តម្លៃស្រូវ Archives - Kampuchea Thmey Daily

ARDB បានបញ្ចេញទុនពិសេសជិត ២០ លានដុល្លារហើយ នៃកញ្ចប់ទុនសរុប ដើម្បីប្រមូលទិញស្រូវពីកសិករ

Din Thary — Wed, 19 Nov 2025 09:19:03 +0000

ទុនពិសេស ៤០ លានដុល្លារ ដែលរាជរដ្ឋាភិបាលកម្ពុជាទម្លាក់ដើម្បីជួយដោះស្រាយបញ្ហាស្រូវធ្លាក់ថ្លៃមកទល់ពេលបច្ចុប្បន្ននេះ ធនាគារអភិវឌ្ឍន៍ជនបទ និងកសិកម្ម (ARDB) បានបញ្ចេញទុនអស់ជិត ២០ លានដុល្លារហើយ ដើម្បីប្រើប្រាស់ក្នុងការប្រមូលទិញស្រូវពីប្រជាកសិករ។

លោក កៅ ថាច អគ្គនាយក ARDB បានបញ្ជាក់ប្រាប់«កម្ពុជាថ្មី» នៅថ្ងៃទី១៩ ខែវិច្ឆិកានេះថា សម្រាប់ទុនពិសេសដែលរាជរដ្ឋាភិបាលកម្ពុជាទើបតែបានទម្លាក់ដើម្បីជាទុនបន្ថែមទៅដល់បណ្តារោងម៉ាស៊ីនកិនស្រូវក្នុងស្រុកក្នុងការប្រមូលទិញស្រូវពីកសិករ ក៏ដូចជារក្សាតម្លៃស្រូវឱ្យមានស្ថិរភាព មកទល់ពេលនេះបានប្រើប្រាស់អស់ជិត ២០ លានដុល្លារហើយ ។

ក្នុងនោះដែរ រោងម៉ាស៊ីនដែលបានចូលរួមនៅក្នុងការប្រើប្រាស់កញ្ចប់ទុននេះមានប្រមាណជាង ២០ រោងម៉ាស៊ីនកិនស្រូវហើយ ដែលភាគច្រើន រោងម៉ាស៊ីនទាំងអស់នោះបានធ្វើការប្រមូលទិញនូវប្រភេទស្រូវផ្ការំដួលពីកសិករ។

លោក ក៏បានបញ្ជាក់ដែរថា៖« រោងម៉ាស៊ីនកិនស្រូវទាំងជាង ២០ រោងម៉ាស៊ីននេះសុទ្ធសឹងតែជាសមាជិករបស់សហព័ន្ធស្រូវអង្ករកម្ពុជា ហើយនិងរោងម៉ាស៊ីនដែលមានកិច្ចសហការជាមួយក្រសួងកសិកម្ម រុក្ខាប្រមាញ់ និងនេសាទ»។

ជាមួយគ្នានេះ បើតាមលោកឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា ក៏បានឱ្យដឹងដែរថា បច្ចុប្បន្ន រោងម៉ាស៊ីនកិនស្រូវដែលជាសមាជិករបស់ខ្លួន និង ដែលបានសហការជាមួយក្រសួងកសិកម្ម និងប្រើប្រាស់នូវកញ្ចប់ថវិការបស់រាជរដ្ឋាភិបាល បាននិងកំពុងប្រមូលទិញស្រូវពីកសិករប្រចាំថ្ងៃ ដោយជាមធ្យមក្នុងរង្វង់ ១ ម៉ឺន ៥ ពាន់តោន។

ក្នុងនោះ រោងម៉ាស៊ីនកិនស្រូវដែលជាសមាជិកទាំងអស់នេះ ជាមធ្យមក្នុងមួយថ្ងៃ គឺប្រមូលទិញស្រូវក្នុងរង្វង់ ១ ម៉ឺន ៥ ពាន់តោន ពីប្រជាកសិករ៕

The post ARDB បានបញ្ចេញទុនពិសេសជិត ២០ លានដុល្លារហើយ នៃកញ្ចប់ទុនសរុប ដើម្បីប្រមូលទិញស្រូវពីកសិករ appeared first on Kampuchea Thmey Daily.

អភិបាលខេត្តកំពង់ធំ ណែនាំឲ្យអាជ្ញាធរ និងឈ្មួញទិញស្រូវក្នុងខេត្តត្រូវស្វែងរកដំណោះស្រាយដើម្បីកាត់បន្ថយផលប៉ះពាល់ដល់កសិករ

Sokhom Khon — Tue, 11 Nov 2025 02:04:07 +0000

នៅថ្ងៃទី១០ ខែវិច្ឆិកា ឆ្នាំ២០២៥ លោក នួន ផារ័ត្ន អភិបាលនៃគណៈអភិបាលខេត្តកំពង់ធំ បានដឹកនាំកិច្ចប្រជុំជាមួយឈ្មួញទិញស្រូវ និងម្ចាស់រោងម៉ាស៊ីនកិនស្រូវ លើការងារប្រមូលទិញស្រូវសំដៅរក្សាលំនឹងថ្លៃស្រូវ នៅក្នុងរដូវប្រមូលផលនេះ។

ក្នុងឱកាសនោះ លោកអភិបាលខេត្តលើកឡើងថា បញ្ហាតម្លៃស្រូវ គឺជាបញ្ហារួមរបស់ប្រជាកសិករ ដែលឈ្មួញកណ្តាលទិញស្រូវ និងម្ចាស់រោងម៉ាស៊ីនកិនស្រូវ មន្ត្រីជំនាញ និងអាជ្ញាធរដែនដី ត្រូវតែស្វែងរកដំណោះស្រាយចំពោះមុខរួមគ្នា ដើម្បីកាត់បន្ថយផលប៉ះពាល់ដែលកើតមានឡើង និងឱ្យបានទាន់ពេលវេលាជូនប្រជាកសិករ។ ហើយឈ្មួញទិញស្រូវ និងម្ចាស់រោងម៉ាស៊ីនស្រូវទាំងអស់ ត្រូវជួយសម្របសម្រួលក្នុងការទិញស្រូវពីប្រជាកសិករឱ្យបានល្អប្រសើរ ចៀសវាងការទិញទម្លាក់ថ្លៃ ឬបន្ទាបតម្លៃខ្លាំង ដើម្បីរក្សាស្ថិរភាពតម្លៃស្រូវ និងបញ្ចៀសការកកស្ទះក្នុងរដូវប្រមូលផល ព្រមទាំងជំរុញដល់ការអភិវឌ្ឍន៍វិស័យកសិកម្មនៅក្នុងខេត្ត។

លោកភិបាលខេត្តបន្ថែមថា បើទោះបីជាការប្រមូលផលស្រូវនៅមានចំនួនតិចធៀបនឹងផ្ទៃដីបង្កបង្កើនផលនៅឡើយក្ដី អាជ្ញាធរក្រុងស្រុកទាំង៩ ក្នុងភូមិសាស្ត្រខេត្តកំពង់ធំ ត្រូវបន្តចុះជាប់ជាប្រចាំជាមួយប្រជាកសិករ ដើម្បីក្តាប់ឱ្យជាប់នូវបញ្ហាប្រឈមពាក់ព័ន្ធនឹងសេដ្ឋកិច្ច និងជីវភាពរបស់ប្រជាពលរដ្ឋ ដើម្បីដាក់ចេញនូវវិធានការ និងការជួយគាំទ្រដល់ពួកគាត់ឱ្យបានទាន់ពេលវេលា៕

អត្ថបទ៖ ឈាង មករា

The post អភិបាលខេត្តកំពង់ធំ ណែនាំឲ្យអាជ្ញាធរ និងឈ្មួញទិញស្រូវក្នុងខេត្តត្រូវស្វែងរកដំណោះស្រាយដើម្បីកាត់បន្ថយផលប៉ះពាល់ដល់កសិករ appeared first on Kampuchea Thmey Daily.

បទយកការណ៍៖ កសិករចង់ឱ្យមានដំណោះស្រាយរឿងតម្លៃស្រូវខណៈថ្លៃផលិតកាន់តែកើនឡើង

hun sirivadh — Mon, 03 Nov 2025 10:42:07 +0000

«គិតមើលពូជជីម៉ាការុងប៉ុន្មាន? ម៉ាការ៉ុង១៥ម៉ឺន បាញ់ថ្នាំ១ដបអាល្អ១០ម៉ឺន មានអា៥ម៉ឺន ហើយជី១៥ម៉ឺនក្នុងមួយការុង ស្រែខ្ញុំដាក់ជីអស់ម៉ាតោនជាងលើដី៣ហិតា តែលទ្ធផលគឺអត់បានដល់នោះទេ! គិតមើលទៅក្នុងមួយហិតាខ្ញុំបានមិនដល់១លានផង ហើយជីខ្ញុំត្រូវចំណាយអស់ប៉ុន្មាន?»

នេះជាការរៀបរាប់របស់អ្នកស្រី សុខឿត រស់នៅឃុំជន្លាសដៃ ស្រុកក្រឡាញ់ ខេត្តសៀមរាបបានត្អូញរៀបរាប់ពីការលំបាករបស់ខ្លួនក្រោយពេលដែលប្រមូលផលស្រូវមិនអាចទូទាត់សងដល់ថ្លៃជី ថ្នាំ ថ្លៃច្រូត និងអគ្គិសនីបាន។ អ្នកស្រីថាឆ្នាំនេះតម្លៃស្រូវកាន់តែថោក តែតម្លៃជីនៅតែឡើងថ្លៃ ដែលប៉ះពាល់ដល់ការលក់ស្រូវដែលធ្វើបានជាខ្លាំង។

អ្នកស្រីបន្ថែមថា៖«វេទនាណាស់! ណាមួយកូនរៀនអត់មានលុយឱ្យកូនរៀន ខ្ញុំគ្មានគោក្របីអីនឹងគេទេ។ សព្វថ្ងៃនេះខ្ញុំបានលក់ដូរតិតតក់ៗ ហើយលក់នេះក៏ពិបាកទៀត លក់មិនបានទេ! ១ថ្ងៃខ្ញុំសឹងតែរកមិនបាន៣ម៉ឺនចូលហោប៉ៅទេ!»។

អ្នកស្រីសំណូមពរឱ្យមានវិធានការយ៉ាងណាកាត់បន្ថយថ្លៃដើមនៃការផលិតដោយធ្វើយ៉ាងណាសម្រួលថ្លៃថ្នាំ ជីកសិកម្ម ប្រេងសាំង អគ្គិសនី ហើយសុំឱ្យមន្ត្រីរដ្ឋាភិបាលចុះមកពិនិត្យលើទីតាំងជាក់ស្ដែងទទួលយកកង្វល់របស់ប្រជាកសិករដើម្បីជួយស្វែងរកដំណោះស្រាយផងដែរ។

នៅតាមបណ្ដោយផ្លូវជាតិលេខ៦ពីខេត្តសៀមរាបទៅខេត្តបន្ទាយមានជ័យ កសិករមួយចំនួនបានចាប់ផ្ដើមប្រមូលផលស្រូវវស្សារបស់ខ្លួនដើម្បីយកលក់ឱ្យឈ្មួញទទួលទិញដែលយើងឃើញមានរថយន្តធំៗជាច្រើនបានចតនៅតាមផ្លូវដើម្បីប្រមូលទិញពីកសិករ។

តម្លៃស្រូវរំដួល និងម្លិះត្រូវបានឈ្មួញប្រមូលទិញក្នុងមួយគីឡូ ១ ០០០រៀល ខណៈស្រូវសែនក្រអូបបានត្រឹម ៩០០រៀលប៉ុណ្ណោះ។ កសិករបានរអ៊ូរទាំថាតម្លៃនេះស្ទើរតែមិនអាចទូទាត់នឹងថ្លៃផលិតបាននោះទេ តែយ៉ាងណាត្រូវតែបង្ខំលក់ព្រោះស្រូវទុំហើយ និងត្រូវយកលុយសងថ្លៃជី ថ្លៃម៉ាស៊ីនច្រូតជាដើម។

អង្គុយនៅលើម៉ូតូបន្ទាប់ពីយកស្រូវមកលក់បានប្រមាណ២តោន និងទទួលបានលុយប្រមាណ២លាន៤០ម៉ឺនរៀលលោក ហ៊ុំ ឈូក បានអង្គុយគិតគូរថ្លៃចំណាយនិងបាននិយាយបែបអស់សំណើច ហួសចិត្តថា បន្ទាប់ពីដាំដុះរាប់ខែ ចំណាយកម្លាំងអស់ជាច្រើនមក ក្រោយលក់ស្រូវទូទាត់នឹងថ្លៃដើមទៅសល់បាន២០ម៉ឺនរៀលប៉ុណ្ណោះ។

លោកថា៖ «សល់តិចណាស់! បើគិតថាសល់នោះ វាយ៉ាប់វេទនា។ បើសល់គឺសល់តិចណាស់ វាមិនដូចកាលពីឆ្នាំទៅមិញ»។

លោកថាតម្លៃស្រូវដែលអាចធានាដល់ប្រជាកសិករបាននោះក្នុងតម្លៃ ១៥០០រៀលក្នុងមួយគីឡួ បូករួមទាំងការប្រមូលផលបានពេញលេញ និងផ្លូវដឹកជញ្ជូនពីស្រែមកកន្លែងលក់ល្អ។

អ្នកនាំពាក្យក្រសួងពាណិជ្ជកម្មលោក ប៉ែន សុវិជាតិ បានប្រាប់មកកម្ពុជាថ្មីថា ចំពោះកត្តាតម្លៃនៃការផលិតដែលត្រូវចំណាយច្រើនប៉ះពាល់ដល់ចំណូលកសិករពុំមែនជាសមត្ថកិច្ចរបស់ក្រសួងពាណិជ្ជកម្មនោះទេ ដោយបង្វែរទៅកាន់ក្រសួងកសិកម្មវិញ។

ក្នុងវីដេអូដែលបានបង្ហោះលើបណ្ដាញសង្គមកាលពីថ្ងៃទី២ ខែវិច្ឆិកា ឆ្នាំ២០២៥ រដ្ឋមន្ត្រីកសិកម្មលោក ឌិត ទីណា បានលើកឡើងថាស្រូវផ្ការំដួលដែលលក់បានក្នុងតម្លៃ១០០០រៀលនេះគឺជាតម្លៃសមរម្យដែលអាចទទួលបាន ទោះបីជាលោកថាហាក់បីជានៅទាបក្ដី។ លោកថាបច្ចុប្បន្នរដ្ឋាភិបាលកំពុងគិតគូរពីដំណោះស្រាយសមស្របដល់កសិករផងដែរ ខណៈចំពោះបញ្ហាចំពោះមុខពេលបច្ចុប្បន្នលោកសំណូមពរដល់ម្ចាស់បំណុលជួយយោគយល់អធ្យាស្រ័យដល់ការលំបាករបស់កសិករ ខណៈលោកជំរុញដល់ប្រជាកសិករចងក្រងជាសហគមន៍ដើម្បីមានការគាំទ្រគ្នា។

លោកថា៖ «នៅពេលដែលយើងព្យាយាមលើកតម្លៃម្នាក់បន្តិច ឈ្មួញជួយលើកបន្ដិច អ្នកទិញហូបជួយទិញបន្ថែមដើម្បីមានថវិកាចូល រដ្ឋយើងដែលមានក្រសួងសេដ្ឋកិច្ចនិងហិរញ្ញវត្ថុគាត់ទម្លាក់ថវិកាក្នុងការឱ្យជួយទិញថែមទៀតដើម្បីឱ្យតម្លៃហ្នឹងវាកើនឡើងខ្ពស់ ហើយបូករួមជាមួយអ្នកដែលឱ្យប្រជាកសិករយើងជំពាក់ព្យាយាមអត់អោនការជំពាក់នេះដើម្បីចាំរដូវប្រមូលផលលើកក្រោយដើម្បីព្យាយាមសងជាលំដាប់ជាលំដាប់គឺយើងអាចទៅមុខទាំងអស់គ្នា ប្រជាកសិករយើងក៏អាចទទួលបានលទ្ធភាពនៃការដាំដុះបន្តទៀត»។

បើតាមលោករដ្ឋមន្ត្រីបច្ចុប្បន្នកម្ពុជាមានផ្ទៃដីដាំដុះជាង៣លានហិតា និងមានប្រជាកសិករប្រមាណជាង១,៧លានគ្រួសារ ខណៈបច្ចុប្បន្នកម្ពុជាប្រមូលទិន្នផលស្រូវបានប្រមាណជិត៣ម៉ឺនតោនក្នុងមួយថ្ងៃ។

ទីប្រឹក្សាផ្នែកកសិកម្មលោក សម វិទូ បានឱ្យកម្ពុជាថ្មីដឹងថា បញ្ហាតម្លៃស្រូវនេះនឹងចោទជាបញ្ហាជារៀងរាល់ឆ្នាំដោយសារតម្រូវការទាបជាងការផ្គត់ផ្គង់។ លោកថាមានប្រទេសមិនច្រើនទេដែលត្រូវការការនាំចូលអង្ករពីបរទេសនោះ ខណៈអ្នកផ្គត់ផ្គង់មានឥណ្ឌា ថៃ វៀតណាម ភូមា កម្ពុជា ដែលកំពុងប្រកួតប្រជែងគ្នានាំអង្ករទៅលក់។

លោកថាបច្ចុប្បន្នអង្គរកម្ពុជាមានទីផ្សារនៅទីផ្សារអឺរ៉ុបដែលជាហេតុធ្វើឱ្យតម្លៃស្រូវប្រណិតរបស់កម្ពុជានៅរក្សាតម្លៃសមរម្យនៅលើទីផ្សារ យ៉ាងណាក្ដីលោកឱ្យជាយោបល់ថារដ្ឋាភិបាលគួរគិតគូរពីផែនការផលិត និងរកដំណាំស្រូវប្រភេទណាដែលអាចយកទៅផលិតជារបស់ផ្សេងក្រៅពីអង្ករសម្រាប់បរិភោគ។

លោកថា៖ «យើងត្រូវរកស្រូវពួជអីដែលអាចជាអ្វីផ្សេងទៀតក្រៅតែពីការយកទៅដាំបាយហូបព្រោះមនុស្សម្នាក់បាយបីពេលអស់អង្ករប៉ុន្មានយើងមិនអាចហូបលើសពីហ្នឹងទេ! ព្រោះបាយយើងមិនអាចយកទៅហូបលេងឬអីទេ។ ឬយើងអាចថាយកអង្កររបស់យើងទៅច្នៃជាផលិតផលអ្វីដែលមានមនុស្សប្រើប្រាស់ច្រើនត្រូវគិតពីបញ្ហាអស់ហ្នឹងក្រៅពីការផលិតស្រូវឬកិនជាអង្ករលក់នោះ ឬក៏យើងត្រូវគិតថាដាំស្រូវណាដែលត្រូវផលិតជាអង្ករសម្រាប់នាំចេញទៅលើទីផ្សារណាដែលត្រូវការនាំចេញខ្ពស់»។

លោក សម វិទូ បានជំរុញដល់មន្ទីរ ក្រសួងស្ថាប័នពាក់ព័ន្ធ ជាពិសេសក្រសួងកសិកម្ម និងពាណិជ្ជកម្មត្រូវគិតគូរពិភាក្សាគ្នារៀបចំផែនការដោយពិនិត្យលើទីផ្សារសម្រាប់ការផ្គត់ផ្គង់ជារៀងរាល់ឆ្នាំដើម្បីមានថ្នាលតម្រង់ទិសសម្រាប់ការដាំដុះផងដែរ។

ងាកទៅអ្នកស្រី សុខឿត វិញនៅពេលសួរថាបើលក់ខាតរាល់ឆ្នាំហេតុអ្វីអ្នកស្រីនៅតែបន្តធ្វើស្រែនេះទៀត។ អ្នកស្រីថាកសិករមិនដឹងថាត្រូវធ្វើអ្វីជីវិតរបស់កសិករគឺស្រូវអង្ករនេះទោះបីជាខាត មានតែរកចំណូលមកផ្សែផ្សំបន្ថែមដើម្បីអាចបន្តរស់នៅបន្តទៀតប៉ុណ្ណោះ។

អ្នកស្រីថា៖ « ខាតសឹងតែរាល់ឆ្នាំដោយសារតែយើងមិនដឹងធ្វើអី? ជីវិតកសិករយើងគឺរំពឹងលើការធ្វើស្រែនេះហើយបើថាយើងចំណេញមានបានដោយសារស្រូវអង្ករគឺអត់មានទេ! តែខ្ញុំមិនដឹងធ្វើយ៉ាងមិច។ សំណួរ៖ បើខាតអ៊ីចឹងយើងរកចំណូលអីដើម្បីយកមកទប់ការខាតបាន? មានតែចិញ្ចឹមមានចិញ្ចឹមទាបានក៏បាន អត់ក៏អត់ខ្ញុំចាស់ហើយទៅរកអីបាន? ទៅធ្វើរោងចក្រមិនដឹងថាធ្វើយ៉ាងណាយើងក៏ចាស់ហើយ មានតែចិញ្ចឹមគោ មាន់ ទា និងធ្វើស្រែប៉ុណ្ណោះ»»៕

អត្តបទដោយ ហ៊ុន សិរីវឌ្ឍន៍

The post បទយកការណ៍៖ កសិករចង់ឱ្យមានដំណោះស្រាយរឿងតម្លៃស្រូវខណៈថ្លៃផលិតកាន់តែកើនឡើង appeared first on Kampuchea Thmey Daily.

កសិករខេត្តបាត់ដំបង ថ្ងួចថ្ងូរពីតម្លៃស្រូវចុះថោកខ្លាំង

អ៊ិន ពិសី — Sat, 25 Oct 2025 04:08:30 +0000

ប្រជាកសិករនៅខេត្តបាត់ដំបង មានការរអ៊ូរទាំអំពីតម្លៃស្រូវដែលឈ្មួញទម្លាក់តម្លៃយ៉ាងទាបបំផុត ស្ទើរតែទទួលយកមិនបាន ព្រោះបើប្រៀបធៀបទៅនឹងទិន្នផល បើទោះបីជាពួកគាត់ច្រូតកាត់ប្រមូលផល ក្នុងមួយហិតាបានដល់ ៧ តោនក៏ដោយ ក៏នៅតែមិនអាចទប់ទល់នឹងដើមទុនក្នុងការផលិតបានឡើយ។

លោក ពុន កក្កដា ជាប្រជាកសិកររស់នៅឃុំព្រៃតូច ស្រុកមោងឬស្សី ខេត្តបាត់ដំបង បានលើកឡើងថា នៅពេលនេះ គឺជាការប្រមូលផលស្រូវវគ្គទី ២ ហើយសម្រាប់កសិករទូទៅ តែការប្រមូលផលលើកនេះ កសិករអស់ទឹកចិត្តក្នុងការដាំដុះ ដោយសារតែតម្លៃពេលឈ្មួញចុះមកទិញ គឺ ទាបបំផុត ស្ទើរតែទទួលយកមិនបាន ហើយតម្លៃនេះ កសិករខាតដើមគ្រប់គ្នា។

កសិកររូបនេះ បានបន្តថា សម្រាប់តម្លៃស្រូវ OM 62 គឺ លក់បានត្រឹមតែតម្លៃ ៦២ ម៉ឺនរៀល ក្នុងមួយតោន។ ដោយឡែកសម្រាប់ពូជស្រូវស្រង៉ែស្រាល គឺបានត្រឹមតែ ៦៥ ម៉ឺនរៀល ក្នុងមួយតោន ដែលក្នុងតម្លៃស្រូវវគ្គទី ២ នេះ ប្រជាកសិករមានការខាតដើមគ្រប់គ្នា ព្រោះឈ្មួញទម្លាក់តម្លៃខ្លាំងពេក បើប្រៀបធៀបទៅនឹងឆ្នាំកន្លងទៅ តម្លៃស្រូវទាំងពីរប្រភេទនេះ គឺមានតម្លៃជាង ៨០ ម៉ឺនរៀល ក្នុងមួយតោន ខុសគ្នាឆ្ងាយណាស់បើគិតមកទល់នឹងពេលនេះ។

ប្រជាកសិករជាច្រើន ក៏បានសំណូមពរយ៉ាងទទូចដល់រដ្ឋមន្ត្រីក្រសួងកសិកម្ម សូមមេត្តាចុះពិនិត្យ និងជួយជំរុញឲ្យឈ្មួញដំឡើងថ្លៃឲ្យបានសមរម្យដែលកសិករអាចទទួលយកបាន ព្រោះពេលនេះតម្លៃស្រូវធ្លាក់ខ្លាំងពេក ធ្វើឲ្យកសិករម្នាក់ៗ ស្ទើរតែអស់ទឹកចិត្តក្នុងការដាំស្រូវហើយ៕

អត្ថបទ ៖ សោ និយមរ័ត្ន

The post កសិករខេត្តបាត់ដំបង ថ្ងួចថ្ងូរពីតម្លៃស្រូវចុះថោកខ្លាំង appeared first on Kampuchea Thmey Daily.

រដ្ឋស្នើឱ្យសហព័ន្ធស្រូវ-អង្ករកម្ពុជា បន្តជួយការពារលើបញ្ហាតម្លៃស្រូវនារដូវប្រមូលផល

Din Thary — Tue, 21 Oct 2025 07:07:00 +0000

ពាក់ព័ន្ធទៅនឹងវិស័យស្រូវ-អង្ករ ក្រសួងកសិកម្ម នៅក្នុងកិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែកឯកជន បានស្នើឱ្យសហព័ន្ធស្រូវអង្ករកម្ពុជា និងសមាជិកនៃរោងម៉ាស៊ីនកិនស្រូវទាំងអស់បន្តជួយគាំពារ និងការពារទៅលើបញ្ហាតម្លៃស្រូវដែលកសិករនឹងប្រមូលផលនាពេលខាងមុខនេះ។

ថ្លែងប្រាប់ «កម្ពុជាថ្មី» នៅព្រឹកថ្ងៃទី២១ ខែតុលា ឆ្នាំ២០២៥ នេះ លោក ឧកញ៉ា ឡាយ ឈុនហួរ បានឱ្យដឹងថា នៅក្នុងកិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែកឯកជន សហព័ន្ធស្រូវអង្ករកម្ពុជាពុងមានបញ្ហាថ្មីបន្ថែមដែលត្រូវលើកទៅកាន់រាជរដ្ឋាភិបាលដើម្បីឱ្យដោះស្រាយនោះទេ ព្រោះដោយសារតែបញ្ហាផ្សេងៗត្រូវបានលើកកាលពីពេលកន្លងទៅរួចរាល់ហើយដែរ។ មួយវិញទៀត បញ្ហាមួយចំនួនក៏បានត្រូវបានដោះស្រាយរួច ដូច្នេះនៅលើបញ្ហាថ្មីមានការពាក់ព័ន្ធការប្រជុំរវាងវិស័យឯកជន។

ជាមួយគ្នានេះ ក្រសួងកសិកម្មក៏បានស្នើមកកាន់សហព័ន្ធស្រូវអង្កកម្ពុជា ក៏ដូចជាសមាជិករោងម៉ាស៊ីនកិនស្រូវទាំងអស់ជួយរក្សាការពារលើបញ្ហាតម្លៃស្រូវ ជាពិសេសស្រូវផ្ការំដួល ដែលប្រជាកសិករនឹងត្រូវប្រមូលផលនៅក្នុងខែវិច្ឆកា ខាងមុខនេះ ព្រមទាំងស្រូវប្រភេទផ្សេងៗដែលនឹងច្រូតបន្តបន្ទាប់ទៀតនៅក្នុងខែធ្នូ ខែមករា និងខែកុម្ភៈ។

ទន្ទឹមនេះ ពីខាងសហ័ពន្ធស្រូវអង្ករកម្ពុជា ក៏បានស្នើឱ្យគ្រប់បណ្តាសមាជិករោងម៉ាស៊ីនកិនស្រូវទាំងអស់ ជួយបន្តទិញស្រូវផ្ការំដួលពីប្រជាពលរដ្ឋឱ្យអស់ពីសមត្ថភាពដែលអាចធ្វើទៅបាន ជាមួយនិងការជួយបន្តទិញនូវប្រភេទកញ្ចុងអង្ករ និងកន្ទក់ពីរោងម៉ាស៊ីនកិនស្រូវដើម្បីឱ្យមានតម្លៃល្អសមរម្យ។

សូមជម្រាបថា កិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែកឯកជន ក្រោយអធិបតីភាពរដ្ឋមន្ត្រីក្រសួងកសិកម្ម លោក ឌិត ទីណា ត្រូវបានរៀបចំឡើងក្នុងគោលបំណងដើម្បី ១.ពិគ្រោះ និងពិភាក្សាអំពីវិធានការ និងការអន្តរាគមន៍ស្តីពី ទីផ្សារ និងការប្រមូលផលស្រូវវស្សាដែលនឹងឈានចូលមកដល់ក្នុងពេលឆាប់ៗនេះ និង២. ពិភាក្សា និងដោះស្រាយលើបញ្ហាប្រឈមក្នុងវិស័យស្រូវ អង្ករ ដែលស្នើឡើងដោយផ្នែកឯកជន៕

ដោយ៖ ឌិន ថារី

The post រដ្ឋស្នើឱ្យសហព័ន្ធស្រូវ-អង្ករកម្ពុជា បន្តជួយការពារលើបញ្ហាតម្លៃស្រូវនារដូវប្រមូលផល appeared first on Kampuchea Thmey Daily.

រាជរដ្ឋាភិបាលដាក់ចេញយុទ្ធសាស្ត្រចំនួន ៦ ដើម្បីពង្រីក និងធ្វើពិពិធកម្មទីផ្សារនាំចេញអង្ករ ក្នុងពេលតម្លៃធ្លាក់ចុះ

deth leng — Tue, 26 Aug 2025 09:45:27 +0000

រាជរដ្ឋាភិបាលកម្ពុជាបានដាក់ចេញនូវយុទ្ធសាស្ត្រពង្រីក និងពិពិធកម្មទីផ្សារនាំចេញអង្ករកម្ពុជា ២០២៥-២០៣០ ដើម្បីជួយដោះស្រាយបញ្ហាតម្លៃស្រូវ-អង្ករកំពុងធ្លាក់ចុះ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍នៅថ្ងៃទី ២៦ ខែសីហា ឆ្នាំ ២០២៥ថា ក្នុងគ្រាដ៏លំបាកនេះ មន្ត្រីក្រសួងកសិកម្ម និងស្ថាប័នពាក់ព័ន្ធគ្រប់ជាន់ថ្នាក់ នៅតែបន្តឆ្លើយតបនឹងការធ្លាក់ថ្លៃស្រូវសើម តាមរយៈការសម្របសម្រួលការប្រមូលទិញនៅទីវាល និងដឹកជញ្ជូន ហើយការដាក់ចេញយុទ្ធសាស្ត្រពង្រីក និងពិពិធកម្មទីផ្សារនាំចេញនេះ នឹងជួយសម្រួលដល់កិច្ចខិតខំប្រឹងប្រែងជំរុញថ្លៃស្រូវ។

ការផ្ដោតអាទិភាពលើលក្ខណៈពិសេសនៃពូជក្រអូប និងប្រណិតរបស់កម្ពុជា ដើម្បីប្រជែងគុណភាពនៅលើទីផ្សារគោលដៅ ជាជាងប្រជែងលើបរិមាណ គឺនឹងជួយបង្កើនតម្លៃហើយផ្ដល់ផលចំណេញជូនទាំងរោងម៉ាស៊ីននាំចេញ ទាំងប្រជាកសិករផ្ទាល់។

លោក ឌិត ទីណា លើកទឹកចិត្តឱ្យរោងម៉ាស៊ីនជឿជាក់ និងផ្ដល់តម្លៃខ្ពស់ដល់ពូជយុទ្ធសាស្ត្ររបស់កម្ពុជា ដើម្បីជួយជំរុញម៉ាកយីហោអង្ករទៅប្រកួតប្រជែងនៅលើទីផ្សារអន្តរជាតិ។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម មានប្រសាសន៍ថា រាជរដ្ឋាភិបាលដាក់ចេញនូវយុទ្ធសាស្ត្រពង្រីក និងការពិពិធកម្មទីផ្សារនាំចេញអង្ករ ដោយបានដាក់ចេញនូវយុទ្ធសាស្ត្រទាំង ៦ រួមាន៖ ទី១ ការពង្រឹងការស្រាវជ្រាវផ្នែកទីផ្សារ ដើម្បីជួយជំរុញការនាំចេញអង្ករប្រកបដោយប្រសិទ្ធភាព ទី២ ការទទួលបានពីទីផ្សារ ទី៣ ការពង្រឹងម៉ាកយីហោ និងការផ្សព្វផ្សាយនូវផលិតកម្ម ផលអង្ករកម្ពុជាសម្រាប់នាំចេញ ទី៤ ការលើកកម្ពស់សមត្ថភាពម្ចាស់រោងម៉ាស៊ីនកិនស្រូវ និងអ្នកនាំចេញ ទី៥ ពង្រឹងសមត្ថភាពនាំចេញរបស់ក្រុមហ៊ុន ហ្គ្រីនត្រេដ សម្រាប់ផ្គត់ផ្គង់ទ្រង់ទ្រាយធំ និងទី៦ ការរកដំណោះស្រាយផ្អែកលើទីផ្សារ ដើម្បីលើកកម្ពស់ខ្សែច្រវាក់តម្លៃអង្ករកម្ពុជា។

លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា មានប្រសាសន៍ថា តម្លៃស្រូវ-អង្ករនៅកម្ពុជា និងពិភពលោកបានធ្លាក់ចុះ ដោយសារកំណើននៃផលិតកម្មប្រទេសមួយចំនួន ដែលជាប្រទេសនាំចូល ដូចជា ហ្វីលីពីន ឥណ្ឌូនេស៊ីជាដើម ដោយសារអាកាសធាតុអំណោយផល ធ្វើឱ្យទិន្នផលនៃការដាំដុះរបស់ប្រទេសទាំងនោះកើនឡើង ខណៈប្រទេសហ្វីលីពីនផ្អាកការនាំចូលអង្ករចំនួន ៦០ ថ្ងៃ។

លោក លន់ យ៉េង យល់ឃើញថា៖ «ការផ្អាកនាំចូលរបស់ហ្វីលីពីន ៦០ ថ្ងៃនេះ ធ្វើឱ្យអង្ករប្រមាណ ១ លានតោន ចាល់នៅលើទីផ្សារ ដែលស្តុកប្រទេសអាស៊ីទាំងអស់នេះត្រូវចាល់ទាំងអស់ ធ្វើឱ្យសម្ពាធនេះ ធ្លាក់ទៅដល់ការប្រមូលផលស្រូវ ដែលអង្ករអត់ទីផ្សារ ធ្វើឱ្យតម្លៃស្រូវក៏ធ្លាក់ចុះដែរ»។

យោងតាមសហព័ន្ធស្រូវអង្ករកម្ពុជា (CRF) នៅក្នុងរយៈពេល៧ខែ នៃឆ្នាំ២០២៥ កម្ពុជាបាននាំចេញអង្ករបានចំនួន ៤២០ ៥៧២តោន ទៅកាន់គោលដៅ ៦៥ ប្រទេស គិតជាទឹកប្រាក់បានចំនួន ៣០៩.៣២ លានដុល្លារសហរដ្ឋអាមេរិក។

កម្ពុជាក៏បាននាំចេញស្រូវចំនួន ៣ ៨៧៣ ០៧៨ តោនស្រូវសើម ដែលគិតជាទឹកប្រាក់បានប្រមាណ ៩១៤.២១ លានដុល្លារ៕

អត្ថបទ៖ ឡេង ដេត

The post រាជរដ្ឋាភិបាលដាក់ចេញយុទ្ធសាស្ត្រចំនួន ៦ ដើម្បីពង្រីក និងធ្វើពិពិធកម្មទីផ្សារនាំចេញអង្ករ ក្នុងពេលតម្លៃធ្លាក់ចុះ appeared first on Kampuchea Thmey Daily.

តម្លៃស្រូវធ្លាក់ចុះ ដោយសារប្រទេសនាំចូលអង្ករផ្អាកការបញ្ជាទិញ

deth leng — Fri, 22 Aug 2025 06:53:00 +0000

ការធ្លាក់ចុះថ្លៃស្រូវចាប់តាំងពីពាក់កណ្តាលខែកក្កដា ឆ្នាំ២០២៥ ពាក់ព័ន្ធដោយផ្ទាល់ទៅនឹងការផ្អាកបញ្ជាពីប្រទេសនាំចូលអង្ករ ស្របពេលដែលមានការប្រជែងទម្លាក់ថ្លៃអង្ករយ៉ាងគំហុកពីសំណាក់ប្រទេសនាំចេញ ដែលបង្កឱ្យមានបញ្ហាជាសកលនៅលើទីផ្សារអង្ករអន្តរជាតិ។

គិតត្រឹមថ្ងៃទី ១៨ ខែសីហា ឆ្នាំ ២០២៥ តម្លៃស្រូវអូអឹម មានតម្លៃ ៧៣០ រៀល ក្នុងមួយគីឡូក្រាម ខណៈស្រូវសែនក្រអូបតម្លៃ ៩៤០ រៀលក្នុងមួយគីឡូក្រាម។

ស្ថានភាពនេះបានធ្វើឱ្យថ្លៃស្រូវសើមនៅតាមប្រទេសនានាក្នុងតំបន់ រួមមានទាំងកម្ពុជាដែរនោះ បន្តធ្លាក់ចុះជាបន្តបន្ទាប់ ខណៈពេលដែលរោងម៉ាស៊ីនកិនស្រូវក្នុងស្រុកភាគច្រើនក៏កំពុងមានការកកស្ទះស្តុកអង្ករចាស់ ចុងអង្ករ និងកន្ទក់ជាច្រើនផងដែរ។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ជាវិធានការបន្ទាន់ដើម្បី ជួយកាត់បន្ថយសម្ពាធលើថ្លៃស្រូវនៅតាមវាលស្រែ ក្រសួងកសិកម្មបានសហការជាមួយនឹងក្រសួងសេដ្ឋកិច្ចនិងហិរញ្ញវត្ថុ ក្រសួងពាណិជ្ជកម្ម ធនាគារARDB អាជ្ញាធរថ្នាក់ក្រោមជាតិ និងសហព័ន្ធស្រូវអង្ករកម្ពុជា តាមរយៈការផ្ដល់ប្រាក់កម្ចីពិសេសឱ្យរោងម៉ាស៊ីនដៃគូជួយទិញស្រូវសើមដល់វាល ព្រមទាំងបានដាក់ពង្រាយមន្ត្រីទាំងថ្នាក់ជាតិនិងថ្នាក់ក្រោមជាតិឱ្យជួយសម្របសម្រួលរកម្ចាស់រោងម៉ាស៊ីនទិញស្រូវ និងរករថយន្តដឹកឱ្យទាន់ពេលវេលា។

គោលដៅចម្បងនៃការអន្តរាគមន៍ទាំងនេះ គឺដើម្បីជួយស្តារថ្លៃស្រូវឱ្យបានកើនឡើងវិញមួយកម្រិត និងបញ្ចៀសការកកស្ទះការប្រមូលផលរបស់ប្រជាកសិករនៅតាមទីវាល។

ជាដំណោះស្រាយនៅរដូវកាលក្រោយៗ ក្រសួងកំពុងជំរុញលើកទឹកចិត្តឱ្យប្រជាកសិករងាកមកចូលរួមជាមួយសហគមន៍កសិកម្មទំនើប ដើម្បីរាជរដ្ឋាភិបាលអាចមានលទ្ធភាពអាចជួយទ្រទ្រង់ជាដើមទុនស្តារសមត្ថភាពផលិតកម្មឡើងវិញ តាមរយៈការផ្តល់កម្ចីការប្រាក់ទាប ការជួយកាត់បន្ថយថ្លៃដើម និងការងាកមកចាប់យកការធ្វើកសិកម្មតាមកិច្ចសន្យា ដែលជាមធ្យោបាយដ៏មានប្រសិទ្ធភាពក្នុងការការពារកសិករពីបញ្ហាវិបត្តិថ្លៃដូចពេលបច្ចុប្បន្ន។

គួរបញ្ជាក់ថា កសិករដែលបានចូលរួមក្នុងសហគមន៍កសិកម្មទំនើបក្នុងរដូវកាលនេះ មិនបានជួបបញ្ហាធ្លាក់ថ្លៃដូចអ្នកនៅក្រៅសហគមន៍ឡើយ ដោយហេតុថារោងម៉ាស៊ីនដៃគូនៅតែបន្តទទួលទិញក្នុងថ្លៃខ្ពស់ដែលបានព្រមព្រៀងក្នុងកិច្ចសន្យាពីដើមរដូវ៕

The post តម្លៃស្រូវធ្លាក់ចុះ ដោយសារប្រទេសនាំចូលអង្ករផ្អាកការបញ្ជាទិញ appeared first on Kampuchea Thmey Daily.

កសិករក្នុងស្រុកមោងឬស្សី ខេត្តបាត់ដំបង ត្អូញត្អែររឿងស្រូវធ្លាក់ថ្លៃពេលប្រមូលផល

Sokhom Khon — Mon, 18 Aug 2025 02:56:55 +0000

នៅឆ្នាំនេះ កសិករដែលប្រកបមុខរបរធ្វើស្រែកំពុងត្អូញត្អែរយ៉ាងខ្លាំងស្របពេលដែលពួកគាត់កំពុងប្រមូលផលស្រូវដើម្បីលក់ទៅលើទីផ្សារបែរជាបានតម្លៃថោកជាងឆ្នាំមុនឆ្ងាយ ទោះបីស្រូវរបស់ពួកគាត់ជាប្រភេទស្រូវដែលត្រូវប៉ាន់យ៉ាងណាក៏ដោយ។

អ្នកស្រី សម រ៉ាឌី ជាប្រជាកសិករមួយរូបរស់នៅភូមិកូនខ្លុង ឃុំព្រៃតូច ស្រុកមោងឬស្សី ខេត្តបាត់ដំបង បានរៀបរាប់ថា ស្រូវឆ្នាំនេះ គឺបានតម្លៃថោកខ្លាំងជាងឆ្នាំមុន ទោះបីជាអ្នកស្រី និងអ្នកភូមិទាំងអស់នាំគ្នាដាំពូជស្រូវស្រង៉ែ ដែលជាពូជត្រូវប៉ាន់ និងពេញនិយមរបស់ឈ្មួញក៏ដោយក៏តម្លៃនៅតែទាបដដែល។

អ្នកស្រីបានបន្តថា កាលពីឆ្នាំមុនតម្លៃស្រូវក្នុងមួយតោន គឺជាងមួយលានរៀល ឬយ៉ាងហោចណាស់ក៏បានជាង ៩០ម៉ឺនរៀលដែរ នេះសម្រាប់ស្រូវស្រង៉ែដែលពួកគាត់តែងនិយមចូលចិត្តដាំព្រោះជាពូជដែលមានតម្លៃខ្ពស់ជាងគេ។ ដោយឡែកសម្រាប់ឆ្នាំនេះ នៅពេលដែលអ្នកស្រីរួមជាមួយកសិករដទៃទៀតកំពុងប្រមូលផលបែរជាឈ្មួញឲ្យតម្លៃត្រឹមតែ ៧២ មុឺនរៀល ឬក៏អាចធ្លាក់មកនៅ ៦៨ ម៉ឺនរៀលប៉ុណ្ណោះ។ កាលពីស្រូវប្រមូលផលដើមដៃ គឺបានតម្លៃដល់ ៨២ម៉ឺនរៀលក្នុងមួយតោន ដូច្នេះបើប្រៀបធៀបនឹងឆ្នាំកន្លងទៅ គឺខុសគ្នាឆ្ងាយដែលសឹងតែមិនអាចទប់ទល់បានទៅលើការចំណាយផ្សេងៗ ដោយគ្រាន់តែបច្ចុប្បន្នស្រូវដែលឈ្មួញប្រមូលទិញ គឺមិនចាំបាច់ហាលឲ្យស្ងួតនោះឡើយ គឺគ្រាន់តែច្រូតចេញពីស្រែគេទិញភ្លាមតែម្ដង។

អ្នកស្រីបានបន្ថែមថា ការប្រមូលផលនៅពេលនេះ គឺជាលើកចុងក្រោយហើយ ម្យ៉ាងវិញទៀតបើកុំតែបានផលស្រូវច្រើន ម៉្លេះសមមិនអាចទប់ទល់បានឡើយ ព្រោះឆ្នាំនេះស្រូវបានហុចទិន្នផលខ្ពស់គឺក្នុងមួយហិកតាចាប់ពី ៦,៥០ តោន ទៅជាង ៨ តោន ដូច្នេះទិន្នផលនេះហើយដែលអាចទប់ទល់បានយ៉ាងល្អទៅលើការចំណាយផ្សេងៗក្នុងពេលកំពុងដាំដុះ។

ជាចុងក្រោយអ្នកស្រីក៏សូមសំណូមពរដល់ឈ្មួញទាំងឡាយមេត្តាកុំទម្លាក់តម្លៃខ្លាំងពេក ព្រោះប្រជាកសិករសង្ឃឹមទៅលើការដាំស្រូវតែប៉ុណ្ណោះដើម្បីយកមកទប់ទល់លើជីវភាពប្រចាំថ្ងៃ ឯដើមទុនក៏ត្រូវខ្ចីបុលគេដើម្បីយកមកផលិតដែរ ដូច្នេះហើយធ្វើយ៉ាងណាជួយដំឡើងតម្លៃស្រូវឲ្យសមរម្យផង ព្រោះប្រភេទស្រូវក៏មិនអន់ដែរ ៕

អត្ថបទ៖ សោ និយមរ័ត្ន

The post កសិករក្នុងស្រុកមោងឬស្សី ខេត្តបាត់ដំបង ត្អូញត្អែររឿងស្រូវធ្លាក់ថ្លៃពេលប្រមូលផល appeared first on Kampuchea Thmey Daily.