ក្រុមកីឡាបាល់ទះជម្រើសជាតិកម្ពុជា Archives - Kampuchea Thmey Daily

បងប្អូនបង្កើតត្រកូល Ishikawa ឈ្នះពានអត្តពលិកបាល់ទះល្អបំផុតប្រចាំទ្វីបអាស៊ី

chean virakbot — Wed, 08 Jul 2026 01:05:27 +0000

កីឡាករបាល់ទះជម្រើសជាតិជប៉ុន Yuki Ishikawa និងកីឡាការិនី Mayu Ishikawa ដែលជាបងប្អូនបង្កើត ត្រូវបានសហព័ន្ធកីឡាបាល់ទះទ្វីបអាស៊ី (AVC) ប្រកាសឲ្យឈ្នះពានរង្វាន់កីឡាករ កីឡាការិនីល្អបំផុត ប្រចាំឆ្នាំ ២០២៥។

សហព័ន្ធកីឡាបាល់ទះទ្វីបអាស៊ី បានរៀបចំពានរង្វាន់ជាផ្លូវការលើកដំបូងនៅឆ្នាំ ២០២៦ នេះ ដើម្បីអបអរសាទរជ័យលាភីកីឡាបាល់ទះប្រចាំទ្វីបអាស៊ី កាលពីឆ្នាំ ២០២៥។ កីឡាករ កីឡាការិនី កីឡាបាល់ទះក្នុងសាល កីឡាករ កីឡាការិនីបាល់ទះឆ្នេរខ្សាច់ គ្រូបង្វឹក អាជ្ញាកណ្តាល និងពានរង្វាន់ផ្សេងៗត្រូវបានប្រកាសឈ្មោះអ្នកឈ្នះជាផ្លូវការហើយកាលពីថ្ងៃទី៦ ខែកក្កដា ឆ្នាំ ២០២៦។

ក្នុងចំណោមជ័យលាភីទាំងអស់នោះមានអត្តពលិកកីឡាបាល់ទះជប៉ុនពីរនាក់ដែលជាបងប្អូនបង្កើតទទួលបានរង្វាន់ប្រចាំឆ្នាំនេះ។ កីឡាករ Yuki Ishikawa អាយុ ៣០ ឆ្នាំ កម្ពស់ ១.៩២ ម៉ែត្រ លេងតួនាទីជាអ្នកវាយផ្តាច់ស្លាបសាំ ឈ្នះពានរង្វាន់កីឡាករល្អបំផុត។ កីឡាការិនីជម្រើសជាតិនារីជប៉ុន Mayu Ishikawa អាយុ ២៦ ឆ្នាំ កម្ពស់ ១.៧៤ ម៉ែត្រ លេងតួនាទីជាអ្នកវាយផ្តាច់ស្លាបស្តាំ ដែលជាប្អូនស្រីបង្កើតរបស់កីឡាករ Yuki Ishikawa បានឈ្នះពានកីឡាការិនីល្អបំផុត។ ការផ្តល់ជូនពានរង្វាន់នេះគឺផ្អែកទៅលើសមិទ្ធផលរបស់ពួកគេដែលបានជួយក្រុមបាល់ទះជម្រើសជាតិជប៉ុនលើឆាកអន្តរជាតិ និងក្លិបរបស់ពួកគេនៅក្នុងការប្រកួតផ្សេងៗកាលពីឆ្នាំ ២០២៥។

កីឡាករកាតា Cherif Younousse និង Ahmed Tijan បានឈ្នះពានកីឡាករបាល់ទះឆ្នេរខ្សាច់ល្អបំផុត ខណៈកីឡាការិនីជប៉ុន Asami Shiba និង Reika Murakami បានឈ្នះពានកីឡាការិនីឆ្នេរខ្សាច់ល្អបំផុត។

ក្រុមកីឡាការិនីបាល់ទះកូរ៉េខាងត្បូង បានឈ្នះពាន AVC Women’s Volleyball Cup ឆ្នាំ ២០២៦ ដូច្នេះកីឡាការិនីកូរ៉េខាងត្បូង Kang S-hwi ឈ្នះពានកីឡាការីល្អប្រចាំព្រឹត្តិការណ៍ កីឡាការិនីវៀតណាម Vo Thi Kim Thoa ឈ្នះពានអ្នកប៉ះសេល្អបំផុត និងកីឡាការិនីវៀតណាម Tran Thi Thanh Thuy ឈ្នះពានកីឡាការិនីរកបានពិន្ទុច្រើនជាងគេបំផុត។

ចំពោះពាន AVC Men’s Volleyball Cup ឆ្នាំ ២០២៦ ក្រុមបាល់ទះជម្រើសជាតិឥណ្ឌូណេស៊ី ជាម្ចាស់ផ្ទះជើងឯក។ កីឡាករឥណ្ឌូណេស៊ី Boy Arnez Arabi បានឈ្នះពានកីឡាករល្អប្រចាំព្រឹត្តិការណ៍ និងកីឡាករកាហ្សាស្ថាន Vladislav Mastikhin ឈ្នះពានកីឡាកររកបានពិន្ទុច្រើនជាងគេ។ សម្រាប់ពានក្លិបទ្វីបអាស៊ី AVC Men’s Championship League ដែលក្លិបរបស់ឥណ្ឌូណេស៊ី Jakarta Bhayangkara Presisi ឈ្នះជើងឯកឆ្នាំ ២០២៦ គឺកីឡាកអ៊ីតាលី Noumory Keita ជាអ្នកឈ្នះពានកីឡាករល្អប្រចាំព្រឹត្តិការណ៍។

មិនត្រឹមតែប៉ុណ្ណោះពានគ្រូបង្វឹកល្អ ពានអាជ្ញាកណ្តាលល្អ ពានអ្នកគាំទ្រ និងពានបុគ្គលជោគជ័យក្នុងការងារបាល់ទះក៏ត្រូវបានគេប្រកាសអ្នកឈ្នះរួចរាល់ដែរ។

សូមបញ្ជាក់ថា តាមការគ្រោងទុក សហព័ន្ធកីឡាបាល់ទះទ្វីបអាស៊ី នឹងរៀបចំពិធីប្រគល់ពានរង្វាន់ផ្លូវការលើកទី ១ របស់ខ្លួន (AVC Gala Awards Night) នៅថ្ងៃទី៨ ខែសីហា ឆ្នាំ ២០២៦៕

ប្រែសម្រួល៖ វិរបុត្រ

The post បងប្អូនបង្កើតត្រកូល Ishikawa ឈ្នះពានអត្តពលិកបាល់ទះល្អបំផុតប្រចាំទ្វីបអាស៊ី appeared first on Kampuchea Thmey Daily.

ស្ងាត់ៗស្មាត់ឌូក ឥលូវក្លាយជាគ្រូបង្វឹកបាល់ទះជម្រើសជាតិឆ្នេរខ្សាច់កម្ពុជាហើយ

Sina Noun — Fri, 10 Apr 2026 09:14:57 +0000

កីឡាករចាស់វស្សាក្នុងវិស័យបាល់ទះទាំងក្នុងសាល និងឆ្នេរខ្សាច់ លោក ជុក សោភា ហៅស្មាត់ឌូក នៅឆ្នាំ២០២៦ នេះបានក្លាយជាគ្រូបង្វឹកបាល់ទះវិញ្ញាសាឆ្នេរខ្សាច់ហើយដើម្បីជួយបង្ហាត់បង្រៀនដល់យុវជនជំនាន់ក្រោយត្រៀមការប្រកួតអន្តរជាតិតំណាងកម្ពុជា។

លោក ជុក សោភា

ស្មាត់ឌូក បានបញ្ជាក់កាលពីព្រឹកថ្ងៃទី១០ ខែមេសា ឆ្នាំ២០២៦ នេះថា បច្ចុប្បន្ននេះរូបគេជាប់ជាគ្រូបង្វឹកឆ្នេរខ្សាច់ហើយ ប៉ុន្តែត្រឹមជាគ្រូជំនួយនោះទេ។ រូបគេជាគ្រូជំនួយ ខណៈគ្រូធំនោះគឺលោក ស៊ីម ឃ្លោក ដែលជាគ្រូរបស់ក្រុមបាល់ទះស្នងការ ន.ប រាជធានីភ្នំពេញ។

ការប្រមូលផ្ដុំក្រុមជម្រើសជាតិឆ្នេរខ្សាច់នៅឆ្នាំនេះគឺមានកីឡាករ ៦រូប និងកំពុងហ្វឹកហាត់ពង្រឹងសមត្ថភាព បង្កើនបច្ចេកទេសនៅទីលានក្នុងពហុកីឡដ្ឋានជាតិ។ បើតាមផែនការរបស់ក្រសួងអប់រំ យុវជន និងកីឡា ឆ្នាំនេះមានការប្រមូលផ្ដុំលើ ៤០ប្រភេទកីឡា ដោយឈុតធំរយៈពេល ៧ខែ និងថ្នាលមានរយៈពេល ៩ខែ ដើម្បីត្រៀមការប្រកួតកម្រិតអន្តរជាតិផ្សេងៗ។

លោក ជុក សោភា

បញ្ជាក់ដែរថា លោក ជុក សោភា ហៅស្មាត់ឌូក នេះជាអតីតកីឡាករដែលមានបទពិសោធច្រើនក្នុងវិស័យបាល់ទះមិនថាក្រុមជម្រើសជាតិ ឬបាល់ក្រៅផ្លូវការនោះឡើយ។ រូបគេធ្លាប់ជាប់ជាកីឡាករជម្រើសជាតិបាល់ទះក្នុងសាល និងឆ្នេរខ្សាច់ផងដែរកាលពីកន្លងទៅ។ គ្រូបង្វឹករូបគេក៏ជាមន្ត្រីមួយរូបរបស់ក្រសួងអប់រំ យុវជន និងកីឡាទៀតផង៕

ជុក សោភា និង សួន ចាន់ណារ៉ូ

អត្ថបទដោយ៖ នួន ស៊ីណា

The post ស្ងាត់ៗស្មាត់ឌូក ឥលូវក្លាយជាគ្រូបង្វឹកបាល់ទះជម្រើសជាតិឆ្នេរខ្សាច់កម្ពុជាហើយ appeared first on Kampuchea Thmey Daily.

កីឡាកររបស់ក្រុមស្នងការ ន.ប រាជធានីភ្នំពេញ ឆ្នាំនេះជាប់ជម្រើសជាតិ ៦រូប ក្នុងសាល៥ ឆ្នេរខ្សាច់១

Sina Noun — Thu, 09 Apr 2026 04:19:54 +0000

ក្រុមបាល់ទះស្នងការ ន.ប រាជធានីភ្នំពេញ នៅឆ្នាំនេះបានជាប់ជម្រើសជាតិ និងប្រមូលផ្ដុំហ្វឹកហាត់មានចំនួន ៦រូបក្នុងនោះមាន ៥រូបជាប់ហ្វឹកហាត់វិញ្ញាសាបាល់ទះក្នុងសាល និង ១រូបជាប់លើវិញ្ញាសាបាល់ទះឆ្នេរខ្សាច់ផងដែរដើម្បីត្រៀមការប្រកួតតំណាងកម្ពុជានៅព្រឹត្តិការណ៍អន្តរជាតិផ្សេងៗ។

លោក តឹង សុធី និងកូនក្រុម

បើតាមការបញ្ជាក់ពីលោក ប្រាក់ សារ៉ាន់ឌី ថាការប្រមូលផ្ដុំហ្វឹកហាត់ជម្រើសជាតិនៅឆ្នាំនេះកីឡាកររបស់ក្រុមស្នងការ ន.ប រាជធានីភ្នំពេញ បានជាប់ ៦រូប។ ៥រូបគឺត្រូវហ្វឹកហាត់លើវិញ្ញាសាបាល់ទះក្នុងសាលនោះរួមមាន កីឡាករ រ៉ុន សុខជា ចាន់ វាសនា យ៉ុន ខេមរៈ ឧក រដ្ឋា និងកីឡាករ សាន ចនវិរៈ។ ចំណែកខាងវិញ្ញាសាឆ្នេរខ្សាច់មានតែ ១រូបទេគឺកីឡាករ ទន ទូច។

ក្រុមស្នងការ ន.ប រាជធានីភ្នំពេញ

បញ្ជាក់ដែរថា សហព័ន្ធកីឡាជាតិចំនួន ៤០ និងត្រូវជាជាង ៦០០នាក់បានប្រមូលផ្ដុំក្រុមជម្រើសជាតិដើម្បីហ្វឹកហាត់ចាប់តាំងពីថ្ងៃទី១ ខែមេសា ឆ្នាំ២០២៦ ដើម្បីត្រៀមចូលរួមការប្រកួតកម្រិតអន្តរជាតិតំណាងកម្ពុជានៅពេលខាងមុខនេះ។ សម្រាប់សហព័ន្ធកីឡាបាល់ទះកម្ពុជា ប្រមូលផ្ដុំ និងប្រើប្រាស់ទីតាំងហ្វឹកហាត់ ដោយសាមីសហព័ន្ធខ្លួនឯងតែម្ដង៕

កីឡាករ រ៉ុន សុខជា (ក្នុងសាល)

កីឡាករ ចាន់ វាសនា (ក្នុងសាល)

កីឡាករ យ៉ុន ខេមរៈ (ក្នុងសាល)

កីឡាករ ឧក រដ្ឋា (ក្នុងសាល)

កីឡាករ សាន ចនវិរៈ (ក្នុងសាល)

កីឡាករ ទន ទូច (ឆ្នេរខ្សាច់)

អត្ថបទដោយ៖ នួន ស៊ីណា

The post កីឡាកររបស់ក្រុមស្នងការ ន.ប រាជធានីភ្នំពេញ ឆ្នាំនេះជាប់ជម្រើសជាតិ ៦រូប ក្នុងសាល៥ ឆ្នេរខ្សាច់១ appeared first on Kampuchea Thmey Daily.

លក្ខណៈពិសេស ៤ របស់ វឿន វាសនា កំពុងក្លាយជាតួសំខាន់របស់ Win Streak

chean virakbot — Thu, 02 Apr 2026 08:41:55 +0000

កីឡាករបាល់ទះជម្រើសជាតិកម្ពុជា វឿន វាសនា កំពុងក្លាយជាតួដ៏សំខាន់ដែលជួយឲ្យក្រុម Win Streak ទទួលបានជ័យជម្នះរាល់ការប្រកួតក្នុងលីគបាល់ទះអាជីពតៃវ៉ាន់ តាំងពីរដូវកាលមុន រហូតដល់រដូវកាលនេះ។

តួនាទីលេងជាកីឡាករប្រយុទ្ធរកពិន្ទុតែម្យ៉ាងគត់មិនគ្រប់គ្រាន់ទេសម្រាប់កីឡាករបាល់ទះម្នាក់ៗក្នុងការជួយឲ្យក្រុមទទួលបានជ័យជម្នះ។ បើក្រឡេកមើលលក្ខណៈពិសេសរបស់កីឡាករ វឿន វាសនា គឺមានចំណុចពិសេសច្រើនលើសពីជាជាកីឡាករវាយប្រយុទ្ធថែមទៀត។

កម្ពុជាថ្មី សូមលើកយកលក្ខណៈពិសេសចំនួន ៤ របស់កីឡាករកម្ពុជារូបនេះក្នុងការជួយឲ្យក្រុម Win Streak មានភាពខ្លាំងដាច់គេនៅលីគបាល់ទះតៃវ៉ាន់។

ទី១. ការវាយផ្តាច់មានប្រសិទ្ធភាព

ស្ថិតនៅតួនាទីជាអ្នកប្រយុទ្ធស្លាបស្តាំ វឿន វាសនា មានប្រសិទ្ធភាពតាមរយៈការវាយផ្តាច់ស្លាបស្តាំ និងជំហរ ៣ ម៉ែត្រ។ រហូតដល់ពេលនេះ រូបរកបានជិត ១០០០ ពិន្ទុច្រើនដែលដាច់ឆ្ងាយលើ មិត្តរួមក្រុម និងកីឡាករដទៃទៀតនៅក្នុងលីគបាល់ទះតៃវ៉ាន់។ រូបគេកំពុងឈរក្នុងតំណែងកំពូលតារាងដែលជាកីឡាកររកបានពិន្ទុច្រើនជាងគេ និងកីឡាករល្អប្រចាំការប្រកួតច្រើនជាង។

ទី២. ការវាយសេវាល្អ

វឿន វាសនា ជាកីឡាករម្នាក់របស់ Win Streak ដែលវាយសេវាបានល្អដែលហៅថា វាយសេវាកាច។ តាំងពីរដូវកាលមុន និងដល់រដូវកាលនេះ រូបគេ រកពិន្ទុបានច្រើនដែរតាមរយៈការវាយសេវាបានល្អ។ ការវាយសេវាបានល្អគឺជាបញ្ហាមួយដែលធ្វើឲ្យដៃគូពិបាកចាប់ និងពិបាកលើបាល់ឲ្យដៃគូវាយផ្តាច់ ហេតុដូច្នេះហើយបានជានៅលើពិភពលោកនេះ ការប្រកួតកម្រិតអាជីព កីឡាករម្នាក់ៗចូលចិត្តវាយសេវាកាចណាស់។

ទី៣. រួមចំណែកការពារ

មិនត្រឹមតែប៉ុណ្ណោះ វឿន វាសនា ជាផ្នែកមួយដ៏សំខាន់ផងដែរក្នុងការជួយបិទបាំង និងការពារពីការវាយផ្តាច់របស់ដៃគូ។ រូបគេក៏រកបានពិន្ទុញឹកញាប់តាមរយៈរនាំងការពារ ហើយជូនកាលបាំងតែម្នាក់ឯងក៏ជាប់ដែរ។ បច្ចេកទេសបិទបាំងនេះមិនមែនចេះតែលោតបាំងនោះទេ ប៉ុន្តែត្រូវមានប៉ិនប្រសប់ក្នុងការលោតបាំងទើបជាប់។

ទី៤. ទប់ស្កាត់ជើងក្រោមដូចជាលីប្រូរ

អ្នកគាំទ្រដែលបានទស្សនាការប្រកួតរបស់ វឿន វាសនា នៅលីគបាល់ទះតៃវ៉ាន់ ប្រហែលជាបានឃើញហើយពីទីតាំងឈររបស់កីឡាករកម្ពុជារូបនេះនៅលើទីលន។ ជាទូទៅ រូបគេឈរនៅកណ្តាលផ្នែកខាងក្រោយដែលទីតាំងឈរបែបនេះគឺត្រៀមចំណុចពិសេស ៣។ ទី១ ជាគោលជំហរសម្រាប់ការវាយផ្តាច់ ៣ ម៉ែត្រ, ទី២ ដើម្បីទទួលបាល់ពីការវាយសេវារបស់ដៃគូ និងទី៣ ទប់បាល់ពីការវាយផ្តាច់របស់ដៃគូ។ ជារឿយៗ វឿន វាសនា ទប់បាល់បានច្រើនពីការវាយផ្តាច់របស់ដៃគូ ដែលការងារនេះគឺជាតួនាទីរបស់ លីប្រូ ប៉ុន្តែកីឡាករកម្ពុជាបានជួយផ្នែកនេះដែរ។

ក្រៅពីនេះ វឿន វាសនា ក៏មានចំណុចពិសេសផ្សេងៗទៀតដែលជាបច្ចេកទេស និងតាក់ទិកជួយឲ្យក្រុមកាន់តែមានប្រសិទ្ធភាព និងគុណភាព៕

អត្ថបទ៖ វិរបុត្រ

The post លក្ខណៈពិសេស ៤ របស់ វឿន វាសនា កំពុងក្លាយជាតួសំខាន់របស់ Win Streak appeared first on Kampuchea Thmey Daily.

ផុល រតនៈ និង មួន និមល ជាដៃគូលោតបាំងដ៏ល្អមានការសរសើរពីកីឡាកររួមទាំងអេដមីនៗផង

Sina Noun — Mon, 08 Sep 2025 08:12:51 +0000

អ្នកគាំទ្រវិស័យបាល់ទះមួយចំនួនប្រហែលមិនសូវចាប់អារម្មណ៍នៃការលោតធ្វើរនាំង ឬហៅថាលោតបាំងក្នុងការប្រកួតផ្លូវការរបស់ក្រុមជម្រើសជាតិ ឬវិសាខា នោះឡើយ ប៉ុន្តែក្នុងវិស័យកីឡាមួយនេះទាំងកីឡាករផ្ទាល់ រួមនិងអេដមីន ដែលតាមដានជាប់ជាមួយបាល់ទះគឺតែងតែសរសើរមិនដាច់ពីថា ផុល រតនៈ និង មួន និមល បាំងធំណាស់។

ការប្រកួតកន្លងទៅ

កីឡាករបាល់ទះអាជីពដូចគ្នា និងធ្លាប់ជួបប្រកួតជាមួយ វិសាខា គឺតែងតែសរសើរថាកីឡាករ ផុល រតនៈ និង មួន និមល ពីរនាក់នេះចាប់បាំងច្បាស់ណាស់ ពោលក្នុងមួយសិតៗប្រសិនបើពួកគេលោតបាំងជាមួយគ្នាគឺជាប់មិនតិចគ្រាប់នោះឡើយ។ ដោយសារតែបទពិសោធយ៉ាងច្រើនទាំងក្នុងស្រុក ក្រៅស្រុក រួមទាំងការហ្វឹកហាត់បានល្អ កាយសម្បទាខ្ពស់ លោតបានខ្ពស់ ទើបធ្វើឲ្យកីឡាករទាំងពីររូបនេះលោតបាំងបានល្អរហូតមានមិត្តរួមអាជីពសរសើរមិនដាច់ពីមាត់នោះឡើយ។

ការប្រកួតកន្លងទៅ

ចំពោះអេដមីនដែលតាមដានជាប់ជាមួយវិស័យបាល់ទះផ្លូវការកន្លងទៅដឹងច្បាស់ និងសរសើរថាកីឡាករវិសាខា ឬជ្រើសជាតិរបស់កម្ពុជាទាំងពីរនាក់ខាងលើល្បីខាងលោតធ្វើរនាំងបានល្អមែន។ កីឡាករមួយចំនួនពិបាកក្នុងការវាយឲ្យផុតរនាំងរបស់ទាំងពីរនាក់នេះណាស់នាពេលកន្លងមកមិនថាកីឡាករកម្ពុជា ឬបរទេសដែលធ្លាប់ជួប។

ការប្រកួតកន្លងទៅ

បញ្ជាក់ដែរថា កីឡាករ ផុល រតនៈ និង មួន និមល ជាសមាជិករបស់ក្រុមបាល់ទះវិសាខា និងជាកីឡាករជម្រើសជាតិកម្ពុជា។ អ្នកទាំងពីរគឺលេងក្នុងតួនាទីបាល់ដេញ (Middle Blocker) ដូចគ្នា។ រតនៈ បច្ចុប្បន្នមានកម្ពស់ 1.88 Cm និង មួន និមល បច្ចុប្បន្នមានកម្ពស់ 1.94 Cm៕

រតនៈ និង និមល

អត្ថបទដោយ៖ នួន ស៊ីណា

The post ផុល រតនៈ និង មួន និមល ជាដៃគូលោតបាំងដ៏ល្អមានការសរសើរពីកីឡាកររួមទាំងអេដមីនៗផង appeared first on Kampuchea Thmey Daily.

សហព័ន្ធបាល់ទះប្តូរពាន «មហាជន៤ទល់៤» ទៅជា«ពានយុវជនថ្នាក់ជាតិ៦ទល់៦»

chean virakbot — Wed, 20 Aug 2025 00:57:45 +0000

ថ្នាក់ដឹកនាំ សហព័ន្ធកីឡាបាល់ទះកម្ពុជាបានឲ្យពីផែនការអភិវឌ្ឍថ្នាលធនធានកីឡាករបាល់ទះកម្ពុជាដើម្បីពង្រឹងសមត្ថភាពក្រុមបាល់ទះជម្រើសជាតិកម្ពុជាទៅថ្ងៃអនាគតសម្រាប់ការប្រកួតអន្តរជាតិនានា។

លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា បានលើកឡើងថា សហព័ន្ធនឹងបញ្ជូនក្រុមបាល់ទះជម្រើសជាតិកម្ពុជាអាយុក្រោម ១៨ ឆ្នាំ ទៅចូលរួមប្រកួតកីឡាយុវជនអាស៊ី ឆ្នាំ (2025 Asian Youth Games) នៅប្រទេសបារ៉ែន។ នេះជាប្រវត្តិសាស្ត្រដំបូង ដែលក្រុមបាល់ទះជម្រើសជាតិកម្ពុជាកម្រិតយុវជនទៅចូលរួមប្រកួតព្រឹត្តិការណ៍កីឡាយុវជនអាស៊ី។

លោកបានបញ្ជាក់ថា ៖«យើងឃើញថា នេះជាការកសាងប្រវត្តិសាស្ត្រថ្មីមួយទៀតសម្រាប់វិស័យកីឡាបាល់ទះកម្ពុជា។ ខ្ញុំជឿជាក់លើក្រុមបាល់ទះ U18 ឆ្នាំរបស់យើងនឹងធ្វើបានល្អ ពីព្រោះយើងបានប្រមូលហ្វឹកហាត់ជាងមួយឆ្នាំហើយ»។

ខាងលើនេះគ្រាន់តែជំហានដំបូងដែលក្រុមបាល់ទះយុវជនកម្ពុជាត្រូវចេញទៅបង្ហាញសមត្ថភាពលើឆាកអន្តរជាតិកម្រិតទ្វីបអាស៊ី ប៉ុន្តែគោលដៅសំខាន់គឺការបណ្តុះបណ្តាលថ្នាលយុវជនទើបជាមូលដ្ឋានគ្រឹះសំខាន់សម្រាប់សមត្ថភាពរបស់ក្រុមជម្រើសជាតិ។ លោកអគ្គលេខាធិការរូបនេះបានបន្ថែមថា កម្ពុជាមិនទាន់មានពានរង្វាន់កម្រិតអាជីពដែលផ្តល់ឱកាសឲ្យកីឡាករក្មេងៗបានបង្ហាញសមត្ថភាពទេ ដូច្នេះថ្នាក់ដឹកនាំ សហព័ន្ធបានសម្រេចកែប្រែពានរង្វាន់មហាជន ៤ទល់៤ ដែលបានប្រកួតពីរឆ្នាំចុងក្រោយទៅជា«យុវជនអាយុ២០ឆ្នាំថ្នាក់ជាតិដែលប្រកួតតាមកម្រិតស្តង់ដា៦ទល់៦នាក់។

លោកបានបញ្ជាក់ថា ៖«ពានរង្វាន់កម្រិតអាយុក្រោម២០ឆ្នាំនេះគឺ ផ្តល់ឱកាសឲ្យយុវជនទូទាំងប្រទេសបានបង្ហាញសមត្ថភាព និងប្រកួតប្រជែងពិតប្រាកដ។ ជាពិសេសយើងមានប្រាក់រង្វាន់ច្រើនដែលរឹតតែធ្វើឲ្យពួកគាត់ខិតខំប្រឹងប្រែងខ្លាំងឡើង។ នេះក៏ជាឱកាសដែលសហព័ន្ធសម្លឹងជ្រើសរើសយុវជនល្អៗសម្រាប់ត្រៀមការប្រកួតកីឡាយុវជនអាស៊ី ឆ្នាំ ២០២៩ ដែលកម្ពុជាទទួលធ្វើម្ចាស់ផ្ទះ ហើយក៏ជាការបណ្តុះបណ្តាលធនធានកីឡាករសម្រាប់ក្រុមជម្រើសជាតិទៅថ្ងៃអនាគត»។

សូមបញ្ជាក់ថា សហព័ន្ធកីឡាបាល់ទះកម្ពុជាធ្លាប់បានបញ្ជូនក្រុមបាល់ទះជម្រើសជាតិកម្ពុជាអាយុក្រោម២០ឆ្នាំទៅប្រកួតជាមួយ ក្រុម U20 វៀតណាម នៅប្រទេសថៃ កាលពីឆ្នាំ ២០២៤ ប៉ុន្តែបានចាញ់ វៀតណាម ដោយមិនបានឡើងទៅកាន់វគ្គចែកពូលទេ។ ចាប់តាំងពីពេលនោះ ក្រុមបាល់ទះយុវជនជម្រើសជាតិកម្ពុជាមិនមានការប្រកួតអន្តរជាតិទេ ប៉ុន្តែសហព័ន្ធក៏បានប្រមូលផ្តុំហ្វឹកហាត់ដើម្បីប្រកួតកីឡាយុវជនអាស៊ី លើកទី៣ ចាប់ពីថ្ងៃទី២២ ដល់ ទី៣១ ខែតុលា ឆ្នាំ ២០២៥ នៅប្រទេសបារ៉ែន។ បួនឆ្នាំបន្ទាប់ពោលគឺនៅឆ្នាំ ២០២៩ កីឡាយុវជនអាស៊ី ធ្វើនៅកម្ពុជា៕

អត្ថបទ៖ វីរបុត្រ

The post សហព័ន្ធបាល់ទះប្តូរពាន «មហាជន៤ទល់៤» ទៅជា«ពានយុវជនថ្នាក់ជាតិ៦ទល់៦» appeared first on Kampuchea Thmey Daily.

លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…»

chean virakbot — Sat, 09 Aug 2025 02:57:25 +0000

អ្នកប៉ះសេឆ្នើមប្រចាំស្រុកខ្មែរ សួន ចាន់ណារ៉ូ បានធ្វើឲ្យអ្នកគាំទ្រចាប់អារម្មណ៍យ៉ាងខ្លាំងពីអាជីពបាល់ទះរបស់ខ្លួនក្នុងមួយរយៈពេលចុងក្រោយនេះ ខណៈអ្នកគាំទ្រជាច្រើនពិតជាចង់ឃើញរូបគេវិលត្រឡប់មកចូលរួមជាមួយក្រុមបាល់ទះជម្រើសជាតិកម្ពុជាវិញ។

កីឡាករ សួន ចាន់ណារ៉ូ

ចុងក្រោយបំផុត កាលពីថ្ងៃសុក្រ ទី៨ ខែកក្កដា ឆ្នាំ ២០២៥ សួន ចាន់ណារ៉ូ បានបង្ហោះរូបភាពដែលមានឯកសណ្ឋានរបស់ក្រុមបាល់ទះជម្រើសជាតិកម្ពុជា និងមានខ្លឹមសារខ្លីថា ៖«ជួបគ្នាឆាប់ៗ»។ ស្របពេលជាមួយគ្នានេះ ស្មាត់ឆ្នើម គួន ម៉ុម បានសរសេរថា ៖«ជួបគ្នាជាថ្មីម្តងទៀត»។ សារខ្លីទាំងនេះបានធ្វើឲ្យអ្នកគាំទ្រចាប់អារម្មណ៍យ៉ាងខ្លាំង ហើយគិតថា រូបគេប្រហែលជាអាចវិលត្រឡប់មកចូលរួមជាមួយជម្រើសជាតិឡើងវិញ។

កីឡាករ សួន ចាន់ណារ៉ូ និង គួន ម៉ុម

ទន្ទឹមជាមួយគ្នានេះ លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ក៏បានបង្ហាញរូបភាពពីការជួបកីឡាករ សួន ចាន់ណារ៉ូ និងបានសរសេរសារថា ៖«អតីតជម្រើសជាតិបាល់ទះមកទទួលសេវាសាធារណៈ ផ្តល់សេវាតម្រូវការដល់ពលរដ្ឋទូទៅអោយកាន់តែល្អប្រសើរ និងមានទំនុកចិត្ត….»។

លោក អាំង សិរីពិសិដ្ឋ

ទោះបីជាយ៉ាងណា ការបង្ហោះសារគួរឲ្យចាប់អារម្មណ៍របស់កីឡាករទាំងពីរខាងលើ មិនមែនមានន័យថា សួន ចាន់ណារ៉ូ វិលត្រឡប់ទៅកាន់ជម្រើសជាតិក្នុងនាមជាកីឡាករដែរ ប៉ុន្តែក៏អាចមានន័យក្នុងលក្ខខណ្ឌផ្សេងដូចជា កីឡាករអាចចូលរួមជាមួយក្រុមបាល់ទះជម្រើសជាតិក្នុងនាមជាគ្រូជំនួយ ឬការងារអ្វីដែលអាចរួមចំណែកជួយដល់ក្រុមជម្រើសជាតិបាន។

លោក អាំង សិរីពិសិដ្ឋ និង សួន ចាន់ណារ៉ូ

សារព័ត៌មាន«កម្ពុជាថ្មី»ក៏បានសួរទៅលោក អាំង សិរីពិសិដ្ឋ ជុំវិញករណីនេះ ដោយបានឆ្លើយដោយសញ្ញាវិជ្ជមានថា ៖«អាចដែរ ដូចខ្ញុំធ្លាប់និយាយអ៉ីចឹង យើងអត់ដែលបិទឱកាសសម្រាប់កីឡាករណាម្នាក់ទេ ឲ្យតែមានឆន្ទៈ ហើយមានសមត្ថភាពនៅល្អ ដែលអាចជួយជាតិបាន គឺយើងអនុញ្ញាតឲ្យគាត់ចូល»។

ក្រុមជម្រើសជាតិកម្ពុជាឈ្នះមេដាយប្រាក់ស៊ីហ្គេម

សូមបញ្ជាក់ថា សួន ចាន់ណារ៉ូ បានប្រកាសចូលនិវត្តន៍ជាផ្លូវការកាលពីថ្ងៃទី ២១ ខែតុលា ឆ្នាំ ២០២៤ បន្ទាប់ពីចាប់អាជីពបាល់ទះអស់រយៈពេល ១៥ ឆ្នាំ។ រូបគេជាផ្នែកមួយដ៏សំខាន់ជួយក្រុមបាល់ទះជម្រើសជាតិកម្ពុជា ទទួលបានមេដាយសំរិទ្ធកីឡាស៊ីហ្គេម ឆ្នាំ ២០២១ និងមេដាយប្រាក់កីឡាស៊ីហ្គេម ឆ្នាំ ២០២៣ ព្រមទាំងឈ្នះជើងឯក SEA V. League Challenge ឆ្នាំ ២០២៤។ បន្ទាប់ពីអវត្តមានអ្នកប៉ះសេឆ្នើមរូបនេះ ក្រុមបាល់ទះជម្រើសជាតិកម្ពុជាធ្វើមិនបានល្អទេ ក្នុងពានរង្វាន់ SEA V. League ឆ្នាំ ២០២៥ ដោយឆ្លងកាត់ ៨ ប្រកួតគឺចាញ់ទាំងអស់៕

សួន ចាន់ណារ៉ូ លើកពាន SEA V. LEAGUE Challenge

The post លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…» appeared first on Kampuchea Thmey Daily.

ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League

Kosal Sem — Sat, 19 Jul 2025 03:00:12 +0000

នាម៉ោង ៧ ល្ងាចនេះ ថ្ងៃ សៅរិ៍ ទី ១៩ ខែកក្កដា ឆ្នាំ ២០២៥ ក្រុមបាល់ទះជម្រើសជាតិ កម្ពុជា នឹងត្រូវមានភារកិច្ចប្រកួតចុងក្រោយក្នុងពាន SEA V League ២០២៥ ទល់នឹងក្រុមបាល់ទះជម្រើសជាតិ ឥណ្ឌូណេស៊ី។

ក្រុមបាល់ទះជម្រើសជាតិ កម្ពុជា

ការជួបគ្នាកាលពីថ្ងៃទី ១១ ខែកក្កដា ឆ្នាំ ២០២៥ នៅប្រទេសហ្វីលីពីន ក្នុងជុំទី១ នៃពានរង្វាន់ដដែលនេះ កម្ពុជា ធ្វើមិនបានល្អនោះទេ ដោយការប្រកួតនោះបានចាញ់ ឥណ្ឌូណេស៊ី ក្នុងលទ្ធផល ៣ សិតទល់នឹង ០។

យ៉ាងណា ទាំងការប្រកួត កាលពីជើងទី ១ និងជើងទី ២ នេះ ដែលកំពុងប្រព្រឹត្តទៅនៅ ឥណ្ឌូណេស៊ី គឺ កម្ពុជា មិនទាន់រកបានជ័យជម្នះសូម្បីមួយប្រកួតនៅឡើយទេ ដោយឆ្លងកាត់ការប្រកួតសរុប ៧ ប្រកួត ចាញ់ទាំង ៧ ប្រកួត។ តាមរយៈលទ្ធផលនេះ បានធ្វើឱ្យ កម្ពុជា កំពុងប្រឈមជួបស្ថានភាពមិនល្អ ដោយអាចធ្លាក់ទៅលេងពានទី ២ SEA V. League Challenge វិញនៅឆ្នាំក្រោយ ២០២៦។

ក្រុមបាល់ទះជម្រើសជាតិ ឥណ្ឌូណេស៊ី

គួរឱ្យដឹងថា ការប្រកួតទល់នឹង ឥណ្ឌូណេស៊ី ល្ងាចនេះ គឺជាការប្រកួតទី ៤ ក្នុងជើងទី ២ នេះ ហើយក៏ជាការប្រកួតចុងក្រោយសម្រាប់ កម្ពុជា ក្នុងពាននេះផងដែរ។ ប្រវត្តិជួបគ្នា ៦ លើកចុងក្រោយគិតចាប់តាំងពីឆ្នាំ ២០១១ មក កម្ពុជា មិនទាន់ទាន់ស្គាល់ជ័យជម្នះលើ ឥណ្ឌូណេស៊ី សូម្បីម្តង។

ខាងក្រោមនេះជាលទ្ធផលជួបគ្នាទាំង ៦ លើករវាងក្រុមបាល់ទះ កម្ពុជា និង ហ្វីលីពីន៖

កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ២០១១)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០១៥)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០១៩)
កម្ពុជា ចាញ់ ឥណ្ឌូណេស៊ី ១-៣ (កីឡាស៊ីហ្គេម ឆ្នាំ ២០២១)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០២៣)
កម្ពុជា ចាញ់ ឥណ្ឌូណេស៊ី ០-៣ (ជើងទី ១ ពាន SEA V League ២០២៥)៕

កម្ពុជា និង ឥណ្ឌូណេស៊ី កាលស៊ីហ្គេម ២០២៣

អត្ថបទ៖ សេម កុសល

The post ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League appeared first on Kampuchea Thmey Daily.

ក្រុមកីឡាបាល់ទះជម្រើសជាតិកម្ពុជា Archives - Kampuchea Thmey Daily

បង​ប្អូន​បង្កើតត្រកូល Ishikawa ឈ្នះ​ពាន​អត្តពលិក​បាល់ទះ​ល្អ​បំផុត​ប្រចាំ​ទ្វីប​អាស៊ី

ស្ងាត់ៗ​ស្មាត់​ឌូក​ ឥលូវ​ក្លាយ​ជា​គ្រូ​បង្វឹក​បាល់ទះ​ជម្រើស​ជាតិ​ឆ្នេរខ្សាច់​កម្ពុជា​ហើយ​

លក្ខណៈ​ពិសេស ៤ របស់ វឿន វាសនា កំពុង​ក្លាយជា​​តួ​សំខាន់​របស់ Win Streak

ផុល​ រតនៈ និង​ មួន​ និមល​ ជា​ដៃគូ​លោត​បាំង​ដ៏​ល្អ​មាន​ការ​សរសើរ​ពី​កីឡាកររួម​ទាំង​អេដមីន​ៗ​ផង​

សហព័ន្ធ​បាល់ទះ​​ប្តូរ​ពាន​ «មហាជន​៤ទល់​៤» ទៅ​ជា​«ពាន​​យុវជន​ថ្នាក់​ជាតិ៦ទល់៦» ​

លោក អាំង សិរីពិសិដ្ឋ ៖«សួន ចាន់ណារ៉ូ អាច​ចូល​ជម្រើស​ជាតិវិញ បើចង់…»

ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League

បងប្អូនបង្កើតត្រកូល Ishikawa ឈ្នះពានអត្តពលិកបាល់ទះល្អបំផុតប្រចាំទ្វីបអាស៊ី

ស្ងាត់ៗស្មាត់ឌូក ឥលូវក្លាយជាគ្រូបង្វឹកបាល់ទះជម្រើសជាតិឆ្នេរខ្សាច់កម្ពុជាហើយ

លក្ខណៈពិសេស ៤ របស់ វឿន វាសនា កំពុងក្លាយជាតួសំខាន់របស់ Win Streak

ផុល រតនៈ និង មួន និមល ជាដៃគូលោតបាំងដ៏ល្អមានការសរសើរពីកីឡាកររួមទាំងអេដមីនៗផង

សហព័ន្ធបាល់ទះប្តូរពាន «មហាជន៤ទល់៤» ទៅជា«ពានយុវជនថ្នាក់ជាតិ៦ទល់៦»

លោក អាំង សិរីពិសិដ្ឋ ៖«សួន ចាន់ណារ៉ូ អាចចូលជម្រើសជាតិវិញ បើចង់…»