ជប៉ុន-កម្ពុជា Archives - Kampuchea Thmey Daily

ទូតជប៉ុនថាជោគជ័យរបស់ក្រុមហ៊ុនតូយ៉ូតានៅកម្ពុជាបង្ហាញពិភពលោកថា កម្ពុជានៅតែជាគោលដៅវិនិយោគដែលមានសុវត្ថិភាព

hun sirivadh — Fri, 03 Jul 2026 05:51:03 +0000

ឯកអគ្គរាជទូតជប៉ុនប្រចាំកម្ពុជាលោក អ៊ូអិណុ អាត់ស៊ូស៊ី បានលើកឡើងការបើកដំណើរការខ្សែច្រវាក់ផលិតកម្មដំឡើងរថយន្តថ្មីរបស់តូយ៉ូតានៅកម្ពុជា គឺជាសារមួយបង្ហាញទៅកាន់ពិភពលោកថា កម្ពុជានៅតែជាគោលដៅវិនិយោគដែលមានសក្ដានុពល និងមានសុវត្ថិភាព បើទោះបីប្រឈមមុខនឹងស្រមោលអវិជ្ជមានមួយចំនួនដែលធ្វើឱ្យអ្នកវិនិយោគបរទេសមានការសង្ស័យលើប្រទេសនេះក្ដី។ អនុប្រធានទី១ក្រុមប្រឹក្សាអភិវឌ្ឍន៍កម្ពុជា ឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណដល់ប្រទេសជប៉ុនចំពោះការជឿទុកចិត្តមួយនេះ និងសង្ឃឹមថាអ្នកវិនិយោគបរទេសផ្សេងទៀតនឹងផ្ដល់គំនិតវិជ្ជមានលើកម្ពុជាកាន់តែច្រើន។

ថ្លែងក្នុងពិធីដាក់ដំណើរការការផ្គុំ និងដំឡើងរថយន្ត Toyota ម៉ូដែលថ្មីនៅកម្ពុជាកាលពីព្រឹកថ្ងៃទី២ ខែកក្កដា ឆ្នាំ២០២៦ នៅរោងចក្រតូយូតាក្នុងតំបន់សេដ្ឋកិច្ចពិសេសភ្នំពេញ លោក អ៊ូអីណុ អាត់ស៊ូស៊ី មានប្រសាសន៍ថា បញ្ហាព្រំដែនជាមួយថៃ និងបញ្ហាឆបោកតាមប្រព័ន្ធអនឡាញ ដែលកើតឡើងក្នុងឆ្នាំ២០២៥ បានធ្វើឱ្យអ្នកវិនិយោគបរទេសមួយចំនួនចាប់ផ្ដើមសម្លឹងមើលកម្ពុជាក្នុងកែវភ្នែកសង្ស័យ ដែលបានប៉ះពាល់ដល់ទំនុកចិត្តរបស់ពួកគេ។ តែសម្រាប់ជប៉ុននៅតែបង្ហាញការទុកចិត្តលើប្រទេសនេះ ហើយលទ្ធផលនៃការទុកចិត្តនេះបានបង្ហាញនៅថ្ងៃដែលក្រុមហ៊ុនតូយូតា បង្កើនខ្សែច្រវ៉ាក់ផលិតកម្មរបស់ខ្លួននៅកម្ពុជាពេលនេះ។

លោកថា៖ «នៅក្នុងបរិបទនៃការធ្លាក់ចុះនៃទំនុកចិត្តរបស់វិនិយោគិន ការពិតដែលថា Toyota ដែលជាម៉ាកយីហោឈានមុខគេរបស់ជប៉ុន កំពុងដំណើរការក្រុមហ៊ុនផលិតរថយន្តនៅក្នុងប្រទេសកម្ពុជា និងទទួលបានជោគជ័យយ៉ាងខ្លាំងទាំងផ្នែកលក់រថយន្ត និងការអភិវឌ្ឍធនធានមនុស្ស នឹងជួយយ៉ាងច្រើនក្នុងការលើកកម្ពស់មុខមាត់របស់ប្រទេសកម្ពុជាជាគោលដៅវិនិយោគ»។

លោកបានបញ្ជាក់បន្ថែមថាស្ថានទូតជប៉ុនប្រចាំកម្ពុជានឹងនៅតែបន្តគាំទ្រដល់ការវិនិយោគពីជប៉ុនមកកាន់កម្ពុជាបន្ថែមទៀត និងសង្ឃឹមថា រថយន្តដែលធ្វើនៅកម្ពុជាចេញពីរោងចក្រតូយូតានឹងទទួលបានក្ដីស្រឡាញ់ពីប្រជាជនកម្ពុជា ហើយនឹងគាំទ្រដល់សេដ្ឋកិច្ចកម្ពុជាកាន់តែយូរអង្វែងទៅថ្ងៃអនាគត។

អនុប្រធានទី១ ក្រុមប្រឹក្សាអភិវឌ្ឍន៍កម្ពុជាលោកឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណជប៉ុនចំពោះការជំរុញការទូតសេដ្ឋកិច្ចជាមួយកម្ពុជា និងបានបញ្ជាក់ថារដ្ឋាភិបាលកម្ពុជាបានដាក់ចេញផែនការជាច្រើនក្នុងការកាត់បន្ថយថ្លៃដើមផលិត ដោះស្រាយបញ្ហាថាមពល និងការលំបាករបស់អ្នកវិនិយោគ ជាពិសេសគឺប្ដេជ្ញាលុបបំបាត់ឧក្រិដ្ឋកម្មឆបោកអនឡាញឱ្យអស់ចេញពីប្រទេស។

លោកបានបញ្ជាក់បន្ថែមប្រាប់ក្រុមអ្នកយកព័ត៌មានថា៖ «នេះគាត់ជោគជ័យ ហើយខ្ញុំសង្ឃឹមថាតូយ៉ូតានឹងអាចជួយផ្សព្វផ្សាយទៅក្រុមហ៊ុនជប៉ុនផ្សេងៗទៀតឱ្យមកដាក់ទុននៅកម្ពុជាយើង ទី២ក្រុមហ៊ុនផ្សេងៗទៀតក្រៅពីតូយូតាទាំងក្រុមហ៊ុនចិន ក្រុមហ៊ុនកូរ៉េ ក្រុមហ៊ុនអាគាំង ក្រុមហ៊ុនអឺរ៉ុបទាំងអស់ ពេលគេឃើញសារព័ត៌មាននេះថាតូយូតាដែលឈ្មោះល្បីល្បាញលើពិភពលោកបានដាក់ទុននៅកម្ពុជាហើយបានពង្រីកខ្សែចង្វាក់ផលិតកម្មរបស់គាត់ថែមទៀត! នេះហើយគាំទ្រឱ្យយើងខ្ញុំមានលទ្ធភាពទាក់ទាញអ្នកវិនិយោគមកកម្ពុជាផងដែរ»។

ទំហំពាណិជ្ជកម្មកម្ពុជាជប៉ុននៅឆ្នាំ២០២៥មានទំហំប្រមាណ ២,៥ពាន់លានដុល្លារអាមេរិក កើនឡើង១៧%បើធៀបនឹងឆ្នាំ២០២៤។ ដោយឡែកសម្រាប់ការទាក់ទាញអ្នកវិនិយោគបន្ថែមមកក្នុងប្រទេសកម្ពុជាវិញក្នុងឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជាអនុម័តគម្រោងវិនិយោគចំនួន ៦៣០គ្រោង កើនពី៤២៤គម្រោងក្នុងឆ្នាំ២០២៤ ដែលមានទុនប្រមាណ១០ពាន់លានដុល្លារអាមេរិក៕

អត្ថបទដោយ ហ៊ុន សិរីវឌ្ឍន៍

The post ទូតជប៉ុនថាជោគជ័យរបស់ក្រុមហ៊ុនតូយ៉ូតានៅកម្ពុជាបង្ហាញពិភពលោកថា កម្ពុជានៅតែជាគោលដៅវិនិយោគដែលមានសុវត្ថិភាព appeared first on Kampuchea Thmey Daily.

ស្ថានទូតជប៉ុនជំរុញអ្នកវិនិយោគមកកាន់កម្ពុជា

hun sirivadh — Sat, 21 Feb 2026 08:20:00 +0000

ស្ថានទូតជប៉ុនប្រចាំនៅកម្ពុជាបានរៀបចំសិក្ខាសាលាមួយស្ដីពីឱកាសវិនិយោគសម្រាប់ក្រុមហ៊ុនជប៉ុននៅកម្ពុជា ខណៈឯកអគ្គរាជទូតបានបង្ហាញក្ដីរំពឹងថាក្រុមហ៊ុនជប៉ុនអាចនឹងពិចារណាវិនិយោគនៅកម្ពុជា ខណៈអ្នកដែលកំពុងវិនិយោគអាចនឹងពង្រីកអាជីវកម្មបន្ថែម។

យោងតាមការផ្សព្វផ្សាយរបស់ស្ថានទូតជប៉ុននៅថ្ងៃទី២១ ខែកុម្ភៈ ឆ្នាំ២០២៦នេះ សិក្ខាសាលាស្ដីពីការវិនិយោគសម្រាប់ក្រុមហ៊ុនជប៉ុន ដែលរៀបចំកាលពីថ្ងៃទី២០ នេះមានក្រុមហ៊ុនចូលរួម ១៧០ក្រុមហ៊ុនតាមអនឡាញ និងទីតាំងផ្ទាល់។

នៅក្នុងសិក្ខាសាលានោះឯកអគ្គរាជទូត អ៊ូអ៊ិណុ អាត់ស៊ូស៊ី (UENO Atsushi) បានសម្តែងការរំពឹងទុកថា សិក្ខាសាលានេះនឹងក្លាយជាឱកាសមួយសម្រាប់ក្រុមហ៊ុនជប៉ុនដែលមានចំណាប់អារម្មណ៍ក្នុងការវិនិយោគនៅកម្ពុជា ក៏ដូចជាក្រុមហ៊ុនដែលមានវត្តមាននៅកម្ពុជារួចហើយ ដើម្បីពិចារណាលើការវិនិយោគថ្មី ឬពង្រីកការវិនិយោគដែលមានស្រាប់របស់ពួកគេ។

របាយការណ៍ឆ្នាំ២០២៣ គម្រោងវិនិយោគជប៉ុននៅកម្ពុជាមានចំនួន ១៣៧គម្រោង ដែលមានទឹកប្រាក់ប្រមាណ ២,៥ពាន់លានដុល្លារអាមេរិក និងមានពាណិជ្ជករជប៉ុនប្រមាណ ១,៧០០នាក់នៅកម្ពុជា៕

អត្ថបទដោយ ហ៊ុន សិរីវឌ្ឍន៍

The post ស្ថានទូតជប៉ុនជំរុញអ្នកវិនិយោគមកកាន់កម្ពុជា appeared first on Kampuchea Thmey Daily.

ជប៉ុនប្តេជ្ញាសហការគាំទ្រកម្ពុជាអភិវឌ្ឍវិស័យទេសចរណ៍

Din Thary — Thu, 12 Feb 2026 03:40:20 +0000

ប្រធានវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (Economic Research Institute for ASEAN and East Asia: ERIA) លោកសាស្ត្រាចារ្យ Tetsuya Watanabe បានប្តេជ្ញារបស់ខ្លួនក្នុងការសហការគាំទ្រក្រសួងទេសចរណ៍លើការអភិវឌ្ឍវិស័យទេសចរណ៍កម្ពុជា។

លោកសាស្ត្រាចារ្យ Tetsuya Watanabe បានលើកឡើងបែបនេះនៅក្នុងជំនួបពិភាក្សាការងារស្តីពីកិច្ចសហប្រតិបត្តិការលើវិស័យទេសចរណ៍ ជាមួយលោក ហួត ហាក់ រដ្ឋមន្ត្រីក្រសួងទេសចរណ៍។

លោកសាស្ត្រាចារ្យបានថ្លែងអំពីចំណាប់អារម្មណ៍លើការធានាបាននូវកត្តាសុខសន្តិភាព ស្ថិរភាពនយោបាយដែលកម្ពុជា និងរាជរដ្ឋាភិបាលកម្ពុជា ធានាបាន គឺពិតជាកត្តាដ៏សំខាន់ និងចម្បងក្នុងការអភិវឌ្ឍសេដ្ឋកិច្ច សង្គម ជាពិសេសគឺវិស័យទេសចរណ៍។ លោកក៏បានគូសបញ្ជាក់ពីសក្តានុពលទេសចរណ៍ដ៏សំបូរបែបដែលកម្ពុជាមាន គួបផ្សំជាមួយស្ថានភាពភូមិសាស្រ្តពិតផ្តល់នូវលក្ខណៈល្អប្រសើរដល់ការអភិវឌ្ឍទេសចរណ៍ និងចូលរួមចំណែកជម្រុញសេដ្ឋកិច្ចកម្ពុជាឱ្យមានសន្ទុះបន្ថែមទៀត។

លោក ហួត ហាក់ បានលើកឡើងអំពីទំនាក់ទំនងដ៏ល្អរវាងកម្ពុជា និងវិទ្យាស្ថាន(ERIA) ដែលបានចាប់ផ្តើមចាប់តាំងពីឆ្នាំ២០១២ ដោយគិតត្រឹមឆ្នាំ២០២៦ នេះ គឺមានរយៈពេល១៤ឆ្នាំ។ តាមរយៈទំនាក់ទំនងដ៏ល្អនេះ ដែលបានប្រែក្លាយជាមូលដ្ឋានគ្រឹះសម្រាប់ពង្រឹង និងពង្រីកកិច្ចសហប្រតិបត្តិការលើផ្នែកផ្សេងៗទៀត ជាពិសេសក្នុងវិស័យទេសចរណ៍ដែលបានទទួលកិច្ចសហប្រតិបត្តិការគាំទ្រជាបន្តបន្ទាប់ពីវិទ្យាស្ថានរហូតមក។

លោករដ្ឋមន្រ្តី ក៏បានអរគុណប្រធានវិទ្យាស្ថាន និងវិទ្យាស្ថានចំពោះកិច្ចសហប្រតិបត្តិការដ៏ល្អ និងការគំាទ្រក្រសួងទេសចរណ៍ទាំងនៅក្នុងប្រទេស ក្របខ័ណ្ឌអាស៊ាន តំបន់ និងអន្តរជាតិរហូតមក។

តាមរយៈជំនួបពិភាក្សាការងារផ្លាស់ប្តូរទស្សនៈប្រកបដោយលទ្ធផលជាផ្លែផ្កា គូភាគីប្តេជ្ញាបន្តពង្រីកកិច្ចសហប្រតិបត្តិការ ដោយភាគីវិទ្យាស្ថានបានទទួលពិនិត្យលទ្ធភាពលើសំណើសុំជំនួយគំាទ្របច្ចេកទេសអភិវឌ្ឍវិស័យទេសចរណ៍ពីក្រសួងទេសចរណ៍។

ទន្ទឹមនេះ ក្នុងពេលជួបពិភាក្សាការងារជាមួយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោកសាស្ត្រាចារ្យ ក៏បានលើកឡើងពីសក្ដានុពល និងឱកាសរបស់កម្ពុជាក្នុងការទាក់ទាញវិនិយោគិនជប៉ុន ជាពិសេសលទ្ធភាពរបស់កម្ពុជាក្នុងការប្រែក្លាយខ្លួនទៅជា «មូលដ្ឋានផលិតកម្មឧស្សាហកម្មថ្មី» ដែលការណ៍នេះមិនត្រឹមតែរួមចំណែកដល់កំណើនសេដ្ឋកិច្ចរបស់កម្ពុជាប៉ុណ្ណោះទេ ប៉ុន្តែថែមទាំងរួមចំណែកដល់ខ្សែច្រវាក់ផលិតកម្មឧស្សាហកម្មតំបន់ និង សកល។

លោកសាស្ត្រាចារ្យ បន្ថែមថា វិនិយោគិនជប៉ុនចាប់អារម្មណ៍ក្នុងការវិនិយោគបន្ថែម នៅកម្ពុជា ក៏ដូចជាការរៀបចំនូវវេទិកាធុរកិច្ចកម្ពុជា-ជប៉ុន នាពេលខាងមុខ ដើម្បីចូលរួមចំណែកក្នុងការទាក់ទាញវិនិយោគិនជប៉ុនមកកាន់កម្ពុជាឱ្យកាន់តែច្រើន។

បច្ចុប្បន្ននេះ បណ្ដាក្រុមហ៊ុនជប៉ុនកំពុងស្វែងរកឱកាសក្នុងការផ្លាស់ប្ដូរទីតាំងផលិតកម្ម (Re-location) នៅក្នុងតំបន់ ហើយបាននិងកំពុងសម្លឹងមើលឱកាសក្នុងការវិនិយោគថ្មីៗនៅកម្ពុជាបន្ថែមទៀត៕

The post ជប៉ុនប្តេជ្ញាសហការគាំទ្រកម្ពុជាអភិវឌ្ឍវិស័យទេសចរណ៍ appeared first on Kampuchea Thmey Daily.

ជប៉ុនផ្តល់ហិរញ្ញប្បទានឥតសំណង ១១លានដុល្លារដល់កម្ពុជាសម្រាប់បោសសម្អាតមីនក្នុងខេត្តចំនួន៣

Samean Lay — Mon, 12 Jan 2026 08:20:16 +0000

រាជរដ្ឋាភិបាលជប៉ុន បានផ្តល់ហិរញ្ញប្បទានឥតសំណងប្រមាណ ១១ លានដុល្លារ ជូនរាជរដ្ឋាភិបាលកម្ពុជា ដើម្បីបោសសម្អាតមីនក្នុងដំណាក់កាលទី៣ នៅក្នុងខេត្តគោលដៅចំនួន៣រួមមាន ខេត្តបាត់ដំបង ពោធិ៍សាត់ និងខេត្តកោះកុង។

ពិធីចុះហត្ថលេខាលើលិខិតប្តូរសារ និងឯកសារពាក់ព័ន្ធស្តីពីការផ្តល់ហិរញ្ញប្បទានឥតសំណងសម្រាប់អនុវត្តគម្រោង”សមាហរណកម្មការបោសសម្អាតមីននិងសង្គ្រោះជនពិការដោយសារមីន ដំណាក់កាលទី៣ ត្រូវបានធ្វើឡើងនៅថ្ងៃទី ១២ខែមករា ឆ្នាំ ២០២៦ រវាងលោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្ដីក្រសួងការបរទេស និងសហប្រតិបត្តិការអន្ដរជាតិ និងលោក អាត់ស៊ូស៊ី អ៊ូអិណូ (Atsushi UENO) ឯកអគ្គរាជទូតជប៉ុនប្រចាំកម្ពុជា។

ហិរញ្ញប្បទាននេះ ផ្តល់ជូនរាជរដ្ឋាភិបាលកម្ពុជា ដើម្បីគាំទ្រអង្គភាពស៊ីម៉ាក់ (CMAC) ដែលមានទឹកប្រាក់ចំនួន១.៧០០.០០០.០០០ យ៉េន (មួយពាន់ប្រាំពីររយលានយ៉េន) ប្រមាណជាង១១ លានដុល្លារអាមេរិក។ គម្រោងនេះ សម្រាប់កិច្ចប្រតិបត្តិការរបស់អង្គភាពCMAC នៅខេត្តគោលដៅចំនួន៣ គឺខេត្តបាត់ដំបង ពោធិ៍សាត់ និងខេត្តកោះកុង ព្រមទាំងមានរយៈពេលអនុវត្តគម្រោងចំនួន២ឆ្នាំ ខែមករា ២០២៦-១៥ មករា ២០២៨។

លោក ហេង រតនា អគ្គនាយកនៃមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានបញ្ជាក់ថា គម្រោងនេះនឹងផ្ដល់ផលប្រយោជន៍ដល់ប្រជាពលរដ្ឋទទួលផលផ្ទាល់ចំនួនប្រមាណជាង២៧.០០០គ្រួសារ និងអ្នកទទួលផលដោយប្រយោលមានចំនួនយ៉ាងច្រើនទៀតផង។ លោកថា៖«ដើម្បីសម្រេចបានគោលដៅគម្រោងនេះ អង្គភាពCMACត្រូវពង្រាយកម្លាំងប្រតិបត្តិការសរុបប្រមាណជាង៣៥០នាក់។ បន្ថែមលើការងារបោសសម្អាតផ្ទៃដីចម្ការមីន គម្រោងនេះក៏មានផ្ដល់ សម្ភារបច្ចេកទេស និងបំពាក់ប្រព័ន្ធបច្ចេកវិទ្យាទំនើបដូចជា ម៉ាស៊ីនរាវមីនALIS គ្រឿងចក្រកម្ទេចមីន ដ្រូន និងប្រព័ន្ធទិន្នន័យបញ្ញាសិប្បនិមិ្មត(AI) និងការអភិវឌ្ឍជនខ្នាតតូចមួយចំនួនទៀត ជូនប្រជាពលរដ្ឋជាជនរងគ្រោះដោយសារមីនផងដែរ»។

ឆ្លៀតក្នុងឱកាសនេះ ក្នុងនាមអគ្គនាយកស៊ីម៉ាក់ បានថ្លែងអំណរគុណយ៉ាងជ្រាលជ្រៅបំផុតចំពោះ សម្តេចធិបតី នាយករដ្ឋមន្រ្តី និងលោក ប្រាក់ សុខុន ដែលបានគាំទ្រក្នុងការស្នើសុំជំនួយនេះ ជាពិសេសថ្លែងអំណរគុណរដ្ឋាភិបាល និងប្រជាជនជប៉ុន ដែលតែងតែផ្តល់ការគាំទ្រលើការបោសសម្អាតមីនមនុស្សធម៌ តាមរយៈការផ្តល់ហិរញ្ញប្បទានឥតសំណង និងសម្ភារបច្ចេកទេសជាដើម។

គួរជម្រាបថា គិតត្រឹមខែមីនា ឆ្នាំ២០២៥ កម្ពុជានៅសល់ផ្ទៃដីមានមីន គ្រាប់បែកចង្កោម និងសំណល់ជាតិផ្ទុះពីសង្គ្រាម សរុបមានចំនួន ១ ៦៩៧ គីឡូម៉ែត្រក្រឡា ក្នុងនោះផ្ទៃដីមានមីន ៤៦៩ គីឡូម៉ែត្រក្រឡា គ្រាប់បែកចង្កោម ៦៨១គីឡូម៉ែត្រក្រឡា និងសំណល់ជាតិផ្ទុះពីសង្រ្គាម ៥៤៧ គីឡូម៉ែត្រក្រឡា៕

The post ជប៉ុនផ្តល់ហិរញ្ញប្បទានឥតសំណង ១១លានដុល្លារដល់កម្ពុជាសម្រាប់បោសសម្អាតមីនក្នុងខេត្តចំនួន៣ appeared first on Kampuchea Thmey Daily.

ជប៉ុនសន្យាខំប្រឹងជំរុញការអនុវត្តកិច្ចព្រមព្រៀងសន្តិភាពកម្ពុជា-ថៃឱ្យបានពេញលេញ បន្ថយភាពតានតឹង

Ngoeul Narath — Mon, 24 Nov 2025 03:46:54 +0000

ប្រទេសជប៉ុនបានសម្តែងការគោរពចំពោះក្រុមអ្នកសង្កេតការណ៍អាស៊ាន (AOT) ដែលដឹកនាំដោយប្រទេសម៉ាឡេស៊ី និងសន្យាថាខ្លួននឹងធ្វើការជាមួយប្រទេសក្នុងតំបន់ និងដៃគូពាក់ព័ន្ធ ដើម្បីបន្ថយភាពតានតឹង និងធានាថាភាគីជម្លោះកម្ពុជា-ថៃ គោរពយ៉ាងប្រាកដប្រជាចំពោះបទឈប់បាញ់។

Colonel HARA Takashi, PHOTO: ISHIKAWA KPT.

ក្នុងសេចក្ដីថ្លែងការណ៍ផ្សាយលើទំព័រហ្វេសប៊ុកស្ថានទូតប្រចាំនៅកម្ពុជា, រដ្ឋាភិបាលទីក្រុងតូក្យូ បានសង្កត់ធ្ងន់ថា៖«ជប៉ុននឹងបន្តខិតខំប្រឹងប្រែង ដើម្បីជំរុញការអនុវត្តយ៉ាងប្រាកដប្រជានៃកិច្ចព្រមព្រៀងបទឈប់បាញ់ និងបន្ថយភាពតានតឹង ដោយសហការជាមួយបណ្តាប្រទេសពាក់ព័ន្ធនានា។»។

ទីក្រុងតូក្យូចេញមកថ្លែងបញ្ជាក់ពីជំហររបស់ខ្លួនបែបនេះម្ដងទៀត ស្របពេលដែលទីប្រឹក្សា និងអនុព័ន្ធយោធារបស់ខ្លួនប្រចាំនៅកម្ពុជា លោកវរសេនីយ៍ឯក HARA Takashi បានចូលរួមសកម្មភាពចុះពិនិត្យទីតាំងជាក់ស្តែងទាក់ទងនឹងស្ថានការណ៍ព្រំដែន ដែលរៀបចំដោយក្រសួងការពារជាតិ នៅថ្ងៃទី ២២-២៣ ខែវិច្ឆិកា។

វរសេនីយ៍ឯក HARA Takashi ក្នុងឋានៈជាសមាជិកនៃក្រុមអនុព័ន្ធយោធាបរទេសប្រចាំកម្ពុជា(MACPP) បានចូលរួមដំណើរទស្សនកិច្ចរៀបចំដោយក្រសួងការពារជាតិកម្ពុជាទៅកាន់ជំរុំភៀសសឹកខេត្តបន្ទាយមានជ័យ និងខេត្តសៀមរាប ដើម្បីទទួលបានសេចក្តីសង្ខេបព័ត៌មានស្តីពីស្ថានភាពចុងក្រោយបង្អស់។

តំណាងរបស់ជប៉ុនវរសេនីយ៍ឯក HARA Takashi បានចុះទៅសួរសុខទុក្ខដល់ប្រជាជនស្លូតត្រង់កម្ពុជាដែលជាជនភៀសសឹក ស្នាក់នៅបណ្តោះអាសន្ននៅវត្តចាន់ស៊ីសាមគ្គីរតនារាម ដែលជាប្រជាជនត្រូវបានជម្លៀសចេញពីផ្ទះសម្បែងនៅក្នុងភូមិព្រៃចាន់ ភ្លាមៗ ក្រោយពីហេតុការណ៍យោធាថៃបើកការបាញ់ប្រហារមកលើប្រជាពលរដ្ឋស៊ីវិលស្លូតត្រង់កម្ពុជាដោយគ្មានមូលហេតុ កាលពីរសៀលថ្ងៃទី១២ ខែវិច្ឆិកា ដែលហេតុការណ៍នោះបានបណ្តាលឱ្យប្រជាពលរដ្ឋរងរបួសធ្ងន់ ចំនួន៣រូប និងបាត់បង់ជីវិតនៅនឹងកន្លែងចំនួន១រូប។

បន្ទាប់ពីនាយករដ្ឋមន្ត្រីកម្ពុជាសម្តេចមហាបវរធិបតី ហ៊ុន ម៉ាណែត និងនាយករដ្ឋមន្ត្រីថៃ Anutin Charnvirakul បានចុះហត្ថលេខាលើសេចក្តីថ្លែងការណ៍រួមទាក់ទងជម្លោះព្រំដែន នៅចំពោះមុខប្រធានាធិបតីអាមេរិក Donald J. Trump និងនាយករដ្ឋមន្ត្រីម៉ាឡេស៊ី កាលពីចុងខែតុលា រដ្ឋមន្ត្រីការបរទេសជប៉ុន Motegi Toshimitsu បានស្វាគមន៍ចំពោះកិច្ចព្រមព្រៀងនេះ និងសង្ឃឹមថា ភាពតានតឹងរវាងប្រទេសទាំងពីរនឹងត្រូវបានបន្ធូរបន្ថយដោយសន្តិវិធី តាមរយៈការអនុវត្តដ៏ម៉ឺងម៉ាត់នូវកិច្ចព្រមព្រៀងនេះ។

Japanese Foreign Minister Toshimitsu Motegi. (Reuters)

ជប៉ុនក៏បានសម្តែងនូវការគោរពយ៉ាងជ្រាលជ្រៅ ចំពោះកិច្ចខិតខំប្រឹងប្រែងផ្នែកការទូតរបស់សហរដ្ឋអាមេរិក និងប្រទេសម៉ាឡេស៊ីជាប្រធានអាស៊ាន ក្នុងការដោះស្រាយបញ្ហាជម្លោះរវាងកម្ពុជា-ថៃ។

រដ្ឋមន្ត្រីការបរទេសជប៉ុនថា ភាពប្រសើរឡើងវិញនៃទំនាក់ទំនងរវាងកម្ពុជា និងថៃ មានសារៈសំខាន់ណាស់សម្រាប់ស្ថិរភាព និងការអភិវឌ្ឍក្នុងតំបន់ទាំងមូល។ រដ្ឋាភិបាលជប៉ុននឹងបន្តខិតខំប្រឹងប្រែងក្នុងការបន្ធូរបន្ថយភាពតានតឹង ដោយសម្របសម្រួលជាមួយប្រទេសពាក់ព័ន្ធនានា ដូចជាការផ្តល់សម្ភារៈ ដល់ប្រទេសម៉ាឡេស៊ីដែលដឹកនាំក្រុមអ្នកសង្កេតការណ៍បទឈប់បាញ់តាមរយៈជំនួយសន្តិសុខផ្លូវការ(OSA)របស់ជប៉ុន ដើម្បីឆ្ពោះទៅរកការរក្សា និងពង្រឹងសន្តិភាពរវាងកម្ពុជា-ថៃ រយៈពេលមធ្យម និងវែង៕

ដោយ៖ ង៉ិល ណារ៉ាត់

The post ជប៉ុនសន្យាខំប្រឹងជំរុញការអនុវត្តកិច្ចព្រមព្រៀងសន្តិភាពកម្ពុជា-ថៃឱ្យបានពេញលេញ បន្ថយភាពតានតឹង appeared first on Kampuchea Thmey Daily.

ជំនួយមនុស្សធម៌ជប៉ុនជិត២លានដុល្លារនឹងមកដល់កម្ពុជានៅសប្ដាហ៍ក្រោយ

hun sirivadh — Fri, 12 Sep 2025 04:04:53 +0000

ជំនួយជាទឹកប្រាក់មនុស្សធម៌ពីប្រទេសជប៉ុនដែលមានប្រមាណ ១,៨លានដុល្លារអាមេរិក នឹងត្រូវផ្ដល់មកកម្ពុជានៅថ្ងៃទី១៥ ខែកញ្ញា ខាងមុខ ដោយផ្ដល់ទៅឱ្យអង្គការអន្តរជាតិចំនួនពីរគឺ UNICEF និង IOM។

តាមសេចក្ដីប្រកាសព័ត៌មានជំនួយនេះនឹងត្រូវផ្ដល់ដើម្បីសង្គ្រោះដើម្បីផ្តល់ជំនួយសង្គ្រោះជីវិតដល់កុមារ និងគ្រួសារដែលរងផលប៉ះពាល់ដោយវិបត្តិនៅព្រំដែនកម្ពុជា-ថៃ ដែលពិធីនៃការផ្ដល់ជំនួយនេះនឹងធ្វើនៅវត្តកំពង់សង្កែ ស្រុកឆែប ខេត្តព្រះវិហារ ដោយមានការចូលរួមពីឯកអគ្គរាជទូតជប៉ុនប្រចាំកម្ពុជាលោក អ៊ូអិណុ អាត់ស៊ូស៊ី អភិបាលខេត្តព្រះវិហារលោក គឹម រិទ្ធី និងតំណាងអង្គការ UNICEF និង IOM ផងដែរ។

ឯកអគ្គរាជទូតជប៉ុនប្រចាំកម្ពុជាលោក អ៊ូអិណុ អាត់ស៊ូស៊ី បានប្រាប់កម្ពុជាថ្មីថា ក្នុងជំនួយសង្គ្រោះបន្ទាន់នេះនឹងផ្ដល់ការផ្គត់ផ្គង់សម្ភារៈចាំបាច់ប្រើប្រាស់ប្រចាំថ្ងៃ ការរៀបចំជម្រកបណ្ដោះអាសន្ន និងការគាំទ្រការអប់រំកុមារជាដើម។

លោកថា៖ «ប្រទេសជប៉ុនសង្ឃឹមយ៉ាងមុតមាំថា ជំនួយនេះនឹងជួយឱ្យជីវភាពរស់នៅប្រកបដោយសន្ដិភាពរបស់ប្រជាពលរដ្ឋតាមតំបន់ព្រំដែនត្រូវបានស្ដារឡើងវិញ ហើយជប៉ុននឹងបន្តកិច្ចសហប្រតិបត្តិការឆ្ពោះទៅរកការបន្ធូរបន្ថាយភាពតានតឹងរវាងកម្ពុជា–ថៃ»។

គិតត្រឹមថ្ងៃទី៤ ខែសីហា មានពលរដ្ឋភៀសសឹកប្រមាណ១២ម៉ឺននាក់ដែលភៀសខ្លួនទៅកាន់មណ្ឌលសុវត្ថិភាព។ កាលពីថ្ងៃទី១៥ ខែសីហា រដ្ឋាភិបាលជប៉ុនបានសម្រេចផ្ដល់ជំនួយសង្គ្រោះបន្ទាន់ឥតសំណងដែលមានទឹកប្រាក់ប្រមាណ ១,៨លានដុល្លារអាមេរិក ខណៈសង្ឃឹមថាសន្ដិភាពនឹងមានឡើងវិញឆាប់រហ័ស ហើយនឹងបន្តខិតខំដើម្បីកាត់បន្ថយការលំបាករបស់អ្នកដែលរងគ្រោះ៕

អត្ថបទដោយ ហ៊ុន សិរីវឌ្ឍន៍

The post ជំនួយមនុស្សធម៌ជប៉ុនជិត២លានដុល្លារនឹងមកដល់កម្ពុជានៅសប្ដាហ៍ក្រោយ appeared first on Kampuchea Thmey Daily.

ឯកអគ្គរាជទូតជប៉ុនថា ការបិទព្រំដែនរវាងកម្ពុជា-ថៃ កំពុងធ្វើឱ្យក្រុមហ៊ុនជប៉ុនជួបការលំបាក

hun sirivadh — Thu, 11 Sep 2025 08:52:27 +0000

ឯកអគ្គរាជទូតជប៉ុនប្រចាំកម្ពុជាលោក អ៊ូអិណុ អាត់ស៊ូស៊ី បានលើកឡើងថា ដោយសារការអូសបន្លាយការបិទព្រំដែនគោករវាងកម្ពុជានិងថៃបានធ្វើឱ្យក្រុមហ៊ុនជប៉ុនកំពុងស្ថិតក្នុងស្ថានភាពលំបាក ហើយការបង្កើតឱកាសការងារថ្មីមិនមែនងាយស្រួលនោះទេក្នុងស្ថានភាពបែបនេះ។

ថ្លែងប្រាប់កម្ពុជាថ្មីព្រឹកថ្ងៃទី១១ ខែកញ្ញា ឆ្នាំ២០២៥ លោក អ៊ូអិណុ អាត់ស៊ូស៊ី បានលើកឡើងថា៖ «ខ្ញុំយល់ថា រាជរដ្ឋាភិបាលកម្ពុជា សង្ឃឹមថាក្រុមហ៊ុនជប៉ុននៅកម្ពុជានឹងផ្ដល់ឱកាសការងារដល់ពលករដែលវិលត្រឡប់មកវិញ។ ប៉ុន្ដែដោយសារតែការបិទព្រំដែនគោកជាមួយប្រទេសថៃមានការអូសបន្លាយ បានធ្វើឱ្យក្រុមហ៊ុនជប៉ុនដែលបាននិងកំពុងវិនិយោគនៅប្រទេសកម្ពុជាតាមរយៈគោលនយោបាយ «ថៃបូក១» កំពុងស្ថិតក្នុងស្ថានភាពលំបាកយ៉ាងខ្លាំង ហើយការពង្រីកឱកាសការងារថ្មីមិនមែនជាកិច្ចការងាយស្រួលនោះទេ»។

មានពលករខ្មែរជាង៨០ម៉ឺននាក់បានវិលត្រលប់មកកម្ពុជាក្រោយមានការបារម្ភពីសុវត្ថិភាពដោយសារការវាយប្រហារពីជនជាតិថៃ ក្រោយមានជម្លោះព្រំដែនជាមួយកម្ពុជា។ ខណៈក្រសួងការងារខិតខំស្វែងរកការងារជូនពលករដែលវិលត្រលប់មកវិញបានជាបន្តបន្ទាប់ផងដែរ។

លោក អ៊ូអិណុ អាត់ស៊ូស៊ី បានបញ្ជាក់ផងដែរថាទន្ទឹមនឹងការវិលត្រលប់មកវិញនេះក្រុមហ៊ុនជប៉ុនមួយចំនួនក៏កំពុងស្វែងរកកម្មករនិយោជិតដោយសង្ឃឹមថាក្រសួងការងារនឹងជួយសម្របសម្រួលដល់ការងារនេះ ខណៈរដ្ឋាភិបាលជប៉ុនក៏នឹងពិចារណាផ្ដល់ការគាំទ្រដល់ការបណ្ដុះបណ្ដាលវិជ្ជាជីវៈដល់ពលករដែលវិលត្រលប់មកវិញ។

លោកថា៖ «បច្ចុប្បន្នយើងកំពុងពិភាក្សាអំពីវិធីសាស្ត្រ និងពេលវេលាជាក់លាក់ជាមួយនិងភាគីពាក់ព័ន្ធផ្សេងទៀត រួមមានក្រសួងការងារ និងបណ្ដុះបណ្ដាលវិជ្ជាជីវៈ ហើយចង់ស្វែងរកពីលទ្ធភាពផ្សេងៗសម្រាប់ការគាំទ្រ រួមទាងកិច្ចសហប្រតិបត្តិការជាមួយអង្គការអន្តរជាតិផងដែរ»។

ក្នុងកិច្ចប្រជុំលើកទី១ របស់គណៈកម្មាធិការព្រំដែនទូទៅ (GBC) កាលពីថ្ងៃទី៧ ដល់ថ្ងៃទី១០ ខែកញ្ញា នៅខេត្តកោះកុង កន្លងទៅ ប្រទេសថៃ និងកម្ពុជា ក៏បានពិភាក្សាលើការបើកព្រំដែនដែលចាំបាច់ដល់ការដឹកទំនិញតាមរយៈការស្នើសុំរបស់ជប៉ុនផងដែរ ខណៈគណៈរដ្ឋមន្ត្រីថៃកាលពីថ្ងៃទី៩ ខែកញ្ញា ក៏បានប្រជុំទាក់ទងនឹងការបើកព្រំដែនឡើងវិញតាមសំណើរបស់ជប៉ុនផងដែរ តែការសម្រេចយ៉ាងណាគឺស្ថិតនៅលើការសម្រេចរបស់គណៈរដ្ឋមន្ត្រីថ្មីរបស់ថៃ។

ប្រទេសថៃបានបិទទ្វារព្រំដែនអន្តរជាតិជាមួយកម្ពុជាទាំងស្រុងដោយឯកតោភាគីចាប់តាំងពីថ្ងៃទី២៤ ខែមិថុនា ឆ្នាំ២០២៥ ជាការឆ្លើយតបកម្ពុជាបានសម្រេចបិទវិញ។ ក្រោយចំណាត់ការរបស់កម្ពុជាថៃបានព្យាយាមឱ្យកម្ពុជាចរចាជាមួយខ្លួនដើម្បីបើក។ នាយករដ្ឋមន្ត្រីកម្ពុជាសម្ដេចធិបតី ហ៊ុន ម៉ាណែត ធ្លាប់មានប្រសាសន៍ថាកូនសោរនៃការបើកទ្វាព្រំដែនឡើងវិញគឺស្ថិតនៅលើថៃ បើបិទដោយខ្លួនឯង សូមបើកវិញដោយខ្លួនឯង កម្ពុជានឹងឆ្លើយតបតាមក្រោយ៕

អត្ថបទដោយ ហ៊ុន សិរីវឌ្ឍន៍

The post ឯកអគ្គរាជទូតជប៉ុនថា ការបិទព្រំដែនរវាងកម្ពុជា-ថៃ កំពុងធ្វើឱ្យក្រុមហ៊ុនជប៉ុនជួបការលំបាក appeared first on Kampuchea Thmey Daily.

ខ្មែរនៅជប៉ុនជាង ២០០នាក់ រៀបចំការគោរពវិញ្ញាណក្ខន្ធ និងបង្សុកូលឧទ្ទិសកុសលជូនដល់វីវៈកងទ័ពពលីនៅសមរភូមិមុខ

កម្ពុជាថ្មី — Sun, 24 Aug 2025 14:01:39 +0000

(ជប៉ុន)៖ នៅថ្ងៃទី២៤ ខែសីហា ឆ្នាំ២០២៥ ស្ថានទូតខ្មែរនៅប្រទេសជប៉ុន ក្រុមការងារ ESEA ទទួលបន្ទុក ប្រទេសជប៉ុន និងសហគមន៍ខ្មែរនៅជប៉ុនប្រមាណ២០០នាក់ បានរៀបចំកម្មវិធីគោរពវិញ្ញាណក្ខន្ធ និងបង្សុកូលឧទ្ទិសកុសលជូនដល់វីវៈកងទ័ពពលីនៅសមរភូមិមុខ នៅវត្តបិតាធំ ខេត្តកាណាហ្កាវ៉ា នៃប្រទេសជប៉ុន ដោយមានការចូលរួមពីបងប្អូនសហគមន៍ខ្មែរ និស្សិត និងពលករសរុបប្រមាណ ២០០នាក់។

កម្មវិធីនេះមានពិធីសាសនាដូចជាការប្រគេនយាគូព្រះសង្ឃ រាប់បាត្រ វេរចង្ហាន់ប្រគេនព្រះសង្ឃ និងបង្សុកូលឧទ្ទិសកុសល ដោយបាននិមន្តព្រះសង្ឃពីវត្តខ្មែរ សាមគ្គី វត្តខ្មែរអង្គររតនរង្សី និងព្រះសង្ឃគង់នៅវត្តបិតាធំ សរុប ៥អង្គ។ បន្ទាប់ពីពិធីសាសនា ក៏មានការហែក្បួនគោរពវិញ្ញាណក្ខន្ធវីរៈកងទ័ព ដោយបានលើកបដារំលឹកគុណកងទ័ព និងច្រៀងចម្រៀងលើកទឹកចិត្តវីរៈកងទ័ពផងដែរ៕

The post ខ្មែរនៅជប៉ុនជាង ២០០នាក់ រៀបចំការគោរពវិញ្ញាណក្ខន្ធ និងបង្សុកូលឧទ្ទិសកុសលជូនដល់វីវៈកងទ័ពពលីនៅសមរភូមិមុខ appeared first on Kampuchea Thmey Daily.

ជប៉ុន-កម្ពុជា Archives - Kampuchea Thmey Daily

ស្ថានទូត​ជប៉ុន​ជំរុញ​អ្នក​វិនិយោគ​មក​កាន់​កម្ពុជា​

ជប៉ុនប្តេជ្ញាសហការគាំទ្រកម្ពុជាអភិវឌ្ឍវិស័យទេសចរណ៍

ជប៉ុនផ្តល់ហិរញ្ញប្បទានឥតសំណង ១១លានដុល្លារដល់កម្ពុជាសម្រាប់បោសសម្អាតមីនក្នុងខេត្តចំនួន៣

ជប៉ុនសន្យាខំប្រឹងជំរុញការអនុវត្តកិច្ចព្រមព្រៀងសន្តិភាពកម្ពុជា-ថៃឱ្យបានពេញលេញ បន្ថយភាពតានតឹង

ជំនួយមនុស្សធម៌ជប៉ុនជិត២លានដុល្លារនឹង​មកដល់កម្ពុជានៅសប្ដាហ៍​ក្រោយ

ឯកអគ្គរាជទូត​ជប៉ុនថា ការបិទព្រំដែនរវាង​កម្ពុជា-ថៃ កំពុងធ្វើឱ្យក្រុម​ហ៊ុន​ជប៉ុន​​ជួប​ការ​លំបាក

ខ្មែរនៅជប៉ុនជាង ២០០នាក់ រៀបចំការគោរពវិញ្ញាណក្ខន្ធ និងបង្សុកូលឧទ្ទិសកុសលជូនដល់វីវៈកងទ័ពពលីនៅសមរភូមិមុខ

ស្ថានទូតជប៉ុនជំរុញអ្នកវិនិយោគមកកាន់កម្ពុជា

ជំនួយមនុស្សធម៌ជប៉ុនជិត២លានដុល្លារនឹងមកដល់កម្ពុជានៅសប្ដាហ៍ក្រោយ

ឯកអគ្គរាជទូតជប៉ុនថា ការបិទព្រំដែនរវាងកម្ពុជា-ថៃ កំពុងធ្វើឱ្យក្រុមហ៊ុនជប៉ុនជួបការលំបាក