ការចុះត្រួតពិនិត្យនេះ ធ្វើឡើងកាលពីថ្ងៃទី១៣ ខែកក្កដា ឆ្នាំ២០២៦ ដោយផ្តោតលើការវាយតម្លៃស្ថានភាពរចនាសម្ព័ន្ធទំនប់ សមត្ថភាពស្តុកទឹក ប្រព័ន្ធរំដោះទឹកជំនន់ ការដំណើរការគ្រប់គ្រងទ្វារទឹក និងការត្រៀមវិធានការបច្ចេកទេស ដើម្បីធានាសុវត្ថិភាពទំនប់ និងសំណង់ធារាសាស្ត្រសំខាន់ៗ ព្រមទាំងត្រៀមឆ្លើយតបឱ្យបានទាន់ពេលវេលា ក្នុងករណីមានការកើនឡើងនៃកម្ពស់ទឹ កឬជំនន់ទឹកភ្លៀង។

ក្នុងឱកាសនោះ លោកអនុរដ្ឋលេខាធិការ បានណែនាំដល់មន្ត្រីឆ្មាំទំនប់ និងមន្ត្រីមន្ទីរធនធានទឹក និងឧតុនិយមខេត្តព្រះវិហារ ឱ្យបង្កើនការយកទឹកចិត្តទុកដាក់ តាមដាន និងត្រួតពិនិត្យស្ថានភាពទំនប់ អាងស្តុកទឹក និងការដំណើរការទ្វារទឹកជាប្រចាំ ព្រមទាំងត្រៀមកម្លាំង សម្ភារៈ និងមធ្យោបាយសម្រាប់ អន្តរាគមន៍បន្ទាន់ និងពង្រឹងកិច្ចសហការជាមួយអាជ្ញាធរមូលដ្ឋាន ដើម្បីធានាបាននូវការឆ្លើយតបប្រកបដោយប្រសិទ្ធភាព និងទាន់ពេលវេលា។

មន្ត្រីជាន់ខ្ពស់រូបនេះ ក៏បានអំពាវនាវដល់ប្រជាពលរដ្ឋ ជាពិសេសអ្នករស់នៅតំបន់ងាយរងគ្រោះដោយទឹកជំនន់ និងនៅតាមដងស្ទឹង ឬក្បែរអាងស្តុកទឹក បន្តតាមដានសេចក្តីជូនដំណឹង និងការព្យាករអាកាសធាតុដែលចេញផ្សាយដោយក្រសួងធនធានទឹក និងឧតុនិយម ព្រមទាំងបង្កើនការប្រុងប្រយ័ត្នខ្ពស់ ដើម្បីការពារសុវត្ថិភាព អាយុជីវិត និងទ្រព្យសម្បត្តិ។

សូមបញ្ជាក់ថា យោងតាមសេចក្តីជូនដំណឹងស្តីពីការព្យាករអាកាសធាតុរបស់ក្រសួងធនធានទឹក និងឧតុនិយម សម្រាប់ថ្ងៃទី១៣–១៥ ខែកក្កដា ឆ្នាំ២០២៦ ប្រទេសកម្ពុជា នឹងទទួលឥទ្ធិពលពីព្យុះទី៩ ឈ្មោះ បាវី(BAVI) និងព្យុះទី១១ ឈ្មោះហៃសិន(Haishen) ដែលអាចបង្កឱ្យតំបន់វាលទំនាប តំបន់ខ្ពង់រាប និងតំបន់មាត់សមុទ្រ មានភ្លៀងធ្លាក់ពីមធ្យមទៅច្រើន លាយឡំដោយផ្គររន្ទះ និងខ្យល់កន្ត្រាក់៕

The post មន្ត្រីជាន់ខ្ពស់ក្រសួងធនធានទឹក ចុះពិនិត្យអាងស្តុកទឹកសំខាន់ៗ ក្នុងខេត្តព្រះវិហារ ដើម្បីត្រៀមឆ្លើយតបឥទ្ធិពលព្យុះ appeared first on Kampuchea Thmey Daily.

សម្ដេចបានមានប្រសាសន៍ផ្ដល់អំណោយផ្ទះថ្មីនេះ ក្នុងឱកាសដែល សម្តេច អញ្ជើញចុះជួប និង សំណេះសំណាលជាមួយ ក្រុមប្រឹក្សា ខេត្ត ក្រុង ស្រុក ឃុំ សង្កាត់ និង ថ្នាក់ដឹកនាំមន្ទីរ អង្គភាពនានា ក្នុងខេត្តព្រះវិហារ កាលពីព្រឹកថ្ងៃទី ១០ ខែកក្កដា ឆ្នាំ ២០២៦ នៅខេត្តព្រះវិហារ។

អំណោយជាថវិកាក្នុងការសាងសង់ផ្ទះថ្មី ១០២ ខ្នង នេះ រួមមាន ថវិកាដែលជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន ផ្ដល់ជូនចំនួន ៥២ ខ្នងផ្ទះ ចំណែក ៥០ ខ្នងផ្ទះទៀត គាំទ្រថវិកាសាងសង់ដោយ លោក ភឺន ផល្លា ជំនួយការផ្ទាល់ សម្ដេចតេជោ ហ៊ុន សែន និង លោកស្រីឧកញ៉ា សាយ សោភា។ ចំពោះដំណើរការ នៃការរៀបចំសាងសង់ផ្ទះថ្មីនេះ គឺទទួលខុសត្រូវដោយ លោកទេសរដ្ឋមន្រ្តី គន់ គីម អនុប្រធាន និងជាអគ្គលេខាធិការសមាគមអតីតយុទ្ធជន និង និវត្តជនកម្ពុជា។

ជុំវិញស្ថានភាព នៃការគ្រប់គ្រងអតីតយុទ្ធជន និង និវត្តជន នៅក្នុងខេត្តព្រះវិហារ បើយោងតាមរបាយការណ៍ លោក គីម រិទ្ធី អភិបាល នៃគណៈអភិបាលខេត្តព្រះវិហារ គិតត្រឹមខែមិថុនា ឆ្នាំ ២០២៦ នេះ ខេត្តព្រះវិហារ មានអតីតយុទ្ធជន និង និវត្តជន សរុប ៣,១៥៥ នាក់។ ចំណែកអតីតយុទ្ធជន និង និវត្តជន ដែលមានជីវភាពខ្វះខាតមានចំនួន ១០២ នាក់ ក្នុងនោះមានគ្រួសារដែលអត់ដី អត់ផ្ទះចំនួន ៧៣ នាក់ និង មានដី អត់ផ្ទះ ចំនួន ២៩ នាក់។ កន្លងមក ចំពោះការងារសាងសង់ផ្ទះដែលជាអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់អតីតយុទ្ធជនដែលជាសមាជិក អ.ន.ក.ខេត្ត ចាប់ពីឆ្នាំ ២០១៦ ដល់ ២០២៦ បានសរុប ១០៩ ខ្នងផ្ទះ ក្នុងនោះ ស្ថិតនៅលើដីសម្បទានសង្គមកិច្ច ទំហំ ៣ ហិតា ស្ថិតនៅភូមិប៉ាលហាល ក្រុងព្រះវិហារ ខេត្តព្រះវិហារ។

នៅក្នុងពិធីសំណេះសំណាលនាព្រឹកនេះ សម្ដេចតេជោ ហ៊ុន សែន ក៏បន្តផ្ដល់អនុសាសន៍ ណែនាំដល់ថ្នាក់ដឹកនាំ និង មន្រ្តីនៅមូលដ្ឋានខេត្តព្រះវិហារទាំងអស់ ត្រូវបន្តយកចិត្តទុកដាក់ ឧបត្ថម្ភគាំទ្រ ទាំងថវិកា និង សម្ភារ ចំពោះគ្រួសារយុទ្ធជន ដែលជាប់ភារកិច្ចនៅព្រំដែន និង យុទ្ធជនពលី ពិការ អតីតយុទ្ធជន និង និវត្តជន ណាដែលមានជីវភាពខ្វះខាត ព្រមទាំងឧស្សាហ៍ចុះសួរសុខទុក្ខផ្ដល់ភាពកក់ក្ដៅដល់ពួកគាត់ដែលបានចូលនិវត្ត។ ជាពិសេសត្រូវជួយផ្ដល់ការអប់រំ បណ្ដុះបណ្ដាលជំនាញវិជ្ជាជីវៈ ដល់កូនចៅយុទ្ធជន និង អតីតយុទ្ធជនទាំងអស់ ឱ្យទទួលបានការសិក្សាសមរម្យ និង ជំរុញឱ្យក្លាយជាបញ្ញវន្តសម្រាប់សង្គមជាតិ។

សូមជម្រាបជូនថា ក្នុងថ្ងៃនេះដែរ សម្ដេចតេជោ ហ៊ុន សែន ក៏បានបញ្ជាក់ជាថ្មីជុំវិញវិសាលភាពគ្របដណ្ដប់របស់សមាគមអតីតយុទ្ធជន និង និវត្តជនកម្ពុជា លើវិស័យអប់រំ ដោយ សម្ដេច បានបញ្ជាក់ថា និវត្តជនក្នុងវិស័យអប់រំជាង ២ ម៉ឺន ៤ ពាន់នាក់ អាចចូលជាសមាជិកសមាគមអតីតយុទ្ធជន និង និវត្តជនកម្ពុជា ដោយស្វ័យប្រវត្តិ លើកលែងតែគ្រូបង្រៀនសកម្ម ដែលមិនទាន់ចូលនិវត្តន៍។

សម្ដេចតេជោ បានបញ្ជាក់ថា ក្រសួងអប់រំ មានសមាគមក្នុងអង្គភាពខ្លួនហើយ គឺ សមាគមបុគ្គលិកសិក្សាខ្មែរ (ស.ប.ស.ខ.) ប៉ុន្តែចំពោះមន្ត្រីរាជការចូលនិវត្តន៍ក្នុងវិស័យអប់រំទាំងអស់ គឺនៅតែអាចចូលជាសមាជិកសមាគមអតីតយុទ្ធជន និង និវត្តជនកម្ពុជាបានដោយស្វ័យប្រវត្តិ ដោយមិនចាំបាច់ដាក់ពាក្យស្នើសុំចូលសមាជិក អ.ន.ក. នោះទេ។ បន្ថែមពីនេះ សម្ដេចតេជោ ក៏បានបញ្ជាក់ថា និវត្តជនក្នុងវិស័យអប់រំ ក្រៅពីទទួលបានអត្ថប្រយោជន៍ពី ស.ប.ស.ខ. ថែមទាំងទទួលបានអត្ថប្រយោជន៍ផ្សេងៗ ពី អ.ន.ក. ដូចសមាជិក អ.ន.ក.ផ្សេងៗ ទៀតដែរ៕

The post សម្តេចតេជោ ហ៊ុន សែន ប្រកាសផ្តល់ផ្ទះចំនួន ១០២ ខ្នង ជូន អតីតយុទ្ធជន និង និវត្តជន នៅខេត្តព្រះវិហារ appeared first on Kampuchea Thmey Daily.

ដោយឡែក រដ្ឋបាលខេត្តព្រះវិហារ ក៏បានចេញសេចក្តីប្រកាសដែរ បន្ទាប់ពីឃើញការបង្ហោះវីដេអូរយៈពេលជាង ១ នាទី របស់អ្នកសារព័ត៌មានអនឡាញខាងលើ ដោយមានខ្លឹមសារថា មានក្រុមជនមិនស្គាល់មុខប្រមាណ ៤ នាក់ ជិះរថយន្តម៉ាក Highlander ពណ៌ខ្មៅ គ្មានស្លាកលេខ បានដេញបុក ស្ទាក់ផ្លូវ និង គំរាមកំហែងរូបលោកដែលជាអ្នកសារព័ត៌មាន រួមទាំងវាយរថយន្តរបស់លោកចំនួន ១ ដៃ ផងដែរ ដែលបានកើតឡើងនៅក្នុងភូមិសាស្ត្រភូមិណារ៉ុង ឃុំឆែបពីរ ស្រុកឆែប ខេត្តព្រះវិហារ កាលពីវេលាម៉ោង ៤ និង ១១ នាទីរសៀល ថ្ងៃទី ២០ ខែមិថុនា ឆ្នាំ ២០២៦។

ពាក់ព័ន្ធករណីនេះ លោកវរសេនីយ៍ឯក គង់ គា នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តព្រះវិហារ បានប្រាប់អ្នកយកព័ត៌មានកាលពីរសៀលថ្ងៃទី ២២ ខែមិថុនា ឆ្នាំ ២០២៦ ថា កម្លាំងជំនាញ នៃស្នងការដ្ឋាននគរបាលខេត្តព្រះវិហារ សហការជាមួយអធិការដ្ឋាននគរបាលស្រុកឆែប និង ប៉ុស្តិ៍នគរបាលរដ្ឋបាលឃុំឆែបពីរ បានចុះស្រាវជ្រាវយ៉ាងម៉ត់ចត់ជាបន្ទាន់ ជាលទ្ធផល ពុំមែនជាករណីប៉ុនប៉ងមនុស្សឃាត ឬ បង្កអសន្តិសុខតាមដងផ្លូវដូចការចុះផ្សាយនោះឡើយ ពោលគឺជាករណីទំនាស់បុគ្គល និង បុគ្គល។

លោកបន្តថា គិតមកដល់ត្រឹមល្ងាចថ្ងៃទី ២២ កម្លាំងនគរបាលស្រុកឆែប និង នគរបាលខេត្តព្រះវិហារ នៅមិនទាន់បានទទួលពាក្យបណ្តឹងពីឈ្មោះខាងលើនៅឡើយទេ ខណៈដែលបានបង្ហោះក្នុងន័យស្វែងរកជំនួយពីសមត្ថកិច្ច។

លោកបន្ថែមថា នគរបាលស្រុកឆែប បានទាក់ទងតាមទូរស័ព្ទទៅបុគ្គលខាងលើដែរ តែឈ្មោះ ប៉ាន់ នោះ បាននិយាយថា លោកមិនទាន់មានពេលទៅដាក់ពាក្យបណ្តឹងនោះទេ ដោយសារមិនទាន់មានលុយចាក់សាំងធ្វើដំណើរ។

បច្ចុប្បន្ន កម្លាំងសមត្ថកិច្ច កំពុងបន្តនីតិវិធីស្រាវជ្រាវ និង ស៊ើបអង្កេតករណីនេះឲ្យបានដិតដល់ ដើម្បីចាត់ការតាមច្បាប់ ហើយរដ្ឋបាលខេត្ត នឹងជម្រាបជូនព័ត៌មានលម្អិតបន្ថែមទៀត នៅពេលទទួលបានលទ្ធផលថ្មី។

ទោះមានការលើកឡើងពីសំណាក់អាជ្ញាធរជុំវិញករណីខាងលើយ៉ាងនេះក្តី អ្នកសារព័ត៌មាន និង មហាជន សង្ឃឹមថា សមត្ថកិច្ច នឹងប្រឹងប្រែងស្រាវជ្រាវឲ្យដឹងរឿងរ៉ាវនេះឆាប់មានពន្លឺយុត្តិធម៌ទាំងសងខាង៕

អត្ថបទ ៖ ជុន កុសល

The post អ្នកសារព័ត៌មានអនឡាញម្នាក់ បង្ហោះហ្វេសបុកផ្ទាល់ខ្លួនថា មានករណីប៉ុនប៉ងមនុស្សឃាត ឬ បង្កអសន្តិសុខតាមដងផ្លូវនៅស្រុកឆែប នៅមិនទាន់មកដាក់ពាក្យបណ្តឹងនោះទេ appeared first on Kampuchea Thmey Daily.

ការណែនាំនេះ បានធ្វើឡើងក្នុងឱកាសដែលលោក រួមជាមួយលោក អំ តារាវិទូ អនុរដ្ឋលេខាធិការទទួលបន្ទុកមន្ទីរព័ត៌មានខេត្តព្រះវិហារ បានអញ្ជើញដឹកនាំកិច្ចប្រជុំផ្សព្វផ្សាយ និង សម្រង់ទិសការងារព័ត៌មាន និង សាធារណមតិ ជូនដល់មន្ត្រីរាជការ នៃមន្ទីរព័ត៌មានខេត្តព្រះវិហារ កាលពីរសៀលថ្ងៃទី ១៧ ខែមិថុនា ឆ្នាំ ២០២៦។

ក្នុងឱកាសនោះ លោកអ្នកនាំពាក្យក្រសួងព័ត៌មាន បានលើកទឹកចិត្តដល់មន្ត្រីជំនាញ ឲ្យច្នៃប្រឌិតផលិតមាតិកាខ្លីៗ ដែលទាក់ទាញ អំពីសម្រស់ និង ប្រវត្តិសាស្ត្រ នៃបេតិកភណ្ឌខ្មែរ ដោយធ្វើការសម្ភាសន៍ ឬ សាកសួអ្នកជំនាញ ឲ្យពន្យល់បញ្ជាក់ ដើម្បីលើកកម្ពស់ការយល់ដឹងដល់សាធារណជនជាតិ និង អន្តរជាតិ តាមគ្រប់បណ្តាញផ្សព្វផ្សាយ។

លោកលើកឡើងថា ការផ្សព្វផ្សាយវប្បធម៌ជាតិបានយ៉ាងទូលំទូលាយ នឹងជួយជំរុញកំណើនទេសចរឲ្យកាន់តែខ្លាំងក្លា។ ទន្ទឹមនឹងនេះ ការចែករំលែកអត្ថបទ និង វីដេអូតាមបណ្តាញសង្គម ក៏ជាឱកាសមាសសម្រាប់យុវជនកម្ពុជាក្នុងការសិក្សាស្វែងយល់ និង រួមចំណែកអភិរក្សសម្បត្តិវប្បធម៌ជាតិឲ្យកាន់តែទូលាយ។

ជាមួយគ្នានេះ លោក ទេព អស្នារិទ្ធ បានណែនាំដល់មន្ត្រីព័ត៌មាន នៃមន្ទីរព័ត៌មានខេត្តព្រះវិហារ ឲ្យបង្កើនការផលិតមាតិកាផ្សព្វផ្សាយអំពីប្រាសាទព្រះវិហារ និង តំបន់បេតិកភណ្ឌវប្បធម៌ប្រវត្តិសាស្ត្រផ្សេងៗ ឲ្យបានច្រើនបន្ថែមទៀត។

លោកសង្កត់ធ្ងន់ថា ដោយសារប្រាសាទនេះជាមរតកដូនតាខ្មែរ ហើយកម្ពុជាធ្លាប់ទទួលបានជោគជ័យតាមផ្លូវច្បាប់ជាបន្តបន្ទាប់ក្នុងការការពារអធិបតេយ្យភាពលើប្រាសាទនេះ ទោះបីជាមានភាគីជិតខាងនៅតែមានមហិច្ឆតាឈ្លានពានក្តី ការផលិតមាតិកាព័ត៌មាន និង ឯកសារពាក់ព័ន្ធដើម្បីពង្រឹងការយល់ដឹងដល់សាធារណមតិ គឺជាកិច្ចការអាទិភាពដែលមន្ទីរព័ត៌មានត្រូវយកចិត្តទុកដាក់ខ្ពស់។

លោកស្រី ហែម សុគុណពិសី ប្រធានមន្ទីរព័ត៌មានខេត្តព្រះវិហារ បានសម្តែងការអរគុណយ៉ាងជ្រាលជ្រៅចំពោះថ្នាក់ដឹកនាំក្រសួងព័ត៌មាន ដែលបានឆ្លៀតពេលវេលាដ៏មមាញឹក និង ផ្តល់តម្លៃខ្ពស់ក្នុងការអញ្ជើញមកដឹកនាំកិច្ចប្រជុំផ្សព្វផ្សាយ និង តម្រង់ទិសការងារព័ត៌មាន និង សាធារណមតិ ជូនដល់មន្ត្រីរាជការ នៃមន្ទីរព័ត៌មានខេត្តព្រះវិហារ។

លោកស្រីប្រធានមន្ទីរ បានចាត់ទុកថា កិច្ចប្រជុំតម្រង់ទិសនេះ ពិតជាមានសារៈសំខាន់ខ្លាំងណាស់ ក្នុងការជួយបង្កើនសមត្ថភាពដល់មន្ត្រីជំនាញ ដើម្បីឲ្យមានមូលដ្ឋានកាន់តែរឹងមាំក្នុងការផលិតមាតិកាព័ត៌មានចំគោលដៅព័ត៌មាន និង សាធារណមតិ ឆ្លើយតបទៅនឹងតម្រូវការរបស់អ្នកអាន ក៏ដូចជាអ្នកទស្សនា ជាពិសេសដើម្បីរួមចំណែកលើកកម្ពស់វិស័យវប្បធម៌ និង ទេសចរណ៍នៅក្នុងខេត្តឲ្យកាន់តែទូលំទូលាយថែមទៀត៕

The post អ្នកនាំពាក្យក្រសួងព័ត៌មាន ជំរុញ មន្ទីរព័ត៌មាន និង អ្នកផលិតមាតិកា បង្កើនការផ្សព្វផ្សាយពីតម្លៃបេតិកភណ្ឌជាតិឲ្យបានទូលំទូលាយ appeared first on Kampuchea Thmey Daily.

ការណែនាំនេះក្នុងឱកាស លោក ទេព អស្នារិទ្ធ អញ្ជើញជាអធិបតី ក្នុងពិធីផ្សព្វផ្សាយយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ នៅវិទ្យាល័យរវៀង ខេត្តព្រះវិហារ កាលពីព្រឹកថ្ងៃទី ១៧ ខែមិថុនា ឆ្នាំ ២០២៦ ដោយមានការចូលរួមពី លោក ណុប វុធ្ធី អភិបាលរងខេត្តព្រះវិហារ  លោកអភិបាលរងស្រុករវៀង លោកស្រីប្រធានមន្ទីរព័ត៌មានខេត្ត លោកនាយក លោកគ្រូ អ្នកគ្រូ និង សិស្សានុសិស្សប្រមាណជាង ១,០០០ នាក់។

លោក ទេព អស្នារិទ្ធ បានផ្តល់ដំបូន្មានដល់សិស្សានុសិស្សកម្រិតអនុវិទ្យាល័យ និង វិទ្យាល័យ ឲ្យប្រើប្រាស់បច្ចេកវិទ្យា ដើម្បីទទួលចំណេះដឹងតាមប្រព័ន្ធឌីជីថល ដែលក្រសួងអប់រំ យុវជន និង កីឡា បានបង្កើតឡើង និង ទទួលព័ត៌មានវិជ្ជមានពីបណ្តាញសង្គមផ្សេងៗ សម្រាប់ការសិក្សា និង ធ្វើលំហាត់អនុវត្តជាក់ស្តែងឲ្យបានចំគោលដៅ។ «នៅពេលដែលយើងប្រើប្រាស់បច្ចេកវិទ្យាបានត្រឹមត្រូវតាមគោលដៅ វានឹងផ្ដល់ផលប្រយោជន៍ និង ផ្តល់តម្លៃមកឲ្យយើងវិញ។ យើងអាចទទួលបាននូវចំណេះដឹងបន្ថែម ក្រៅពីអ្វីដែលបានរៀននៅក្នុងថ្នាក់ និង អ្វីដែលលោកគ្រូអ្នកគ្រូបានផ្ដល់ឲ្យ។ តាមរយៈមធ្យោបាយឌីជីថលនៅលើដៃរបស់យើងនេះ យើងអាចបង្កើនចំណេះដឹងបានជាប្រចាំថ្ងៃ។ ពេលខ្លះ នៅពេលដែលយើងធ្វើការស្រាវជ្រាវលើប្រធានបទណាមួយ យើងត្រូវប្រើប្រាស់ទូរស័ព្ទ ដើម្បីស្វែងរកព័ត៌មានដែលក្រសួងអប់រំផ្ដល់ឲ្យ។ នៅក្នុងកម្មវិធី (App) របស់ក្រសួងអប់រំ មានចំណេះដឹងជាច្រើន ដែលជួយបង្កើនពុទ្ធិ និង ចំណេះដឹងបន្ថែម។ ដូច្នេះ សូមឲ្យការប្រើប្រាស់បច្ចេកវិទ្យាឲ្យត្រូវគោលដៅបែបនេះ ដើម្បីបម្រើឲ្យប្រយោជន៍ នៃការសិក្សារបស់យើងឆ្ពោះទៅរកអនាគតដ៏ភ្លឺស្វាង និង ប្រសើរជាងមុន»។

ជាមួយគ្នានេះដែរ លោកអ្នកនាំពាក្យក្រសួងព័ត៌មាន បានព្រមានថា ការប្រើប្រាស់បច្ចេកវិទ្យាឌីជីថលខុសគោលដៅ ដូចជាការលេងហ្គេមមិនចេះគិត ឬ ការចែកចាយព័ត៌មានមិនពិត នឹងនាំឲ្យបាត់បង់ពេលវេលា និង ថវិកា ព្រមទាំងប៉ះពាល់ដល់អនាគត ហើយងាយក្លាយជាជនរងគ្រោះ នៃការឆបោកតាមប្រព័ន្ធអនឡាញផងដែរ។ ក្នុងន័យនេះ លោកបានក្រើនរំលឹកដល់យុវជនឲ្យមានការប្រុងប្រយ័ត្នខ្ពស់មុននឹងចែករំលែក (Share) ព័ត៌មានណាមួយ។ ការពិនិត្យផ្ទៀងផ្ទាត់ប្រភពឲ្យបានច្បាស់លាស់មុននឹងចុចចែករំលែក គឺជាទង្វើដ៏សំខាន់ដើម្បីទប់ស្កាត់ការផ្សព្វផ្សាយព័ត៌មានមិនពិត ឬ ព័ត៌មានដែលមានលក្ខណៈបំភាន់ ដែលអាចបង្កផលប៉ះពាល់ដល់សន្តិសុខសង្គម និង កិត្តិយសបុគ្គល។ លោកបានអំពាវនាវដល់យុវជនកម្ពុជាទាំងអស់ ឲ្យប្រែក្លាយខ្លួនជាកម្លាំងចលករប្រកបដោយមនសិការ និង ការទទួលខុសត្រូវក្នុងសង្គមឌីជីថល។

លោកសង្កត់ធ្ងន់ថា «ការរួមគ្នាបញ្ចប់ការចែករំលែកព័ត៌មានមិនពិត និង ការចូលរួមផ្សព្វផ្សាយតែអ្វីដែលជាការពិត វិជ្ជមាន និង មានប្រយោជន៍សម្រាប់សហគមន៍ គឺជាការរួមចំណែកក្នុងការការពារសន្តិភាព ស្ថិរភាព និង ការអភិវឌ្ឍប្រទេសជាតិ ឲ្យកាន់តែមានភាពរីកចម្រើន ជាមួយបរិយាកាសរស់នៅប្រកបដោយសុវត្ថិភាព និង លំហព័ត៌មានមានគុណភាព»។

លោក ណុប វុធ្ធី អភិបាលរងខេត្តព្រះវិហារ មានប្រសាសន៍ថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ ដែលដឹកនាំដោយក្រសួងព័ត៌មាននេះ ពិត​ជា​មាន​សារៈសំខាន់​ខ្លាំង​ណាស់ ក្នុងបរិបទដែលបច្ចេកវិទ្យាឌីជីថល និង​ បណ្តាញ​ទំនាក់​ទំនង​សង្គម​កំពុង​រីក​ចម្រើន​យ៉ាង​ឆាប់រហ័ស។ សព្វថ្ងៃនេះ ប្រជាពលរដ្ឋ ជាពិសេសយុវជន និង សិស្សានុសិស្ស អាច​ទទួល​បាន​ព័ត៌មាន​លឿន រហ័ស ងាយស្រួល និង ទូលំទូលាយជាងពេលណាៗ ទាំងអស់។ នេះ​ជា​ឱកាស​ដ៏​ល្អ​សម្រាប់ការសិក្សា ស្រាវជ្រាវ ការទំនាក់ទំនង និង ការអភិវឌ្ឍចំណេះដឹង។

សិស្សានុសិស្ស​ទាំង​អស់​ នៅវិទ្យាល័យរវៀង ​បាន​ប្តេជ្ញា​ចិត្ត​យ៉ាងមោះមុតក្នុង​ការ​ចូល​រួម​ជា​មួយ​ក្រសួង​ព័ត៌មាន​ ក្នុង​ការ​​ទប់​ស្កាត់​ព័ត៌មាន​ក្លែង​ក្លាយ។ ពួកគេ​សូម​ប្តេជ្ញា​ចិត្ត «​និយាយ​ថា​ទេ​ចំពោះ​ព័ត៌មានក្លែង​ក្លាយ» និង​ ចូល​រួម​លើក​កម្ពស់​ចំណេះ​ដឹងក្នុង​ការ​​​ប្រើ​ប្រាស់​បណ្តាញ​ទំនាក់​ទំនង​សង្គម​ប្រកប​ដោយ​ការ​ទទួល​ខុស​ត្រូវ​ខ្ពស់ និង​ ពង្រឹង​ចំណេះ​ដឹង​ព័ត៌មាន និង​ ប្រព័ន្ធ​ផ្សព្វ​ផ្សាយ​នៅក្នុង​សាលា​រៀន និង សហគមន៍​យើង។​​

សូមបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី ២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»ត្រូវបានប្រកាសដាក់ឲ្យដំណើរការជាផ្លូវការ កាលពីថ្ងៃទី ១៨ ខែឧសភា ឆ្នាំ ២០២៦ នៅវិទ្យាល័យ សម្តេច ហ៊ុន សែន ប៊ុន រ៉ានី វត្តភ្នំ ក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន។ យុទ្ធនាការជំហានទី ២ នេះ បាននិងកំពុងធ្វើដំណើរទៅតាមបណ្តាវិទ្យាល័យ អនុវិទ្យាល័យ ក្នុងរាជធានីភ្នំពេញ ខេត្តព្រះវិហារ តាកែវ កំពង់ស្ពឺ កំពត និង បន្តទៅខេត្តផ្សេងៗ ទៀត ជាបន្តបន្ទាប់ នៅទូទាំងប្រទេស ក្នុងឆ្នាំ ២០២៦ នេះ៕

The post លោក ទេព អស្នារិទ្ធ ណែនាំយុវជនប្រើបច្ចេកវិទ្យាឲ្យចំគោលដៅ និង ប្រុងប្រយ័ត្នចំពោះព័ត៌មានក្លែងក្លាយ appeared first on Kampuchea Thmey Daily.

ប្រជាកសិករម្នាក់បានលើកឡើងថា ការចិញ្ចឹមជ្រូកនេះមិនសូវហត់នឿយពេកទេ យើងអាចឆ្លៀតពេលពីធ្វើស្រែមកមើលថែបាន។ វាដូចជាការសន្សំប្រាក់អញ្ចឹង ដល់ពេលជ្រូកធំលក់ទៅ បានលុយដុំសម្រាប់ទប់ទល់ការចំណាយក្នុងផ្ទះ និងទុកឱ្យកូនបានបន្តការរៀនសូត្រ។

អ្នកជំនាញផ្នែកកសិកម្ម និងសេដ្ឋកិច្ចជនបទបានផ្តល់អនុសាសន៍ថា ដើម្បីឱ្យរបរចិញ្ចឹមជ្រូកលក្ខណៈគ្រួសារនេះមាននិរន្តរភាព និងមិនរងផលប៉ះពាល់ពីការប្រែប្រួលតម្លៃទីផ្សារ ប្រជាកសិករគួរតែពង្រឹងការថែទាំសុខភាពសត្វ តាមដានការចាក់វ៉ាក់សាំងការពារជំងឺឆ្លងផ្សេងៗ ដើម្បីការពារការខាតបង់ដើមទុនជាយថាហេតុ។ ការគ្រប់គ្រងហិរញ្ញវត្ថុ គួរមានការកត់ត្រារាល់ការចំណាយលើចំណី និងថ្នាំសង្កូវដើម្បីដឹងពីប្រាក់ចំណេញពិតប្រាកដ និងងាយស្រួលក្នុងផែនការហិរញ្ញវត្ថុសម្រាប់វគ្គបន្តបន្ទាប់។

សូមជម្រាបថា គំនិតផ្តួចផ្តើម និងការខិតខំប្រឹងប្រែងរបស់ប្រជាពលរដ្ឋនៅក្នុងភូមិមហាផល ឃុំឈានមុខ គឺជាគំរូដ៏ល្អស្របតាមគោលនយោបាយអភិវឌ្ឍន៍សហគមន៍ ដោយបំប្លែងសក្តានុពលដែលមានស្រាប់ក្នុងមូលដ្ឋាន ទៅជាខែលការពារហានិភ័យសេដ្ឋកិច្ច និងជាគ្រឹះដ៏រឹងមាំសម្រាប់អនាគតគ្រួសារនីមួយៗ។

គំរូនៃការចិញ្ចឹមជ្រូករបស់ប្រជាពលរដ្ឋភូមិមហាផល បានផ្តល់ជាមេរៀនហិរញ្ញវត្ថុយ៉ាងសំខាន់ចំនួន ៣ ចំណុចសម្រាប់សហគមន៍ជនបទ៖ ១. ការបំប្លែងកាកសំណល់ទៅជាទុន ការចិញ្ចឹមជ្រូកលក្ខណៈគ្រួសារជួយឱ្យកសិករអាចទាញយកផលប្រយោជន៍ពីអនុផលកសិកម្ម ដូចជា កន្ទក់ ចុងអង្ករ ឬកាកសំណល់ផ្ទះបាយ ធ្វើជាចំណី ដែលនេះជាការកាត់បន្ថយការចំណាយប្រចាំថ្ងៃ និងបង្កើនប្រាក់ចំណេញ។ ២. ទម្រង់នៃការសន្សំជាទ្រព្យសកម្ម យន្តការនេះប្រៀបដូចជា កូនជ្រូកសន្សំប្រាក់ជារូបវន្ត។ ការវិនិយោគលើកូនជ្រូក និងចំណីបន្តិចម្តងៗរាល់ថ្ងៃ គឺជាការសន្សំប្រាក់ដោយប្រយោល។ នៅពេលជ្រូកធំពេញវ័យ លទ្ធផលដែលទទួលបានមកវិញ គឺជាប្រាក់ដុំ ដែលអាចយកទៅប្រើប្រាស់ក្នុងគោលដៅធំៗបាន។ ៣. ការវិនិយោគលើមូលធនមនុស្ស ថវិកាដែលបានមកពីការលក់ជ្រូក ត្រូវបានប្រជាកសិករយកទៅប្រើប្រាស់ចំគោលដៅប្រកបដោយចីរភាព នោះគឺការអប់រំរបស់កូនៗ៕

អត្ថបទ៖ ជុន កុសល

The post របរចិញ្ចឹមជ្រូកលក្ខណៈគ្រួសាររបស់ប្រជាកសិករនៅស្រុកត្បែងមានជ័យ បានលើកកម្ពស់ជីវភាពប្រចាំថ្ងៃកាន់តែប្រសើរឡើង appeared first on Kampuchea Thmey Daily.

ពលរដ្ឋរស់នៅក្នុងក្រុងព្រះវិហារ បានលើកឡើងនៅថ្ងៃទី១២ខែមិថុនា ឆ្នាំ២០២៦ នេះថា ពីធ្លាប់បង់តែប្រមាណ៤០ម៉ឺនរៀល ប៉ុន្តែខែនេះឡើងដល់៨០ម៉ឺនរៀល។ ពលរដ្ឋបន្តថា បើយ៉ាងហ្នឹង ដាច់ខ្យល់ហើយ សម្ភារៈប្រើដដែល តែគីឡូភ្លើងឡើងសាហាវរាល់ខែ។ពលេរដ្ឋលើងឡើងទៀតថា អត់ដឹងនិយាយថាម៉េចទេមួយខែៗរកតែលុយបង់ភ្លើងធ្លាប់តែប្រើអស់ហើយ៧ម៉ឺនរៀលទៅ៨ម៉ឺនរៀល តែឥឡូវជិត២០ម៉ឺនរៀល។

ស្រដៀងគ្នានេះដែរ ពលរដ្ឋនៅស្រុកជាំក្សាន្ត ក៏បានត្អូញត្អែរថាលក់ដូរមិនសូវដាច់ ហើយភ្លើងឡើងបែបនេះ មានលុយពីណាបង់ឱ្យក្រុមហ៊ុន បើគុណជាពីរបែបនេះ ហើយពួកគាត់ទើបនឹងជួបវិបត្តិសង្គ្រាមឈ្លានពានរបស់ថៃ មកលើកម្ពុជា រកលុយមិនបានទេ។

ពាក់ព័ន្ធករណីនេះ កាលពីថ្ងៃទី ០៩ ខែមិថុនា កន្លងទៅ ក្រុមហ៊ុនអគ្គិសនីព្រះវិហារ បានចេញសេចក្តីបំភ្លឺព័ត៌មានថា ដោយមួយរយះពេលចុងក្រោយនេះមានភ្លៀងធ្លាក់ខ្លាំងលាយឡំជាមួយខ្យល់កន្ត្រាក់ ទើបធ្វើអោយមានការដាច់ចរន្តអគ្គិសនីញឹកញាប់ពីខ្សែបណ្តាញបញ្ជូនរងនៅលើ អូតូទ្វារចរន្តលេខ៥ ពីអនុស្ថានីយព្រះវិហារ។ បន្ទាប់ពីអាកាសធាតុបានស្ងប់ភ្លៀង ក្រុមការងារបច្ចេសទេសខាងបញ្ជូនរងធ្វើការតភ្ជាប់អគ្គិសនីជូនអតិថិជនប្រើប្រាស់ជាធម្មតាវិញ។

ទោះជាយ៉ាងនេះក្តី ពលរដ្ឋបញ្ជាក់ថា ការបំភ្លឺរបស់ក្រុមហ៊ុនអគ្គិសនីព្រះវិហារ មិនត្រូវជាមួយខ្លឹមសារនៃការចង់បានរបស់ពួកគាត់នោះទេ គឺជាចេនាគេចវេសពីការពិត។

លោក ស៊ុន ច័ន្ទរក្សា ប្រធានមន្ទីររ៉ែ និងថាមពល ខេត្តព្រះវិហារ បានឱ្យដឹងនៅថ្ងៃទី១២ ខែមិថុនាឆ្នាំ២០២៦នេះថា ករណីនេះលោកនឹងហៅក្រុមហ៊ុនអគ្គិសនីដែលបើកអាជីវកម្មនៅក្នុងខេត្តព្រះវិហារ ទាំងអស់មកជួបគ្នាជាមួយតំណាងពលរដ្ឋ ដើម្បីរកដំណោះស្រាយ នៅថ្ងៃចន្ទ ដើមសប្តាហ៍ខាងមុខនេះ៕

អត្ថបទ៖ ជុន កុសល

The post ពលរដ្ឋនៅខេត្តព្រះវិហារ កំពុងត្អូញត្អែររឿងគីឡូភ្លើង​ហក់ឡើងទ្វេរដង appeared first on Kampuchea Thmey Daily.

មន្ត្រីផ្នែករដ្ឋបាលព្រៃឈើរវៀង បានឱ្យដឹងថា រថយន្តកូរ៉េកែច្នៃដឹកឈើខុសច្បាប់បានមួយគ្រឿង ដឹកឈើប្រមាណជិត១០ម៉ែត្រគូប។ បច្ចុប្បន្នទាំងរថយន្ត និងឈើ ត្រូវបានបញ្ជូនយកទៅរក្សាទុកនៅសង្កាត់រដ្ឋបាលព្រៃឈើស្រុករវៀង ដើម្បីចាត់ការទៅតាមនិតិវិធីច្បាប់។ ប្រភពព័ត៌មានបានឱ្យដឹងថា ឈើល្មើសច្បាប់ទាំងនេះ ដឹកចេញពីតំបន់ព្រៃព្រះរកា ស្រុកឆែប នៃខេត្តព្រះវិហារ៕

អត្ថបទ៖ ជុន កុសល

The post រដ្ឋបាលព្រៃឈើស្រុករវៀង ឃាត់រថយន្តដឹកឈើខុសច្បាប់១គ្រឿងនៅលើផ្លូវជាតិលេខ៦២ appeared first on Kampuchea Thmey Daily.