ការបញ្ជូនខ្លួននេះ កាលពីព្រឹកថ្ងៃទី ១៣ ខែឧសភា ឆ្នាំ ២០២៦ នេះ ក្រោយបញ្ចប់នីតិវិធីសួរនាំ។ ជនសង្ស័យរួមមាន ៖ ១.ឈ្មោះ FEI YIYUAN ភេទប្រុស អាយុ ៤២ ឆ្នាំ ជនជាតិចិន មុខរបរមិនពិតប្រាកដ។ ២.ឈ្មោះ XUE XITAO ភេទប្រុស អាយុ ៣៤ ឆ្នាំ ជនជាតិចិន មុខរបរមិនពិតប្រាកដ។ ៣.ឈ្មោះ QIAN XIQIANG ភេទប្រុស អាយុ ៣៤ ឆ្នាំ​ ជនជាតិចិន មុខរបរមិនពិតប្រាកដ។ ជនសង្ស័យទាំង ០៣ ស្នាក់នៅបន្ទប់ជួល អគារ​ BAI LY 2 ផ្លូវសបិត​ សង្កាត់ទន្លេបាសាក់ ខណ្ឌចំការមន​ រាជធានីភ្នំពេញ។

លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល បញ្ជាក់ថា កាលពីវេលាម៉ោង ៧ និង ៣០ នាទីព្រឹក​ ថ្ងៃទី ៤ ខែឧសភា ឆ្នាំ ២០២៦ ជនសង្ស័យ បានលួចរថយន្តម៉ាក ALPHARD ពណ៍ខ្មៅ​ ពាក់ស្លាកលេខ​ APO. K66​។ លុះនៅវេលាម៉ោង ៨ និង ៣០ នាទីព្រឹក ថ្ងៃទី ៦ ខែឧសភា ឆ្នាំ ២០២៦​ ជនសង្ស័យ បានយករថយន្ត LEXUS LM350 ពណ៍ខ្មៅ​ ពាក់ស្លាកលេខ​ H.Z.8998 និង​ រថយន្ត​ GAC NG8 ពណ៍ស គ្មានលេខ​។

លោកបន្តថា លុះមកដល់ថ្ងៃទី ១០ ខែឧសភា ឆ្នាំ ២០២៦ ការិយាល័យនគរបាលព្រហ្មទណ្ឌកម្រិតស្រាល បានស្រាវជ្រាវរហូតឈានដល់ការឃាត់ខ្លួនជនសង្ស័យចំនួន ៣ នាក់ នៅចំណុចផ្លូវសហពន្ធ័រុស្សី សង្កាត់ទឹកល្អក់ទី ១​ ខណ្ឌទួលគោក​ រាជធានីភ្នំពេញ នាំមកកាន់ស្នងការដ្ឋាននគរបាលរាជធានីភ្នំពេញ តែម្តង។

បន្ទាប់ពីសួរនាំរួចរាល់ ជនសង្ស័យ សារភាពថា ករណីទី១.ពួកខ្លួនបានធ្វើសកម្មភាពលួចរថយន្តម៉ាក ALPHARD ពណ៍ខ្មៅ​ ពាក់ស្លាកលេខ​ APO.K66 នៅចំណុចអគារខុនដូរ​ ONE PRAK សង្កាត់ស្រះចក​ ខណ្ឌដូនពេញ​ រាជធានីភ្នំពេញ​។ ករណីទី២.កាលពីវេលាម៉ោង​ ១១ និង ៤៤ នាទីយប់ ថ្ងៃទី ៥ ខែឧសភា ឆ្នាំ ២០២៦​ លួចរថយន្តម៉ាក LEXUS LM350 ពណ៍ខ្មៅ​ ពាក់ស្លាកលេខ​ H.Z.8998 នៅចំណុច អគារខុនដូរ​ ONE PRAK សង្កាត់ស្រះចក​ ខណ្ឌដូនពេញ​ រាជធានីភ្នំពេញ។ ករណីទី៣.កាលពីវេលាម៉ោង​ ១២ យប់រំលងអធ្រាត្រ ឈានចូលថ្ងៃទី ៥ ខែឧសភា ឆ្នាំ ២០២៦​ លួចរថយន្តម៉ាក GAC NG8 ពណ៌ស ពាក់ស្លាកលេខ​ 2CI-3521 នៅចំណុចបុរី ប៉េង ហួត​ គម្រោងអេកូសាន់រ៉ាយ​ ភូមិស្វាយតាអុក​ សង្កាត់វាលស្បូវ​ ខណ្ឌច្បារអំពៅ​ រាជធានីភំពេញ។ ករណីទី៤.កាលពីវេលាម៉ោង ៨ ថ្ងៃទី ៧ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2M-2149 នៅចំណុចមុខឃ្លាំង ក្នុងបរិវេណបុរីមង្គលថ្មី ភូមិ ១ ឃុំព្រែកខ្សាយ(ខ) ស្រុកពាមរក៏ ខេត្តព្រៃវែង។ ករណីទី៥.កាលពីវេលាម៉ោង​ ៨ និង ៣០ នាទី ថ្ងៃទី ៦ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2W-4016 នៅចំណុចមុខផ្ទះលេខ ៤៩៧ ផ្លូវលំ ភូមិកោះតេជោ ២ សង្កាត់គគីរធំ ស្រុកកៀនស្វាយ ខេត្តកណ្តាល។ ករណីទី៦.កាលពីវេលាម៉ោង​ ១០ យប់ ថ្ងៃទី ៦ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2CH-6300 នៅចំណុចភូមិលេខ ៦ សង្កាត់កំពង់លាវ ក្រុងព្រៃវែង ខេត្តព្រៃវែង។ ដោយឡែកវត្ថុតាងដកហូតរួមមាន ៖ រថយន្តចំនួន ១ គ្រឿង ម៉ាកព្រុស ពណ៍ទឹកមាស​ សា្លកលេខ ភ្នំពេញ 2BC-8308 (ជាមធ្យោបាយធ្វើសកម្មភាព)។ សម្ភារៈមួយចំនួនសម្រាប់ធ្វើសកម្មភាពលួច រួមនឹងស្លាកលេខចំនួន ១០ សន្លឹក។

បច្ចុប្បន្ន ជនសង្ស័យ ត្រូវបានសមត្ថកិច្ចកសាងសំណុំរឿងចាត់ការតាមនីតិវិធីច្បាប់៕
អត្ថបទ ៖ រដ្ឋា

The post បញ្ជូនជនជាតិចិន ៣ នាក់ លួចរថយន្ត និង ស្លាកលេខ ចំនួន ៦ ករណី ទៅកាន់តុលាការ appeared first on Kampuchea Thmey Daily.

ក្នុងនោះផងដែរ ក្រោយកែប្រែតម្លៃប្រេងឥន្ធនៈថ្មី ក្រុមការងារបានចុះពិនិត្យតាមស្ថានីយ និងដេប៉ូ ចំនួន២៥០ទីតាំង ក្នុងនោះមានដេប៉ូបិទចំនួន២៦ទីតាំង ដោយមូលហេតុ អស់ស្តុកប្រេង និងកម្មង់មកមិនទាន់បាន

ស្ថានភាពសន្និធិស្តុកប្រេងឥន្ធនៈ រួមមាន៖ សម្រាប់ស្ថានីយ (មាន១៣ទីតាំង) ៖ សាំងនៅមានស្តុក ចន្លោះពី ១៥ ០០០លីត្រ ទៅ ២០ ០០០លីត្រម៉ាស៊ូតនៅមានស្តុក ចន្លោះពី ៨ ០០០លីត្រ ទៅ ១០ ០០០លីត្រ។ សម្រាប់ដេប៉ូ (មាន១៣៧ទីតាំង)៖ សាំងនៅមានស្តុក ចន្លោះពី ២០០០លីត្រ ទៅ ៤០០០លីត្រ ម៉ាស៊ូតនៅមានស្តុក ចន្លោះពី ២ ០០០លីត្រ ទៅ ៣០០០លីត្រ។

ជាមួយគ្នាផងដែរក្រុមការងារបានណែនាំ និងផ្សព្វផ្សាយខ្លឹមសារ នៃសេចក្តីជូនដំណឹងរបស់ក្រសួងពាណិជ្ជកម្ម និងតារាងតម្លៃលក់ ដោយបញ្ជាក់ចំណុចសំខាន់ អនុវត្តថ្លៃលក់តាមការកំណត់របស់ក្រសួងពាណិជ្ជកម្ម និង មិនអនុញ្ញាតឱ្យបិទបណ្តោះអាសន្នបើមានស្តុកប្រេងឥន្ធនៈ និងមិនអនុញ្ញាតលក់ តាមប៊ីដុង៕

The post ស្ថានីយ និងដេប៉ូប្រេងឥន្ធនៈ ចំនួន៥៨ទីតាំង ក្នុងភូមិសាស្រ្តខេត្តកណ្ដាល បានបិទបណ្តោះអាសន្នដោយមូលហេតុ អស់ប្រេងក្នុងស្តុក appeared first on Kampuchea Thmey Daily.

នៅថ្ងៃទី៥ ខែធ្នូ ឆ្នាំ២០២៥ លោកស្រី ជុំ ស៊ីណាត ប្រធានមន្ទីរកិច្ចការនារីខេត្តកណ្ដាល បានរៀបចំពិធីយុទ្ធនាការ១៦ថ្ងៃ បញ្ឈប់អំពើហិង្សាលើស្រ្តី និងក្មេងស្រី ដល់សិស្សានុសិស្ស លោកគ្រូ អ្នកគ្រូ នៅវិទ្យាល័យ ហ៊ុន សែន តាខ្មៅ ប្រមាណជាង ១០០០នាក់។

លោកស្រី ជុំ ស៊ីណាត ប្រធានមន្ទីរកិច្ចការនារីខេត្តកណ្ដាល បានថ្លែងថា យុទ្ធនាការ១៦ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី គឺជាយុទ្ធនាការរួមគ្នាមួយ ដែលប្រារព្ធឡើងដើម្បីឲ្យប្រជាជនកម្ពុជា បានដឹងអំពីផលប៉ះពាល់ នៃអំពើហិង្សាលើស្ត្រី និងកុមារី និងការប្រយុទ្ធប្រឆាំងលើអំពើហិង្សា ព្រមទាំងលើកកម្ពស់ការយល់ដឹងជាសាធារណៈពី កាតព្វកិច្ចរបស់ប្រជាពលរដ្ឋគ្រប់រូប និងស្ថាប័នពាក់ព័ន្ធ ក្នុងការអនុវត្តច្បាប់ដែលការពារ និងលុបបំបាត់នូវរាល់ទម្រង់ នៃការរើសអើងលើស្ត្រី និងកុមារ។

លោកស្រី ប្រធានមន្ទីរ បានលើកឡើងថា ដើម្បីឆ្លើយតបយុទ្ធសាស្ត្ររបស់រាជរដ្ឋាភិបាលគ្រប់នីតិកាល ការបន្តជំរុញអនុវត្តផែនការសកម្មភាពជាតិ ស្តីពីការទប់ស្កាត់អំពើហិង្សាលើស្ត្រី គឺសំដៅលុបបំបាត់ឥរិយាបថប្រើអំពើហិង្សាលើ ស្ត្រី និងពង្រីកវប្បធម៌ អហិង្សា ដើម្បីរួមចំណែកលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ ក៏ដូចជាកសាងគ្រួសារមានសុភមង្គល សហគមន៍ និងសង្គមជាតិ។

លោកស្រីបន្ថែមថា ការបញ្ឈប់អំពើហិង្សាលើស្ត្រី និងក្មេងស្រី គឺអាចធ្វើទៅបានតាមរយៈការឆ្លើយតបជាពហុវិស័យទាមទារឱ្យមានការចូលរួមរបស់អ្នកពាក់ព័ន្ធ រួមទាំងស្ត្រីខ្លួនឯងផងដែរ។ លោកស្រីបានសង្កត់ធ្ងន់ថា សម្រាប់យុទ្ធនាការ ១៦ថ្ងៃ គឺធ្វើឡើងតាមរយៈសកម្មភាពនៃការជួបជុំនាពេលនេះ ពិតជាមានសារៈសំខាន់ ក្នុងការចូលរួមកាត់បន្ថយអំពើហិង្សាទាក់ទងនឹងយេនឌ័រ ដើម្បីឆ្លើយតប ទៅនឹងផែនការយុទ្ធសាស្ត្រអភិវឌ្ឍន៍ជាតិ របស់រាជរដ្ឋាភិបាលកម្ពុជា និងផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ត្រី ក្នុងគោលបំណង ជំរុញឱ្យមានសមភាព និងសមធម៌យេនឌ័រនៅក្នុងសង្គម និងធ្វើឪ្យប្រសើរឡើងនូវក្នុងទំនាក់ទំនងផ្នែកយេនឌ័រដើម្បីកាត់បន្ថយរាល់ទម្រង់អំពើហិង្សាលើស្ត្រី។ ដូច្នេះការផ្លាស់ប្ដូរ និងការប្រកាន់ភ្ជាប់នូវការប្រព្រឹត្តិ និងឥរិយាបថជាវិជ្ជមាន គឺជាមធ្យោបាយដ៏មានប្រសិទ្ធភាពក្នុងការលើកកម្ពស់សមភាព និងសមធម៌យេនឌ័រ រវាងបុរស និងស្ត្រី៕

The post យុទ្ធនាការ១៦ថ្ងៃ បញ្ឈប់អំពើហិង្សាលើស្រ្តី និងក្មេងស្រី នៅវិទ្យាល័យ ហ៊ុន សែនតាខ្មៅ appeared first on Kampuchea Thmey Daily.

ហេតុការណ៍​នេះ​បាន​កើត​ឡើង​កាលពី​វេលា​ម៉ោង ៥ និង ០០ នាទី​ទៀបភ្លឺ ថ្ងៃ​ទី ៤ ខែ​កញ្ញា ឆ្នាំ ២០២៥ ស្ថិត​នៅ​ភូមិ​ជ័យជំនះ ឃុំ​សៀមរាប ស្រុក​កណ្តាលស្ទឹង ខេត្ត​កណ្ដាល។

តាម​ប្រភព​ពី​កន្លែង​កើតហេតុ បាន​ឲ្យ​ដឹង​ថា រាល់ដង​នៅ​ពេល​ជនរងគ្រោះ​មកពី​ធ្វើការ​វិញ តែងតែ​បោក​សម្លៀកបំពាក់​រួច​ទើប​ទៅ​សម្រាក ដោយសារ​គាត់​ជា​សន្តិសុខ​យាម​ពេលយប់ ដូច្នេះ​ហើយ​ទើប​ឆ្លៀតពេល​បោក​សម្លៀកបំពាក់។

ប្រភព​ដដែល​បន្ត​ថា ហើយ​នៅ​វេលា​ម៉ោង​ប្រមាណ ៥ និង ០០ នាទី ទៀបភ្លឺ ថ្ងៃ​ទី ៤ កញ្ញា គាត់​កំពុងតែ​រៀបចំ​បើក​តូប​លក់ដូរ ពេលនោះ​ក៏​មាន​អ្នក​ស្នាក់នៅ​ផ្ទះ​ជួល​ក្បែរ​នោះ​មក​ប្រាប់​ថា ជនរងគ្រោះ​ឆក់​ខ្សែភ្លើង​ស្លាប់​បាត់​ហើយ រួច​គាត់​ក៏​រត់​ទៅ​មើល និង​បិទ​កុងទ័រ​ភ្លើង។ ភ្លាមៗ នោះ អ្នក​នៅ​ក្បែរ​ខាង​បាន​ព្យាយាម​ជួយសង្គ្រោះ និង​ទាក់ទង​ហៅ​រថយន្ត​របស់​មន្ទីរ​ពេទ្យ​មក​ជួយ តែ​ជា​អកុសល​ជនរងគ្រោះ​បាន​ស្លាប់​បាត់​ទៅ​ហើយ គាត់​ក៏បាន​រាយការណ៍​ទៅ​អាជ្ញាធរ​មូលដ្ឋាន​ឲ្យ​ ចុះ​មក​អន្តរាគមន៍​នៅ​នឹង​ទីតាំង​កើតហេតុ​ភ្លាមៗ។

បើ​តាម​ការ​បញ្ជាក់​ពី​សមត្ថកិច្ច បាន​ឲ្យ​ដឹង​ថា ជនរងគ្រោះ​ឈ្មោះ ញ៉េប វាស្នា ភេទ​ប្រុស អាយុ ៣៣ ឆ្នាំ បច្ចុប្បន្ន​ស្នាក់នៅ​បន្ទប់​ជួល​ភូមិ-ឃុំ​កើត​ហេតុ​ខាង​លើ មាន​ស្រុកកំណើត​នៅ​ភូមិ​ឃ្លៃ ឃុំ​ជ្រៃ​បាក់ ស្រុក​រលាប្អៀរ ខេត្ត​កំពង់ឆ្នាំង។

ក្រោយពេល​ពិនិត្យ​រួច សមត្ថកិច្ច​ជំនាញ និង​ក្រុម​គ្រូពេទ្យ បាន​សន្និដ្ឋាន​ថា ជនរងគ្រោះ​បាន​ស្លាប់​ដោយសារ​ឆក់​ចរន្តអគ្គិសនី។ ចំណែក​សព​ត្រូវ​បាន​ប្រគល់​ជូន​សាច់ញាតិ ដើម្បី​រៀបចំ​ធ្វើ​បុណ្យ​តាម​ប្រពៃណី​នៅ​ស្រុក​កំណើត៕

អត្ថបទ ៖ ម៉េង

The post សន្តិសុខម្នាក់ ខណៈកំពុងឈរហាលខោអាវ ត្រូវខ្សែភ្លើងឆក់ស្លាប់ភ្លាមៗ មុខបន្ទប់ជួល appeared first on Kampuchea Thmey Daily.

ហេតុការណ៍​ដ៏​សាហាវ​នេះ​បាន​កើត​ឡើង​កាលពី​វេលា​ម៉ោង ២១ និង ៣០ នាទី​យប់ ថ្ងៃ​ទី ៣១ ខែ​សីហា ឆ្នាំ ២០២៥ ស្ថិត​នៅ​ភូមិ​ត្រពាំង​ត្បែង ឃុំ​សំរោង​លើ ស្រុក​អង្គស្នួល ខេត្ត​កណ្ដាល។

លោក​វរសេនីយ៍ឯក មាន សំណាង អធិការ​នគរបាល​ស្រុក​អង្គស្នួល បាន​ឲ្យ​ដឹង​ថា ជនសង្ស័យ​ឈ្មោះ ភិន រ៉ា ភេទ​ប្រុស អាយុ ៤១ ឆ្នាំ មុខរបរ​កម្មករ​រោងចក្រ ត្រូវ​ជា​ប្ដី​របស់​ជនរងគ្រោះ​ឈ្មោះ ហៀង យ៉ាត ភេទ​ស្រី អាយុ ៣៧ ឆ្នាំ។ ជនសង្ស័យ គ្មាន​សារធាតុ​ញៀន​ក្នុង​ខ្លួន​ទេ។ ចំណែក​វត្ថុតាង​ប្រើ​សម្រាប់​ធ្វើ​សកម្មភាព គឺ ដំបង​ដែក​ទីប​មួយ​កំណាត់​ដែល​ជនសង្ស័យ​បាន​បោះចោល​ក្នុង​ព្រៃ​ក្បែរ​ភូមិ។

លោក​អធិការ បន្ត​ថា មុន​ពេល​កើតហេតុ ជនសង្ស័យ បាន​ចេញ​ទៅ​ផឹក​ស្រា​ជាមួយ​បងប្អូន។ លុះ​ដល់​ម៉ោង ៦ និង ០០ នាទី​ល្ងាច ជនសង្ស័យ បាន​ត្រឡប់​មក​ដល់​ផ្ទះ តែ​មិន​ឃើញ​ប្រពន្ធ។ ជនសង្ស័យ ក៏បាន​ដើរ​រក ហើយ​ឃើញ​ប្រពន្ធ​ខ្លួន​កំពុង​ផឹក​ស្រា​នៅ​ផ្ទះ​មិត្តភ័ក្ដិ។ ពេលនោះ ជនសង្ស័យ ក៏បាន​ឈ្លោះប្រកែក​ជាមួយ​ប្រពន្ធ និង​វាយ​នាង​បន្តិចបន្តួច ហើយ​ជនរងគ្រោះ​បាន​រត់​មក​ផ្ទះ​ដោយ​លាក់ខ្លួន​នៅ​ក្នុង​បន្ទប់។ នៅ​ពេល​ជនសង្ស័យ​មក​ដល់​ផ្ទះ​វិញ គាត់​បាន​សួរ​កូន ប៉ុន្តែ​កូន​បាន​ឆ្លើយ​ថា មិន​ឃើញ​ម្ដាយ ហើយ​ដើរ​ចេញ​បាត់​ទៅ។ រហូត​ដល់​ម៉ោង​កើតហេតុ ជនសង្ស័យ​រក​ប្រពន្ធ​ឃើញ ក៏​យក​ដំបង​ដែក​ទីប​វាយ​នាង​ជា​ច្រើន​ដំបង​ស្លាប់​ភ្លាមៗ នៅ​ក្រោម​សំយាប​ផ្ទះបាយ។ ក្រោយ​ធ្វើ​សកម្មភាព​រួច ជនសង្ស័យ បាន​គេច​ខ្លួន​មួយ​សន្ទុះ ដោយ​យក​ដំបង​ទីប​បោះចោល​ក្នុង​ព្រៃ រួច​ក៏​ដើរ​ទៅ​ប៉ុស្តិ៍​នគរបាល​រដ្ឋបាល​សំរោង​លើ ដើម្បី​ប្រគល់​ខ្លួន​ឲ្យ​សមត្ថកិច្ច​អនុវត្ត​តាម​នីតិវិធី។

តាម​ការ​ពិនិត្យ​សាកសព​ដោយ​កម្លាំង​ជំនាញ​កោសល្យវិច័យ និង​ក្រុម​គ្រូពេទ្យ សព​មាន​ស្នាម​បែក​នៅ​ក្បាល​ចំនួន ៣ កន្លែង និង​ស្នាម​ជាំ​នៅ ក កែង​ស្មា និង​កែងដៃ ក្រៅពី​នេះ ពុំ​មាន​ស្លាកស្នាម​អ្វី​ទៀត​ទេ​។ នៅ​ចំពោះ​មុខ​សមត្ថកិច្ច ជនសង្ស័យ បាន​សារភាព​ថា ខ្លួន​ពិត​ជា​បាន​វាយ​ប្រពន្ធ​រហូត​ដល់​ស្លាប់​ប្រាកដ​មែន។ បច្ចុប្បន្ន ជនសង្ស័យ ត្រូវ​បាន​កសាង​សំណុំរឿង ដើម្បី​ចាត់ការ​តាម​នីតិវិធី នៃ​ច្បាប់៕

អត្ថបទ ៖ សុខា

The post ប្ដីស្រវឹងយកដំបងដែកវាយប្រពន្ធស្លាប់ រួចរត់ចូលខ្លួនសារភាពប្រាប់សមត្ថកិច្ច appeared first on Kampuchea Thmey Daily.

ដោយ​អនុវត្ត​តាម​បទបញ្ជា​របស់ លោក​នាយ​ឧត្ដមសេនីយ៍ ស ថេត អគ្គស្នងការ​នគរបាល​ជាតិ និង​លោក​ឧត្ដមសេនីយ៍​ឯក ង៉េង ជួ ប្រធាន​នាយកដ្ឋាន​នគរបាល​ព្រហ្មទណ្ឌ នៅ​ថ្ងៃ​ទី ២៨ ខែ​សីហា ឆ្នាំ ២០២៥ នេះ លោក​ឧត្ដមសេនីយ៍​ត្រី ខេង ម៉េងឈាង អនុ​ប្រធាន​នាយកដ្ឋាន បាន​ដឹកនាំ​កម្លាំង​ជំនាញ សហការ​ជាមួយ​ស្នងការដ្ឋាន​នគរបាល​ខេត្ត​កណ្ដាល ចាប់ខ្លួន​ជន​ដៃ​ដល់​ម្នាក់ ពាក់ព័ន្ធ​ករណី​ឃាតកម្ម​សម្លាប់​ស្ត្រី​ម្នាក់ នៅ​បន្ទប់ទឹក នៃ​សណ្ឋាគារ​ណាហ្គា ១ កាលពី​ឆ្នាំ ២០២៣។

ការ​ចាប់​ខ្លួន​នេះ​ធ្វើ​ឡើង​ដោយ​អនុវត្ត​តាម​ដីកា​បង្គាប់​ឲ្យ​ចាប់ខ្លួន​-​ឃុំខ្លួន លេខ ១២០២ (​ឆ​.១) ដ​.​ច​.​ន​/២៤ ចុះ​ថ្ងៃ​ទី ១ ខែ​សីហា ឆ្នាំ ២០២៤ របស់​លោក ហម ម៉េងសែ ប្រធាន​ក្រុមប្រឹក្សា​ជំនុំ​ជម្រះ នៃ​សាលាដំបូង​រាជធានី​ភ្នំពេញ លើ​ឈ្មោះ សេង ពៅ ភេទ​ប្រុស អាយុ ២៥ ឆ្នាំ ជនជាតិ​ខ្មែរ អាសយដ្ឋាន​បន្ទប់​ជួល ផ្លូវ​លេខ ១៩៧៤ សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ ពី​បទ «ឃាតកម្ម និង​លួច​មាន​ស្ថាន​ទម្ងន់​ទោស ដោយសារ​ការ​ប្រព្រឹត្តិ​អំពើ​ហិង្សា​»។

ប្រតិបត្តិការ​នេះ កម្លាំង​សមត្ថកិច្ច បាន​ធ្វើការ​ស្រាវជ្រាវ​ឃាត់ខ្លួន​ជន​ដៃ​ដល់​នៅ​ចំណុច​ភូមិ​ព្រែក​ស៊ឹង សង្កាត់​សំពៅ​ពួន ក្រុង​សំពៅ​ពូន ខេត្ត​កណ្ដាល។ បច្ចុប្បន្ន ជន​ដៃ​ដល់ ត្រូវ​បាន​បញ្ជូន​មក​កាន់​នាយកដ្ឋាន​នគរបាល​ព្រហ្មទណ្ឌ ដើម្បី​ចាត់ការ​បន្ត​តាម​នីតិវិធី នៃ​ច្បាប់៕

អត្ថបទ ៖ ម៉េង

The post ករណីឃាតកម្មសម្លាប់ស្ត្រីម្នាក់ក្នុងបន្ទប់ទឹកសណ្ឋាគារណាហ្គា ១ កាលពីឆ្នាំ ២០២៣ សមត្ថកិច្ចស្រាវជ្រាវឃាត់ខ្លួនជនដៃដល់បានហើយ appeared first on Kampuchea Thmey Daily.

ក្នុង​ការ​ចុះ​ត្រួតពិនិត្យ​វឌ្ឍនភាព​គម្រោង​ដាក់​លូ​រំដោះ​ទឹកភ្លៀង​នៅតាម​បណ្តោយ​ផ្លូវ​លេខ ​១០៨ និង​ផ្លូវជាតិ​លេខ​ ២១A ស្ថិតនៅ​ក្រុង​តាខ្មៅ ខេត្តកណ្ដាល លោក​អភិបាល​ បាន​ណែនាំ​ដល់​ក្រុមការងារ​បច្ចេកទេស​សាងសង់​ប្រព័ន្ធ​លូ ពន្លឿន​ការសាងសង់​ឱ្យ​រួចរាល់​មុន​ការប្រឡង​សញ្ញាបត្រ​មធ្យម​សិក្សា​ទុតិយភូមិ ដែល​នឹង​ប្រព្រឹត្តទៅ​នៅ​ថ្ងៃទី ​២៨ ខែសីហា ឆ្នាំ​ ២០២៥ ​នេះ ដើម្បី​ជួយ​រំដោះ​ទឹក​ភ្លៀង​មិន​ឱ្យ​លិច​នៅ​មណ្ឌល​ប្រឡង ដែល​បង្ក​ឱ្យ​មាន​ការ​លំបាក ប៉ះពាល់​ដល់​អារម្មណ៍​របស់​សិស្សានុ​សិស្ស​ត្រូវ​មក​ប្រលង។

លោក​អភិបាល​ បាន​បន្តថា ជា​រៀងរាល់ឆ្នាំ​ ក្នុង​តំបន់​នេះ នា​រដូវវស្សា​ម្ដងៗ តែងតែ​រង​នូវ​ការ​ជន់​លិច​ដោយ​ជំនន់​ទឹកភ្លៀង ពិសេស​វិទ្យាល័យ ហ៊ុន សែន តាខ្មៅ និង​ វិទ្យាល័យ ហ៊ុន សែន សេរីភាព ដែល​ជា​មណ្ឌល​ប្រលង​សញ្ញាបត្រ​មធ្យម​ទុតិយភូមិ តែងតែ​រង​ការ​ជន់​លិច និង​បង្ក​ផលវិបាក​ដល់​សិស្សានុសិស្ស​ពេល​ប្រឡង ពិសេស​បានធ្វើឱ្យ​ប្រជាពលរដ្ឋ​នៅ​តំបន់​នេះ​ជួប​ការលំបាក​ក្នុងការ​ធ្វើ​ដំណើរ ខូចខាត​សម្ភារៈ​ពេល​ទឹក​ជន់​លិច និង​ពេល​មាន​ភ្លៀង​ខ្លាំង​ម្ដងៗ ដូច្នេះ​ក្រុមការងារ​បច្ចេកទេស​ដែល​កំពុង​អនុវត្ត​គម្រោង ក្នុងការ​សាងសង់​ប្រព័ន្ធ​រំដោះ​ទឹកភ្លៀង សូម​ពន្លឿន​ការ​សាងសង់​ឱ្យ​បាន​លឿន​ និង​ត្រូវ​រួចរាល់​មុន​ការ​ប្រលង​សញ្ញាបត្រ​មធ្យមសិក្សា​ទុតិយភូមិ​នៅ​ឆ្នាំនេះ ប្រកប​ដោយ​ស្តង់ដារ​បច្ចេកទេស ដើម្បី​ធានា​ឱ្យ​ប្រព័ន្ធ​លូ​រំដោះ​ទឹក​នេះ បាន​រំដោះ​ទឹកភ្លៀង​ បញ្ចៀស​ការ​ជន់​លិច កាត់បន្ថយ​ការ​លំបាក​របស់​សិស្សានុសិស្ស និង​ពលរដ្ឋ​នៅ​តំបន់​នេះ​ផង​ដែរ។

តាម​ការ​បញ្ជាក់​របស់​ក្រុមការងារ​អនុវត្ត​គម្រោង ​លូ​រំដោះ​ទឹកភ្លៀង​នេះ មាន​ប្រវែង​ ៧៩០​ ម៉ែត្រ ដោយ​បាន​ដាក់​លូ​ជ្រុង​ទំហំ ២ ​ម៉ែត្រ x២​ ម៉ែត្រ ដែលមាន​សមត្ថភាព​អាច​រំដោះ​ទឹកភ្លៀង​បាន​ពី ៥០០០​ ម៉ែត្រគូប ទៅ​ ៦០០០ ​ម៉ែត្រគូប ក្នុង​ ១ ​ម៉ោង ហើយ​នៅពេល​គម្រោង​នេះ​អនុវត្ត​រួច តំបន់​នេះ នឹង​លែង​មាន​ការ​ជន់​លិច​ដោយ​ជំនន់​ទឹកភ្លៀង​ទៀតហើយ។

ជាមួយ​គ្នា​នេះ​ដែរ លោក​អភិបាល​ខេត្ត​កណ្ដាល បាន​សូម​ការ​យោគយល់​អធ្យាស្រ័យ​ពី​ប្រជាពលរដ្ឋ​នៅ​ក្នុង​ក្រុង​តាខ្មៅ ក៏ដូចជា​អ្នក​ធ្វើដំណើរ​ឆ្លងកាត់​អំឡុង​ពេល​អនុវត្ត​គម្រោង​ដែល​ធ្វើ​ឱ្យ​ប៉ះពាល់​ដល់​ការ​ធ្វើដំណើរ ការ​ប្រកប​របរ​ចិញ្ចឹមជីវិត បង្ក​ការ​រំខាន​ដល់​ការ​រស់នៅ ប៉ុន្តែ​ពេល​គម្រោង​នេះ​អនុវត្ត​រួចរាល់ តំបន់​នេះ​ អាច​នឹង​ជៀស​ផុត​ការ​ជន់​លិច​ដោយ​ទឹកភ្លៀង​តែងតែ​លិច​ជា​រៀងរាល់​ឆ្នាំ៕

អត្ថបទ ៖ ម៉េង

The post អភិបាលខេត្តកណ្ដាល ចុះពិនិត្យក្រុមការងារបច្ចេកទេសសង់ប្រព័ន្ធលូរំដោះទឹកភ្លៀង នៅក្រុងតាខ្មៅ ដើម្បីពន្លឿនការសាងសង់ឱ្យរួចរាល់មុនប្រឡងបាក់ឌុប appeared first on Kampuchea Thmey Daily.

ហេតុការណ៍​ដ៏​គួរ​ឲ្យ​រន្ធត់​នេះ​ដែរ​បាន​កើត​ឡើង​កាលពី​វេលា​ម៉ោង ១១ និង ៤០ នាទី​ព្រឹក ថ្ងៃ​ទី ២៣ ខែ​សីហា ឆ្នាំ ២០២៥ ស្ថិត​នៅ​ចំណុច​ផ្លូវ​បេតុង ភូមិ​ព្រែ​កតា​ពៅ សង្កាត់​ដើម​មាន ក្រុង​តាខ្មៅ ខេត្ត​កណ្តាល។

បើ​យោង​តាម​ប្រភព​ព័ត៌មាន​ពី​ប្រជាពលរដ្ឋ​បាន​ឲ្យ​ដឹង​ថា មុន​ពេល​កើតហេតុ ពួកគាត់​កំពុងតែ​ពិសា​បាយ ស្របពេលនោះ មាន​ធុំក្លិន​ឈ្ងៀម ក៏​រត់ចេញ​ទៅ​មើល ស្រាប់តែ​ឃើញ​មាន​ផ្សែង​ហុយ​ខ្មៅ​ខ្មួល​ខ្មាញ់​លាយឡំ​អណ្ដាតភ្លើង​យ៉ាង​សន្ធោសន្ធៅ​ចេញ​ពី​ផ្ទះ​កើតហេតុ​បាត់​ទៅ​ហើយ។ ភ្លាមៗ នោះ ប្រជាពលរដ្ឋ បាន​នាំ​គ្នា​យក​ទុយោ​ទឹក​ជួយ​បាញ់​ពន្លត់ភ្លើង តែ​ទប់ទល់​មិន​បាន ទើប​ប្រញាប់​រាយការណ៍​ជូន​សមត្ថកិច្ច​ឲ្យ​ជួយ​ចុះ​មក​អន្តរាគមន៍ ដើម្បី​កុំ​ឲ្យ​មាន​ការ​ឆេះ​រាលដាល​កាន់តែ​ខ្លាំង​ដល់​ផ្ទះ​ដទៃ​ទៀត។

បន្ទាប់ពី​ទទួល​បាន​ដំណឹង​ថា មាន​ករណី​អគ្គិភ័យ​ឆាបឆេះ​ផ្ទះ​ប្រជាពលរដ្ឋ ភ្លាមៗ លោក​ឧត្ដមសេនីយ៍​ទោ ឈឿន សុចិត្ត ស្នងការ នៃ​ស្នងការដ្ឋាន​នគរបាល​ខេត្ត​កណ្តាល បាន​ឲ្យ​រថយន្ត​បង្ការ​អគ្គិភ័យ​ពន្លត់ និង សង្គ្រោះ​ ចេញ​រថយន្ត​ទៅ​ជួយ​អន្តរាគមន៍​ពន្លត់​អគ្គិភ័យ​ផង​ដែរ។ បច្ចុប្បន្ន កម្លាំង​សមត្ថកិច្ច​ជំនាញ កំពុង​ធ្វើការ​អន្តរាគមន៍​បាញ់​ពន្លត់ ក្នុង​នោះ សមត្ថកិច្ច​ក៏បាន​បង្ហើប​ព័ត៌មាន​បឋម​ឲ្យ​ដឹង​ថា មាន​លោកយាយ​ចាស់ជរា​ម្នាក់ បាន​ឆេះ​ស្លាប់​ក្នុង​អណ្ដាតភ្លើង​យ៉ាង​គួរ​ឲ្យ​រន្ធត់។

បច្ចុប្បន្ន សមត្ថកិច្ច​ជំនាញ​នគរបាល​ក្រុង​តាខ្មៅ កំពុង​ធ្វើការ​ស្រាវជ្រាវ​យ៉ាង​យកចិត្តទុកដាក់​បំផុត ដើម្បី​រក​ពី​មូលហេតុ នៃ​ការ​ឆេះ​ស្លាប់​លោកយាយ​ខាងលើ៕

អត្ថបទ ៖ ម៉េង

The post អគ្គិភ័យឆាបឆេះផ្ទះ ១ ខ្នង ឆក់យកអាយុជីវិតលោកយាយម្នាក់ ស្លាប់ក្នុងភ្នក់ភ្លើងយ៉ាងអាណោចអាធ័ម appeared first on Kampuchea Thmey Daily.