តាមសេចក្ដីប្រកាសព័ត៌មានរបស់សាលាដំបូងខេត្តកណ្ដាល ជនត្រូវចោទជាប្ដីមានឈ្មោះ គឹម វណ្ណា អាយុ៣៥ឆ្នាំ ត្រូវបានចោទប្រកាន់ពីបទ ចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស ឃាតកម្មដែលមានស្ថានទម្ងន់ទោសទាក់ទងអាយុជនរងគ្រោះ តាមបញ្ញាត្តិមាត្រា ២៥៤ និងមាត្រា ២០២ នៃក្រមព្រហ្មទណ្ឌ។ និងឈ្មោះ ធី ណារ៉ុង អាយុ២៧(ជាប្រពន្ធ) ត្រូវបានចោទប្រកាន់ពីបទ សមគំនិតក្នុងអំពើចាប់ឃុំឃាំង និងបង្ខាំងដោយខុសច្បាប់ មានស្ថានទម្ងន់ទោស ឃាតកម្មដែលមានស្ថានទម្ងន់ទោសទាក់ទងអាយុជនរងគ្រោះ តាមបញ្ញាត្តិមាត្រា ២៩ និងមាត្រា២៥៤ និងមាត្រា ២០២ នៃក្រមព្រហ្មទណ្ឌ។

គួរជម្រាបថា ករណីចាប់ជំរិតក្មេងស្រីអាយុ៥ឆ្នាំ បានកើតឡើងកាលពីថ្ងៃទី១០ ខែឧសភា ឆ្នាំ២០២៦ នៅចំណុចផ្ទះជនដៃដល់ឈ្មោះ គីម វណ្ណា ស្ថិតនៅភូមិកូនជ្រែ ឃុំព្រែកអំបិល ស្រុកស្អាង ខេត្តកណ្ដាល។ ជនសង្ស័យជាប្ដីត្រូវបានកម្លាំងសមត្ថកិច្ចឃាត់ខ្លួនបានក្រោយកើតហេតុ ចំណែកជនសង្ស័យជាប្រពន្ធត្រូវបានឃាត់ខ្លួននៅថ្ងៃទី១៤ ខែឧសភា ឆ្នាំ២០២៦ បន្ទាប់ពីកិច្ចប្រតិបត្តិការយ៉ាងសកម្ម និងហ្មត់ចត់របស់ស្នងការដ្ឋាននគរបាលខេត្តកណ្តាល សហការជាមួយអង្គភាពជំនាញពាក់ព័ន្ធ ពិនិត្យ និងវិភាគយ៉ាងល្អិតល្អន់ទៅលើភស្តុតាង និងអង្គហេតុជុំវិញការស្លាប់របស់ជនរងគ្រោះ។ ជនសង្ស័យត្រូវបានគេស្គាល់ថា គឺជាពូសាច់ថ្លៃ និងម្ដាយមីងបង្កើតរបស់ក្មេងស្រីជនរងគ្រោះ បានផ្ញើសារគំរាមឪពុកម្ដាយក្មេងរងគ្រោះ និងជំរិតទារប្រាក់ចំនួន១ម៉ឺនដុល្លារជាថ្នូរនឹងការដោះលែងកូនស្រី។ ក្រោយពីទទួលបានសារពីជនសង្ស័យ ឪពុកម្ដាយក្មេងស្រីរងគ្រោះបានដាក់ពាក្យបណ្ដឹងឲ្យសមត្ថកិច្ចជួយអន្តរាគមន៍តែជនគ្រោះបានស្លាប់បាត់ទៅហើយ៕

The post ករណីជំរិតទារប្រាក់នៅខេត្តកណ្ដាល ៖ តុលាការសម្រេច ឃុំខ្លួនជនត្រូវចោទពីរនាក់ប្ដីប្រពន្ធដាក់ពន្ធនាគារ appeared first on Kampuchea Thmey Daily.

បើយោងតាមរយៈសាររប​ស់ជនដៃដល់ ដែលបានផ្ញើទៅឪពុកម្តាយកុមារីរងគ្រោះ ដោយបានបង្ខំឲ្យពួកគេផ្ញើលុយចំនួន ១ម៉ឺនដុល្លារ តាមវីងជូន ដោយទុកពេលត្រឹម១ម៉ោង បើលើសម៉ោងកំណត់សូមរង់ចាំសពកូនស្រីចុះ ជាមួយសារព្រមានថា កុំប្រាប់រឿងនេះដល់នគរបាល និងអ្នកជិតខាង។

ក្រោយជួបហេតុការណ៍ដ៏រន្ធត់នេះ ឪពុកម្តាយក្មេងស្រីរងគ្រោះបានប្តឹងទៅនគរបាលភ្លាមៗ ហើយកម្លាំងនគរបាលជំនាញព្រហ្មទណ្ឌ សហការជាមួយនគរបាលមូលដ្ឋានបើកប្រតិបត្តិការ និងឈានដល់ការចាប់ខ្លួនជនដៃដល់ តែអកុសលក្មេងស្រីរងគ្រោះបានស្លាប់ទៅហើយ។ 

បច្ចុប្បន្នសមត្ថកិច្ចជំនាញនៃស្នងការដ្ឋាននគរបាលខេត្តកណ្ដាលកំពុងសួរនាំបន្តទៀត ដើម្បីចាត់ការតាមនីតិវីច្បាប់៕

The post ជនដៃដល់ចាប់ជំរិតក្មេងស្រីអាយុ ៥ ឆ្នាំ ទុកពេលឲ្យឪពុកម្តាយ ១ ម៉ោង ជាថ្នូរដូរយកលុយ ១ ម៉ឺនដុល្លារ  តែអកុសលក្មេងរងគ្រោះបានស្លាប់ appeared first on Kampuchea Thmey Daily.

ក្រោមការបញ្ជាផ្ទាល់របស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស, លោក ម៉ាង ស៊ីណេត អភិបាលខេត្តព្រះសីហនុ និងលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ក្រោមការសម្របសម្រួលរបស់តំណាងអយ្យការអមសាលាដំបូងខេត្តព្រះសីហនុ។

បន្ទាប់ពីទទួលបានព័ត៌មានករណីចាប់ឃុំឃាំង និងបង្ខាំងមនុស្សដោយខុសច្បាប់ (ជំរិតទារប្រាក់), រំលោភសេពសន្ថវៈ, លក់-ដូរមនុស្ស និងករណីគ្រឿងញៀន ដែលប្រព្រឹត្ដកាលពីថ្ងៃទី២៩ ខែមេសា ឆ្នាំ២០២៦ រហូតដល់ថ្ងៃទី៦ ខែឧសភា ឆ្នាំ២០២៦ នៅចំណុចក្រុងព្រះសីហនុ និងក្រុងកំពង់សោម។ កាលពីថ្ងៃទី៦ ខែឧសភា ឆ្នាំ២០២៦ទៀបភ្លឺ កងកម្លាំងការិយាល័យព្រហ្មទណ្ឌបានទទួលបណ្ដឹងពីមិត្តភក្កិជនរងគ្រោះ មានករណីគេចាប់បង្ខាំងជំរិតទារប្រាក់ នៅក្នុងផ្ទះវីឡាមួយកន្លែងស្ថិតក្នុងភូមិ១ សង្កាត់លេខ២ ក្រុងព្រះសីហនុ ខេត្តព្រះសីហនុ។

ក្រោយពីទទួលបានបណ្ដឹងនៅវេលាម៉ោង ៨:៣០នាទីថ្ងៃខែឆ្នាំដដែល កម្លាំងកងរាជអាវុធហត្ថខេត្តដឹកនាំដោយលោកវរសេនីយ៍ទោ សួ ស៊ន ប្រធានមន្ទីរស្រាវជ្រាវ និងបង្ក្រាបបទល្មើស ដោយមានការសម្របសម្រួលនីតិវិធីពីលោក វុធ សាវី ព្រះរាជអាជ្ញារងនៃអយ្យការអមសាលាដំបូងខេត្តព្រះសីហនុ បានចុះទៅដល់ចំណុចផ្ទះវីឡាខាងលើ ប៉ុន្តែជនសង្ស័យបានយកជនរងគ្រោះចេញពីផ្ទះនោះបាត់ហើយ រួចកម្លាំងជំនាញបន្ដស្រាវជ្រាវ រហូតដល់ចំណុចខុនដូរ «ស្ដាបេ» ស្ថិតក្នុងភូមិ១ សង្កាត់លេខ៣ ក្រុងព្រះសីហនុ ខេត្ដព្រះសីហនុ បានធ្វើការនាំខ្លួនជនសង្ស័យ ចំនួន០៣នាក់ (ស្រី ០២នាក់)​ កម្លាំងជំនាញរកឃើញដកហូតវត្ថុតាងមួយចំនួន៖ រថយន្ដចំនួន ០១គ្រឿង ម៉ាក MAYBACH SG50 ពណ៌ខ្មៅ ផ្លាកលេខភ្នំពេញ 2AZ-6866 និងទូរស័ព្ទដៃ ចំនួន ០២គ្រឿង។

លុះដល់វេលាម៉ោង ១១:១០នាទី ថ្ងៃខែឆ្នាំដដែលកម្លាំងជំនាញ បានបន្តធ្វើការស្រាវជ្រាវដល់ចំណុចបុរី «លន់ស៊ីធី» ស្ថិតក្នុងភូមិចំណោតរាម សង្កាត់បិតត្រាំង ក្រុងកំពង់សោម ខេត្តព្រះសីហនុ ទើបជួយសង្គ្រោះជនរងគ្រោះ ជាជនជាតិចិន ព្រមទាំងឃាត់ខ្លួនជនសង្ស័យចំនួន០៣នាក់ (ប្រុស) ជនជាតិចិន និងដកហូតវត្ថុតាងរួមមាន៖ ទូរស័ព្ទដៃចំនួន០៣គ្រឿង, រថយន្ដចំនួន ០១គ្រឿង ម៉ាក PRLUS ពណ៌ស ផ្លាកលេខ 2BX-3076, ក្រណាត់បូពណ៌ទឹកមាស រុំថង់ខ្មៅបិទស្គុត (សម្រាប់រុំភ្នែក) ចំនួន០១ និងគ្រឿងញៀនមួយចំនួន។

តាមការស្រាវជ្រាវរបស់កម្លាំងជំនាញអាវុធហតហត្ថ ជនរងគ្រោះត្រូវបានជនសង្ស័យបោកប្រាស់ឱ្យមកប្រទេសកម្ពុជា ដែលក្រុមជនល្មើសមានអង្គការចាត់តាំង ដោយឱ្យស្ដ្រីដែលបម្រើការងារជានារីកំដរ ធ្វើការទាក់ទងជាមួយស្ដ្រីៗកំដរដូចគ្នា តាមរយៈកុហុកថា ជួយរកការងារឱ្យ (មានថៅកែចិញ្ចឹម)។ បន្ទាប់ពីចាញ់បោកការលួងលោម ស្រ្តីរងគ្រោះបានចាកចេញពីប្រទេសម៉ាឡេស៊ី ចូលមកប្រទេសកម្ពុជា ហើយក្រុមឧក្រិដ្ឋជន ក៏បានរៀបចំរថយន្ដទៅទទួលជនរងគ្រោះពីព្រលានយន្ដហោះថ្មី រួចដឹកមកខេត្ដព្រះសីហនុ និងយកមកឃុំឃាំងនៅក្នុងខុនដូរមួយកន្លែងចំកណ្ដាលទីក្រុង ព្រមទាំងជំរិតយកប្រាក់ពីជនរងគ្រោះ ដោយផ្ទេរប្រាក់ពីគណនីធនាគារចិន អស់ចំនួនជិត ៣០ម៉ឺនយ័ន និងបង្ខំជនរងគ្រោះរួមភេទ ប្រើប្រាស់គ្រឿងញៀន ប៉ុន្ដែ មិនប្រើហិង្សា ប៉ុន្ដែពួកគេបានបង្ខំឱ្យជនរងគ្រោះទាក់ទងទៅមិត្ដភក្ដិដែលជានារី ដើម្បីបោកបញ្ឆោតពួកគេ នឹងដោះលែងជនរងគ្រោះឱ្យមានសេរីភាពវិញ។ បន្ទាប់ពីជនរងគ្រោះអស់ប្រាក់ឱ្យពួកគេ គឺពួកគេបានលក់ជនរងគ្រោះ ឱ្យទៅក្រុមជនជាតិចិនផ្សេងទៀត ក្នុងតម្លៃ ៥ម៉ឺនដុល្លារ (USTD) បន្ដទៀត។

តាមរបាយការណ៍ដដែល បានគូសបញ្ជាក់ថា ចំពោះក្រុមឧក្រិដ្ឋខាងលើនោះ គឺបោកតែស្ដ្រីភាគច្រើនជានារីកំដរភ្ញៀវ បន្ទាប់ពីជំរិតអស់ប្រាក់ហើយ គោលបំណងរបស់ពួកគេ គឺលក់ជនរងគ្រោះឱ្យទៅក្រុមជួញដូរមនុស្ស មិនមានបំណងដោះលែងនោះទេ ប៉ុន្ដែបើជនរងគ្រោះស្ម័គ្រចិត្ដធ្វើតាមពួកគេ ដោយបោកនារីណាម្នាក់មកជំនួសនោះ ទើបក្រុមឧក្រិដ្ឋដោះលែងជនរងគ្រោះអាចមានសេរីភាពវិញ៕

The post អាវុធហត្ថខេត្តព្រះសីហនុ ចាប់ខ្លួនជនល្មើស៦នាក់ ដែលចាប់បង្ខាំង និង ជំរិតទារប្រាក់ពីស្ត្រីជនជាតិចិនដូចគ្នា appeared first on Kampuchea Thmey Daily.

ប្រតិបត្តិការនេះ ធ្វើឡើងបន្ទាប់ពីនាយកដ្ឋាននគរបាលព្រហ្មទណ្ឌ បានទទួលពាក្យបណ្តឹងពីបុរសជនជាតិវៀតណាមឈ្មោះ Phan Van Tien អាយុ ២៣ឆ្នាំ ដែលបានរាយការណ៍ថា មិត្តស្រីរបស់ខ្លួនឈ្មោះ Lam Thi Nheu អាយុ ២១ឆ្នាំ ត្រូវបានជនមិនស្គាល់អត្តសញ្ញាណចាប់បង្ខាំង និងជំរិតទារប្រាក់កាលពីថ្ងៃទី២៥ ខែមីនា ឆ្នាំ២០២៦ វេលាម៉ោង ០៣និង៤០នាទី នៅចំណុចសង្កាត់វត្តភ្នំ ខណ្ឌដូនពេញ រាជធានីភ្នំពេញ។

ក្រោយទទួលបានព័ត៌មាន កម្លាំងជំនាញបានចាប់ផ្តើមស្រាវជ្រាវភ្លាមៗ ដោយប្រើប្រាស់វិធានការនីតិវិធី និងបច្ចេកទេសជំនាញ ដើម្បីកំណត់អត្តសញ្ញាណ និងទីតាំងស្នាក់នៅរបស់ក្រុមជនសង្ស័យ។ ប្រតិបត្តិការតាមដានបានបន្តរហូតដល់ថ្ងៃទី០១ ខែមេសា ឆ្នាំ២០២៦ វេលាម៉ោង ២១និង២០នាទី ទើបកម្លាំងសមត្ថកិច្ចអាចចូលប្រតិបត្តិការបង្ក្រាប និងសង្គ្រោះជនរងគ្រោះបានដោយសុវត្ថិភាព។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យចំនួន ១១នាក់ (១០នាក់ភេទប្រុស និង ១នាក់ភេទស្រី) សុទ្ធសឹងជាជនជាតិចិន។ ការចាប់ខ្លួនបានធ្វើឡើងនៅចំណុចសង្កាត់២ ក្រុងព្រះសីហនុ ខេត្តព្រះសីហនុ។

តាមការស្រាវជ្រាវបឋម ក្រុមជនសង្ស័យបានប្រើល្បិចណាត់ជួបជាមួយនារីរងគ្រោះក្រោមរូបភាពបម្រើសេវាផ្លូវភេទ បន្ទាប់មកធ្វើសកម្មភាពចាប់បង្ខាំង និងជំរិតទារប្រាក់ពីជនរងគ្រោះ។ សមត្ថកិច្ចក៏បានបញ្ជាក់ថា ក្រុមនេះធ្លាប់បានប្រព្រឹត្តអំពើដូចគ្នាជាច្រើនលើកមកហើយ មុនពេលត្រូវបានបង្ក្រាប។

បច្ចុប្បន្ន ជនសង្ស័យទាំងអស់កំពុងត្រូវបានសាកសួរ និងរៀបចំនីតិវិធីបន្តនៅនាយកដ្ឋាននគរបាលព្រហ្មទណ្ឌ ដើម្បីចាត់ការតាមផ្លូវច្បាប់ ខណៈជនរងគ្រោះត្រូវបានសង្គ្រោះ និងផ្តល់ការថែទាំសុវត្ថិភាពតាមនីតិវិធី៕

អត្ថបទ៖ សំណាង

The post ប្រតិបត្តិការបង្ក្រាបករណីបង្ខាំង និងជំរិតទារប្រាក់ រំដោះបានជនរងគ្រោះ៣នាក់ ខណៈជនសង្ស័យ ១១នាក់ត្រូវឃាត់ខ្លួន appeared first on Kampuchea Thmey Daily.

ប្រតិបត្តិការ​នេះ​ធ្វើឡើង​កាលពី​ថ្ងៃ​ទី ២៧ ខែ​មករា ឆ្នាំ ២០២៦ ដោយ​កម្លាំង​គណៈ​បញ្ជាការ​ឯកភាព​ខណ្ឌ​បឹង​កេងកង ដឹកនាំ​ដោយ​លោក សុខ សម្បត្តិ អភិបាល​ខណ្ឌ និង​កម្លាំង​ជំនាញ បាន​ចុះ​ឆែកឆេរ​ចំណុច​អគារ​លេខ ៦២៣ AGILE SKY RESIDENCE នៅ​ផ្លូវ​មុនី​វង្ស ភូមិ ៧ សង្កាត់​បឹង​កេងកង ៣ ខណ្ឌ​បឹង​កេងកង រាជធានី​ភ្នំពេញ។

ក្នុង​រង្វង់​ប្រតិបត្តិការ​កម្លាំង​ជំនាញ​បាន​ធ្វើការ​ឆែកឆេរ​បន្ទប់​លេខ​ A36-16 និង​បន្ទប់​លេខ​ A36-17 ធ្វើការ​ឃាត់ខ្លួន​ជនសង្ស័យ​ម្នាក់ ពាក់ព័ន្ធ​ក្នុង​ករណី​ឃុំឃាំង និង​បង្ខាំង​មនុស្ស​ដោយ​ខុសច្បាប់​ជំរិត​ទារ​ប្រាក់​ចំនួន ​៥,០០០ ដុល្លារ។ កម្លាំង​អាជ្ញាធរ​បាន​ដកហូត​សម្ភារៈ​រួមមាន ៖ លិខិត​ឆ្លងដែន​ចំនួន ១ ច្បាប់ ​, សៀវភៅ​ការងារ​ជនបរទេស​ចំនួន ១​ សន្លឹក ​, ម្សៅ​ម៉ត់​ស​ចំនួន ២ កញ្ចប់ (​សង្ស័យ​ជា​គ្រឿង​ញៀន​) , ក្រាម​ពណ៌​ស​ថ្លា​ចំនួន​ ៤​ កញ្ចប់​ តូច​ ២ ធំ ​២ (​សង្ស័យ​ជា​គ្រឿងញៀន​) , ជញ្ជីង​ថ្លឹង​គ្រឿង​ញៀន​ចំនួន ២ , ថ្នាំ​គ្រាប់​អក្សរ​ wwy ចំនួន​ ១២​ គ្រាប់ ​, សម្ភារៈ​កែច្នៃ​សម្រាប់​ប្រើប្រាស់​គ្រឿងញៀន​មួយ​ចំនួន និង​ខ្សែ​ច្រវាក់​ដែក​អ៊ីណុក​ពណ៌​ស ​ប្រវែង​ជាង​ ១​ ម៉ែត្រ។

មន្ត្រី​ជំនាញ​ បាន​បញ្ជាក់​ថា ជនសង្ស័យ​ឈ្មោះ REN XIAOPENG អាយុ​ ៤២ ​ឆ្នាំ ជនជាតិ​ចិន ស្នាក់នៅ​បន្ទប់​លេខ A36-16 និង​បន្ទប់​លេខ A36-17 ជាន់​ទី ៣៦។ ចំណែក​ជនរងគ្រោះ​ឈ្មោះ ហ គ ហ ភេទ​ស្រី អាយុ ​២៣ ​ឆ្នាំ ជនជាតិ​ខ្មែរ មុខរបរ​បុគ្គលិក​ហាង ស្នាក់នៅ​សង្កាត់​ភ្នំពេញ​ថ្មី ខណ្ឌ​សែន សុខ រាជធានី​ភ្នំពេញ។

គួរ​រំលឹក​ផង​ដែរ​ថា កាលពី​ថ្ងៃ​ទី ២៣ ខែ​មករា ឆ្នាំ ២០២៦ ជនរងគ្រោះ និង​ជនសង្ស័យ បាន​ចូល​មក​ស្នាក់នៅ​បន្ទប់​លេខ A36-16 និង​បន្ទប់​លេខ A36 -17 ជាន់​ទី ៣៦ អគារ​ខាងលើ។ លុះ​ថ្ងៃ​ទី​ ២៦ ខែ​មករា ឆ្នាំ ​២០២៦ ជនសង្ស័យ​បាន​យក​ទូរស័ព្ទ​របស់​ជនរងគ្រោះ​ឆាត​ទៅ​ទារ​លុយ​បងស្រី​បង្កើត​ជនរងគ្រោះ​ចំនួន ​៥,០០០​ ដុល្លារ។ បន្ទាប់មក​ បងស្រី​របស់​ជនរងគ្រោះ​បាន​មក​រាយការណ៍ និង​ដាក់​ពាក្យ​ប្តឹង​នៅ​សមត្ថកិច្ច​ប៉ុស្ដិ៍​នគរបាល​រដ្ឋបាល​បឹង​កេងកង​ទី ៣។

បច្ចុប្បន្ន ជនសង្ស័យ និង​វត្ថុតាង​ ត្រូវ​បាន​បញ្ជូន​ទៅ​អធិការដ្ឋាន​នគរបាល​ខណ្ឌ​បឹង​កេងកង ដើម្បី​កសាង​សំណុំរឿង​ចាត់ការ​តាម​នីតិវិធី៕

អត្ថបទ ៖ សុភា

The post ឃាត់ខ្លួនជនជាតិចិនម្នាក់ សង្គ្រោះនារីរងគ្រោះខ្មែរម្នាក់ ករណីចាប់ឃុំឃាំង និងបង្ខាំងមនុស្សជំរិតទារប្រាក់ នៅខណ្ឌបឹងកេងកង appeared first on Kampuchea Thmey Daily.

ប្រតិបត្តិការបង្ក្រាបក្រុមជនសង្ស័យករណីចាប់ជំរិតទារប្រាក់នេះ ធ្វើឡើងបន្ទាប់ពីនាយកដ្ឋាននគរបាលព្រហ្មទណ្ឌទទួលបានពាក្យបណ្តឹងពីឈ្មោះ TANG QUNHUI ភេទស្រី អាយុ៥៧ឆ្នាំ ជនជាតិចិន ដោយកូនប្រុសរបស់ខ្លួនឈ្មោះ YIN XING ភេសប្រុស អាយុ៣៤ឆ្នាំ ជនជាតិចិន ត្រូវបានជនមិនស្គាល់អត្តសញ្ញាណធ្វើការចាប់បង្ខាំង និងជំរិតទារប្រាក់ កាលពីថ្ងៃទី២ ខែមករា ឆ្នាំ២០២៦កន្លងទៅ។

តាមរបាយការណ៍របស់នាយកដ្ឋាននគរបាលព្រហ្មទណ្ឌ ជនសង្ស័យដែលត្រូវឃាត់ខ្លួនមាន ១-ឈ្មោះ CHEN YUE អាយុ៤០ឆ្នាំ ភេទប្រុស ជនជាតិចិន។ ២-ឈ្មោះ LAING CHANG LAI ភេទប្រុស អាយុ២៨ឆ្នាំ ជនជាតិចិន។ ៣-ឈ្មោះ DA HAL ភេទប្រុស អាយុ២៨ឆ្នាំ ជនជាតិចិន។ ៤-ឈ្មោះ TONG YUN ភេទប្រុស អាយុ៣៥ឆ្នាំ ជនជាតិ។ ៥-ឈ្មោះ LU YI WANG ភេទប្រុស អាយុ២៧ឆ្នាំ ជនជាតិចិន។ ភូមិត្រពាំងផ្លុងទី១ ឃុំត្រពាំងផ្លុង ស្រុកពញ្ញាក្រែក ខេត្តត្បួងឃ្មុំ។ របាយការបញ្ជាក់ថា ប្រតិបត្តការនេះ ធ្វើឡើងនៅភូមិត្រពាំងផ្លុងទី១ ឃុំត្រពាំងផ្លុង ស្រុកពញ្ញាក្រែក ខេត្តត្បួងឃ្មុំ។

ក្រោយពីឃាត់ខ្លួន ជនសង្ស័យត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តត្បូងឃ្មុំ ដើម្បីកសាងសំណុំរឿងអនុវត្តតាមនីតិវិធីច្បាប់៕

The post នគរបាលព្រហ្មទណ្ឌស្រាវជ្រាវបង្ក្រាបករណីជំរិតទារប្រាក់៥ម៉ឺនដុល្លារ និងរំដោះជនរងគ្រោះ៩នាក់ appeared first on Kampuchea Thmey Daily.

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានឲ្យដឹងនៅព្រឹកថ្ងៃទី១០ ខែមករា ឆ្នាំ២០២៦នេះថា កាលពីថ្ងៃទី៥ ខែមករា ឆ្នាំ២០២៦ កម្លាំងជំនាញរួមមានការិយាល័យប្រឆាំងបទល្មើសបច្ចេកវិទ្យា ការិយាល័យអន្តរាគមន៍ និងតម្រួតបទបញ្ជា និងអធិការដ្ឋាននគរបាលខណ្ឌចំការមន ដោយមានការសម្របសម្រួលនីតិវិធីពីលោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យដើម្បីធ្វើការស្រាវជ្រាវនៅទីតាំងសង្ស័យមានករណីបង្ខាំងជំរិតទារប្រាក់នៅបន្ទប់លេខ៣៩-១០ ជាន់ទី៣៩,​បន្ទប់លេខ​៤០-០៩ ជាន់ទី៤០ សណ្ឋាគារ ហ័រ ហួយ គ័ន ស៊ី ជាន ថាង ហូថែល ឯ.ក ស្ថិតក្នុងអគារ ហ័រសាន អន្តរជាតិ ផ្លូវបើក ថ្មី ភូមិ១៤ សង្កាត់ទន្លេបាសាក់ ខណ្ឌចំការមន រាជធានី ភ្នំពេញ។

លោកស្នងការបញ្ជាក់ថា ក្នុងរង្វង់ប្រតិបត្តិការ កម្លាំងសមត្ថកិច្ចជំនាញបានរកឃើញជនរងគ្រោះឈ្មោះ LIANG TAO ភេទប្រុស អាយុ៤៧ឆ្នាំ ជនជាតិចិន (រងរបួសធ្ងន់) ក្នុងបរិវេណសណ្ឋាគារខាងលើ និងបានធ្វើការឃាត់ខ្លួនជនសង្ស័យម្នាក់ឈ្មោះ ម៉ា ជីវ៉ៃ ភេទប្រុស អាយុ៣២ ឆ្នាំជនជាតិចិន សញ្ជាតិខ្មែរ។ សមត្ថកិច្ចរកឃើញ វត្ថុតាង បន្សល់ទុកនៅកន្លែងកើតហេតុបន្ទប់លេខ ៤០-០៩ ជាន់ទី៤០ រួមមាន ឧបករណ៍សម្រាប់ឆក់ ពណ៌ខ្មៅ ចំនួន១គ្រឿង និងកំរាលតុ ពណ៌ប្រផេះ ចំនួន១កំរាល (ប្រើប្រាស់សម្រាប់គ្រប បាំងមុខជនរងគ្រោះ) និងបានបញ្ជូនមកស្នងការដ្ឋាននគរបាល រាជធានីភ្នំពេញ ដើម្បីសាកសួរ។

ក្រោយមកសមត្ថកិច្ចបានបន្តធ្វើការស្រាវជ្រាវស្វែងរកឃើញអត្តសញ្ញាណជនសង្ស័យដែលបានរត់គេចខ្លួនចំនួន២នាក់ទៀត (ជនដៃដល់) ទី១៖ ឈ្មោះ CHEN XIANGLIANG ភេទប្រុស អាយុ៣៦ឆ្នាំ ជនជាតិចិន និងទី២៖ ឈ្មោះ FU DONGDONG ភេទប្រុស អាយុ៣៦ឆ្នាំ ជនជាតិចិន និងឃាត់ជនសង្ស័យ ចំនួន១នាក់ខាងលើ នាំខ្លួនមកកាន់ស្នងការដ្ឋានដ្ឋាននគរបាលរាជធានី។

លោកបានបន្ដថា យោងវត្ថុតាងដែលបានដកហូតពីកន្លែងកើតហេតុលទ្ធផល ស្រាវជ្រាវត្រួតពិនិត្យ និងតាមការស្តាប់ចម្លើយសមត្ថកិច្ចឃាត់ខ្លួនមនុស្សចំនួន៣នាក់ បញ្ជូនទៅតុលាការ រួមមាន៖ ទី១៖ ឈ្មោះ ម៉ា ជីវ៉ៃ ភេទប្រុស អាយុ៣២ឆ្នាំ ជនជាតិចិន សញ្ជាតិខ្មែរ (អ្នកផ្សំគំនិត) ឃាត់បាននៅនឹងកន្លែង ទី២៖ ឈ្មោះ CHEN XIANGLIANG ភេទប្រុស អាយុ៣៦ឆ្នាំ ជនជាតិចិន សញ្ជាតិចិន (ជនដៃដល់) ឃាត់ នៅអាកាសយានដ្ឋានអន្តរជាតិតេជោ បាន ព្យាយាមលួចរត់ចេញទៅក្រៅប្រទេស ទី៣៖ ឈ្មោះ FU DONGDONG ភេទប្រុស អាយុ៣៦ឆ្នាំ ជនជាតិចិន សញ្ជាតិចិន (ជនដៃដល់) ឃាត់ នៅអាកាសយានដ្ឋានអន្តរជាតិតេជោ បានព្យាយាមលួចរត់ចេញទៅក្រៅប្រទេស។

ជនសង្ស័យទាំង៣នាក់ បានសារភាពថា ខ្លួន និងបក្ខពួកពិតជាបានប្រព្រឹត្តបទល្មើសនៅរាជធានីភ្នំពេញ កាលពីថ្ងៃទី ៤ ខែមករា ឆ្នាំ២០២៦ ប្រាកដមែន។ ក្នុងចំណោមបក្ខពួកខាងលើ គឺនៅសល់បក្ខពួកមួយចំនួនទៀត ដែលសមត្ថកិច្ចកំពុងតាមចាប់ខ្លួនបន្ត។ ក្រុមជនសង្ស័យខាងលើបានរៀបចំគម្រោងផែនការគិតទុកជាមុន ដោយជនសង្ស័យឈ្មោះ CHEN XIANGLIANG បានណាត់ជនរងគ្រោះ មកជួបនៅបន្ទប់លេខ ៣៩-១០ ដែលជាបន្ទប់ បានកក់ទុករួចសម្រាប់បង្ខាំងធ្វើទារុណកម្មជំរិតទារប្រាក់ពីជនរងគ្រោះឈ្មោះ LIANG TAO ហើយជនសង្ស័យឈ្មោះ ម៉ា ជីវ៉ៃ, FU DONG DONG និងបក្ខពួក រង់ចាំនៅក្នុងបន្ទប់លេខ ៣៩-១០ ជាមុន។

ជាមួយគ្នានេះ លោកឧត្តមសេនីយ៍ឯក ជួន ណារិន្ទ បានអំពាវនាវដល់ជនរងគ្រោះផ្សេងទៀត មកដាក់ពាក្យបណ្ដឹងនៅស្នងការដ្ឋាននគរបាលរាជធានីភ្នំពេញ ដើម្បីចូលរួមកំចាត់ក្រុមឧក្រិដ្ឋជនខាងលើនេះ សំដៅធានាសុខសុវត្ថិភាព សណ្ដាប់ធ្នាបជូនប្រជាពលរដ្ឋ និងអ្នកវិនិយោគជាតិ និងអន្តរជាតិ៕

អត្ថបទ៖ សុភា

The post នគរបាលរាជធានីភ្នំពេញ ឃាត់ខ្លួនជនជាតិ​ចិន​៣​នាក់​ពាក់ព័ន្ធករណីបង្ខាំងជំរិតទារប្រាក់ appeared first on Kampuchea Thmey Daily.

ប្រតិបត្តិការ​នេះ​បាន​ធ្វើ​ឡើង​កាលពី​ថ្ងៃ​ទី ២៣ កញ្ញា រហូតដល់​ថ្ងៃ​ទី ២៨ កញ្ញា ជា​បន្តបន្ទាប់ រហូត​ជោគជ័យ ដោយ​អនុវត្ត​តាម​បទបញ្ជា​របស់​លោក​នាយ​ឧត្ដមសេនីយ៍ ស ថេត អគ្គស្នងការ​នគរបាល​ជាតិ និង​លោក​ឧត្ដមសេនីយ៍​ឯក ង៉េង ជួ ប្រធាន​នាយកដ្ឋាន​នគរបាល​ព្រហ្មទណ្ឌ បញ្ជា​ឲ្យ​ដឹកនាំ​កម្លាំង​ជំនាញ​របស់​នាយកដ្ឋាន​នគរបាល​ព្រហ្មទណ្ឌ សហការ​ជាមួយ​ស្នងការដ្ឋាន​នគរបាល​រាជធានី​ភ្នំពេញ , ខេត្ត​ស្វាយរៀង ​, ខេត្ត​ព្រះសីហនុ និង​ខេត្ត​កណ្តាល ធ្វើការ​ស្រាវជ្រាវ​តាម​នីតិវិធី និង​ជំនាញ រហូត​កំណត់​បាន​អត្តសញ្ញាណ​របស់​ក្រុម​ជនសង្ស័យ​ទាំង ០៨ នាក់។

មន្ត្រី​ជំនាញ​បាន​បញ្ជាក់​ថា ក្នុង​រង្វង់​ប្រតិបត្តិការ កម្លាំង​ជំនាញ​ពាក់ព័ន្ធ​បាន​ធ្វើការ​ស្រាវជ្រាវ​តាំងពី​ទទួល​បាន​ពាក្យបណ្ដឹង​របស់​ជនរងគ្រោះ។ លុះ​នៅ​ថ្ងៃ​ទី ២៣ ខែ​កញ្ញា ឆ្នាំ ២០២៥ កម្លាំង​ជំនាញ​របស់​នាយកដ្ឋាន​នគរបាល​ព្រហ្មទណ្ឌ បាន​ធ្វើការ​ជួយ​សង្គ្រោះ​ជនរងគ្រោះ​នៅ​ចំណុច​ស្ថិត​ក្នុង​ផ្លូវ ៥៨ ភូមិ​ដី​ថ្មី សង្កាត់​ភ្នំពេញ​ថ្មី ខណ្ឌ​សែន​សុខ រាជធានី​ភ្នំពេញ។

ក្រុម​ជនសង្ស័យ​ទាំង ០៨ នាក់ រួមមាន ៖ ០១-ឈ្មោះ ZHU LI MIN ភេទ​ប្រុស អាយុ ៤៤ ឆ្នាំ ជនជាតិ​ចិន។ ០២-ឈ្មោះ HE YE ភេទ​ប្រុស អាយុ ៣០ ឆ្នាំ ជនជាតិ​ចិន។ ០៣-ឈ្មោះ HE SHUAI ភេទ​ប្រុស អាយុ ៣០ ឆ្នាំ ជនជាតិ​ចិន។ ០៤-ឈ្មោះ WANG HUA XIE ភេទ​ប្រុស អាយុ ៦០ ឆ្នាំ ជនជាតិ​ចិន។ ០៥-ឈ្មោះ យឿន វ​ឌ្ឍ​នា ភេទ​ប្រុស អាយុ ៣៤ ឆ្នាំ ជនជាតិ​ខ្មែរ។ ០៦-ឈ្មោះ ដោម សីហា ភេទ​ប្រុស អាយុ ៤១ ឆ្នាំ ជនជាតិ​ខ្មែរ។ ០៧-ឈ្មោះ យ៉ា ចំរុង ភេទ​ប្រុស អាយុ ២៩ ឆ្នាំ ជនជាតិ​ខ្មែរ និង ០៨-ឈ្មោះ វ៉ែន ដា​វីត ភេទ​ប្រុស អាយុ ៣២ ឆ្នាំ ជនជាតិ​ខ្មែរ។

គួរ​បញ្ជាក់​ថា កាលពី​ថ្ងៃ​ទី ២០ ខែ​កញ្ញា ឆ្នាំ ២០២៥ អគ្គស្នងការដ្ឋាន​នគរបាល​ជាតិ បាន​ទទួល​បណ្ដឹង​តាមរយៈ​ទូរស័ព្ទ​ដៃ ដោយ​មាន​ករណី​បង្ខាំង​មនុស្ស​ខុសច្បាប់ និង​ជំរិត​ទារ​ប្រាក់ បង្ក​ដោយ​ជនសង្ស័យ​មួយ​ក្រុម​ជនជាតិ​ចិន ជិះ​រថយន្ត ០១ គ្រឿង ម៉ាក TOYOTA ALPHARD ពណ៌​ស បាន​ធ្វើ​សកម្មភាព​ចាប់​ជនរងគ្រោះ​ម្នាក់​ឈ្មោះ JACKY TANG SAI TING ភេទ​ប្រុស អាយុ ៣៨ ឆ្នាំ ជនជាតិ​ចិន សញ្ជាតិ​កាណាដា ចេញពី​សណ្ឋាគារ​មួយ​កន្លែង ស្ថិត​ក្នុង​សង្កាត់​វាលវង់ ខណ្ឌ ៧ មករា រាជធានី​ភ្នំពេញ។

បច្ចុប្បន្ន ក្រុម​ជនសង្ស័យ ត្រូវ​បាន​កម្លាំង​នាយកដ្ឋាន​នគរបាល​ព្រហ្មទណ្ឌ កសាង​សំណុំរឿង​បញ្ជូន​ទៅកាន់​អយ្យការ​អម​សាលាដំបូង​រាជធានី​ភ្នំពេញ៕

អត្ថបទ ៖ សុភា

The post ឃាត់ខ្លួនជនសង្ស័យ ០៨ នាក់ ករណីចាប់បង្ខាំងមនុស្សខុសច្បាប់ និងជំរិតទារប្រាក់ appeared first on Kampuchea Thmey Daily.