ទន្លេមេគង្គ Archives - Kampuchea Thmey Daily

ខេត្ត ២០ រងគ្រោះដោយជំនន់ទឹកភ្លៀង និងទន្លេមេគង្គ ប៉ះពាល់ពលរដ្ឋជាង ៤ ម៉ឺនគ្រួសារ ស្រូវជាង ៣ ម៉ឺនហិតា និងលង់ទឹក ២០ នាក់

អ៊ិន ពិសី — Fri, 10 Oct 2025 08:59:45 +0000

ជំនន់ទឹកភ្លៀង និងជំនន់ទន្លេមេគង្គ បណ្តាលឱ្យប៉ះពាល់ដល់ខេត្តចំនួន ២០ ប៉ះពាល់ប្រជាពលរដ្ឋជាង ៤ ម៉ឺននាក់ ស្មើនឹងជាង ១២ ម៉ឺននាក់ ជម្លៀសពលរដ្ឋជិត ១ ៨០០ គ្រួសារ ស្មើនឹងជិត ៦ ពាន់នាក់ ផ្ទះលិចទឹកជាង ២ ម៉ឺន ៣ ពាន់ខ្នង ស្រូវលិចទឹកជាង ៣ ម៉ឺនហិតា ដំណាំរួមផ្សំទ្រទ្រង់សេដ្ឋកិច្ចជាង ៨ ពាន់ហិតា និងមនុស្សលង់ទឹក ២០ នាក់។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅរសៀលថ្ងៃទី ១០ តុលា នេះថា ភ្លៀងរដូវវស្សាបានជន់ឡើងជាបន្តបន្ទាប់ក្នុងក្របខ័ណ្ឌទូទាំងប្រទេស ក្នុងកម្រិតពីមធ្យមទៅបង្គួរ ជាមួយនឹងរបាយទឹកភ្លៀងធ្លាក់រាយប៉ាយបានល្អ និងមានបរិមាណតិចច្រើនដោយកន្លែង ចាប់តាំងពីសប្ដាហ៍ទី ២ នៃខែឧសភា រួមជាមួយនឹងការទទួលរងឥទ្ធិពល បន្ទាប់ពីព្យុះក្នុងតំបន់ និងរបបខ្យល់មូសុងនិរតីដែលបង្កឱ្យមានភ្លៀងធ្លាក់ក្នុងបរិមាណច្រើននៅតាមតំបន់ភូមិសាស្ត្រមួយចំនួន នៃភាគពាយ័ព្យ តំបន់ខ្ពង់រាប ភាគខាងជើង និងតំបន់ភាគឦសាន ធ្វើឱ្យមានការលិចលង់ភូមិឋាន ស្រែចម្ការ និងហេដ្ឋារចនាសម្ព័ន្ធ ជនបទមួយចំនួន ហើយក្នុងនេះព្រែក ស្ទឹង មួយចំនួន ក៏មានទឹកពេញព្រៀបលើសកម្រិតកម្ពស់ប្រុងប្រយ័ត្ន និងហៀរចេញបង្កការលិចលង់បន្ថែមទៀត។

លោកបានបន្តថា ជាមួយគ្នានេះដែរ ទឹកទន្លេមេគង្គមានចលនាជន់ឡើងចំនួន ៣ លើក ចាប់តាំងពីខែកក្កដា មក ដោយសារមានភ្លៀងធ្លាក់ច្រើននៅផ្ទៃរងទឹកភ្លៀង នៃអាងទន្លេមេគង្គលើ និងដៃទន្លេជាច្រើន ដោយបង្កឱ្យទឹកទន្លេមេគង្គជន់ឡើងលឿន ចាប់ពីដំណាច់ខែកក្កដា មកដល់ដំណាច់ខែកញ្ញា ដែលក្នុងនេះ ស្ថានីយជលសាស្ត្រក្នុងភូមិសាស្ត្រ ខេត្តស្ទឹងត្រែង ត្បូងឃ្មុំ ក្រចេះ និងកំពង់ចាម ទឹកបានជន់ឡើងជិតដល់កម្រិតប្រុងប្រយ័ត្ន និងបង្កឱ្យភូមិឋាន ផ្ទះសំបែង និងដីស្រែចម្ការ នៅតាមដងទន្លេទទួលរងការជន់លិចជាបន្តបន្ទាប់។

លោកបានបន្តទៀតថា ជំនន់ទឹកភ្លៀង និងជំនន់ទន្លេមេគង្គ បានប៉ះពាល់ទៅលើខេត្តចំនួន ២០ ខេត្ត លើកលែង ភ្នំពេញ កំពត កែប តាកែវ និងកំពង់ស្ពឺ ប៉ះពាល់ប្រជាជន ៤១.៥១៣ គ្រួសារ មានប្រមាណ ១២៤.៦៧៦ នាក់ ជម្លៀសប្រជាជន ១.៧៨២ គ្រួសារ ប្រមាណ ៥.៩០០ នាក់ ផ្ទះលិចទឹក ២៣.៤៨៩ ខ្នង សាលារៀន ៦២ អគារ វត្តអារាម ១៣ កន្លែង មណ្ឌលសុខភាព ២៨ កន្លែង និងអគាររដ្ឋបាល ៥ កន្លែង ព្រមទាំងមានប្រជាជនរងគ្រោះលង់ទឹកក្នុងពេលមានទឹកជំនន់ ចំនួន ២០ នាក់ (ស្រី ៧ ក្មេង ១២)។

ស្រូវលិចទឹក ៣០.៧០២ ហិតា ខូចខាត ៨.៦២១ ហិតា ដំណាំរួមផ្សំទ្រទ្រង់សេដ្ឋកិច្ច ៨.១១៨ ហិតា ខូចខាត ៣.៧៥៦ ហិតា ជម្លៀសសត្វចិញ្ចឹម ១.៨៧១ ក្បាល និងងាប់ ៥០ ក្បាល លិចផ្លូវជាតិ ផ្លូវខេត្ត និងផ្លូវកៅស៊ូ ៣៥.៩៣៩ ម៉ែត្រ ផ្លូវលំ បេតុង ក្រួសក្រហម និងដីស លិចទឹក ៥៣៩.០៤៤ ម៉ែត្រ ប៉ះពាល់ស្ពានបេតុង ឈើ និងបាឡេ ៧៨ កន្លែង និងបាក់ស្រុតដីច្រាំងទន្លេ ស្ទឹង ប្រវែងប្រមាណ ៥,៧៤៣ ម៉ែត្រ៕

អត្ថបទ ៖ សំអឿន

The post ខេត្ត ២០ រងគ្រោះដោយជំនន់ទឹកភ្លៀង និងទន្លេមេគង្គ ប៉ះពាល់ពលរដ្ឋជាង ៤ ម៉ឺនគ្រួសារ ស្រូវជាង ៣ ម៉ឺនហិតា និងលង់ទឹក ២០ នាក់ appeared first on Kampuchea Thmey Daily.

ទឹកទន្លេមេគង្គកំពង់ចាមបន្តហក់ឡើងបណ្ដាលឲ្យប៉ះពាល់ផ្លូវ និងផ្ទះពលរដ្ឋមួយចំនួន

Sokhom Khon — Thu, 02 Oct 2025 02:27:56 +0000

ទឹកទន្លេមេគង្គខេត្តកំពង់ចាម នៅថ្ងៃទី២ ខែតុលា ឆ្នាំ២០២៥នេះ បានបន្តហក់ឡើងបន្ថែមទៀតបណ្តាលឲ្យរងផលប៉ះពាល់ផ្លូវ និងផ្ទះប្រជាពលរដ្ឋមួយចំនួនដែលរស់នៅតាមបណ្តោយទន្លេមេគង្គ។

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាម បានបញ្ជាក់ថា ចំពោះស្ថានភាពទឹកទន្លេមេគង្គខេត្តកំពង់ចាម នៅថ្ងៃទី០២ ខែតុលា ឆ្នាំ២០២៥នេះ ទឹកទន្លេបានហក់ឡើងដល់កម្ពស់១៤.៤០ម៉ែត្រ ធៀបថ្ងៃម្សិលមិញ ទឹកទន្លេឡើងកម្ពស់០,១៤ម៉ែត្រ។ ដោយឡែកកម្ពស់ទឹកនាពេលនេះធៀបទៅឆ្នាំ២០២៤ ទឹកទន្លេមានកម្ពស់ ១៣,០៦ម៉ែត្រ ខណៈដែលចំណុចប្រកាសប្រុងប្រយ័ត្នមានកម្ពស់១៥,២០ម៉ែត្រ។

នៅក្នុងស្ថានភាពទឹកទន្លេកំពុងហក់ឡើងជាបន្តបន្ទាប់បែបនេះ ប្រជាពលរដ្ឋបានលើកឡើងថា ទឹកឆ្នាំ២០២៥នេះឡើងធំគ្រាន់បើ ដែលមិននឹកស្មានដល់ ហើយក៏កំពុងបារម្មណ៍ពីសុវត្ថិភាពផងដែរ៕

The post ទឹកទន្លេមេគង្គកំពង់ចាមបន្តហក់ឡើងបណ្ដាលឲ្យប៉ះពាល់ផ្លូវ និងផ្ទះពលរដ្ឋមួយចំនួន appeared first on Kampuchea Thmey Daily.

ទឹកទន្លេមេគង្គកំពង់ចាមបន្តហក់ឡើងជាលើកទី៣

Sokhom Khon — Mon, 29 Sep 2025 04:35:09 +0000

ស្ថានភាពទឹកទន្លេមេគង្គខេត្តកំពង់ចាម បានបន្តហក់ឡើងជាច្រើនថ្ងៃជាប់ៗគ្នា ដែលការហក់ឡើងលើកទី៣នេះមានកម្ពស់ខ្ពស់ជាងការឡើងលើកទី១ និងលើកទី២។ ដោយឡែកបើយោងលោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានបញ្ជាក់ថា ចំពោះស្ថានភាពទឹកទន្លេមេគង្គខេត្តកំពង់ចាម នៅថ្ងៃទី២៩ ខែកញ្ញា ឆ្នាំ២០២៥នេះ ទឹកទន្លេបានហក់ឡើងដល់កម្ពស់១៣.៨៨ម៉ែត្រ ធៀបថ្ងៃម្សិលមិញ ទឹកទន្លេឡើងកម្ពស់០,៣៨ម៉ែត្រ។

តាមការបញ្ជាក់របស់ប្រធានមន្ទីរធនធានទឹក កម្ពស់ទឹកនាពេលនេះធៀបទៅឆ្នាំ២០២៤ ទឹកទន្លេមានកម្ពស់ ១៣,៨៨ម៉ែត្រដូចគ្នា ខណៈដែលចំណុចប្រកាសប្រុងប្រយ័ត្នមានកម្ពស់១៥,២០ម៉ែត្រ។ ដោយឡែកចំពោះស្ថានភាពអាកាសធាតុកាលពីម្សិលមិញ គឺមានភ្លៀងធ្លាក់តិច ទៅច្រើនក្នុងស្រុកកុ្រងចំនួន៨នៃខេត្តកំពង់ចាម៕

អត្ថបទ៖ ឡេក ចាន់ពេជ្រ

The post ទឹកទន្លេមេគង្គកំពង់ចាមបន្តហក់ឡើងជាលើកទី៣ appeared first on Kampuchea Thmey Daily.

ទឹកទន្លេមេគង្គហក់ឡើងលិចផ្លូវបេតុងមួយខ្សែក្នុងឃុំទន្លេបិទ

Sokhom Khon — Wed, 30 Jul 2025 06:56:26 +0000

កម្ពស់ទឹកទន្លេមេគង្គបន្តហក់ឡេីងជាបន្តបន្ទាប់បណ្តាលឲ្យផ្លូវបេតុងមួយខ្សែដែលភ្ជាប់ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ទៅស្រុកកោះសូទិន ខេត្តកំពង់ចាម ត្រូវបានជន់លិចនៅព្រឹកថ្ងៃទី៣០ ខែកក្កដា ឆ្នាំ២០២៥នេះ។ ផ្លូវនេះត្រូវបានជន់លិចនៅចំណុចភូមិទួលគរ ឃុំទន្លេបិទ ដែលមិនអាចឲ្យប្រជាពលរដ្ឋធ្វេីដំណេីរឆ្លងកាត់តាមរថយន្ត ឬម៉ូតូបានទៀតទេ។

ចំពោះទឹកទន្លេមេគង្គជន់លិចផ្លូវបេតុងនៅចំណុចភូមិទួលគរ ឃុំទន្លេបិទ ស្រុកត្បូងឃ្មុំនេះ បេីសិនប្រជាពលរដ្ឋមានបំណងទៅស្រុកកោះសូទិន ខេត្តកំពង់ចាម អាចធ្វេីដំណេីរវាងទៅតាមផ្លូវសែន តស៊ូ ស្រុកអូរាំងឪ ជំនួសវិញ។

គូសបញ្ជាក់ថា យោងតាមរបាយការណ៍កម្ពស់ទឹកពីមន្ទីរធនធានទឹក និងឧត្តុនិយមខេត្តកំពង់ចាម បានបញ្ជាក់ថា នៅថ្ងៃទី៣០ ខែកក្តដា ឆ្នាំ២០២៥នេះ កម្ពស់ទឹកទន្លេមេគង្គបានឡើងដល់កម្ពស់១២.៤២ម៉ែត្រ បេីធៀបថ្ងៃដដែល ឆ្នាំមុន កម្ពស់ទឹកទន្លេមេគង្គកំពង់ចាម មានកម្ពស់១២.២៨ម៉ែត្រ ហេីយកម្រិតដែលត្រូវប្រកាសឲ្យប្រុងប្រយ័ត្នសម្រាប់ខេត្តកំពង់ចាម-ត្បូងឃ្មុំ គឺកម្ពស់១៥.២០សង់ទីម៉ែត្រ៕

អត្ថបទ៖ ឡេក ចាន់ពេជ្រ

The post ទឹកទន្លេមេគង្គហក់ឡើងលិចផ្លូវបេតុងមួយខ្សែក្នុងឃុំទន្លេបិទ appeared first on Kampuchea Thmey Daily.

ខេត្ត Nakhon Phanom របស់ថៃប្រកាសអាសន្ន ខណៈទឹកទន្លេមេគង្គហក់ឡើងដល់កម្រិតគ្រោះថ្នាក់

Bun sopheap — Sun, 27 Jul 2025 08:12:17 +0000

ទឹកទន្លេមេគង្គក្នុងខេត្ត Nakhon Phanom ប្រទេសថៃបានឡើងដល់ ១០,៧០ ម៉ែត្រខ្វះតែ ១,៣ ម៉ែត្រប៉ុណ្ណោះនឹងដល់កម្រិតគ្រោះថ្នាក់ខ្លាំងនៅ ១២ ម៉ែត្រដែលនឹងបង្កការជន់លិចធ្ងន់ធ្ងរ។ នេះបើយោងតាមការចេញផ្សាយរបស់សារព័ត៌មានBangkok Post នៅថ្ងៃទី២៧ខែកក្កដានេះ។

ទឹកទន្លេហក់ឡើងលិចផ្ទះពលរដ្ឋក្បែរទន្លេក្នុងខេត្ត Nakhon Phanom (រូបភាព៖ Bangkok Post)

បើទឹកទន្លេឡើងលើស១២ម៉ែត្រ ទឹកអាចហូរចូលដល់ទីប្រជុំជនតាមប្រឡាយលូ ដែលធ្វើឱ្យផ្ទះសម្បែង និងអាជីវកម្មប្រឈមនឹងហានិភ័ ។ អាជ្ញាធរថៃកំពុងចាត់វិធានការយ៉ាងឆាប់រហ័ស ដើម្បីបញ្ឈប់ការជន់លិចដែលអាចកើតមានតាមរយៈការប្រើម៉ាស៊ីនបូមទឹក និង បើកបង្ហូរទឹក ខណៈទឹកទន្លេបន្តកើនឡើងពី ២០ ទៅ ៣០សង់ទីម៉ែត្រជារៀងរាល់ថ្ងៃ។

កម្ពស់ទឹកឡើងខ្ពស់បានបានធ្វើឱ្យដៃទន្លេចំនួនពីរគឺNam Oun និង Nam Songkhram ដែលជាប់នឹងទន្លេមេគង្គហូរហៀរ។ ប្រការនេះបានជន់លិចវាលស្រែជាង ២០,០០០រ៉ៃ (ប្រហែល ៣,២០០ ហិកតា) នៅក្នុងស្រុក Sri Songkhram ។

ទឹកជំនន់ក្នុងខេត្ត Nan

អាជ្ញាធរធារាសាស្ត្រថៃកំពុងធ្វើកាពេញម៉ោងដើម្បីបញ្ចេញទឹកចេញពីទ្វារទឹកធំៗ និងកាត់បន្ថយសម្ពាធទឹកជន់ មុននឹងមានភ្លៀងធ្លាក់ខ្លាំងនៅប៉ុន្មានថ្ងៃខាងមុខ។

គួរបញ្ជាក់ក្នុងរយៈពេលប៉ុន្មានថ្ងៃមកនេះប្រទេសថៃបានជួបនឹងបញ្ហាអាកាសធាតុញឹកញាប់ ដូចជាធ្លាក់ភ្លៀងខ្លាំង ខ្យល់បក់ខ្លាំងនិងទឹកជំនន់ ក្នុងនោះខេត្ត Nan របស់ប្រទេសថៃរងគ្រោះទឹកជំនន់ធ្ងន់ធ្ងរជាងគេ ខណៈក៏នឹងមានការព្យាករថានឹងមានព្យុះថ្មីបកកាត់ប្រទេសថៃផងដែរ៕

អត្ថបទ៖ ប៊ុន សុភាព

The post ខេត្ត Nakhon Phanom របស់ថៃប្រកាសអាសន្ន ខណៈទឹកទន្លេមេគង្គហក់ឡើងដល់កម្រិតគ្រោះថ្នាក់ appeared first on Kampuchea Thmey Daily.

អភិបាលខេត្តកំពង់ចាម ស្នើអាជ្ញាធរពាក់ព័ន្ធបង្កើនការផ្សព្វផ្សាយពីបញ្ហា ទឹកជំនន់ទន្លេមេគង្គ ដល់ប្រជាពលរដ្ឋ

អ៊ិន ពិសី — Thu, 17 Jul 2025 07:42:14 +0000

លោកអភិបាលខេត្តកំពង់ចាម បានស្នើដល់អាជ្ញាធរ និងសមត្ថកិច្ចពាក់ព័ន្ធ បង្កើនការផ្សព្វផ្សាយដល់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ឲ្យបង្កើនការប្រុងប្រយ័ត្នខ្ពស់ចំពោះទឹកជំនន់ទន្លេមេគង្គ។

ការស្នើនេះ ក្នុងកិច្ចប្រជុំវាយតម្លៃលទ្ធផលការងារការអនុវត្តគោលនយោបាយភូមិ ឃុំ សង្កាត់ មានសុវត្ថិភាព ប្រចាំឆមាសទី ១ និងលើកទិសដៅអនុវត្តបន្ត កាលពីថ្ងៃទី ១៦ កក្កដា ម្សិលមិញនេះ ខណៈ លោក អ៊ុន ចាន់ដា អភិបាលខេត្តកំពង់ចាម បានលើកឡើងពីការត្រៀមបង្ការគ្រោះទឹកជំនន់ទន្លេមេគង្គ។

នាឱកាសនោះ លោក អ៊ុន ចាន់ដា បានកត់សម្គាល់ថា ក្នុងឆ្នាំ ២០២៥ នេះ ទឹកទន្លេមេគង្គ បានហក់ឡើងយ៉ាងគំហុក ខ្ពស់ជាងឆ្នាំមុន។

លោក អ៊ុន ចាន់ដា បានរំឭកថា នៅរដូវវស្សា ខេត្តកំពង់ចាម ដែលស្ថិតនៅជាប់ដងទន្លេមេគង្គ តែងរងគ្រោះដោយសារទឹកជំនន់ទន្លេមេគង្គ។ ក្នុងនោះ ដើម្បីទប់ស្កាត់ផលប៉ះពាល់ដល់ការរស់នៅរបស់ប្រជាពលរដ្ឋ លោក បានបញ្ជាឲ្យសមត្ថកិច្ចមូលដ្ឋាន ចុះពិនិត្យជាប្រចាំនូវតំបន់ងាយរងគ្រោះ រាប់ចេញពីស្រុកស្ទឹងត្រង់ រហូតដល់ស្រុកកងមាស-ស្រុកស្រីសន្ធរ ដែលជាមុខសញ្ញាត្រូវសង្គ្រោះ។ បើតាម លោកអភិបាលខេត្តកំពង់ចាម អាជ្ញាធរ ត្រូវណែនាំដល់ប្រជាពលរដ្ឋឲ្យត្រៀមបង្ការ និងរកទីទួលមានសុវត្ថិភាពសម្រាប់ពួកគាត់។

លោកសង្កត់ធ្ងន់ថា អាជ្ញាធរ ត្រូវត្រៀមកម្លាំង និងក្រុមឆ្លើយតប ដើម្បីសង្គ្រោះបន្ទាន់ ក្នុងករណីមានការទំនាក់ទំនងពីប្រជាពលរដ្ឋ។ បើតាមការកត់សម្គាល់ ឆ្នាំនេះ ទឹកទន្លេមេគង្គ បានហក់ឡើងយ៉ាងគំហុក ខ្ពស់ជាងឆ្នាំមុន ដែលបង្កការព្រួយបារម្ភដល់សុវត្ថិភាពពលរដ្ឋរស់នៅជាប់ទន្លេមេគង្គ៕

អត្ថបទ និង រូបភាព ៖ ឡេក ចាន់ពេជ្រ

The post អភិបាលខេត្តកំពង់ចាម ស្នើអាជ្ញាធរពាក់ព័ន្ធបង្កើនការផ្សព្វផ្សាយពីបញ្ហា ទឹកជំនន់ទន្លេមេគង្គ ដល់ប្រជាពលរដ្ឋ appeared first on Kampuchea Thmey Daily.

អភិបាលខេត្តកំពង់ចាម ដឹកនាំមន្ត្រីជំនាញ ពិនិត្យស្ថានភាពទឹកជំនន់ទន្លេមេគង្គ នៅស្រុកកំពង់សៀម និងស្រុកស្ទឹងត្រង់

អ៊ិន ពិសី — Mon, 30 Sep 2024 01:56:55 +0000

កាលពីព្រឹកថ្ងៃទី ២៩ ខែកញ្ញា ឆ្នាំ ២០២៤ លោក អ៊ុន ចាន់ អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត អមដំណើរដោយ លោកអភិបាលរងខេត្ត និងសហការីជាច្រើននាក់ បានចុះពិនិត្យស្ថានភាពទឹកជំនន់ទន្លេមេគង្គ និងស្ថានភាពរស់នៅរបស់ប្រជាពលរដ្ឋនៅស្រុកកំពង់សៀម និងស្រុកស្ទឹងត្រង់។

បើតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តកំពង់ចាមបានឲ្យដឹងថា គិតត្រឹមថ្ងៃទី ២៩ កញ្ញា ទឹកទន្លេមេគង្គ បានស្រក ០,៤០ ម៉ែត្រ ស្ថិតនៅកម្ពស់ ១៣,៨៨ ម៉ែត្រ បើធៀបនឹងថ្ងៃម្សិលម្ង៉ៃ។ ទោះយ៉ាងណា កម្ពស់ទឹកជំនន់ នាឆ្នាំនេះ បានធ្វើឲ្យប៉ះពាល់បាក់ច្រាំងទន្លេ ប្រវែង ១០.៤៤៧ ម៉ែត្រ ក្នុងស្រុក ចំនួន ៥ នៃខេត្តកំពង់ចាម លិចផ្លូវថ្នល់ ប្រវែង ៣៧.៣២៣ ម៉ែត្រ ក្នុងនោះ ផ្លូវដីប្រវែង ២២.៤៨៩ ម៉ែត្រ បេតុងប្រវែង ១៤.៣២០ ម៉ែត្រ ផ្លូវកៅស៊ូ ២៦០ ម៉ែត្រ។ លិចស្ពាន ០២ កន្លែង សាលារៀន ១៣ កន្លែង វត្តអារាម ០៧ វត្ត ផ្ទះសម្បែង ២៦ ខ្នង។ ប៉ះពាល់ផលដំណាំស្រូវ ២.៩២៥,៩០ ហិតា ពោត ចំនួន ២៣៨,៤០ ហិតា ដំណាំផ្សេងៗ សរុបចំនួន ៥២៧,០៩ ហិតា។ ករណីលង់ទឹកមាន ០៣ ករណី ស្លាប់មនុស្ស ០៣ នាក់។ ដោយឡែក ក្នុងចំណោមឃុំទាំង ០៩ របស់ស្រុកកំពង់សៀម មានឃុំលិចលង់ទឹក ចំនួន ០៧ ធ្វើឲ្យប៉ះពាល់ប្រជាពលរដ្ឋចំនួន ៦៥២ គ្រួសារ ខូចខាតដំណាំពោត ៣៧២ ហិតា ស្រូវ ២.០៩៥ ហិតា ដំណាំរួមផ្សំ ០៦ ហិតា ផ្លូវបេតុង ១២ ម៉ែត្រ បាក់ស្រុតច្រាំងប្រវែង ៥.៩៩៤ ម៉ែត្រ និងខូចខាតហេដ្ឋារចនាសម្ព័ន្ធជាច្រើនទៀត។ ចំពោះ ស្រុកស្ទឹងត្រង់ វិញ មានឃុំចំនួន ០៧ ក្នុងចំណោមឃុំទាំង ១២ ទទួលរងផលប៉ះពាល់ទឹកជំនន់ ដែលមានប្រជាពលរដ្ឋ ចំនួន ២.៧៩៣ គ្រួសារ ប៉ះពាល់វិស័យកសិកម្ម ចំនួន ៦៥៩,៦៣ ហិតា និងដំណាំរួមផ្សំផ្សេងៗ ទៀត ចំនួន ៥៣,៥០ ហិតា ផងដែរ។

នាឱកាសនោះ លោក អ៊ុន ចាន់ដា បានមានប្រសាសន៍ថា នាប៉ុន្មានថ្ងៃនេះ ទឹកជំនន់ទន្លេមេគង្គ បានហក់ឡើងកម្ពស់ ១៤.៣០ ម៉ែត្រ បណ្ដាលឲ្យប៉ះពាល់ដល់ស្រុក នៃខេត្តកំពង់ចាម ចំនួន ៥ នៅតាមបណ្ដោយដងទន្លេមេគង្គ គឺ ៖ ស្រុកស្ទឹងត្រង់ កំពង់សៀម កងមាស កោះសូទិន និងស្រុកស្រីសន្ធរ។

ទោះមកដល់ពេលនេះស្ថានភាពទឹកបានស្រកបន្តិចហើយក្ដី លោកអភិបាលខេត្ត បានដាក់វិធានការដល់អាជ្ញាធរ និងស្ថាប័នពាក់ព័ន្ធ ឲ្យបន្តការយកចិត្តទុកដាក់ខ្ពស់ ៖ ទី១.តាមដានស្ថានភាពអាកាសធាតុ និងស្ថានភាពទឹកជំនន់។ ទី២.អាជ្ញាធរមូលដ្ឋាន ត្រូវសហការជាមួយ មន្ទីរកសិកម្ម រុក្ខាប្រមាញ់ និងនេសាទ ចុះសិក្សាលម្អិតទៅលើផលប៉ះពាល់ និងទំហំ នៃការខូចខាតនានា ដើម្បី រាយការណ៍ជូនថ្នាក់ដឹកនាំ។ និងទី៣.ត្រូវធ្វើរបាយការណ៍ នៃទំហំខូចខាតនៅតាមបណ្ដាស្រុក ដែលទទួលរងផលប៉ះពាល់ ឲ្យបានលឿនបំផុត ដើម្បីស្នើសុំជួយអន្តរាគមន៍ពីប្រមុខរាជរដ្ឋាភិបាល គណៈកម្មាធិការជាតិគ្រប់គ្រងគ្រោះមហន្តរាយ និងក្រសួងមហាផ្ទៃ ផងដែរ។

សូមជម្រាបដែរថា នាឱកាសដែល លោកអភិបាលខេត្តកំពង់ចាម និងសហការី អមដំណើរ ចុះបំពេញបេសកកម្មនៅក្នុងភូមិសាស្ត្រស្រុកទាំង ២ ខាងលើនេះដែរ ថ្នាក់ដឹកនាំខេត្ត ក៏បានអញ្ជើញជួប និងនាំយកអំណោយជាគ្រឿងឧបភោគ បរិភោគ របស់ សម្ដេចមហាបវរធិបតី ហ៊ុន ម៉ាណែត ចែកជូនពលរដ្ឋ ១ គ្រួសារ រស់នៅភូមិរអាងក្រោម ឃុំរអាង ស្រុកកំពង់សៀម ដែលទទួលរងគ្រោះ ដោយសារទឹកហូរ បណ្ដាលឲ្យរលើងផ្ទះហូរតាមទឹក។

ជាមួយនោះ លោក អ៊ុន ចាន់ដា ក៏បន្តដំណើរចុះពិនិត្យដំណាំរួមផ្សំរបស់ប្រជាពលរដ្ឋដែលទទួលរងការលិចលង់ស្ថិតនៅភូមិត្នោតទន្សាយ និងអញ្ជើញសំណេះសំណាល ចែកអំណោយកាកបាទក្រហមជូនប្រជាពលរដ្ឋ ចំនួន ០៦ គ្រួសារ ដែលទទួលរងគ្រោះដោយសារខ្យល់កន្ត្រាក់ ស្ថិតនៅអូរប្រាំ នៃឃុំព្រែកកក់ ស្រុកស្ទឹងត្រង់។

ដោយឡែកដើម្បីស្វែងយល់អំពីស្ថានភាព ជីវភាពរស់នៅរបស់ប្រជាពលរដ្ឋ លោកអភិបាលខេត្ត និងសហការី អមដំណើរ ក៏បានអញ្ជើញចុះពិនិត្យស្ថានភាពទឹកលិចផ្ទះរបស់ប្រជាពលរដ្ឋនៅភូមិព្រែកសង្កែ និងបន្តដំណើរពិនិត្យមើលស្រូវលិចទឹក ស្ថិតនៅភូមិដីលើ ក្នុងឃុំពាមកោះស្នា នៃស្រុកស្ទឹងត្រង់ ផងដែរ៕

អត្ថបទ និង រូបភាព ៖ ឡេក ចាន់ពេជ្រ

The post អភិបាលខេត្តកំពង់ចាម ដឹកនាំមន្ត្រីជំនាញ ពិនិត្យស្ថានភាពទឹកជំនន់ទន្លេមេគង្គ នៅស្រុកកំពង់សៀម និងស្រុកស្ទឹងត្រង់ appeared first on Kampuchea Thmey Daily.

ចាប់ពីថ្ងៃនេះដល់ថ្ងៃ២៨កញ្ញា កម្ពុជាមានភ្លៀងតិចបំផុត ខណៈទឹកទន្លេសាប និងទន្លេបាសាក់កំពុងហក់ឡើង

Sokhom Khon — Thu, 26 Sep 2024 00:27:01 +0000

បន្ទាប់ពីរងឥទ្ធិពលសម្ពាធទាបពីព្យុះ និងខ្យល់មូសុងនិរតីជាច្រើនថ្ងៃកន្លងមកនេះ កម្ពុជា នឹងមានភ្លៀងធ្លាក់តិចបំផុតនៅតាមបណ្ដារាជធានី ខេត្តមួយចំនួនចាប់ពី១៥% ដល់៤០% គិតពីថ្ងៃទី២៦ ដល់ថ្ងៃទី២៨ ខែកញ្ញានេះ ខណៈស្ថានភាពទឹកទន្លេមេគង្គបានស្រកចុះជាបណ្ដើរៗ រីឯទឹកទន្លេសាប និងទន្លេបាសាក់ ទឹកបាននិងកំពុងឡើងបន្តិចបន្តួច។

តាមការប្រកាសរបស់ក្រសួងធនធានទឹក និងឧតុនិយម បានឲ្យដឹងនៅព្រឹកថ្ងៃទី២៦កញ្ញា នេះថា ខ្យល់មូសុងនិរតី ដែលបក់លើសមុទ្រអានដាមម៉ែន (Andaman Sea) សមុទ្រចិនខាងត្បូង បានថយឥទ្ធិពល ខណៈសម្ពាធទាបនៅបន្តគ្របដណ្តប់លើ ភាគកណ្តាល នៃអាងទន្លេមេគង្គ និងលើព្រះរាជាណាចក្រកម្ពុជា។

ស្ថានភាពបែបនេះ ចាប់ពីថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៤ នឹងធ្វើឱ្យតំបន់វាលទំនាប មានសីតុណ្ហភាពមធ្យមអប្បបរមា២៣°Cនិងសីតុណ្ហភាពមធ្យមអតិបរមា៣៤°C។ ខ្យល់បក់មក ពីទិសឦសាន និងបូព៌ មានល្បឿនមធ្យម ៣,៥ម៉ែត្រ វិនាទី។ ខេត្តបន្ទាយមានជ័យ បាត់ដំបង ពោធិ៍សាត់ សៀមរាប កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី ៤០%។

តំបន់ខ្ពង់រាប មានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៣°C។ ខ្យល់បក់មកពីទិសឦសាន និងបូព៌ មានល្បឿនមធ្យម ៣ម៉ែត្រ វិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងជួរភ្នំដងរែក អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់គ្របដណ្តប់លើផ្ទៃដី៣០%។

តំបន់មាត់សមុទ្រ មានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៣°C ។ ខ្យល់បក់ មកពីទិសអាគ្នេយ៍មានល្បឿនមធ្យម ២,៥០ម៉ែត្រ វិនាទី។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើផ្ទៃដី១៥%។ រលកសមុទ្រមានកម្ពស់មធ្យមអប្បបរមា០,៥០ម៉ែត្រ និងកម្ពស់មធ្យមអតិបរមា១,២៥ ម៉ែត្រ៕

តាមការព្យាករណ៍ព្រឹត្តិបត្រព័ត៌មានកម្ពស់ទឹក របស់ក្រសួងធនធានទឹក និងឧតុនិយម ដដែលបង្ហាញថា គិតត្រឹមម៉ោង ៧ព្រឹក ថ្ងៃទី២៦ ខែកញ្ញា ឆ្នាំ២០២៤ ស្ថានភាពទឹកទន្លេ នៅតាមបណ្ដាស្ថានីយជលសាស្ត្រ ទន្លេមេគង្គផ្នែកខាងលើបានចាប់ផ្ដើមស្រកជាបណ្តើរៗ រីឯទឹកទន្លេសាប និងទន្លេបាសាក់ ទឹកបាននិងកំពុងឡើងបន្តិចបន្តួច៕

The post ចាប់ពីថ្ងៃនេះដល់ថ្ងៃ២៨កញ្ញា កម្ពុជាមានភ្លៀងតិចបំផុត ខណៈទឹកទន្លេសាប និងទន្លេបាសាក់កំពុងហក់ឡើង appeared first on Kampuchea Thmey Daily.

ទន្លេមេគង្គ Archives - Kampuchea Thmey Daily

ទឹកទន្លេមេគង្គកំពង់ចាមបន្តហក់ឡើងបណ្ដាលឲ្យប៉ះពាល់ផ្លូវ និងផ្ទះពលរដ្ឋមួយចំនួន

ទឹកទន្លេមេគង្គកំពង់ចាមបន្តហក់ឡើងជាលើកទី៣

ទឹកទន្លេមេគង្គហក់ឡើងលិចផ្លូវបេតុង​មួយខ្សែក្នុងឃុំទន្លេបិទ

ខេត្ត Nakhon Phanom របស់ថៃប្រកាស​អាសន្ន​ ខណៈ​ទឹកទន្លេមេគង្គ​ហក់ឡើងដល់កម្រិតគ្រោះថ្នាក់

ចាប់ពីថ្ងៃនេះដល់ថ្ងៃ២៨កញ្ញា កម្ពុជាមានភ្លៀងតិចបំផុត ខណៈទឹកទន្លេសាប និង​ទន្លេបាសាក់កំពុងហក់ឡើង

ទឹកទន្លេមេគង្គហក់ឡើងលិចផ្លូវបេតុងមួយខ្សែក្នុងឃុំទន្លេបិទ

ខេត្ត Nakhon Phanom របស់ថៃប្រកាសអាសន្ន ខណៈទឹកទន្លេមេគង្គហក់ឡើងដល់កម្រិតគ្រោះថ្នាក់

ចាប់ពីថ្ងៃនេះដល់ថ្ងៃ២៨កញ្ញា កម្ពុជាមានភ្លៀងតិចបំផុត ខណៈទឹកទន្លេសាប និងទន្លេបាសាក់កំពុងហក់ឡើង