ប៉ូលិសថៃ ចាប់ខ្លួនជនជាតិចិនមួយក្រុម ដែលជាពួកឧក្រិដ្ឋជនអនឡាញ 

ប៉ូលិសថៃបានបង្ក្រាបជនជាតិចិនមួយក្រុម ដែលជាពួកឧក្រិដ្ឋជនអនឡាញ (Scam) ដោយពួកគេបានបង្កើតបណ្តាញឆបោកមនុស្សយ៉ាងច្រើន ជាពិសេសគឺមានគោលដៅធំលើជនជាតិចិនគ្នាគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Bangkok Post, ប្រតិបត្តិការបង្ក្រាបនេះធ្វើឡើងនៅថ្ងៃអង្គារទី១ខែកក្កដាឆ្នាំ២០២៥ ក្នុងស្រុក Hang Dong នៃខេត្តឈៀងម៉ៃ ភាគខាងជើងប្រទេសថៃ។

ប៉ូលិសបញ្ជាក់ថា ពួកគេបានទិញផ្ទះដ៏ធំមួយដោយប្រើឈ្មោះជាជនជាតិថៃ ដើម្បីប្រើជាកន្លែងបើកប្រតិបត្តិការឆបោកតាមអនឡាញ។

ក្នុងការវាយឆ្មក់នោះ ប៉ូលិសបានចាប់ខ្លួនជនជាតិចិនចំនួន១៥នាក់ និងបុគ្គលិកជនជាតិមីយ៉ាន់ម៉ា២នាក់ទៀត ហើយក៏បានរឹបអូសកំព្យូទ័រចំនួន១០គ្រឿង ទូរស័ព្ទដៃ២៦គ្រឿង និងសម្ភារៈផ្សេងទៀតដែលពួកគេប្រើក្នុងអំពើឧក្រិដ្ឋកម្មនេះ។

ទន្ទឹមនោះ ក្រុមអ្នកស៊ើបអង្កេតនិយាយថា បណ្តាញបោកប្រាស់នេះបានពង្រីកខ្លួនយ៉ាងធំតាមរយៈការទិញ ឬជួលលំនៅដ្ឋាន សណ្ឋាគារ និងអគារខុនដូនៅទូទាំងភាគខាងជើងប្រទេសថៃ ដើម្បីធ្វើប្រតិបត្តិការ។

ពួកគេបានប្រើប្រាស់ទីតាំងទាំងនោះដើម្បីរៀបចំប្រព័ន្ធទូរគមនាគមន៍ និងទាក់ទាញជនជាតិចិនដែលរស់នៅបរទេសឲ្យចូលលេងល្បែងអនឡាញ ឬចូលរួមក្នុងកាស៊ីណូដែលកំពុងប្រតិបត្តិការនៅក្នុងប្រទេសជិតខាង៕

អត្ថបទ៖ សុខ សុវណ្ណ

ចុចអាន៖ ថៃ ចាប់ជនសង្ស័យនៃក្រុម Scam ដែល​​ឆបោកមនុស្ស ជិ​ត៤០០នាក់ បានលុយ ​ជាង២០​លាន បាត​