ប្រតិបត្តិការបង្ក្រាបនេះធ្វើឡើងក្រោមបទបញ្ជាពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ , លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ , លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ដោយមានការសម្របសម្រួលនីតិវិធីច្បាប់ពីសំណាក់ លោក សេង ហៀង , លោក ចើង ជើងគ័ង និង លោក ថេង សំណាង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និង អាជ្ញាធរខណ្ឌពោធិ៍សែនជ័យ។

ជាលទ្ធផល ក្រុមការងារបានឃាត់ខ្លួនជនសង្ស័យសរុបចំនួន ៦១ នាក់ (ស្រី ៦ នាក់) ក្នុងនោះ គ្មានលិខិតឆ្លងដែន ស្នាក់នៅខុសច្បាប់ ចំនួន ៤២ នាក់ , ជាប់ពាក់ព័ន្ធនឹងការរក្សាទុកសម្ភារសម្រាប់ប្រព្រឹត្តបទល្មើស Online Scam ១៥ នាក់ និង ជាប់ពាក់ព័ន្ធនឹងការប្រើប្រាស់គ្រឿងញៀន ៤ នាក់។

ជាមួយគ្នានេះ សមត្ថកិច្ចក៏បានដកហូតវត្ថុតាង និង សម្ភារបច្ចេកវិទ្យាមួយចំនួនមានដូចជា ៖ កុំព្យូទ័រយួរដៃចំនួន ៤៨ គ្រឿង , ទូរសព្ទដៃចំនួន ៤៦៨ គ្រឿង , អេក្រង់ម៉ូនីទ័រចំនួន ៣២ គ្រឿង , CPU ចំនួន ១០ គ្រឿង , Tablet ចំនួន ១ គ្រឿង , និង ស៊ីមកាតទូរស័ព្ទបរទេសមួយចំនួនធំទៀតផងដែរ។

បច្ចុប្បន្ន ក្រុមការងារសម្រេចប្រគល់ជនសង្ស័យ រួមនឹងវត្ថុតាងទាំងអស់ ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីសាកសួរ និង កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ជាធរមាន។

សូមរម្លឹកថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានអនុម័តកាលពីថ្ងៃ ទី៦ ខែមេសា និង បានកំពុងអនុវត្តចាប់តាំងពីថ្ងៃទី ៧ ខែមេសា ឆ្នាំ ២០២៦ មក បានកំណត់ដាក់ទោស ជនល្មើស ត្រូវប្រឈមនឹងការជាប់ពន្ធនាគារខ្ពស់បំផុតរហូតដល់ ១ ជីវិត និង ពិន័យជាប្រាក់ដល់ទៅ ១ ០០០ លានរៀល ថែមទាំងការរឹបអូសទ្រព្យសម្បត្តិរបស់ជនល្មើសផងដែរ៕
អត្ថបទ ៖ សុភា

The post ឃាត់ខ្លួនជនសង្ស័យ ៦១ នាក់ ឆបោកអនឡាញ និង គ្រឿងញៀន នៅខណ្ឌពោធិ៍សែនជ័យ appeared first on Kampuchea Thmey Daily.

យោងតាមដីកាសម្រេចចំនួន៧ផ្សេងគ្នារបស់លោក ឡោ ក្រឹម ចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ជាក់ថា ការសម្រេចឃុំខ្លួននេះ ធ្វើឡើងបន្ទាប់ពីបានពិនិត្យយ៉ាងល្អិតល្អន់លើសំណុំរឿងដែលកសាងដោយសមត្ថកិច្ចនៃស្នងការដ្ឋាននគរបាលរាជធានីភ្នំពេញ។

ជនត្រូវចោទ ទី១មានឈ្មោះ  XI BING  ភេទប្រុស ជនជាតិចិន , ទី២ ឈ្មោះ CHEN LANG ភេទប្រុស ជនជាតិចិន , ទី៣ឈ្មោះ  XIA CHAO ភេទប្រុស ជនជាតិចិន, ទី៤ ឈ្មោះ NAN LIANG ភេទប្រុស ជនជាតិចិន , ទី៥ឈ្មោះ  FAN LEI  ភេទប្រុស ជនជាតិចិន , ទី៦ឈ្មោះ  KIRAN KUMA RBAYAK ភេទប្រុស ជនជាតិនេប៉ាល់ និងទី៧ ឈ្មោះ MOHD SAKIB ភេទប្រុស ជនជាតិឥណ្ឌា ។ ជនបរទេសទាំង៧នាក់នេះ ត្រូវបានដាក់ឱ្យនៅក្រោមការពិនិត្យពីបទឆបោកមានស្ថានទម្ងន់ទោស ជាក្រុមមានការចាត់តាំង ដែលចែងឱ្យផ្តន្ទាទោសតាមមាត្រា ៣៧៧ និងមាត្រា ៣៨០ ចំណុចទី៥ នៃក្រមព្រហ្មទណ្ឌ។

តាមរបាយការណ៍របស់ក្រសួងយុត្តិធម៌ បានឱ្យដឹងថា ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញ ដើម្បីផ្តន្ទាទោសមេខ្លោង និងបក្ខពួកចំនួនជាង៥០០នាក់ ក្នុងនោះរាប់បញ្ចូលទាំងសំណុំរឿង ចេន ស៊ី, សំណុំរឿងឧកញ៉ា លី គួង និងសំណុំរឿងធំៗពាក់ព័ន្ធនឹងមេខ្លោងជាជនបរទេសផ្សេងទៀត។ សមត្ថកិច្ចបានបន្តសហការជាមួយបណ្តាប្រទេសដៃគូ ដើម្បីស្រាវជ្រាវ ធ្វើកោសល្យវិច័យលើវត្ថុតាង និងស៊ើបអង្កេតប្រព័ន្ធហិរញ្ញវត្ថុរបស់ក្រុមឧក្រិដ្ឋជន ដើម្បីឈានទៅវែកមុខក្រុមអង្គការចាត់ដែលបានយកកម្ពុជាធ្វើជាទីតាំងឆបោកទៅក្រៅប្រទេស។

សូមបញ្ជាក់ថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់នាពេលកន្លងមកយ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយគ្មានការយោគយល់ ឬការអន្តរាគមន៍ណាមួយឡើយ។ វិធានការដែលបាន និងកំពុងអនុវត្តទាំងនេះ នឹងអាចធ្វើអាចឱ្យកម្ពុជាឈានទៅលុបបំបាត់ការឆបោកតាមប្រព័ន្ធបច្ចេកវិទ្យានៅពេលខាងមុខ៕

The post តុលាការក្រុងភ្នំពេញសម្រេចឃុំខ្លួនមេខ្លោង Online scam ជនបរទេសចំនួន៧នាក់ដាក់ពន្ធនាគារ appeared first on Kampuchea Thmey Daily.

លោកបានបញ្ជាក់ថា អាជ្ញាធរមិនគួរគិតថាបទល្មើសឆបោកតាមប្រព័ន្ធបច្ចេកវិទ្យាបានអស់ពីមូលដ្ឋានរបស់ខ្លួនឡើយ ព្រោះក្រុមឆបោកអាចលាក់ខ្លួននៅទីតាំងដែលយើងមិននឹកស្មានដល់ផងដែរ។ ដូច្នេះ អាជ្ញាធរខណ្ឌ និងកម្លាំងពាក់ព័ន្ធទាំងអស់ ត្រូវត្រួតពិនិត្យ និងបោសសម្អាតឱ្យបានដូចភ្លៀងរលឹម នៅក្នុងមូលដ្ឋានដែលខ្លួនគ្រប់គ្រង។

ជាមួយគ្នានេះ លោក ឃួង ស្រេង បានមានប្រសាសន៍ថា តាមផែនការរបស់លោក ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដាក់បទបញ្ជាឱ្យធ្វើការបង្ក្រាប និងបោសសម្អាតបទល្មើសឆបោកតាមប្រព័ន្ធបច្ចេកវិទ្យាឱ្យអស់ នៅត្រឹមពាក់កណ្តាលខែមីនា ឆ្នាំ២០២៦ នេះ។ លោកបញ្ជាក់ថា៖«ដូច្នេះយើងនៅពេលតែ១សប្តាហ៍ទៀតប៉ុណ្ណោះ ដើម្បីអនុវត្តផែនការនេះឱ្យទទួលបានជោគជ័យ។ កន្លងមកនេះយើងអនុវត្តការងារនេះបានល្អប្រសើរហើយ។ ប៉ុន្តែទោះបីជាយ៉ាងណាក្តី យើងកុំសន្តិភាពពេក ពួកគេអាចជ្រកនៅតាមទីតាំងមួយចំនួនដែលយើងនឹកស្មានមិនដល់»។

ភ្ជាប់ជាមួយការបោសសម្អាតការឆបោកតាមប្រព័ន្ធបច្ចេកវិទ្យា រឿងល្បែងស៊ីសងគ្រប់ប្រភេទនិងគ្រឿងញៀន ក៏ត្រូវបន្តបោសសម្អាតផងដែរ ដើម្បីបង្កភាពកក់ក្តៅដល់ប្រជាពលរដ្ឋ។ ឥឡូវយើងកំពុងតែដើរលើផ្លូវត្រូវហើយ សូមបន្តដើរលើផ្លូវនេះទៅមុខទៀត សំដៅធ្វើយ៉ាងណាឱ្យបទល្មើសឆបោកតាមប្រព័ន្ធបច្ចេកវិទ្យាគ្មាននៅក្នុងមូលដ្ឋានរបស់យើងគ្រប់គ្រង។ នេះជាការណែនាំបន្ថែម។

ក្នុងឱកាសនោះ លោក ឃួង ស្រេង អភិបាលរាជធានីភ្នំពេញ ក៏បានធ្វើការកោតសរសើរដល់គណៈបញ្ជាការឯកភាពរដ្ឋបាលរាជធានីនិងគណៈបញ្ជាការឯកភាពរដ្ឋបាលខណ្ឌទាំង១៤ ព្រមទាំងកងកម្លាំងសមត្ថកិច្ចនគរបាល និងកងរាជ​អាវុធហត្ថរាជធានីភ្នំពេញដែលបានធ្វើការងារបង្ក្រាបនិងបោសសម្អាតបទល្មើសឆបោកតាមប្រព័ន្ធបច្ចេកវិទ្យានេះកន្លងមកទទួលបានជោគជ័យល្អ។

តាមអនុសាសន៍របស់នាយករដ្ឋមន្រ្តី សម្តេចធិបតី ហ៊ុន ម៉ាណែត ប្រទេសកម្ពុជាបានប្រកាន់យកគោលនយោបាយអភិវឌ្ឍសេដ្ឋកិច្ចពណ៌ស ដោយមិនទទួលយកសេដ្ឋកិច្ចពណ៌ប្រផេះ និងសេដ្ឋកិច្ចពណ៌ខ្មៅឡើយ។ ពណ៌ប្រផេះ ឬខ្មៅសំដៅទៅលើពាក់ព័ន្ធការឆបោកអនឡាញ។ សម្តេចធិបតីបានបញ្ជាក់ថា កម្ពុជាបានប្តេជ្ញាចិត្តយ៉ាងមុតមាំក្នុងការបោស សម្អាត និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scam) ឱ្យអស់ពីប្រទេសកម្ពុជា ត្រឹមខែមេសា ឆ្នាំ២០២៦ខាងមុខនេះ៕

ដោយ៖ ស្រីរ័ត្ន

The post អភិបាលរាជធានី ដាក់កំហិតឱ្យបោសសម្អាតឆបោកអនឡាញក្នុងមូលដ្ឋាន ត្រឹមពាក់កណ្តាលខែមីនានេះ appeared first on Kampuchea Thmey Daily.

ក្នុងរបាយការណ៍ដែលចេញផ្សាយនៅថ្ងៃទី ៥ ខែកុម្ភៈនេះ ឱ្យដឹងថា ចាប់តាំងពីថ្ងៃទី១ ខែមករា រហូតមកដល់ដើមខែកុម្ភៈ ឆ្នាំ២០២៦នេះ គណៈបញ្ជាការឯកភាពរាជធានី-ខេត្ត និងសមត្ថកិច្ច បានបង្រ្កាប និងបិទខ្ទប់សកម្មភាពប្រព្រឹត្តបទល្មើសឆបោកតាមប្រព័ន្ធបច្ចេកវិទ្យាទៅលើទីតាំងសរុបចំនួន ១៩០ កន្លែង។ ក្នុងនោះមានកាស៊ីណូចំនួន ៤៤ នៅក្នុងខេត្តព្រះសីហនុ, កំពត, កណ្តាល, ស្វាយរៀង, រាជធានីភ្នំពេញ, ពោធិ៍សាត់, ព្រៃវែង និងខេត្តមណ្ឌលគិរី ដោយសមត្ថកិច្ចបានគ្រប់គ្រង រឹបអូសវត្ថុតាងជាច្រើនប្រភេទ/គ្រឿង មានកំព្យូទ័រ ទូរស័ព្ទ ស៊ីមកាតជាដើមនិងបំពេញសំណុំរឿង ដើម្បីចាត់វិធានការតាមនីតិវិធីច្បាប់។ ទន្ទឹមនេះ សមត្ថកិច្ចបានឃាត់ខ្លួនជនសង្ស័យចំនួន ២ ៥០៨ នាក់ មាន ៧ សញ្ជាតិ មានជនជាតិនេប៉ាល់ ចិន ម៉ាឡេស៊ី ឡាវ ឥណ្ឌា ប៉ាគីស្ថាន បង់ក្លាដេស។

ក្នុងចំណោមករណីធំៗ មានរាប់បញ្ចូលចំណាត់ការលើសំណុំរឿងសំខាន់ៗដោយបានចាប់ខ្លួន និងអនុវត្តនីតិវិធីតុលាការចំពោះមេខ្លោង និងអ្នកសមគំនិតមួយចំនួនទៀត, ការបង្ក្រាបដល់ទីតាំងដែលឧក្រិដ្ឋជនបានប្រើប្រាស់សម្រាប់ធ្វើសកម្មភាពឆបោកអនឡាញ ដោយរាប់ទាំងករណីក្លែងជាសមត្ថកិច្ចផ្សេងៗដើម្បីឆបោកទៅក្រៅប្រទេស, ព្រមទាំងកិច្ចសហការជាមួយសមត្ថកិច្ចនៃសាធារណរដ្ឋប្រជាមានិតចិន អាមេរិក កូរ៉េ ជាដើម ក្នុងការបន្តស្រាវជ្រាវដើម្បីវែកមុខបណ្តាញអង្គការចាត់តាំងនៅពីក្រោយករណីទាំងនេះ។

កម្លាំងសមត្ថកិច្ចជំនាញតាមបណ្តារាជធានី-ខេត្តកំពុងបន្តចុះបង្ក្រាប និងបំបែកសម្បុកក្រុមឆបោកតាមប្រព័ន្ធបច្ចេកវិទ្យា ខណៈការបន្តចាត់វិធានការបង្ក្រាបទ្រង់ទ្រាយធំដោយផ្អែកលើការស្រាវជ្រាវច្បាស់លាស់ និងកិច្ចសហប្រតិបត្តិការជាមួយដៃគូ។ ប្រតិបត្តិការទាំងនេះបានជំរុញឱ្យជនបរទេសចំនួន ១១០.០៩៥ នាក់ មាន ៦ សញ្ជាតិ ក្នុងនោះមានជនជាតិចិន វៀតណាម ឥណ្ឌូនេស៊ី ឥណ្ឌា បង់ក្លាដេស និងប៉ាគីស្ថាន បានចាកចេញពីប្រទេសកម្ពុជាក្នុងចន្លោះខែមករា និងដើមខែកុម្ភៈ ឆ្នាំ២០២៦។ តាមរបាយការណ៍របស់ក្រសួងយុត្តិធម៌ ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងធំៗចំនួន ៣៧ករណី ហើយផ្តន្ទាទោសមេខ្លោង និងបក្ខពួកចំនួន១៧២នាក់ ខណៈអាជ្ញាធរកម្ពុជាបានបណ្តេញជនបរទេសចំនួន ៩ ៣១៤ នាក់ ចេញពីកម្ពុជា។

រាជរដ្ឋាភិបាលបានបញ្ជាក់យ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយគ្មានការយោគយល់ ឬការអន្តរាគមន៍ណាមួយឡើយ។ វិធានការដែលបាន និងកំពុងអនុវត្តទាំងនេះ នឹងអាចធ្វើអាចឱ្យកម្ពុជាឈានទៅលុបបំបាត់ការឆបោកតាមប្រព័ន្ធបច្ចេកវិទ្យានៅពេលខាងមុខ៕

The post ដើមឆ្នាំ ២០២៦​ សមត្ថកិច្ចកម្ពុជាឃាត់ជនសង្ស័យបរទេស ២ ៥០៨ នាក់ មាន៧សញ្ជាតិ ពាក់ព័ន្ធឆបោកអនឡាញ appeared first on Kampuchea Thmey Daily.

ប្រតិបត្តិការ​នេះ​ធ្វើឡើង​កាលពី​ថ្ងៃ​ទី ៥ ខែ​មករា ឆ្នាំ ២០២៦ មាន​ការ​អនុញ្ញាត​ពី​លោក​នាយ​ឧត្ដមសេនីយ៍ ស ថេត អគ្គស្នងការ​នគរបាល​ជាតិ ដោយ​សហការ​ជាមួយ​គណៈ​បញ្ជាការ​ឯកភាព​ខណ្ឌ​ច្បារអំពៅ និង​មាន​ការ​សម្របសម្រួល​នីតិវិធី​ពី លោក មុត ដារ៉ា ព្រះរាជអាជ្ញា​រង នៃ​អយ្យការ​អម​សាលាដំបូង​រាជធានី​ភ្នំពេញ។

ក្នុង​រង្វង់​ប្រតិបត្តិការ​នេះ សមត្ថកិច្ច​បាន​ដកហូត​សម្ភារ​វត្ថុតាង​កុំព្យូទ័រ​លើ​តុ និង​ទូរស័ព្ទ​ដៃ​មួយ​ចំនួន។ ក្នុង​នោះ​រក​ឃើញ​ថា ជនសង្ស័យ​បាន​ក្លែងខ្លួន​ជា​សមត្ថកិច្ច​នគរបាល និង​រដ្ឋអាជ្ញា​កូរ៉េ ដើម្បី​ជំរិត​គំរាម​ទារ​ប្រាក់​ពី​ជនរងគ្រោះ​ជា​ជនជាតិ​កូរ៉េខាងត្បូង។

បច្ចុប្បន្ន សមត្ថកិច្ច​បាន​នាំ​ខ្លួន​ជនសង្ស័យ​ទៅ​សាកសួរ​បំភ្លឺ​នៅ​អគ្គស្នងការដ្ឋាន​នគរបាល​ជាតិ និង​ចាត់ការ​តាម​នីតិវិធី៕

អត្ថបទ ៖ សុភា

The post អគ្គស្នងការដ្ឋាននគរបាលជាតិ ឃាត់ខ្លួនជនជាតិកូរ៉េខាងត្បូង ៣២ នាក់ ឆបោកអនឡាញ នៅទីតាំង ៤ កន្លែងផ្សេងគ្នា appeared first on Kampuchea Thmey Daily.

កុំថាឡើយប្រជាជនសាមញ្ញក្នុងស្រុក សូម្បីបុគ្គលល្បីៗមកពីបរទេសចូលទៅលេងក្នុងប្រទេសថៃ ក៏បានក្លាយជាជនរងគ្រោះនៃអំពើឆបោកនេះដែរ។ 

ខាងក្រោមនេះគឺជាករណីឆបោក-ចាប់ជំរិតដ៏ល្បីចំនួន៣ ដែលកើតឡើងនៅក្នុងប្រទេសថៃ មួយរយៈពេលចុងក្រោយ៖

១. តារាសម្តែងចិន Wang Xing

តារាសម្ដែងចិន Wang Xing គឺជាគោលដៅនៃការបោកប្រាស់ ដែលប្រើការតេស្តសម្តែងក្លែងក្លាយដើម្បីបញ្ឆោតគាត់ឲ្យមកទីក្រុងបាងកក។ ក្រុមឆបោកដែលអះអាងថា ជាបុគ្គលិករបស់ក្រុមហ៊ុនសិល្បៈថៃ GMM Grammy បានទាក់ទងទៅ Wang តាមកម្មវិធី WeChat ឲ្យ​ធ្វើ​ដំណើរ​មក​ប្រទេស​ថៃ។

នៅពេល Wang មកដល់ទីក្រុងបាងកកក្នុងខែមករា គាត់ត្រូវបានគេចាប់ជំរិត និងនាំឆ្លងដែនចូលប្រទេសមីយ៉ាន់ម៉ា ទៅកាន់មជ្ឈមណ្ឌលឆបោក «Apollo Park»។ ក្រុមឧក្រិដ្ឋជន បានយកលិខិតឆ្លងដែនរបស់គាត់ ​ហើយកោរសក់ ថែមទាំងបង្ខំគាត់ឲ្យរៀនពីរបៀបបើកបណ្តាញបោកប្រាស់តាមអនឡាញទៀតផង។

ឧបទ្ទវហេតុ​នេះ​​ធ្វើ​ឲ្យ​ភ្ញៀវ​ទេសចរ​ចិន​ខឹងសម្បា ​ឈាន​ដល់​ការ​លុប​ចោល​កម្មវិធី​ប្រគំ​តន្ត្រី​ក្នុង​ប្រទេស​ថៃ ពីសំណាក់​តារា​ចិន​ផ្សេង​ទៀតផង។

២. ជនជាតិអាមេរិកដើមកំណើតតៃវ៉ាន់ Yu Emil

នៅខែមករា ជនជាតិអាមេរិកដើមកំណើតតៃវ៉ាន់ម្នាក់ឈ្មោះ Yu Emil ត្រូវបានល្បួងឲ្យទៅប្រទេសថៃ ហើយត្រូវបានជួញដូរជាបន្តបន្ទាប់។ ក្រុមឧក្រិដ្ឋជនតៃវ៉ាន់-ចិន បានល្បួង Yu ពីទីក្រុងសៀងហៃ ដោយភូតថា ចូលរួមក្នុងពិធីបើកសម្ពោធហាងនំប៉័ងក្នុងទីក្រុងបាងកក។

៣. តារាម៉ូដែលចិន Yang Zeqi

តារាម៉ូដែលចិនឈ្មោះ Yang Zeqi ក៏ត្រូវបានបញ្ឆោតទៅប្រទេសថៃដោយការបោកប្រាស់ដូចទៅនឹង Wang Xing ដែរ។

Yang ត្រូវបានទាក់ទងតាម WeChat ដោយអ្នកសមគំនិតនៃក្រុមឆបោកដែលពាក់ព័ន្ធនឹងករណី Wang Xing។ Yang បានបាត់ខ្លួននៅជិតព្រំដែនថៃ-មីយ៉ាន់ម៉ា ក្នុងខែធ្នូឆ្នាំ២០២៤ ហើយគេជឿថា Yang ត្រូវបានជួញដូរ។ បន្ទាប់ពីករណី Wang Xing គ្រួសាររបស់គាត់បានបង្ហោះសារអង្វរសុំជំនួយ ហើយគាត់ត្រូវបានគេរកឃើញ និងត្រលប់ទៅផ្ទះវិញនៅពាក់កណ្តាលខែមករា ឆ្នាំ២០២៥៕

អត្ថបទ៖ សុខ សុវណ្ណ

ចុចអាន៖ ប៉ូលិសថៃ ចាប់ខ្លួនជនជាតិចិនមួយក្រុម ដែលជាពួកឧក្រិដ្ឋជនអនឡាញ 

The post ការចាប់ជំរិតជនបរទេសជាបន្តបន្ទាប់នៅថៃ បង្ហាញយ៉ាងច្បាស់ថា ប្រទេសនេះជាសម្បុក Scam appeared first on Kampuchea Thmey Daily.

សម្តេចតេជោ បានលើកឡើងដោយភ្ញាក់ផ្អើលថា៖ «ពេលនេះកម្ពុជាបានកំពុងរងគ្រោះដោយសន្តិភាព ដោយសារតែការរីកចម្រើនរយៈពេលចុងក្រោយ ពួកឆបោកនានាទាក់ទងនឹងល្បែងអនឡាញបានប្រមូលមនុស្សតាំងពីប្រទេសឥណ្ឌូនេស៊ី តាំងពីឥណ្ឌា និងពីកន្លែងនេះកន្លែងនោះ ថា ទៅកម្ពុជា គេឱ្យប្រាក់ខែច្រើន»។

«ដែលមុននេះ ឮថា កម្ពុជាគេខ្លាចសង្រ្គាម ខ្លាចខ្មែរក្រហម ប៉ុន្តែឥឡូវបែរជាកម្ពុជាទៅជាឋានសួគ៍លោកិយនៃការឆបោកនៃក្រុមអន្តរជាតិ ដែលធ្វើការទាក់ទងនឹងការឆបោកតាមរយៈអនឡាញ»។ សម្ដេចតេជោលើកឡើងដូច្នេះ នៅក្នុងឱកាសអញ្ជើញថ្លែងបាឋកថា ក្រោមប្រធានបទ «មេរៀនរបស់ហ៊ុន សែន ពីរបបប្រល័យពូជសាសន៍ និងភាពក្រីក្រឆ្ពោះទៅកាន់សេរីភាព និងវិបុលភាព» នៅវិមានប្រធានាធិបតីទីម័រ។

សម្ដេចតេជោ ប្រធានព្រឹទ្ធសភា ក៏បានអះអាងពីការរាលដាលនៅទូទាំងប្រទេសចំពោះបទល្មើសតាមប្រព័ន្ធបច្ចេកវិទ្យានេះ ដោយមិនកើតនៅតែកម្ពុជានោះឡើយ សូម្បីតែប្រទេសធំៗក៏កើតមានដែរ។ តបទៅនឹងការចោទប្រកាន់ពីប្រទេសមួយចំនួនមកលើកម្ពុជា សម្ដេច ហ៊ុន សែន បានប្រាប់ប្រទេសទាំងនោះ គប្បីប្រដៅ និងណែនាំប្រជាជនខ្លួនកុំឱ្យលេងល្បែង ជាពិសេសល្បែងតាមអនឡាញ ទើបជាការល្អ ដើម្បីជៀសវាងការចាញ់បោកគេ។ ក្នុងនោះ សម្ដេចតេជោ បាននិយាយចំៗទៅកាន់រដ្ឋាភិបាលសហរដ្ឋអាមេរិកតែម្ដង ហេតុអ្វីបានជារដ្ឋាភិបាលអាមេរិកមិនអប់រំពលរដ្ឋខ្លួន កុំឱ្យលេងល្បែងអនឡាញនេះ។

ថ្លែងចេញពីប្រទេសទីម័រ សម្ដេចតេជោ បានបញ្ជាក់ថា តាមរយៈយន្តការពហុភាគី កម្ពុជាបានចូលរួមចំណែកប្រយុទ្ធប្រឆាំងឧក្រិដ្ឋកម្មឆ្លងដែន ជាអាទិ៍ អំពើភេរវកម្ម ការជួញដូរមនុស្ស និងការជួញដូរគ្រឿងញៀន ហើយពេលនេះកំពុងប្រយុទ្ធប្រឆាំងនឹងការឆបោកតាមអនឡាញ៕

ដោយ៖ ធឿន វ៉ាន់សុង

The post ពីប្រទេសសង្គ្រាម សម្ដេចតេជោ ថា កម្ពុជាមករងគ្រោះដោយសារការឆបោកតាមអនឡាញ appeared first on Kampuchea Thmey Daily.

ក្រុមឆបោកទាំងនេះបានរីកដុះដាល​យ៉ាង​ឆាប់រហ័ស​នៅតាមព្រំដែននៃប្រទេសមីយ៉ាន់ម៉ា ហើយបុគ្គលិកបរទេសជាច្រើនជារឿយៗត្រូវបានជួញដូរ និងបង្ខំឱ្យធ្វើការ បោកប្រាស់មនុស្សជុំវិញពិភពលោកដែលក្រុមអ្នកវិភាគឧស្សាហកម្ម​នេះ​ថា«មានតម្លៃរាប់ពាន់លានដុល្លារ»។

អ្នកនាំពាក្យកងកម្លាំងការពារព្រំដែន Karen (BGF) ​លោក​ ឧត្តមសេនីយ៍ទោ Naing Maung Zaw បានប្រាប់ AFP កាលពីថ្ងៃសៅរ៍ថា៖​«យើងបានប្រកាសដើម្បីកម្ចាត់ការបោកប្រាស់ទាំងអស់ចេញពីដីរបស់យើង។ លោក​បាន​បន្ត​ថា​៖«​យើង​បាន​ធ្វើ​បញ្ជី​ហើយ​ត្រៀម​ផ្ទេរ​មនុស្ស​ប្រហែល១ម៉ឺន​នាក់ទៅ​ប្រទេស​ថៃ។ ការ​និរទេស​នឹង​ត្រូវ​ធ្វើ​​ឡើង​​ជា​ក្រុម​ចំនួន៥០០នាក់ក្នុង​មួយ​ថ្ងៃ»។

កន្លែងឆបោកដ៏លេចធ្លោគឺ Shwe Kokko ដែលមានទីតាំងនៅតំបន់ដែលស្ថិតនៅក្រោមការគ្រប់គ្រងរបស់ BGF ក្នុងរដ្ឋ Karen គឺជាទីក្រុងដែលបានសាងសង់ឡើងក្នុងទំបន់មានវាលកសិកម្មជុំវិញ។ អគារទាំងនោះភាគច្រើនត្រូវបានជួលដោយជនជាតិចិនដែលជាមេខ្លោងឆបោក។

ក្រុមឆបោកតាមអ៊ីនធឺណិតទាំងនោះជារឿយៗទាក់ទាញមនុស្សមកពីជុំវិញពិភពលោកដោយសន្យាផ្ដល់ការងារដែលមានប្រាក់​ខែខ្ពស់ ប៉ុន្តែបន្ទាប់មកចាប់ពួកគេធ្វើជាចំណាប់ខ្មាំងហើយបង្ខំពួកគេឲ្យធ្វើការឆបោកតាមអ៊ីនធឺណិត។

កន្លងមក ប្រទេសថៃបាននិរទេសជនជាតិចិនចំនួន១០នាក់រួចហើយដែលជាប់ពាក់ព័ន្ធទៅនឹងការចាប់ជំរិតដ៏ល្បីមួយរបស់តារាសម្តែងដែលត្រូវបានជួយសង្គ្រោះពីមជ្ឈមណ្ឌលបោកប្រាស់តាមអ៊ីនធឺណិតនៅក្នុងប្រទេសមីយ៉ាន់ម៉ា។ យោងតាមសេចក្តីថ្លែងការណ៍របស់ប៉ូលិសបានឲ្យដឹងថា ជនសង្ស័យគឺជាផ្នែកនៃក្រុមឆបោកមួយក្រុមដែលកំពុងប្រតិបត្តិការនៅ Shwe Kokko ក្នុងទីក្រុង Myawaddy ។

កាលពីថ្ងៃពុធសប្ដាហ៍មុនជនបរទេស២៦១នាក់មកពីប្រទេសរាប់សិបក៏ត្រូវបានជួយសង្គ្រោះពីមជ្ឈមណ្ឌលបោកប្រាស់តាមប្រព័ន្ធអ៊ីនធឺណិតក្នុងទីក្រុង Kyauk Khet ចម្ងាយ៥០គីឡូម៉ែត្រពីShwe Kokkoផងដែរ ហើយត្រូវបានបញ្ជូនទៅប្រទេសថៃនិងកំពុងរងចាំការធ្វើមាតុភូមិនិវត្តិន៍៕

អត្ថបទ៖ ប៊ុន សុភាព

The post មីយ៉ាន់ម៉ាត្រៀមបញ្ជូន​បុគ្គលិក​ឆបោកតាមអ៊ីនធឺណិតប្រមាណ​១ម៉ឺននាក់​ទៅ​ថៃ​​ appeared first on Kampuchea Thmey Daily.