ជប៉ុន Archives - Kampuchea Thmey Daily

ព្យុះទីហ្វុង Bavi ដ៏មានឥទ្ធិពល សំដៅទៅជប៉ុន និង តៃវ៉ាន់ ខណៈអាជ្ញាធរ ព្រមានពីគ្រោះថ្នាក់

Minea Neu — Fri, 10 Jul 2026 05:14:19 +0000

ព្យុះទីហ្វុងដ៏ធំនិងមានកម្លាំងបំផ្លិចបំផ្លាញខ្លាំង បានវាយប្រហារមកលើកោះដាច់ស្រយាលមួយភាគនិរតីនៃប្រទេសជប៉ុន នៅថ្ងៃសុក្រនេះ ទាញការព្រមានពីអាជ្ញាធរ អំពីខ្យល់បោកបក់ ភ្លៀងធ្លាក់ខ្លាំង ការបាក់ដី និងទឹកជំនន់ ហើយ វាក៏អាចជាព្យុះបំផ្លិចបំផ្លាញបំផុតក្នុងតំបន់ក្នុងរយៈពេលជាច្រើនឆ្នាំ។ នេះបើយោងតាមទីភ្នាក់ងារសារព័ត៌មានរ៉យទ័រ នៅថ្ងៃទី១០ ខែកក្កដា ឆ្នាំ២០២៦ ។

រូបភាពផ្កាយរណបបង្ហាញពីព្យុះទីហ្វុងបាវី ពេលកំពុងបោកបក់ក្នុងមហាសមុទ្រប៉ាស៊ីហ្វិកកាលពីថ្ងៃទី ៩ ខែកក្កដា ឆ្នាំ២០២៦។ រូបភាព៖ Reuters

នៅព្រឹកថ្ងៃសុក្រ ព្យុះទីហ្វុង Bavi បានខិតជិតកោះ Sakishima របស់ប្រទេសជប៉ុន ដែលជាកោះដាច់ស្រយាលមួយនៅជិតតៃវ៉ាន់ ជាមួយនឹងល្បឿនខ្យល់អតិបរមា ១៦២គីឡូម៉ែត្រក្នុងមួយម៉ោង ជំរុញឱ្យប្រជាជនក្នុងតំបន់បិទបង្អួច និងបិទសំណាញ់ការពារខ្យល់នៅតាមផ្ទះ និងហាងនានា។

មិនតែប៉ុណ្ណោះ ក្រុមហ៊ុនអាកាសចរណ៍ បានលុបចោលជើងហោះហើររាប់សិបជើង នៅក្នុងតំបន់ រួមទាំងសម្រាប់ថ្ងៃសៅរ៍ផងដែរ។

ព្យុះទីហ្វុង Bavi មិនត្រឹមតែរំពឹងថានឹងបោកបក់មកដល់កោះតៃវ៉ាន់ទេ ប៉ុន្តែនឹងបង្កឱ្យមានភ្លៀងធ្លាក់ច្រើននៅលើកោះនេះ។ តំបន់ខ្លះអាចនឹងមានភ្លៀងធ្លាក់រហូតដល់មួយម៉ែត្រ ដោយចាប់ផ្តើមនៅសុក្រ។

រដ្ឋាភិបាលនិយាយថា មនុស្សជាង ១ ០០០ នាក់ ត្រូវបានជម្លៀសចេញ ភាគច្រើនមកពីឆ្នេរសមុទ្រភាគខាងកើតដែលមានភ្នំ ហើយយោធាជិត ២៩ ០០០ នាក់ កំពុងត្រៀមខ្លួនដើម្បីជួយសង្គ្រោះ។

ប្រធានាធិបតីតៃវ៉ាន់ លោក Lai Ching-te សរសេរលើបណ្តាញសង្គមហ្វេសប៊ុក ថា៖ « ទោះបីជាព្យុះទីហ្វុងនេះបានចុះខ្សោយបន្តិច ហើយត្រូវបានបន្ទាបទៅជាព្យុះទីហ្វុងកម្រិតមធ្យមក៏ដោយ កាំព្យុះរបស់វាមានទំហំធំ ហើយនៅតែអាចនាំមកនូវខ្យល់បក់ខ្លាំង និងភ្លៀងធ្លាក់ខ្លាំងដល់តំបន់ជាច្រើន»។

គួរបញ្ជាក់ថា ក្រុមហ៊ុនអាកាសចរណ៍តៃវ៉ាន់បានលុបចោលជើងហោះហើរទាំងអស់៕

The post ព្យុះទីហ្វុង Bavi ដ៏មានឥទ្ធិពល សំដៅទៅជប៉ុន និង តៃវ៉ាន់ ខណៈអាជ្ញាធរ ព្រមានពីគ្រោះថ្នាក់ appeared first on Kampuchea Thmey Daily.

ចិនបាញ់សាកល្បងមីស៊ីលពីនាវាមុជទឹក នៅមហាសមុទ្រប៉ាស៊ីហ្វិក ទាញការរិះគន់ពីជប៉ុន អូស្រ្តាលី និងនូវែលសេឡង់

Minea Neu — Mon, 06 Jul 2026 12:41:00 +0000

ប្រព័ន្ធផ្សព្វផ្សាយចិនរាយការណ៍ថា យោធាចិនបានបាញ់សាកល្បងមីស៊ីលមួយគ្រាប់ពីនាវាមុជទឹកនុយក្លេអ៊ែរចូលទៅក្នុងមហាសមុទ្រប៉ាស៊ីហ្វិកនៅថ្ងៃចន្ទ នេះ ទាញការរិះគន់និងព្រួយបារម្ភពីប្រទេសជប៉ុន អូស្ត្រាលី និងនូវែលសេឡង់។ នេះបើតាមទីភ្នាក់ងាររ៉យទ័រ ផ្សាយនៅថ្ងៃទី៦ ខែកក្តដា ឆ្នាំ២០២៦ ។

ទីភ្នាក់ងារសារព័ត៌មាន Xinhua news លើកឡើងថា នាវាមុជទឹកនុយក្លេអ៊ែរមួយគ្រឿងរបស់កងទ័ពជើងទឹករំដោះប្រជាជនចិនបានបាញ់មីស៊ីលផ្ទុកក្បាលគ្រាប់សិប្បនិម្មិតឆ្ពោះទៅកាន់ដែនទឹកអន្តរជាតិនៅមហាសមុទ្រប៉ាស៊ីហ្វិកនៅម៉ោង ១២:០១ រសៀល។ មីស៊ីលនេះបានធ្លាក់ចូលទៅក្នុងដែនទឹកដែលបានកំណត់ ដោយមិនផ្តល់ព័ត៌មានលម្អិតបន្ថែមអំពីទីតាំងនោះទេ។

មីស៊ីលចិន។ រូបភាព៖ samaa tv

ភ្នាក់ងារសារព័ត៌មាន Xinhua ពណ៌នាអំពីការបាញ់បង្ហោះនេះ ថាជាការរៀបចំជាប្រចាំនៃការហ្វឹកហ្វឺនយោធាប្រចាំឆ្នាំរបស់ចិន ហើយមិនបានដឹកនាំប្រឆាំងនឹងប្រទេស ឬគោលដៅជាក់លាក់ណាមួយឡើយ។

ជុំវិញបញ្ហានេះ រដ្ឋមន្ត្រីការបរទេសអូស្ត្រាលី លោកស្រី Penny Wong និយាយថា ចិនបានជូនដំណឹងដល់រដ្ឋាភិបាលអូស្រ្តាលីពីការសាកល្បងដែលបានគ្រោងទុក ប៉ុន្តែការបាញ់បង្ហោះនេះកំពុងបង្កអស្ថិរភាពក្នុងតំបន់។

លោកស្រី Wong ប្រាប់អ្នកយកព័ត៌មានក្នុងសន្និសីទសារព័ត៌មានមួយនៅរដ្ឋធានី Suva ប្រទេសហ្វីជីថា៖ « អូស្ត្រាលីបានបញ្ជាក់យ៉ាងច្បាស់ថា ការសាកល្បងដែលបានស្នើឡើងនេះគឺស្ថិតក្នុងបរិបទនៃការកសាងសមត្ថភាពយោធាចិនយ៉ាងឆាប់រហ័ស ដែលខ្វះតម្លាភាព និងការធានាពីចេតនាដែលតំបន់នេះរំពឹងទុក»។

ដោយឡែក រដ្ឋាភិបាលជប៉ុនថា ខ្លួនបានទទួលការជូនដំណឹងអំពីការបាញ់បង្ហោះមីស៊ីល ប៉ុន្តែជំរុញឱ្យប្រទេសចិនពិចារណាលើបញ្ហានេះឡើងវិញ។

ទីក្រុងតូក្យូលើកឡើងថា៖ « យើងសម្តែងការព្រួយបារម្ភយ៉ាងខ្លាំង ចំពោះសកម្មភាពកើនឡើងរបស់យោធាចិន»។ ទីភ្នាក់ងារសារព័ត៌មាន Kyodo រាយការណ៍នៅថ្ងៃចន្ទ ដោយដកស្រង់ប្រភពរដ្ឋាភិបាលជប៉ុនថា មីស៊ីលបានធ្លាក់នៅខាងក្រៅតំបន់សេដ្ឋកិច្ចផ្តាច់មុខរបស់ជប៉ុន។

ដោយឡែក រដ្ឋមន្ត្រីការបរទេសនូវែលសេឡង់ លោក Winston Peters ថា ប្រទេសខ្លួនមានការព្រួយបារម្ភយ៉ាងខ្លាំង ចំពោះការបាញ់សាកល្បងនេះ ហើយប្រទេសលោកត្រូវបានជូនដំណឹងពីប្រទេសចិន តែប៉ុន្មានម៉ោងនៃការបាញ់បង្ហោះប៉ុណ្ណោះ។

លោក Peters និយាយថា៖ « នូវែលសេឡង់ចាត់ទុករឿងនេះ ជាការអភិវឌ្ឍដែលមិនគួរឱ្យស្វាគមន៍ និងគួរឱ្យព្រួយបារម្ភ។ យើង ដូចជាប្រទេសជិតខាងក្នុងប្រទេសប៉ាស៊ីហ្វិកដទៃទៀត មិនមានចំណាប់អារម្មណ៍ ចំពោះប្រទេសចិនក្នុងការប្រើប្រាស់តំបន់ប៉ាស៊ីហ្វិកខាងត្បូងជាកន្លែងសាកល្បងសមត្ថភាពមីស៊ីលនោះទេ»។

លោក Peters រាប់រៀបក្នុងសេចក្តីថ្លែងការណ៍មួយថា៖ « ប្រទេសចិនបានសាកល្បងមីស៊ីលផ្លោងអន្តរទ្វីបចុងក្រោយនៅឆ្នាំ២០២៤ ជាការបាញ់បង្ហោះដ៏កម្រមួយ បង្ហាញពីសមត្ថភាពយោធាដែលកំពុងកើនឡើងរបស់ប្រទេសនេះ»៕

សម្រួល៖ ណឺ មិនា

The post ចិនបាញ់សាកល្បងមីស៊ីលពីនាវាមុជទឹក នៅមហាសមុទ្រប៉ាស៊ីហ្វិក ទាញការរិះគន់ពីជប៉ុន អូស្រ្តាលី និងនូវែលសេឡង់ appeared first on Kampuchea Thmey Daily.

កូរ៉េខាងជើង ថ្កោលទោស ចំពោះសមយុទ្ធរួមគ្នារបស់អាមេរិក និងជប៉ុន

Minea Neu — Mon, 29 Jun 2026 13:30:00 +0000

កូរ៉េខាងជើង បានថ្កោលទោស ការធ្វើសមយុទ្ធយោធារួមគ្នា រវាងសហរដ្ឋអាមេរិក និងជប៉ុននៅថ្ងៃចន្ទនេះ ដោយ ចោទប្រកាន់ទីក្រុងតូក្យូថា បានប្រើប្រាស់ស្ថានភាពពិភពលោកដ៏ច្របូកច្របល់ ដើម្បីបង្ហាញអំពីភាពត្រឹមត្រូវនៃការផ្លាស់ប្តូរយុទ្ធសាស្រ្តយោធារបស់ខ្លួនទៅជាប្រទេសសង្គ្រាម។ នេះបើយោងតាមប្រព័ន្ធផ្សព្វផ្សាយរដ្ឋ KCNA ផ្សាយនៅថ្ងៃទី២៩ ខែមិថុនា ឆ្នាំ២០២៦ ។

យោធាជប៉ុនកំពុងធ្វើសមយុទ្ធ។ រូបភាព៖ Reuters

កូរ៉េខាងជើងបានរិះគន់ប្រទេសជប៉ុន ចំពោះការចូលរួមក្នុងសមយុទ្ធ Resolute Dragon ដោយចោទប្រកាន់ប្រទេសជប៉ុនថា៖ « បានបង្កើនសមត្ថភាពឈ្លានពាន»។ ក្នុងអត្ថបទវិចារណកថាមួយ ចុះផ្សាយដោយទីភ្នាក់ងារសារព័ត៌មានកណ្តាលកូរ៉េ (KCNA)។

កូរ៉េខាងជើងបន្តទៀតថា ជប៉ុនបានធ្វើឱ្យស្ថានការណ៍សន្តិសុខនៅក្នុងតំបន់កាន់តែធ្ងន់ធ្ងរឡើង ដោយពង្រឹងទំនាក់ទំនងយោធារបស់ខ្លួនជាមួយសហរដ្ឋអាមេរិក។

ទីក្រុងព្យុងយ៉ាងអះអាងបន្ថែមទៀតថា មីស៊ីលរយៈចម្ងាយឆ្ងាយត្រូវបានបាញ់សាកល្បងក្នុងសមត្ថភាពបង្ការដែលមានគោលបំណងវាយប្រហារប្រទេសជិតខាង អំឡុងពេលចូលរួមលើកដំបូងរបស់ប្រទេសជប៉ុន ក្នុងសមយុទ្ធពហុជាតិដឹកនាំដោយសហរដ្ឋអាមេរិក នៅតំបន់អាស៊ីប៉ាស៊ីហ្វិកក្នុងខែមេសា និងឧសភា។

កូរ៉េខាងជើងព្រមានទីក្រុងតូក្យូអំពីទីបញ្ចប់ដ៏សោកសៅ ប្រសិនបើនៅតែបន្តអាកប្បកិរិយាយោធាដោយមិនប្រុងប្រយ័ត្ន។

គួរបញ្ជាក់ថា សមយុទ្ធ Resolute Dragon ពាក់ព័ន្ធនឹងកងកម្លាំងការពារខ្លួនលើដីជប៉ុន និងកងម៉ារីនសហរដ្ឋអាមេរិក បានចាប់ផ្តើមនៅថ្ងៃទី២០ ខែមិថុនា នៅកោះ Okinawa និង Kyushu ដែលជាកោះសំខាន់ៗ នៅភាគនិរតីនៃប្រទេសជប៉ុន ហើយគ្រោងនឹងបញ្ចប់នៅ ថ្ងៃអង្គារ ទី៣០ ខែមិថុនា នេះ ។

សម្រួល៖ ណឺ មិនា

The post កូរ៉េខាងជើង ថ្កោលទោស ចំពោះសមយុទ្ធរួមគ្នារបស់អាមេរិក និងជប៉ុន appeared first on Kampuchea Thmey Daily.

ចិន-រុស្ស៊ី បញ្ជូនយន្តហោះទម្លាក់គ្រាប់បែកនិងយន្តហោះចម្បាំង ល្បាតលើដែនសមុទ្រជប៉ុន នៅសមុទ្រចិនខាងកើត

Minea Neu — Sun, 28 Jun 2026 08:36:35 +0000

ប្រទេសចិន និងរុស្ស៊ីបានបញ្ជូនយន្តហោះទម្លាក់គ្រាប់បែក និងយន្តហោះចម្បាំងសម្រាប់ល្បាតផ្លូវអាកាសយុទ្ធសាស្ត្ររួមគ្នាក្នុងដែនអាកាសសមុទ្រជប៉ុន នៅឯសមុទ្រចិនខាងកើតនិងតំបន់ប៉ាស៊ីហ្វិកខាងលិចកាលពីថ្ងៃសៅរ៍។ នេះបើយោងតាមក្រសួងការពារជាតិរបស់ទីក្រុងប៉េកាំង និងចុះផ្សាយដោយសារព័ត៌មាន The Japan Times នៅថ្ងៃទី២៨ ខែមិថុនា ឆ្នាំ២០២៦ ។

ក្រសួងការពារជាតិចិននិយាយថា៖ « ការល្បាតរយៈចម្ងាយឆ្ងាយលើកទី១១ រវាងកងកម្លាំងអាកាសទាំងពីរ បានបង្ហាញពីការតាំងចិត្ត និងសមត្ថភាពក្នុងការរួមគ្នាការពារសន្តិភាព និងស្ថិរភាពក្នុងតំបន់»។

យន្តហោះចម្បាំងនិងទម្លាក់គ្រាប់បែករបស់ចិន។ រូបភាព៖ Reuters

ដោយឡែក ក្រសួងការពារជាតិជប៉ុនលើកឡើងថា ខ្លួនបានបញ្ជូនយន្តហោះចម្បាំងជាច្រើនគ្រឿងជាការឆ្លើយតប ដោយបន្ថែមថា ជប៉ុនបានតាមដានចលនារបស់យន្តហោះចិននិងរុស្ស៊ី រួមទាំងយន្តហោះទម្លាក់គ្រាប់បែក H-6 របស់ចិនចំនួន ៤គ្រឿង និងយន្តហោះទម្លាក់គ្រាប់បែក Tu-95 របស់រុស្ស៊ីចំនួន ២គ្រឿង ចាប់ពីព្រឹកថ្ងៃសៅរ៍ រហូតដល់រសៀល។ ការហោះហើរនេះក៏ពាក់ព័ន្ធនឹងយន្តហោះល្បាត Tu-142 របស់រុស្ស៊ីចំនួន ២គ្រឿង យន្តហោះចម្បាំង J-16 របស់ចិនចំនួន២គ្រឿង និងយន្តហោះចម្បាំង Su-30 របស់រុស្ស៊ីមួយគ្រឿងផងដែរ។

យ៉ាងណាមិញ ផែនទីនៃផ្លូវហោះហើររបស់យន្តហោះដែលភ្ជាប់មកជាមួយសេចក្តីថ្លែងការណ៍របស់ក្រសួងការពារជាតិចិនបានបង្ហាញថា យន្តហោះទម្លាក់គ្រាប់បែកមួយចំនួន បានហោះហើរឆ្លងកាត់ច្រកសមុទ្រ Miyako ជិតខេត្ត Okinawa ប្រទេសជប៉ុន និងចូលទៅក្នុងមហាសមុទ្រប៉ាស៊ីហ្វិកភាគខាងលិចនៅភាគខាងត្បូងតំបន់ Shikoku មុនពេលវិលត្រឡប់មកវិញ។

មិនតែប៉ុណ្ណោះ កងទ័ពអាកាសកូរ៉េខាងត្បូងក៏បានបាញ់យន្តហោះចម្បាំងរបស់ខ្លួនឡើងលើអាកាសយ៉ាងឆាប់រហ័ស ដើម្បីឆ្លើយតបទៅនឹងការគំរាមកំហែងដែលអាចកើតមាន បន្ទាប់ពីយន្តហោះរបស់យោធាចិននិងរុស្ស៊ីជាង ១០គ្រឿងបានចូលទៅក្នុងតំបន់ដែលកំណត់ថាជាអត្តសញ្ញាណដែនអាកាសកូរ៉េខាងត្បូងនៅថ្ងៃដដែល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Yonhap ។

យ៉ាងណា យន្តហោះចិន និងរុស្ស៊ីមិនបានរំលោភលើដែនអាកាសកូរ៉េខាងត្បូងទេ។

គួរបញ្ជាក់ថា ប្រទេសចិននិងរុស្ស៊ីក៏បានធ្វើការល្បាតចម្ងាយឆ្ងាយពាក់ព័ន្ធនឹងយន្តហោះទម្លាក់គ្រាប់បែក និងយន្តហោះចម្បាំងកាលពីខែធ្នូ ម្តងរួចមកហើយ ដោយរដ្ឋមន្ត្រីក្រសួងការពារជាតិជប៉ុន លោក Shinjiro Koizumi ហៅថាជាការហោះហើរយន្តហោះទម្លាក់គ្រាប់បែករួមគ្នាម្តងហើយម្តងទៀតនិងជាការពង្រីក និងពង្រឹងសកម្មភាពជុំវិញប្រទេសជប៉ុន។

លោក បន្ថែមថា៖ « សកម្មភាពទាំងនេះតំណាងឱ្យការបង្ហាញកម្លាំងប្រឆាំងនឹងប្រទេសជប៉ុនយ៉ាងច្បាស់។ នេះគឺជាក្តីបារម្ភផ្នែកសន្តិសុខធ្ងន់ធ្ងរសម្រាប់ប្រទេសរបស់យើង»៕

សម្រួល៖ ណឺ មិនា

The post ចិន-រុស្ស៊ី បញ្ជូនយន្តហោះទម្លាក់គ្រាប់បែកនិងយន្តហោះចម្បាំង ល្បាតលើដែនសមុទ្រជប៉ុន នៅសមុទ្រចិនខាងកើត appeared first on Kampuchea Thmey Daily.

ជប៉ុន-កូរ៉េខាងត្បូង ប្តេជ្ញារំសាយអាវុធនុយក្លេអ៊ែរនៅឧបទ្វីបកូរ៉េ និងសន្យាធ្វើសមយុទ្ធរួមគ្នាឡើងវិញ

Minea Neu — Sun, 28 Jun 2026 06:28:32 +0000

ខណៈជម្លោះភូមិសាស្រ្ត និងប្រដាប់អាវុធជុំវិញពិភពលោកមិនបានធូរស្បើយនៅឡើយនោះទេ ពីមួយថ្ងៃទៅមួយថ្ងៃ ការណ៍នេះ កូរ៉េខាងត្បូងនិងជប៉ុន កាលពីថ្ងៃអាទិត្យ បានបញ្ជាក់ជាថ្មីនូវការប្តេជ្ញាចិត្តរវាងប្រទេសទាំងពីរ ចំពោះការរំសាយអាវុធនុយក្លេអ៊ែរនៅឧបទ្វីបកូរ៉េ ហើយបានព្រមព្រៀងលើសមយុទ្ធស្វែងរកនិងជួយសង្គ្រោះរួមគ្នាធ្វើយ៉ាងណាឱ្យសកម្មឡើងវិញ ដែលជាជំហានមួយឆ្ពោះទៅមុខសម្រាប់ចំណងមិត្តភាពសន្តិសុខរវាងប្រទេសជិតខាង។

លោក Ahn Gyu-back និង លោក Shinjiro Koizumi ។ រូបភាព៖ Yanhap News

ភ្នាក់ងារសារព័ត៌មាន Reuters ផ្សាយនៅថ្ងៃទី២៨ ខែមិថុនា ឆ្នាំ២០២៦ ក្នុងជំនួបនៅទីក្រុងសេអ៊ូល រដ្ឋមន្ត្រីក្រសួងការពារជាតិកូរ៉េខាងត្បូង លោក Ahn Gyu-back និងសមភាគីជប៉ុន លោក Shinjiro Koizumi បានព្រមព្រៀងគ្នាធ្វើការលើស្ថិរភាពក្នុងតំបន់ទ្វេភាគី ក៏ដូចជាតាមរយៈភាពជាដៃគូជាមួយទីក្រុងវ៉ាស៊ីនតោនក្នុងកិច្ចចរចាជុំទី៦ រវាងប្រទេសទាំងពីរ។

ក្រសួងការពារជាតិកូរ៉េខាងត្បូងលើកឡើងក្នុងសេចក្តីថ្លែងការណ៍មួយថា៖ « រដ្ឋមន្ត្រីទាំងពីរបានចែករំលែកទស្សនៈក្នុងការបន្តកិច្ចសហប្រតិបត្តិការដើម្បីរក្សាសន្តិភាព និងស្ថិរភាពក្នុងតំបន់ក្នុងចំណោមបរិយាកាសសន្តិសុខដ៏តានតឹង»។

ដោយមានការលើកទឹកចិត្តពីសហរដ្ឋអាមេរិក កូរ៉េខាងត្បូង និងជប៉ុន បានខិតខំអភិវឌ្ឍទំនាក់ទំនងកាន់តែជិតស្និទ្ធចាប់តាំងពីឆ្នាំ២០២២ និងយកឈ្នះលើភាពខុសគ្នាខាងប្រវត្តិសាស្ត្រដ៏ជូរចត់ ដែលជាគោលនយោបាយកំពុងបន្តដោយប្រធានាធិបតីកូរ៉េ លោក Lee Jae Myung និងនាយករដ្ឋមន្ត្រីជប៉ុន លោកស្រី Sanae Takaichi ។

នៅឆ្នាំ ២០១៩ ទីក្រុងសេអ៊ូលបានផ្លាស់ប្តូរទៅបញ្ចប់កតិកាសញ្ញាចែករំលែកព័ត៌មានស៊ើបការណ៍សម្ងាត់ GSOMIA ជាមួយជប៉ុន បន្ទាប់ពីទីក្រុងតូក្យូបានរឹតត្បិតការនាំចេញសម្ភារៈអេឡិចត្រូនិក និងដកកូរ៉េខាងត្បូងចេញពីបញ្ជីពាណិជ្ជកម្មអនុគ្រោះរបស់ខ្លួន ដោយសារតែការបន្លាយដោយអាណានិគមរបស់ជប៉ុនកន្លងមកលើឧបទ្វីបកូរ៉េ។

នៅថ្ងៃអាទិត្យ លោក Ahn និង លោក Koizumi ក៏បានយល់ព្រមបន្តជំរុញការផ្លាស់ប្តូររវាងក្រុមហោះហើរតាមអាកាសរៀងខ្លួនរបស់កងទ័ពអាកាសទាំងពីរ គឺក្រុម Black Eagles របស់កូរ៉េខាងត្បូង និងក្រុម Blue Impulse របស់ជប៉ុន ដើម្បីជំរុញលើសមយុទ្ធស្វែងរក និងជួយសង្គ្រោះបន្ថែមទៀត សម្រាប់សេណារីយ៉ូគ្រោះថ្នាក់តាមសមុទ្រ។

គួរបញ្ជាក់ថា ភាគីទាំងពីរក៏បានយល់ព្រមធ្វើសមយុទ្ធស្វែងរក និងជួយសង្គ្រោះរួមគ្នានៅខែមិថុនា ជាលើកដំបូងក្នុងរយៈពេលជិតមួយទសវត្សរ៍៕

សម្រួល៖ ណឺ មិនា

The post ជប៉ុន-កូរ៉េខាងត្បូង ប្តេជ្ញារំសាយអាវុធនុយក្លេអ៊ែរនៅឧបទ្វីបកូរ៉េ និងសន្យាធ្វើសមយុទ្ធរួមគ្នាឡើងវិញ appeared first on Kampuchea Thmey Daily.

ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន

Minea Neu — Tue, 23 Jun 2026 12:52:00 +0000

ប្រទេសចិន បានលើកឡើងថា ខ្លួនប្រឆាំងយ៉ាងម៉ឺងម៉ាត់ ចំពោះការដាក់ពង្រាយប្រព័ន្ធមីស៊ីលរយៈចម្ងាយមធ្យមរបស់សហរដ្ឋអាមេរិក នៅក្នុងប្រទេសអាស៊ី បន្ទាប់ពីមានរបាយការណ៍ថា យោធាសហរដ្ឋអាមេរិកមានគម្រោងដាក់ពង្រាយប្រព័ន្ធមីស៊ីល Typhon នៅឯមូលដ្ឋានទ័ពអាកាស Kanoya ក្នុងខេត្ត Kagoshima ប្រទេសជប៉ុន សម្រាប់សមយុទ្ធរួមគ្នារវាងសហរដ្ឋអាមេរិក និងជប៉ុន ចាប់ពីខែមិថុនាដល់ខែកញ្ញា។ នេះបើយោងតាមសារព័ត៌មាន China Daily ផ្សាយថ្ងៃទី២២ ខែមិថុនា ឆ្នាំ២០២៦ ។

អ្នកនាំពាក្យក្រសួងការបរទេសចិន លោក Guo Jiakun និយាយថា ប្រទេសចិនបានកត់សម្គាល់របាយការណ៍ពាក់ព័ន្ធ និងព្រួយបារម្ភម្តងហើយម្តងទៀតលើបញ្ហានៃការដាក់ពង្រាយនេះ។

លោក Guo Jiakun អ្នកនាំពាក្យក្រសួងការបរទេសចិន ។ រូបភាព៖ Reuters

លោក Guo និយាយក្នុងសន្និសីទសារព័ត៌មានប្រចាំថ្ងៃថា៖ « ប្រព័ន្ធមីស៊ីល Typhon គឺជាអាវុធវាយលុកជាយុទ្ធសាស្ត្រដែលធ្វើឱ្យប៉ះពាល់ដល់ផលប្រយោជន៍សន្តិសុខស្របច្បាប់របស់ប្រទេសដទៃ គំរាមកំហែងដល់សន្តិសុខជាយុទ្ធសាស្ត្រក្នុងតំបន់ បង្កើនហានិភ័យនៃការប្រឈមមុខដាក់គ្នាខាងយោធា និងការប្រណាំងប្រជែងសព្វាវុធ»។

លោកបន្ថែមថា៖ « ចលនាបែបនេះនឹងមិននាំមកនូវអ្វីក្រៅពីគ្រោះថ្នាក់ដល់សន្តិភាព និងស្ថិរភាពក្នុងតំបន់ឡើយ។ ប្រជាជននៅក្នុងប្រទេសអាស៊ីជាច្រើន រួមទាំងប្រទេសជប៉ុនផងដែរ បានសម្តែងការប្រឆាំងជាយូរមកហើយ ចំពោះការដាក់ពង្រាយបែបនេះ»។

លោក មានប្រសាសន៍ថា ចិនជំរុញឱ្យសហរដ្ឋអាមេរិក និងជប៉ុនយកចិត្តទុកដាក់ ចំពោះក្តីបារម្ភរបស់ប្រទេសក្នុងតំបន់ កែតម្រូវទិសដៅរបស់ពួកគេ និងចាត់វិធានការជាក់ស្តែងដែលរួមចំណែកជាវិជ្ជមានដល់សន្តិភាព និងស្ថិរភាពក្នុងតំបន់។

លោក Guo សង្កត់ធ្ងន់ថា ការដាក់ពង្រាយដែលបានគ្រោងទុកក៏ជាភស្តុតាងបន្ថែមទៀតនៃការបង្កើនល្បឿនយោធារបស់ជប៉ុនផងដែរ។

លោក ថា៖ « សញ្ញាផ្សេងៗបង្ហាញថា កងកម្លាំងស្តាំនិយមជប៉ុនកំពុងស្វែងរកការរៀបចំរចនាសម្ព័ន្ធឡើងវិញជារួមនៃសមត្ថភាពយោធារបស់ជប៉ុន និងការត្រៀមខ្លួនសម្រាប់សង្គ្រាមរយៈពេលវែង»។

លោក Guo បន្ថែមថា៖ « ជារួម ចលនាបែបនេះធ្វើឱ្យខូចដល់ការរឹតត្បិតដែលដាក់ដោយរដ្ឋធម្មនុញ្ញជប៉ុន ច្បាប់ និងបទប្បញ្ញត្តិអន្តរជាតិ និងក្នុងស្រុក ប្រឈមនឹងសណ្តាប់ធ្នាប់អន្តរជាតិក្រោយសង្គ្រាម និងផ្ទុយនឹងរូបភាពដែលជប៉ុនប្រកាសដោយខ្លួនឯងថាជាប្រទេសសន្តិភាព»។

ប្រទេសចិន ទទូចបន្ថែមថា យោធានិយមថ្មីរបស់ជប៉ុនកំពុងក្លាយជាប្រភពនៃគ្រោះថ្នាក់កាន់តែខ្លាំងឡើង ហើយអាចក្លាយជាមូលហេតុចម្បងនៃភាពចលាចលក្នុងតំបន់ម្តងទៀត ដោយជំរុញឱ្យសហគមន៍អន្តរជាតិទាញយកមេរៀនពីប្រវត្តិសាស្ត្រ រក្សាការប្រុងប្រយ័ត្នខ្ពស់ និងធ្វើការរួមគ្នា ដើម្បីទប់ស្កាត់៕

សម្រួល៖ ណឺ មិនា

The post ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន appeared first on Kampuchea Thmey Daily.

ប្រព័ន្ធមីស៊ីលអាមេរិក Typhon នឹងត្រូវដាក់ពង្រាយនៅជប៉ុន សម្រាប់លំហាត់សមយុទ្ធ រួចតម្កល់នៅទីនោះ

Minea Neu — Mon, 22 Jun 2026 02:57:41 +0000

យោធាសហរដ្ឋអាមេរិក គ្រោងនឹងដាក់ពង្រាយប្រព័ន្ធមីស៊ីលរយៈចម្ងាយមធ្យម Typhon ដ៏មានអានុភាពរបស់ទីក្រុងវ៉ាស៊ីនតោនទៅកាន់ខេត្ត Kagoshima ប្រទេសជប៉ុន សម្រាប់សមយុទ្ធរួមគ្នាជាមួយកងកម្លាំងការពារខ្លួន ចាប់ពីថ្ងៃចន្ទ នេះ។

សារព័ត៌មាន The Japan Times ផ្សាយថ្ងៃទី២១ ខែមិថុនា ឆ្នាំ២០២៦ ការដាក់ពង្រាយប្រព័ន្ធមីស៊ីល Typhon មានមូលដ្ឋាននៅលើដីគោក ត្រូវបានគេមើលឃើញថា ជាផ្នែកមួយនៃវិធីសាស្រ្តចងសម្ព័ន្ធមិត្តឲ្យរឹងមាំជាងមុន ដោយរួមគ្នាទប់ទល់នឹងការអះអាងផ្នែកយោធាកាន់តែខ្លាំងឡើងរបស់ប្រទេសចិន នៅក្នុងតំបន់។

ប្រព័ន្ធមីស៊ីលរយៈចម្ងាយមធ្យម Typhon របស់អាមេរិក។ រូបភាព៖ Reuters

ប្រព័ន្ធមីស៊ីលនេះ អាចបាញ់មីស៊ីលបញ្ជា Tomahawk បានចម្ងាយរហូតដល់ ១ ៦០០គីឡូម៉ែត្រ ដែលអាចវាយទៅដល់គោលដៅ ដែលជាផ្នែកខ្លះរបស់ប្រទេសចិន។ កងទ័ពប្រទេសទាំងពីរនឹងចូលរួមក្នុងសមយុទ្ធ ដែលមានឈ្មោះថា «Valiant Shield» ពីមូលដ្ឋានទ័ពអាកាស Kanoya របស់កងកម្លាំងស្វ័យការពាររបស់ជប៉ុន តាមសមុទ្រក្នុងខេត្ត Kagoshima ។ សមយុទ្ធនេះនឹងដំណើរការរហូតដល់ថ្ងៃទី០១ ខែកក្កដា ឆ្នាំ២០២៦ ។

ប្រព័ន្ធនេះគ្រោងនឹងប្រើប្រាស់ អំឡុងពេលសមយុទ្ធរួមគ្នា Orient Shield ក្នុងខែកញ្ញា ហើយគ្រោងនឹងផ្លាស់ទីទៅកាន់មូលដ្ឋានយោធាសហរដ្ឋអាមេរិកក្នុងប្រទេសជប៉ុន ចាប់ពីពាក់កណ្តាលខែតុលា។ នេះបើយោងតាមរដ្ឋមន្ត្រីក្រសួងការពារជាតិជប៉ុន លោក Shinjiro Koizumi ។

លោក Koizumi ប្រាប់សន្និសីទសារព័ត៌មានមួយកាលពីថ្ងៃសុក្រសប្តាហ៍មុនថា៖ « ខ្ញុំជឿជាក់ថា ការដាក់ពង្រាយសម្ភារៈយោធាបែបនេះជាបណ្តោះអាសន្នទៅកាន់កន្លែងកងកម្លាំងស្វ័យការពាររបស់ជប៉ុន និងការបណ្តុះបណ្តាលរួមគ្នាម្តងហើយម្តងទៀត នឹងមិនត្រឹមតែបង្កើនសមត្ថភាពដាក់ពង្រាយយ៉ាងឆាប់រហ័សរបស់យោធាអាមេរិកប៉ុណ្ណោះទេ ប៉ុន្តែថែមទាំងធ្វើឱ្យការឆ្លើយតបកាន់តែប្រសើរឡើង និងអន្តរប្រតិបត្តិការរវាងជប៉ុននិងអាមេរិកផងដែរ។ គំនិតផ្តួចផ្តើមនេះ គឺជាការដាក់ពង្រាយបណ្តោះអាសន្នសម្រាប់ការហ្វឹកហាត់»។

លោកនិយាយអំពីផែនការដើម្បីផ្លាស់ទីប្រព័ន្ធនេះទៅកាន់មូលដ្ឋានសហរដ្ឋអាមេរិកនៅក្នុងប្រទេស បន្ទាប់ពីសមយុទ្ធបានបញ្ចប់ ដោយលើកឡើងថា៖ « យើងត្រូវបានជូនដំណឹងដោយភាគីសហរដ្ឋអាមេរិកថា ប្រព័ន្ធការពារមីស៊ីលមិនមែនជាការដាក់ពង្រាយអចិន្ត្រៃយ៍ទៅកាន់ប្រទេសជប៉ុនទេ»។

គួរបញ្ជាក់ថា ការដាក់ពង្រាយនេះនឹងជាលើកទីពីរហើយសម្រាប់ជប៉ុន បន្ទាប់ពីអាមេរិកបានបញ្ជូនប្រព័ន្ធ Typhon ទៅកាន់ស្ថានីយអាកាសកងម៉ារីអាមេរិកនៅតំបន់ Iwakuni ក្នុងខេត្ត Yamaguchi កាលពីឆ្នាំមុន៕

សម្រួល៖ ណឺ មិនា

The post ប្រព័ន្ធមីស៊ីលអាមេរិក Typhon នឹងត្រូវដាក់ពង្រាយនៅជប៉ុន សម្រាប់លំហាត់សមយុទ្ធ រួចតម្កល់នៅទីនោះ appeared first on Kampuchea Thmey Daily.

ជប៉ុន ថា ការបង្កើនសមត្ថភាពលើវិស័យការពារជាតិ គឺសំខាន់ សម្រាប់ទប់ស្កាត់សង្គ្រាម

Minea Neu — Fri, 19 Jun 2026 10:49:00 +0000

រដ្ឋមន្ត្រីក្រសួងការពារជាតិជប៉ុន លោក Shinjiro Koizumi ប្រាប់សារព័ត៌មាន BBC នៅថ្ងៃទី១៨ ខែមិថុនា ថា ទីក្រុងតូក្យូត្រូវតែពង្រឹងសមត្ថភាពការពារជាតិរបស់ខ្លួនឡើងវិញ ដោយសង្កត់ធ្ងន់លើតម្រូវការនៃឥរិយាបថសន្តិភាពបច្ចុប្បន្ន ចាប់តាំងពីសង្គ្រាមលោកលើកទីពីរ។

លោក Koizumi ថា៖ « ការជំរុញវិស័យការពារជាតិ ពង្រឹងសម្ព័ន្ធភាព ជាមួយសហរដ្ឋអាមេរិក និងការពង្រីកកិច្ចសហការជាមួយប្រទេសដែលមានគំនិតដូចគ្នា គឺជាផ្នែកមួយនៃការកសាងការទប់ស្កាត់ពហុស្រទាប់ដ៏សំខាន់ សម្រាប់ធានាថា គ្មានសង្គ្រាមថ្មីផ្ទុះឡើង នៅក្នុងតំបន់នេះ»។

រដ្ឋមន្ត្រីក្រសួងការពារជាតិជប៉ុន លោក Shinjiro Koizumi ។ រូបភាព៖ Reuters

លោកនិយាយពីការផ្លាស់ប្តូរថ្មីៗ ក្នុងគោលនយោបាយការពារជាតិរបស់ជប៉ុន ដូចជាការបន្ធូរបន្ថយច្បាប់នាំចេញអាវុធដែលមានអាយុកាលរាប់ទសវត្សរ៍មកហើយ។

ជាលើកដំបូងក្នុងរយៈពេលជិត ៥០ឆ្នាំ ទីក្រុងតូក្យូ អាចលក់ ឬផ្ទេរឧបករណ៍ការពារជាតិ និងអាវុធប្រល័យលោកទៅកាន់ប្រទេសចំនួន ១៧ ដែលបានចុះហត្ថលេខាលើកិច្ចព្រមព្រៀងជាផ្លូវការ រួមទាំងសហរដ្ឋអាមេរិក និងចក្រភពអង់គ្លេស។

លោក Koizumi ពន្យល់ក្នុងបទសម្ភាសន៍មួយនៅទីក្រុងតូក្យូ ថា៖ « អូស្ត្រាលីបានជ្រើសរើសនាវាចម្បាំងជប៉ុន។ ការពិភាក្សាកំពុងដំណើរការជាមួយហ្វីលីពីន សម្រាប់នាវាពិឃាតដែលប្រើរួចពីកងកម្លាំងការពារខ្លួនតាមសមុទ្ររបស់ជប៉ុន។ យើងកំពុងចរចាយ៉ាងស៊ីជម្រៅជាមួយឥណ្ឌូណេស៊ី ហើយនូវែលសេឡង់ក៏បង្ហាញចំណាប់អារម្មណ៍ក្នុងការទិញនាវាពិឃាតផងដែរ។ ចក្ខុវិស័យនៃការជួញដូរឧបករណ៍ និងទ្រព្យសម្បត្តិយោធា នៅទូទាំងតំបន់ឥណ្ឌូ-ប៉ាស៊ីហ្វិកគឺជាអ្វីដែលយើងមិនធ្លាប់ឃើញពីមុនមក»។

គួរបញ្ជាក់ថា ការពារជាតិគឺជាអាទិភាពកំពូលមួយ សម្រាប់រដ្ឋបាលជប៉ុនបច្ចុប្បន្ន ប្តេជ្ញាបង្កើនការចំណាយជាប្រវត្តិសាស្ត្រ ហើយអះអាងថាកំណែទម្រង់ទាំងនេះគឺត្រូវការក្នុងតំបន់ដែលមានភាពតានតឹងកាន់តែខ្លាំងឡើង។

តាមការមើលឃើញរបស់ជប៉ុន ប្រទេសចិនបានលេចចេញជាអ្នកលេងសកលដ៏គួរឱ្យខ្លាច ហើយមហិច្ឆតានុយក្លេអ៊ែររបស់កូរ៉េខាងជើងក៏នៅតែបន្ត ពិសេសបានសាកល្បងមីស៊ីលផ្លោងលើប្រទេសជប៉ុនទៀតផង ប្រទេសនេះមិនបង្ហាញសញ្ញាថយចុះនៃអាវុធនុយក្លេអ៊ែរនោះទេ។

លោក Koizumi ថា៖ « យើងមិនមែននិយាយក្នុងនាមជារដ្ឋមន្ត្រីក្រសួងការពារជាតិទេ ប៉ុន្តែជាសមាជិកសភា! ជប៉ុនមិនបានធ្វើវិសោធនកម្មរដ្ឋធម្មនុញ្ញសូម្បីម្តង ចាប់តាំងពីសង្គ្រាមលោកលើកទីពីរ។ ដោយសារតែបរិយាកាសសន្តិសុខ បានផ្លាស់ប្តូរយ៉ាងខ្លាំង យើងត្រូវសម្របខ្លួនទៅនឹងការផ្លាស់ប្តូរទាំងនោះ ប្រសិនបើ ជប៉ុនចង់រក្សាសន្តិភាព»៕

សម្រួល៖ ណឺ មិនា

The post ជប៉ុន ថា ការបង្កើនសមត្ថភាពលើវិស័យការពារជាតិ គឺសំខាន់ សម្រាប់ទប់ស្កាត់សង្គ្រាម appeared first on Kampuchea Thmey Daily.

ជប៉ុន Archives - Kampuchea Thmey Daily

​ព្យុះទីហ្វុង Bavi ដ៏​មាន​ឥទ្ធិពល សំដៅទៅ​​​​ជប៉ុន​ និង តៃ​វ៉ាន់ ខណៈ​អាជ្ញាធរ ​​​ព្រមានពីគ្រោះថ្នាក់​​

កូរ៉េខាង​ជើង ​ថ្កោល​ទោស ចំពោះ​​​សម​យុទ្ធ​​រួមគ្នា​របស់​​អាមេរិក និងជប៉ុន

ចិន ​ប្រតិកម្ម​ប្រឆាំង​​​គម្រោងដាក់ពង្រាយ​​ប្រព័ន្ធមីស៊ីលរបស់​អាមេរិក​ លើ​ទឹក​ដី​ជប៉ុន​

ប្រព័ន្ធមីស៊ីល​​អាមេរិក Typhon នឹង​ត្រូវដាក់​ពង្រាយ​នៅជប៉ុន សម្រាប់​​លំហាត់​សមយុទ្ធ រួចតម្កល់​នៅទីនោះ​

ជប៉ុន​ ថា ការ​​បង្កើន​​​សមត្ថភាព​លើ​វិស័យ​ការពារ​ជាតិ គឺ​សំខាន់ សម្រាប់​​​ទប់​ស្កាត់​​សង្គ្រាម​

ព្យុះទីហ្វុង Bavi ដ៏មានឥទ្ធិពល សំដៅទៅជប៉ុន និង តៃវ៉ាន់ ខណៈអាជ្ញាធរ ព្រមានពីគ្រោះថ្នាក់

កូរ៉េខាងជើង ថ្កោលទោស ចំពោះសមយុទ្ធរួមគ្នារបស់អាមេរិក និងជប៉ុន

ចិន ប្រតិកម្មប្រឆាំងគម្រោងដាក់ពង្រាយប្រព័ន្ធមីស៊ីលរបស់អាមេរិក លើទឹកដីជប៉ុន

ប្រព័ន្ធមីស៊ីលអាមេរិក Typhon នឹងត្រូវដាក់ពង្រាយនៅជប៉ុន សម្រាប់លំហាត់សមយុទ្ធ រួចតម្កល់នៅទីនោះ

ជប៉ុន ថា ការបង្កើនសមត្ថភាពលើវិស័យការពារជាតិ គឺសំខាន់ សម្រាប់ទប់ស្កាត់សង្គ្រាម