ដួង សុខគា Archives - Kampuchea Thmey Daily

ដួង សុខគា សរសើរភាពយន្តសម័យបុរាណប្រើពាក្យច្បាស់ៗ វេយ្យាករណ៍ពេញ ជាការអប់រំគំរូល្អ

អ៊ិន ពិសី — Mon, 17 Feb 2025 04:40:29 +0000

តារាពហុជំនាញ លោក ដួង សុខគា ថ្មីៗ នេះ បានធ្វើការចែករំលែកនូវវីដេអូបង្ហាញពីរឿងកាលពីសម័យបុរាណមួយភ្ជាប់នឹងសំណេរសរសើរមិនដាច់ពីមាត់ថា ភាពយន្តសម័យបុរាណមួយនេះ ប្រើពាក្យពេចន៍ច្បាស់ៗ និងវេយ្យាករណ៍ពេញ ជាការអប់រំគំរូល្អ។

ភាពយន្តសម័យបុរាណដែលត្រូវបាន លោក ដួង សុខគា ធ្វើការចែករំលែក និងបង្កការចាប់អារម្មណ៍នេះ មានចំណងជើងថា «ព្រះប្រជាកុមារ» ជារឿងត្រូវប្រភពមួយចំនួនឲ្យដឹងថាថតអំឡុងសម័យសង្គមរាស្ត្រនិយម។

លោក ដួង សុខគា លើកឡើងថា ពាក្យច្បាស់ៗ វេយ្យាករណ៍ពេញ មានឃ្លា មានប្រយោគប្រធានកិរិយាសព្ទកម្មបទ សព្វនាម គុណនាមកិរិយាវិសេសន៍ អាយតនិបាត..សិល្បៈជ្រោងយោងភាសាជាតិ មិនឃ្លាតពីសីលធម៌ សុជីវធម៌ យុត្តិធម៌ ការអប់រំគំរូល្អ ភាពឆ្លាតវៃ នៃជីវិត។

មានការបញ្ចេញមតិស្រដៀង លោក ដួង សុខគា ដែរថា ខ្មែរពីដើមផូរផង់ណាស់,រឿងនេះផលិតមកនិយាយខ្មែរចំច្បាស់ៗ ល្អ គឺដើម្បីទុករក្សាជាអត្តសញ្ញាណជាតិ។ រឿងភាពយន្តរបស់ សម្ដេចឪ សម័យសង្គមរាស្ត្រនិយម «ប្រជាកុមារ»។

គួរបញ្ជាក់ថា បើយោងតាមឯកសាររឿង«ព្រះប្រជាកុមារ» គឺជាស្នាព្រះហស្តនិពន្ធ និងដឹកនាំរឿងដោយព្រះករុណាព្រះបរមរតនកោដ្ឋ និងតួអង្គសំខាន់ក្នុងរឿងគឺ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា(ថតនៅក្នុងឆ្នាំ ១៩៦៧)៕

អត្ថបទ ៖ ចាន់រ៉ា

The post ដួង សុខគា សរសើរភាពយន្តសម័យបុរាណប្រើពាក្យច្បាស់ៗ វេយ្យាករណ៍ពេញ ជាការអប់រំគំរូល្អ appeared first on Kampuchea Thmey Daily.

ដួង សុខគា ៖ មុននិយាយអ្វីលើហ្វេសប៊ុក គួរថ្លឹងថ្លែងឲ្យប្រាកដសិន ព្រោះទស្សនៈខ្លះអាចឲ្យផលអវិជ្ជមាន

Din Thary — Mon, 09 Sep 2024 09:18:17 +0000

តារាពហុជំនាញលោក ដួង សុខគា បានចេញមុខដោយស្នើដល់មហជន ជាពិសេសអ្នកនិយមប្រើប្រាស់បណ្តាញសង្គមហ្វេសប៊ុក មុននិយាយអ្វីនៅលើបណ្តាញសង្គមគួរថ្លឹងថ្លែងឲ្យប្រាកដសិន ព្រោះថា ទស្សនៈខ្លះអាចឲ្យផលអវិជ្ជមានមកខ្លួនអ្នក និងសង្គម។

តួយ៉ាងនាពេលកន្លងមកដោយសង្កេតឃើញបច្ចុប្បន្នមានបុគ្គលមួយចំនួនបានបង្កើតនូវរឿងរ៉ាវជេរបញ្ចោរគ្នា អត់ប្រយោជន៍នាំឲ្យបំពុលសង្គមតាមរយៈការប្រើប្រាស់បណ្តាញសង្គមហ្វេសប៊ុកធ្វើជាឈ្នាន់ដើម្បីទាញយកផលប្រយោជ៍ផ្ទាល់ខ្លួន លោក ដួង សុខគា ធ្លាប់បានចេញមកបំផុសអ្នកគាំទ្រត្រូវរួមគ្នាលុបបំបាត់។

ដោយឡែក ស្រាប់តែពេលនេះតារាប្រុសផ្នែកបុរាណលោក សុខគា បានលើកឡើងដូច្នេះថា នៅតាមហ្វេសប៊ុកគឺជា ទីសាធារណៈ។ មុននឹងនិយាយអ្វីមួយ អ្នកគួរថ្លឹងថ្លែងឲ្យប្រាកដសិនព្រោះ ទស្សនៈខ្លះវាអាចឲ្យផលអវិជ្ជមានមកខ្លួនអ្នក និងសង្គម។ ទ្រឹស្តីខ្លះស្តាប់ទៅទំនងតែពេលដែលយកទៅអនុវត្តមិនប្រាកដថាល្អនោះទេ។

គេចាំបានថា ថ្មីៗនេះតារាប្រុសពហុជំនាញលោក ដួង សុខគា បានស្នើដល់អ្នកផលិតរឿង ឬផលិតមាតិកាមួយចំនួនកុំដើម្បីតែផលប្រយោជន៍ផ្ទាល់ខ្លួន ក្លាយជាមេរោគឆ្លងធ្វើឱ្យបាត់បង់សេចក្តីសុខក្នុងការរស់នៅ បាត់បង់តម្លៃ ថ្លៃថ្នូរជាជនជាតិ និងបាត់បង់ក្តីស្រលាញ់ គឺសាមគ្គីភាព។

លោក ដួង សុខគា បីទោះបច្ចុប្បន្នមានការមមាញឹកក្នុងការងារសិល្បៈផ្នែកភ្លេងបុរាណយ៉ាងណាក្តីតែជាការកត់សម្គាល់លោកមិនភ្លេចក្នុងការបំផុសមហាជនខ្មែរពាក់ព័ន្ធទៅនឹងរឿងសង្គមនោះទេ។ តាមរយៈផ្នត់គំនិតរបស់លោក ដួង សុខគា កន្លងមកលោកតែងចេញសារដាស់តឿនល្អៗដែលជាគំនិតវិជ្ជមានសម្រាប់សង្គមពិសេសគឺ យុវជនខ្មែរជំនាន់ក្រោយឲ្យបានយល់ដឹងពីតម្លៃវប្បធម៌ អរិយធម៌ សិល្បៈ និងអក្សរសាស្ត្រជាតិ ជាដើម៕

អត្ថបទ៖ ចាន់រ៉ា

The post ដួង សុខគា ៖ មុននិយាយអ្វីលើហ្វេសប៊ុក គួរថ្លឹងថ្លែងឲ្យប្រាកដសិន ព្រោះទស្សនៈខ្លះអាចឲ្យផលអវិជ្ជមាន appeared first on Kampuchea Thmey Daily.

ដួង សុខគា ស្នើអ្នកផលិតមាតិកា កុំដើម្បីប្រយោជន៍ផ្ទាល់ខ្លួន ក្លាយជាមេរោគបាត់បង់តម្លៃ ថ្លៃថ្នូរ សង្គមជាតិ

Din Thary — Tue, 03 Sep 2024 04:47:29 +0000

តារាប្រុសពហុជំនាញលោក ដួង សុខគា បានស្នើដល់អ្នកផលិតរឿង ឬផលិតមាតិកាមួយចំនួន កុំដើម្បីតែផលប្រយោជន៍ផ្ទាល់ខ្លួន ក្លាយជាមេរោគឆ្លងធ្វើឱ្យបាត់បង់សេចក្តីសុខក្នុងការរស់នៅ បាត់បង់តម្លៃថ្លៃថ្នូរជាជនជាតិ និងបាត់បង់ក្តីស្រលាញ់គឺ សាមគ្គីភាព។

លោក ដួង សុខគា ទោះបីបច្ចុប្បន្នមានការមមាញឹកក្នុងការងារសិល្បៈផ្នែកភ្លេងបុរាណយ៉ាងណាក្តី តែជាការកត់សម្គាល់លោកមិនភ្លេចក្នុងការបំផុសមហាជនខ្មែរពាក់ព័ន្ធទៅនឹងរឿងសង្គមនោះទេ។ តាមរយៈផ្នត់គំនិតរបស់លោក ដួង សុខគា កន្លងមកលោកតែងចេញសារដាស់តឿនល្អៗដែលជាគំនិតវិជ្ជមានសម្រាប់សង្គមពិសេស គឺយុវជនខ្មែរជំនាន់ក្រោយឱ្យបានយល់ដឹងពីតម្លៃវប្បធម៌ អរិយធម៌ សិល្បៈ និងអក្សរសាស្រ្តជាតិជាដើម។

តួយ៉ាងពេលនេះ លោក ដួង សុខគា ស្នើដល់អ្នកផលិតមាតិកាមួយចំនួន គឺត្រូវចេះគិតពីតម្លៃសង្គមផង ដោយលោកលើកឡើងថា អ្នកផលិតរឿងដើម្បីផ្សាយទាំងឡាយ តាមរយៈមាតិការបស់អ្នកតើមានសាបព្រោះ បណ្តុះពូជអសីលធម៌ ពូជអកុសលកម្មច្រណែន ឈ្នានីស កេងប្រវ័ញ្ច រុកកួន បង្ខូចឈ្លើយដែរឬទេ? ព្រោះវាជាមេរោគឆ្លងធ្វើឱ្យបាត់បង់សេចក្តីសុខក្នុងការរស់ នៅបាត់បង់តម្លៃថ្លៃថ្នូរជាជនជាតិមួយ និងបាត់បង់ក្តីស្រលាញ់ គឺសាមគ្គីភាព។

លោក ដួង សុខគា បាននិយាយទៀតថា “សូមកុំឱ្យដើម្បីតែបានប្រយោជន៍ ហើយមិនគិតផលប៉ះពាល់ យោបល់ខ្ញុំតាមដានកូនរបស់អ្នក និងខ្លួនអ្នកផងដែរ តើមានមើលប៉ះមាតិកាខាងលើដែរឬទេ? វានឹងឆ្លងចូលក្នុងចិត្តគំនិតដោយមិនដឹងខ្លួនភាពផូរផង់របស់ភូមិយើងផ្តើមចេញពីយើង“។

កត់សម្គាល់ដែរថា តារាពហុជំនាញអាចលេងបានគ្រប់ទម្រង់ទាំងសម័យ និងបុរាណលោក ដួង សុខគា ជារឿយៗលោកតែងបង្ហាញពីឆន្ទៈបំផុសស្មារតីដល់យុវជនដែលជាកូនខ្មែរគ្រប់រូបត្រូវនាំគ្នាដើម្បីចូលរួម ថែរក្សាតម្លៃវប្បធម៌ អរិយធម៌ និងភាសាជាតិ អក្សរជាតិ ដែលជា កេរ្តិ៍តំណែលមរតកដូនតាដ៏ល្អផូរផង់របស់ខ្មែរ៕

អត្ថបទ៖ ចាន់រ៉ា

The post ដួង សុខគា ស្នើអ្នកផលិតមាតិកា កុំដើម្បីប្រយោជន៍ផ្ទាល់ខ្លួន ក្លាយជាមេរោគបាត់បង់តម្លៃ ថ្លៃថ្នូរ សង្គមជាតិ appeared first on Kampuchea Thmey Daily.

ដួង សុខគា ចង់ផលិតវីដេអូអប់រំដាស់តឿនពីច្បាប់ចរាចរណ៍ និងរបៀប នៃការបើកបរនាំមកនូវសុវត្ថិភាព

អ៊ិន ពិសី — Fri, 14 Jun 2024 07:17:42 +0000

ក្នុងគោលបំណងចូលរួមការងារជួយសង្គម ពិសេសផ្សព្វផ្សាយអប់រំអំពីបញ្ហាច្បាប់ចរាចរណ៍ផ្លូវគោក និងរបៀប នៃការបើកបរនាំមកនូវសុវត្ថិភាព តារាពហុជំនាញលោក ដួង សុខគា ចង់បង្កើតផេកមួយដើម្បីផលិតវីដេអូអប់រំដាស់តឿនពីច្បាប់ចរាចរណ៍។

ការបង្ហាញគោលបំណងពីសំណាក់តារាប្រុសលោក ដួង សុខគា នេះ ស្របពេលលោកមើលឃើញថា បច្ចុប្បន្ននៅមានប្រជាពលរដ្ឋមួយចំនួនហាក់មានការខ្វះខាតការយល់ដឹង និងបើកបរដោយមិនសូវប្រុងប្រយ័ត្ន អាចនាំឲ្យកើតមានបញ្ហាគ្រោះថ្នាក់ចរាចរណ៍លើដងផ្លូវបណ្ដាលឲ្យស្លាប់ ឬរបួសជាដើម។

តួយ៉ាង លោក ដួង សុខគា បានចែករំលែកវីដេអូភ្ជាប់ខ្លឹមសារថា «ចង់បង្កើតផេកមួយដាក់ឈ្មោះថា”បើកបរឆ្លាតវៃ”។ ក្នុងនោះយើងផលិតវីដេអូអប់រំដាស់តឿនពីច្បាប់ចរាចរណ៍ និងរបៀប នៃការបើកបរដែលនាំមកនូវសុវត្ថិភាព និងក្តីស្រលាញ់»។

តារាជើងចាស់រូបនេះបានលើកឡើងជាសំនួរទៅកាន់មហាជនដែរថា «ការបើកបរដោយសុវត្ថិភាពចំណេញច្រើនណាស់ តើចំណេញអ្វីខ្លះ? បងប្អូនយើងសាកឆ្លើយទៅមើល?»។ តាមរយៈការលើកឡើងរបស់លោក ដួង សុខគា ខាងលើនេះ គេសង្កេតឃើញមានការលើកទឹកចិត្ត និងគាំទ្រពីមហាជនមួយចំនួនផងដែរ។

ជាមួយគ្នានោះ ក៏មានការបញ្ចេញទស្សនៈថា «ការបើកបរឆ្លាតវៃ គឺជួយកាត់បន្ថយគ្រោះថ្នាក់ ចំណេញពេលវេលា ជួយឲ្យមនុស្សចេះមានអធ្យាស្រ័យល្អ ចេះគោរពគ្នាទៅវិញទៅមក រួមទាំងផ្តល់ប្រយោជន៍ដល់សង្គមទៀតផង។ ប្រាកដណាស់ បញ្ហាគ្រោះថ្នាក់ចរាចរណ៍ ខ្លះគ្រាន់តែរងការខូចខាត ឬរងរបួស ដោយឡែកមួយចំនួនទៀត គឺជីវិតត្រូវបានផ្លាស់ប្ដូរទាំងស្រុង មានអ្នកខ្លះបាត់បង់សមាជិកគ្រួសារដ៏សំខាន់ រីឯអ្នកខ្លះបាត់បង់មនុស្សជាទីស្រលាញ់ ឬត្រូវពិការជាដើម»៕

អត្ថបទ ៖ ចាន់រ៉ា

The post ដួង សុខគា ចង់ផលិតវីដេអូអប់រំដាស់តឿនពីច្បាប់ចរាចរណ៍ និងរបៀប នៃការបើកបរនាំមកនូវសុវត្ថិភាព appeared first on Kampuchea Thmey Daily.

ដួង សុខគា ទប់ទឹកភ្នែកមិនជាប់ ក្រោយឃើញកូននេនមួយអង្គអង្វរសុំម្តាយឱប ដែលនឹងចេញទៅធ្វើការស្រុកថៃ

អ៊ិន ពិសី — Thu, 06 Jun 2024 02:46:52 +0000

សង្កេតឃើញរយៈពេលប៉ុន្មានថ្ងៃនេះ មានការចែករំលែកវីដេអូសកម្មភាពកូននេនមួយអង្គបានយំអង្វរសុំឱបម្តាយដែលនឹងត្រូវចេញទៅធ្វើការងារនៅឯប្រទេសថៃដើម្បីរកប្រាក់ចំណូលផ្គត់ផ្គង់គ្រួសារ ធ្វើឲ្យអ្នកប្រើប្រាស់បណ្ដាញសង្គម និងមហាជនជាច្រើនចាប់អារម្មណ៍ខ្លាំង។

យ៉ាងណាមិញគេកត់សម្គាល់ដែរថាមានមហាជនខ្លះក៏បានលើកឡើងពីមនោសញ្ចេតនាអាណិតដល់កូននេន និងសរសើរចំពោះទឹកចិត្តម្តាយដែលបានលះបង់ការនឿយហត់ដើម្បីចេញរកលុយមកផ្គត់ផ្គង់គ្រួសារ។ ក្នុងនោះមានការបង្ហោះថា “អត់ទេ សុំឱបតែបន្តិចទេ សុំអង្វរម៉ែឱបតែបន្តិចបានហើយ តែទោះកូនឱបយ៉ាងណា ក៏នៅតែបែកគ្នាដែរណាកូន ព្រោះម្ដាយត្រូវត្រឡប់ទៅស្រុកថៃ ដើម្បីរកលុយឲ្យកូនបានរៀនខ្ពង់ខ្ពស់”។

ឃើញទង្វើ និងការចែកចាយវីដេអូនេះ តារាពហុជំនាញ ដួង សុខគា បានរំភើបរហូតស្រក់ទឹកភ្នែក ខណៈលោកថា “ទឹកភ្នែកខ្ញុំករុណាហូរមកពេលនេះ! មិនមែនអាណិតតេជគុណទេ តែអាណិតញោម និងរំភើបចំពោះផ្លូវរបស់ព្រះតេជព្រះគុណ ខ្ញុំករុណាជ្រះថ្លាណាស់ តស៊ូឡើងតេជគុណតូច”។

ចំណែកលោក ផន ផល្លា ប្រធានមណ្ឌលកុមារកំព្រាមែកឈើ បានបង្ហាញអារម្មណ៍អាណិត និងសរសើរផងដែរចំពោះទឹកចិត្តម្តាយ ដោយក្នុងនោះលោកក៏បានប្រកាសផ្តល់ឱកាសការងារដល់ស្ត្រីជាម្តាយនៅក្នុងមណ្ឌលកុមារកំព្រាមែកឈើផងដែរ ដើម្បីងាយស្រួលចុះឡើងជួបកូន ពិសេសបានរស់នៅស្រុកកំណើត។

លោក ផន ផល្លា លើកឡើងថា ”បើប្អូនស្រីមិនទាន់បានចេញទៅស្រុកថៃទេ ខ្ញុំពេញចិត្តទទួលប្អូនស្រីមកធ្វើការនៅក្នុងមណ្ឌលមែកឈើ ដើម្បីអាចឲ្យប្អូនបាននៅក្នុងស្រុកកំណើតយើងផង និងអាចងាយឡើងចុះទៅលេងកូនដែលមានការនឹករលឹកម្តាយមិនចង់បែកពីម្តាយមួយអង្គនេះផង”។

លោកបន្តទៀតថា ”ខ្ញុំស្រណោះតែពាក្យមួយឃ្លាទេ«អាត្មាសុំឱបម៉ែតែបន្តិចទៀតទេ» «ឲ្យអាត្មាឱបម៉ែបន្តិចទៀតមក» នេះហើយជីវិតកូនដែលត្រូវការទ្រូងម្តាយម្តងទៀត បើប្អូនស្រីបានឃើញ ឬមួយមានបងប្អូនយើងណាបានស្គាល់គាត់ សូមផ្ដាំផ្ញើដល់គាត់ផង ថានេះគឺជាបំណងរបស់ខ្ញុំ”៕

អត្ថបទ ៖ ចាន់រ៉ា

The post ដួង សុខគា ទប់ទឹកភ្នែកមិនជាប់ ក្រោយឃើញកូននេនមួយអង្គអង្វរសុំម្តាយឱប ដែលនឹងចេញទៅធ្វើការស្រុកថៃ appeared first on Kampuchea Thmey Daily.

លោក ដួង សុខគា បារម្ភរឿងទីផ្សារភ្លេងខ្មែរសព្វថ្ងៃខ្លាចអនាគតគ្មានអ្នករៀន

អ៊ិន ពិសី — Tue, 23 Apr 2024 01:42:23 +0000

តារាពហុជំនាញ លោក ដួង សុខគា ដែលជារឿយៗ តែងចេញមុខឈឺឆ្អាលរឿងវប្បធម៌ខ្មែរ បានសម្តែងការព្រួយបារម្ភជាថ្មីចំពោះភ្លេងខ្មែរ ខណៈបច្ចុប្បន្នលោកមើលឃើញថា កាន់តែមានការដេញបញ្ចុះថ្លៃតាមរយៈមេការ។

លោក ដួង សុខគា ថ្មីៗ នេះ បានស៊ែរចែករំលែកវីដេអូ ដោយបានលើកឡើងខ្លឹមសារថា «សុខទុក្ខពួកយើងមិនខុសគ្នាទេ ភ្លេងខ្មែរក៏ដេញថ្លៃណាស់ដែរ ទីផ្សារសេរី សេដ្ឋកិច្ចពិភពលោកជ្រុះ អ្វីដែលត្រូវគិត គឺរៀនចេះភ្លេងរកស៊ីពីបាតដៃទទេ យូរៗ ទៅ នៅសល់តែបាតដៃ ខ្លាចតែផ្តាំកូនចៅថា កុំរៀនមុខរបរនេះ ទៅមុខមិនរួចទេ»។

លោក ដួង សុខគា និយាយទៀតថា «សព្វថ្ងៃនេះ តាមដឹង គឺមានអ្នកម៉ៅការធូរៗ មួយថ្ងៃដប់វង់ស៊ីក្បាលកាក់ ខ្លះបាត់តាខេ ខ្លះបាត់ឃឹម។ ឈ្មួញកណ្ដាលហូបលើអ្នកទៅលេង វង់ខ្លះថែមគ្នាឲ្យច្រើនៗ ទៀត ចែកគ្នាយ៉ាងដូចម្ដេច? បើសង្ឃឹមលើវិស័យប្រាក់រង្វាន់ គឺដួលហើយ»។

តាមរយៈនេះ មានទស្សនៈមួយចំនួនបានបញ្ចេញមតិដោយគាំទ្រការលើកឡើងរបស់លោក ដួង សុខគា ខណៈក៏មានការលើកឡើងដែរថា «លោកបងរកចំណូលបានចូលហូរហែ បានស្លៀកពាក់ស្អាត បានហូបឆ្ងាញ់ មានការទទួលរាក់ទាក់ពីម្ចាស់កម្មវិធី លោកបងនៅតែត្អូញត្អែរ»។ ឆ្លើយតបការលើកឡើងនេះ លោក ដួង សុខគា និយាយថា «ខ្ញុំមិនមែនត្អូញដើម្បីខ្លួនឯងទេ ខ្ញុំគិតដល់អ្នកភ្លេងខ្មែរផ្សេងៗ ទៀត សម្រាប់ខ្ញុំ គឺមិនអួត មិនត្អូញ»។

អ្នកសិល្បៈជើងចាស់ លោក ដួង សុខគា គេសង្កេតឃើញថា កន្លងមកលោកតែងចេញមុខព្រួយបារម្ភពាក់ព័ន្ធលើការបាត់បង់វិស័យសិល្បៈបុរាណមួយចំនួន។ លោក ដួង សុខគា ក៏ជាអ្នកសិល្បៈដែលមានជំនាញលេងសិល្បៈបានស្ទើរតែគ្រប់ទម្រង់ ទាំងបុរាណសម័យ កំប្លែង និងបទចម្រៀងភ្លេងការជាដើម…។ ចំណុចនេះ ត្រូវបានអ្នកគាំទ្រយល់ថា លោកជាបុគ្គលគំរូល្អសម្រាប់សង្គម ពិសេសយុវជនខ្មែរផងដែរ៕

អត្ថបទ ៖ ចាន់រ៉ា

The post លោក ដួង សុខគា បារម្ភរឿងទីផ្សារភ្លេងខ្មែរសព្វថ្ងៃខ្លាចអនាគតគ្មានអ្នករៀន appeared first on Kampuchea Thmey Daily.

កៀកចូលឆ្នាំខ្មែរ ! ដួង សុខគា អំពាវនាវលេងល្បែងប្រជាប្រិយ ចៀសវាងទិញរបស់គេយកមកលេង

អ៊ិន ពិសី — Mon, 25 Mar 2024 01:57:46 +0000

រយៈពេលប៉ុន្មានឆ្នាំចុងក្រោយនេះ ដោយសង្កេតឃើញមានយុវជនខ្មែរមួយចំនួនធំងាកពីការលេងល្បែងប្រជាប្រិយរបស់ខ្មែរ ទៅនាំគ្នាទិញរបស់គេយកមកលេងដូចជាការលេងបាញ់ទឹក ប៉ាតម្សៅ ឬ ជះទឹកជាដើមនោះ ស្រាប់តែតារាពហុជំនាញ ដួង សុខគា បានបង្ហោះសារដាស់តឿនឲ្យយុវជនខ្មែរមកលេងល្បែងប្រជាប្រិយដែលខ្មែរមានតាំងពីបុរាណ។

លោក ដួង សុខគា បានលើកឡើងដោយអំពាវនាវថា «ចូលឆ្នាំខ្មែរខាងមុខនេះ តើបងប្អូនណាខ្លះហ៊ានសន្យាថា នៅពេលចេញទៅក្រៅ ឬក៏ទៅកម្សាន្តកន្លែងនានា ស្លៀកតែសម្លៀកបំពាក់ខ្មែរសុទ្ធ? ស្វែងរកក្រុមសម្លៀកខ្មែរ ស្រួលដើរជាមួយគ្នា ខ្ញុំនឹងបង្កើតក្រុមប្រអប់សារមួយ ដើម្បីបង្ហោះរូបលើកទឹកចិត្តបងប្អូនយើង បើព្រមសូមលើកដៃមកបាទ»។

លោក ដួង សុខគា បញ្ជាក់ថា តាមកន្លែងកម្សាន្តនានា ក្នុងពេលប្រារព្ធពិធីបុណ្យចូលឆ្នាំថ្មីប្រពៃណីខ្មែរ ខាងមុខ បើបានឮសំឡេង ទ្រ ស្គរ ខ្លុយ តាខេ ឃឹម ចាប៉ី បទចោលឈូង បទរបាំត្រុដិ បទភិសវង់ បទក្របកៃ និងបទប្រជាប្រិយជាច្រើនទៀត ដែលបង្ហាញនូវភាពសុខសាន្ត រុងរឿង របស់ជាតិ មិនដឹងជាល្អយ៉ាងណាទេ?។ លោកថា «យោបល់ខ្ញុំ ចំណាយលុយទិញរបស់គេយកមកលេង និងការចូលលុយគ្នាលេងរបស់ដែលខ្លួនឯងមានស្រាប់ ខ្ញុំយករបស់ខ្មែរហើយ»។

តារាពហុជំនាញ ដួង សុខគា និយាយទៀតថា «គួរមានអ្នកបោះមេតាមតំបន់ ហើយនាំលេងឲ្យសប្បាយ។ ឈប់ទៅការដាក់កុងត្រូលស្ទាក់ទារលុយទៅទិញស្រា។ វាមិនថ្លៃថ្នូរ វានាំកើតជម្លោះ វាបង្កើតទោមនស្ស វាបំផ្លាញសាមគ្គីភាព និងសុខភាព។ បងៗ អាជ្ញាធរ ជួយមើលផង កន្លែងខ្លះអាក្រក់មើលខ្លាំងណាស់ មួយផ្លូវៗ ឃើញតែស្ទាក់ ស្រវឹងពុល ចាប់ លូក ស្ទាប ឈ្លោះ។ល។ បើបានអានហើយយល់ស្របនូវគំនិតនេះ សូមមេត្តាជួយផ្សាយបន្តផង»៕

អត្ថបទ ៖ ចាន់រ៉ា

The post កៀកចូលឆ្នាំខ្មែរ ! ដួង សុខគា អំពាវនាវលេងល្បែងប្រជាប្រិយ ចៀសវាងទិញរបស់គេយកមកលេង appeared first on Kampuchea Thmey Daily.

ដួង សុខគា ប្រកាសឈប់ច្រៀងអាយ៉ៃយ៉ាងភ្ញាក់ផ្អើល

អ៊ិន ពិសី — Wed, 20 Mar 2024 02:01:40 +0000

លោក ដួង សុខគា តារាពហុជំនាញ អាចលេងបានគ្រប់ទម្រង់សិល្បៈសម័យ-បុរាណ អាយ៉ៃ ជាដើម នោះ បានប្រកាសយ៉ាងភ្ញាក់ផ្អើលថា លោកនឹងឈប់ច្រៀងអាយ៉ៃទៀតហើយ។

ការប្រកាសរបស់តារាពហុជំនាញ លោក ដួង សុខគា នាពេលនេះ ស្របពេលមានការបញ្ចេញមតិមួយចំនួនពីអ្នកប្រើប្រាស់បណ្ដាញសង្គមហាក់មិនឲ្យតម្លៃសិល្បករជើងចាស់ចម្រៀងអាយ៉ៃ ឬអាចនិយាយថា ការរិះគន់ខ្លះមានចេតនាជាន់ពន្លិច ឬបំបាក់ទឹកចិត្ត។ លោកថា ខ្លួនបានខំប្រឹងប្រែងត្រដាបត្រដួស ខ្មែរគួរតែយល់ហើយ តែនេះធ្វើឲ្យលោកឈឺចាប់ច្រើនជាងការលើកទឹកចិត្ត (អាយ៉ៃ មិនមែនជារបស់លោកតែម្នាក់ទេ)។

លោក ដួង សុខគា បានរៀបរាប់ខ្លឹមសារតាមរយៈបណ្ដាញសង្គមកាលពីយប់មិញថា «ពិតជាឆ្អែតពេលឃើញខមមិនក្នុងគណនីមេ ម្សិលមិញ ខ្ញុំឃើញមេបង្ហោះ តែខ្ញុំមិនបានចែកផ្សាយបន្តទេ ព្រោះតែមិនចង់ឲ្យគេថា…ដឹងថាខ្លួនមិនពូកែ ឥឡូវនេះបានជាជ្រុលមើលខមមិនហើយ សូមបញ្ជាក់ជូនចុះ អរគុណណាស់បងប្អូនទាំងអស់ដែលលើកទឹកចិត្តខ្ញុំ»។

លោក ដួង សុខគា លើកឡើងថា «ខ្ញុំសូមទោសផង ដែលខ្ញុំតបនឹងយោបល់បងប្អូនខ្លះៗ»។ ខ្ញុំក៏ចេះឆ្អែតដែរ ដឹងថាអ្នកខ្លះមិនទាំងស្គាល់បែបបទអាយ៉ៃផង ក៏ប្រឹងទើសជាន់ពន្លិចទៅហើយ ពេលខ្លះវាអាចធ្វើឲ្យអ្នកខំប្រឹងបន្តទាំងត្រដាបត្រដួស ឆ្អែតដោយកន្លែងដែរ។ ជម្រាបជូនចុះថា ខ្ញុំមិនដែលនឹកថាចង់ច្រៀងម្តងឡើយ គ្រាន់តែខ្លាចបាត់ក៏មិនដែលថាខ្លួនឯងពូកែដែរ បណ្តាញសង្គមដែលមានសេរីភាពពេញទំហឹង ហើយខ្វះសុជីវធម៌ និងការក្រែងរអែងចិត្តអើយ! សុំខ្លាចហើយ ការលើកទឹកចិត្តមិនសូវមាន មានតែការបំបាក់ទឹកចិត្ត»។

លោក ដួង សុខគា បន្តថា «ដាក់មួយម៉ាត់ៗ ឆ្អែត ខ្ញុំ ចង់ជម្រាបចុះថា បើពូកែបែបហ្នឹង ជួយថែអាយ៉ៃបន្តផងចុះ ខ្ញុំនឹងមិនច្រៀងទៀតទេ គឺសុំឈប់សិល្បៈមួយនេះ មិនមែនជារបស់ខ្ញុំម្នាក់ឯងទេ ខ្ញុំបំពេញតែការងារដែលទទួលរួចហើយប៉ុន្មានរោងទៀត ខ្ញុំនឹងឈប់ច្រៀងទៀតហើយអាយ៉ៃ សូម្បីតែសម្រាប់វិទ្យុក៏ឈប់ដែរ ខ្ញុំទទួលការកែលម្អ តែក៏បាក់ទឹកចិត្តនឹងពាក្យទ្រគោះខ្លះដែរ»។

បន្ថែមពីលើនេះ លោក ដួង សុខគា បានបញ្ជាក់ឲ្យដឹងថា លោកក៏ចង់បង្ហាញបន្តិចមុននឹងឈប់ ៖ អាយ៉ៃ នៅលើឆាក គឺត្រូវការចាប់ចុងចួនភ្លាមៗ តាមបទ តាមប្រធានបទឆ្លើយឆ្លងគ្នាទៅវិញទៅមក តែអាយ៉ៃវិទ្យុ គេអាចកាន់ប៉ារ៉ូលច្រៀងបាន យោងទៅលើខ្លឹមសារ និងខ្លាចដៃគូរកជួនមិនឃើញផង ក៏ខ្លាចល្អៀងខ្លឹមសារដែរ។ អាយ៉ៃថតដាក់វិទ្យុគេយកតែសំឡេងទេ ហេតុនេះគេមិនសូវបានប្រុងឡើយ ដូចនេះបើថតបង្ហោះនៅពេលនោះគឺអាក្រក់មើលមែនហើយ សង្ឃឹមថា អ្នកខមមិនដែលមិនយល់ពីអាយ៉ៃ និងមិនក្រែងចិត្ត មេត្តាជ្រាបផងចុះ។

តារាសិល្បៈលោក ដួង សុខគា លើកឡើងទៀតថា «ខ្ញុំនៅតែនិយាយដដែលថា ខ្ញុំមិនខឹងអ្វីទេ តែក៏អន់ចិត្ត អាយ៉ៃនេះ ខ្ញុំខំផ្សាយផង ច្រៀងផង បង្ហាញក្មេងៗ ផង តែថ្ងៃនេះ ខ្ញុំមើលក្នុងខមមិនដែលមេបង្ហោះ ហើយ គឺធ្លាក់ថ្លើមក្តុក! ឱ សីលធម៌ សុជីវធម៌ ជនជាតិខ្ញុំអើយ ទៅឯណាបាត់អស់ទៅហើយ?ខ្ញុំនិយាយថា ខ្ញុំនឹងឈប់ច្រៀងអាយ៉ៃទៀតហើយ អាយ៉ៃលើឆាកទទួលបានបួនប្រាំរោង ខ្ញុំនឹងទៅច្រៀងបង្ហើយ តែក្រៅពីនោះ ខ្ញុំមិនច្រៀងទៀតឡើយ សូម្បីតែថតឲ្យវិទ្យុជាតិក៏ខ្ញុំមិនច្រៀងទៀតដែរ»៕

អត្ថបទ ៖ ចាន់រ៉ា

The post ដួង សុខគា ប្រកាសឈប់ច្រៀងអាយ៉ៃយ៉ាងភ្ញាក់ផ្អើល appeared first on Kampuchea Thmey Daily.