ដេប៉ូខ្សាច់ជាប់ផ្លូវជាតិលេខ១ ក្នុងមូលដ្ឋានខណ្ឌច្បារអំពៅ កំពុងបង្កផលប៉ះពាល់ដល់ពលរដ្ឋ

អ្នកធ្វើដំណើរឆ្លងកាត់ផ្លូវជាតិលេខ១ហួសបុរីប៉េងហួតចូលដល់សង្កាត់វាលស្បូវ ខណ្ឌច្បារអំពៅ រាជធានីភ្នំពេញ តែងសង្កេតឃើញដីខ្សាច់ជ្រុះពេញលើផ្លូវ និងតែងបង្កការគ្រោះថ្នាក់ដល់អ្នកបើកបរម៉ូតហើយប៉ះពាល់ដល់បរិស្ថានខ្លាំងណាស់។

យោងតាមប្រភពពត័មានពីលោក គុយ គឹមហ៊ាង ប្រធានការិយាល័យសាធារណការសាលាខណ្ឌច្បារអំពៅបានឲ្យដឹងថា ចំពោះដីខ្សាច់ដែលជ្រុះលើកំណាត់ផ្លូវជាតិលេខ១ ចាប់ពីសង្កាត់វាលស្បូវច្រើនជាងសង្កាត់ដ៏ទៃទៀតនេះដោយសារតែសង្កាត់មួយនេះមានដេប៉ូខ្សាច់នៅជាប់ផ្លូវជាតិលេខ១ ហើយអ្នកបើកបររថយន្តដឹកខ្សាច់ភាគច្រើន​ដឹកខ្សាច់សើមដែលងាយនឹងហូជ្រុះ។

លោក គុយ គឹមហ៊ាង បានបញ្ជាក់ថា រថយន្តដឹកខ្សាច់បង្កឲ្យជ្រុះលើផ្លូវបែបនេះភាគច្រើនដឹកពេលយប់រំលងអាធ្រាត។ហើយបើសិនជាអាជ្ញាធរមិនបានបោសសំអាតទេនោះ គឺដីខ្សាច់ច្បាស់ជាពេញលើផ្លូវជាតិតែម្តង។ ក្នុងនោះលោក គុយ គឹមហ៊ាង បានណែនាំដល់ម្ចាស់ដេប៉ូខ្សាច់សូមចូលរួមថែរក្សាបរិស្ថានផង កុំគិតតែពីប្រយោជន៍ផ្ទាល់ខ្លួនមិនគិតពីផលលំបាករួមនោះ។

ដោយឡែកលោកស្រី យន់ សុផល ចៅសង្កាត់វាលស្បូវវិញបានបង្ហោះពត័មានពីសកម្មភាពមន្ត្រីអាជ្ញាធរសង្កាត់ចុះបោសកើបដីខ្សាច់ដែលជ្រុះលើផ្លូវសឹងគ្មានថ្ងៃសំរាក៕

អត្ថបទ៖ នរា