គណៈកម្មាធិការជាតិអូឡាំពិកកម្ពុជា Archives - Kampuchea Thmey Daily

សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ…

Sina Noun — Wed, 31 Dec 2025 09:08:26 +0000

អគ្គលេខាធិការ នៃគណៈកម្មាធិការជាតិអូឡាំពិកកម្ពុជា ថាអំឡុងសង្គ្រាមឈ្លានពានរបស់សៀមមកលើកម្ពុជាថ្មីៗនេះចំពោះទំនាក់ទំនងខាងផ្នែកកីឡាពិសេសការប្រកួត ឬការហ្វឹកហាត់ផ្សេងៗគឺមិនអនុញ្ញាតនោះទេប្រទេសទាំងសងខាង ព្រោះបញ្ហាព្រំដែនមិនទាន់បញ្ចប់។

លោក វ៉ាត់ ចំរើន

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា បានឲ្យដឹងថា អំឡុងសង្គ្រាមរបស់សៀមមកលើកម្ពុជាថ្មីៗនេះគឺតែងតែមានការប៉ះពាល់ដល់អារម្មណ៍ប្រជាពលដ្ឋទូទៅ និងផ្នែកកីឡាក៏មានដូចគ្នាដែរ។ ទំនាក់ទំនងរវាង NOCC កម្ពុជាជាមួយខាងប្រសៀមគឺមានជាធម្មតាក្នុងនាមគ្រួសារកីឡាអន្តរជាតិ និងស្មារតីចលនាអូឡាំពិក។

រូបភាព NOCC

យោងតាមស្ថានការណ៍ព្រំដែនជាក់ស្ដែងខាងកម្ពុជាគឺផ្ដោតលើអារម្មណ៍របស់កីឡាករផ្ទាល់ អារម្មណ៍របស់ក្រុមគ្រួសារបារម្ភអំពីសុខសុវត្ថិភាពអំឡុងពេលនេះគឺមិនអនុញ្ញាតឲ្យចូលរួមការប្រកួតផ្សេងៗនោះឡើយ។ ពោលខាងកម្ពុជាមិនទៅចូលរួមរីឯខាងសៀមក៏មិនមកចូលរួមដូចគ្នាដែរ។

រូបភាព NOCC

បញ្ជាក់ដែរថា អំឡុងពេលប៉ុន្មានខែចុងក្រោយនេះបញ្ហាឈ្លានពានរបស់ប្រទេសសៀមមកលើកម្ពុជាមានជាបន្តបន្ទាប់រហូតដល់មានបទឈប់បាញ់ ៧២ម៉ោងកាលពីថ្ងៃ២៧ ខែធ្នូ ឆ្នាំ២០២៥ រហូតមកដល់ពេលនេះ។ ក្នុងអំឡុងការឈ្លានពាននេះខាងកម្ពុជាបានទៅចូលរួមពិធីបើកការប្រកួតស៊ីហ្គេម លើកទី៣៣ នៅឯប្រទេសថៃដែរ ប៉ុន្តែថ្ងៃបន្ទាប់មកក៏ចាកចេញមកកម្ពុជាវិញ ព្រោះតាមបណ្ដោយព្រំដែនកំពុងផ្ទុះអាវុធជាខ្លាំង៕

អត្ថបទដោយ៖ នួន ស៊ីណា

The post សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ… appeared first on Kampuchea Thmey Daily.

គណៈកម្មាធិការអូឡាំពិកអន្តរជាតិ ឧបត្ថម្ភជំនួយតាមរយៈក្រសួងអប់រំ ដល់សិស្សានុសិស្សភៀសសឹក

Sina Noun — Tue, 30 Dec 2025 04:56:38 +0000

នៅព្រឹកថ្ងៃទី៣០ ខែធ្នូ ឆ្នាំ២០២៥ នេះលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) បាននាំយកជំនួយរបស់គណៈកម្មាធិការជាតិអូឡាំពិកអន្តរជាតិ ជូនដល់ ក្រសួងអប់រំ យុវជន និងកីឡា ដើម្បីជួយដល់ជនភៀសសឹក ពិសេសសិស្សានុសិស្សដែលបានផ្អាកការរៀនសូត្រអំឡុងពេលការឈ្លានពានរបស់សៀម។

ទិដ្ឋភាពប្រគល់ព្រឹកមិញ

លោក វ៉ាត់ ចំរើន បានឲ្យដឹងថា ថ្ងៃនេះតំណាងឲ្យគណៈកម្មាធិការជាតិអូឡាំពិកកម្ពុជា បាននាំយកជំនួយមួយចំនួនធំពីអូឡាំពិកអន្តរជាតិ (IOC) ប្រគល់ជូនតាមរយៈក្រសួងអប់រំ យុវជន និងកីឡា ស្របតាមការអំពាវនាវកន្លងទៅដើម្បីជួយសម្រួលដល់ជនភៀសសឹក។ ពិសេសនោះគឺសិស្សានុសិស្សដែលកំពុងភៀសខ្លួន និងកំពុងផ្អាកការសិក្សាអំឡុងពេលឈ្លានពានពេលនេះ។

ទិដ្ឋភាពប្រគល់ព្រឹកមិញ

តំណាងផ្នែកកីឡារូបនេះបន្ថែមទៀតថា សម្ភារកីឡាដូចជាបាល់ សី និងឧបករណ៍ជាច្រើននេះនឹងជួយដល់សិស្សានុសិស្សបានលេងកម្សាន្តសប្បាយកាត់បន្ថយភាពតានតឹង ភាពស្មុគស្មាញ និងបានលេងកីឡានៅតាមទីកន្លែងដែលភៀសខ្លួន។ មួយវិញទៀតជាការលើកទឹកចិត្តដល់គ្រូៗ សិស្សានុសិស្ស និងក្រុមគ្រួសារជនភៀសសឹកផងដែរអំឡុងស្ថានភាពលំបាក។

ទិដ្ឋភាពប្រគល់ព្រឹកមិញ

បញ្ជាក់ដែរថា សម្ភារដែលប្រគល់ជូនទៅក្រសួងអប់រំ យុវជន និងកីឡា កាលពីព្រឹកមិញនេះមានជាអង្ករ បាល់ សី អាវកីឡា ក្រមា និងរបស់ប្រើប្រាស់ផ្សេងៗជាច្រើនមុខទៀត។ នេះជាលើកទី២ ផងដែរដែលគណៈកម្មាធិការជាតិអូឡាំពិកកម្ពុជាបានជួយដល់ជនភៀសសឹកអំឡុងការឈ្លានពានរបស់សៀមមកលើខ្មែរអំឡុងពេលនេះ៕

ទិដ្ឋភាពប្រគល់ព្រឹកមិញ

អត្ថបទ៖ នួន ស៊ីណា

The post គណៈកម្មាធិការអូឡាំពិកអន្តរជាតិ ឧបត្ថម្ភជំនួយតាមរយៈក្រសួងអប់រំ ដល់សិស្សានុសិស្សភៀសសឹក appeared first on Kampuchea Thmey Daily.

កម្ពុជា រៀបចំព្រឹត្តិការណ៍កីឡាកុមារអូឡាំពិក លើកដំបូង បើកឱ្យកុមារអាយុ ១ ឆ្នាំចូលប្រកួត

Kosal Sem — Tue, 30 Sep 2025 07:31:22 +0000

នាព្រឹកថ្ងៃ អង្គារ៍ ទី ៣០ ខែ កញ្ញា ឆ្នាំ ២០២៥ គណៈកម្មាធិការជាតិអូឡាំពិកកម្ពុជា (NOCC) បានធ្វើសន្និសីទសារព័ត៌មាន ស្តីពីការរៀបចំព្រឹត្តិការណ៍ប្រកួតកីឡាកុមារអូឡាំពិកជាលើកដំបូង ដែលគ្រោងធ្វើនៅថ្ងៃទី ១ ខែ កុម្ភៈ ឆ្នាំ ២០២៦។

ទិដ្ឋភាពសន្និសីទសារព័ត៌មាន

នៅក្នុងសន្និសីទសារព័ត៌មាន លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានលើកឡើងថា ការរៀបចំព្រឹត្តិការណ៍កីឡាកុមារអូឡាំពិកនេះឡើង គឺស្របទៅតាមគោលការណ៍របស់គណៈកម្មាធិការអូឡាំពិកអន្តរជាតិ (IOC) ដើម្បីជម្រុញឱ្យយល់ដឹងពីគុណតម្លៃអូឡាំពិក ក៏ដូចជាអត្ថប្រយោជន៍ពីការលេងកីឡាទៅដល់កុមារ។

លោក វ៉ាត់ ចំរើន បានគូសបញ្ជាក់ពីគោលបំណងធំ ៤ អំពីការរៀបចំព្រឹត្តិការណ៍កីឡាកុមារអូឡាំពិកនេះឡើង ដោយទី ១ ដើម្បីបណ្តុះពីគុណតម្លៃអូឡាំពិក និងផ្សព្វផ្សាយពីគុណតម្លៃអូឡាំពិកដល់កុមារ ពោលគឺចាប់ពីកុមារភាពតទៅ ដើម្បីឱ្យពួកគេបានស្វែងយល់ពីកីឡា និងចាប់ក្តីស្រមៃចំពោះកីឡាដែលពួកគេស្រឡាញ់ ហើយអាចក្លាយជាកីឡាករតំណាងជាតិនាពេលអនាគត។ គោលបំណងទី ២ ជំរុញឱ្យកុមារស្គាល់ពីការប្រកួតប្រជែង។

ទិដ្ឋភាពសន្និសីទសារព័ត៌មាន

គោលបំណងទី ៣ គឺប្រមែប្រមូល និងផ្តល់ឱកាសឱ្យកុមារចន្លោះពីអាយុ ១ ឆ្នាំដល់ ៧ ឆ្នាំ បានចូលរួមលេងកីឡា និងផ្តល់ឱកាសឱ្យអាណាព្យាបាលបានយល់អំពីអត្ថប្រយោជន៍នៃការលេងកីឡា។ គោលបំណងទី ៤ គឺការផ្សារភ្ជាប់ជាមួយកម្មវិធីសប្បុរសធម៌ ដោយថវិកាដែលទទួលបានពីព្រឹត្តិការណ៍នេះ នឹងយកទៅបរិច្ចាគជូនមន្ទីរពេទ្យកុមារជាតិ និងជួយដល់កុមារ តាមរយៈការជួយសម្ភារៈកីឡាទៅសាលារៀនផ្សេងៗនៅតំបន់ដាច់ស្រយាល។

បច្ចុប្បន្នមានអ្នកចាប់អារម្មណ៍ខ្ទង់រាប់ពាន់នាក់ ប៉ុន្តែជាលើកដំបូងនេះ គឺបើកទទួលចុះឈ្មោះត្រឹម ៥៥៥ នាក់ប៉ុណ្ណោះ ដោយការចុះឈ្មោះចាប់ផ្តើមបើកពីម៉ោង ១២ យប់រំលងអាធ្រាត្រ ថ្ងៃអង្គារ៍ ឈានចូលថ្ងៃ ពុធ ទី ០១ ខែ តុលា ឆ្នាំ ២០២៥ តទៅ។

ទិដ្ឋភាពសន្និសីទសារព័ត៌មាន

ព្រឹត្តិការណ៍កីឡាកុមារអូឡាំពិក គឺអនុញ្ញាតឱ្យកុមារចូលរួមប្រកួតចន្លោះពីអាយុ ១ ឆ្នាំ ដល់ ៧ ឆ្នាំ ដែលការប្រកួតនឹងធ្វើឡើងនៅផ្សារទំនើបអុីអនមានជ័យ នៅថ្ងៃទី ១ ខែ កុម្ភៈ ឆ្នាំ ២០២៦។ ចំពោះការប្រកួតវិញ គឺមាន ១០ ប្រភេទកីឡា ហើយអ្នកឈ្នះនឹងទទួលបានពានរង្វាន់ មេដាយ និងវញ្ញាបនបត្រផងដែរ។

ខាងក្រោមនេះ ជាលីងចុះឈ្មោះចូលប្រកួតក្នុងព្រឹត្តិការណ៍កីឡាកុមារអូឡាំពិក៖ https://olympiccambodia.com/

ទិដ្ឋភាពសន្និសីទសារព័ត៌មាន

អត្ថបទ៖ សេម កុសល

The post កម្ពុជា រៀបចំព្រឹត្តិការណ៍កីឡាកុមារអូឡាំពិក លើកដំបូង បើកឱ្យកុមារអាយុ ១ ឆ្នាំចូលប្រកួត appeared first on Kampuchea Thmey Daily.

ប្រធាន NOC កម្ពុជាជួបឯកអគ្គរាជទូតជប៉ុនដើម្បបង្កើនកិច្ចសហប្រតិការកីឡា

chean virakbot — Thu, 26 Sep 2024 07:44:44 +0000

ថ្នាក់ដឹកនាំគណៈកម្មាធិការជាតិអូឡាំពិកកម្ពុជា (NOCC) បានជួបសម្តែងការគួរសមជាមួយឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបង្កើនកិច្ចសហប្រតិបត្តិការវិស័យកីឡាកាលពីថ្ងៃទី២៥ ខែកញ្ញា ឆ្នាំ២០២៤ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា។

លោកបណ្ឌិត ថោង ខុន

ការជួបសម្តែងគួរសមនេះ ភាគីកម្ពុជាមានលោកបណ្ឌិត ថោង ខុន ទេសរដ្ឋមន្ត្រីទទួលបន្ទុកអភិវឌ្ឍកីឡា និងជាប្រធានគណៈកម្មាធិការជាតិ (NOCC) លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា ខណភាគីជប៉ុនមានលោក Ueno Atsushi ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងលោក Ando Kenta លេខាទី១ប្រចាំស្ថានទូតជប៉ុននៅកម្ពុជា។

លោក Ueno Atsushi ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា

លោក វ៉ាត់ ចំរើន បានឲ្យដឹងថា ក្នុងជំនួបសវនាការនេះផ្តោតលើកត្តាសំខាន់មួយចំនួន។ ភាគីជប៉ុនបានណែនាំពីជនជាតិជប៉ុន លោក Watanabe Morinari ប្រធានអាណត្តិចាស់របស់សហព័ន្ធកីឡាកាយសម្ព័ន្ធអន្តរជាតិ (FIG) នឹងបន្តឈរឈ្មោះជាបេក្ខភាពប្រធានអាណត្តិថ្មីចាប់ពីឆ្នាំ២០២៥-២០២៨ ដើម្បីប្រជែងជាមួយលោក Gaybov Farid ជនជាតិអាស៊ែបៃសង់។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា

មហាសន្និបាតបញ្ចប់អាណត្តិចាស់ និងបោះឆ្នោតជ្រើសរើសក្រុមប្រឹក្សានៃសហព័ន្ធកីឡាកាយសម្ព័ន្ធអន្តរជាតិអាណត្តិថ្មី គ្រោងនឹងធ្វើនៅថ្ងៃទី២៤-២៥-២៦ ខែតុលា ឆ្នាំ២០២៤ នៅទីក្រុងដូហា ប្រទេសកាតា។ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជានឹងដឹកនាំប្រតិភូកម្ពុជាចូលរួម។

កត្តាសំខាន់ទៀតនោះគឺការលើកឡើងពីកិច្ចសហប្រតិបត្តិការលើវិស័យកីឡារវាងកម្ពុជា និងជប៉ុនកន្លងមក។ ជាពិសេសជំនួយបច្ចេកទេសកីឡាក្នុងការរៀបចំធ្វើម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។ ពេលនោះ ក្រុមការងារអាជ្ញាកណ្តាល-ចៅក្រមជប៉ុនមកជួយរៀបចំការប្រកួត។ គ្រូបង្វឹក កីឡាករយូដូ និងការ៉ាតេកម្ពុជាបានទៅហ្វឹកហាត់នៅជប៉ុន។ ការរៀបចំព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរវត្តរយៈពេល២៨ឆ្នាំមកហើយ។ ការឧបត្ថម្ភសម្ភារ និងឧបករណ៍ហ្វឹកហាត់ដល់កីឡាកាយសម្ព័ន្ធកម្ពុជា និងកិច្ចសហប្រតិបត្តិលើកីឡាផ្សេងៗទៀត។

ជាមួយគ្នានេះ ភាគីកម្ពុជាបានស្នើសុំដល់ភាគីជប៉ុនឲ្យជួយគ្រូបង្វឹកស្ម័គ្រចិត្តកម្រិតខ្ពស់ដើម្បីបង្វឹកបង្ហាត់ដល់កីឡាករ កីឡាការិនីកីឡាយូដូ និងការ៉ាតេកម្ពុជារយៈពេលវែងនៅប្រទេសកម្ពុជា។ កម្ពុជាក៏បានស្នើសុំអាហារូបករណ៍ដើម្បីក្រុមកីឡាយូដូ និងការ៉ាតេកម្ពុជាទៅហ្វឹកហាត់កម្រិតខ្ពស់រយៈពេលវែងនៅប្រទេសជប៉ុន សម្រាប់ការត្រៀមខ្លួនប្រកួតព្រឹត្តិការណ៍កីឡាយុវជនអាស៊ី ឆ្នាំ២០២៩ ដែលប្រទេសកម្ពុជាទទួលធ្វើម្ចាស់ផ្ទះ។

បន្ថែមលើនេះ កម្ពុជាបានស្នើជប៉ុនឧបត្ថម្ភសម្ភារកីឡា Trampoline និងរៀបចំទីលានហ្វឹកហាត់ស្តង់ដាកីឡាកាយសម្ព័ន្ធ Gymnastics Artistic។

លោក វ៉ាត់ ចំរើន បានបញ្ជាក់ថា ៖«យើងទទួលបានភាពវិជ្ជមាន ឯកឧត្តមឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបានសន្យាថានឹងលើកសំណើទាំងអស់នេះដាក់ទៅរាជរដ្ឋាភិបាលជប៉ុនដើម្បីពិនិត្យជាមួយសហព័ន្ធជាតិកីឡាលើប្រភេទកីឡាទាំងនេះដើម្បីលទ្ធភាពជួយកម្ពុជា»៕

អត្ថបទ៖ វីរបុត្រ

The post ប្រធាន NOC កម្ពុជាជួបឯកអគ្គរាជទូតជប៉ុនដើម្បបង្កើនកិច្ចសហប្រតិការកីឡា appeared first on Kampuchea Thmey Daily.

លោក ថោង ខុន ជំរុញសិក្ខាកាម CECS ផ្ដោតលើការបណ្ដុះបណ្ដាលថ្នាលតាមសាលា

Pha Rothana — Wed, 20 Mar 2024 08:26:43 +0000

វគ្គសាមគ្គីអូឡាំពិកស្តីពីគ្រូបង្វឹកកីឡាអត្តពលកម្ម CECS កម្រិត១ បានបញ្ចប់ទៅដោយភាពជោគជ័យ ក្រោយដំណើរកាលអស់រយៈពេល៩ថ្ងៃ គិតចាប់តាំងពីថ្ងៃទី១១ ខែមីនា ឆ្នាំ២០២៤។

ក្នុងបណ្តុះបណ្តាលមានសិក្ខកាមចូលរួមចំនួន២៤រូប មកពីបណ្ដា១៤រាជធានី-ខេត្ត និង២សមាគមក្រសួងដែលសុទ្ធជាគ្រូបង្វឹកជម្រើសជាតិ គ្រូបង្វឹកសមាគមរាជធានី-ខេត្ត និងក្រសួង គ្រូអប់រំកាយ និងគរុសិស្សនៅវិទ្យាស្ថានជាតិអប់រំកាយ និងកីឡា។ វណ្ណុះបណ្តាលនេះបង្រៀនដោយគ្រូឧទ្ទេស លោក Jayalal Rathnasooriya ជនជាតិស្រីលង្កា និងលោក បូរ ពុធរាត្រី ជនជាតិខ្មែរដែលជាគ្រូឧទ្ទេសអន្តរជាតិរបស់ World Athletics។

ក្នុងពិធីបិទវគ្គសាមគ្គីអូឡាំពិកស្តីពីគ្រូបង្វឹកកីឡាអត្តពលកម្ម CECS កម្រិត១ នៅព្រឹកថ្ងៃទី២០ ខែមីនា ឆ្នាំ២០២៤ ទេសរដ្ឋមន្ត្រីទទួលបន្ទុកអភិវឌ្ឍកីឡា លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា បានជំរុញឲ្យសិក្ខាកាមទាំងអស់យកចិត្តទុកដាក់ក្នុងការបណ្ដុះបណ្ដាលយុវជនអាយុក្រោម១៦ឆ្នាំ នៅតាមគ្រឹះស្ថានសិក្សាទាំងសាធារណៈនិងឯកជន ដើម្បីចូលរួមអភិវឌ្ឍធនធានថ្នាល សម្រាប់ការប្រកួតជាលក្ខណៈអន្តរជាតិនានា ជាពិសេសឆ្ពោះទៅការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជាធ្វើជាម្ចាស់ផ្ទះ។

លោក ថោង ខុន មានប្រសាសន៍ថា ៖«សូមអ្នកគ្រូ លោកគ្រូទាំងអស់ ត្រូវមានការជំរុញឲ្យសកម្មភាពកីឡារគ្រប់សាលា គ្រប់គ្រឹះស្ថានសារធារណៈ។ ឥឡូវនេះយើងមានគ្រូហើយ ដូច្នេះត្រូវខំបង្ហាត់ពួកគេទៅ ដើម្បីឱកាសប្រជែងមេដាយមាស»។

បន្ទាប់ពីការលោកឡើងរបស់ប្រធានគណៈកម្មាធិការជាតិអូឡាំពិកកម្ពុជា ពាក់ព័ន្ធនិងការជំរុញការបណ្ដុះបណ្ដាលយុវជនអាយុក្រោម១៦ឆ្នាំ នៅតាមគ្រឹះស្ថានសិក្សាទាំងសាធារណៈនិងឯកជន លោក Jayalal Rathnasooriya មានការគាំទ្រយ៉ាងខ្លាំង នូវការយកចិត្តទុកដាក់ចំពោះលើយុវជនបែបនេះ ព្រោះថាយុវជនជាទំពាំងស្នងឬស្សីនាពេលអនាគត។

ជាមួយគ្នានេះ លោក Jayalal Rathnasooriya បាននិយាយថា៖«ខ្ញុំមានការពេញចិត្តជាខ្លាំង ក្រោយទទួលព័ត៌មានថា មានការជំរុញឲ្យសិក្ខាកាមអនុវត្តសកម្មភាពកីឡា នៅក្នុងសាលារៀន។ រឿងមួយសំខាន់ពួកគាត់ត្រូវតែចេះឆ្នៃប្រឌិត នូវកន្លែងហ្វឹកហាត់និងសម្ភារៈ ដើម្បីឲ្យសិស្សានុសិស្ស បានចូលរួមក្នុងសកម្មភាពកីឡា»។

សិក្ខាកាម២៤រូប មកពី១៤ រាជធានី-ខេត្តគឺ រាជធានីភ្នំពេញ ខេត្តកោះកុង ស្ទឹងត្រែង កំពង់ឆ្នាំងសៀមរាប ពោធិ៍សាត់ ត្បូងឃ្មុំ កំពង់ធំ ស្វាយរៀង ឧត្តរមានជ័យ កំពត ប៉ៃលិន ព្រះវិហារ និងខេត្តកំពង់ចាម ព្រមទាំងសមាគមកីឡាក្រសួងមហាផ្ទៃ និងក្រសួងការពារជាតិ។

វគ្គបណ្តុះបណ្តាលផ្តោតសំខាន់គោលសំខាន់ធំ២គឺ១.ទ្រឹស្តី៖ ការរៀបចំកម្មវីធីហ្វឹកហាត់ ការណែនាំពីសុវត្ថិភាពកីឡាអត្តពលកម្ម គោលការណ៍បង្រៀននិងបង្វឹក ការបង្ហាញវីដេអូស្តីពីបច្ចេកទេស មូលដ្ឋានគ្រឹះនៃការចាប់ផ្តើមកីឡាអត្តពលកម្ម ការណែនាំស្តីពី WADA និង ការណែនាំពីអាហាររូបត្ថម្ភ។ ២. អនុវត្តជាក់ស្តែង នៅពហុកីឡដ្ឋានជាតិអូឡំាពិក។

អត្ថបទ៖ ផា រតនា

The post លោក ថោង ខុន ជំរុញសិក្ខាកាម CECS ផ្ដោតលើការបណ្ដុះបណ្ដាលថ្នាលតាមសាលា appeared first on Kampuchea Thmey Daily.

សិក្ខាកាម៧០នាក់បញ្ចប់វគ្គសិក្សាសាមគ្គីអូឡាំពិក ស្ដីពីរដ្ឋបាលកីឡា

Pha Rothana — Fri, 16 Feb 2024 03:56:26 +0000

វគ្គសិក្សាសាមគ្គីអូឡាំពិកស្ដីពីរដ្ឋបាលកីឡា សម្រាប់មន្ត្រីកីឡា និងមន្រ្ដីសហព័ន្ធកីឡាជាតិ រយៈពេល៤ថ្ងៃ បានបញ្ចប់ដោយជោគជ័យ កាលពីល្ងាចថ្ងៃទី១៥ ខែកុម្ភៈ ឆ្នាំ២០២៤ ក្រោមអធិបតីភាពលោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC)។

វគ្គសិក្សានេះបង្កើតឡើងតាមផែនការកម្មវិធីប្រចាំឆ្នាំរបស់គណៈកម្មាធិការជាតិអូឡាំពិកកម្ពុជាក្រោមការជំនួយឧបត្ថម្ភផ្នែកហិរញ្ញវត្ថុរបស់អង្គការសាមគ្គីអូឡាំពិកអន្ថរជាតិ គណៈកម្មាធិការជាតិអូឡាំពិកកម្ពុជា។ ការសិក្សារយៈពេល៤ថ្ងៃនេះផ្ដោតសំខាន់លើការពង្រឹងសមត្ថភាព មន្រ្ដីកំពុងបម្រើការងារកីឡានៅតាមបណ្ដាសហព័ន្ធកីឡាជាតិ មន្ដ្រីស្ម័គ្រចិត្តរបស់គណៈកម្មាធិការជាតិអូឡាំពកិកកម្ពុជា និងមន្រ្ដីអង្គភាពសារព័ត៌មាន។

វគ្គសិក្សានេះចាប់ពីថ្ងៃទី១២ដល់ទី១៥ ខែកុម្ភៈ មានសិក្ខាកាមចូលរួមចំនួន៧០នាក់រួមមានៈ
-មន្រ្ដីស្ម័គ្រចិត្ត របស់គណៈកម្មាធិការជាតិអូឡាំពិកកម្ពុជា ចំនួន៩នាក់
-មន្រ្ដីសហព័ន្ធកីឡាជាតិ ចំនួន៥៨នាក់
-មន្ដ្រីមកពីអង្គភាពសារព័ត៌មាន ចំនួន៣

វគ្គសិក្សាសាមគ្គីអូឡាំពិក ស្ដីពីរដ្ឋបាលកីឡា បង្រៀនដោយគ្រូឧទ្ទេសចំនួន៤រូប សុទ្ធតែបុគ្គលឆ្នើមមានបទពិសោធច្រើនពាក់ព័ន្ធជាផ្នែកកីឡារួមមាន៖ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិកាជាតិអូឡាំពិកកម្ពុជា លោកវេជ្ជបណ្ឌិត សុក សារឿន ប្រធានគណៈកម្មការវេជ្ជសាស្រ្តកីឡា លោក បឹង គឹមតោ ប្រធាននាយកដ្ឋានអប់រំកាយ និងកីឡា និង លោក ឯម ហៀង អគ្គលេខាធិការរងគណៈកម្មាធិការជាតិអូឡាំពិកកម្ពុជាឧទ្ទេសនាមស្ដីពី ការរៀបចំព្រឹត្ដិការណ៍កីឡាមួយ និងការរៀបចំរូបមន្តនៃការប្រកួតកីឡា។

ក្រោយការសិក្សារយៈពេល៤ ថ្ងៃសិក្ខាកាមចូលទាំងអស់បានទទួលចំណេះដឹងពាក់ព័ន្ធជាមួយការងាររដ្ឋបាលផ្នែកកីឡា ការរៀបចំដឹកនាំកម្មវិធីកីឡា ក្រោមការបង្រៀនដោយផ្ទាល់ពីគ្រូឧទ្ទេសទាំង៤រូប ដើម្បីយកទៅអនុវត្ត និងបម្រើការងារឲ្យកាន់តែមានប្រសិទ្ធភាពបន្ដែមទៀត ដើម្បីធ្វើឲ្យវិស័យកីឡានៅកម្ពុជាកាន់តែរីកចម្រើន។

ជាលទ្ធផលសិក្ខាកាមទាំង៧០នាក់ ទទួលបាននិទ្ទេស៣ផ្សេងគ្នា៖
-និទ្ទេសល្អណាស់ ចំនួន១៣នាក់
-និទ្ទេសល្អ ចំនួន២៨នាក់
-និទ្ទេសមធ្យម ចំនួន២៩នាក់

តាមការឲ្យដឹងពីលោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជាថា ៖«ចំពោះផែនការបណ្តុះបណ្តាល គណៈកម្មាធិការជាតិអូឡាំពិកកម្ពុជាគ្រោងរៀបចំវគ្គសិក្សាគ្រប់គ្រងកីឡាកម្រិតខ្ពស់ “Advanced Sports Management Courses”សម្រាប់មន្ត្រីជាន់ខ្ពស់ និងថ្នាក់ដឹកនាំស្ថាប័នកីឡា។ គម្រោងរៀបចំវគ្គបណ្តុះបណ្តាលកម្រិតខ្ពស់នេះនឹងចាប់ផ្តើមពីឆ្នាំ២០២៥តទៅ ដើម្បីផ្តល់ឱកាសដល់ថ្នាក់ដឹកនាំសហព័ន្ធកីឡាជាតិ និងថ្នាក់ដឹកនាំស្ថាប័នកីឡាបានពង្រឹងសមត្ថភាព និងចំណេះដឹងរបស់ខ្លួនបន្ថែមទៀតក្នុងការគ្រប់គ្រងស្ថាប័នកីឡារបស់ខ្លួនប្រកបដោយប្រសិទ្ធភាព និងស័ក្ដិសិទ្ធិភាព ស្របតាមគោលការណ៍ការដឹកនាំរបស់ចលនាអូឡាំពិក»៕

អត្ថបទៈ ផា រតនា

The post សិក្ខាកាម៧០នាក់បញ្ចប់វគ្គសិក្សាសាមគ្គីអូឡាំពិក ស្ដីពីរដ្ឋបាលកីឡា appeared first on Kampuchea Thmey Daily.

កម្ពុជាធ្វើម្ចាស់ផ្ទះមហាសន្និបាតក្រុមប្រឹក្សាអូឡាំពិកអាស៊ីមានភ្ញៀវអន្តរជាតិ៤០០នាក់

chean virakbot — Tue, 23 Aug 2022 07:25:20 +0000

កម្ពុជាបានទទួលភារកិច្ចធំលំដាប់អាស៊ីមួយទៀតសម្រាប់រៀបចំធ្វើមហាសន្និបាតក្រុមប្រឹក្សាអូឡាំពិកអាស៊ី (OCA) លើកទី៤១ ចាប់ពីថ្ងៃទី១ដល់ទី៥ ខែតុលា ឆ្នាំ២០២២ នៅសណ្ឋាគារសុខាភ្នំពេញ ដែលនឹងមានភ្ញៀវជាតិ អន្តរជាតិមកពីប្រមាណ៤៥ប្រទេសចូលរួម។

រូបភាព មហាសន្និបាតក្រុមប្រឹក្សាអូឡាំពិកអាស៊ី កាលពីលើកទី៣៩

ក្នុងកិច្ចប្រជុំព្រឹកមិញនៅទីស្នាក់ការគណៈកម្មាធិការជាតិអូឡាំពិកកម្ពុជា ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣បានឲ្យដឹងថា មហាសន្និបាតក្រុមប្រឹក្សាអូឡាំពិកអាស៊ីនៅកម្ពុជានឹងទទួលបដិសណ្ឋារកិច្ចប្រភិភូកីឡាអន្តរជាតិមកពីពិភពលោក ប្រមាណ ៤០០នាក់។ ប្រតិភូ ថ្នាក់ដឹកនាំ និងសមាជិកក្រុមប្រឹក្សាអូឡាំពិកអាស៊ី ព្រមទាំងប្រធានគណៈកម្មាធិការជាតិអូឡាំពិក៤៥ប្រទេសក្នុងទ្វីបអាស៊ី។

ឯកឧត្តមបញ្ជាក់ថា សម្រាប់រៀបចំមហាសន្និបាតក្រុមប្រឹក្សាអូឡាំពិកអាស៊ីនេះ កម្ពុជាទទួលបានអត្ថប្រយោជន៍ជាច្រើនពីសហគមន៍អន្តរជាតិដូចជា ការជួយផ្សព្វផ្សាយពីបណ្តាញសារព័ត៌មានអន្តរជាតិ ដែលនឹងមកប្រមូលផ្តុំគ្នា នៅទីកន្លែងតែមួយនៃរាជធានីភ្នំពេញ ដើម្បីជួយពង្រីកការផ្សព្វផ្សាយទៅកាន់ពិភពលោក។

កិច្ចប្រជុំក្រុមប្រឹក្សាកីឡាអាស៊ានកន្លងមកនៅភ្នំពេញ

ម្យ៉ាងទៀត នឹងផ្តល់ភាពងាយស្រួលក្នុងការទំនាក់ទំនងគ្នារវាងសហព័ន្ធកីឡាជាតិកម្ពុជានានាជាមួយសហព័ន្ធកីឡាអន្តរជាតិ ចលនាអូឡាំពិកអន្តរជាតិទាំងអស់ ក្នុងគោលបំណងជួយពង្រឹងដល់ការអភិវឌ្ឍវិស័យកីឡាជាតិនៅកម្ពុជាបាន។ ចំណុច១ទៀត គឺនយោបាយការទូតកីឡាកម្ពុជាកាន់តែមានភាពរឹងមាំ ជាពិសេសនឹងជំរុញបន្ថែមដល់ចលនាកីឡាពិភពលោកមើលឃើញពីសក្តានុពលរបស់កម្ពុជាផងដែរ៕

អត្ថបទ៖ វីរបុត្រ

The post កម្ពុជាធ្វើម្ចាស់ផ្ទះមហាសន្និបាតក្រុមប្រឹក្សាអូឡាំពិកអាស៊ីមានភ្ញៀវអន្តរជាតិ៤០០នាក់ appeared first on Kampuchea Thmey Daily.

បញ្ចប់យុទ្ធនាការផ្សព្វផ្សាយកម្មវិធី «គុណតម្លៃអូឡាំពិក» នៅខេត្តកែប

Kang Tola — Fri, 10 Dec 2021 16:06:35 +0000

យុទ្ធនាការផ្សព្វផ្សាយកម្មវិធី «គុណតម្លៃអូឡាំពិក» ក្រោមការរៀបចំរបស់គណៈកម្មាធិការជាតិអូឡាំពិកកម្ពុជា (NOCC) រយៈពេល២ថ្ងៃនៅខេត្តកែបបានបញ្ចប់ដោយជោគជ័យនៅថ្ងៃទី ១០ ខែធ្នូ ឆ្នាំ២០២១ នៅវិទ្យាល័យ ប៊ុន រ៉ានី ហ៊ុនសែន ចរិយាវង្ស ខេត្តកែប បន្ទាប់ពីបើកយុទ្ធនា ការថ្ងៃទី១ កាលពីម្សិលមិញ នៅវិទ្យាល័យ ហ៊ុន សែន ចំការដូង (ខេត្តកែប)។

លោក ប៊ុយ សុភ័ណ្ឌ គ្រូឧទ្ទេសប្រចាំវគ្គអប់រំគុណតម្លៃអូឡាំពិក នៃគណៈកម្មាធិការជាតិអូឡាំពិកកម្ពុជា បានរាយការណ៍ឲ្យដឹងតាមអនឡាញថា នៅថ្ងៃទី ១០ ខែធ្នូឆ្នាំ ២០២១ ដែលជាថ្ងៃទី២ និងជាថ្ងៃបញ្ចប់នៃយុទ្ធនាការផ្សព្វផ្សាយកម្មវិធីគុណតម្លៃអូឡាំពិក ដែលបានរៀបចំធ្វើនៅវិទ្យាល័យប៊ុន រ៉ានី ចរិយាវង្ស ខេត្ត កែប លោកសង្កេត ឃើញថា សិស្សានុសិស្សបានចូលរួមរៀនសូត្រក៏ដូចជាចូលរួមសកម្មភាពលេងកីឡាមួយចំនួន។ ហើយសំខាន់នោះយើងបានផ្ដល់នូវប្រធានបទចំនួនពីរ គឺអប់រំចលនាអូឡាំពិក និងមួយទៀតផ្សព្វផ្សាយដំណើរឆ្ពោះទៅស៊ីហ្គេមឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។

លោកបញ្ជាក់ថា ប្រធានបទសំខាន់ៗនៃកម្មវិធីនេះ ទី១គឺការធ្វើបទបង្ហាញលើការអប់រំគុណតម្លៃអូឡាំពិក ការប្រកួតកីឡាអូឡាំពិក និងការអប់រំចលនាអូឡាំពិក។ ទី២ គឺយុទ្ធនាការផ្សព្វផ្សាយការអប់រំសង្គម ប្រជាជនម្នាក់លេងកីឡាមួយមុខ ជៀសឆ្ងាយពីគ្រឿងញៀន យល់ដឹងពីបញ្ហាគ្រោះថ្នាក់ចរាចរណ៍ កម្ពុជាស្អាត និងបដិសណ្ឋាកិច្ចល្អ នៃដំណើរឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅព្រះរាជាណាចក្រកម្ពុជាជាប្រវត្តិសាស្ត្រដំបូង។

លោកបានឲ្យដឹងទៀតថា ក្រោយបញ្ចប់ពីខេត្តកែបនេះទៅ ក្រុមការងារក៏ដូចជាគណៈកម្មាធិការជាតិអូឡាំពិកកម្ពុជា នឹងរៀបចំនៅតាមសាលាដទៃទៀត ទៅតាមគម្រោងដែលបានគ្រោងរៀបចំកម្មវិធីនេះចំនួន៨លើក សម្រាប់ឆ្នាំ២០២១នេះ។ លោកបានបញ្ជាក់ឲ្យដឹងដែរថា សម្រាប់ជាផែន ការយុទ្ធនាការបន្តបន្ទាប់ទៀត យើងគ្រោងរៀបចំទី១នៅរាជធានីភ្នំពេញ ទី២ ខេត្តកំពង់ស្ពឺ និងទី ៣ខេត្តកំពង់ធំ ដែលសរុបគឺយើងនៅសល់កម្មវិធីចំនួន ៦ លើកទៀត។ ដូច្នេះក្រោយពីបញ្ចប់នៅខេត្តកែបនេះ គឺយើងនឹងគ្រោងរៀបចំជាបន្តបន្ទាប់ទៀតនៅរាជធានី-ខេត្តទាំងបីខាងលើនេះ ដោយរួមសហការជាមួយគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី ៣២ ឆ្នាំ២០២៣ ហៅថាCAMSOC ដើម្បីធ្វើការផ្សព្វ ផ្សាយយុទ្ធនាការឆ្ពោះទៅស៊ីហ្គេមឆ្នាំ ២០២៣ នៅកម្ពុជាបន្តទៀត។

សូមបញ្ជាក់ថា កម្មវិធីគុណតម្លៃអូឡាំពិក នៅខេត្តកែបនេះ គឺមានការចូលរួមពីសិស្សានុសិស្សចំនួន ១០០នាក់ (ពីរវិទ្យាល័យ) ដោយសិស្សានុ សិស្សដែលចូលរួម បានផ្តល់នូវចំណាប់អារម្មណ៍របស់ខ្លួន បានបង្ហាញនូវក្តីរីករាយជាខ្លាំង ដែលខ្លួនបានចូលរួមលេងកីឡា ព្រមទាំងទទួលបានចំណេះដឹងពីគោលដៅនៃយុទ្ធនាការ អប់រំគុណតម្លៃអូឡាំពិក ជាពិសេសគឺគោលដៅដ៏ចម្បងនៃដំណើរឆ្ពោះទៅទទួលរៀបចំធ្វើម្ចាស់ផ្ទះស៊ីហ្គេម- អាស៊ានប៉ារ៉ាហ្គេម ឆ្នាំ២០២៣នៅកម្ពុជាជាប្រវត្តិសាស្ត្រដំបូងនោះ៕

ដោយ ៖ វិសិទ្ធ

The post បញ្ចប់យុទ្ធនាការផ្សព្វផ្សាយកម្មវិធី «គុណតម្លៃអូឡាំពិក» នៅខេត្តកែប appeared first on Kampuchea Thmey Daily.

គណៈកម្មាធិការជាតិអូឡាំពិកកម្ពុជា Archives - Kampuchea Thmey Daily

សង្គ្រាម​ឈ្លានពាន​របស់​សៀម​មក​លើ​កម្ពុជា​ ប៉ះពាល់​សកម្មភាព​កីឡា​យ៉ាងណា​ខ្លះ…​

គណៈកម្មាធិការ​អូឡាំពិក​អន្តរជាតិ​ ឧបត្ថម្ភ​ជំនួយ​តាម​រយៈ​ក្រសួង​អប់រំ​ ដល់​សិស្សានុសិស្ស​​ភៀស​សឹក

កម្ពុជា រៀបចំព្រឹត្តិការណ៍កីឡាកុមារអូឡាំពិក លើកដំបូង បើកឱ្យកុមារអាយុ ១ ឆ្នាំចូលប្រកួត

ប្រធាន​ NOC កម្ពុជាជួបឯកអគ្គរាជទូតជប៉ុន​ដើម្បបង្កើនកិច្ចសហប្រតិការកីឡា

លោក ថោង ខុន ជំរុញសិក្ខាកាម CECS ផ្ដោតលើការបណ្ដុះបណ្ដាលថ្នាលតាមសាលា

សិក្ខាកាម៧០នាក់បញ្ចប់វគ្គសិក្សាសាមគ្គីអូឡាំពិក ស្ដីពីរដ្ឋបាលកីឡា

បញ្ចប់​យុទ្ធនាការ​ផ្សព្វផ្សាយ​កម្ម​វិធី «​គុណ​តម្លៃ​អូឡាំពិក​» នៅ​ខេត្ត​កែប

សង្គ្រាមឈ្លានពានរបស់សៀមមកលើកម្ពុជា ប៉ះពាល់សកម្មភាពកីឡាយ៉ាងណាខ្លះ…

គណៈកម្មាធិការអូឡាំពិកអន្តរជាតិ ឧបត្ថម្ភជំនួយតាមរយៈក្រសួងអប់រំ ដល់សិស្សានុសិស្សភៀសសឹក

ប្រធាន NOC កម្ពុជាជួបឯកអគ្គរាជទូតជប៉ុនដើម្បបង្កើនកិច្ចសហប្រតិការកីឡា

បញ្ចប់យុទ្ធនាការផ្សព្វផ្សាយកម្មវិធី «គុណតម្លៃអូឡាំពិក» នៅខេត្តកែប