សេចក្តីប្រកាសព័ត៌មានរដ្ឋបាលខេត្តបន្ទាយមានជ័យ ចុះថ្ងៃទី ១៦ ខែកក្កដានេះ បានបំភ្លឺជូនសាធារណជនថា
បងប្អូនប្រជាពលរដ្ឋរងគ្រោះដោយសារសង្គ្រាមឈ្លានពានពីសំណាក់យោធាថៃ ដាក់កុងតឺន័រ រាយ បន្លាលួស ហ៊ុំព័ទ្ធផ្ទះសម្បែង ដីធ្លី មាន៖ ភូមិជោគជ័យ ភូមិព្រៃចាន់ ឃុំអូរបីជាន់ ស្រុកអូរជ្រៅ និងភូមិបន្ទាយ មានរិទ្ធ ភូមិសាមគ្គី ភូមិ ភូមិត្រពាំងសំរោង ភូមិផ្លូវបំបែក និងភូមិបឹងសុក្រម ឃុំគោករមៀត ស្រុកថ្មពួក ខេត្តបន្ទាយមានជ័យ ត្រូវបានរាជរដ្ឋាភិបាលដែលមានសម្តេចតេជោ ហ៊ុន សែន ប្រធានព្រឹទ្ធសភា សម្តេចធិបតី ហ៊ុន ម៉ាណែត នាយករដ្ឋមន្ត្រី បានយកចិត្តទុកដាក់គិតគូរជាខ្លាំងទាំងការរស់នៅ និងជីវភាពប្រចាំថ្ងៃរបស់បងប្អូនដែលជាជនភៀសសឹក ។

ដោយក្នុងនោះនាយករដ្ឋមន្ត្រី បានរៀបចំលំឋានជូនបងប្អូនសម្រាប់ស្នាក់នៅបណ្តោះអាសន្នស្ថិតនៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ ដែលមានចំនួន៣.៣១៨គ្រួសារ ស្មើនឹង៧ភូមិ ដូចបានរៀបរាប់ខាងលើ ។ បច្ចុប្បន្ននេះបងប្អូនជាជនភៀសសឹកខាងលើ បានទទួលផ្ទះតាមរយៈនៃការចាប់ឆ្នោតដោយមួយចំនួនធំបានចូលរស់នៅរួចរាល់ហើយ និងនៅសេសសល់មួយចំនួនតូចមិនទាន់បានចូលទៅរស់នៅនៅឡើយទេ ដោយមូលហេតុពួកគាត់ទើបតែបានចាប់ឆ្នោតបញ្ចប់ត្រឹមថ្ងៃទី១៥ ខែកក្កដា ឆ្នាំ២០២៦ ថ្មីៗនេះ។

រដ្ឋបាលខេត្តសង្កត់ធ្ងន់ថា៖« ម្យ៉ាងទៀត ការចាប់ឆ្នោតទទួលយកផ្ទះ មិនមានការឃុបឃិតគ្នាដកហូតផ្ទះកែងសម្រាប់ធ្វើការដោះដូរជាប្រាក់ដូច បណ្តាញសង្គមហ្វេសប៊ុក ឈ្មោះ កាមទេព លីម ហុង ធ្វើការចុះផ្សាយនោះឡើយ»។ ចំពោះការរៀបចំការចាប់ឆ្នោតទទួលយកផ្ទះស្នាក់នៅបណ្តោះអាសន្ន រដ្ឋបាលខេត្តបានរៀបចំក្រុមការងារចម្រុះខេត្តជាអ្នកទទួល ខុសត្រូវក្នុងការចាប់ឆ្នោតទទួលយកផ្ទះប្រកបតម្លាភាព ដោយមានការចូលរួមពីអាជ្ញាធរមូលដ្ឋានពាក់ព័ន្ធ អ្នកសារព័ត៌មាន និងសាធារណៈជន។ ចំពោះខ្នងផ្ទះដែលនមិនទាន់ចាប់ឆ្នោត គឺទុកសម្រាប់ជនភៀសសឹក ដែលមិនទាន់មកចាប់ចាប់ឆ្នោត ដោយមិនទុកសម្រាប់ឱ្យទៅបុគ្គលណាមួយឡើយ។

ក្រោយពីបងប្អូនប្រជាពលរដ្ឋភៀសសឹកបានទទួលផ្ទះតាមរយៈនៃការចាប់ឆ្នោតរួចហើយ ពួកគាត់ត្រេកអរ និងចូលទៅរស់នៅរៀបចំផ្ទះសម្បែងរៀងៗខ្លួន ព្រមទាំងមានការដាំដុះ ឬប្រកបមុខរបរលក់ដូរ មិនដែលមានអ្នកណាម្នាក់បានចំណាយថវិកាលើការទទួលបានផ្ទះតាមរយៈនៃការចាប់ឆ្នោតឡើយ។ នេះបើតាមការអះអាងរដ្ឋបាលខេត្ត។

ក្រសួងមហាផ្ទៃ បញ្ជាក់ថា គិតត្រឹមព្រឹកថ្ងៃទី១៥ ខែកក្កដា ឆ្នាំ២០២៦នេះ មានពលរដ្ឋចំនួន២០.៣៩១នាក់ទៀត ក្នុងនោះស្រី្ត១០.៣៩៧នាក់ និងកុមារ៦.០៦៦នាក់ទៀត ពុំទាន់អាចវិលទៅលំនៅឋានវិញនៅឡើយទេ បន្ទាប់ពីភូមិករ និងផ្ទះសម្បែងត្រូវបានយោធាថៃចូលកាន់កាប់ និងបំផ្លិចបំផ្លាញដោយខុសច្បាប់ក្រោយបទឈប់បាញ់ចូលជាធរមាន៕

The post ខេត្តបន្ទាយមានជ័យ ច្រានចោលការចុះផ្សាយថាអាជ្ញាធរឃុបឃិតដកហូតផ្ទះកែងរបស់ពលរដ្ឋភៀសសឹក សម្រាប់ធ្វើការដោះដូរជាប្រាក់ appeared first on Kampuchea Thmey Daily.

រាជរដ្ឋាភិបាលកម្ពុជា បានសាងសង់ជម្រកបណ្ដោះអាសន្នសរុប៣៣១៣ខ្នង នៅលើដីទំហំប្រមាណ៤០០ហិកតា សម្រាប់ទទួលប្រជាពលរដ្ឋភៀសសឹកចំនួន៣៣១៣គ្រួសារ មកពីតំបន់បឹងត្រកួន ស្ថិតក្នុងឃុំគោករមៀត ស្រុកថ្មពួក ព្រមទាំងប្រជាពលរដ្ឋមកពីភូមិព្រៃចាន់ ភូមិជោគជ័យ ឃុំអូរបីជាន់ ស្រុកអូរជ្រៅ និងមួយផ្នែកនៃភូមិបឹងសុក្រម រងគ្រោះព្រោះការឈ្លានពាន វាយកម្ទេចផ្ទះសម្បែង រាយបន្លាលួស ដាក់ទូរកុងតឺន័រដោយយោធាថៃ។

បើតាមការបញ្ជាក់របស់លោក ឃ្លោក នួយ ការប្រគល់ជម្រកបណ្ដោះអាសន្នជូនពលរដ្ឋខ្មែររងគ្រោះព្រោះយោធាថៃឈ្លានពាន គឺធ្វើឡើងចំនួន២ដំណាក់កាល ក្នុងនោះដំណាក់កាលទី១ មានប្រជាពលរដ្ឋភៀសសឹកចំនួន ២.៨០០គ្រួសារ មកពីស្រុកអូរជ្រៅ និងស្រុកថ្មពួក បានចូលទៅរស់ក្នុងផ្ទះបណ្ដោះអាសន្នតាំងពីខែមីនា ឆ្នាំ២០២៦ និងបានចាប់ផ្តើមប្រកបមុខរបរជាបណ្តើរៗ ចំណែកដំណាក់កាលទី២ គឺរៀបចំសាងសង់ផ្ទះចំនួន៥១៣ខ្នង ដើម្បីប្រគល់ជូនប្រជាពលរដ្ឋភៀសសឹកចំនួន ៥១៣គ្រួសារបន្ថែមទៀត មកពីស្រុកអូរជ្រៅ និងស្រុកថ្មពួក។ បច្ចុប្បន្ននេះ ពលរដ្ឋ បាននិងកំពុងចាប់ផ្តើមចូលទៅរស់នៅក្នុងជម្រកបណ្តោះអាសន្នបណ្ដើរៗ ក្រោយអាជ្ញាធរបានរៀបចំការចាប់ឆ្នោតជ្រើសរើសផ្ទះ ដើម្បីធានាតម្លាភាព និងសមធម៌ក្នុងការបែងចែកលំនៅដ្ឋាន។

អភិបាលរងខេត្តបន្ទាយមានជ័យ សង្កត់ធ្ងន់ថា ៖ «ដំណាក់កាលទី១ មានការចាប់ឆ្នោតផ្ទះជូនប្រជាពលរដ្ឋចំនួន ២.៨០០គ្រួសារ ខណៈដំណាក់កាលទី២នេះ មានចំនួន ៥១៣គ្រួសារ ដែលបានចាប់ផ្តើមចូលរស់នៅជាបណ្តើរៗ ស្របពេលសំណង់លំនៅដ្ឋានកំពុងបន្តសាងសង់»។

លោកអភិបាលរង ឆ្លើយពន្យល់តបសំណួរអ្នកសារព័ត៌មានថា ស្របពេលផ្ទះមួយចំនួនមិនទាន់សង់រួចទាំងស្រុង សម្រាប់គ្រួសារដែលមិនទាន់ទទួលបានផ្ទះ ពួកគាត់កំពុងស្នាក់នៅជាមួយសាច់ញាតិ ឬមិត្តភក្តិជាបណ្តោះអាសន្នសិន នៅពេលផ្ទះសង់រួច ទើបចូលទៅរស់នៅ។

គួរឱ្យដឹងថឆា ប្រជាពលរដ្ឋភៀសសឹកម្នាក់ៗទទួលបានផ្ទះមួយខ្នង មានទំហំ ៥ម៉ែត្រ គុណនឹង ៧ម៉ែត្រ ស្ថិតលើក្បាលដីទំហំ ២០ម៉ែត្រ គុណនឹង ៣០ម៉ែត្រ នៅក្នុង «ភូមិរង់ចាំ» ស្ថិតក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ។ ភូមិនេះមានសរុប ៦ភូមិ ចាប់ពីភូមិរង់ចាំទី១ ដល់ភូមិរង់ចាំទី៦។

លោក ឃ្លោក នួយ បានឱ្យដឹងបន្ថែមថា អាជ្ញាធរបានរៀបចំហេដ្ឋារចនាសម្ព័ន្ធ និងសេវាសាធារណៈនៅក្នុង «ភូមិរង់ចាំ» រួមមាន សាលារៀនចាប់ពីមត្តេយ្យសិក្សាដល់វិទ្យាល័យ មណ្ឌលសុខភាព ទីស្នាក់ការសន្តិសុខ និងផ្សារ ដើម្បីបំពេញតម្រូវការរស់នៅ និងប្រកបអាជីវកម្មរបស់ប្រជាពលរដ្ឋ ដែលជាការប្រែក្លាយទៅជាសហគមន៍ថ្មីមួយ។

រាជរដ្ឋាភិបាលកម្ពុជា បន្តសាងសង់ជម្រកស្នាក់នៅបណ្តោះអាសន្ន ដើម្បីជួយដោះស្រាយការលំបាករបស់ប្រជាពលរដ្ឋភៀសសឹកនៅខេត្តបន្ទាយមានជ័យ  ដែលមិនទាន់អាចវិលត្រឡប់ទៅលំនៅដ្ឋានដើមវិញបាន ស្របពេលកំពុងបន្តដោះស្រាយបញ្ហាព្រំដែនដោយសន្តិវិធី ដើម្បីការពារអធិបតេយ្យភាព និងបូរណភាពទឹកដីរបស់ខ្លួន។ រាជរដ្ឋាភិបាល បានប្រកាសម្ដងហើយម្ដងទៀតថា កម្ពុជាមិនទទួលស្គាល់ដាច់ខាតចំពោះការកែប្រែខ្សែបន្ទាត់ព្រំដែនដោយប្រើប្រាស់កងកម្លាំងពីសំណាក់ភាគីថៃ៕

The post អភិបាលរង៖ជម្រកបណ្ដោះអាសន្ននៅភូមិរងចាំសរុប៣៣១៣ខ្នង នឹងសាងសង់រួចទាំងអស់ត្រឹមដំណាច់ខែកក្កដានេះ appeared first on Kampuchea Thmey Daily.

ថ្លែងនៅថ្ងៃទី២១ ខែមីនា នៅលើផ្លូវកំពុងសាងសង់ ខាងមុខជម្រកបណ្ដោះអាសន្ន ស្របពេលក្រុមជាងមមាញឹកតទឹកស្អាត បណ្ដាញអគ្គិសនី  លោក ឃ្លោក នួយ ប្រាប់ក្រុមអ្នកយកព័ត៌មានដូច្នេះ៖« ការរៀបចំហេដ្ឋារចនាសម្ព័ន្ធ គឺមានផ្ទះសរុបប្រមាណជា៣ពាន់ខ្នង មានទឹកស្អាត មានភ្លើងអគ្គិសនីភ្ជាប់គ្រប់ផ្ទះ ផ្លូវខ្វាត់ខ្វែង ហើយផ្លូវធំយើងចាក់បេតុងទៀត ហើយក្នុងនោះយើងបានរៀបចំសាលារៀន ចាប់តាំងពីបឋមសិក្សារហូតដល់វិទ្យាល័យ មណ្ឌលសុខភាព​ ទីស្នាក់ការភូមិតាមប្លុកទាំង៦។ »។

អភិបាលរងខេត្តបន្ទាយមានជ័យ អះអាងថា រដ្ឋាភិបាលបានសាងសង់រោងសាលារៀនបណ្ដោះអាសន្ន ដើម្បីបម្រើឱ្យការសិក្សាររបស់កុមារបន្តទៅមុខជានិច្ច មិនឱ្យអាក់ខាន ស្របពេលដែលសាលារៀនបេតុងរឹងមាំបន្តសាងសង់ត្រូវការរយៈពេលយូរ។   នៅទីតាំងជម្រកស្នាក់នៅបណ្ដោះអាសន្ននោះ ក៏មានក្រុមគ្រូពេទ្យប្រចាំការជាប់ជានិច្ច ដើម្បីមើលថែពលរដ្ឋជាជនភៀសសឹក។

សម្រាប់ប្រពលរដ្ឋភៀសសឹកស្នាក់នៅជាបណ្តោះអាសន្នដោយក្នុងមួយគ្រួសារ ទទួលបានជម្រកបណ្ដោះអាសន្នមួយខ្នង មានទំហំទទឹង៥ម៉ែត្រ និងបណ្ដោយ៧ម៉ែត្រ នៅលើក្បាលដី ដែលមានទទឹង២០ម៉ែត្រ និងបណ្ដោយ៣០ម៉ែត្រ។ ជម្រកបណ្ដោះអាសន្ននោះ ពលរដ្ឋមានបង្គន់អនាម័យ ទឹកស្អាត អគ្គិសនីសម្រាប់ប្រើប្រាស់។ ដើម្បីសម្រាលបន្ទុកជីវភាពជនភៀសសឹកឱ្យបានជាអតិបរមា ពលរដ្ឋក៏ទទួលបានការឧបត្ថម្ភថ្លៃប្រើប្រាស់ទឹកស្អាត និងអគ្គិសនីរយៈពេលពេញមួយឆ្នាំ។

តាមរយៈនេះ អភិបាលរងលោក ឃ្លោក នួយ អះអាងថា  រាជរដ្ឋាភិបាលកម្ពុជា ដែលមានសម្តេចបវរធិបតី ហ៊ុន ម៉ាណែត និងសម្តេចតេជោ ហ៊ុន សែន ប្រធានព្រឹទ្ធសភា គឺមិនដែលបោះបង់ចោលពលរដ្ឋខ្មែរឡើយ ព្រោះយល់ច្បាស់ពីការលំបាករបស់ប្រជាពលរដ្ឋភៀសសឹក ដែលត្រូវភៀសខ្លួនពីសង្គ្រាមឈ្លានពាននៅតាមព្រំដែន។ ការផ្តល់ជម្រកថ្មីនេះ គឺជាការធានានូវសេចក្តីថ្លៃថ្នូរ និងសុវត្ថិភាព ខណៈដែលរដ្ឋាភិបាលកំពុងបន្តដោះស្រាយបញ្ហាដីធ្លីនៅតំបន់ដើម។

រដ្ឋាភិបាលបានសងសង់ជម្រកបណ្ដោះអាសន្នប្រមាណ៣ពាន់ខ្នង នៅក្នុងភូមិសាស្ត្រភូមិស្លក្រាម ឃុំស្លក្រាម ស្រុកស្វាយចេក សម្រាប់ជនភៀសសឹកដែលមកពីភូមិព្រៃចាន់ និងជោគជ័យ ក្នុងឃុំអូរបីជាន់ ស្រុកអូរជ្រៅ និងពលរដ្ឋមកពីភូមិចំនួន៥នៅតំបន់បឹងត្រកួន ក្នុងស្រុកថ្មពួក ខេត្តបន្ទាយមានជ័យ ជាង២៨០០គ្រួសារ ចូលទៅរស់នៅអន្តរកាល ក្នុងពេលដែលរដ្ឋាភិបាលកំពុងទាមទារទឹកដីដែលថៃកាន់កាប់តាមវិធានការការទូត និងផ្លូវច្បាប់។

អភិបាលរងខេត្តបន្ទាយមានជ័យ ប្រាប់ក្រុមអ្នកសារព័ត៌មានថា  គិតត្រឹមថ្ងៃទី២១ ខែមីនា  ពលរដ្ឋសរុប៨២២គ្រួសារមកពីតំបន់បឹងត្រកួន ក្នុងនោះភូមិបន្ទាយមានរិទ្ធ ចំនួន ៥០៤គ្រួសារ និងភូមិសាមគ្គីចំនួន ៣១៨គ្រួសារ ដែលចាប់ឆ្នោតចូលរស់នៅជម្រកបណ្ដោះអាសន្នជាលើកទី១ កាលពីថ្ងៃ១៨ ខែមីនា បានបន្តរៀបចំ និងចូលស្នាក់នៅក្នុងជម្រកបណ្តោះអាសន្នបណ្ដើរ។ ក្រុមការងារ និងរៀបចំការចាប់ឆ្នោតជាលើកទី២ នៅថ្ងៃទី១០​ខែមេសា ខាងមុខ ដើម្បីឱ្យពលរដ្ឋភៀសសឹកក្នុងខេត្តបន្ទាយមានជ័យអាចចូលរស់នៅក្នុងជម្រកបណ្ដោះអាសន្នមុនរដូវវស្សារមកដល់។

ពលរដ្ឋភៀសសឹកប្រាប់អ្នកយកព័ត៌មានរបស់«កម្ពុជាថ្មី»ថា ការរស់នៅក្នុងជម្រកបណ្ដោះអាសន្ន ដែលរាជរដ្ឋាភិបាលរៀបចំជូន គឺងាយស្រួលរស់នៅ ស្រឡះមុខស្រឡះមាត់ ជាងមណ្ឌលសុវត្ថិភាព ការរស់មណ្ឌលសុវត្ថិភាពវត្តកណ្ដោលជាង២ខែ គឺជួបប្រទះនូវបញ្ហាមួយចំនួនដូចជា បរិយាកាសមិនអំណោយផល អាកាសធាតុអាក្រក់ កង្វះទឹកបន្ទប់ទឹក និងទឹកប្រើប្រាស់បន្តិចបន្តួច ព្រោះនៅទីនោះមានពលរដ្ឋភៀសសឹករស់នៅច្រើនគ្រួសារ។   ប៉ុន្តែទោះបីជាយ៉ាងណាក៏ដោយ ពលរដ្ឋនៅតែនឹកផ្ទះសម្បែងដែលធ្លាប់រស់នៅជាច្រើនឆ្នាំយ៉ាងកក់ក្ដៅ សុខសាន្ត និងចង់ត្រឡប់ទៅរស់នៅផ្ទះសម្បែងដូចដើមវិញ ដោយបានទាមទារឱ្យយោធាថៃដកកងកម្លាំង ទូរកុងតឺន័រ បន្លាលួសចេញពីទឹកដីកម្ពុជា។ ជនភៀសសឹក ប្រកាសថាពួកគាត់គាំទ្រចំពោះដំណោះស្រាយរបស់រដ្ឋាភិបាល ក្នុងការទាមទារយកទឹកដីមកវិញ។

គួររម្លឹកថា សម្តេច ហ៊ុន ម៉ាណែត  ធ្លាប់បានគូសបញ្ជាក់ថា  ការផ្តល់ជម្រកបណ្តោះអាសន្នដល់ជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន គឺជាការគិតគូរពីសុខទុក្ខរបស់ពួកគាត់ទាំងបរិស្ថាន និងសុខុមាលភាព តែមិនមែនមានន័យថា រាជរដ្ឋាភិបាល បោះបង់សិទ្ធិទាមទារទឹកដីនោះឡើយ។ រាជរដ្ឋាភិបាល មានជំហរម៉ឺងម៉ាត់ និងដាច់ខាតក្នុងការការពារបូរណភាពទឹកដី ហើយបាននិងកំពុងធ្វើការងារនេះយ៉ាងសកម្មតាមយន្តការការទូតដោយសន្តិវិធី៕

ដោយ៖ ង៉ិល ណារ៉ាត់

The post មិនទុកពលរដ្ឋចោល! រដ្ឋរៀបចំជម្រកបណ្ដោះអាសន្នជូនជនភៀសសឹកជាមួយរចនាសម្ព័ន្ធខ្វាត់ខ្វែង ឱ្យងាយស្រួលរស់នៅ ខណៈការទាមទារទឹកដីពីថៃនៅតែបន្ត appeared first on Kampuchea Thmey Daily.

ក្នុងពេលសំណេះសំណាលជាមួយស្ត្រីចាស់ជរាម្នាក់ដែលកំពុងជិះលើរទះរុញ ក្រោមជម្រកបណ្ដោះអាសន្នដែលរដ្ឋាភិបាលសាងសង់រួចបណ្ដើរៗ ទេសរដ្ឋមន្ត្រី​ គន់ គីម ថ្លែងមកកាន់អ្នកសារព័ត៌មាន៖«យើងយកចាស់ៗចឹងមកមុន ឱ្យគាត់មកនេះចឹងទៅ ដើម្បីបានត្រជាក់ ព្រោះនៅនោះ[មណ្ឌលសុវត្ថិភាព]ក្ដៅណាស់។ ឥឡូវយើងបានជម្រកបណ្ដោះអាសន្ននេះមួយហើយ។»។

ក្នុងឱកាសនោះដែរ លោក គន់ គីម​ បានណែនាំក្រុមជាងត្រូវពន្លឿនការងារសាងសង់ និងជាពិសេសការសាងសង់បន្គន់អនាម័យ ដើម្បីជួយឱ្យពលរដ្ឋមានភាពងាយស្រួលក្នុងការរស់នៅ។

ពលរដ្ឋភៀសសឹកប្រាប់អ្នកយកព័ត៌មានរបស់«កម្ពុជាថ្មី»ថា ការរស់នៅក្នុងជម្រកបណ្ដោះអាសន្ន ដែលរាជរដ្ឋាភិបាលរៀបចំជូន គឺងាយស្រួលរស់នៅ ស្រឡះមុខស្រឡះមាត់ ជាងមណ្ឌលសុវត្ថិភាព ការរស់មណ្ឌលសុវត្ថិភាពវត្តកណ្ដោលជាង២ខែ គឺជួបប្រទះនូវបញ្ហាមួយចំនួនដូចជា បរិយាកាសមិនអំណោយផល អាកាសធាតុអាក្រក់ កង្វះទឹកបន្ទប់ទឹក និងទឹកប្រើប្រាស់បន្តិចបន្តួច ព្រោះនៅទីនោះមានពលរដ្ឋភៀសសឹករស់នៅច្រើនគ្រួសារ។   ប៉ុន្តែទោះបីជាយ៉ាងណាក៏ដោយ ពលរដ្ឋនៅតែនឹកផ្ទះសម្បែងដែលធ្លាប់រស់នៅជាច្រើនឆ្នាំយ៉ាងកក់ក្ដៅ សុខសាន្ត និងចង់ត្រឡប់ទៅរស់នៅផ្ទះសម្បែងដូចដើមវិញ ដោយបានទាមទារឱ្យយោធាថៃដកកងកម្លាំង ទូរកុងតឺន័រ បន្លាលួសចេញពីទឹកដីកម្ពុជា។ ជនភៀសសឹក ប្រកាសថាពួកគាត់គាំទ្រចំពោះដំណោះស្រាយរបស់រដ្ឋាភិបាល ក្នុងការទាមទារយកទឹកដីមកវិញ។

អភិបាលរងខេត្តបន្ទាយមានជ័យ លោក ឃ្លោក នួយ ប្រាប់ក្រុមអ្នកសារព័ត៌មានថា  បច្ចុប្បន្ននេះ ពលរដ្ឋសរុប ៨២២ គ្រួសារ មកពីតំបន់បឹងត្រកួន ក្នុងនោះភូមិបន្ទាយមានរិទ្ធ ចំនួន ៥០៤គ្រួសារ និងភូមិសាមគ្គីចំនួន ៣១៨គ្រួសារ ដែលចាប់ឆ្នោតចូលរស់នៅជម្រកបណ្ដោះអាសន្នជាលើកទី១ កាលពីថ្ងៃ១៨ ខែមីនា បានបន្តរៀបចំ និងចូលស្នាក់នៅក្នុងជម្រកបណ្តោះអាសន្នបណ្ដើរ។ ការចាប់ឆ្នោតជាលើកទី២ គ្រោងនឹងធ្វើឡើងនៅថ្ងៃទី១០​ខែមេសា ខាងមុខ ដើម្បីឱ្យពលរដ្ឋភៀសសឹកក្នុងខេត្តបន្ទាយមានជ័យអាចចូលរស់នៅក្នុងជម្រកបណ្ដោះអាសន្នមុនរដូវវស្សារមកដល់។

លោក អះអាងថា រាជរដ្ឋាភិបាល បានសាងសង់ជម្រកបណ្ដោះអាសន្នប្រមាណ៣ពាន់ខ្នង នៅក្នុងភូមិស្លក្រាម ឃុំស្លក្រាម ស្រុកស្វាយចេក ដោយភ្ជាប់មកនូវហេដ្ឋារចនាសម្ព័ន្ធតបណ្ដាញទឹកស្អាត អគ្គិសនីចូលដល់ក្នុងខ្នងផ្ទះ ផ្លូវខ្វាត់ខ្វែង និងមានផ្លូវធំចាក់បេតុង សាលារៀន ចាប់ពីបឋមសិក្សា ដល់វិទ្យាល័យ និងមន្ទីរពេទ្យ និងរៀបចំគម្រោងផ្សេងៗគាំទ្រដល់ការរស់នៅចិញ្ចឹមជីវិតពលរដ្ឋ ដែលរៀបចំជាលក្ខណៈទីប្រជុំជន។

គួររម្លឹកថា សម្តេច ហ៊ុន ម៉ាណែត  ធ្លាប់បានគូសបញ្ជាក់ថា  ការផ្តល់ជម្រកបណ្តោះអាសន្នដល់ជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន គឺជាការគិតគូរពីសុខទុក្ខរបស់ពួកគាត់ទាំងបរិស្ថាន និងសុខុមាលភាព តែមិនមែនមានន័យថា រាជរដ្ឋាភិបាល បោះបង់សិទ្ធិទាមទារទឹកដីនោះឡើយ។ រាជរដ្ឋាភិបាល មានជំហរម៉ឺងម៉ាត់ និងដាច់ខាតក្នុងការការពារបូរណភាពទឹកដី ហើយបាននិងកំពុងធ្វើការងារនេះយ៉ាងសកម្មតាមយន្តការការទូតដោយសន្តិវិធី៕

ដោយ៖ ង៉ិល ណារ៉ាត់

The post លោក គន់ គីម៖ ជនភៀសសឹកចាស់ជរា ជនពិការ ជាអាទិភាពចម្បងដែលត្រូវនាំមករស់នៅជម្រកបណ្ដោះអាសន្នមុនគេ appeared first on Kampuchea Thmey Daily.

ទេសរដ្ឋមន្រ្តី គន់ គីម បានថ្លែងថា យុវជនពេញកម្លាំងគួរតែចូលធ្វើការងារជាកម្មករសំណង់ គ្រាន់បានប្រាក់ចំណូលបន្ថែម។

សម្រាប់ខេត្តបន្ទាយមានជ័យ រាជរដ្ឋាភិបាលកម្ពុជា បានសាងសង់ជម្រកផ្ទះបណ្តោះអាសន្ន ដើម្បីដោះស្រាយការលំបាកជូនប្រជាពលរដ្ឋភៀសសឹកចំនួន៣ពាន់គ្រួសារ ដែលមិនទាន់អាចត្រឡប់ទៅលំនៅដ្ឋាននៅភូមិព្រៃចាន់ និងភូមិជោគជ័យ ក្នុងឃុំអូរបីជាន់ ស្រុកអូរជ្រៅ និងភូមិចំនួន៥នៅតំបន់បឹងត្រកួន ស្រុកថ្មពួក ស្របពេលរាជរដ្ឋាភិបាលកម្ពុជា បាននិងកំពុងខិតខំរកដំណោះស្រាយ ដោយសន្តិវិធីទាមទារដីកម្ពុជាមកវិញ ដែលយោធាថៃឈ្លានពាន ដោយការរាយបន្លាលួស និងដាក់ទូរកុងតឺន័រព័ទ្ធយក វាយកម្ទេច ក្រោយប្រជាពលរដ្ឋកម្ពុជាជម្លៀសខ្លួនពីការបង្ករសង្គ្រាមរបស់យោធាថៃ កាលពីថ្ងៃទី៨-២៧ ខែធ្នូ ឆ្នាំ២០២៥។

បើតាមអភិបាលរងខេត្តបន្ទាយមានជ័យ លោក ឃ្លោក នួយ ប្រាប់ក្រុមអ្នកសារព័ត៌មានថា  បច្ចុប្បន្ននេះ ពលរដ្ឋសរុប៨២២គ្រួសារមកពីតំបន់បឹងត្រកួន ក្នុងនោះភូមិបន្ទាយមានរិទ្ធ ចំនួន ៥០៤គ្រួសារ និងភូមិសាមគ្គីចំនួន ៣១៨គ្រួសារ ដែលចាប់ឆ្នោតចូលរស់នៅជម្រកបណ្ដោះអាសន្នជាលើកទី១ កាលពីថ្ងៃ១៨ ខែមីនា បានបន្តរៀបចំ និងចូលស្នាក់នៅក្នុងជម្រកបណ្តោះអាសន្នបណ្ដើរ។ ការចាប់ឆ្នោតជាលើកទី២ គ្រោងនឹងធ្វើឡើងនៅថ្ងៃទី១០​ខែមេសា ខាងមុខ ដើម្បីឱ្យពលរដ្ឋភៀសសឹកក្នុងខេត្តបន្ទាយមានជ័យអាចចូលរស់នៅក្នុងជម្រកបណ្ដោះអាសន្នមុនរដូវវស្សារមកដល់។

លោក អះអាងថា រាជរដ្ឋាភិបាល បានសាងសង់ជម្រកបណ្ដោះអាសន្នប្រមាណ៣ពាន់ខ្នង នៅក្នុងភូមិស្លក្រាម ឃុំស្លក្រាម ស្រុកស្វាយចេក ដោយភ្ជាប់មកនូវហេដ្ឋារចនាសម្ព័ន្ធតបណ្ដាញទឹកស្អាត អគ្គិសនីចូលដល់ក្នុងខ្នងផ្ទះ ផ្លូវខ្វាត់ខ្វែង និងមានផ្លូវធំចាក់បេតុង សាលារៀន ចាប់ពីបឋមសិក្សា ដល់វិទ្យាល័យ និងមន្ទីរពេទ្យ និងរៀបចំគម្រោងផ្សេងៗគាំទ្រដល់ការរស់នៅចិញ្ចឹមជីវិតពលរដ្ឋ ដែលរៀបចំជាលក្ខណៈទីប្រជុំជន។

សកម្មភាពទាំងនេះមិនត្រឹមតែជាការផ្តល់ជម្រកប៉ុណ្ណោះទេ ប៉ុន្តែគឺជាការផ្តល់នូវក្តីសង្ឃឹម និងការការពារយ៉ាងកក់ក្តៅដល់ប្រជាពលរដ្ឋនៅតាមបន្ទាត់ព្រំដែន ដែលបានលះបង់ និងឆ្លងកាត់ការលំបាកក្នុងគ្រាមានជម្លោះសឹក។ នេះជាកិច្ចខិតខំប្រឹងប្រែងបន្ថែមទៀតរបស់រាជរដ្ឋាភិបាល ក្នុងការធានាថា គ្មានប្រជាពលរដ្ឋណាម្នាក់ ត្រូវបានបោះបង់ចោលក្នុងគ្រាលំបាកនោះឡើយ៕

The post លោក គន់ គីម ឱ្យយុវជនពេញកម្លាំងចូលធ្វើការក្នុងការដ្ឋានសង់ជម្រកបណ្ដោះអាសន្ន ដើម្បីបានចំណូលជួយគ្រួសារ appeared first on Kampuchea Thmey Daily.

អ្នកស្រី ម៉ៅ សាវ៉េត ជនភៀសសឹកមកពីតំបន់បឹងត្រកួន ស្រុកថ្មពួក ខេត្តបន្ទាយមានជ័យ បានរៀបរាប់ថា អ្នកស្រីបានរស់នៅក្នុងផ្ទះសម្បែងនៅតំបន់បឹងត្រកួនយ៉ាងកក់ក្ដៅ និងសុខសាន្តប្រមាណ៤០ឆ្នាំមកហើយ ប៉ុន្តែនៅចុងឆ្នាំ២០២៥ យោធាថៃឈ្លានពានបានដាក់ទូរកុងតឺន័រ រាយបន្លាលួសព័ទ្ធយកផ្ទះរបស់អ្នកស្រី និងអ្នកភូមិផ្សេងទៀតជាច្រើនគ្រួសារ។ ស្ត្រីវ័យ៥៦ឆ្នាំរូបនេះ រៀបរាប់ថាខ្លួនពិតជានឹករលឹក និងសោកស្ដាយ​ចំពោះការបាត់បង់ផ្ទះសម្បែង និងទ្រព្យសម្បត្តិដែលខំប្រឹង​រកទុកដាក់ជាច្រើនឆ្នាំមកនេះ។

អ្នកស្រី ម៉ៅ សាវ៉េត លើកឡើងថា នៅពេលដែលចូលមករស់នៅជម្រកបណ្ដោះអាសន្ន ដែលរាជរដ្ឋាភិបាលរៀបចំជូន អ្នកស្រីមានអារម្មណ៍ស្រួលរស់នៅរស់នៅ ស្រឡះមុខស្រឡះមាត់ ងាយស្រួលស្នាក់នៅជាងការស្នាក់នៅមណ្ឌលសុវត្ថិភាព។ អ្នកស្រីរម្លឹកថា ការរស់មណ្ឌលសុវត្ថិភាពវត្តកណ្ដោលជាង២ខែ គឺជួបប្រទះនូវបញ្ហាមួយចំនួនដូចជា បរិយាកាសមិនអំណោយផល អាកាសធាតុអាក្រក់ កង្វះទឹកបន្ទប់ទឹក និងទឹកប្រើប្រាស់បន្តិចបន្តួច ព្រោះនៅទីនោះមានពលរដ្ឋភៀសសឹករស់នៅជាង១៥០០គ្រួសារ។  

បើទោះបីជម្រកបណ្ដោះអាសន្នថ្មីរស់នៅមានភាពងាយស្រួលយ៉ាងណា ក៏អ្នកស្រី នៅតែនឹកផ្ទះ ចង់បានផ្ទះ និងដីធ្លីមកវិញតាមរយៈមធ្យោបាយសន្តិវិធីរបស់រាជរដ្ឋាភិបាលកម្ពុជា។ ក្រោយចូលរស់នៅជម្រកបណ្ដោះអាសន្នថ្មី អ្នកស្រីគូសបញ្ជាក់ថា ៖«ខ្ញុំ​នៅតែចង់បានផ្ទះសម្បែងដែលធ្លាប់រស់នៅពីមុនមក ចង់បានផ្ទះមកវិញ តែមិនបានចង់សង្គ្រាមទេ ចង់បានសន្តិភាព។ ខ្ញុំជឿជាក់លើថ្នាក់ដឹកនាំ និងរាជរដ្ឋាភិបាលថា គាត់នឹងអាចដោះស្រាយបាន។»។

រីឯលោក ជា ឃាំង ជនភៀសសឹក មកពីតំបន់បឹងត្រកួនដូចគ្នា​ ក៏មានអារម្មណ៍នឹកផ្ទះសម្បែង  ដែលធ្លាប់រស់នៅ និងចង់វិលត្រឡប់ទៅផ្ទះសម្បែងវិញ។ លោកក៏បង្ហាញការគាំទ្រចំពោះរដ្ឋាភិបាលក្នុងការដោះស្រាយបញ្ហាព្រំដែនជាមួយភាគីថៃដោយសន្តិវិធី ដើម្បីទាមទារទឹកដីយកមកវិញ។

ថ្លែងចេញពីខាងក្រោមជម្រកបណ្ដោះអាសន្នដែលទើបនឹងចូលរស់នៅក្រោយរដ្ឋាភិបាលសាងសង់ជូនថ្មីៗ បុរសវ័យជាង៦០ឆ្នាំ រូបនេះ ប្រាប់ក្រុមអ្នកសារព័ត៌មានថា៖«នឹកផ្ទះ ធ្លាប់រស់នៅកក់ក្ដៅ មានផ្ទះ មានដីរស់នៅ បែជាកើតជាជនជាភៀសសឹកចឹង មានការសោកស្ដាយ។»។

គួរឱ្យដឹងថាជនភៀសសឹកដែលមកពីភូមិព្រៃចាន់ និងជោគជ័យ ក្នុងឃុំអូរបីជាន់ ស្រុកអូរជ្រៅ និងពលរដ្ឋមកពីភូមិចំនួន៥នៅតំបន់បឹងត្រកួន ក្នុងស្រុកថ្មពួក ខេត្តបន្ទាយមានជ័យ ជាង២៨០០គ្រួសារ ត្រូវបានរាជរដ្ឋាភិបាលរៀបចំសាងសង់រចនាសម្ព័ន្ធ និងជម្រកបណ្ដោះអាសន្ន សម្រាប់ឱ្យរស់នៅអន្តរកាលនៅក្នុងភូមិសាស្ត្រភូមិស្លក្រាម ឃុំស្លក្រាម ស្រុកស្វាយចេក ក្នុងពេលដែលរដ្ឋាភិបាលកំពុងទាមទារទឹកដីដែលថៃកាន់កាប់តាមវិធានការការទូត និងផ្លូវច្បាប់។

អភិបាលរងខេត្តបន្ទាយមានជ័យ លោក ឃ្លោក នួយ ប្រាប់ក្រុមអ្នកសារព័ត៌មានថា  បច្ចុប្បន្ននេះ ពលរដ្ឋសរុប៨២២គ្រួសារមកពីតំបន់បឹងត្រកួន ក្នុងនោះភូមិបន្ទាយមានរិទ្ធ ចំនួន ៥០៤គ្រួសារ និងភូមិសាមគ្គីចំនួន ៣១៨គ្រួសារ ដែលចាប់ឆ្នោតចូលរស់នៅជម្រកបណ្ដោះអាសន្នជាលើកទី១ កាលពីថ្ងៃ១៨ ខែមីនា បានបន្តរៀបចំ និងចូលស្នាក់នៅក្នុងជម្រកបណ្តោះអាសន្នបណ្ដើរ។ ការចាប់ឆ្នោតជាលើកទី២ គ្រោងនឹងធ្វើឡើងនៅថ្ងៃទី១០​ខែមេសា ខាងមុខ ដើម្បីឱ្យពលរដ្ឋភៀសសឹកក្នុងខេត្តបន្ទាយមានជ័យអាចចូលរស់នៅក្នុងជម្រកបណ្ដោះអាសន្នមុនរដូវវស្សារមកដល់។

លោក អះអាងថា រាជរដ្ឋាភិបាល បានសាងសង់ជម្រកបណ្ដោះអាសន្នប្រមាណ៣ពាន់ខ្នង នៅក្នុងភូមិស្លក្រាម ឃុំស្លក្រាម ស្រុកស្វាយចេក ដោយភ្ជាប់មកនូវហេដ្ឋារចនាសម្ព័ន្ធតបណ្ដាញទឹកស្អាត អគ្គិសនីចូលដល់ក្នុងខ្នងផ្ទះ ផ្លូវខ្វាត់ខ្វែង និងមានផ្លូវធំចាក់បេតុង ដាក់លូ សាងសង់សាលារៀន ចាប់ពីបឋមសិក្សា ដល់វិទ្យាល័យ និងមន្ទីរពេទ្យ និងរៀបចំគម្រោងផ្សេងៗគាំទ្រដល់ការរស់នៅចិញ្ចឹមជីវិតពលរដ្ឋ ដែលរៀបចំជាលក្ខណៈទីប្រជុំជន។

សម្តេច ហ៊ុន ម៉ាណែត  ធ្លាប់បានគូសបញ្ជាក់ថា  ការផ្តល់ជម្រកបណ្តោះអាសន្នដល់ជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន គឺជាការគិតគូរពីសុខទុក្ខរបស់ពួកគាត់ទាំងបរិស្ថាន និងសុខុមាលភាព តែមិនមែនមានន័យថា រាជរដ្ឋាភិបាល បោះបង់សិទ្ធិទាមទារទឹកដីនោះឡើយ។ រាជរដ្ឋាភិបាល មានជំហរម៉ឺងម៉ាត់ និងដាច់ខាតក្នុងការការពារបូរណភាពទឹកដី ហើយបាននិងកំពុងធ្វើការងារនេះយ៉ាងសកម្មតាមយន្តការការទូតដោយសន្តិវិធី។

ទាំងអ្នកស្រី ម៉ៅ សាវ៉េត និងលោក ជា ឃាំង ដែលជាជនភៀសសឹក សុទ្ធតែមានជំនឿជឿជាក់ចំពោះរាជរដ្ឋាភិបាល ក្នុងការដោះស្រាយបញ្ហាព្រំដែនជាមួយភាគី និងរំពឹងថា រដ្ឋាភិបាលអាចទាមទារទឹកដី និងផ្ទះរបស់ពួកគាត់ពីយោធាថៃមកវិញទោះបីជាត្រូវចំណាយពេលយ៉ាងណាក៏ដោយ៕

ដោយ/ ង៉ិល ណារ៉ាត់

The post ទោះបានជម្រកថ្មីសមរម្យ តែជនភៀសសឹកនៅតែនឹកផ្ទះចាស់ ចង់ទៅរស់នៅវិញ ទាមទារឱ្យថៃរុះរើបន្លាលួសចេញ appeared first on Kampuchea Thmey Daily.

នៅពេលបានឃើញផ្ទាល់ភ្នែកនូវជម្រកបណ្ដោះអាសន្នដែលរាជរដ្ឋាភិបាលសាងសង់ជូន ពលរដ្ឋភៀសសឹកមកពីតំបន់បឹងត្រកួន ក្នុងស្រុកថ្មពួក ខេត្តបន្ទាយមានជ័យ រៀបរាប់ថា ពួកគាត់ហាក់ធូរស្រាលពីទុក្ខព្រួយនាពេលកន្លងមកមួយកម្រិត ដោយសារជម្រកបណ្ដោះអាសន្ននោះមានភាពល្អប្រសើរ សមរម្យ ងាយស្រួលរស់នៅជាងការរស់នៅក្នុងជម្រកតង់ ដែលកន្លងមកជួបនូវការលំបាកមួយចំនួន និងនឹករលឹកផ្ទះដែលធ្លាប់រស់នៅជាច្រើនឆ្នាំតែត្រូវយោធាថៃឈ្លានពានវាតទីយក។

លោក មាស ម៉ៅ វ័យ៤៣ឆ្នាំ ជនភៀសសឹកមកពីភូមិសាមគ្គី នៃតំបន់បឹងត្រកួន ដែលបានទៅមើលឃើញពីជម្រកបណ្ដោះអាសន្នផ្ទាល់ភ្នែក លោករៀបរាប់ថា ជម្រកបណ្ដោះអាសន្នដែលរដ្ឋាភិបាលសាងសង់ជូន គឺមានភាពសមសម្យ ទំហំទូលាយ អាចជួយឱ្យលោករស់នៅល្អប្រសើរជាងការរស់នៅក្នុងមណ្ឌលសុវត្ថិភាព។

លោក មាស ម៉ៅ ប្រាប់ក្រុមអ្នកសារព័ត៌មានថា៖« ជម្រកបណ្ដោះអាសន្នហ្នឹង សម្រាប់ខ្ញុំគឺសមរម្យ ស្អាត ទីធ្លាធំទូលាយ ទទួលយកបានទាំងអស់ សម្ដេច (ប្រមុខរដ្ឋភិបាល) គាត់រៀបចំឲ្យស្អាតបាតទាំងអស់។ ជម្រកបណ្តោះអាសន្នហ្នឹងមើលទៅសមរម្យគួរឱ្យចង់រស់នៅដែរ។»។

លោកបន្តថា ៖« ខ្ញុំធូរក្នុងចិត្តច្រើនហ្មង ព្រោះសម្ដេច(ប្រមុខរាជរដ្ឋាភិបាល)អត់ទុកពួកខ្ញុំចោលផង ព្រោះពួកខ្ញុំភៀសសឹកទាំងអស់ គឺសម្ដេចបានជួយជ្រោមជ្រែងគ្រប់គ្នាទាំងអស់ ទាំងអំណោយ ទាំងលុយទាំងកាក់បានទាំងអស់ ពួកខ្ញុំបានចាយនិងហូបចុកគ្រប់គ្រាន់ទាំងអស់។»។

ចំណែកលោកស្រី អង់ ណៃ វ័យ៥៥ឆ្នាំ ភៀសសឹកមកពីភូមិសាមគ្គី នៃតំបន់បឹងត្រកួន ប្រៀបធៀបក្រុមអ្នកសារព័ត៌មាននថាការរស់នៅក្នុងជម្រកតង់ គឺជួបការលំបាកមួយចំនួន ហើយឥឡូវនៅពេលដែលអ្នកស្រីបានឃើញនូវជម្រកបណ្ដោះអាសន្នដែលរដ្ឋាភិបាលរៀបចំជូន គឺលោកស្រី មានហាក់ធូរស្រាលទុក្ខព្រួយមួយកម្រិត។បន្ទាប់ពីបានឃើញនូវជម្រកបណ្ដោះអាសន្ន

បន្ទាប់ពីបានចូលទៅរស់នៅជម្រកបណ្ដោះអាសន្ន លោកស្រី អង់ ណៃ លើកឡើងដូច្នេះថា៖« ខ្ញុំធូរស្រាល បានសប្បាយចិត្ត ដូចថាយើងបានទៅរស់នៅក្នុងជម្រកបណ្ដោះអាសន្នទៅ បើជួបភ្លៀង ផ្គរយ៉ាងណាក៏យើងមានអារម្មណ៍ស្រួលចិត្តជាងនៅក្នុងតង់ ព្រោះនៅក្នុងតង់ពេលភ្លៀងសាចមក យើងត្រូវទប់ទឹកភ្លៀង បាំងទឹកភ្លៀងឱ្យជិត កុំឱ្យសាច ដើម្បីបានសម្រាក។»។

សម្ដេចនាយករដ្ឋមន្ត្រី ហ៊ុន ម៉ាណែត ធ្លាប់បានគូសបញ្ជាក់ថា ការផ្តល់ជម្រកបណ្តោះអាសន្នដល់ជនភៀសសឹកដែលមិនទាន់អាចវិលត្រឡប់ទៅផ្ទះសម្បែងវិញបាន គឺជាការគិតគូរពីសុខទុក្ខរបស់ពួកគាត់ទាំងបរិស្ថាន និងសុខុមាលភាព តែមិនមែនមានន័យថា រាជរដ្ឋាភិបាល បោះបង់សិទ្ធិទាមទារទឹកដីនោះឡើយ។ រាជរដ្ឋាភិបាល មានជំហរម៉ឺងម៉ាត់ និងដាច់ខាតក្នុងការការពារបូរណភាពទឹកដី ហើយបាននិងកំពុងធ្វើការងារនេះយ៉ាងសកម្មតាមយន្តការការទូតដោយសន្តិវិធី។

ពលរដ្ឋដែលជាជនភៀសសឹក ក៏មានជំនឿជឿជាក់ចំពោះរាជរដ្ឋាភិបាល ក្នុងការដោះស្រាយបញ្ហាព្រំដែនជាមួយភាគី និងរំពឹងថា រដ្ឋាភិបាលអាចទាមទារទឹកដី និងផ្ទះរបស់ពួកគាត់ពីយោធាថៃមកវិញ។

គួរជម្រាបថា និតីវិធីបែងចែកជម្រកបណ្ដោះអាសន្នជូនជនភៀសសឹក គឺតម្រូវឱ្យតំណាងគ្រួសារជនភៀសសឹកម្នាក់ឡើងចាប់ឆ្នោត យកលេខដែលក្រុមការងារបានបែងចែកលើជម្រកបណ្ដោះអាសន្នដែលបានសង់រួច។ ក្នុងថ្ងៃទី២០ ខែមីនា នេះ ពលរដ្ឋដែលស្នាក់នៅមណ្ឌលសុវត្ថិភាព បានរុះរើសម្ភារទៅចូលរស់នៅក្នុងជម្រកបណ្ដោះអាសន្នដែលរាជរដ្ឋាភិបាល និងរដ្ឋបាលខេត្តបន្ទាយមានជ័យរៀបចំជូននៅក្នុង ភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ៕

The post ក្រោយទទួលបានជម្រកបណ្ដោះអាសន្នពីរដ្ឋជនភៀសសឹកអះអាងថា «អារម្មណ៍ព្រួយលំបាកពីការរស់នៅធូរស្រាលជាងមុន» appeared first on Kampuchea Thmey Daily.

ក្នុងដំណើរការចាប់ផ្តើមនេះ ធ្វើឡើងក្រោមអធិបតីភាពលោកទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ រួមនិងនាយឧត្តមសេនីយ៍ ខេង សុមេធ, លោក ឌិត ទីណា រដ្ឋមន្ត្រីក្រសួងកសិកម្ម និងជាប្រធានក្រុមការងាររាជរដ្ឋាភិបាល អមដោយអភិបាលនៃគណៈអភិបាលខេត្ត បានចុះទៅដល់មូលដ្ឋាននៅថ្ងៃទី១៤ ខែកុម្ភៈ ឆ្នាំ២០២៦ និងបានរៀបចំពិធីបញ្ចុះបឋមសិលាសម្រាប់សាងសង់ជម្រកបណ្តោះអាសន្ននេះឡើងផងដែរ។

លោកទេសរដ្ឋមន្ត្រី គន់ គីម គូសបញ្ជាក់ថា ដោយមានការគិតគូរពីសុខទុក្ខបងប្អូនជនភៀសសឹក ដែលមាន ចាស់ ក្មេង ស្ត្រីមានផ្ទៃពោះ ជាពិសេសខណៈមុនរដូវភ្លៀងខិតជិតចូលមកដល់ ដែលនឹងធ្វើឱ្យស្ថានភាពរស់នៅរបស់ជនភៀសសឹកកម្ពុជា កាន់តែពិបាកផងនោះ រាជរដ្ឋាភិបាលកម្ពុជា និងគណៈកម្មាធិការអន្តរក្រសួង បានសម្រេចរៀបចំជាជម្រកបណ្តោះអាសន្នជូនពួកគាត់ លើផ្ទៃដីទំហំ ២០ម៉ែត្រx៣០ម៉ែត្រ សាងសង់ផ្ទះមួយខ្នង ដេីម្បីឱ្យពួកគាត់រស់នៅស្រួល មានទាំងបន្ទប់ទឹក ព្រមទាំងមានការរៀបចំហេដ្ឋារចនាសម្ព័ន្ធ មានភ្លេីង អណ្តូងទឹកជាដេីម។

លោកទេសរដ្ឋមន្ត្រីបន្តថា នៅពេលដែលព្រំដែនត្រូវបានដោះស្រាយចប់រួចរាល់ នៅពេលណាមួយ បងប្អូនជនភៀសសឹកអាចវិលត្រលប់ទៅភូមិឋានវិញ ហេីយដីផ្ទះទាំងនេះនឹងត្រូវប្រគល់ជូនរាជរដ្ឋាភិបាល ហេីយក្នុងនាមសមាគមអតីតយុទ្ធជន និងស្នេីសុំរដ្ឋាភិបាល សម្រាប់ជូនដល់បងប្អូនអតីតយុទ្ធរស់នៅបន្ត។ ខណៈការសាងសង់ជម្រកបណ្តោះអាសន្ននេះ លោកទេសរដ្ឋមន្ត្រីក៏ដូចជារដ្ឋបាលខេត្ត ប្តេជ្ញានឹងខិតខំជំរុញសំដៅធ្វេីយ៉ាងឱ្យការសាងសង់នេះឆាប់បានរួចរាល់មុនរដូវវស្សាឈានចូលមកដល់។

ក្នុងនាមរាជរដ្ឋាភិបាល ក៏ដូចជាអាជ្ញាធរខេត្ត ក៏បានថ្លែងអំណរគុណចំពោះលោក កែ គឹម យ៉ាន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រមណ្ឌលខេត្តបន្ទាយមានជ័យ និងលោកជំទាវ ដែលបានផ្តល់ដី ៤០០ហិកតា សម្រាប់សាងសង់ជម្រកបណ្តោះអាសន្នជូនជនភៀសសឹករស់នៅបណ្តោះអាសន្ន ដែលចំនួន៦ភូមិ ។ ក្នុងគ្រាដ៏លំបាកនេះដែរ រាជរដ្ឋាភិបាលកម្ពុជា នឹងធ្វេីការដោះស្រាយជូនជនភៀសសឹកផងដែរ តាមរយៈមូលនិធិសមធម៌ ដោះស្រាយការពិនិត្យព្យាបាលសុខភាពដោយមិនគិតថវិកា រួមទាំងដោះស្រាយប័ណ្ណសមធម៌សម្រាប់ផ្តល់ជាថវិកាគាំពារសង្គមប្រចាំខែជូនជនភៀសសឹកទាំង ៦ភូមិ ខាងលេីនេះ។

ជាមួយគ្នានោះ ក្រសួងកសិកម្ម នឹងធ្វេីការស្នេីសុំដល់រាជរដ្ឋាភិបាល ធ្វេីជាទីតាំងកសិកម្ម ដាំដុះដំណាំផ្សេងៗ ក៏ដូចជាផ្តល់ឱកាសដេីម្បីឱ្យពួកគាត់មានប្រាក់ចំណូលប្រចាំថ្ងៃ តាមរយៈការដាំដុះដោយខ្លួនឯងជាដេីម ហេីយក៏ទទួលបានឱកាសការងារ ទទួលបានចំណូលសម្រាប់ផ្គត់ផ្គង់គ្រួសារ ៕ ដោយ៖អពៅ

The post ជម្រកបណ្តោះអាសន្នជូនជនភៀសសឹក ៣០០០គ្រួសារ នៅខេត្តបន្ទាយមានជ័យ ចាប់ផ្តើមដំណើរការសាងសង់ appeared first on Kampuchea Thmey Daily.