លោក សល់ ជាង តំណាងសហគមន៍ជនជាតិដើមភាគតិចទំពួន បានអះអាងថា ជម្លោះដីធ្លីរវាងសហគមន៍ និងភាគីក្រុមហ៊ុនឯកជន បានអូសបន្លាយជាយូរមកហើយ ដោយការដោះស្រាយតាមរយៈអាជ្ញាធរមូលដ្ឋានមិនទាន់ទទួលបានលទ្ធផលឡើយ។ លោកថា ប្រជាពលរដ្ឋបានធ្វើការតវ៉ាចំនួនពីរលើក បន្ទាប់ពីពួកគេអះអាងថា មានការទន្ទ្រានលើដីដែលសហគមន៍ប្រើប្រាស់ និងអាស្រ័យផលជាប្រពៃណី។

តាមការអះអាងរបស់តំណាងសហគមន៍ ព្រៃអារក្សមានសារៈសំខាន់សម្រាប់ជីវភាព និងវប្បធម៌របស់ជនជាតិដើមភាគតិច ដោយជាប្រភពប្រមូលអនុផលព្រៃឈើ កន្លែងចិញ្ចឹមសត្វ និងជាទីធ្វើពិធីសែនព្រេនតាមទំនៀមទម្លាប់។ សហគមន៍បារម្ភថា ប្រសិនបើព្រៃនេះបាត់បង់ នឹងប៉ះពាល់ដល់ការរស់នៅ និងអត្តសញ្ញាណវប្បធម៌របស់ពួកគេ។

ជាមួយគ្នានេះ តំណាងសហគមន៍ក៏បានអះអាងថា ក្នុងអំឡុងពេលកើតមានវិវាទ មានការគំរាមកំហែង និងភាពតានតឹងរវាងភាគីទាំងពីរ ហើយបានអំពាវនាវឱ្យអាជ្ញាធរពាក់ព័ន្ធជួយពន្លឿនការដោះស្រាយ ដើម្បីបញ្ចៀសការកើនឡើងនៃជម្លោះ និងការពារសិទ្ធិរបស់ជនជាតិដើមភាគតិច។

ដោយឡែក លោក ពុំ តួ ជាជនជាតិដើមភាគតិចកាចក់ បានអះអាងថា សហគមន៍ធ្លាប់បានដាក់ពាក្យស្នើសុំអន្តរាគមន៍ទៅអាជ្ញាធរ និងតុលាការតាំងពីឆ្នាំ២០២៤ ប៉ុន្តែរហូតមកដល់ពេលនេះ មិនទាន់មានដំណោះស្រាយច្បាស់លាស់នៅឡើយ។

គួររំឮកថា ឆ្លើយតបសំណើររបស់លោក សល់ ហ្មើយ ប្រធានសហគមន៍ជនជាតិដើមភាគតិចកាចក់ ភូមិកាណាត, ក្រសួងមហាផ្ទៃ កាលពីថ្ងៃទី ០៥ ខែធ្នូ ឆ្នាំ ២០១២ បានចេញលិខិតយល់ព្រម ព្រមចុះបញ្ជី សហគមន៍ជនជាតិដើមភាគតិចកាចក់ ភូមិកាណាតដែលមានអាស័យដ្ឋាននៃទីស្នាក់ការកណ្តាល នៅភូមិកាណាត ឃុំតាឡាវ ស្រុកអណ្តូងមាស ខេត្តរតនគិរី។ ក្នុងលិខិតបញ្ជាក់ថា សហគមន៍ជនជាតិដើមភាគតិចកាចក់ ភូមិកាណាត ត្រូវអនុវត្តតាមលក្ខន្តិកៈដូចបានតម្កល់ទុកនៅក្រសួងមហាផ្ទៃ និងធ្វើសកម្មភាពការងារក្នុង​ក្របខ័ណ្ឌជាសមាគមអព្យាក្រឹត មិនប្រកាន់ពូជសាសន៍ មិនប្រកាន់សាសនា មិនប្រកាន់ និន្នាការនយោបាយ មិនធ្វើសកម្មភាពបម្រើឱ្យគណបក្សនយោបាយ និងមិនធ្វើជាឧបករណ៍គណបក្ស នយោបាយ ។

ពាក់ព័ន្ធនឹងករណីនេះ កម្ពុជាថ្មីបានព្យាយាមទាក់ទងលោក មាស សារ៉េត អភិបាលស្រុកអណ្តូងមាស និងលោក ញ៉ែម សំអឿន អភិបាលខេត្តរតនគិរី ដើម្បីសុំការបំភ្លឺ ប៉ុន្តែគិតត្រឹមពេលចេញផ្សាយ មិនទាន់ទទួលបានការឆ្លើយតបនៅឡើយ៕

ដោយ៖ ខៀវ ចាប ភ្នាក់ងារប្រចាំខេត្តរតនគិរី

The post សហគមន៍ជនជាតិដើមភាគតិចប្រមាណ៣០០គ្រួសារនៅរតនគិរី ស្នើអាជ្ញាធរពន្លឿនដោះស្រាយវិវាទដីព្រៃសហគមន៍ appeared first on Kampuchea Thmey Daily.

ក្នុងចំណោមនិស្សិតទាំង ១៧០នាក់ រួមមាន និស្សិតមកពីសាធារណរដ្ឋសង្គមនិយមវៀតណាម ៩១នាក់ (ស្រី ២៦នាក់) និស្សិតមកពីព្រះរាជាណាចក្រឡាវ ៧១នាក់ (ស្រី ៣១នាក់) និងនិស្សិតមកពីសាធារណរដ្ឋប្រជាមានិតចិន ៨នាក់ (ស្រី ៥នាក់)។

បើតាមមន្ទីរទេសចរណ៍ខេត្តរតនគិរី ក្រុមការងារបានសម្របសម្រួលដំណើរទស្សនកិច្ច ដោយណែនាំ និងធ្វើការឧទ្ទេសនាមអំពីតំបន់ទេសចរណ៍សំខាន់ៗ ជូនដល់គណៈប្រតិភូ និងនិស្សិតបរទេស ដើម្បីឱ្យពួកគេបានស្វែងយល់កាន់តែស៊ីជម្រៅអំពីសក្ដានុពលទេសចរណ៍ធម្មជាតិ វប្បធម៌ អរិយធម៌ ទំនៀមទម្លាប់ និងជីវភាពរស់នៅរបស់បងប្អូនជនជាតិដើមភាគតិចក្នុងខេត្តរតនគិរី។

មន្ទីរទេសចរណ៍បញ្ជាក់ថា ដំណើរទស្សនកិច្ចនេះ មិនត្រឹមតែជាឱកាសផ្សព្វផ្សាយសក្ដានុពលទេសចរណ៍របស់ខេត្តរតនគិរីទៅកាន់អន្តរជាតិប៉ុណ្ណោះទេ ប៉ុន្តែថែមទាំងរួមចំណែកពង្រឹងចំណងមិត្តភាព សាមគ្គីភាព និងកិច្ចសហប្រតិបត្តិការផ្នែកវប្បធម៌រវាងកម្ពុជា ជាមួយវៀតណាម ឡាវ និងចិន ឱ្យកាន់តែរឹងមាំ និងមានភាពស៊ីជម្រៅថែមទៀត៕

ដោយ៖ ខៀវ ចាប

The post និស្សិតបរទេស ១៧០នាក់ ទស្សនកិច្ចខេត្តរតនគិរី ស្វែងយល់ទេសចរណ៍ធម្មជាតិ និងវប្បធម៌ជនជាតិដើមភាគតិច appeared first on Kampuchea Thmey Daily.

កម្មវិធីនេះមានការចូលរួមពីលោក សំ ប៊ុនថន នាយកវិទ្យាស្ថានពហុបច្ចេកទេសអាស៊ី-កម្ពុជា លោក ពក បញ្ញាពេជ្រ ប្រធានជាន់ខ្ពស់ផ្នែកអភិវឌ្ឍន៍សហគ្រិនភាព នៃសហគ្រិនខ្មែរ (Khmer Enterprise) លោក វ៉ាន់ និមល នាយករងវិទ្យាស្ថាន ព្រមទាំងសាស្ត្រាចារ្យ និងនិស្សិតជាច្រើនរូប។

លោក សំ ប៊ុនថន បានថ្លែងថា វិទ្យាស្ថានពហុបច្ចេកទេសអាស៊ី-កម្ពុជា ដែលបង្កើតឡើងនៅឆ្នាំ២០១៧ បានខិតខំអភិវឌ្ឍការបណ្តុះបណ្តាលធនធានមនុស្សប្រកបដោយគុណភាព និងជំនាញវិជ្ជាជីវៈ ស្របតាមស្តង់ដារជាតិ និងអន្តរជាតិ។ លោកបានលើកទឹកចិត្តឱ្យនិស្សិតហ៊ានគិត ហ៊ានអនុវត្ត និងចាប់យកឱកាសពីកម្មវិធីប្រកួតប្រជែងសហគ្រិនភាព ដើម្បីអភិវឌ្ឍគំនិតអាជីវកម្មរបស់ខ្លួនឱ្យក្លាយជាការពិត។

លោកបន្តថា កម្មវិធីនេះមិនត្រឹមតែផ្តល់ឱកាសឱ្យនិស្សិតបង្ហាញគំនិតអាជីវកម្មប៉ុណ្ណោះទេ ប៉ុន្តែថែមទាំងអាចជួយឱ្យពួកគេទទួលបានការគាំទ្រ និងឱកាសអភិវឌ្ឍគម្រោងបន្តទៅថ្ងៃអនាគត។ ជាពិសេស និស្សិតជនជាតិដើមភាគតិចនៅខេត្តរតនគិរី ក៏អាចប្រើប្រាស់ចំណេះដឹង និងសមត្ថភាពរបស់ខ្លួន ដើម្បីបង្កើតអាជីវកម្មដែលរួមចំណែកដល់ការអភិវឌ្ឍសហគមន៍ និងសង្គមជាតិ។

ជាមួយគ្នានេះ លោក ពក បញ្ញាពេជ្រ បានបញ្ជាក់ថា ការបណ្តុះស្មារតីសហគ្រិនភាពដល់យុវជន គឺជាផ្នែកសំខាន់មួយក្នុងការជំរុញកំណើនសេដ្ឋកិច្ចជាតិ និងលើកកម្ពស់ការបង្កើតមុខរបរ និងការងារថ្មីៗនៅកម្ពុជា។ លោកក៏សង្ឃឹមថា និស្សិតនៅខេត្តរតនគិរីនឹងអាចអភិវឌ្ឍផលិតផល និងសេវាកម្មដែលមានសក្តានុពលសម្រាប់ទីផ្សារក្នុងស្រុក និងក្រៅប្រទេសនាពេលអនាគត។

ដោយឡែក លោក វ៉ាន់ និមល បានលើកឡើងអំពីសារៈសំខាន់នៃការច្នៃប្រឌិត នវានុវត្តន៍ និងការប្រើប្រាស់បច្ចេកវិទ្យាទំនើប ដូចជា AI និងគម្រោងសហគ្រិនភាពបៃតង ក្នុងការបង្កើតដំណោះស្រាយថ្មីៗសម្រាប់សហគមន៍។ លោកបានជំរុញឱ្យនិស្សិតខិតខំអភិវឌ្ឍសមត្ថភាព និងជំនះឧបសគ្គនានា ដើម្បីសម្រេចគោលដៅផ្ទាល់ខ្លួន និងរួមចំណែកដល់ការអភិវឌ្ឍខេត្តរតនគិរី។

ការប្រកួតសហគ្រិនមហាវិទ្យាល័យ រដូវកាលទី៤ នឹងផ្តល់ឱកាសដល់និស្សិត និងសិស្សានុសិស្សបង្ហាញគំនិតអាជីវកម្ម និងផលិតផលច្នៃប្រឌិតរបស់ខ្លួន ដើម្បីប្រកួតប្រជែងយកជ័យលាភី និងទទួលបានការគាំទ្រសម្រាប់ការអភិវឌ្ឍគម្រោងបន្ត។ កម្មវិធីនេះត្រូវបានរំពឹងថា នឹងក្លាយជាវេទិកាសំខាន់មួយសម្រាប់បណ្តុះអ្នកសហគ្រិនជំនាន់ថ្មី និងជំរុញការអភិវឌ្ឍសេដ្ឋកិច្ចមូលដ្ឋាននៅខេត្តរតនគិរី និងកម្ពុជាទាំងមូល៕

ដោយ៖ ខៀវ ចាប

The post វេទិកា «សហគ្រិនមហាវិទ្យាល័យ» បើកឱកាសឱ្យនិស្សិតខេត្តរតនគិរី ឈោងចាប់ក្តីស្រមៃជាសហគ្រិនជំនាន់ថ្មី appeared first on Kampuchea Thmey Daily.

ការងារជួសជុលផ្លូវនេះ មានប្រវែងសរុប ១១,៧០០ម៉ែត្រ ស្ថិតនៅភូមិសាយ៉ស់ ក្នុងភូមិសាស្ត្រស្រុកលំផាត់ និងក្រុងបានលុង។ កាលពីថ្ងៃទី១៥ ខែមិថុនា ឆ្នាំ២០២៦ មន្ត្រីជំនាញបានចុះពិនិត្យវឌ្ឍនភាពការងារ ខណៈការជួសជុលសម្រេចបានប្រមាណ ៧០ភាគរយហើយ ដោយគ្រោងបញ្ចប់ការស្ថាបនាដ៏ឆា​ប់ខាងមុខនេះ។

លោក អៀន អឿន ប្រធានមន្ទីរអភិវឌ្ឍន៍ជនបទខេត្តរតនគិរី បានឱ្យដឹងថា ផ្លូវនេះមានសារៈសំខាន់សម្រាប់ការធ្វើដំណើររបស់ប្រជាពលរដ្ឋក្នុងឃុំសេដា ឃុំកាឡែង ឃុំបាតាង នៃស្រុកលំផាត់ ឃុំលុងឃុង នៃស្រុកបរកែវ និងសង្កាត់យក្ខឡោម នៃក្រុងបានលុង។ លោកបន្តថា បន្ទាប់ពីការជួសជុលរួចរាល់ ផ្លូវនេះនឹងជួយកាត់បន្ថយពេលវេលាធ្វើដំណើរ សម្រួលដល់ការទំនាក់ទំនង ការដឹកជញ្ជូនកសិផល និងការអន្តរាគមន៍ករណីបន្ទាន់នានាឱ្យកាន់តែមានប្រសិទ្ធភាព។

ជាពិសេស កំណាត់ផ្លូវនេះនឹងជួយលើកកម្ពស់វិស័យទេសចរណ៍ក្នុងខេត្តរតនគិរី ដោយបង្កភាពងាយស្រួលដល់ភ្ញៀវទេសចរជាតិ និងអន្តរជាតិ ក្នុងការធ្វើដំណើរទៅកាន់រមណីយដ្ឋានបឹងយក្ខឡោម ដែលជាបឹងភ្នំភ្លើងបុរាណមានប្រវត្តិសាស្ត្រយូរលង់ និងទឹកជ្រោះធម្មជាតិអូរស៊ិនលែរ៍។

គួរបញ្ជាក់ថា កំណាត់ផ្លូវនេះធ្លាប់រងការខូចខាតយ៉ាងខ្លាំងអស់រយៈពេលជាច្រើនឆ្នាំ ទាំងនៅរដូវប្រាំង និងរដូវវស្សា ដែលបង្កការលំបាកដល់ការធ្វើដំណើរ ការដឹកជញ្ជូនកសិផល ការដឹកអ្នកជំងឺសង្គ្រោះបន្ទាន់ និងការធ្វើដំណើរទៅសាលារៀនរបស់សិស្សានុសិស្ស។ ក្រោយការជួសជុលរួច ផ្លូវនេះត្រូវបានរំពឹងថានឹងក្លាយជាសរសៃឈាមសេដ្ឋកិច្ច និងទេសចរណ៍ដ៏សំខាន់មួយរបស់ខេត្តរតនគិរី៕

ដោយ៖ ខៀវ ចាប

The post អាជ្ញាធរជួសជុលកំណាត់ផ្លូវឆ្ពោះទៅកាន់តំបន់ប្រវត្តិសាស្ត្រ និងរមណីយដ្ឋានបឹងយក្ខឡោម សម្រេចបាន៧០% appeared first on Kampuchea Thmey Daily.

កម្មវិធីនេះធ្វើឡើងនៅថ្ងៃទី១៦ ខែមិថុនា ឆ្នាំ២០២៦ ក្រោមការចូលរួមពីថ្នាក់ដឹកនាំខេត្ត មន្ត្រីជំនាញ និងប្រជាពលរដ្ឋជាង ៣០០នាក់ ដោយផ្តោតលើការបង្កើនចំណេះដឹង និងជំនាញឆ្លើយតបគ្រោះមហន្តរាយ ជាពិសេសគ្រោះទឹកជំនន់ ផ្គររន្ទះ ខ្យល់កន្ត្រាក់ និងអគ្គិភ័យ។

លោក ម៉ា វិចិត្រ អភិបាលរងខេត្តរតនគិរី បានអំពាវនាវឱ្យប្រជាពលរដ្ឋបង្កើនការប្រុងប្រយ័ត្ន និងត្រៀមសម្ភារៈចាំបាច់ជាមុន ដូចជា ទូក ធុងសាំង និងសម្ភារៈសង្គ្រោះផ្សេងៗ ដើម្បីត្រៀមខ្លួនឆ្លើយតបនៅពេលមានគ្រោះមហន្តរាយកើតឡើងភ្លាមៗ។ លោកក៏បានជំរុញឱ្យអាជ្ញាធរមូលដ្ឋានបន្តផ្សព្វផ្សាយព័ត៌មានពាក់ព័ន្ធនឹងការបង្ការគ្រោះមហន្តរាយឱ្យបានទូលំទូលាយដល់ប្រជាពលរដ្ឋ។

តាមការបញ្ជាក់ពីលោក ជី បុត្វា ប្រធានគម្រោងសមាគមថែរក្សាបរិស្ថាន និងវប្បធម៌ ខេត្តរតនគិរី សកម្មភាពនេះជាផ្នែកមួយនៃគម្រោង «ការកែលម្អភាពធន់នឹងការប្រែប្រួលអាកាសធាតុនៅកម្ពុជា» ដែលអនុវត្តពីឆ្នាំ២០២៤ ដល់ឆ្នាំ២០២៩ ក្នុងខេត្តរតនគិរី និងស្ទឹងត្រែង។ គម្រោងនេះមានគោលបំណងពង្រឹងសមត្ថភាពសហគមន៍ឱ្យអាចបន្ស៊ាំ និងកាត់បន្ថយផលប៉ះពាល់ពីការប្រែប្រួលអាកាសធាតុ។

ទោះបីគ្រោះមហន្តរាយធម្មជាតិមិនអាចទស្សន៍ទាយបានជាក់លាក់ក៏ដោយ ប៉ុន្តែប្រជាពលរដ្ឋអាចត្រៀមខ្លួនជាមុនបានតាមរយៈការយល់ដឹង និងការបណ្តុះបណ្តាលជំនាញចាំបាច់ ដើម្បីកាត់បន្ថយហានិភ័យ និងការខូចខាតដែលអាចកើតមាន។

មន្ត្រីពាក់ព័ន្ធបានឱ្យដឹងថា ការរៀបចំសមយុទ្ធ និងវគ្គបណ្តុះបណ្តាលនេះ គឺជាការត្រៀមទុកជាមុនសម្រាប់រដូវទឹកជំនន់ដែលអាចកើតមាននៅអំឡុងខែកញ្ញា ដោយសារតំបន់មួយចំនួនក្នុងស្រុកអណ្តូងមាសមានភូមិសាស្ត្រងាយរងគ្រោះដោយទឹកជំនន់។ កម្មវិធីនេះក៏ជួយពង្រឹងកិច្ចសហប្រតិបត្តិការរវាងអាជ្ញាធរ ស្ថាប័នជំនាញ និងសហគមន៍ ក្នុងការគ្រប់ គ្រងហានិភ័យ និងឆ្លើយតបគ្រោះមហន្តរាយឱ្យកាន់តែមានប្រសិទ្ធភាពផងដែរ។

ដោយ៖ ខៀវ ចាប

The post រដូវវស្សាប្រឈមគ្រោះទឹកជំនន់ ពលរដ្ឋរស់នៅតាមដងទន្លេក្នុងខេត្តរតនគិរីទទួលបានវគ្គបណ្តុះបណ្តាលការពារខ្លួន appeared first on Kampuchea Thmey Daily.

ស្របពេលរដូវវស្សាចាប់ផ្តើម និងភ្លៀងធ្លាក់ជាបន្តបន្ទាប់ ប្រជាកសិករជនជាតិដើមភាគតិចនៅតាមស្រុកនានាក្នុងខេត្តរតនគិរី កំពុងមមាញឹករៀបចំដី និងដាំដំឡូងមី ដោយរំពឹងថានឹងទទួលបានទិន្នផលល្អ និងតម្លៃទីផ្សារខ្ពស់នៅរដូវប្រមូលផលខាងមុខ។ សកម្មភាពដាំដុះនេះ ក៏បានបង្កើតឱកាសការងារបណ្តោះអាសន្នសម្រាប់សិស្សានុសិស្សនៅតាមមូលដ្ឋានផងដែរ។

ដោយសារម្ចាស់ចម្ការមួយចំនួនមានផ្ទៃដីធំ និងត្រូវការកម្លាំងពលកម្មច្រើន ពួកគេបានជួលសិស្សានុសិស្សឱ្យទៅជួយដាំដំឡូងមីនៅថ្ងៃឈប់សម្រាក ឬក្រៅម៉ោងសិក្សា។ ប្រាក់កម្រៃដែលទទួលបាន ទោះមិនច្រើនក៏ដោយ ប៉ុន្តែអាចជួយដល់ការចំណាយប្រចាំថ្ងៃ ការធ្វើដំណើរទៅសាលារៀន និងសម្រួលបន្ទុកសេដ្ឋកិច្ចក្នុងគ្រួសារបានមួយផ្នែក។

កញ្ញា កេត កែ សិស្សថ្នាក់ទី៧ ក្នុងចំណោមសិស្សដទៃទៀត ប្រាប់កម្ពុជាថ្មីថា រៀងរាល់ថ្ងៃអាទិត្យ កញ្ញាតែងតែទៅជួយដាំដំឡូងមី ដើម្បីរកប្រាក់កម្រៃបន្ថែមសម្រាប់ទិញម្ហូបអាហារ និងចំណាយលើការធ្វើដំណើរទៅសាលារៀន។ កញ្ញាបានចូលរួមការងារនេះជារៀងរាល់ឆ្នាំជាមួយមិត្តភក្តិ ហើយចាត់ទុកថាជាឱកាសមួយក្នុងការជួយសម្រាលបន្ទុកគ្រួសារ។

លោក បាន ជាកសិករជនជាតិដើមភាគតិចគ្រឹង ជាម្ចាស់ចម្ការ រស់នៅស្រុកវើនសៃ បានឱ្យដឹងថា ឆ្នាំនេះលោកបានចាប់ផ្តើមដាំដំឡូងមីលើផ្ទៃដី ១ហិកតា ហើយមានគម្រោងពង្រីករហូតដល់ ៤ហិកតា។ ដើម្បីឱ្យការងារបានទាន់ពេលវេលាក្នុងរដូវដាំដុះ លោកបានជួលកម្មករជាច្រើននាក់មកជួយដាំដុះ ក្នុងនោះទាំងសិស្សានុសិស្សផងដែរ។ លោកបញ្ជាក់ថា៖« កម្លាំងពលកម្មភាគច្រើនគឺជាសិស្សានុសិស្សដែលទំនេរពីការសិក្សានៅចុងសប្តាហ៍ ដោយឱ្យតម្លៃប្រាក់ឈ្នួល ១ម៉ឺនរៀលសម្រាប់អ្នកធ្វើការកន្លះថ្ងៃ ខណៈអ្នកធ្វើការពេញមួយថ្ងៃទទួលបាន ២ម៉ឺនរៀល ព្រោះការងារនេះក៏បាន​ផ្តល់ចំណូល​បន្ថែមដល់សិស្សានុសិស្សផងដែរ»។

ផ្អែកលើបទពិសោធន៍ច្រើនឆ្នាំ កសិកររូបនេះចែករំលែកគន្លឹះថា ការជ្រើសរើសពូជដំឡូងមីដែលមានទិន្នផលខ្ពស់ និងមើមធំ គឺជាកត្តាសំខាន់ក្នុងការបង្កើនប្រាក់ចំណេញ។ លោកថា៖«មុនពេលដាំ ដីត្រូវបានភ្ជួរ និងទុកចោលប្រហែលមួយខែ មុននឹងលើករង និងរៀបចំដើមពូជសម្រាប់ដាំ។ ដើមពូជត្រូវកាត់ជាកំណាត់ៗ និងត្រាំថ្នាំការពារជំងឺ ឬសត្វល្អិត មុនយកទៅដាំ»។

ទោះបីជាកាលពីឆ្នាំមុន កសិករមួយចំនួនទទួលរងផលប៉ះពាល់ពីអាកាសធាតុ និងតម្លៃទីផ្សារមិនសូវអំណោយផលក៏ដោយ ក៏ពួកគេនៅតែបន្តដាំដុះដំណាំនេះ ដោយជឿជាក់ថា នៅរដូវប្រមូលផលខាងមុខ តម្លៃដំឡូងមីអាចនឹងប្រសើរឡើងជាងមុន។ ដំឡូងមីត្រូវបានចាត់ទុកជាដំណាំសេដ្ឋកិច្ចសំខាន់មួយសម្រាប់ប្រជាកសិករក្នុងតំបន់ ដោយសារងាយស្រួលដាំដុះ និងសមស្របទៅនឹងលក្ខខណ្ឌដី និងអាកាសធាតុ។ នៅអំឡុងខែមិថុនា ក្រោយមានភ្លៀងធ្លាក់គ្រប់គ្រាន់ កសិករជាច្រើនបានចាប់ផ្តើមដោតដើមពូជដំឡូងមីចូលក្នុងដី ដើម្បីត្រៀមផលិតកម្មសម្រាប់រដូវថ្មី។

ដំណាំទាំងនេះត្រូវបានរំពឹងថា នឹងផ្តល់ប្រាក់ចំណូលសំខាន់សម្រាប់គ្រួសារកសិករ និងរួមចំណែកជំរុញកំណើនសេដ្ឋកិច្ចមូលដ្ឋាននៅពេលប្រមូលផលនារដូវប្រាំងខាងមុខ៕

ដោយ៖ ខៀវ ចាប

The post សិស្សសាលាមួយក្រុម ទំនេរពីការសិក្សារកការងារក្រៅម៉ោងជួយដាំដំឡូងមី រកចំណូលបាន ២ម៉ឺនរៀលក្នុងមួយថ្ងៃ appeared first on Kampuchea Thmey Daily.

វេទិកាដែលរៀបចំឡើង នាពេលថ្មីៗនេះ ប្រព្រឹត្តទៅក្រោមអធិបតីភាពលោកស្រី ញាណ សុចិត្រា អគ្គនាយកនៃអគ្គនាយកដ្ឋានអភិវឌ្ឍន៍សង្គមនៃក្រសួងកិច្ចការនារី ដោយមានការចូលរួមពីលោកស្រីក្រុមប្រឹក្សាខេត្ត អភិបាលរងស្រុក ការិយាល័យស្រុកប្រតិបត្តិបរកែវ លោកគ្រូ អ្នកគ្រូ ឳពុកម្តាយ និងអាណាព្យាបាល និងសិស្សានុសិស្ស នៅក្នុងវត្តអូរយ៉ាដាវ ដែលស្ថិតក្នុងឃុំប៉ាតេ ស្រុកអូរយ៉ាដាវ ខេត្តរតនគិរី។

បើតាមលោកស្រី ញាណ សុចិត្រា យោងលើរបាយការណ៍នៃលទ្ធផលសិក្សាស្រាវជ្រាវ ដែលបានធ្វើនៅខេត្តចំនួន៩ ក្នុងឆ្នាំ ២០២៤ ដោយក្រសួងកិច្ចការនារី សហការជាមួយអង្គការភ្លែនអន្តរជាតិ បានបង្ហាញថា អត្រាប្រេវ៉ាឡង់នៃការរៀបការមុនអាយុ ១៨ឆ្នាំ​ នៅតែខ្ពស់នៅឡើយ​ ក្នុងនោះប្រហែល ១៤% នៃស្រ្តី បានរៀបការមុនអាយុ ១៨ ឆ្នាំ និងប្រហែល ១៤% បានរៀបការដោយការផ្សំផ្គុំក្នុងអាយុចន្លោះ ១៥ ដល់ ១៨ ឆ្នាំ ជាពិសេសនៅក្នុងខេត្តរតនគិរី។

លោកស្រីបន្តថា ការរៀបអាពាហ៍ពិពាហ៍ ឬការមានកូននៅវ័យក្មេង បង្កផលវិបាកដល់ក្មេងស្រី ដូចជា ប៉ះពាល់ដល់សុខភាពបន្តពូជ សុខភាពផ្លូវចិត្ត ការរំលូតកូនដោយគ្មានសុវត្ថិភាព អំពើហិង្សាក្នុងគ្រួសារ និងបាត់បង់សិទ្ធិសេរីភាពក្នុងការចូលរួមការងារសង្គម និងការធ្វើការសម្រេចចិត្ត។

ចំណែកកត្តាជំរុញឱ្យមានអាពាហ៍ពិពាហ៍នៅវ័យក្មេង អាពាហ៍ពិពាហ៍ដោយបង្ខំ និងការរស់នៅជាប្តីប្រពន្ធនៅវ័យក្មេង រួមមាន ទីតាំងភូមិសាស្រ្ត សេដ្ឋកិច្ចរបស់គ្រួសារ ភាពក្រីក្រ វិសមភាពសេដ្ឋកិច្ចសង្គម ជាតិសាសន៍ សាសនា ការអប់រំ ការបោះបង់ការសិក្សា កង្វះចំណេះដឹង វិសមភាពយេនឌ័រ ការមានផ្ទៃពោះក្នុងវ័យជំទង់ បទដ្ឋានសង្គមនិងវប្បធម៌ កង្វះការអនុវត្តច្បាប់ និងឥទ្ធិពលនៃអ៊ីនធឺណេតនិងបណ្តាញសង្គម៕

The post ក្រសួងកិច្ចការនារី ចុះអប់រំផ្សព្វផ្សាយ អំពីសុខមាលភាព និងសិទ្ធិរបស់ស្ត្រី និងក្មេងស្រី នៅខេត្តរតនគិរី appeared first on Kampuchea Thmey Daily.

សកម្មភាពចុះឈ្មោះនេះ បានធ្វើឡើងនៅថ្ងៃទី៥ ខែមិថុនា ឆ្នាំ២០២៦ នៅសាលារោងភូមិទៀមលើ ឃុំកាចូន ស្រុកវើនសៃ ខេត្តរតនគិរីដោយមានប្រជាពលរដ្ឋចូលរួមប្រមាណ ២៥នាក់ ក្នុងនោះមានបុរស ៨នាក់។ កម្មវិធីនេះមានគោលដៅជួយឱ្យកសិករមិនចាំបាច់ចំណាយប្រាក់ទិញកូនស្វាយចន្ទីផ្សាំពីខាងក្រៅទៀតឡើយ ដោយអាចរៀនបច្ចេកទេស និងអនុវត្តដោយខ្លួនឯង។

លោក ទិត សុខរិន គ្រូបង្រៀននៃមជ្ឈមណ្ឌលវិជ្ជាជីវៈខេត្តរតនគិរី បានប្រាប់កម្ពុជាថ្មីថា បន្ទាប់ពីការចុះឈ្មោះរួចរាល់ វគ្គបណ្តុះបណ្តាលបច្ចេកទេសកាត់តស្វាយចន្ទី នឹងចាប់ផ្តើមនៅថ្ងៃទី១ ខែកក្កដា ឆ្នាំ២០២៦ នៅសាលារោងភូមិទៀមលើដដែល។ លោកបន្តថា មជ្ឈមណ្ឌលមានគ្រូបង្គោលដែលមានជំនាញ និងបទពិសោធន៍ខ្ពស់ អាចផ្តល់ចំណេះដឹងជាក់ស្តែងដល់ប្រជាកសិករ ដើម្បីឱ្យពួកគេអាចកាត់ត និងផ្សាំពូជស្វាយចន្ទីដោយខ្លួនឯង។ គោលបំណងសំខាន់គឺកាត់បន្ថយការពឹងផ្អែកលើការទិញកូនពូជពីខាងក្រៅ និងកាត់បន្ថយចំណាយដើមទុនផលិតកម្ម ខណៈដែលកសិករក៏អាចជ្រើសរើសពូជដែលមានគុណភាព និងផ្តល់ទិន្នផលខ្ពស់សម្រាប់ចម្ការរបស់ខ្លួនផងដែរ។

លោក ទិត សុខរិន បានអំពាវនាវដល់ប្រជាពលរដ្ឋក្នុងខេត្តរតនគិរី ឱ្យចូលរួមសិក្សាជំនាញនេះឱ្យបានច្រើន ដោយសារជំនាញបច្ចេកទេសកាត់តស្វាយចន្ទីអាចជួយបង្កើនម្ចាស់ការលើការផលិតកូនពូជ និងលើកកម្ពស់ជីវភាពគ្រួសារនាពេលអនាគត។

លោកបញ្ជាក់ថា កម្មវិធីបណ្តុះបណ្តាលនេះ ជាផ្នែកមួយនៃកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាលជូនពលរដ្ឋ ១ លាន ៥ សែននាក់ ដែលផ្តោតលើការលើកកម្ពស់ជីវភាពប្រជាពលរដ្ឋ តាមរយៈការផ្តល់ជំនាញដែលអាចយកទៅប្រើប្រាស់ក្នុងជីវភាពប្រចាំថ្ងៃ។

ជាមួយគ្នានេះ លោកបានឱ្យដឹងថា ក្រុមការងាររបស់មជ្ឈមណ្ឌលបានចុះផ្សព្វផ្សាយ និងចុះឈ្មោះសិក្ខាកាមនៅតាមស្រុកនានាទូទាំងខេត្តរតនគិរី ដើម្បីធានាថាប្រជាពលរដ្ឋនៅតំបន់ដាច់ស្រយាលក៏អាចទទួលបានឱកាសសិក្សាជំនាញវិជ្ជាជីវៈផងដែរ។ ជំនាញកសិកម្មដែលកំពុងបណ្តុះបណ្តាលរួមមាន ដំណាំស្វាយចន្ទី កៅស៊ូ ធុរេន និងចេក ដែលស្របតាមតម្រូវការទីផ្សារ។

លោក ស្វែង បាន មេភូមិទៀមលើ បានលើកឡើងថា វគ្គបណ្តុះបណ្តាលបច្ចេកទេសកាត់តស្វាយចន្ទីនេះ មានសារៈសំខាន់ខ្លាំងសម្រាប់ប្រជាកសិករក្នុងមូលដ្ឋាន ព្រោះអាចជួយពង្រឹងសមត្ថភាពកសិកម្ម និងកាត់បន្ថយការចំណាយក្នុងគ្រួសារ។ លោកបានបញ្ជាក់ថា បន្ទាប់ពីបញ្ចប់វគ្គបណ្តុះបណ្តាល កសិករនឹងទទួលបានជំនាញជាក់ស្តែង ដែលអាចយកទៅអនុវត្តបានដោយខ្លួនឯង ដោយមិនចាំបាច់ពឹងផ្អែកលើការទិញកូនពូជពីខាងក្រៅ៕

ដោយ៖ ខៀវ ចាប

The post មជ្ឈមណ្ឌលវិជ្ជាជីវៈខេត្តរតនគិរី ផ្តល់វគ្គបណ្តុះបណ្តាលជំនាញផ្សាំដើមស្វាយចន្ទីឥតគិតថ្លៃដល់កសិករ appeared first on Kampuchea Thmey Daily.