ព័ត៌មានជាតិ

អភិបាលខណ្ឌឫស្សីកែវ តម្រូវឲ្យម្ចាស់ដេប៉ូខ្សាច់ទាំងអស់ សម្អាតកង់រថយន្ត និងគ្របឲ្យបានត្រឹមត្រូវ

បានផុស

១១ ខែ មុន

នៅ

ថ្ងៃសុក្រ ៨ សីហា ២០២៥

ដោយ

កាលពីរសៀលថ្ងៃទី ៧ ខែសីហា ២០២៥ លោក ជិន ប៊ុនធឿន អភិបាលខណ្ឌឫស្សីកែវ បានដឹកនាំក្រុមការងារចុះពិនិត្យ និងណែនាំដល់ម្ចាស់ដេប៉ូខ្សាច់ទាំងអស់ ដែលស្ថិតតាមបណ្ដោយផ្លូវជាតិលេខ ៥ ក្នុងមូលដ្ឋានខណ្ឌឫស្សីកែវ ត្រូវសម្អាតកង់ គ្របរថយន្តឲ្យបានត្រឹមត្រូវ និងរៀបចំកន្លែងលាងសម្អាតកង់រថយន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនោះ លោកអភិបាលខណ្ឌឫស្សីកែវ បានតម្រូវឲ្យម្ចាស់ដេប៉ូខ្សាច់គ្រប់កន្លែង ត្រូវរៀបចំកន្លែងលាងសម្អាតកង់រថយន្តដឹកខ្សាច់ឲ្យបានត្រឹមត្រូវ និងគ្របខ្សាច់ មុនពេលធ្វើចរាចរណ៍ចេញចូលផ្លូវ ស្របតាមលក្ខណៈបច្ចេកទេស ដើម្បីលើកកម្ពស់សោភ័ណភាព និងអនាម័យ ក្នុងរាជធានីភ្នំពេញ។

លោកអភិបាលខណ្ឌឫស្សីកែវ បញ្ជាក់ថា កន្លងមក មានដេប៉ូខ្សាច់មួយចំនួនដឹកជញ្ជូនខ្សាច់ដោយមិនបានគ្រប និងមិនបានលាងសម្អាតផ្លូវ បណ្ដាលឲ្យខ្សាច់ជ្រុះ និងទឹកហូរចូលលើផ្លូវ បង្កឲ្យមានបញ្ហាអនាម័យ និងសោភ័ណភាពទីក្រុង។ រដ្ឋបាលខណ្ឌ បានព្រមានថា ប្រសិនបើម្ចាស់ដេប៉ូមិនអនុវត្តតាមការណែនាំ នឹងអនុវត្តវិធានការច្បាប់តាមនីតិវិធី ហើយអាចឈានទៅដល់ការបិទអាជីវកម្មផងដែរ។

សូមរំលឹកផងដែរថា កាលថ្ងៃទី ៩ ខែកក្កដា ឆ្នាំ ២០២៥ លោក ឌន ដាវុឌ នាយករងរដ្ឋបាលខណ្ឌ បានដឹកនាំក្រុមការងាររដ្ឋបាលខណ្ឌឫស្សីកែវ ចុះពិនិត្យ និងណែនាំដល់ដេប៉ូខ្សាច់ ក្នុងមូលដ្ឋានខណ្ឌឫស្សីកែវ ដើម្បីអនុវត្តវិធានការអនាម័យបរិស្ថាន និងថែរក្សាសណ្ដាប់ធ្នាប់សាធារណៈ។

ក្នុងនោះ ដោយបានណែនាំដល់ម្ចាស់ដេប៉ូខ្សាច់ទាំងនោះ តម្រូវឲ្យធ្វើកន្លែងលាងសំអាតកង់ឡានតាមលក្ខណៈបច្ចេកទេសត្រឹមត្រូវ មុននឹងធ្វើចរាចរណ៍លើដងផ្លូវ ត្រូវប្រើតង់កៅស៊ូគ្របឡានដឹកខ្សាច់ឲ្យបានជិតត្រឹមត្រូវ ជៀសវាងធ្លាក់ដីខ្សាច់លើដងផ្លូវបណ្តាលឲ្យខូចសោភ័ណភាព សណ្ដាប់ធ្នាប់សាធារណៈ ប៉ះពាល់ដល់អ្នកធ្វើដំណើរ។ បន្ថែមនោះ ត្រូវលាងសំអាតផ្លូវឲ្យបានស្អាតជាប្រចាំនៅទីតាំងដេប៉ូខ្សាច់រៀងៗ ខ្លួន ផងដែរ៕

អត្ថបទ ៖ សំណាង