លោកអភិបាលខេត្តបានបន្តថា អាជ្ញាធរក្រុងស្រុក និងមន្រ្តីពាក់ព័ន្ធ ក៏ត្រូវពិនិត្យមើល និងទប់ស្កាត់ដាច់ខាតការរំលោភយកដីចំណីផ្លូវ ប្រឡាយ ព្រែក អូរ និងបឹងបួរ ដែលកន្លងមកបញ្ហានេះ បានកើតមានឡើងនៅក្នុងស្រុកត្រាំកក់ ដែលនាំឱ្យមានការចុះផ្សាយរិះគន់យ៉ាងព្រោងព្រាត។

ក្រៅពីបញ្ហាដីធ្លី លោក វ៉ី សំណាង បានណែនាំអាជ្ញាធរមូលដ្ឋាន ឱ្យបង្កើនប្រសិទ្ធភាព ក្នុងការដោះស្រាយទំនាស់ជូនប្រជាពលរដ្ឋ តាមរយៈយន្តការក្រៅប្រព័ន្ធតុលាការ ដើម្បីបង្កភាពងាយស្រួល និងរក្សាសុខដុមរមនាក្នុងសហគមន៍។ ដោយឡែក បន្ថែមលើនេះលោក វ៉ី សំណាង ក៏បានណែនាំដល់មន្ទីរជំនាញពាក់ព័ន្ធ និងអាជ្ញាធរក្រុងដូនកែវ ត្រូវសហការគ្នា ពិភាក្សា និងសិក្សាលើការៀបចំកែលម្អហេដ្ឋារចនាមួយចំនួននៅភូមិសាស្រ្តក្រុងដូនកែវ ពិសេសការរៀបចំប្លង់មេ និងហេដ្ឋារចនាសម្ព័ន្ធនៅចំណុច “រង្វង់មូលអូរចំបក់” ដើម្បីបង្កើនសម្រស់ខេត្ត និងសម្រួលដល់ការធ្វើដំណើរ របស់ប្រជាពលរដ្ឋ។ ព្រោះថាការកែលម្អនេះ ពិតជាមានសារសំខាន់ណាស់ សម្រាប់លើកសម្រស់ ក៏ដូចជាសោភ័ណ្ឌភាពក្រុងដូនកែវ ដើម្បីជាផ្នែកមួយសម្រាប់ទាក់ទាញភ្ញៀវទេសចរជាតិ និងអន្តរជាតិ បានចូលមកទស្សនាឱ្យបានច្រើនកុះករ៕

អត្ថបទ៖ វីរៈ

The post អភិបាលខេត្តតាកែវ ណែនាំអភិបាលក្រុង-ស្រុក ត្រូវទប់ស្កាត់ការទន្ទ្រានកាន់កាប់ដីរដ្ឋខុសច្បាប់ appeared first on Kampuchea Thmey Daily.

បើតាមលោកឧត្តមសេនីយ៍ទោ សោម ស៊ុន ជនល្មើសបានឆ្លៀតឱកាសកាប់ទន្ទ្រានព្រៃឈើនៅតំបន់អូតាលោក ឃុំមានរិទ្ធ នៅពេលកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំមួយផ្នែក ត្រូវបានទទួលបទបញ្ជាក្នុងការទៅបំពេញភារកិច្ចការពារបូរណភាពទឹកដីនៅតំបន់ព្រំដែនកម្ពុជា-ថៃនាពេលកន្លងទៅ។

មេបញ្ជាការតំបន់ប្រតិបត្តិការសឹករងកំពង់ធំ បញ្ជាក់នៅព្រឹកថ្ងៃទី១២ ខែមករា ឆ្នាំ២០២៦ ក្នុងពេលដឹកនាំមន្ត្រីជំនាញរដ្ឋបាលព្រៃឈើខេត្ត រួមជាមួយអាជ្ញាធរដែនដី ឃុំ ស្រុក ចុះត្រួតពិនិត្យការកាប់ទន្ទ្រានព្រៃឈើថ្មីៗនេះថា ដីព្រៃឈើដែលជនឆ្លៀតឱកាសលួចកាប់ទន្ទ្រាននេះ មានចំនួន៤៥​ ហិកតា ដែល​ជា​ដី​បម្រុង​ទុក​របស់​រដ្ឋ​ នៅក្នុងតំបន់អូតាលោក ឃុំមានរិទ្ធ ស្រុកសណ្ដាន់ ខេត្តកំពង់ធំ។

ឧត្តមសេនីយ៍ទោ សោម ស៊ុន បន្ថែមថា ក្នុងរយៈពេលជិតពីរឆ្នាំកន្លងទៅនេះ គណៈកម្មការគ្រប់គ្រង ការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ ដោយមានកងកម្លាំងប្រដាប់អាវុធទាំងបី មន្ត្រីស្ថាប័នជំនាញមានការពាក់ព័ន្ធ រួមជាមួយអាជ្ញាធរដែនដីគ្រប់លំដាប់ថ្នាក់ បានខិតខំប្រឹងប្រែងការពារ ទប់ស្កាត់ មិនឱ្យមានការកាប់ទន្ទ្រានព្រៃឈើ យកដីរបស់រដ្ឋធ្វើជាកម្មសិទ្ធិបានឡើយ។ ជាមួយនោះក៏បានគ្រប់គ្រងផ្ទៃដីដែលដកហូតយកបានពីជនល្មើស ដែលលួចកាត់ទន្ទ្រាននាបណ្ដាឆ្នាំកន្លងទៅ ចំនួនជាង បួនពាន់ហិកតា រក្សាទុកជាដីរបស់រដ្ឋ ដើម្បីឲ្យព្រៃឈើធម្មជាតិដុះលូតលាស់ឡើងវិញ និងផ្ទៃដីមួយផ្នែកទៀត ត្រូវបានដាំស្ដារព្រៃឈើឡើងវិញផងដែរ។

ឧត្តមសេនីយ៍ទោ សោម ស៊ុន បានប្រគល់ភារកិច្ចដល់កងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវបន្តរួមសហការជាមួយអាជ្ញាធរដែនដី និងមន្ត្រីសមត្ថកិច្ចជំនាញពាក់ព័ន្ធ ក្នុងការគ្រប់គ្រងថែរក្សាព្រៃឈើ ដែលបានលួចកាប់ទន្ទ្រាននេះឱ្យបាន ដើម្បីស្ថាប័នមានសមត្ថកិច្ចចាត់ការតាមនីតិវិធីច្បាប់៕

The post មេបញ្ជាការតំបន់ប្រតិបត្តិការសឹករងកំពង់ធំ ជំរុញឲ្យសមត្ថកិច្ចស្រាវជ្រាវមុខសញ្ញាកាប់ទន្ទ្រានព្រៃឈើនៅតំបន់អូតាលោកយកមកអនុវត្តច្បាប់ appeared first on Kampuchea Thmey Daily.

អ្នកនាំពាក្យក្រសួងបរិស្ថាន លោកខ្វៃ អាទិត្យា បានឱ្យដឹងថាមន្រ្តីឧទ្យានុរក្ស បានចាត់វិធានការច្បាប់ ស្របតាមក្រមបរិស្ថាននិងធនធានធម្មជាតិ ធ្វើការរុះរើ ផ្ទះលំហែចំនួន១ខ្នង (សាងសង់បានប្រមាណ៨០% ) រោងប្រក់តង់ចំនួនពីរ (រោងស្នាក់នៅ និងរោងបាយ) របងព័ទ្ធបន្លាលួសព័ទ្ធតំបន់ព្រៃមួយផ្នែកប្រហែល១៥០ម៉ែត្រ និងតំបន់ហេដ្ឋារចនាសម្ព័ន្ធមួយចំនួនទៀត នៃតំបន់ឧទ្យានជាតិព្រះសុរាម្រិត កុសមៈ«គិរីរម្យ»  បន្ទាប់ពីបានរកឃើញបទល្មើសធនធានធម្មជាតិ បង្កឡើងដោយជនខិលខូច ដែលបានលួចឈូសឆាយ សាងសង់ដោយខុសច្បាប់ កាលពីពេលថ្មីៗកន្លងមកនេះ។

ក្រសួងបរិស្ថាន ថ្លែងអំណរគុណដល់សាធារណជន ដែលបានចូលរួមសហការផ្តល់ព័ត៌មាន ផ្តល់រូបភាព រាយការណ៍អំពីជនល្មើស សម្រាប់តាមដានស៊ើបអង្កេត លើករណីកាប់គាស់ រុករានដីព្រៃ និងកាប់ឈើ ខុសច្បាប់ នៅតាមតំបន់ការពារធម្មជាតិ នៅក្នុងព្រះរាជាណាចក្រកម្ពុជា។ ចំពោះករណីបទល្មើសធនធានធម្មជាតិ នៅឧទ្យានជាតិព្រះសុរាម្រិត កុសមៈ«គិរីរម្យ» ក្រុមការងារក្រសួងបរិស្ថាន បានសហការជាមួយក្រុមអ្នកច្បាប់ ក្រសួងយុត្តិធម៌ និងស្ថាប័នពាក់ព័ន្ធ ស្រាវជ្រាវ និងនាំខ្លួនជនល្មើស ដើម្បីបញ្ជូនទៅតុលាការចាត់ការ តាមនីតិវិធីនៃច្បាប់។

អ្នកនាំពាក្យក្រសួងបរិស្ថាន ធ្លាប់បានអះអាងថា ក្រសួងនឹងចាត់វិធានការច្បាប់ចំពោះជនល្មើស ដែលបានកាប់រុករានដីព្រៃនៅក្នុងតំបន់ការពារធម្មជាតិ ស្របតាមក្រមបរិស្ថាននិងធនធានធម្មជាតិ មាត្រា៨៥៥ ការធ្វើសកម្មភាពសាងសង់ ឬធ្វើប្រតិបត្តិការគម្រោងបំពានការហាមឃាត់ និងមាត្រា៨៥០ ចំណុច «ង»   ដឹកជញ្ជូន ប្រមូល ធ្វើសន្និធិ ឬប្រមូលសន្និធិផល និងអនុផលធនធានធម្មជាតិដោយគ្មានការអនុញ្ញាត និងចំណុច «ឌ» បោះបង្គោលហ៊ុមព័ទ្ធ ឬដាក់សញ្ញាសម្គាល់លើដីដែលជាទ្រព្យសម្បត្តិរដ្ឋក្នុងតំបន់ការពារធម្មជាតិ ក្នុងគោលបំណងកាន់កាប់ដើម្បីយកដីធ្វើជាកម្មសិទ្ធិ ជាបទល្មើសពាក់ព័ន្ធនឹងការគ្រប់គ្រងតំបន់ការពារធម្មជាតិ។

រាជរដ្ឋាភិបាលពិនិត្យនិងសម្រេច  ព្រមទាំងអនុវត្តន៍ទៅតាមគោលការណ៍បែបបទបច្ចេកទេស ស្របតាមនិតីវិធីច្បាប់ជាធរមាន ចំពោះការអភិវឌ្ឍ រៀបចំ សាងសង់សំណង់ និងហេដ្ឋារចនាសម្ព័ន្ធនានា ហើយមិនអនុញ្ញាតឱ្យមានការឈូសឆាយ កាប់រុករាន ដីព្រៃធ្វើជាកម្មសិទ្ធិដាច់ខាត។

ក្រមបរិស្ថាននិងធនធានធម្មជាតិ ក្នុងមាត្រា៣៧៩ ចំណុច «១» ការរៀបចំគម្រោងស្ថាបនានិងអភិវឌ្ឍហេដ្ឋារចនាសម្ព័ន្ធសាធារណៈគ្រប់ប្រភេទ នៅក្នុងតំបន់ការពារធម្មជាតិ ត្រូវធ្វើការពិគ្រោះយោបល់ជាមុន ជាមួយក្រសួងទទួលបន្ទុកវិស័យបរិស្ថាននិងធនធានធម្មជាតិ និងរដ្ឋបាលថ្នាក់ក្រោមជាតិ និងចំណុច «២» រាល់គម្រោងស្ថាបនា សាងសង់សំណង់ឯកជន នៅក្នុងតំបន់ការពារធម្មជាតិ ត្រូវទទួលការអនុញ្ញាតជាមុនពីក្រសួងទទួលបន្ទុកវិស័យបរិស្ថាននិងធនធានធម្មជាតិ ឬរដ្ឋបាលថ្នាក់ក្រោមជាតិ និងមាត្រា៣៨៦ ការហាមឃាត់សិទ្ធិរបស់បុគ្គល ចែងថា «បុគ្គលពុំមានសិទ្ធិ ផ្តល់ការអនុញ្ញាតទោះដោយផ្ទាល់ក្តីឬប្រយោលក្តី ឱ្យរានដីព្រៃ កាន់កាប់ដី កាប់ដើមឈើ ចាប់សត្វព្រៃគ្រប់ប្រភេទ ឬធ្វើសកម្មភាពគ្រប់យ៉ាង ដើម្បីប្រមូលផល អនុផលធនធានធម្មជាតិក្នុងតំបន់ការពារធម្មជាតិ ដែលផ្ទុយនឹងបទប្បញ្ញត្តិនៃក្រមនេះ»៕

The post មន្ត្រីបរិស្ថានចុះរុះរើសំណង់ខុសច្បាប់ និងប្ដឹងទៅតុលាការករណីទន្ទ្រានដីនៅឧទ្យានជាតិ«គិរីរម្យ» appeared first on Kampuchea Thmey Daily.

មន្រ្តីជាន់ខ្ពស់ក្រសួងបរិស្ថាន នៅថ្ងៃទី២២ ខែកក្កដា ឆ្នាំ២០២៥ បានចេញមកបដិសេធចំពោះការលើកឡើងរបស់ប្រជាពលរដ្ឋមួយគ្រួសារ ដែលនៅតែអះអាងថា ស្រ្តីជាប់ឃុំនៅពន្ធនាគារខេត្តកំពង់ឆ្នាំង ឈ្មោះ យុត្ត ផល្លី បានឈូសឆាយចូលដីរដ្ឋ រហូតមានការចាប់ឃាត់ខ្លួន។

យោងតាមសេចក្តីប្រកាសព័ត៌មានរបស់មន្ទីរបរិស្ថានខេត្តកំពង់ឆ្នាំង បានបញ្ជាក់ឲ្យដឹងថា សកម្មភាពឈូសឆាយនេះ គឺជាបទល្មើសជាក់ស្ដែងកំណត់ជាបទល្មើសធនធានធម្មជាតិថ្នាក់ទី៣ ដែលមានចែងក្នុងមាត្រា៨៥១ នៃក្រមបរិស្ថាន និងធនធានធម្មជាតិត្រង់ចំណុច «ច» បន្ទាប់ពីឃើញសកម្មភាពបែបនេះមន្ត្រីឧទ្យានុរក្ស ក៏បានរាយការណ៍សុំគោលការណ៍ពីព្រះរាជអាជ្ញា នៃអយ្យការអមសាលាដំបូងខេត្តកំពង់ឆ្នាំង ហើយព្រះរាជអាជ្ញាក៏បានបញ្ជាឲ្យឃាត់ខ្លួន និងកសាងសំណុំរឿងតាមនីតិវិធី។

ក្នុងករណីខាងលើនេះមន្ត្រីឧទ្យានុរក្ស បាននាំយកត្រាក់ទ័រ និងមនុស្ស២នាក់មានឈ្មោះ កៃ កន ភេទប្រុស ជាម្ចាស់គ្រឿងចក្រ និងឈ្មោះ យុត ផល្លី ភេទស្រី អ្នករំលោភឈូសឆាយ ដែលទាំង២នាក់នេះ ត្រូវបានចោទថា បានឈូសឆាយដីរបស់រដ្ឋអស់ទំហំ ១.៤៣ហិកតា៕

The post ក្រសួងបរិស្ថាន÷ ស្ត្រីម្នាក់នៅស្រុកកំពង់លែង ខេត្តកំពង់ឆ្នាំង ត្រូវតុលាការឃាត់ខ្លួន និងឃុំខ្លួន ព្រោះតែឈូសឆាយដីរដ្ឋ appeared first on Kampuchea Thmey Daily.

លោក ផេន សុផាត អភិបាលរងស្រុកកោះសូទិន​ តំណាងលោក យី វណ្ណៈ អភិបាលស្រុក នៅថ្ងៃទី ២៥ ខែ មេសាឆ្នាំ២០២៥ បានកោះហៅប្រជាពលរដ្ឋដែលបានឈូសឆាយនិងកាប់ទន្រ្ទានដីព្រៃលិចទឹកក្នុងឡូត៍លេខ៨ ភូមិព្រែកចង្ក្រានឲ្យមកធ្វេីកិច្ចសន្យា​ កុំឲ្យមានការសកម្មភាពបែបនេះទៀត​ ព្រោះជាដីរដ្ឋ​ ហេីយខុសច្បាប់។ 

ទន្ទឹមនឹងនេះដែរ​ លោក ផេន សុផាត អភិបាលរងស្រុកកោះសូទិន​ បានបញ្ជាក់ប្រាប់​ថា​ ក្រោយពីបង្កេីតគណៈកម្មាធិការចំរុះទៅដល់ទីតាំងផ្ទាល់​ គឺសង្កេតឃេីញថា​ មានក្រុមប្រជាពលរដ្ឋចូលទៅឈូសឆាយដីនិងកាប់ទន្រ្ទានដីព្រៃលិចទឹកក្នុងឡូត៍លេខ៨ពិតប្រាកដ​មែន​។ 

គូសបញ្ជាក់​ថា ទំហំដីដែលរងការទន្ទ្រាននៅតំបន់នោះ​ មានប្រមាណជិត១០០ហិចតា​ ខណៈ​បច្ចុប្បន្ន​តំបន់ខ្លះត្រូវបានប្រជាពលរដ្ឋឈូសឆាយទៅអាស្រ័យផលបណ្តេីរ​ៗ​ដែរ​ ប៉ុន្តែ​ប្រជាពលរដ្ឋ​ដែលរស់នៅឃុំល្វេ​ ស្រុកកោះសូទិន​ ក៍សំណូមពរដល់អាជ្ញាធរគ្រប់ថ្នាក់​ គ្រប់ផ្នែក​ ជួយអន្តរាគមន៍ទប់ស្កាត់ឲ្យខានតែបានចំពោះករណីឈូសឆាយទន្ទ្រានដីព្រៃលិចទឹក​ ដេីម្បីជាជំរកសត្វត្រីពងកូននៅរដូវទឹកឡេីងផង៕​

អត្ថបទ​និងរូបភាព​ ៖​ ឡេក​ ចាន់ពេជ្រ​

The post អាជ្ញាធរ​ស្រុកកោះសូទិន​ចុះទប់ស្កាត់សកម្មភាពទន្ទ្រានដីរដ្ឋនៅចំណុចឡូត៍លេខ៨ appeared first on Kampuchea Thmey Daily.

ក្នុងឱកាសនោះ លោកសរ សុពុត្រា បានសង្កត់ធ្ងន់ថា៖«មន្ត្រីមានសមត្ថកិច្ចពាក់ព័ន្ធ និងអាជ្ញាធរស្រុក ឃុំ ត្រូវបន្តស្រាវជ្រាវជនសង្ស័យដើម្បីឃាត់ខ្លួនយកមកអនុវត្តច្បាប់ឱ្យបាន ព្រោះជននេះបង្កភាពស្មុគ្រស្មាញរឿងដីធ្លី ហើយបង្កើតអំពើឆបោកប្រជាជនយើងបន្ថែមទៀត»។

គួរជម្រាបថា កន្លងមកមានទាំងពលរដ្ឋ​ និងជនសង្ស័យ បានយកលុយឱ្យអ្នកសារព័ត៌មានគ្មានវិជ្ជាជីវៈចុះផ្សាយខុសពីការពិត ថាពួកគេបាត់បង់ដី ខណៈដីដែលពួកគេកាន់កាប់នោះ ជាដីដែលកាប់ទន្ទ្រានដីរដ្ឋសម្រាប់ទុកអភិរក្ស។ បន្ថែមពីនេះ ពលរដ្ឋខ្លះ បានកាន់រូបថ្នាក់ដឹកនាំ ហើយស្នើសុំឱ្យស្វែងរកយុត្តិធម៌ បង្កឱ្យមានការភាន់ច្រឡំដល់សាធារណៈមតិ។
បើតាមអភិបាលខេត្ត ៖«មានបងប្អូនខ្លះស្រែកថាក្រណាស់ៗ តែប្រមូលលុយឱ្យគេម្ដងរហូតដល់ទៅ ៣០០០ ទៅ ៤០០០ ដុល្លារឱ្យគេបោក ហើយនាំគ្នាទៅកាប់ដីព្រៃដើម្បីលក់ ពេលអាជ្ញាធរចាប់ខ្លួន ស្រែកថាអយុត្តិធម៌»។

ជុំវិញបញ្ហាទាំងនេះ លោក សរ សុពុត្រា បានបង្ហើបឱ្យដឹងថា ដោយសារតែមានការយោគយល់ និងប្រោសប្រណីដល់ប្រជាពលរដ្ឋ ពីសំណាក់ប្រមុខរាជរដ្ឋាភិបាល ទើបចាត់តាំងមន្រ្តីចុះមកសម្របសម្រួលដោយសន្តិវិធី ដើម្បីបញ្ចប់បញ្ហាទាំងនោះ។

លោក សុវណ្ណ ពិសេដ្ឋ អភិបាលស្រុកសេសាន មានប្រសាសន៍ថា កន្លងមកមន្ត្រីជំនាញ និងសមត្ថកិច្ចពាក់ព័ន្ធ បានចុះបង្ក្រាបមិនបន្ធូរដៃឡើយ និងបានឃាត់ខ្លួនជនខិលខូចច្រើននាក់ ដែលបានកាប់ព្រៃទន្ទ្រានដីរដ្ឋ ក្នុងនោះក៏មានអ្នកសារព័ត៌មួយចំនួនផងដែរ។ លោកថា៖«នៅសល់អ្នករត់គេចខ្លួនមួយចំនួនទៀត សមត្ថកិច្ចបានកំណត់មុខសញ្ញាអស់ហើយនិងកំពុងអនុវត្តនីតិវិធី។ ដោយឡែកទីតាំងដីដែលអាជ្ញាធរដកហូតបានកំពុងការពារយ៉ាងតឹងរឹង ចំណែកដីរបស់ក្រសួងកសិកម្មដែលមានប្លង់ នៅភូមិបានប៊ុង​ ឃុំភ្លុក ស្រុកសេសាន នៅពេលប្រជាពលរដ្ឋប្រមូលផលដំឡូងមីអស់  អាជ្ញាធរមានសមត្ថកិច្ចចុះទៅអនុវត្តនីតិវិធី ព្រោះបានណែនាំពួកគាត់រួចហើយដែរ»។

ពាក់ព័ន្ធករណីដីធ្លីនេះ នាយករងខុទ្ទកាល័យសម្ដេចនាយករដ្ឋមន្រ្តី ហ៊ុន ម៉ាណែត, លោក ប៉ាន់ខែម ប៊ុនថន កន្លងមក បានចុះមកជួបប្រជាពលរដ្ឋ និងដោះស្រាយជាច្រើលើកច្រើនសារមកហើយ តែមិនទាន់បានសម្រេចលទ្ធផលទាំងស្រុងទេ ដោយសារពលរដ្ឋខ្លះជឿតាមការញុះញង់អ្នកនៅពីក្រោយសកម្មភាពកាប់ទន្ទ្រានដីរដ្ឋ៕

ដោយ៖ ងិន លីម

The post អភិបាលខេត្តស្ទឹងត្រែង ដាក់បទបញ្ជាតាមចាប់ជនសង្ស័យញុះញង់ពលរដ្ឋកាប់ទន្ទ្រានដីព្រៃរដ្ឋ appeared first on Kampuchea Thmey Daily.

លោក នួន ផារ័ត្ន អភិបាលខេត្តកំពង់ធំ បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត សហការជាមួយរដ្ឋបាលព្រៃឈើ ឱ្យសិក្សាលើដីដែលបានដកហូតពីជនខិលខូចបានកាប់ទន្រ្ទានយកដីរដ្ឋដោយខុសច្បាប់ មកដាំដុះកូនឈើឡើងវិញ និងការពារឱ្យបានល្អ ដោយមិនមានការទន្ទ្រានថ្មីទៀតនោះទេ។

តែយ៉ាងណា ក្នុងឱកាសដឹកនាំកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលខេត្តកំពង់ធំ នាព្រឹកថ្ងៃទី១៦ ខែកក្កដា ឆ្នាំ២០២៤ លោក នួន ផារ័ត្ន អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត បានអរគុណដល់កងកម្លាំងសមត្ថកិច្ច និងមន្ត្រីជំនាញទាំងអស់ ដែលឈរជើងនៅទីបញ្ជាការស្រាលទាំង ១៤គោលដៅ នៅដែនជម្រកសត្វព្រៃ ព្រៃសហគមន៍ និងតំបន់វាលក្រោម (តំបន់៣) ក្នុងប្រតិបត្តិការបង្ក្រាប និងទប់ស្កាត់ការពារធនធានធម្មជាតិ ក្នុងភូមិសាស្ត្រខេត្តកំពង់ធំនាពេលកន្លងមក ទទួលបានលទ្ធផលយ៉ាងមានប្រសិទ្ធិភាព។

លោកអភិបាលខេត្ត បានជំរុញឱ្យកម្លាំងសមត្ថកិច្ច និងមន្ត្រីជំនាញបន្តនិរន្តរភាពការងារនេះឱ្យបានល្អប្រសើថែមទៀត ដែលជាមួយគ្នានេះ ក្នុងនាមជាអភិបាលខេត្តកំពង់ធំ លោក នួន ផារ័ត្ន ក៏បានជួយឧត្ថម្ភដល់កម្លាំងដែលឈរជើងប្រចាំការទីបញ្ជាការស្រាលទាំង ១៤គោលដៅនូវគ្រឿងឧបភោគបរិភោគ និងម៉ូតូសម្រាប់ប្រតិបត្តិការផងដែរ។

បន្ថែមពីការណែនាំលើកិច្ចការទប់ស្កាត់ការទន្ទ្រានដីរដ្ឋនេះដែរ លោក នួន ផារ័ត្ន ក៏បានក្រើនរំលឹកដល់គណៈបញ្ជាការឯកភាពរដ្ឋបាលក្រុង ស្រុក និងកងកម្លាំងប្រដាប់វុធទាំងបីប្រភេទឱ្យបន្តនិរន្តភាពការងារដែលធ្លាប់បានអនុវត្តកន្លងមកឱ្យល្អប្រសើរថែមទៀត ព្រមទាំងការបង្ក្រាប និងទប់ស្កាត់ល្បែងស៊ីសងគ្រប់ប្រភេទ បញ្ហាគ្រឿងញៀន ការរឹតបណ្តឹងសុវត្ថិភាពចរាចរណ៍ផ្លូវគោគ ត្រួតពិនិត្យគ្រឿងស្រវឹង អាវុធជាតិផ្ទុះ បញ្ជាក្មេងទំនើង តាមរយៈការអប់រំ និងអនុវត្តច្បាប់ឱ្យបានត្រឹមត្រូវ៕

The post ដីដែលដកហូតពីការទន្ទ្រាន ត្រូវបានអភិបាលខេត្តកំពង់ធំ ណែនាំឱ្យដាំកូនឈើឡើងវិញ appeared first on Kampuchea Thmey Daily.

លោក សរ សុវណ្ណ ក៏បានជម្រុញដល់ក្រុមការងារ ចុះបញ្ជីដីធ្លី ជូនប្រជាពលរដ្ឋ ត្រូវខិតខំបំពេញភារកិច្ចឲ្យបានល្អត្រឹមត្រូវ និងឆាប់រហ័សស្របទៅតាមគោលការណ៍របស់រាជរដ្ឋាភិបាល ឲ្យបានរួចរាល់ទូទាំងប្រទេសនាឆ្នាំ២០២៥។

លោក សរ សុវណ្ណ បានណែនាំដល់អាជ្ញាធរ ក្រុង-ស្រុក ឃុំ-សង្កាត់  ទាំងអស់ក្នុងខេត្តសៀមរាប  គឺត្រូវអនុលោមតាម ការណែនាំរបស់ក្រុមអ្នកបច្ចេកទេសក្នុងការងារចុះបញ្ជីដីធ្លី។  លោក ក៏បានចង្អុល ឱ្យអាជ្ញាធរជួយផ្សព្វផ្សាយព័ត៌មានដល់ប្រជាពលរដ្ឋឱ្យត្រៀមឯកសារឱ្យបានគ្រប់គ្រាន់ និងត្រូវជួយសម្របសម្រួលពលរដ្ឋលើករណីជម្លោះព្រំដីជាប់គ្នា ដើម្បីសម្រួលដល់ក្រុមការងារការវាស់វែង។

មន្ត្រីជាន់ខ្ពស់ក្រសួងរៀបចំដែនដីរូបនេះ បានគូសបញ្ជាក់ឱ្យអាជ្ញាធរមូលដ្ឋានត្រូវក្ដាប់ពីប្រវត្តិដីឲ្យបានជាក់លាក់ ត្រូវបញ្ជាក់ឈ្មោះអ្នកគ្រប់គ្រង សំដៅងាយស្រួល ក្នុងការចុះបញ្ជីដីធ្លី ជាទ្រព្យសម្បត្តិខាងប្រពន្ធ ឬប្តី ឬក៏ជាទ្រព្យសម្បត្តិរួម ឲ្យមានប្រសិទ្ធិភាពខ្ពស់ និងត្រូវក្តាប់ឲ្យបានអំពីសាវតាដីដែលបានសុំចុះបញ្ជីឲ្យបានច្បាស់លាស់ ។

ដោយឡែក  អភិបាលរងខេត្តសៀមរាប លោក អ៉ឹង គឹមលាង ក្នុងឱកាសចូលរួមក្នុងកិច្ច​ប្រជុំនេះ ក៏បានណែនាំអាជ្ញាធរគ្រប់ជាន់ថ្នាក់ ត្រូវធ្វើសកម្មភាពផ្សព្វផ្សាយ និងណែនាំដល់ប្រជាពលរដ្ឋ ឲ្យត្រៀមលក្ខណៈនូវរាល់ឯកសារពាក់ព័ន្ធក្នុងការចុះបញ្ជីដីធ្លី  ដើមី្បជៀសវាងក្នុងកិច្ចដំណើរការទៅ មានភាពយឺតយ៉ាវ និង បង្កការលំបាកដល់បងប្អូនទៀតផង៕

អត្ថបទដោយ៖ គឿនវេត

The post មន្ត្រីជាន់ខ្ពស់ក្រសួងរៀបចំដែនដី​ បញ្ជាឱ្យ អាជ្ញាធរខេត្តសៀមរាបទប់ស្កាត់ការទន្រានដីរដ្ឋធ្វើសម្បត្តិឯកជន appeared first on Kampuchea Thmey Daily.