តវ៉ា Archives - Kampuchea Thmey Daily

មន្ត្រីជំនាញក្រសួងការងារ កំពុងស្តាប់សំណូមពរកម្មករ-និយោជិត ក្រុមហ៊ុនភីវី ដើម្បីរកដំណោះស្រាយសមស្របបញ្ចប់ករណីតវ៉ា

អ៊ិន ពិសី — Fri, 17 Oct 2025 04:09:02 +0000

នៅពេលនេះ មន្ត្រីជំនាញពីក្រសួង និងមន្ត្រី នៃមន្ទីរការងារ និងបណ្ដុះបណ្ដាលវិជ្ជាជីវៈខេត្តតាកែវ ដឹកនាំដោយលោក ទុយ ស៊ីផាន់ រដ្ឋលេខាធិការ នៃក្រសួងការងារ និងបណ្ដុះបណ្ដាលវិជ្ជាជីវៈ កំពុងស្តាប់សំណូមពររបស់កម្មករ-និយោជិត នៃក្រុមហ៊ុនភីវី អ៊ិនដាសស្ទ្រី (PEEVI INDUSTRY) ដែលមានទីតាំងក្នុងស្រុកបាទី ខេត្តតាកែវ ដើម្បីឈានទៅរកដំណោះស្រាយសមស្របនាពេលដ៏ខ្លីខាងមុខនេះ ដោយផ្អែកលើច្បាប់។ នេះគឺជាការបញ្ជាក់របស់លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី ១៧ តុលា នេះ។

លោកបានលើកឡើងថា សំណូមពររបស់កម្មករ-និយោជិត និងកង្វល់របស់និយោជក គឺជាការគិតគូរជាអាទិភាពរបស់ក្រសួងការងារដែលជាសេនាធិការជូនរាជរដ្ឋាភិបាលក្នុងការធានា និងរក្សាបាននូវសុខដុមនីយកម្មក្នុងសហគ្រាសរវាងនិយោជិត និងនិយោជក ដែលជាការចង់បានរបស់រាជរដ្ឋាភិបាល។

ជាមួយគ្នានេះ អ្នកនាំពាក្យដដែល រូបនេះ ក៏បានអំពាវនាវឱ្យកម្មករ-និយោជិត និងនិយោជក បន្តជឿជាក់លើការដោះស្រាយ និងសម្របសម្រួលរបស់ក្រសួងការងារក្នុងនាមជាអាណាព្យាបាល៕

The post មន្ត្រីជំនាញក្រសួងការងារ កំពុងស្តាប់សំណូមពរកម្មករ-និយោជិត ក្រុមហ៊ុនភីវី ដើម្បីរកដំណោះស្រាយសមស្របបញ្ចប់ករណីតវ៉ា appeared first on Kampuchea Thmey Daily.

កម្មករ-កម្មការិនីរោងចក្រប្រមាណ ២៥០ នាក់ តវ៉ាបិទផ្លូវ ២១៧ ខណ្ឌដង្កោ ដោយសំណូមពរ ៥ ចំណុច

អ៊ិន ពិសី — Tue, 20 May 2025 04:45:31 +0000

នៅវេលាម៉ោង ៧ និង ១៥ នាទីព្រឹក ថ្ងៃទី ២០ ខែឧសភា ឆ្នាំ ២០២៥ នេះ កម្មករ-កម្មការិនីរោងចក្រគល័រស្តារ (កាត់ដេរសម្ភារៈផ្ទះបាយ និងសម្ភារៈការិយាល័យ) បានធ្វើការតវ៉ានៅខាងមុខរោងចក្រ ស្ថិតនៅផ្លូវ ២១៧ ភូមិព្រែកជ្រៃ សង្កាត់ស្ពានថ្ម ខណ្ឌដង្កោ ដោយសំណូមពរទាមទារចំនួន ៥ ចំណុច។

ហេតុការណ៍តវ៉ានៅខាងមុខរោងចក្រនេះ ដោយសារតែថៅកែរោងចក្រគល័រស្តារ បានផ្លាស់ប្ដូរពីទីតាំងចាស់ទៅទីតាំងថ្មីនៅខេត្តតាកែវវិញ និងមិនទាន់បានបើកប្រាក់ខែចុងក្រោយ ធ្វើឲ្យកម្មករ-កម្មការិនីប្រមាណ ២៥០ នាក់ នាំគ្នាបិទផ្លូវតវ៉ាទាមទារឲ្យមានដំណោះស្រាយជូនពួកគាត់។

ក្នុងការបិទផ្លូវតវ៉ាខាងលើនេះដែរ ក្រុមកម្មករ-កម្មការិនី បានសំណូមពរទាមទារចំនួន ៥ ចំណុច រួមមាន ៖ ទី១/សូមឲ្យរោងចក្រគិតប្រាក់ខែចុងក្រោយ។ ទី២/សូមឲ្យរោងចក្រគិតប្រាក់បំណាច់ឆ្នាំនៅសល់។ ទី៣/សូមឲ្យរោងចក្រគិតប្រាក់អតីតភាពដែលមាន។ ទី៤/សូមរោងចក្រគិតប្រាក់ការជូនដំណឹង(រោងចក្របានជូនដំណឹងហើយ) និងទី៥/សូមឲ្យរោងចក្រគិតប្រាក់សងជំងឺចិត្ត(កិច្ចសន្យាការងារ។

ជាមួយគ្នានេះ ដោយមានការសម្របសម្រួលពីក្រសួងការងារ បានឯកភាពគ្នាបានចំនួន ៤ ចំណុច នៅសល់តែ ១ ចំណុចចុងក្រោយ ខាងរោងចក្រ និងខាងតំណាងកម្មករ-កម្មការិនី សូមលើកយកទៅពិភាក្សាបន្តនៅពេលខាងមុខ។

បើតាម លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឲ្យដឹងថា គិតត្រឹមម៉ោង ៩ និង ៣០ នាទី ថ្ងៃដដែល កម្មករ នៃរោងចក្រ គល័រស្តារ ប្រមាណ ១០០ នាក់ ក្នុងចំណោម ៥០០ នាក់ បានបើកផ្លូវវិញហើយ។ ក្រសួង កំពុងបន្តដោះស្រាយយ៉ាងយកចិត្តទុកដាក់ និងធានាអត្ថប្រយោជន៍ជូនកម្មករស្របតាមច្បាប់កំណត់។

គួរជម្រាបថា ក្រសួងការងារ និងបណ្ដុះបណ្ដាលវិជ្ជាជីវៈ បានចុះដោះស្រាយម្តងរួចហើយ លើបញ្ហាខាងលើនេះ កាលពីថ្ងៃទី ១៩ ខែឧសភា ឆ្នាំ ២០២៥ ម្សិលមិញ។ ចំពោះបញ្ហានេះដែរ ដោយសារតែ កម្មករ-កម្មការិនី បារម្ភ ព្រោះតែរោងចក្រគល័រស្តារ គ្រោងនឹងផ្លាស់ប្ដូរទីតាំងរបស់ខ្លួន ពីទីតាំងបច្ចុប្បន្ន ទៅទីតាំងនៅខេត្តតាកែវវិញ។

ករណីនេះ ក្រសួង ក៏បានចុះទៅដោះស្រាយ និងឯកភាពគ្នាចំនួន ២ ចំណុចធំៗ គឺ ប្រសិនបើ កម្មករ-កម្មការិនី ដែលមកពីខេត្តតាកែវ ចង់ទៅធ្វើការនៅទីតាំងថ្មី ក្រុមហ៊ុន ទទួលយកដដែល។ បន្ថែមនេះ បើមានកម្មករ-កម្មការិនី មិនអាចទៅធ្វើការនៅទីតាំងថ្មីបាន ក្រុមហ៊ុន នឹងទូទាត់តាមច្បាប់៕

អត្ថបទ ៖ សុខា

The post កម្មករ-កម្មការិនីរោងចក្រប្រមាណ ២៥០ នាក់ តវ៉ាបិទផ្លូវ ២១៧ ខណ្ឌដង្កោ ដោយសំណូមពរ ៥ ចំណុច appeared first on Kampuchea Thmey Daily.

បុគ្គលិកសណ្ឋាគារអាមេរិកប្រមាណ១ម៉ឺននាក់ធ្វើកូដកម្មទាមទារកែលក្ខខណ្ឌការងារ

Bun sopheap — Mon, 02 Sep 2024 08:16:28 +0000

បុគ្គលិកសណ្ឋាគារប្រហែល ១០០០០ នាក់នៅទូទាំងសហរដ្ឋអាមេរិកបានធ្វើកូដកម្មនៅថ្ងៃឈប់សម្រាកដ៏សំខាន់មួយនៅចុងសប្តាហ៍ ដើម្បីទាមទារប្រាក់ឈ្នួល និងលក្ខខណ្ឌការងារ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០២ខែកញ្ញានេះ។

(រូបភាព៖ AP)

បុគ្គលិកសណ្ឋាគារកាលពីថ្ងៃអាទិត្យបានដើរចេញពីការងាររបស់ពួកគេនៅក្នុងទីក្រុងចំនួនប្រាំបី រួមមាន ទីក្រុង Boston, Honolulu, San Francisco, San Diego និង Seattle បន្ទាប់ពីសហជីព UNITE HERE និងខ្សែសង្វាក់សណ្ឋាគារ Hilton, Hyatt និង Marriott បរាជ័យក្នុងការចរចាកិច្ចសន្យាជាមួយបុគ្គលិកទាំងនោះ។

លោក Gwen Mills ប្រធានសហជីព UNITE HERE បាននិយាយថា កូដកម្មដែលកើតមាននៅមុនថ្ងៃទិវាពលកម្មដោយសារភាគីនិយោជកក្នុងឧស្សាហកម្មសណ្ឋាគារមិនបានផ្លាស់ប្តូរវិធានការកាត់បន្ថយការចំណាយដែលបានអនុវត្តក្នុងអំឡុងពេលជំងឺរាតត្បាតកូវីដ១៩ បើទោះបីជាទទួលបានប្រាក់ចំណេញនិងងើបឡើងវិញបន្ទាប់ពីពេលនោះមក។

(រូបភាព៖ AP)

សណ្ឋាគារចំនួនច្រើននៅតែមិនទាន់បានស្ដារឡើងវិញនូវសេវាកម្មស្តង់ដារបុគ្គលិកសមទទួលបាន ខណៈបុគ្គលិកមិនទទួលបានប្រាក់ខែគ្រប់គ្រាន់ដើម្បីផ្គត់ផ្គង់គ្រួសាររបស់ពួកគេទេ ដោយបុគ្គលិកជាច្រើនមិនមានលទ្ធភាពរស់នៅក្នុងទីក្រុងដែលពួកគេធ្វើការទេ ហើយបន្ទុកការងារដ៏ច្រើនកំពុងធ្វើឱ្យរាងកាយទ្រុឌទ្រោម។ បុគ្គលិកមួយចំនួនថាសណ្ឋាគាររកប្រាក់ចំណេញដោយកាត់បន្ថយការផ្តល់ជូនភ្ញៀវ និងបោះបង់ការយកចិត្តទុកដាក់របស់ពួកគេចំពោះកម្មករ។

ទោះយ៉ាងណា សហជីព បានឲ្យដឹងថា កូដកម្មក៏ត្រូវបានអនុញ្ញាតឱ្យរៀបចំឡើងនៅក្នុងទីក្រុង Baltimore, New Haven, Oakland និង Providence ហើយអាចចាប់ផ្តើមនៅក្នុងទីក្រុងទាំងនោះនៅពេលណាក៏បាន ខណៈថ្ងៃចុងសប្តាហ៍នៃទិវាពលកម្មគឺជារយៈពេលមួយដែលមមាញឹកបំផុតសម្រាប់ការធ្វើដំណើរនៅក្នុងសហរដ្ឋអាមេរិក ដោយអង្គការ Motoring AAA បាននិយាយកាលពីខែមុនថា ការកក់ទុកសម្រាប់ថ្ងៃចុងសប្តាហ៍របស់ភ្ញៀវទេសចរណ៍បានកើនឡើង៩ភាគរយបើធៀបនឹងឆ្នាំមុន៕

(រូបភាព៖ AP)

អត្ថបទ៖ ប៊ុន សុភាព

The post បុគ្គលិកសណ្ឋាគារអាមេរិកប្រមាណ១ម៉ឺននាក់ធ្វើកូដកម្មទាមទារកែលក្ខខណ្ឌការងារ appeared first on Kampuchea Thmey Daily.

ប្រជាពលរដ្ឋដែលចាញ់បោកលោកហ៊ី គឹមហុង អគ្គនាយកក្រុមហ៊ុន ពិភពដីមាសបានជួបប្រមូលផ្តុំគ្នាតវ៉ាជាថ្មី

Kang Tola — Wed, 07 Aug 2024 12:57:18 +0000

ភ្នំពេញ ៖ ប្រជាពលរដ្ឋរាប់រយនាក់ដែលចាញ់បោកលោកហ៊ី គឹមហុង អគ្គនាយកក្រុមហ៊ុនពិភពដីមាសបាននាំគ្នាជួបប្រមូលផ្តុំជាថ្មីដើម្បីទាមទារប្រាក់ត្រឡប់មកវិញបន្ទាប់ពីទទួលដំណឹងថាក្រុមហ៊ុននិងកាត់ដីឲ្យពួកគាត់វិញ។

យោងតាមការចេញសេចក្ដីជូនដំណឹងរបស់ក្រុមហ៊ុនកាលពីថ្ងៃទី២៩ ខែកក្កដា ឆ្នាំ២០២៤។ ការជួបប្រមូលផ្ដុំនេះ ដោយប្រជាពលរដ្ឋដែលរងគ្រោះបានលើកគ្នាទៅស្នាក់ការក្រុមហ៊ុនដែលស្ថិតនៅ ភូមិ ត្រពាំងថ្ងាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ កាលពីវេលាម៉ោងប្រមាណ៨ព្រឹកថ្ងៃទី០៧ ខែសីហា ឆ្នាំ២០២៤។

ប្រជាពលរដ្ឋដែលរងគ្រោះប្រមាណ ៤០០ទៅ ទៅ៥០០នាក់ បានមកពីគ្រប់ទិសទីជួបប្រមូលផ្តុំគ្នានៅមុខស្នាក់ការក្រុមហ៊ុនបន្ទាប់ពីទទួលដំណឹងថា ក្រុមហ៊ុនសន្យា និងកាត់ដីឱ្យពួកគាត់តែប្រជាពលរដ្ឋមិនព្រម។

នៅក្នុងការជួបប្រមូលផ្ដុំនេះដែរ តំណាងក្រុមហ៊ុន ក៏បានចេញមុខមកជួបដោះស្រាយជាមួយប្រជាពលរដ្ឋដោយសន្យាថា ទី១ ក្រុមហ៊ុននឹងលក់ដីរបស់ខ្លួន២៣ហិតតា សងប្រជាពលរដ្ឋវិញ ,ទី២.ក្រុមហ៊ុននឹងកាត់ដីជួនប្រជាពលរដ្ឋតែឱ្យប្រជាពលរដ្ឋហើយទុកពេលឱ្យក្រុមហ៊ុនរយៈ៣ឆ្នាំក្រុមហ៊ុនទិញវិញក្នុងតម្លៃដើមក្នុង១ឡូតិ៍តម្លៃ១៥០០០ដុល្លារ។

ទោះបីជាយ៉ាងណា ប្រជាពលរដ្ឋមិនទទួលយកនូវការសន្យារបស់ក្រុមហ៊ុនទៀតឡើយដោយចាត់ទុកថាការសន្យានេះ គឺជាការបោកប្រាស់ព្រោះរយៈពេលកន្លងមកក្រុមហ៊ុនតែងតែសន្យាខ្យល់ថានឹងដោះស្រាយជូនប្រជាពលរដ្ឋរហូតមក។

តាមប្រជាពលរដ្ឋឱ្យដឹងទៀតថា ពីកំឡុងឆ្នាំ២០២១ ឆ្នាំ២០២២ពួកគាត់រាប់ពាន់គ្រួសារបាននាំគ្នាមកទិញដីរបស់ក្រុមហ៊ុនពិភពដីមាសនេះ នៅស្រុកឧត្តុង្គ ខេត្តកំពង់ស្ពឺក្នុងមួយឡូតិ៍១៥០០០ដុល្លារហើយនៅក្នុងការទិញដីជិតទៀតសោត គឺបានការប្រាក់បីភាគរយជាហេតុធ្វើឱ្យពួកគាត់បានយកប្លង់ដីនិងផ្ទះទៅដាក់ធានាគារ ដើម្បីយកលុយមកទិញដីពីក្រុមហ៊ុនបានការប្រាក់និងខ្លះទៀតយកលុយទៅដាក់ឱ្យក្រុមហ៊ុនដើម្បីយកការក៏មានដែរ តែទីបំផុតបានការតែប៉ុន្មានខែបាញ់បោកអស់ទាំងការនិងដើម។ បន្ទាប់ពីមានភាពចម្រុងចម្រាស់គ្នាខាងក្រុមហ៊ុននិងប្រជាពលរដ្ឋសន្យាថានឹងជួបដោះស្រាយគ្នាបន្តទៀតនៅថ្ងៃទី១៥ ខែសីហា ឆ្នាំ២០២៤នេះ ដោយមានអាជ្ញាធរដឹងឮ។

គួរបញ្ជាក់ថា លោកហ៊ី គឹមហុង អគ្គនាយកក្រុមហ៊ុន ពិភពដីមាស និងកងអង្គរក្ស១៣នាក់ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ ឃាត់ខ្លួននៅវេលារសៀលថ្ងៃទី០៧ខែសីហា ឆ្នាំ២០២៣ ពាក់ព័ន្ធ បានប្រើហិង្សាមកលើសមត្ថកិច្ច។

ការឃាត់ខ្លួនបន្ទាប់ពីប្រជាពលរដ្ឋ បានផ្ទុះការតវ៉ា ដុតកង់រថយន្ត ដើម្បីទាមទារប្រាក់ ដែលពួកគាត់ទិញ ដី នោះ ត្រឡប់មកវិញ ខណៈពេលដែលក្រុមហ៊ុន ខានបង់ការប្រាក់តាមកិច្ចសន្យារយៈពេល៥ខែ( ទិញ ដីមានការប្រាក់)មកហើយ។ កាលនោះ បន្ទាប់ជួប ប្រមូលផ្តុំតវ៉ានៅវេលារសៀល ប្រជាពលរដ្ឋ ក៏បាននាំគ្នា ដុតកង់រថយន្តដើម្បីទទូចឱ្យ លោកចេញមុខ មកដោះស្រាយ។

ខណៈនោះ សមត្ថកិច្ច ខណ្ឌព្រែកព្នៅ និងនគរបាលព្រហ្មទណ្ឌកម្រិតស្រាលនៃស្នងការនគរបាលរាជធានីភ្នំពេញ ក៏បានចុះទៅអន្តរាគមន៍ និងសាកសួរ ម្ចាស់ក្រុមហ៊ុន ហើយត្រូវបានអង្គរក្សរារាំង ប្រើហិង្សាវាយមកលើសមត្ថកិច្ចបណ្តាលឱ្យរងរបួស ហើយត្រូវបានកម្លាំងសមត្ថកិច្ច ក៏បានផ្ទុះអាវុធជាច្រើនគ្រាប់គំរាម និងឃាត់កងអង្គរក្សាបានជាបន្តបន្ទាប់ចំនួន១៣នាក់។

បន្ទាប់ពីឃាត់ខ្លួនទៅសាលាដំបូង រាជធានីភ្នំពេញជាប់គុករយៈពេលប្រមាណ៣ខែនៅដើមខែវិច្ឆិកា ឆ្នាំ២០២៣ បានដោះលែវិញហើយប្រជាពលរដ្ឋ បន្តនាំគ្នាតវ៉ារហូតមកដើម្បីទាមទារប្រាក់ត្រឡប់មកវិញក្រុមហ៊ុនចេះតែសន្យាខ្យល់រហូតមក៕

អត្ថបទ ៖ សុភា

The post ប្រជាពលរដ្ឋដែលចាញ់បោកលោកហ៊ី គឹមហុង អគ្គនាយកក្រុមហ៊ុន ពិភពដីមាសបានជួបប្រមូលផ្តុំគ្នាតវ៉ាជាថ្មី appeared first on Kampuchea Thmey Daily.

ក្រសួងការងារ ៖ កម្មករក្រុមហ៊ុនអ៊ិនឌីភេនដិនស៏ បានចូលធ្វើការហើយនៅព្រឹកនេះ

Kang Tola — Tue, 13 Feb 2024 13:41:38 +0000

ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាកម្មករក្រុមហ៊ុនអ៊ិនឌីភេនដិនស៏ប្រមាណជិត១០០នាក់ ដែលតវ៉ារឿងបើកប្រាក់ឈ្នួលបានចូលធ្វើការវិញហើយនៅថ្ងៃអង្គារ ទី១៣ ខែកុម្ភៈ ឆ្នាំ២០២៤នេះ។ ការចូលធ្វើការនេះក្រោយមានកិច្ចសម្របសម្រួលភ្លាមៗពីមន្ត្រីអធិការកិច្ចការងារនៃក្រសួងការងារ និងបណ្តុះបណ្តាលវិជ្ជាជីវៈ។

នៅវេលាម៉ោង៥ ថ្ងៃទី១២ខែកុម្ភៈ ក្រុមហ៊ុនបានដោះស្រាយផ្ទេរប្រាក់ចូលគណនីវីង របស់កម្មករនិយោជិតចំនួន៩០នាក់ ដែលក្រុមហ៊ុនបានជំពាក់តាមកាលកំណាត់រួចរាល់ដែលបានធ្វើឱ្យនៅព្រឹកថ្ងៃទី១៣ ខែកុម្ភៈ ឆ្នាំ២០២៤ កម្មករនិយោជិតទាំងអស់បានត្រឡប់ចូលធ្វើការងារជាធម្មតាវិញ។ នេះបើតាមរបាយការណ៍របស់មន្ត្រីអធិការកិច្ចការងារនៃក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី១៣ ខែកុម្ភៈនេះ។

សូមបញ្ជាក់ថា កាលពីថ្ងៃទី១២ ខែកុម្ភៈម្សិលមិញកម្មករនៃក្រុមហ៊ុនអ៊ិនឌីភេនដិនស៏ដែលមានទីតាំងនៅភូមិ ព្រៃព្រីងខាងត្បូង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ បានតវ៉ា ក្រុមហ៊ុនជំពាក់ប្រាក់ឈ្នួលកម្មករនិយោជិតចំនួន៩០នាក់ និងមានការដឹកម៉ាស៊ីនអូតូពន្លាលក្រណាត់មួយគ្រឿងចេញពីរោងចក្រ ដែលជាហេតុធ្វើឱ្យកម្មករជ្រួលច្របល់និងឈរតវ៉ានៅខាងក្រៅរោងចក្រ៕

The post ក្រសួងការងារ ៖ កម្មករក្រុមហ៊ុនអ៊ិនឌីភេនដិនស៏ បានចូលធ្វើការហើយនៅព្រឹកនេះ appeared first on Kampuchea Thmey Daily.

អាជ្ញាធរ សន្យា នឹងនាំសំណូមពរជូនរាជរដ្ឋាភិបាលពិនិត្យ ក្រោយពលរដ្ឋតំបន់រុនតាឯក ជាង ២ ពាន់នាក់ តវ៉ាករណីបាត់សាច់ប្រាក់ក្នុងប័ណ្ណក្រីក្រ

អ៊ិន ពិសី — Sun, 28 Jan 2024 04:48:40 +0000

ប្រជាពលរដ្ឋប្រមាណជាង ២ ០០០ នាក់ បានមកប្រមូលផ្ដុំគ្នានៅបរិវេណផ្សាររុនតាឯក ដើម្បីតវ៉ាករណីបាត់បង់សាច់ប្រាក់ក្នុងប័ណ្ណសមធម៌ ឬ ប័ណ្ណក្រីក្រ អស់មួយចំនួនធំ ដោយមិនដឹងមូលហេតុ។ ក្នុងនោះ ចំពោះករណីនេះ អាជ្ញាធរខេត្តសៀមរាប បានសន្យាថា នឹងនាំសំណូមពរនេះ ជូនទៅប្រមុខរាជរដ្ឋាភិបាលពិនិត្យ។

កាលពីថ្ងៃទី ២៧ ខែមករា ឆ្នាំ ២០២៤ ម្សិលមិញ មានករណីផ្ទុះការតវ៉ាមួយស្ថិតនៅចំណុចផ្សាររុនតាឯក ភូមិធម្មជាតិរុនតាឯក ដោយប្រជាពលរដ្ឋប្រមាណជាង ២ ០០០ នាក់ ដែលស្ម័គ្រចិត្តចាកចេញពីលំនៅឋានធ្លាប់តាំងនៅក្នុងរមណីយដ្ឋានអង្គរ ទៅរស់នៅក្នុងក្រុងថ្មីឈ្មោះ«ក្រុងរុនតាឯក តេជោសែន» បានលើកគ្នាតវ៉ារឿងប័ណ្ណសមធម៌ (ប័ណ្ណក្រីក្រ) បន្ទាប់ពីទទួលអនុក្រឹត្យថ្មី លេខ ៣៧១ អនក្រ.កប ចុះហត្ថលេខាដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា កាលថ្ងៃទី ២៩ ខែធ្នូ ឆ្នាំ ២០២៣ ស្ដីពីការកែសម្រួលអនុក្រឹត្យលេខ ៨៨ អនក្រ.បក ចុះថ្ងៃទី ១២ ខែមិថុនា ឆ្នាំ ២០២០ ស្ដីពីការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ កំឡុងពេលប្រយុទ្ធជំងឺកូវីដ-១៩ ពីការផ្សព្វផ្សាយរបស់លោកមេឃុំ។

ដោយឡែកប្រជាពលរដ្ឋមកពីឃុំពាក់ស្មែង ស្រុកអង្គរធំ ក៏បានលើកឡើងដែរថា «សម្រាប់ខ្ញុំយល់ហើយ នៅឡើយតែពលរដ្ឋដែលខ្វះការយល់ដឹង ទើបពួកគាត់នៅមានកម្រិតទាប ធ្វើឲ្យវាទាមទារឲ្យមន្ត្រីជំនាញពន្យល់គាត់បន្ថែម។ បើចេញតែសេចក្ដីប្រកាសឲ្យពួកគាត់អានម៉េចនឹងយល់បាន។ មានន័យថា ពលរដ្ឋដែលមិនមានចែងក្នុងលេខរៀងចាប់ពីលេខ ២ ដល់លេខ ៥ បានតែតម្លៃក្បាលប័ណ្ណ ១២ ម៉ឺនរៀល ហ្នឹងឯង…»។

យ៉ាងណាមិញ ប្រជាពលរដ្ឋដែលលើកគ្នាមកតវ៉ានោះ ក៏បានបញ្ជាក់ដែរថា មូលហេតុមកពីមានការប្រែប្រួលប្រាក់ឧបត្ថម្ភ កំឡុង ៣ ខែចុងក្រោយ គឺ ចាប់ពីខែមករា ដល់ ខែមីនា ឆ្នាំ ២០២៤ ក្រោយពីមានការផ្សព្វផ្សាយគោលការណ៍រាជរដ្ឋាភិបាល និងការចែកខិតប័ណ្ណរបស់មេឃុំ-ចៅសង្កាត់ មេភូមិ ដល់ប្រជាពលរដ្ឋតាមខ្នងផ្ទះរួចមក។ ទន្ទឹមនោះ ប្រជាពលរដ្ឋ យល់ឃើញថា ប្រាក់ពួកគាត់ទទួលបាន គឺជាការដោះដូរលំនៅឋានពីតំបន់អង្គរ ទៅ រុនតាឯក។ ក្នុងនោះ អត្ថប្រយោជន៍ដែលពួកគាត់ត្រូវទទួលបានពីការឧបត្ថម្ភពីរាជរដ្ឋាភិបាលរយៈពេល ១០ ឆ្នាំ ដោយមិនមែនគិតថា ទទួលពីកម្មវិធីកូវីដ-១៩ និងសុពលភាពប័ណ្ណសមធម៌នោះទេ។

ជាមួយគ្នានេះ ក្រុមប្រជាពលរដ្ឋខាងលើ ក៏បានសំណូមពរសុំឲ្យរដ្ឋាភិបាល នៅតែបន្តឧបត្ថម្ភជាបន្តទៀតទៅតាមប្រាក់ដែលពួកគាត់ទទួលបានដូចប្រចាំខែកន្លងមក នៅដដែល ដោយសារមានការលំបាកក្នុងការប្រកបអាជីវកម្មនានានៅទីក្រុងថ្មីមួយនេះ និងជាពិសេសនៅជាប់បំណុលធនាគារ។

ពាក់ព័ន្ធករណីនេះដែរ អាជ្ញាធរខេត្តសៀមរាប ក៏បានជម្រាបជូនសាធារណជនដែរថា កាលពីថ្ងៃទី ២៧ ខែមករា ឆ្នាំ ២០២៤ ក្រុមការងារចម្រុះដោយមានតំណាងក្រសួងសង្គមកិច្ច អតីតយុទ្ធជន និង យុវនីតិសម្បទា តំណាងរដ្ឋបាលខេត្ត និងអ្នកពាក់ព័ន្ធ បានជួបជាមួយប្រជាពលរដ្ឋដែលស្ម័គ្រចិត្តចាកចេញពីតំបន់រមណីយដ្ឋានអង្គរ ទៅតាំងទីលំនៅនៅភូមិធម្មជាតិរុនតាឯក ដើម្បីស្ដាប់សំណូមពររបស់ប្រជាពលរដ្ឋ ពាក់ព័ន្ធនឹងការឧបត្ថម្ភសាច់ប្រាក់។ ជាមួយគ្នានេះ ក្រុមការងារចម្រុះ ក៏បានធ្វើការផ្សព្វផ្សាយជូនប្រជាពលរដ្ឋអំពីគោលនយោបាយ និងការកែសម្រួលលើការឧបត្ថម្ភសាច់ប្រាក់ ដោយអនុវត្តតាមអនុក្រឹត្យលេខ ៨៨ អនក្រ.បក ចាស់ និងអនុក្រឹត្យលេខ ៣៧១ អនក្រ.បកថ្មី ចុះថ្ងៃទី២៩ ខែធ្នូ ឆ្នាំ ២០២៣។ បន្ទាប់ពីបានទទួលសំណូមពរខាងលើ ក្រុមការងារចម្រុះ ក៏ជូនដំណឹងទៅកាន់ប្រជាពលរដ្ឋថា រដ្ឋបាលខេត្ត នឹងធ្វើរបាយការណ៍ជូន រាជរដ្ឋាភិបាល ដើម្បីពិនិត្យ ហើយជូនដំណឹងមកកាន់ពលរដ្ឋវិញ ឲ្យឆាប់រហ័ស ក្រោយពេលទទួលបានដំណឹងពីរាជរដ្ឋាភិបាល៕

អត្ថបទ ៖ ជុន កុសល

The post អាជ្ញាធរ សន្យា នឹងនាំសំណូមពរជូនរាជរដ្ឋាភិបាលពិនិត្យ ក្រោយពលរដ្ឋតំបន់រុនតាឯក ជាង ២ ពាន់នាក់ តវ៉ាករណីបាត់សាច់ប្រាក់ក្នុងប័ណ្ណក្រីក្រ appeared first on Kampuchea Thmey Daily.

អ្នកឧកញ៉ា ហុង ពីវ បញ្ចេញលុយជាង ៥,៦លានដុល្លារ ទិញយកផ្ទះពីអតិថិជនវិញ

Sophal Tuon — Wed, 08 Nov 2023 05:40:56 +0000

ក្រុមហ៊ុនបុរីពិភពថ្មី របស់អ្នកឧកញ៉ា ហុង ពីវ បានចំណាយប្រាក់ទិញផ្ទះរបស់អតិថិជន ចូលវិញអស់ទឹកប្រាក់ចំនួនជាង ៥,៦ លានដុល្លារ ក្រោយពីសេចក្តីសម្រេចចរចារបស់ភាគីពាក់ព័ន្ធចូលជាធរមានបានរយៈពេល ៧ថ្ងៃ ដោយមានអតិថិជន ៤៥៨ នាក់ ហើយចំនួននេះ នឹងមានការកើនឡើងជាបន្តបន្ទាប់ទៀត។ នេះបើតាមសេចក្តីប្រកាសរបស់បុរីពិភពថ្មី។

អ្នកឧកញ៉ា ហុង ពីវ ថ្លែងតាមសេចក្តីប្រកាសនេះថា កន្លងមក បុរីពិភពថ្មី តែងតែបានចាត់តាំងតំណាងឲ្យទៅចូលរួម ប្រជុំដោះស្រាយបញ្ហាជាមួយអតិថិជនគ្រប់ពេលវេលា។ ប្រជុំនៅសាលាខណ្ឌចំនួន៥ដង នៅសាលារាជធានីភ្នំពេញចំនួន ៣ដង និងអ្នកឧកញ៉ា បានចូលរួមប្រជុំផ្ទាល់ជាមួយអគ្គនាយកនិយ័តករអាជីវកម្មអចលនវត្ថុ និងបញ្ចាំផងដែរ។

ក្រោយជាលទ្ធផលនៃកិច្ចប្រជុំ ក្រុមហ៊ុនបានសម្រេចចេញសេចក្តីប្រកាសជូន ដំណឹង ចុះថ្ងៃទី២៩ ខែតុលា ឆ្នាំ២០២៣ អំពីការទិញផ្ទះចូលវិញ ដោយមានលក្ខខណ្ឌ។ ទោះបីលក្ខខណ្ឌថ្មីមិនមានចែងក្នុងកិច្ចសន្យាទិញលក់ពីមុនទាំងស្រុងក៏ដោយ ក្រុមហ៊ុននៅតែបន្តអនុវត្តតាមសេចក្ដីប្រកាស ហើយអានុភាពនៃសេចក្តីប្រកាសនោះ មិនមានការអនុវត្តន៍ ដោយភាពប្រតិសកម្មឡើយ។

ប្រភពដដែល បានបញ្ជាក់ថា មានអតិថិជនជាច្រើនបានយល់ និងគាំទ្រនូវលក្ខខណ្ឌថ្មីនេះ ហើយបានស្ម័គ្រចិត្តមកទទួលយកលក្ខខណ្ឌនេះ សល់តែចំនួនតិចតូចប៉ុណ្ណោះ។ បើតាមអ្នក=ឧកញ៉ា ហុង ពីវ «ក្រោយពីសេចក្តីសម្រេចចូលជាធរមានបានរយៈពេល ៧ថ្ងៃ ក្រុមហ៊ុនបានចំណាយប្រាក់ទិញផ្ទះចូលវិញអស់ចំនួន USD5,648,376 ដោយមានអតិថិជន 458 នាក់ ហើយ ចំនួននេះ នឹងមានការកើនឡើងជាបន្តបន្ទាប់ទៀត»។

ក្រុមហ៊ុនបានប្តេជ្ញា ខិតខំឱ្យអស់លទ្ធភាពក្នុងការសម្របសម្រួលលក្ខខណ្ឌ ដើម្បីសម្រាលដល់ការលំបាករបស់អតិថិជន ក្នុងបរិបទវិបត្តិអចលនទ្រព្យនេះ។ ប៉ុន្តែបើក្រុមហ៊ុន បានអះអាងថា ធ្វើតាមការទាមទារ ការចង់បានរបស់អតិថិជនមួយចំនួនតូច ដែលដឹកនាំដោយឈ្មោះ ហេង តារា នោះក្រុមហ៊ុនបុរីពិភពថ្មី នឹងក្ស័យធនជាមិនខាន ព្រោះក្រុមហ៊ុនក៏មានជាប់បំណុល ដូចគ្នាដែរ ដូចពាក្យចាស់ពោលថា “ទូកធំក្តោងធំ” បើក្រុមហ៊ុនក្ស័យធន នោះពិតជាមានការប៉ះពាល់យ៉ាងធ្ងន់ធ្ងរ ដល់អតិថិជនទាំងអស់។

ជាមួយគ្នានេះ ម្ចាស់គម្រោងបុរីពិភពថ្មី អ្នកឧកញ៉ា ហុង ពីវ បានអំពាវនាវឲ្យអតិថិជនទទួលយក និងអនុវត្តនូវគោលការណ៍ចុងក្រោយ និងសូមមិនចូលរួមបន្តដោះស្រាយនូវអ្វីដែលជាការទាមទារ លើសពីលក្ខខណ្ឌ ដូចមានក្នុងសេចក្តីប្រកាសជូនដំណឹងចុះថ្ងៃទី២៩ ខែតុលា ឆ្នាំ២០២៣ និងផ្សព្វផ្សាយនៅថ្ងៃទី៣ ខែវិច្ឆិកា ឆ្នាំ២០២៣។

សូមរម្លឹកថា ក្រោយផ្ទុះការតវ៉ាពីសំណាក់អតិថិជនមួយចំនួនរបស់ខ្លួន ដែលអះអាងថា ក្រុមហ៊ុនបុរីពិភពថ្មី មិនអនុវត្តតាមកិច្ចសន្យាទិញ-លក់ផ្ទះ, ក្រុមហ៊ុន បុរីពិភពថ្មី បានចេញមុខបកស្រាយជំហរអនុវត្តន៍កិច្ចសន្យា ទិញ-លក់ផ្ទះរបស់ខ្លួន។ តាមរយៈសេចក្តីប្រកាស ចុះថ្ងៃទី២៩តុលា ក្រុមហ៊ុន សម្រេចកែប្រែលក្ខខណ្ឌចំនួន៣ ដែលក្រុមហ៊ុនអះអាងថាជាលក្ខខណ្ឌសម្រាលដល់អតិថិជន នៅក្នុងស្ថានភាពដែលសេដ្ឋកិច្ចកំពុងជួបវិបត្តិដូចបច្ចុប្បន្ន។

លក្ខខណ្ឌដែលក្រុមហ៊ុនប្រកាសកែប្រែនោះ រួមមាន៖ ទី១ សម្រាប់កិច្ចសន្យាទិញលក់ផ្ទះ មានលក្ខខណ្ឌទទួលទិញវិញ។ ចំពោះករណីនេះ ក្រុមហ៊ុនទទួលទិញវិញ៥០ភាគរយ នៃប្រាក់ដែលបានបង់ប្រចាំខែ(ប្រាក់ដើមបូកការប្រាក់) ចាប់ពីខែទី៧ឡើងទៅ បូកនឹងប្រាក់បានកក់និងប្រាក់បានសងដើម ទូទាត់កាត់កងជាក់ស្តែងជាមួយប្រាក់ដែលអតិថិជនជំពាក់ ឬខកខានបង់ប្រចាំខែ។
លក្ខខណ្ឌទី២ គឺសម្រាប់កិច្ចសន្យាទិញលក់ផ្ទះគ្មានលក្ខខណ្ឌទទួលទិញ។ ចំពោះករណីនេះ ក្រុមហ៊ុនទទួលទិញវិញតែប្រាក់ដើម បូកបន្ថែមនឹងប្រាក់បានកក់ និងប្រាក់បានសងដើម ទូទាត់ឬកាត់កងជាក់ស្តែងជាមួយប្រាក់ដែលអតិថិជនជំពាក់ ឬខកខានបង់ប្រចាំខែ។
លក្ខខណ្ឌទី៣ គឺសម្រាប់កិច្ចសន្យាទិញលក់ផ្ទះគ្មានលក្ខខណ្ឌទទួលទិញវិញ សម្រាប់អតិថិជនមានផ្ទះ២។ ចំពោះលក្ខខណ្ឌនេះ គឺក្រុមហ៊ុនអនុវត្តន៍តែលើកិច្ចសន្យា ទិញផ្ទះមុនថ្ងៃទី៣០ ខែតុលា ឆ្នាំ២០២២ប៉ុណ្ណោះ ដោយក្រុមហ៊ុនទទួលទិញផ្ទះវិញ ៥០ភាគរយ នៃប្រាក់ដែលបានបង់ប្រចាំខែ(ប្រាក់ដើមបូកការប្រាក់) ចាប់ពីខែទី៧ឡើងទៅ បូកបន្ថែមប្រាក់បានកក់ និងប្រាក់បានសងដើម ហើយទូទាត់ជាក់ស្តែងជាមួយប្រាក់ដែលអតិថិជនជំពាក់បង់ប្រចាំខែ ហើយយកទៅទូទាត់ជាមួយអតិថិចននៅបង់រំលស់បន្ត។ ចំពោះប្រាក់នៅសល់ក្រោយទូទាត់ ក្រុមហ៊ុន មិនប្រគល់ជូនវិញទេ៕

The post អ្នកឧកញ៉ា ហុង ពីវ បញ្ចេញលុយជាង ៥,៦លានដុល្លារ ទិញយកផ្ទះពីអតិថិជនវិញ appeared first on Kampuchea Thmey Daily.

អាជីវករទិញតូបផ្សារ TCC ចេញតវ៉ាឱ្យថៅកែពន្លឿនសាងសង់ និងអនុវត្តតាមកិច្ចសន្យា

Sophal Tuon — Fri, 20 Oct 2023 13:16:12 +0000

អ្នកទិញតូបផ្សារ TRIUMPH COMMERCIAL CENTER (TCC) វិនិយោគដោយក្រុមហ៊ុន យុនណាន សេងម៉ៅ អ៊ីនវេសមិន (Yun Nan Sheng Mao Investment Co, Ltd) ស្ថិតនៅភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាប់រយនាក់ បានចេញតវ៉ាជាបន្តបន្ទាប់ ក្រោយពីថៅកែក្រុមហ៊ុន ព្រងើយកន្តើយមិនព្រមចេញមុខដោះស្រាយជាមួយអតិថិជន និងរំលោភកិច្ចព្រមព្រៀង ដែលបានសន្យាជាមួយអ្នកទិញ។

លោក ហាក់ ចាន់ថា តំណាងអ្នកទិញតូបផ្សារ TCC បានលើកឡើងថា ចាប់តាំងពីកើតមានរឿងរ៉ាវនេះឡើង ពុំដែលឃើញថៅកែក្រុមហ៊ុន ចេញមុខមកដោះស្រាយជាមួយអតិថិជនម្តងណាឡើយ។ លោកបន្តថា គិតចាប់ពីឆ្នាំ ២០១៨ រហូតមកដល់ពេលនេះ មានរយៈពេលច្រើនឆ្នាំហើយ ដែលក្រុមហ៊ុនបានសាងសង់ តែមិនទាន់រួចរាល់ ស្របតាមកិច្ចសន្យា និងពុំមានសកម្មភាពសាងសង់បន្តឡើយ ក្រោយពីប្រមូលលុយពីអតិថិជនបានជាច្រើនលានដុល្លារ។ បើតាមតំណាងអតិថិជន បានបញ្ជាក់ថា ទិន្នន័យបណ្តោះអាសន្នដែលទទួលបាន ក្រុមមានគម្រោងសាងសង់ប្រហែលជាង ៤ពាន់តូប ដោយមានតម្លៃ ១តូបចាប់ពីជាង ៦ពាន់ដុល្លារឡើងទៅដល់ជាង១០ម៉ឺនដុល្លារ។

តំណាងអតិថិជន បានគូសបញ្ជាក់ទៀតថា រហូតមកដល់ពេល ក្រុមអាជីវករ បានស្នើសុំអន្តរាគមន៍ពីអាជ្ញាធរខណ្ឌឫស្សីកែវរួចហើយដែរ ដើម្បីជួយរកដំណោះស្រាយ និងអញ្ជើញភាគីក្រុមហ៊ុនចេញមុខមកដោះស្រាយជាមួយអតិថិជន។

យោងតាមកិច្ចសន្យាក្រុមហ៊ុនបានព្រមព្រៀងគ្នាទិញលក់តូប រយៈពេល ៤០ ឆ្នាំ (២០១៦- ២០៥៦) ដោយក្រុមហ៊ុនសន្យាថា នឹងសាងសង់ឱ្យរួចរាល់ ប្រគល់តូប និងផ្ទះអាជីវកម្មដល់អតិថិជន នៅថ្ងៃទី ៣១ ខែធ្នូ ឆ្នាំ២០១៩ ប្រសិនបើមានឧបសគ្គ នឹងត្រូវពន្យារយៈពេល ០៦ ខែយ៉ាងយូរ។

លោក ហាក់ ចាន់ថា បានសង្កត់ធ្ងន់ថា អាជីវករដែលទិញតូបផ្សារនេះ បានកំពុងរងផលប៉ះពាល់ដោយអ្នកខ្លះត្រូវបង់ធនាគារ ខ្លះទៀតបាត់បង់ចំណូលដោយសារស្ថានភាពសេដ្ឋកិច្ចមិនសូវល្អ ដោយរំពឹងថា ទិញតូបផ្សារនេះហើយ អាចចូលលក់ដូរបានដើម្បីដោះស្រាយជីវភាព។

អាជីវករបានបញ្ជាក់ថា បើលើស ៦ខែភាគីខាងផ្សារ នឹងផ្តល់សំណង ១ភាគរយរៀងរាល់ខែ។ ប៉ុន្តែរហូតមកដល់ពេលនេះ ក្រុមអាជីវករ បានអះអាងថា ភាគីផ្សារមិនបានផ្តល់សំណងដល់អតិថិជននោះឡើយ ខណៈដែលផ្សារក៏មិនទាន់សាងសង់រួចរាល់។

ក្រុមអាជីវករ បានសំណូមពរដល់ថ្នាក់ដឹកនាំគ្រប់លំដាប់ថ្នាក់ ជាពិសេសសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ឱ្យជួយរកយុត្តិធម៌ និងសូមឱ្យភាគីខាងផ្សារពន្លឿនដំណើរការសាងសង់ គោរពតាមកិច្ចសន្យា ចូលខ្លួនមកដោះស្រាយជាមួយអតិថិជន ដោយកំណត់ពេលវេលាឱ្យបានច្បាស់លាស់។ ក្រុមអាជីវករ បានអះអាងថា នឹងប្រមូលផ្តុំតវ៉ាជាបន្តទៀត ប្រសិនបើភាគីពាក់ព័ន្ធ ជាពិសេសថៅកែក្រុមអភិវឌ្ឍផ្សារ TCC មិនចេញមកដោះស្រាយជូនអតិថិជន ដូចមានចែងក្នុងកិច្ចសន្យា ដែលបានព្រមព្រៀងគ្នាទេនោះ៕

អត្ថបទ៖ ផល ធារិត

The post អាជីវករទិញតូបផ្សារ TCC ចេញតវ៉ាឱ្យថៅកែពន្លឿនសាងសង់ និងអនុវត្តតាមកិច្ចសន្យា appeared first on Kampuchea Thmey Daily.

តវ៉ា Archives - Kampuchea Thmey Daily

កម្មករ-កម្មការិនីរោងចក្រប្រមាណ ២៥០ នាក់ តវ៉ាបិទផ្លូវ ២១៧ ខណ្ឌដង្កោ ដោយសំណូមពរ ៥ ចំណុច

បុគ្គលិកសណ្ឋាគារអាមេរិកប្រមាណ១ម៉ឺននាក់ធ្វើកូដកម្ម​ទាមទារកែ​​​លក្ខខណ្ឌ​ការងារ

ក្រសួង​ការងារ​ ៖ កម្មករ​ក្រុមហ៊ុន​អ៊ិន​ឌី​ភេ​ន​ដិ​ន​ស៏ បាន​ចូល​ធ្វើការ​ហើយ​នៅ​ព្រឹក​នេះ

អ្នកឧកញ៉ា ហុង ពីវ បញ្ចេញលុយជាង ៥,៦លានដុល្លារ ទិញយកផ្ទះពីអតិថិជនវិញ

អាជីវករទិញតូបផ្សារ TCC ចេញតវ៉ាឱ្យថៅកែ​ពន្លឿនសាងសង់ និងអនុវត្តតាមកិច្ចសន្យា

បុគ្គលិកសណ្ឋាគារអាមេរិកប្រមាណ១ម៉ឺននាក់ធ្វើកូដកម្មទាមទារកែលក្ខខណ្ឌការងារ

ក្រសួងការងារ ៖ កម្មករក្រុមហ៊ុនអ៊ិនឌីភេនដិនស៏ បានចូលធ្វើការហើយនៅព្រឹកនេះ

អាជីវករទិញតូបផ្សារ TCC ចេញតវ៉ាឱ្យថៅកែពន្លឿនសាងសង់ និងអនុវត្តតាមកិច្ចសន្យា