អ្នកនាង វត្តី ជាប្រជាពលរដ្ឋមួយរូបក្នុងចំណោមប្រជាពលរដ្ឋជាង២០គ្រួសារ ដែលរស់នៅជិតដេប៉ូខ្សាច់ ក្នុងភូមិព្រែកសំរោង១ សង្កាត់តាខ្មៅ ក្រុងតាខ្មៅ បានសម្ដែងការមិនសប្យាយចិត្តដោយសារផ្ទះពួកគាត់ត្រូវរងផលប៉ះពាល់ដោយសារខ្សាច់ហុយខ្លាំងប៉ះដល់សុខភាព និងការប្រកបរបរអាជីវកម្មប្រចាំថ្ងៃ។ អ្នកនាង វត្តី បញ្ជាក់ថា ទីតាំងដេប៉ូខ្សាច់នេះមានទំហំដីប្រហែល១ហិកតា ហើយមានពំនូកខ្សាច់នៅខាងក្នុងការដ្ឋានមានកម្ពស់ខ្ពស់ជាងផ្ទះពលរដ្ឋទៅទៀត ទើបនៅពេលមានខ្សល់បក់ហើរខ្សាច់ជះមកលើផ្ទះពួកគាត់រៀងរាល់ថ្ងៃ។

បើតាមប្រជាពលរដ្ឋរូបនេះ ការមានដីខ្សាច់ហុយលើផ្ទះពួកគាត់នេះ គឺមានរយៈពេលជិត២០ថ្ងៃមកហើយ ពោលគឺចាប់ពីអាកាសធាតុធ្លាក់ខ្សល់មករហូតមកដល់ពេលនេះនៅមិនទាន់មានដំណោះស្រាយជូនពួកគាត់នៅឡើយ ខណៈពួកគាត់ក៏បានជូនដំណឹងទៅអាជ្ញាធរហើយដែរ។

មិនខុសពីប្រជាពលរដ្ឋដែលរស់នៅជុំវិញដេប៉ូខ្សាច់ខាងលើ អ្នកធ្វើដំណើរឆ្លងកាត់តាមផ្លូវនៅតំបន់នោះ ក៏បានលើកឡើងពីការប៉ះពាល់ដោយសារដីខ្សាច់ហុយនេះដែរ ព្រោះពេលកំពុងបើករត្រូវដីខ្សាច់ហុចចូលភ្នែកដែលអាចបង្កគ្រោះថ្នាក់ជាយថាហេតុ។

ក្នុងនាមប្រជាពលរដ្ឋដែលកំពុងរងផលប៉ះពាល់ដោយសារដីខ្សាច់ក្នុងដេប៉ូខ្សាច់ខាងលើ អ្នកនាង វត្តី បានសំណូមពរដល់អាជ្ញាធរពាក់ព័ន្ធជួយចុះពិនិត្យ និងសម្រួលឲ្យម្ចាស់ដេប៉ូខ្សាច់កាយពំនូកខ្សាច់ឲ្យបានទាបជាងផ្ទះពួកគាត់ និងដាក់រនាំងស្បៃបាំងឲ្យបានជិតបន្ថែម ដើម្បីបញ្ចៀសដីខ្សាច់ហុយមកលើផ្ទះពួកគាត់បន្តទៀត។

លោក ឃឹម សំភារ អភិបាលនៃគណៈអភិបាលក្រុងតាខ្មៅ ខេត្តកណ្ដាល គិតដល់ព្រឹកថ្ងៃទី១៩ ខែធ្នូ ឆ្នាំ២០២៥នេះ នៅមិនទាន់ឆ្លើយតប និងបកស្រាយពីវិធានការយ៉ាងណាទៅលើម្ចាស់ដេប៉ូខ្សាច់នេះនៅឡើយទេ បន្ទាប់ពី កម្ពុជាថ្មី បានទំនាក់ទំនងតាមរយៈប្រព័ន្ធតេក្រាមតាំងពីល្ងាចថ្ងៃទី១៨ធ្នូ ម្សិលមិញ៕

អត្ថបទ៖ សុខុម

The post ដេប៉ូខ្សាច់មួយកន្លែងក្នុងភូមិព្រែកសំរោង១ សង្កាត់តាខ្មៅ កំពុងបង្កផលប៉ះពាល់ខ្លាំងដល់ពលរដ្ឋជាង២០គ្រួសារ appeared first on Kampuchea Thmey Daily.

នា​ឱកាស​នោះ លោក​អភិបាល​ខណ្ឌ​ឫស្សីកែវ បាន​តម្រូវ​ឲ្យ​ម្ចាស់​ដេប៉ូ​ខ្សាច់​គ្រប់កន្លែង ត្រូវ​រៀបចំ​កន្លែង​លាង​សម្អាត​កង់​រថយន្ត​ដឹក​ខ្សាច់​ឲ្យ​បាន​ត្រឹមត្រូវ និង​គ្រប​ខ្សាច់ មុន​ពេល​ធ្វើ​ចរាចរណ៍​ចេញ​ចូល​ផ្លូវ ស្របតាម​លក្ខណៈ​បច្ចេកទេស ដើម្បី​លើកកម្ពស់​សោភ័ណភាព និង​អនាម័យ​ ក្នុង​រាជធានី​ភ្នំពេញ។

លោក​អភិបាល​ខណ្ឌ​ឫស្សីកែវ បញ្ជាក់​ថា កន្លងមក មាន​ដេប៉ូ​ខ្សាច់​មួយ​ចំនួន​ដឹកជញ្ជូន​ខ្សាច់​ដោយ​មិន​បាន​គ្រប និង​មិន​បាន​លាង​សម្អាត​ផ្លូវ បណ្ដាល​ឲ្យ​ខ្សាច់​ជ្រុះ និង​ទឹក​ហូរ​ចូល​លើ​ផ្លូវ បង្ក​ឲ្យ​មាន​បញ្ហា​អនាម័យ និង​សោភ័ណភាព​ទីក្រុង។ រដ្ឋបាល​ខណ្ឌ បាន​ព្រមាន​ថា ប្រសិន​បើ​ម្ចាស់​ដេប៉ូ​មិន​អនុវត្ត​តាម​ការ​ណែនាំ នឹង​អនុវត្ត​វិធានការ​ច្បាប់​តាម​នីតិវិធី ហើយ​អាច​ឈាន​ទៅដល់​ការ​បិទ​អាជីវកម្ម​ផង​ដែរ។

សូម​រំលឹក​ផង​ដែរ​ថា កាល​ថ្ងៃទី ៩ ខែកក្កដា ឆ្នាំ ២០២៥ លោក ឌន ដា​វុ​ឌ នាយករង​រដ្ឋបាល​ខណ្ឌ បាន​ដឹកនាំ​ក្រុមការងារ​រដ្ឋបាល​ខណ្ឌ​ឫស្សីកែវ ចុះ​ពិនិត្យ និង​ណែនាំ​ដល់​ដេប៉ូ​ខ្សាច់ ក្នុង​មូលដ្ឋាន​ខណ្ឌ​ឫស្សីកែវ ដើម្បី​អនុវត្ត​វិធានការ​អនាម័យ​បរិស្ថាន និង​ថែរក្សា​សណ្ដាប់ធ្នាប់​សាធារណៈ។

ក្នុង​នោះ ដោយ​បាន​ណែនាំ​ដល់​ម្ចាស់​ដេប៉ូ​ខ្សាច់​ទាំងនោះ តម្រូវ​ឲ្យ​ធ្វើ​កន្លែង​លាង​សំអាត​កង់ឡាន​តាម​លក្ខណៈ​បច្ចេកទេស​ត្រឹមត្រូវ មុន​នឹង​ធ្វើ​ចរាចរណ៍​លើ​ដង​ផ្លូវ ត្រូវ​ប្រើ​តង់​កៅស៊ូ​គ្រប​ឡាន​ដឹក​ខ្សាច់​ឲ្យ​បាន​ជិត​ត្រឹមត្រូវ ​ជៀសវាង​ធ្លាក់​ដីខ្សាច់​លើ​ដង​ផ្លូវ​បណ្តាល​ឲ្យ​ខូច​សោភ័ណភាព សណ្ដាប់ធ្នាប់​សាធារណៈ ប៉ះពាល់​ដល់​អ្នក​ធ្វើ​ដំណើរ។ បន្ថែម​នោះ ត្រូវ​លាង​សំអាត​ផ្លូវ​ឲ្យ​បាន​ស្អាត​ជា​ប្រចាំ​នៅ​ទីតាំង​ដេប៉ូ​ខ្សាច់​រៀងៗ ​ខ្លួន ផង​ដែរ៕

អត្ថបទ ៖ សំណាង

The post អភិបាលខណ្ឌឫស្សីកែវ តម្រូវឲ្យម្ចាស់ដេប៉ូខ្សាច់ទាំងអស់ សម្អាតកង់រថយន្ត និងគ្របឲ្យបានត្រឹមត្រូវ appeared first on Kampuchea Thmey Daily.

ការចុះត្រួតពិនិត្យដេប៉ូខ្សាច់ទាំង៥ ក្រុមការងារបានណែនាំ តម្រូវឲ្យម្ចាស់ទីតាំងត្រូវធ្វើកន្លែងលាងសម្អាតកង់រថយន្ដតាមលក្ខណ:បច្ចេកទេសឲ្យបានត្រឹមត្រូវ មុននឹងធ្វើចរាចរលើដងផ្លូវ។ ត្រូវប្រើតង់កៅស៊ូ គ្របរថយន្ដដឹកខ្សាច់ឱ្យបានជិតត្រឹមត្រូវចៀសវៀងធ្លាក់ដីខ្សាច់លើដងផ្លូវបណ្តាលខូចសោភ័ណភាព សណ្តាប់ធ្នាប់សាធារណ: និងប៉ះពាល់ដល់អ្នកធ្វើដំណើរ និងត្រូវលាងសម្អាតផ្លូវឱ្យបានស្អាតជាប្រចាំនៅទីតាំងដេប៉ូខ្សាច់រៀងៗខ្លួន។

ក្រៅពីណែនាំដល់ម្ចាស់ដេប៉ូខ្សាច់ ក្រុមការងារក៏បានដឹកនាំកម្លាំងសណ្តាប់ធ្នាប់ខណ្ឌ សង្កាត់ ធ្វើ​ការ​សម្អាតអនាម័យ​ បរិស្ថាន​ តាម​ដងផ្លូវ​ចាប់​ពី​ចំណុច​ស្តុប​គីឡូម៉ែត្រ​លលេខ៩ ទៅក្រោម​ស្ពាន​លីយ៉ុង​ផាត់​ ព្រំប្រទល់ខណ្ឌព្រែកព្នៅ ដោយចូកសម្អាតកំណកដីតាមទ្រូវផ្លូវ និងសំរាមរាយប៉ាយ។

ការចុះណែនាំ និងសម្អាតបរិស្ថានតាមដងផ្លូវនេះ ក្នុងគោលបំណងដើម្បីបង្កើនការយល់ដឹងឱ្យម្ចាស់ដេប៉ូខ្សាច់ និងក្រុមហ៊ុនដឹកជញ្ជូនអំពីការថែរក្សាអនាម័យបរិស្ថាន និងសណ្តាប់ធ្នាប់សាធារណៈក្នុងមូលដ្ឋាន៕

អត្ថបទ៖ សំណាង

The post អាជ្ញាធរខណ្ឌឬស្សីកែវ ចុះពិនិត្យ និងណែនាំម្ចាស់ដេប៉ូខ្សាច់ ៥ទីតាំង ឲ្យអនុវត្តន៍វិធានការអនាម័យ បរិស្ថាន និងសណ្តាប់ធ្នាប់សាធារណៈ appeared first on Kampuchea Thmey Daily.

អ្នកស្រី សីតា ប្រជាពលរដ្ឋរស់នៅក្នុងមូលដ្ឋានសង្កាត់ស្វាយប៉ាក ប្រាប់អោយដឹងថា គាត់តែងឃើញអ្នកដំណើរជិះម៉ូតូឆ្លងកាត់ដួលដោយសារខ្សាច់នៅលើដងផ្លូវជាញឹកញាប់ មានខ្លះរអិលដួលរបួសដៃជើងរហូតដល់បាក់ជើងថែមទៀតផង។ អ្នកស្រីបន្តថា ភាគច្រើនពេលគាត់ជិះតាមបណ្តោយផ្លូវជាតិលេខ៥ ឆ្លងកាត់ដេប៉ូខ្សាច់នេះ គឺសឹងតែមិនមានហ៊ានជិះម៉ូតូតែម្តង។ ហើយពេលមានខ្យល់បក់ ដីខ្សាច់ទាំងនោះហ៊ុយខ្លាំង ឬមានភ្លៀងធ្លាក់យូរៗ នឹងកើតទៅទឹកដក់លើផ្លូវជាដើម។

លោក សុខា រតនា ពលរដ្ឋដែលតែងឆ្លងកាត់តំបន់នោះបានលើកឡើងថា រៀងរាល់ថ្ងៃ ពលរដ្ឋសង្កេតឃើញមានអាជ្ញាធរចុះទៅលាង និងកើបដីពេលថ្ងៃម្តង និងពេលល្ងាចម្តងដើម្បីសម្អាតកុំអោយមានដី។ លោកបានចោទសួរទៅកាន់អាជ្ញាធរដោយចម្ងល់ថា « តើអាជ្ញាធរមិនមានវិធានការចំពោះទីតាំងដេប៉ូខ្សាច់នេះទេ ឬយ៉ាងណា បានបណ្តោយអោយរថយន្តចេញចូលដឹកដី ដោយមិនមានការគ្រប់ត្រឹមត្រូវបែបនេះ? » ។

ពួកគាត់ក៏បានសំណូមពរទៅកាន់អាជ្ញាធរ សូមមានវិធានការចុះអប់រំ ឬចាត់តាមនីតិវិធីណាមួយ ដើម្បីកុំអោយដេប៉ូខ្សាច់ខាងលើនេះ បន្តធ្វើអោយខូចសោភ័ណ្ឌភាពដងផ្លូវ ឬបង្កគគ្រោះថ្នាក់ដល់ដំណើរបន្តទៀត។ បើនៅតែបណ្តោយបែបនេះទៅ យូរៗទៅ ក្រុមអ្នករកសុីបើកដេប៉ូខ្សាច់ នឹងក្លាយទៅជាទម្លាប់អាក្រក់បន្តបង្កផលប៉ះពាល់ដល់ពលរដ្ឋ។

ពាក់ព័ន្ធបញ្ហានេះ លោក ជិន ប៊ុនធឿន អភិបាលនៃគណអភិបាលខណ្ឌឬស្សីកែវ បានបញ្ជាក់ថា លោកនឹងណែនាំមន្រ្តីក្រោមឪវាទឲ្យចុះត្រួតពិនិត្យ រួមនឹងមានវិធានការចំពោះទីតាំងខាងលើនេះ៕

អត្ថបទ៖ រដ្ឋា

The post ដេប៉ូខ្សាច់នៅផ្លូវជាតិលេខ៥ ក្នុងសង្កាត់ស្វាយប៉ាក កំពុងបង្កគ្រោះថ្នាក់ដល់អ្នកដំណើរ appeared first on Kampuchea Thmey Daily.

លោក ស៊ុយ សេរិទ្ធ បានបញ្ជាក់ថា ការចុះបិទដេប៉ូខ្សាច់ទាំងនេះ ធ្វើឡើងទៅតាមបទបញ្ជារបស់អភិបាលរាជធានីភ្នំពេញ ដោយសារទីតាំងខាងលើមិនអនុវត្តតាមការណែនាំ របស់រដ្ឋបាលរាជធានីភ្នំពេញ ដោយធ្វើឲ្យដីខ្សាច់ហូរហៀលើទ្រូវផ្លូវ ពិបាកឲ្យប្រជាពលរដ្ឋធ្វើដំណើរ បង្កឲ្យមានគ្រោះថ្នាក់ចរាចរណ៍ និងបណ្តាលឲ្យខូចខាតហេដ្ឋារចនាសម្ព័ន្ធមួយចំនួនថែមទៀត ដូចជាខូចខាតផ្លូវ និងប្រព័ន្ធលូ ជាដើម។

លោក ស៊ុយ សេរិទ្ធ ក៏បានបញ្ជាក់ផងដែរថា អាជីវកម្មទាំងនេះ គឺត្រូវបិទទាំងស្រុងតែម្តង ពោលគឺមិនទុកឲ្យដេប៉ូខ្សាច់ទាំងនេះ បំផ្លាញហេដ្ឋារចនាសម្ព័ន្ធទៀតទេ ហើយរាល់រចនាសម្ព័ន្ធដែលខូចខាត ដូចជាលូ ផ្លូវ នៅលើផ្លូវជាតិលេខ ២ ផ្លូវ ៦០ ម៉ែត្រ និងផ្លូវ ៣០ ម៉ែត្រ ម្ចាស់ដេប៉ូខ្សាច់ខាងលើត្រូវតែ កើបដីខ្សាច់ចេញពីថ្នល់ និងធ្វើការជួសជុលឡើងវិញទាំងលូ និងផ្លូវ។

លោកបានបញ្ជាក់បន្ថែមថា ទីតាំងដេប៉ូខ្សាច់ខាងលើនេះ ត្រូវបានអាជ្ញាធររាជធានីភ្នំពេញធ្វើការណែ​នាំ និងធ្វើកិច្ចសន្យាជាច្រើនលើកច្រើនសាររួចមកហើយ និងបានណែនាំឲ្យពួកគេមានម៉ាស៊ីនលាងកង់រថយន្ត និងដឹកជញ្ជូនខ្សាច់នៅពេលយប់វិញ។ ប៉ុន្តែទោះបីជាយ៉ាងណាក្តី ម្ចាស់អាជីវកម្ម នៅតែរអនុវត្តមិនបានល្អ ទៅតាមការណែនាំរបស់រដ្ឋបាលរាជធានីភ្នំពេញ ទើបរដ្ឋបាលរាជធានីភ្នំពេញ សម្រេចបិទអាជីវកម្មទាំងស្រុងតែម្តង។

ចំណែកលោក ជា សុខៃ ចៅសង្កាត់ចាក់អង្រែក្រោម បានឲ្យដឹងដែរថា នៅព្រឹកថ្ងៃទី ៨ ខែសីហានេះអាជ្ញាធរថ្នាក់រាជធានី ថ្នាក់ខណ្ឌ និងសង្កាត់ បានចុះផ្អាកអាជីវកម្មដេប៉ូខ្សាច់ ដែលមានទីតាំងស្ថិតនៅសង្កាត់ចាក់អង្រែលើ និងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដែលទីតាំងដេប៉ូខ្សាច់ខាងលើបង្ក ការខូចខាតផ្លូវ ជ្រុះខ្សាច់​ ព្រមទាំងបង្កឲ្យខូចខាតលូបង្ហូរទឹកទៀតផង។

លោក ជា សុខៃ បានបន្តថា ព្រោះតែម្ចាស់ដេប៉ូខ្សាច់ ប្រើប្រាស់រថយន្តខ្នាតធំមកដឹកជញ្ជូនខ្សាច់ បង្កឲ្យខូចខាតផ្លូវជាតិលេខ ២សឹងគ្រប់កន្លែង។ បើទោះម្ចាស់ដេប៉ូ បានធ្វើការជួសជុលផ្លូវឡើងវិញក៏ដោយ តែដោយសារការជួសជុលមិនបានល្អបង្កឲ្យខូចខាតទៅវិញ មិនបានប៉ុន្មានថ្ងៃផង។ លោក ចៅសង្កាត់បានបញ្ជាក់ថា ទីតាំងដេប៉ូខ្សាច់ ដែលស្ថិតនៅតាមបណ្តោយផ្លូវជាតិលេខ ២ ក្នុងទឹកដីខណ្ឌមានជ័យនេះ គឺសង្កាត់ចាក់អង្រែលើមាន ៤ទីតាំង និងសង្កាត់ចាក់អង្រែក្រោមមាន ៣ទីតាំង។

កាលពីសប្តាហ៍មុននេះដែរ កម្មុជាថ្មីបានចុះផ្សាយព័ត៌មាន ស្តីពី ការខូចខាតផ្លូវជាតិលេខ ២ មុខអតីតរោងចក្រកាត់ដេរ (តាកហ្វាត) ដែលមានទីតាំងស្ថិតនៅខាងជើង សាលាសង្កាត់ចាក់អង្រែលើ ដែលបង្កឲ្យលំបាកក្នុងកាធ្វើដំណើរ របស់ប្រជាពលរដ្ឋ៕  

អត្ថបទ៖ ស្រីរ័ត្ន, នរា

The post អភិបាលរាជធានី បញ្ជាឲ្យបិទដេប៉ូខ្សាច់ ៧ទីតាំង នៅផ្លូវជាតិលេខ ២ ដោយសារមិនអនុវត្តតាមការណែនាំ appeared first on Kampuchea Thmey Daily.

យោងតាមប្រភពពត័មានពីលោក គុយ គឹមហ៊ាង ប្រធានការិយាល័យសាធារណការសាលាខណ្ឌច្បារអំពៅបានឲ្យដឹងថា ចំពោះដីខ្សាច់ដែលជ្រុះលើកំណាត់ផ្លូវជាតិលេខ១ ចាប់ពីសង្កាត់វាលស្បូវច្រើនជាងសង្កាត់ដ៏ទៃទៀតនេះដោយសារតែសង្កាត់មួយនេះមានដេប៉ូខ្សាច់នៅជាប់ផ្លូវជាតិលេខ១ ហើយអ្នកបើកបររថយន្តដឹកខ្សាច់ភាគច្រើន​ដឹកខ្សាច់សើមដែលងាយនឹងហូជ្រុះ។

លោក គុយ គឹមហ៊ាង បានបញ្ជាក់ថា រថយន្តដឹកខ្សាច់បង្កឲ្យជ្រុះលើផ្លូវបែបនេះភាគច្រើនដឹកពេលយប់រំលងអាធ្រាត។ហើយបើសិនជាអាជ្ញាធរមិនបានបោសសំអាតទេនោះ គឺដីខ្សាច់ច្បាស់ជាពេញលើផ្លូវជាតិតែម្តង។ ក្នុងនោះលោក គុយ គឹមហ៊ាង បានណែនាំដល់ម្ចាស់ដេប៉ូខ្សាច់សូមចូលរួមថែរក្សាបរិស្ថានផង កុំគិតតែពីប្រយោជន៍ផ្ទាល់ខ្លួនមិនគិតពីផលលំបាករួមនោះ។

ដោយឡែកលោកស្រី យន់ សុផល ចៅសង្កាត់វាលស្បូវវិញបានបង្ហោះពត័មានពីសកម្មភាពមន្ត្រីអាជ្ញាធរសង្កាត់ចុះបោសកើបដីខ្សាច់ដែលជ្រុះលើផ្លូវសឹងគ្មានថ្ងៃសំរាក៕

អត្ថបទ៖ នរា

The post ដេប៉ូខ្សាច់ជាប់ផ្លូវជាតិលេខ១ ក្នុងមូលដ្ឋានខណ្ឌច្បារអំពៅ កំពុងបង្កផលប៉ះពាល់ដល់ពលរដ្ឋ appeared first on Kampuchea Thmey Daily.

ពលរដ្ឋរស់នៅក្បែរនោះ សុំមិនបញ្ចេញឈ្មោះបានប្រាប់អោយដឹងថា រាល់ថ្ងៃអស់រយះពេលជាច្រើនឆ្នាំមកហើយពិបាករស់នៅខ្លាំងណាស់ ពេលថ្ងៃហុយ ពេលយប់ថ្លង់សម្លេងបើក្រុមឡានដឹកជញ្ជូន​មួយថ្ងៃរាប់រយ​ឡានឯណោះ។

ពួកគាត់បន្ថែមថា មិនដឹងថាត្រូវធ្វើយ៉ាងមេចទៀតទេ បើជម្រាបប្រាប់អាជ្ញាធររួចហើយតែនៅដដែល មិនដឹងថាម្ចាស់ដេប៉ូមានបុណ្យស័ក្តិខ្សែធំប៉ុណ្ណានោះទេ ។ បើនិយាយរឿងសម្លេងវិញ យប់ឡើងដេកមិនបាននោះទេ សម្លេងថ្លង់អាអ៊ិចកាយខ្សាច់ផងក្រុមឡានដឹកខ្សាច់ផង ។ បើក្រឡេកមកមើលផ្លូវវិញមានខ្សាច់និងទឹកហូរពេញផ្លូវ ធ្វើអោយខ្សាច់ ដី កកពូនលើផ្លូវ ក្លាយជាភក់រអិលដល់អ្នកធ្វើដំណើរខ្លាំងណាស់ វាងាយធ្វើអោយ​កើតឡើង​គ្រោះថ្នាក់ចរាចរណ៍ថែមទៀតផង ។ ពួកគាត់សង្ឃឹមថា លោក គង់ សោភណ្ឌ អភិបាលខេត្តកណ្តាល និងដោះស្រាយបញ្ហារនេះ ដើម្បីក្តីសុខប្រជាពលរដ្ឋ៕

អត្ថបទ៖ ឆៃ យ៉ា

The post ពលរដ្ឋស្នើសុំអភិបាលខេត្តកណ្ដាល ពិនិត្យដេប៉ូខ្សាច់ក្បែរស្ពានព្រែកសំរោង ដែលកំពុងបំផ្លាញផ្លូវ និងបង្កការរំខាន២៤ម៉ោង appeared first on Kampuchea Thmey Daily.