បញ្ជូនជនជាតិចិន ៣ នាក់ លួចរថយន្ត និង ស្លាកលេខ ចំនួន ៦ ករណី ទៅកាន់តុលាការ

ជនជាតិចិនចំនួន ៣ នាក់ ជាមុខសញ្ញាលួចរថយន្ត និង ស្លាកលេខ ត្រូវបាននគរបាលរាជធានីបញ្ជូនទៅកាន់សាលាដំបូងរាជធានីភ្នំពេញ។

ការបញ្ជូនខ្លួននេះ កាលពីព្រឹកថ្ងៃទី ១៣ ខែឧសភា ឆ្នាំ ២០២៦ នេះ ក្រោយបញ្ចប់នីតិវិធីសួរនាំ។ ជនសង្ស័យរួមមាន ៖ ១.ឈ្មោះ FEI YIYUAN ភេទប្រុស អាយុ ៤២ ឆ្នាំ ជនជាតិចិន មុខរបរមិនពិតប្រាកដ។ ២.ឈ្មោះ XUE XITAO ភេទប្រុស អាយុ ៣៤ ឆ្នាំ ជនជាតិចិន មុខរបរមិនពិតប្រាកដ។ ៣.ឈ្មោះ QIAN XIQIANG ភេទប្រុស អាយុ ៣៤ ឆ្នាំ​ ជនជាតិចិន មុខរបរមិនពិតប្រាកដ។ ជនសង្ស័យទាំង ០៣ ស្នាក់នៅបន្ទប់ជួល អគារ​ BAI LY 2 ផ្លូវសបិត​ សង្កាត់ទន្លេបាសាក់ ខណ្ឌចំការមន​ រាជធានីភ្នំពេញ។

លោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល បញ្ជាក់ថា កាលពីវេលាម៉ោង ៧ និង ៣០ នាទីព្រឹក​ ថ្ងៃទី ៤ ខែឧសភា ឆ្នាំ ២០២៦ ជនសង្ស័យ បានលួចរថយន្តម៉ាក ALPHARD ពណ៍ខ្មៅ​ ពាក់ស្លាកលេខ​ APO. K66​។ លុះនៅវេលាម៉ោង ៨ និង ៣០ នាទីព្រឹក ថ្ងៃទី ៦ ខែឧសភា ឆ្នាំ ២០២៦​ ជនសង្ស័យ បានយករថយន្ត LEXUS LM350 ពណ៍ខ្មៅ​ ពាក់ស្លាកលេខ​ H.Z.8998 និង​ រថយន្ត​ GAC NG8 ពណ៍ស គ្មានលេខ​។

លោកបន្តថា លុះមកដល់ថ្ងៃទី ១០ ខែឧសភា ឆ្នាំ ២០២៦ ការិយាល័យនគរបាលព្រហ្មទណ្ឌកម្រិតស្រាល បានស្រាវជ្រាវរហូតឈានដល់ការឃាត់ខ្លួនជនសង្ស័យចំនួន ៣ នាក់ នៅចំណុចផ្លូវសហពន្ធ័រុស្សី សង្កាត់ទឹកល្អក់ទី ១​ ខណ្ឌទួលគោក​ រាជធានីភ្នំពេញ នាំមកកាន់ស្នងការដ្ឋាននគរបាលរាជធានីភ្នំពេញ តែម្តង។

បន្ទាប់ពីសួរនាំរួចរាល់ ជនសង្ស័យ សារភាពថា ករណីទី១.ពួកខ្លួនបានធ្វើសកម្មភាពលួចរថយន្តម៉ាក ALPHARD ពណ៍ខ្មៅ​ ពាក់ស្លាកលេខ​ APO.K66 នៅចំណុចអគារខុនដូរ​ ONE PRAK សង្កាត់ស្រះចក​ ខណ្ឌដូនពេញ​ រាជធានីភ្នំពេញ​។ ករណីទី២.កាលពីវេលាម៉ោង​ ១១ និង ៤៤ នាទីយប់ ថ្ងៃទី ៥ ខែឧសភា ឆ្នាំ ២០២៦​ លួចរថយន្តម៉ាក LEXUS LM350 ពណ៍ខ្មៅ​ ពាក់ស្លាកលេខ​ H.Z.8998 នៅចំណុច អគារខុនដូរ​ ONE PRAK សង្កាត់ស្រះចក​ ខណ្ឌដូនពេញ​ រាជធានីភ្នំពេញ។ ករណីទី៣.កាលពីវេលាម៉ោង​ ១២ យប់រំលងអធ្រាត្រ ឈានចូលថ្ងៃទី ៥ ខែឧសភា ឆ្នាំ ២០២៦​ លួចរថយន្តម៉ាក GAC NG8 ពណ៌ស ពាក់ស្លាកលេខ​ 2CI-3521 នៅចំណុចបុរី ប៉េង ហួត​ គម្រោងអេកូសាន់រ៉ាយ​ ភូមិស្វាយតាអុក​ សង្កាត់វាលស្បូវ​ ខណ្ឌច្បារអំពៅ​ រាជធានីភំពេញ។ ករណីទី៤.កាលពីវេលាម៉ោង ៨ ថ្ងៃទី ៧ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2M-2149 នៅចំណុចមុខឃ្លាំង ក្នុងបរិវេណបុរីមង្គលថ្មី ភូមិ ១ ឃុំព្រែកខ្សាយ(ខ) ស្រុកពាមរក៏ ខេត្តព្រៃវែង។ ករណីទី៥.កាលពីវេលាម៉ោង​ ៨ និង ៣០ នាទី ថ្ងៃទី ៦ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2W-4016 នៅចំណុចមុខផ្ទះលេខ ៤៩៧ ផ្លូវលំ ភូមិកោះតេជោ ២ សង្កាត់គគីរធំ ស្រុកកៀនស្វាយ ខេត្តកណ្តាល។ ករណីទី៦.កាលពីវេលាម៉ោង​ ១០ យប់ ថ្ងៃទី ៦ ខែឧសភា ឆ្នាំ ២០២៦​ លួចស្លាកលេខ រថយន្តលេខ ភ្នំពេញ 2CH-6300 នៅចំណុចភូមិលេខ ៦ សង្កាត់កំពង់លាវ ក្រុងព្រៃវែង ខេត្តព្រៃវែង។ ដោយឡែកវត្ថុតាងដកហូតរួមមាន ៖ រថយន្តចំនួន ១ គ្រឿង ម៉ាកព្រុស ពណ៍ទឹកមាស​ សា្លកលេខ ភ្នំពេញ 2BC-8308 (ជាមធ្យោបាយធ្វើសកម្មភាព)។ សម្ភារៈមួយចំនួនសម្រាប់ធ្វើសកម្មភាពលួច រួមនឹងស្លាកលេខចំនួន ១០ សន្លឹក។

បច្ចុប្បន្ន ជនសង្ស័យ ត្រូវបានសមត្ថកិច្ចកសាងសំណុំរឿងចាត់ការតាមនីតិវិធីច្បាប់៕
អត្ថបទ ៖ រដ្ឋា