ជីវិតកម្សាន្ដ

ដួង សុខគា ទប់ទឹកភ្នែកមិនជាប់ ក្រោយឃើញកូននេនមួយអង្គអង្វរសុំម្តាយឱប ដែលនឹងចេញទៅធ្វើការស្រុកថៃ

បានផុស

២ years មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

សង្កេតឃើញរយៈពេលប៉ុន្មានថ្ងៃនេះ មានការចែករំលែកវីដេអូសកម្មភាពកូននេនមួយអង្គបានយំអង្វរសុំឱបម្តាយដែលនឹងត្រូវចេញទៅធ្វើការងារនៅឯប្រទេសថៃដើម្បីរកប្រាក់ចំណូលផ្គត់ផ្គង់គ្រួសារ ធ្វើឲ្យអ្នកប្រើប្រាស់បណ្ដាញសង្គម និងមហាជនជាច្រើនចាប់អារម្មណ៍ខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាមិញគេកត់សម្គាល់ដែរថាមានមហាជនខ្លះក៏បានលើកឡើងពីមនោសញ្ចេតនាអាណិតដល់កូននេន និងសរសើរចំពោះទឹកចិត្តម្តាយដែលបានលះបង់ការនឿយហត់ដើម្បីចេញរកលុយមកផ្គត់ផ្គង់គ្រួសារ។ ក្នុងនោះមានការបង្ហោះថា “អត់ទេ សុំឱបតែបន្តិចទេ សុំអង្វរម៉ែឱបតែបន្តិចបានហើយ តែទោះកូនឱបយ៉ាងណា ក៏នៅតែបែកគ្នាដែរណាកូន ព្រោះម្ដាយត្រូវត្រឡប់ទៅស្រុកថៃ ដើម្បីរកលុយឲ្យកូនបានរៀនខ្ពង់ខ្ពស់”។

ឃើញទង្វើ និងការចែកចាយវីដេអូនេះ តារាពហុជំនាញ ដួង សុខគា បានរំភើបរហូតស្រក់ទឹកភ្នែក ខណៈលោកថា “ទឹកភ្នែកខ្ញុំករុណាហូរមកពេលនេះ! មិនមែនអាណិតតេជគុណទេ តែអាណិតញោម និងរំភើបចំពោះផ្លូវរបស់ព្រះតេជព្រះគុណ ខ្ញុំករុណាជ្រះថ្លាណាស់ តស៊ូឡើងតេជគុណតូច”។

ចំណែកលោក ផន ផល្លា ប្រធានមណ្ឌលកុមារកំព្រាមែកឈើ បានបង្ហាញអារម្មណ៍អាណិត និងសរសើរផងដែរចំពោះទឹកចិត្តម្តាយ ដោយក្នុងនោះលោកក៏បានប្រកាសផ្តល់ឱកាសការងារដល់ស្ត្រីជាម្តាយនៅក្នុងមណ្ឌលកុមារកំព្រាមែកឈើផងដែរ ដើម្បីងាយស្រួលចុះឡើងជួបកូន ពិសេសបានរស់នៅស្រុកកំណើត។

លោក ផន ផល្លា លើកឡើងថា ”បើប្អូនស្រីមិនទាន់បានចេញទៅស្រុកថៃទេ ខ្ញុំពេញចិត្តទទួលប្អូនស្រីមកធ្វើការនៅក្នុងមណ្ឌលមែកឈើ ដើម្បីអាចឲ្យប្អូនបាននៅក្នុងស្រុកកំណើតយើងផង និងអាចងាយឡើងចុះទៅលេងកូនដែលមានការនឹករលឹកម្តាយមិនចង់បែកពីម្តាយមួយអង្គនេះផង”។

លោកបន្តទៀតថា ”ខ្ញុំស្រណោះតែពាក្យមួយឃ្លាទេ«អាត្មាសុំឱបម៉ែតែបន្តិចទៀតទេ» «ឲ្យអាត្មាឱបម៉ែបន្តិចទៀតមក» នេះហើយជីវិតកូនដែលត្រូវការទ្រូងម្តាយម្តងទៀត បើប្អូនស្រីបានឃើញ ឬមួយមានបងប្អូនយើងណាបានស្គាល់គាត់ សូមផ្ដាំផ្ញើដល់គាត់ផង ថានេះគឺជាបំណងរបស់ខ្ញុំ”៕

អត្ថបទ ៖ ចាន់រ៉ា