ដាយណូស័រ Archives - Kampuchea Thmey Daily

អ្នកបុរាណវិទូសន្និដ្ឋាន ផ្លូវដាយណូស័រជាច្រើននៅតំបន់ភ្នំ Alps អ៊ីតាលី បន្សល់ទុកពីរាប់លានឆ្នាំ

Minea Neu — Wed, 17 Dec 2025 07:38:32 +0000

ផ្លូវសត្វដាយណូស័រជាច្រើនបានបន្សល់ទុកពីជាង ២១០ពាន់លានឆ្នាំកន្លងទៅ ដែលបានរកឃើញនៅប្រទេសអ៊ីតាលី ក្នុងសួនឧទ្យាន Stelvio Natiion Park មានទីតាំងនៅកណ្តាលតំបន់ភ្នំ Alps ដែលបានរាយការណ៍កាលពីថ្ងៃចន្ទដោយសារព័ត៌មាន Anadola Ajansi ដោយដកស្រង់ប្រាប់ភ្នាក់ងារ ANSA។

តំបន់ជួរភ្នំ Alps នៅតំបន់អឺរ៉ុប។ extremetur.com

បុរាណវិទ្យូ លោក Cristiano Dal Sasso នៃសារមន្ទីប្រវត្តិសាស្រ្តធម្មជាតិម៉ាលី [Malian Natural History] បាននិយាយថា៖«វាជាជ្រលងភ្នំពិតរបស់សត្វដាយណូស័រដែលបានលាតសន្ធឹងជាច្រើនគីឡូម៉ែត្រ ហើយមានទំហំយ៉ាងធំនៃតំបន់ភ្នំ Alps ជាភ្នំដែលស្អាតជាងគេលើពិភពលោក»។

លោកឱ្យដឹងទៀតថា ផ្លូវដែលមានប្រវែងវែងនេះមានស្មៅដុះជុំវិញជួរភ្នំដ៏គួរឱ្យភ្ញាក់ផ្អើល នៅភាគឦសាននៃប្រទេសអ៊ីតាលី ត្រូវបានទុកភស្តុតាងយ៉ាងច្បាស់ពីម្រាមជើងនិងក្រញ៉ាំរបស់ដាយណូស័រ។

លោក Dal Sasso ជាបុរាណវិទូម្នាក់ដែលបានរៀបរាប់ពីរឿងរ៉ាវដ៏សំខាន់នេះ ជូនប្រជាជនអ៊ីតាលីអំពីដាយណូស័រ។

លោកបានពន្យល់បន្ថែមទៀតថា៖ «កន្លែងនេះ(ភ្នំ Alps) មានដាយណូស័រយ៉ាងច្រើន ដែលវាជាបេតិកភណ្ឌវិទ្យាសាស្ត្រដ៏អស្ចារ្យ ហើយនឹងចំណាយពេលជាច្រើនទសវត្សរ៍ ដើម្បីសិក្សារៀនសូត្រ។ ព្រោះផ្លូវរបស់ដាយណូស័រមិនងាយចូលបានទេ ទាល់តែប្រើដ្រូន ឬបច្ចេកវិទ្យាទំនើបថតចាប់ពីចម្ងាយ»។

យោងតាមការវិភាគបឋមរបស់វីដេអូដែលបានថតជាប់បានប៉ានស្មានថា ជាដាយណូស័រ ព្រោះមានកវែង ក្បាលតូចជាងខ្លួន ហើយមានក្រញាំជើងស្រួច៕

ណឺ មិនា

The post អ្នកបុរាណវិទូសន្និដ្ឋាន ផ្លូវដាយណូស័រជាច្រើននៅតំបន់ភ្នំ Alps អ៊ីតាលី បន្សល់ទុកពីរាប់លានឆ្នាំ appeared first on Kampuchea Thmey Daily.

អ្នកស្រាវជ្រាវរកឃើញផ្លូវដើររបស់ដាយណូស័រអាយុកាល១៦៦លានឆ្នាំនៅអង់គ្លេស

Bun sopheap — Fri, 03 Jan 2025 08:43:15 +0000

អ្នកស្រាវជ្រាវបានឲ្យដឹងថា កម្មករម្នាក់ដែលជីកដីឥដ្ឋនៅក្នុងកន្លែងយកថ្មកំបោរភាគខាងត្បូងប្រទេសអង់គ្លេសបានកត់សម្គាល់ឃើញមានដុំពកខុសប្រក្រតីដែលនាំទៅដល់ការរកឃើញ «ផ្លូវដាយណូស័រ» និងមានជិត២០០ដានជើងមានអាយុកាល១៦៦លានឆ្នាំ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP។

(រូបភាព៖ AP)

បើតាមអ្នកស្រាវជ្រាវនៅសាកលវិទ្យាល័យ Oxford និង Birmingham ការរកឃើញដ៏អស្ចារ្យនេះធ្វើឡើងបន្ទាប់ពីក្រុមមនុស្សជាង១០០នាក់បានជីកកកាយដី Dewars Farm Quarry នៅ Oxfordshire ក្នុងខែមិថុនា ដែលនឹងពង្រីកលើការងារបុរាណវិទ្យាពីមុននៅក្នុងតំបន់ និងផ្តល់នូវការយល់ដឹងកាន់តែច្រើនអំពីយុគសម័យកណ្តាល Jurassic។

លោក Kirsty Edgar សាស្ត្រាចារ្យផ្នែកអតិសុខុមបាសាណិភូតវិទ្យា (micropaleontology) នៅសាកលវិទ្យាល័យ Birmingham បាននិយាយថា៖«ស្នាមដានជើងទាំងនេះផ្តល់នូវតម្រុយដ៏អស្ចារ្យមួយចូលទៅក្នុងជីវិតរបស់ដាយណូស័រ ដោយបង្ហាញព័ត៌មានលម្អិតអំពីចលនា អន្តរកម្ម និងបរិយាកាសដែលពួកវារស់នៅ»។

ការរកឃើញនេះមានផ្លូវចំនួនបួនដែលបង្កើតបានជាផ្លូវដើរដ៏អស្ចារ្យ ដែលដើរដោយសត្វស៊ីស្មៅដ៏ធំសម្បើម កវែង ហៅថា sauropods ជាដាយណូស័រដែលមានប្រវែងជិត ១៨ម៉ែត្រ ខណៈស្នាមក្រញ៉ាំបីយ៉ាងប្លែក ខ្លះជារបស់Megalosaurus ដែលជាសត្វមំសាសី (សត្វស៊ីសាច់ជាអាហារ) ប្រវែង៩ម៉ែត្រដ៏កាចសាហាវ និងជាដាយណូស័រដំបូងគេដែលត្រូវបានគេដាក់ឈ្មោះតាមវិទ្យាសាស្ត្រកាលពីពីរសតវត្សមុន។ ការរកឃើញផ្លូវនេះបានបង្កើតជាសំណួរអំពីអន្តរកម្មដែលអាចកើតមានរវាងសត្វស៊ីសាច់ និងសត្វស៊ីស្មៅថែមទៀត។

(រូបភាព៖ AP)

ជាមួយគ្នានេះ លោក Emma Nicholls អ្នកជំនាញខាងសត្វឆ្អឹងកងខ្នង បាននិយាយថា៖«អ្នកវិទ្យាសាស្ត្របានដឹង និងសិក្សាអំពី សត្វដាណូស័រ Megalosaurus យូរជាងដាយណូស័រដទៃទៀតនៅលើផែនដី ហើយការរកឃើញថ្មីៗទាំងនេះបង្ហាញថានៅតែមានភស្តុតាងថ្មីៗអំពីសត្វទាំងនេះនៅទីនោះ និងរង់ចាំការរកឃើញបន្ថែមទៀត»។

គួររម្លឹកថា កាលពីជិត ៣០ឆ្នាំមុន ស្នាមជើងចំនួន៤០ត្រូវបានរកឃើញនៅក្នុងកន្លែងយកថ្មកំបោរក្នុងតំបន់នោះដូចគ្នា និងត្រូវបានចាត់ទុកថា ជាកន្លែងតាមដានដាយណូស័រដ៏សំខាន់បំផុតមួយរបស់ពិភពលោក ប៉ុន្តែតំបន់នោះភាគច្រើនមិនអាចចូលទៅដល់បានទេឥឡូវនេះ ហើយភស្តុតាងនៅមានកម្រិត ព្រោះបានត្រឹមប្រើប្រាស់កាមេរ៉ាឌីជីថល និងយន្តហោះគ្មានមនុស្សបើកដើម្បីកត់ត្រាការរកឃើញនោះប៉ុណ្ណោះ៕

(រូបភាព៖ AP)

អត្ថបទ

The post អ្នកស្រាវជ្រាវរកឃើញផ្លូវដើររបស់ដាយណូស័រអាយុកាល១៦៦លានឆ្នាំនៅអង់គ្លេស appeared first on Kampuchea Thmey Daily.

អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ

Mean Ratana — Sat, 16 Mar 2024 09:33:23 +0000

ក្រុមអ្នកវិទ្យាសាស្រ្តប្រទេសស្កុតឡែនថ្មីៗនេះបានបង្ហាញនូវការរកឃើញហ្វូស៊ីលចម្លែកមួយ មានអាយុកាល ២៤០ លានឆ្នាំ ដែលមានសណ្ឋានដូចសត្វនាគចិន ។ នេះបើតាមការចុះផ្សាយរបស់សារព័ត៌មានសហរដ្ឋអាមេរិក ABC News ។

តាមប្រភពព័ត៌មានដដែល ក្រុមអ្នកវិទ្យាសាស្រ្តអន្តរជាតិពីសារមន្ទីរជាតិស្កុតឡែន បានបង្ហាញពីការរកឃើញហ្វូស៊ីលនេះនៅក្នុងខេត្ត Guizhou ភាគខាងត្បូងប្រទេសចិន ដោយមានឈ្មោះវិទ្យាសាស្រ្តថា Dinocephalosaurus ដែលចាត់ជាល្មូនរូបរាងវែងនៅក្នុងទឹក ដែលគេអាចសម្គាល់ថាវាស្ថិតក្នុងសម័យកាលដាយណូស័រ Triassic មានអាយុកាលប្រហែល ២៤០ លានឆ្នាំ ។

បើតាមការប្រកាសរបស់អ្នកវិទ្យាសាស្រ្តបានឲ្យដឹងថា ”វាមានឆ្អឹងកង ក ៣២ គ្រាប់ដែលជាប្រភេទ Dinocephalosaurus កវែង ជាល្មូនចម្លែកមួយក្នុងចំណាត់ថ្នាក់វិទ្យាសាស្រ្តល្មូនក្នុងសម័យដាយណូស័រ” ។

យ៉ាងណាមិញ ទម្រាំបានការប្រកាសពីការរកឃើញខាងលើ ក្រុមអ្នកវិទ្យាសាស្រ្តពីស្កុតឡែន អាល្លឺម៉ង់ សហរដ្ឋអាមេរិក និងចិនបានសិក្សារួមគ្នាលើហ្វូស៊ីលនេះ អស់រយៈពេលជាង ១០ ឆ្នាំមកហើយ ដើម្បីវិភាគសរុបជាហ្វូស៊ីលរួមបាន នៅឯវិទ្យាស្ថានសិក្សាពីប្រភេទឆ្អឹង នាឯក្រុងប៉េកាំង ។

ដោយឡែកបើតាមការលើកឡើងរបស់សាស្រ្តាចារ្យ Li Chun មកពីវិទ្យាស្ថានសិក្សាពីប្រភេទឆ្អឹងខាងលើបានបញ្ជាក់ថា “នេះជាកិច្ចខិតខំប្រឹងប្រែងជាអន្តរជាតិ ដែលធ្វើការរួមគ្នារវាងសហការីពីសហរដ្ឋអាមេរិក អង់គ្លេស និងអឺរ៉ុបផ្សេងទៀត ដែលរកឃើញនូវគំរូឆ្អឹងថ្មី នៅឯវិទ្យាស្ថានវិទ្យាសាស្រ្តចិន ហើយនឹងបង្កើតនូវចំណេះដឹងថ្មីទៀតអំពីសត្វក្នុងយុគសម័យអតីត” ៕

ដោយ៖ មាន រតនា

The post អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ appeared first on Kampuchea Thmey Daily.

តុលាការនៅរដ្ឋមួយរបស់ អាមេរិក ចោទប្រកាន់បុគ្គល ៤ រូប ពីបទលក់ឆ្អឹងដាយណូស័រ

Boa Sokunveary — Sun, 22 Oct 2023 03:00:00 +0000

កាលពីថ្ងៃព្រហស្បតិ៍ ទី១៩ ខែតុលា គណៈកម្មការវិនិច្ឆ័យរបស់តុលាការសហព័ន្ធនៅទីក្រុង Salt Lake រដ្ឋ Utah សហរដ្ឋអាមេរិក បានចោទប្រកាន់មនុស្ស ៤ នាក់ថា បានទិញ និងលក់ “ធនធានបុរាណវិទ្យា” រួមមានឆ្អឹងដាយណូស័រ ពីអាមេរិកទៅប្រទេសចិនក្នុងតម្លៃជាង ១ លានដុល្លារ ។

អ្នកទាំង ៤ មានឈ្មោះថា Vint Wade អាយុ ៦៥ ឆ្នាំ, Donna Wade អាយុ ៦៧ ឆ្នាំ, Steven Willing អាយុ ៦៧ ឆ្នាំ និង Jordan Willing អាយុ ៤០ ឆ្នាំ ។ ពួកគេរកស៊ីជួញដូរឆ្អឹងដាយណូស័រជាង ៥ ឆ្នាំមកហើយ ដូច្នេះត្រូវរងការចោទប្រកាន់ពីសំណាក់តុលាការសហរដ្ឋអាមេរិកថាបានលាក់បាំង និងរក្សាទ្រព្យសម្បត្តិចោរ ។

លោក Wades បានស្តុកទុកធនធានបុរាណវិទ្យា ដើម្បីលក់ ហើយក៏លក់ឲ្យ Steven និង Jordan Willing ផងដែរ ។ Steven និង Jordan បាននាំចេញឆ្អឹងដាយណូស័រទៅកាន់ប្រទេសចិនតាមរយៈក្រុមហ៊ុនរបស់ពួកគេ JMW Sales Inc ដោយដាក់ស្លាកខុស ដែលធ្វើឲ្យតម្លៃរបស់វាធ្លាក់ចុះ ។

ពាក់ព័ន្ធនឹងករណីខាងលើ Rachel Cannon មេធាវីតំណាងឱ្យ Jordan Willing បាននិយាយថាកូនក្តីរបស់នាង “ជំទាស់នឹងការចោទប្រកាន់នេះហើយទន្ទឹងរង់ចាំថ្ងៃឡើងតុលាការ” ហើយគាត់មិនត្រូវបានឃុំខ្លួនទេ ។

ចំណែកឯមេធាវីម្នាក់ទៀតរបស់លោក Vint Wade បានបដិសេធមិនធ្វើអត្ថាធិប្បាយអ្វីនោះទេ ខណៈអ្នកផ្សេងទៀតមិនអាចទាក់ទងបានឡើយ ៕

ប្រែសម្រួល៖ វារី

ប្រភព៖ NBC

ចុចអាន៖ ប្រទះឃើញស្នាមជើងដាយណូស័រចំនួន ៧០ ដោយចៃដន្យនៅរដ្ឋតិចសាស់

The post តុលាការនៅរដ្ឋមួយរបស់ អាមេរិក ចោទប្រកាន់បុគ្គល ៤ រូប ពីបទលក់ឆ្អឹងដាយណូស័រ appeared first on Kampuchea Thmey Daily.

ប្រទះឃើញស្នាមជើងដាយណូស័រចំនួន ៧០ ដោយចៃដន្យនៅរដ្ឋតិចសាស់

Boa Sokunveary — Mon, 04 Sep 2023 08:13:00 +0000

អ្នកស្ម័គ្រចិត្តនៅឧទ្យាន Dinosaur Valley State Park ដែលមានទីតាំងនៅភាគខាងត្បូងនៃទីក្រុង Dallas រដ្ឋតិចសាស់ សហរដ្ឋអាមេរិក បានប្រទះឃើញស្នាមជើងដាយណូស័រចំនួន ៧០ ដោយចៃដន្យ ។

ស្នាមជើងទាំងនោះមានអាយុកាលប្រហែល ១១០ លានឆ្នាំ ហើយគេអាចប្រទះឃើញវាដោយសារតែអាកាសធាតុក្ដៅខ្លាំង បណ្ដាលឲ្យរីងស្ងួតប៉ុណ្ណោះ ។

ដើម្បីវិភាគដានជើង អ្នកស្ម័គ្រចិត្តត្រូវចំណាយពេលជាច្រើនសប្តាហ៍ យកដីល្បាប់ដែលគ្របដណ្តប់ និងចាក់បំពេញដានជើងដាយណូស័រចេញសិន ។

ការវិភាគចុងក្រោយបង្ហាញថា ពួកវាជាកម្មសិទ្ធិរបស់ដាយណូស័រ ២ គឺ Acrocanthosaurus មានទម្ងន់ ៧ តោន និង Sauropodseiden (Paluxysaurus) មានទម្ងន់រហូតដល់ ៤៤ តោន ។

សូមជម្រាបថា ឧទ្យាន Dinosaur Valley State Park គឺជាកន្លែងទេសចរណ៍ដ៏យូរលង់មួយសម្រាប់អ្នកចូលចិត្តដាយណូស័រ ។ ជាធម្មតា អ្នកទស្សនាទៅទន្លេ Paluxy ដើម្បីនេសាទ ហែលទឹក និងជិះទូកកាយ៉ាកជាដើម ៕

ប្រែសម្រួល៖ វារី

ប្រភព៖ sputnikglobe

The post ប្រទះឃើញស្នាមជើងដាយណូស័រចំនួន ៧០ ដោយចៃដន្យនៅរដ្ឋតិចសាស់ appeared first on Kampuchea Thmey Daily.

គ្រោងឆ្អឹងដាយណូស័រ T-Rex ដេញថ្លៃជាង ៦ លានដុល្លារ នៅប្រទេសស្វីស

Boa Sokunveary — Fri, 21 Apr 2023 08:30:00 +0000

ដាយណូស័រ Tyrannosaurus Rex ហៅកាត់ថា T-Rex ជាដាយណូស័រដែលដាច់ពូជពីភពផែនដីតាំងពី ៦៧ លានឆ្នាំមុនមក ឆ្អឹងរបស់វាត្រូវគេដេញថ្លៃយកកាលពីថ្ងៃអង្គារ ទី១៨ ខែមេសា ឆ្នាំ ២០២៣ នៅប្រទេសស្វីស ទីក្រុងហ្សូរីច ក្រោមតម្លៃ ៦.១៣ លានដុល្លារ ។

គ្រោងឆ្អឹង T-Rex ខាងលើមានកម្ពស់ ៣.៩ ម៉ែត្រ បណ្ដោយ ១១.៦ ម៉ែត្រ ផ្គុំឡើងពីបំណែកឆ្អឹង ២៩៣ ដុំរបស់ដាយណូស័រ T-Rex បីក្បាលដែលរកឃើញនៅចន្លោះឆ្នាំ ២០០៨ និង ២០២៣ ក្នុងសហរដ្ឋអាមេរិក ។

បើលម្អិតចំពោះតម្លៃគ្រោងឆ្អឹងនោះមានតម្លៃត្រឹមតែ ៥,៣៥៩,០៨៤.៨០ ដុល្លារប៉ុណ្ណោះ តែគេនៅបូកបញ្ចូលថ្លៃផ្សេងៗទៀតសម្រាប់ផ្ទះដេញថ្លៃ Koller ទើបឡើងដល់ ៦.១៣ លានដុល្លារវិញ ។

Koller ដែលជាផ្ទះដេញថ្លៃដ៏ធំបំផុតរបស់ប្រទេសស្វីសបានរាយការណ៍ថា នេះជាលើកទីមួយនៅអឺរ៉ុបនិងជាលើកទីបីនៅទូទាំងពិភពលោកដែលគ្រោងឆ្អឹង T-Rex ទាំងមូលត្រូវដាក់ចេញថ្លៃ ។ សូមជម្រាបថាឆ្អឹងជាងពាក់កណ្ដាលនៃដាយណូស័រគឺជារបស់ដើម ក្រៅពីនេះគេជំនួសវាដោយម្នាងសិលា និងជ័រអេផូស៊ី ។

ចំណែកឯដាយណូស័រពីរទៀតដែលគេរកឃើញនៅអាមេរិកខាងជើងមានឈ្មោះថា Sue និង Stan បានលក់ក្រោមតម្លៃ ៨.៤ លានដុល្លារនិង ៣១ លានដុល្លារ ក្នុងឆ្នាំ ១៩៩៨ និងឆ្នាំ ២០២០ ៕

ប្រភព ៖ reuters

ចុចអាន ៖ បុរាណវិទូម៉ិកស៊ិក រកឃើញកន្ទុយដាយណូស័រ មានអាយុកាល ៧២លានឆ្នាំ

The post គ្រោងឆ្អឹងដាយណូស័រ T-Rex ដេញថ្លៃជាង ៦ លានដុល្លារ នៅប្រទេសស្វីស appeared first on Kampuchea Thmey Daily.

បុរាណវិទូម៉ិកស៊ិក រកឃើញកន្ទុយដាយណូស័រ មានអាយុកាល ៧២លានឆ្នាំ

Sonya — Sun, 29 Jan 2023 03:28:31 +0000

សាធារណជនស្ទើរទូទាំងពិភពលោក មានការភ្ញាក់ផ្អើលជាខ្លាំង បន្ទាប់ពីក្រុមអ្នកបុរាណវិទ្យាមួយក្រុមបានរកឃើញហ្វូស៊ីលកន្ទុយដាយណូស័រដែលមានអាយុប្រហែល ៧២លានឆ្នាំ នៅលើវាលខ្សាច់មួយក្នុងប្រទេសម៉ិកស៊ិក ដែលវានៅមានរូបរាងល្អ សឹងទាំងស្រុង។

កាលពីថ្ងៃទី២២ ខែមករា ឆ្នាំ២០២៣ លោក Francisco Aguilar នាយកនៃវិទ្យាស្ថានសិក្សាការវិវត្តរបស់មនុស្ស-សត្វ និងបុរាណវិទ្យា បានឱ្យដឹងថា កន្ទុយដាយណូស័រប្រវែង ៥ yard (៤.៥៧ម៉ែត្រ) ដែលមានឆ្អឹងកងចំនួន ៥០ ត្រូវបានថែរក្សាយ៉ាងល្អ ហើយវាជាសត្វទីមួយដែលមិនធ្លាប់មាននៅក្នុងប្រទេសម៉ិកស៊ិកនោះទេ។

គំហើញហ្វូស៊ីលមួយនេះ ត្រូវក្រុមបុរាណវិទូ នៃប្រទេសម៉ិកស៊ិក បានកំណត់អត្តសញ្ញាណវាជាពពួកដាយណូស័រដែលមានឈ្មោះថា ហារ៉ូស័រ ឬឌីផូសៀស។

ក្រោយការរកឃើញ ពួកគេបានសន្មត់ថា ហ្វួស៊ីលកន្ទុយដាយណូស័រ ប្រហែលជាមានអាយុកាលចន្លោះពី ៦៥-៧២លានឆ្នាំមុន ដែលទីតាំងនៃការរកឃើញជាឆ្នេរសមុទ្ររបស់ម៉ិកស៊ិក កាលពីមុន៕

ប្រែសម្រួល៖ សន្យា

ប្រភព៖ StoriesBus

ចុចអាន៖ ការស្រាវជ្រាវ៖ ស្នូលផែនដី ប្រហែលចាប់ផ្តើមវិលបញ្ច្រាស់ទិស

The post បុរាណវិទូម៉ិកស៊ិក រកឃើញកន្ទុយដាយណូស័រ មានអាយុកាល ៧២លានឆ្នាំ appeared first on Kampuchea Thmey Daily.

“ដាយណូស័រ” បង្ហាញខ្លួនក្នុងយល់សប្តិ អ្នកនឹងទទួលបានសំណាងផ្ទួនៗ

Sonya — Mon, 01 Aug 2022 14:29:58 +0000

ដាយណូស័រ ជាសត្វដែលបានផុតពូជពីផែនដី មិនសូវមានមនុស្សនឹកនាដល់វានោះទេ សូម្បីយល់សប្តិឃើញសត្វមួយនេះ ក៏ជារឿងកម្រមួយដែរ។ យ៉ាងណាមិញ យល់សប្តិឃើញដាយណូស័រ គឺមានការទស្សន៍ទាយនៅក្នុងសៀវភៅសុបិន ដែលវាមានអត្ថន័យទាំងល្អ និងអាក្រក់ តាមប្រភេទដែលអ្នកបានឃើញ។

សុបិនឃើញដាយណូស័រ

ក្នុងរយៈពេលនេះ អ្នកនឹងទទួលបានលាភពីការផ្សងសំណាង ឬទទួលបានការគាំទ្រពីមនុស្សពេញវ័យ ឬអាជ្ញាធរមូលដ្ឋាន ប្រសិនបើអ្នកកំពុងប្រឈមនឹងបញ្ហា។

សុបិនឃើញដាយណូស័រស៊ីរុក្ខជាតិ

វាជាសុបិនល្អ! អ្នកនឹងមានសំណាងផ្ទួនៗទាំងការរកស៊ី និងជីវិតគូ។

សុបិនឃើញដាយណូស័រស៊ីសាច់

វាបង្ហាញថា អ្នកនឹងសម្រេចបាននូវអ្វីដែលអ្នកចង់បាន ហិរញ្ញវត្ថុក៏ល្អ ឯជីវិតក៏សម្បូរបែប។

សុបិនឃើញដាយណូស័រដេញតាម

សុបិននេះចង់ដាស់តឿនឱ្យប្រុងប្រយ័ត្ន អ្នកអាចនឹងត្រូវបានគេប្រមាថមាក់ងាយយ៉ាងខ្លាំង ហើយកើតជាជម្លោះទាស់ទែង ប្រសិនបើអ្នកបណ្ដោយតាមកំហឹង។

សុបិនជិះដាយណូស័រ

កំលុងពេលនេះអ្នកនឹងមានសំណាងពីការធ្វើដំណើរផ្លូវឆ្ងាយ ឬទទួលបានដំណឹងល្អពីញាតិមិត្តជិតឆ្ងាយ។ ខាងស្នេហា អ្នកនៅលីវនឹងជួបមនុស្សល្អម្នាក់ តាមរយៈការណែនាំពីមិត្តភក្តិ៕

អត្ថបទ៖ សន្យា

ចុចអាន៖ យល់សប្តិឃើញគេឱ្យ “កំណប់” ជាប្រផ្នូលនៃលាភសំណាងពិតមែនឬ?

The post “ដាយណូស័រ” បង្ហាញខ្លួនក្នុងយល់សប្តិ អ្នកនឹងទទួលបានសំណាងផ្ទួនៗ appeared first on Kampuchea Thmey Daily.

ដាយណូស័រ Archives - Kampuchea Thmey Daily

អ្នកស្រាវជ្រាវរកឃើញផ្លូវដើររបស់ដាយណូស័រអាយុកាល១៦៦លានឆ្នាំ​នៅ​អង់គ្លេស

អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ

តុលាការនៅរដ្ឋមួយរបស់ អាមេរិក ចោទប្រកាន់បុគ្គល ៤ រូប ពីបទលក់ឆ្អឹងដាយណូស័រ

ប្រទះឃើញស្នាមជើងដាយណូស័រចំនួន ៧០ ដោយចៃដន្យនៅរដ្ឋតិចសាស់

គ្រោងឆ្អឹងដាយណូស័រ T-Rex ដេញថ្លៃជាង ៦ លានដុល្លារ នៅប្រទេសស្វីស

បុរាណវិទូម៉ិកស៊ិក រកឃើញកន្ទុយដាយណូស័រ មានអាយុកាល ៧២លានឆ្នាំ

“ដាយណូស័រ” បង្ហាញខ្លួនក្នុងយល់សប្តិ អ្នកនឹងទទួលបានសំណាងផ្ទួនៗ

អ្នកស្រាវជ្រាវរកឃើញផ្លូវដើររបស់ដាយណូស័រអាយុកាល១៦៦លានឆ្នាំនៅអង់គ្លេស