជោគជ័យថ្មីៗឆ្លើយតបទៅនឹងសេចក្តីត្រូវការពិតប្រាកដរបស់ប្រជាពលរដ្ឋនៅមូលដ្ឋាន។

លោក ចាន់ កុលបុត្រ បានបញ្ជាក់ថា៖« រាល់មតិយោបល់ បញ្ហាប្រឈម និងសំណូមពរដែលបានលើកឡើងក្នុងវេទិកានាថ្ងៃនេះ បើក្នុងករណីដោះស្រាយបានភ្លាមៗ អាជ្ញាធរក៏ដូចជា មន្ទីរពាក់ព័ន្ធ នឹងធ្វើការដោះស្រាយជូនភ្លាមៗ»។
ប៉ុន្តែចំពោះករណីមិនអាចដោះស្រាយបានភ្លាមៗ នោះអាជ្ញាធរស្រុក មន្ទីរពាក់ព័ន្ធ ក្រុមប្រឹក្សា និងគណៈអភិបាល នឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា និងសំណូមពរចោល ឬគេចវេសពីបញ្ហាដែលបានលើកឡើងក្នុងវេទិកានេះឡើយ៕

ដោយ៖ ភក្ដី

The post ខេត្តស្វាយរៀង! មន្រ្តីក្រសួងអធិការកិច្ច រៀបចំវេទិកាសាធារណៈដើម្បីដោះស្រាយបញ្ហាប្រឈមពលរដ្ឋ appeared first on Kampuchea Thmey Daily.

វេទិកាសាធារណៈនេះបានរៀបចំឡើងកាលពីព្រឹកថ្ងៃសុក្រ ទី៥ ខែកញ្ញា ឆ្នាំ២០២៥ នៅបរិវេណសាលាឃុំមុខដា ដោយមានការចូលរួមពីលោក សុខ ខារ៉ាម អភិបាលរងខេត្តស្វាយរៀង និងលោក កែវ គង់ អនុរដ្ឋលេខាធិការនៃក្រសួងអធិការកិច្ច ព្រមទាំងលោកអភិបាលស្រុក កងកម្លាំងប្រដាប់អាវុធ មន្រ្តីរាជការ ប្រជាពលរដ្ឋជាច្រើននាក់ទៀត។

លោកស្រី វី ស្រីពៅ រដ្ឋលេខាធិការក្រសួងអធិការកិច្ច លើកឡើងថា នេះដោយសារតែការគ្រប់គ្រង និងភាពឈ្លាសវៃនៃការដឹកនាំរបស់រាជរដ្ឋាភិបាល អាណត្តិទី៧នេះ ដែលជាកត្តាធ្វើឱ្យមានសុខសន្តិភាពនៅប្រទេសកម្ពុជាយ៉ាងពេញលេញ ទើបធ្វើឱ្យមានវត្តមានរបស់ប្រជាពលរដ្ឋបានអង្គុយជួបជុំគ្នានៅកន្លែងតែមួយ ពិភាក្សារឿងទុក្ខកង្វល់ បញ្ហាផ្សេងៗ របស់ប្រជាពលរដ្ឋ ក៏ដូចជាបញ្ហាទូទៅក្នុងសង្កាត់ច្រកម្ទេស ក្រុងបាវិត។

លោកស្រី វី ស្រីពៅ បានបើកឱកាសឱ្យប្រជាពលរដ្ឋលើកឡើងសំណូមពរ ទុក្ខលំបាករបស់ខ្លួនដែលបានចូលរួមនៅក្នុងកម្មវិធីនោះ ដើម្បីអាជ្ញាធរដោះស្រាយជូនរាល់បញ្ហារបស់ប្រជាពលរដ្ឋ។

រាល់មតិយោបល់ បញ្ហាប្រឈម និងសំណូមពរដែលបានលើកឡើងក្នុងវេទិកានោះ បើក្នុងករណីដោះស្រាយបានភ្លាមៗ អាជ្ញាធរ ក៏ដូចជាមន្ទីរពាក់ព័ន្ធ នឹងធ្វើការដោះស្រាយជូនភ្លាមៗ ហើយចំពោះករណីមិនអាចដោះស្រាយបានភ្លាមៗ នោះអាជ្ញាធរស្រុក មន្ទីរពាក់ព័ន្ធ នឹងលើកយកទៅពិភាក្សារកដំណោះស្រាយជូននៅពេលក្រោយបន្តទៀត ដោយមិនទុកបញ្ហា និងសំណូមពរចោល ឬគេចវេសពីបញ្ហាដែលបានលើកឡើងក្នុងវេទិកានេះឡើយ៕

ដោយ:ភក្ដី

The post ក្រសួងអធិការកិច្ចបើកវេទិកាសាធារណៈស្ដាប់ពីកង្វល់ និងសំណូមពរពលរដ្ឋ នៅឃុំមុខដា ស្រុករមាសហែក appeared first on Kampuchea Thmey Daily.

លោកស្រីរដ្ឋលេខាធិការ បានមានប្រសាសន៍ថា ពិធីផ្សព្វផ្សាយច្បាប់នៅពេលនេះ ត្រូវបានរៀបចំឡើងដើម្បីបង្កើនការយល់ដឹងអំពីច្បាប់ និងសិទ្ធិរបស់ប្រជាពលរដ្ឋ រួមចំណែកក្នុងការលើកកម្ពស់សន្តិសុខ សុវត្ថិភាព និងសុខុមាលភាព ព្រមទាំងជីវភាពរស់នៅក្នុងសង្គម និងដើម្បីជាឧត្តមប្រយោជន៍របស់សង្គមជាតិ។

លោកស្រីបន្តថា សម្តេចធិបតី នាយករដ្ឋមន្ត្រី តែងតែក្រើនរំលឹកឱ្យមន្ត្រីអនុវត្តច្បាប់ ពង្រឹងការអនុវត្តច្បាប់ និងការត្រួតពិនិត្យ ព្រមទាំងបានចេញ បទបញ្ជាឱ្យអនុវត្តច្បាប់ចំពោះអ្នកបើកបរទាំងឡាយណា ដែលប្រព្រឹត្តបទល្មើសចរាចរណ៍ជាក់ស្តែង ត្រូវតែអនុវត្តតាម ច្បាប់ឱ្យបានត្រឹមត្រូវ ដោយកុំខ្លាចការអន្តរាគមន៍ព្រោះមាននាយករដ្ឋមន្រ្តីជាបង្អែក។ សម្តេចធិបតី ក៏បានអំពាវនាវ ឱ្យបន្តផ្សព្វផ្សាយច្បាប់ស្តីពីចរារណ៍ផ្លូវគោកឱ្យកាន់តែទូលំទូលាយ ហើយអំពាវនាវឱ្យមហាជន និងសាមីខ្លួនអ្នកបើកបរ ត្រូវចូលរួមគោរពច្បាប់ទាំងអស់គ្នា។

ក្នុងឱកាសនោះដែរ លោកស្រី វី ស្រីពៅ បានអំពាវនាវដល់សាធារណជន ជាអ្នកប្រើប្រាស់ផ្លូវទាំងអស់ ខិតខំយកចិត្តទុកដាក់បង្កើន ស្មារតីចូលរួមបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដោយបើកបរត្រូវគោរពច្បាប់ ត្រូវបើកបរក្នុងស្មារតី ប្រុងប្រយ័ត្នជានិច្ច ប្រកបដោយសីលធម៌ និងការយោគយល់អធ្យាស្រ័យ។ មិនត្រូវបើកបរលើសល្បឿនកំណត់ ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត និងត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យ កង់ ចង្កូត ហ្វាំង ភ្លើងបំភ្លឺ ជាពិសេសមិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត៕

ដោយ៖ភក្ដី

The post មន្ត្រីក្រសួងអធិការកិច្ច ចុះផ្សព្វផ្សាយច្បាប់ស្តីពី «ចរាចរណ៍ផ្លូវគោក» ដល់សិស្សានុសិស្ស នៅស្រុករមាសហែក appeared first on Kampuchea Thmey Daily.

ក្នុងសិក្ខាសាលានេះ លោក សុខ សូកេន រដ្ឋមន្ត្រីក្រសួងអធិការកិច្ច បានលើកឡើងថា “ការពិនិត្យឡើងវិញ ការវិភាគមុខងារនិងរចនាសម្ព័ន្ធក្រសួង ស្ថាប័ន គឺជាកិច្ចការដ៏ចាំបាច់ដែលត្រូវការប្តេជ្ញាចិត្ត គាំទ្រ និងចូលរួមអនុវត្តប្រកបដោយស្មារតីទទួលខុសត្រូវខ្ពស់ ដើម្បីលើកកម្ពស់ដំណើរការរបស់ក្រសួង ស្ថាប័នឱ្យកាន់តែមានប្រសិទ្ធភាព និងស័ក្តិសិទ្ធភាព ក្នុងក្របខណ្ឌបំពេញមុខងារ និងបេសកកម្មរបស់ខ្លួន ឆ្លើយតបទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។” ជាក់ស្តែង ក្រុមការងារពិនិត្យឡើងវិញ ការវិភាគមុខងារនិរចនាសម្ព័ន្ធរបស់ក្រសួងអធិការកិច្ច ដោយមានកិច្ចសហការជាមួយក្រសួងមុខងារសាធារណៈ បានរៀបចំរបាយការណ៍វឌ្ឍនភាពស្តីពីការពិនិត្យឡើងវិញ ការវិភាគមុខងារនិងរចនាសម្ព័ន្ធ និងការធ្វើបច្ចុប្បន្នភាពទិន្នន័យមន្ត្រីរាជការឆ្នាំ២០២៥ តាមសេចក្តីណែនាំរបស់រាជរដ្ឋាភិបាល ដោយបានបំពេញទិន្នន័យ និងផ្ញើឯកសារពាក់ព័ន្ធចប់សព្វគ្រប់ជូនក្រសួងមុខងារសាធារណៈ។

លោកបន្ថែមថា តាមរយៈការពិនិត្យឡើងវិញ ការវិភាគមុខងារ និងរចនាសម្ព័ន្ធក្រសួង ដោយមានការពិគ្រោះយោបល់ ជាមួយក្រសួង ស្ថាប័នជាច្រើន ក្រសួងអធិការកិច្ច ជាអធិការកិច្ចរាជរដ្ឋាភិបាល មានសមត្ថកិច្ចធ្វើអធិការកិច្ចលើគ្រប់វិស័យ ដោយមានចែកក្នុងព្រះរាជក្រឹត្យស្តីពី «ការរៀបចំ និងការប្រព្រឹត្តទៅរបស់ក្រសួងអធិការកិច្ច» មានមុខងារស្នូលចំនួន៤ រួមមាន៖ ១.ការងារអធិការកិច្ច ២.ការងារដោះស្រាយបណ្តឹង ៣.ការងារតាមដានការអនុវត្តច្បាប់ និង ៤.ការងារផ្សព្វផ្សាយច្បាប់ និងវេទិការសាធារណៈ។” “ក្រសួងអធិការកិច្ច បាន និងកំពុងបន្តការពិនិត្យឡើងវិញ ការវិភាគមុខងារនិងរចនាសម្ព័ន្ធក្រសួង ដោយឈរលើអភិក្រមការពង្រឹងរដ្ឋបាលសាធារណៈ «ការពង្រឹងជាជាងពង្រីក» ដើម្បីរៀបចំឡើងវិញ ស្តីពី ការរៀបចំ និងការប្រព្រឹត្តទៅរបស់អង្គភាពចំណុះក្រសួងអធិការកិច្ច និងមន្ទីរថ្នាក់ក្រោមជាតិ សំដៅធានាប្រសិទ្ធភាពការងារ និងជៀសវាងការស្ទួនតួនាទី ភារកិច្ច រវាងអង្គភាពនីមួយៗចំណុះក្រសួងអធិការកិច្ច” នេះបើតាម លោក សុខ សូកេន។

សូមជម្រាបថា សិក្ខាសាលានេះ មានបទបង្ហាញរបស់ថ្នាក់ដឹកនាំក្រសួងមុខងារសាធារណៈ ចំនួនពីររូបរួមមាន៖ (១) ការបង្ហាញពីដំណើរការ នៃការពិនិត្យឡើងវិញ និងការវិភាគមុខងារ និងរចនាសម្ព័ន្ធ របស់ក្រសួង ស្ថាប័ន ដោយលោកស្រី ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ និង (២) ការបង្ហាញពីការងារបំពេញគ្នា គាំទ្រគ្នា និងជំរុញការអនុវត្តការងាររួមគ្នា ក្នុងក្របខណ្ឌការកែទម្រង់ និងពង្រឹងអភិបាលកិច្ច ដោយ លោក យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ រួមទាំងមានការចោទសួរពីសិក្ខាកាមមកកាន់វាគ្មិនទាំង ២រូប ឱ្យកាន់តែមានភាពស៊ីជម្រៅ ព្រមទាំងទទួលបាននូវគោលការណ៍ណែនាំ និងតម្រង់ទិសដ៏ត្រឹមត្រូវពីឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដើម្បីជំរុញ និងពង្រឹងប្រសិទ្ធភាព ការអនុវត្តការងារកែទម្រង់រដ្ឋបាលសាធារណៈ នៅក្នុងអធិការកិច្ចឱ្យកាន់តែប្រសើរបន្ថែមទៀត៕

The post ក្រសួងមុខងារសាធារណៈ និងក្រសួងអធិការកិច្ច ធ្វើសិក្ខាសាលាវិភាគមុខងារដើម្បីលើកកម្ពស់ដំណើរការរបស់ក្រសួងកាន់តែល្អ appeared first on Kampuchea Thmey Daily.

លោក សុខ សូកេន ជាកូនប្រុសទី៣ ក្នុងចំណោមកូន៥នាក់របស់សម្តេចវិបុលបញ្ញា សុខ អាន អតីតឧបនាយករដ្ឋមន្រ្តី ទទួលបន្ទុកទីស្តីការគណៈរដ្ឋមន្រ្តី ហើយលោក ជាកូនប្រុសភ្លោះជាមួយនឹងលោក សុខ សូកាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់។

លោក សុខ សូកេន ទទួលបានការសិក្សាអប់រំ និងបណ្តុះបណ្តាលទាំងក្នុង និងក្រៅប្រទេស ពោលគឺលោកបានបញ្ចប់ថ្នាក់បណ្ឌិត​នៅសាលាសិក្សាអន្តរជាតិនៃសាកលវិទ្យាល័យប៉េកាំង ប្រទេសចិន និងសញ្ញបត្របរិញ្ញាបត្រជាន់ខ្ពស់ផ្នែករដ្ឋបាល​សាធារណៈនៅសាលា លី ក្វាន់យូ នៃសាកលវិទ្យាល័យ​ជាតិ​សិង្ហបុរី។ លោក សុខ សូកេន ក៏មានសញ្ញាបត្របរិញ្ញាបត្រចំនួនពីរ គឺបរិញ្ញាបត្រវិស្វកម្មស៊ីវិល និងបរិញ្ញាបត្រពាណិជ្ជកម្មពី​សាកលវិទ្យាល័យ Melbourne ប្រទេសអូស្រ្តាលី ព្រមទាំងទទួលបានវិញ្ញាបនបត្រផ្នែកអភិវឌ្ឍអចនលទ្រព្យ និងវិញ្ញាបន​បត្រ​ការ​គ្រប់គ្រង​ហិរញ្ញវត្ថុពី​សាកល​វិទ្យាល័យ THOMAS សហរដ្ឋអាមេរិក។

ប្រវត្តិការងារ គឺរដ្ឋមន្ត្រីវ័យ៤១ឆ្នាំរូបនេះ បានឆ្លងកាត់ការងារជាច្រើន ទាំងនៅក្រសួងពាណិជ្ជកម្ម ក្រុមប្រឹក្សាអភិវឌ្ឍន៍កម្ពុជា ក្រសួងការបរទេស និងក្រសួងទេសចរណ៍។ លោក សុខ សូកេន ចូលបម្រើការងារដំបូងនៅក្រសួងពាណិជ្ជកម្ម ក្នុងឆ្នាំ២០០៨ ជាមន្ត្រីនាយកដ្ឋានជំរុញពាណិជ្ជកម្ម ជានាយកស្ដីទីខុទ្ទកាល័យរដ្ឋមន្ត្រីក្រសួងពាណិជ្ជកម្ម និងជាអនុប្រធាននាយកដ្ឋានស្ថិតិ និងព័ត៌មានពាណិជ្ជកម្ម។ នៅឆ្នាំ២០១០ លោក បានផ្ទេរទៅបម្រើការនៅក្រុមប្រឹក្សាអភិវឌ្ឍន៍កម្ពុជា ដែលទទួលបានតួនាទីជាអាទិ៍ អនុប្រធាននាយកដ្ឋានវិភាគគម្រោង និងលើកទឹកចិត្ត (២០១០-២០១៤) និងជាអនុប្រធាននាយករដ្ឋានវិភាគយុទ្ធសាស្ត្រនៃការវិនិយោគឯកជន (២០១៤-២០១៦)។

បន្ទាប់មក លោក ក៏មកកាន់តំណែងជាអនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ រហូតដល់ឆ្នាំ២០២០ ត្រូវបានដំឡើងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។ ជាថ្នាក់ដឹកនាំនៃក្រសួងការបរទេស លោក សុខ សូកេន ត្រូវទទួលបន្ទុកលើការងារជាច្រើន ដូចជា ប្រធានក្រុមការងារគ្រប់គ្រងមូលនិធិ និងតាមដានការអនុវត្តគម្រោង​កិច្ចសហប្រតិបត្តិការមេគង្គ-ឡានឆាង អនុប្រធានក្រុមការងារសម្របសម្រួលការទូតសេដ្ឋកិច្ច ជាអនុប្រធានលេខាធិការដ្ឋានជាតិកម្ពុជានៃ​កិច្ចសហប្រតិបត្តិការមេគង្គ-ឡានឆាង ឧត្តមមន្រ្តីស្តីទីទទួលបន្ទុកកិច្ចសហប្រតិបត្តិការមេគង្គកម្ពុជានិងជាឧត្តមមន្រ្តីសម្រាប់កិច្ចសហប្រតិបត្តិការកម្ពុជា-ឡាវ-មីយ៉ាន់ម៉ា-វៀតណាម និងជាប្រធាន សសយក វិស័យការបរទេស ជាដើម។

នៅក្នុងអាណត្តិរាជរដ្ឋាភិបាល នីតិកាលទី៧ របស់សម្ដេចធិបតី ហ៊ុន ម៉ាណែត, លោក សុខ សូកេន ត្រូវបានជ្រើសជាសមាសភាពរដ្ឋមន្រ្តីថ្មីមួយរូប ដោយត្រូវកាន់តំណែងជារដ្ឋមន្រ្តីក្រសួងទេសចរណ៍ ជំនួសលោក ថោង ខុន។ រយៈពេលជាង១ឆ្នាំនៃតំណែងជារដ្ឋមន្ត្រីទេសចរណ៍ លោក សុខ សូកេន ក៏ត្រូវបានប្រមុខរាជរដ្ឋាភិបាលស្នើរដ្ឋសភាដោះដូរឱ្យទៅកាន់តំណែងជារដ្ឋមន្ត្រីក្រសួងអធិការកិច្ចវិញ។

ក្នុងសម័យប្រជុំជាវិសាមញ្ញ នាថ្ងៃទី២០ ខែកញ្ញា ឆ្នាំ២០២៤ សមាជិក-សមាជិការដ្ឋសភាសរុប១០៦រូប បានបោះឆ្នោតផ្ដល់សេចក្ដីទុកចិត្តទាំងស្រុងលើការកែសម្រួលសមាសភាពលោក សុខ សូកេន ជារដ្ឋមន្ត្រីក្រសួងអធិការកិច្ច និងលោក ហួត ហាក់ ជារដ្ឋមន្ត្រីក្រសួងទេសចរណ៍។

លោក សុខ សូកេន រដ្ឋមន្រ្តីក្រសួងអធិការកិច្ច បានបង្ហាញការប្ដេជ្ញាចិត្តខ្ពស់ក្នុងការខិតខំចូលរួមចំណែកអនុវត្តការងារក្នុងវិស័យអធិការកិច្ចជាមួយថ្នាក់ដឹកនាំ និងមន្រ្តីរាជការនៃក្រសួងអធិការកិច្ចគ្រប់លំដាប់ថ្នាក់ ទាំងថ្នាក់ជាតិ និងនៅថ្នាក់ក្រោមជាតិ និងវិស័យសាធារណៈ និងឯកជនមកពីគ្រប់ភាគីទាំងអស់ ដើម្បីធានាឱ្យបាននូវប្រសិទ្ធភាពការងារ និងភាពរីកចម្រើនបន្តទៀតរបស់ក្រសួងអធិការកិច្ច សំដៅចូលរួមលើកកម្ពស់បន្ថែមទៀតទៅលើអភិបាលកិច្ចល្អ ពង្រឹងភាពស្អាតស្អំក្នុងរដ្ឋបាលសាធារណៈ និងឯកជន និងទប់ស្កាត់អំពើអសកម្មនានាទាំងក្នុងស្ថាប័នរដ្ឋ និងឯកជន។

ម្យ៉ាងវិញទៀត គឺដើម្បីឈានទៅសម្រេចបានការអភិវឌ្ឍប្រកបដោយភាពធន់ ចីរភាព និងបរិយាបន្ន ស្របតាមកម្មវិធីនយោបាយ និងយុទ្ធសាស្រ្តបញ្ចកោណរបស់រាជរដ្ឋាភិបាល សំដៅឆ្ពោះទៅសម្រេចឱ្យបានកម្ពុជាជាប្រទេសចំណូលមធ្យមកម្រិតខ្ពស់ឆ្នាំ២០៣០ និងប្រទេសមានចំណូលខ្ពស់ឆ្នាំ២០៥០៕

អត្ថបទ៖ ធឿន វ៉ាន់សុង

The post តើរដ្ឋមន្ត្រីថ្មីនៃក្រសួងអធិការកិច្ច លោក សុខ សូកេន ជានរណា? appeared first on Kampuchea Thmey Daily.