សន្តិសុខសង្គម

ករណីឃាតកម្មសម្លាប់ស្ត្រីម្នាក់ក្នុងបន្ទប់ទឹកសណ្ឋាគារណាហ្គា ១ កាលពីឆ្នាំ ២០២៣ សមត្ថកិច្ចស្រាវជ្រាវឃាត់ខ្លួនជនដៃដល់បានហើយ

បានផុស

៨ ខែ មុន

នៅ

ថ្ងៃព្រហស្បតិ៍ ២៨ សីហា ២០២៥

ដោយ

កម្លាំងនាយកដ្ឋានព្រហ្មទណ្ឌ នៃអគ្គស្នងការដ្ឋាននគរបាលរាជធានីភ្នំពេញ សហការជាមួយស្នងការដ្ឋាននគរបាលខេត្តកណ្ដាល ធ្វើការស្រាវជ្រាវឃាត់ខ្លួនជនដៃដល់ម្នាក់ ដែលបានប្រព្រឹត្តបទល្មើសឃាតកម្មសម្លាប់ស្ត្រីម្នាក់ ក្នុងបន្ទប់ទឹកសណ្ឋាគារណាហ្គា ១ កាលពីឆ្នាំ ២០២៣ កន្លងទៅ។

ដោយអនុវត្តតាមបទបញ្ជារបស់ លោកនាយឧត្ដមសេនីយ៍ ស ថេត អគ្គស្នងការនគរបាលជាតិ និងលោកឧត្ដមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ នៅថ្ងៃទី ២៨ ខែសីហា ឆ្នាំ ២០២៥ នេះ លោកឧត្ដមសេនីយ៍ត្រី ខេង ម៉េងឈាង អនុប្រធាននាយកដ្ឋាន បានដឹកនាំកម្លាំងជំនាញ សហការជាមួយស្នងការដ្ឋាននគរបាលខេត្តកណ្ដាល ចាប់ខ្លួនជនដៃដល់ម្នាក់ ពាក់ព័ន្ធករណីឃាតកម្មសម្លាប់ស្ត្រីម្នាក់ នៅបន្ទប់ទឹក នៃសណ្ឋាគារណាហ្គា ១ កាលពីឆ្នាំ ២០២៣។

ការចាប់ខ្លួននេះធ្វើឡើងដោយអនុវត្តតាមដីកាបង្គាប់ឲ្យចាប់ខ្លួន-ឃុំខ្លួន លេខ ១២០២ (ឆ.១) ដ.ច.ន/២៤ ចុះថ្ងៃទី ១ ខែសីហា ឆ្នាំ ២០២៤ របស់លោក ហម ម៉េងសែ ប្រធានក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ លើឈ្មោះ សេង ពៅ ភេទប្រុស អាយុ ២៥ ឆ្នាំ ជនជាតិខ្មែរ អាសយដ្ឋានបន្ទប់ជួល ផ្លូវលេខ ១៩៧៤ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ពីបទ «ឃាតកម្ម និងលួចមានស្ថានទម្ងន់ទោស ដោយសារការប្រព្រឹត្តិអំពើហិង្សា»។

ប្រតិបត្តិការនេះ កម្លាំងសមត្ថកិច្ច បានធ្វើការស្រាវជ្រាវឃាត់ខ្លួនជនដៃដល់នៅចំណុចភូមិព្រែកស៊ឹង សង្កាត់សំពៅពួន ក្រុងសំពៅពូន ខេត្តកណ្ដាល។ បច្ចុប្បន្ន ជនដៃដល់ ត្រូវបានបញ្ជូនមកកាន់នាយកដ្ឋាននគរបាលព្រហ្មទណ្ឌ ដើម្បីចាត់ការបន្តតាមនីតិវិធី នៃច្បាប់៕

អត្ថបទ ៖ ម៉េង