ទិវារត់ពាក់កណ្តាលម៉ារ៉ាតុងអន្តរជាតិអង្គរ Archives - Kampuchea Thmey Daily

លោក ស៊ុន ចាន់ថុល «អ្នកចូលរួមពី ៨៦ ប្រទេស ថ្ងៃនេះយើងនិយាយភាសាតែមួយគឺភាសាកីឡា និងមិត្តភាព»

chean virakbot — Mon, 08 Dec 2025 03:16:48 +0000

ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី៣០ បានធ្វើកាលពីព្រឹកថ្ងៃអាទិត្យ ទី៧ ខែធ្នូ ឆ្នាំ២០២៥ នៅមុខប្រាសាទអង្គរវត្ត ក្នុងខេត្តសៀមរាប ដែលមានអ្នកចូលរួមជាតិ និងអន្តរជាតិជិត ២ ម៉ឺននាក់ ក្រោមអធិបតីភាពលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ ឆ្នាំ ២០២៥ ត្រូវប្រារព្ធឡើងដើម្បីអបអរសាទរខួបលើកទី ៣០ របស់ខ្លួន បន្ទាប់ពីព្រឹត្តិការណ៍នេះបានរៀបចំលើកដំបូងកាលពីឆ្នាំ ១៩៩៦។ អ្នកចូលរួមជាតិ និងអន្តរជាតិដែលបានចុះឈ្មោះជាផ្លូវការប្រមាណ ១៦០០០នាក់ ប៉ុន្តែអ្នករត់ជាក់ស្តែងប្រហែលជាច្រើនជាងចំនួនដែលបានចុះឈ្មោះ ដោយសារមានអ្នកខ្លះប្រហែលជាទៅចូលរួមដោយមិនបានចុះឈ្មោះ។

វាជាកំណត់ត្រាថ្មីមិនធ្លាប់មានដែលមានអ្នកចូលរួមច្រើនបំផុតរហូតដល់ជាង ១៦០០០នាក់ ហើយប្រៀបធៀបកាលឆ្នាំ ២០២៤ គឺកើនឡើង ២៥%។

ថ្លែងក្នុងពិធីបើក លោកឧបនាយករដ្ឋមន្ត្រី ស៊ុន ចាន់ថុល បានលើកឡើងថា សម្រាប់ព្រឹត្តិការណ៍កីឡាទេសចរណ៍អង្គរលើកទី៣០នេះបានស្រួបទាញអ្នកចូលរួមចំនួន ១៦០០០នាក់ កើនឡើង ២៥% បើប្រៀបធៀបនឹងឆ្នាំ ២០២៤។ អត្តពលិកជាតិជាង ១៣០០០នាក់ និងជនបរទេសជាង ៣០០០នាក់។

«ខ្ញុំសូមស្វាគមន៍យ៉ាងកក់ក្តៅដល់អត្តពលិកជាតិ និងអន្តរជាតិដែលបានមកជួបជុំគ្នានៅទីនេះ ពេលនេះ។ ទោះបីជាយើងមកពីប្រទេសផ្សេងគ្នា និយាយភាសាខុសគ្នា ក៏ប៉ុន្តែថ្ងៃនេះ យើងនឹងនិយាយភាសាតែមួយគឺ ភាសាកីឡា និងភាសានៃមិត្តភាព»។ ប្រសាសន៍របស់លោក ស៊ុន ចាន់ថុល។

តាមការឲ្យដឹងពីលោក សែម ផល្លា នាយកម៉ារ៉ាតុងកម្ពុជា បានឲ្យដឹងថា គណៈកម្មការរៀបចំការប្រកួតបានបិទការចុះឈ្មោះមួយខែមុន ដោសារខ្វះសម្ភារគឺ មេដាយ អាវយឺត និងស្លាកលេខ ក៏ដូចជាសម្ភារជំនួយនៅលើដងផ្លូវរត់ផ្សេងៗ។ ប្រសិនបើបន្តឲ្យចុះឈ្មោះក្នុងរយៈពេលមួយខែចុងក្រោយ អ្នកចូលរួមប្រហែលជាអាចឈានដល់ ១៨០០០នាក់ ឬ ២០០០០នាក់ ប៉ុន្តែគណៈកម្មការមិនបានបើកការចុះឈ្មោះបន្តទេ ដោយសារត្រូវរៀបចំសម្ភារបន្ថែម ជាពិសេសមេដាយធ្វើនៅក្រៅប្រទេសដែលមិនអាចផលិតបានលឿនក្នុងរយៈពេលខ្លីទេ។

ក្រៅពីលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក៏មានការអញ្ជើញចូលរួមពីលោក Ueno Atsushi អគ្គរាជទូតជប៉ុនប្រចាំនៅកម្ពុជា លោកស្រី Arimori Yuko ប្រធានអង្គការបេះដូងមាស ដែលជាសហស្ថាបនិករៀបចំព្រឹត្តិការណ៍ពាក់កណ្តាលម៉ារ៉ាតុងអន្តរជាតិអង្គរ តាំងពីឆ្នាំ ១៩៩៦ លោកអភិខេត្តសៀមរាប រដ្ឋមន្ត្រីក្រសួងទេស ព្រមទាំងថ្នាក់ដឹកនាំជាច្រើនទៀត៕

អត្ថបទ៖ វីរបុត្រ

The post លោក ស៊ុន ចាន់ថុល «អ្នកចូលរួមពី ៨៦ ប្រទេស ថ្ងៃនេះយើងនិយាយភាសាតែមួយគឺភាសាកីឡា និងមិត្តភាព» appeared first on Kampuchea Thmey Daily.

ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរឆ្នាំនេះបំបែកកំណត់ត្រាមានអ្នកចូលរួមច្រើនជាងគេបង្អស់រយៈ ៣០ឆ្នាំនេះ

Sina Noun — Wed, 03 Dec 2025 02:16:52 +0000

លោក វាត់ ចំរើន ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរឆ្នាំ ២០២៥ នេះគឺបានបំបែកកំណត់ត្រាមានអ្នកចួលរួមច្រើនជាងគេបង្អស់ក្នុងរយៈពេល ៣០ឆ្នាំដែលបានរៀបចំកន្លងមកនេះ។

ទិដ្ឋភាពរត់កន្លងទៅ

លោក វាត់ ចំរើន អគ្គលេខាធិការ NOCC បានឲ្យដឹងថា ចំនួនអ្នកដែលចូលរួមគឺមានទៅដល់ ១៦០០០នាក់រាប់ទាំងខ្មែរ និងបរទេសដែលមកពី ៨៦ប្រទេសជុំវិញពិភពលោក។ កំណើននៃការចូលរួមនេះគឺបានធ្វើឲ្យបំបែកកំណត់ត្រាដែលមានអ្នកចូលរួមច្រើនជាងគេបង្អស់ក្នុងរយៈពេលនៃការរៀបចំមក ៣០ឆ្នាំនេះ។

ថ្នាក់ដឹកនាំផ្នែកកីឡារូបនេះបន្តទៀតថា កំណើននៃអ្នកចូលរួមនេះជាមោទកភាពមួយ និងមើលឃើញពីការរីកចម្រើនចំពោះការរៀបចំព្រឹត្តិការណ៍។ បន្ថែមពីនេះក៏បញ្ជាក់ពីសុខសន្តិភាព ការអភិវឌ្ឍន៍របស់ប្រទេសជាតិផងដែរ។ ព្រឹត្តិការណ៍រត់ប្រណាំងរយៈពេល ៣០ឆ្នាំនេះបានជួយដល់ធុរកិច្ចទេសចណ៍ និងប្រជាពលរដ្ឋប្រកបរបររកស៊ីមានជីវភាពកាន់តែប្រសើរឡើងដោយភាពសប្បាយរីករាយ។

ទិដ្ឋភាពរត់កន្លងទៅ

បញ្ជាក់ដែរថា ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ លើកទី៣០ នេះនឹងធ្វើឡើងនៅថ្ងៃទី៧ ខែធ្នូ ឆ្នាំ២០២៥ នៅឯខេត្តសៀមរាប។ អ្នកចុះឈ្មោះចូលរួមសរុបមាន ១៦០០០នាក់ និងមានបរទេសចំនួន ៣០០០នាក់មកពី៨៦ប្រទេសជុំវិញពិភពលោក៕

លោក វ៉ាត់ ចំរើន (រូបភាព NOCC)

អត្ថបទដោយ៖ នួន ស៊ីណា

The post ទិវារត់ប្រណាំងពាក់កណ្ដាលម៉ារ៉ាតុងអន្តរជាតិអង្គរឆ្នាំនេះបំបែកកំណត់ត្រាមានអ្នកចូលរួមច្រើនជាងគេបង្អស់រយៈ ៣០ឆ្នាំនេះ appeared first on Kampuchea Thmey Daily.

ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិនៅខេត្តសៀមរាប មានបរទេស ៣០០០នាក់មកពី ៨៦ប្រទេសលើពិភពលោក

Sina Noun — Sun, 30 Nov 2025 04:23:29 +0000

ព្រឹត្តិការណ៍រត់ប្រណាំងដ៏ល្បីប្រចាំនៅប្រទេសកម្ពុជា «ទិវារត់ប្រណាំងពាក់កណ្ដាលម៉ារ៉ាតុងអន្តរជាតិ» លើកទី៣០ នៅតំបន់អង្គរវត្ត មានអ្នកចុះឈ្មោះចូលរួមសរុប ១៦០០០នាក់ដោយក្នុងនោះមានបរទេស ៣០០០នាក់មកពី ៨៦ប្រទេសលើពិភពលោក។

ទិដ្ឋភាពរត់កន្លងទៅ

ខួបលើកទី៣០ នៃព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិ ប្រចាំឆ្នាំ២០២៥ នេះមានសន្ទុះអ្នកគាំទ្រ និងចុះឈ្មោះជាច្រើនរហូតដល់ទៅ ១៦០០០នាក់ឯណោះ។ ជាមួយគ្នានោះដែរគឺមានបរទេសចួលរួមចំនួន ៣០០០នាក់ដែលមកពី ៨៦ប្រទេសនៅជុំវិញពិភពលោក។

លោក វ៉ាត់ ចំរើន អគ្គលេខាធិការ នៃគណៈកម្មាធិការជាតិអូឡាំពិកកម្ពុជា ធ្លាប់លើកឡើងថាខួប ៣០ឆ្នាំនេះនឹងរៀបចំព្រឹត្តិការណ៍ឲ្យមានភាពអធិកអធមជាងរាល់ឆ្នាំដើម្បីជាការអបអរផង និងបង្កើនភាពសប្បាយរីករាយដល់អ្នកចូលរួមទាំងអស់គ្នាផង។ ព្រោះនេះជាការបញ្ជាក់ពីដំណើរការរៀបចំបានរហូតដល់ទៅ ៣០ឆ្នាំមកហើយជាមួយអ្នកស្រឡាញ់គាំទ្រវិស័យកីឡារត់ប្រណាំងតាំងពីដើមមក។

ចំណុចចេញដំណើរ

បញ្ជាក់ដែរថា ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី៣០ នៅថ្ងៃទី៧ ខែធ្នូ ឆ្នាំ ២០២៥ មានគឺមាន ១០ វិញ្ញាសារ។

ចម្ងាយ ២១ គ.ម រទេះពិការ (ទាំង បុរស និង នារី) ចេញដំណើរម៉ោង ៥:១៥នាទីព្រឹក
ចម្ងាយ ២១ គ.ម (ទាំង បុរស និង នារី) ចេញដំណើរម៉ោង ៥:៣០នាទីព្រឹក
ចម្ងាយ ១០ គ.ម (ទាំង បុរស និងនារី) ចេញដំណើរម៉ោង ៥:៤៥នាទីព្រឹក
ចម្ងាយ ៥ គ.ម (ទាំង បុរស និងនារី) ចេញដំណើរម៉ោង ៦:០០នាទីព្រឹក
ចម្ងាយ ៣ គ.ម (ទាំង បុរស និងនារី) ចេញដំណើរម៉ោង ៦:១០នាទីព្រឹក

The post ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិនៅខេត្តសៀមរាប មានបរទេស ៣០០០នាក់មកពី ៨៦ប្រទេសលើពិភពលោក appeared first on Kampuchea Thmey Daily.

អ្នកគ្មានស្លាកលេខ ឬមិនបានចុះឈ្មោះមិនអាចចូលរួមរត់ក្នុងព្រឹត្តិការណ៍ម៉ារ៉ាតុងអង្គរ ដើមខែធ្នូ

chean virakbot — Fri, 28 Nov 2025 02:58:32 +0000

ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី៣០ នឹងធ្វើនៅព្រឹកថ្ងៃអាទិត្យ ទី៧ ខែធ្នូ ឆ្នាំ ២០២៥ នៅមុខប្រាសាទអង្គរវត្តដោយអ្នកចូលរួមទាល់តែបានចុះឈ្មោះ និងប័ណ្ណលេខសម្គាល់ខ្លួនត្រឹមត្រូវទើបអាចចូលរួមបាន។

តាមសេចក្តីប្រកាសរបស់គណៈកម្មការម៉ារ៉ាតុងកម្ពុជាកាលពីថ្ងៃទី២៦ ខែវិច្ឆិកា ឆ្នាំ ២០២៥ បានចែងថា គណៈកម្មការរៀបចំការរត់ប្រណាំងនឹងមិនអនុញ្ញាតឲ្យអ្នកដែលមិនបានចុះឈ្មោះទុកជាមុន ឬគ្មានស្លាកលេខបំពាក់លើខ្លួន ចូលរួមរត់ប្រណាំងឡើយ។ គណៈកម្មការនឹងមានក្រុមការងារត្រួតពិនិត្យមុនពេលចេញដំណើរដើម្បីជៀសវាងបញ្ហាប៉ះពាល់ដល់ការរៀបចំ ទឹក ភេសជ្ជៈបំប៉នសុខភាពដល់អ្នកចូលរួមទាំងអស់ដែលបានចុះឈ្មោះពិតប្រាកដ។ ជាពិសេសការរក្សាសុវត្ថិភាព និងទិន្នន័យសំគាល់ខ្លួនជាចាំបាច់តាមរយៈ ស្លាកលេខរត់ (Race Bib) របស់កីឡាករ កីឡាការិនី នៅពេលដែលមានឧបទ្ទវហេតុចៃដន្យក្នុងពេលរត់ប្រណាំង។

ការប្រកាសរបស់គណៈកម្មការរៀបចំបែបនេះ បន្ទាប់ពីព្រឹត្តិការណ៍កន្លងមកក៏មានអ្នកមិនបានចុះឈ្មោះ ឬគ្មានស្លាកលេខសំគាល់ក៏បានចូលរួមច្រើនដែរដែលធ្វើឲ្យពិបាកក្នុងការគ្រប់គ្រង និងទិន្នន័យពិតប្រាកដនៃអ្នកចូលរួម។

អ្នកដែលបានចុះឈ្មោះទាំងអស់ត្រូវទៅទទួលយកសម្ភារៈសម្រាប់ការចូលរួមរត់នៅសណ្ឋាគារ ខនយ៉ាត តាមផ្លូវជាតិលេខ 6A ភូមិចុងកៅស៊ូ ឃុំស្លក្រាម ក្រុងសៀមរាប នៅថ្ងៃទី ៤ ដល់ ទី៦ ខែធ្នូ ចាប់ពីម៉ោង ៩ព្រឹកដល់ ម៉ោង ៦ល្ងាចជាកំហិត។

សម្រាប់ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិអង្គរ ឆ្នាំ ២០២៥ គឺពិសេសជាងឆ្នាំមុនៗ ដោយសារប្រារព្ធខួបលើកទី៣០ ដែលព្រឹត្តិការណ៍នេះបានដំណើរការ។ តាមការគ្រោងទុកប្រមុខថ្នាក់ដឹកនាំរាជរដ្ឋាភិបាលកម្ពុជាចូលរួម មន្ត្រីរាជការ អ្នកចូលរួមជាតិ និងអន្តរជាតិប្រមាណជាង ១៥០០០នាក់។

ព្រឹត្តិការណ៍រត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី៣០ នាថ្ងៃទី៧ ខែធ្នូ ឆ្នាំ ២០២៥ មាន ១០ វិញ្ញាសាគឺ ៥ វិញ្ញាសាសម្រាប់ភេទប្រុស និង ៥ វិញ្ញាសាសម្រាប់ភេទស្រី។

ចម្ងាយ ២១ គ.ម រទេះពិការ (ទាំង បុរស និង នារី) ចេញដំណើរម៉ោង ៥:១៥នាទីព្រឹក
ចម្ងាយ ២១ គ.ម (ទាំង បុរស និង នារី) ចេញដំណើរម៉ោង ៥:៣០នាទីព្រឹក
ចម្ងាយ ១០ គ.ម (ទាំង បុរស និងនារី) ចេញដំណើរម៉ោង ៥:៤៥នាទីព្រឹក
ចម្ងាយ ៥ គ.ម (ទាំង បុរស និងនារី) ចេញដំណើរម៉ោង ៦:០០នាទីព្រឹក
ចម្ងាយ ៣ គ.ម (ទាំង បុរស និងនារី) ចេញដំណើរម៉ោង ៦:១០នាទីព្រឹក

អត្ថបទ៖ វីរបុត្រ

The post អ្នកគ្មានស្លាកលេខ ឬមិនបានចុះឈ្មោះមិនអាចចូលរួមរត់ក្នុងព្រឹត្តិការណ៍ម៉ារ៉ាតុងអង្គរ ដើមខែធ្នូ appeared first on Kampuchea Thmey Daily.

ព្រឹត្តិការណ៍ពាក់កណ្ដាលម៉ារ៉ាតុងអន្តរជាតិអង្គរ មានសន្ទុះចុះឈ្មោះបានជាង ១ម៉ឺននាក់ហើយ

Sina Noun — Wed, 22 Oct 2025 03:13:01 +0000

ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ លើកទី៣០ នៅថ្ងៃទី៧ ខែធ្នូ ឆ្នាំ២០២៥ នេះមានសន្ទុះអ្នកចុះឈ្មោះបានប្រហែលជាង ១ម៉ឺននាក់ហើយ ខណៈអ្នករៀបចំថាចំនួនអ្នករត់នឹងកើនឡើងបន្តទៀត។

រូបភាពតំណាង (NOCC)

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា កាលពីឆ្នាំមុនដោយមានវត្តមានរបស់សម្ដេចបវរធិបតី ធ្វើឲ្យអ្នកចូលរួមរត់ក្នុងព្រឹត្តិការណ៍ពាក់ម៉ារ៉ាតុងអង្គរនេះមានរហូតដល់ជាង ១៤០០០នាក់ឯណោះ។

យ៉ាងណាឯកមកឆ្នាំនេះវិញសន្ទុះនៃការគាំទ្រក៏ច្រើនដូចគ្នា ពោលគិតមកដល់ពេលនេះមានអ្នកចុះឈ្មោះរត់បានប្រមាណជាង ១០០០០នាក់មកហើយក្នុងនោះបរទេសបានប្រហែល ៣០០០នាក់។ យ៉ាងណានៅមានអ្នកមិនទាន់បានចុះឈ្មោះច្រើនទៀត ដូច្នេះសូមរួសរាន់ឡើងដើម្បីឲ្យគណៈកម្មការរៀបចំងាយស្រួលដល់ការរៀបចំជាសម្ភាររត់ ឬមេដាយជាដើម។ ការចុះឈ្មោះយឺតពេលនាំគណៈកម្មការរៀបចំមិនធានាដល់ការរៀបចំឲ្យរលូន ឬបានល្អនោះទេ។

រូបភាពតំណាង (NOCC)

អ្នកជំនាញផ្នែកកីឡាខាងលើនេះបន្ថែមទៀតថា តាមការរំពឹងទុកសន្ទុះនៃការគាំទ្រនេះអាចនឹងឈានឡើងចំនួនអ្នករត់ដល់ ១៥០០០-១៦០០០នាក់ជាមិនខាន។ សូមរួសរាន់ចំពោះអ្នកចង់ចុះឈ្មោះចូលរួមព្រឹត្តិការណ៍រត់ប្រណាំងដ៏ធំប្រចាំឆ្នាំ ២០២៥ មួយនេះ។

បញ្ជាក់ដែរថា ពាក់កណ្ដាលម៉ារ៉ាតុងអន្តរជាតិអង្គរ គឺជាព្រឹត្តិការណ៍រត់ប្រណាំងដ៏ធំជាងគេនៅកម្ពុជា ក្នុងចំណោមព្រឹត្តិការណ៍រត់ប្រណាំងផ្សេងៗ។ ឆ្នាំនេះជាខួបលើកទី៣០ នៃព្រឹត្តិការណ៍រត់ប្រណាំងនេះផង ដូច្នេះការរៀបចំ និងកម្មវិធីកម្សាន្តនឹងរៀបចំឡើងកាន់តែពិសេសសម្រាប់អ្នកចូលរួម៕

រូបភាពតំណាង (NOCC)

អត្ថបទដោយ៖ នួន ស៊ីណា

The post ព្រឹត្តិការណ៍ពាក់កណ្ដាលម៉ារ៉ាតុងអន្តរជាតិអង្គរ មានសន្ទុះចុះឈ្មោះបានជាង ១ម៉ឺននាក់ហើយ appeared first on Kampuchea Thmey Daily.

ម៉ារ៉ាតុងអន្តរជាតិអង្គរវត្ត ខែធ្នូខាងមុខនេះនឹងបង្កើតកំណត់ត្រាថ្មីអ្នកចូលរួមច្រើនបំផុត

chean virakbot — Fri, 03 Oct 2025 05:18:34 +0000

ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិ អង្គរវត្ត លើកទី៣០ នឹងបង្កើតកំណត់ត្រាថ្មីនៃអ្នកចូលរួមច្រើនបំផុតមិនធ្លាប់មាន នៅមុខប្រាសាទអង្គរវត្ត ថ្ងៃទី៧ ខែធ្នូ ឆ្នាំ ២០២៥។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងនៅក្នុងសន្និសីទសារព័ត៌មានព្រឹកថ្ងៃទី៣ ខែតុលា ឆ្នាំ ២០២៥ ថា ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិ អង្គរវត្ត ចាប់ផ្តើមពីដំបូងកាលពីឆ្នាំ ១៩៩៦ គឺមានអ្នកចូលរួមប្រមាណ ៤០០ ទៅ ៥០០នាក់ប៉ុណ្ណោះ ប៉ុន្តែឥឡូវនេះឈានដល់ជាង ១ម៉ឺននាក់។ ជាក់ស្តែងកាលពីឆ្នាំ ២០២៤ មានអ្នកចូលរួមចំនួន ១៤០០០នាក់ ខណៈឆ្នាំ ២០២៥ មានអ្នកចុះឈ្មោះជិត ១ម៉ឺននាក់ហើយ ហើយកំពុងទទួលបានអ្នកចុះឈ្មោះជាបន្តបន្ទាប់ទៀតដែលអាចឈានដល់ជាង ១៥០០០នាក។

លោកមានប្រសាសន៍ថា ៖«ប៉ុន្មានឆ្នាំចុងក្រោយនេះ មានការប្រែប្រួលច្រើន ជាពិសេសកាលពីឆ្នាំមុន មានការចូលរួមរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រត់ចម្ងាយ ៥គីឡូម៉ែត្រ ហើយឆ្នាំនេះ សម្តេចធិបតីនឹងចូលរួមរត់ ១០គីឡូម៉ែត្រ ដូច្នេះសន្ទុះនៃការគាំទ្រកាន់តែខ្លាំង។ ឆ្នាំនេះ មកដល់ម៉ោងនេះ អ្នកចុះឈ្មោះជិត ១ម៉ឺននាក់ហើយ ទម្រាំដល់ថ្ងៃប្រកួតគឺអាចជាង ១៥០០០នាក់»។

លោកបង្ហើបថា ព្រឹត្តិការណ៍រត់ឆ្នាំនេះគឺជាខួបលើកទី៣០ នឹងមានកម្មវិធីពិសេសៗច្រើនធ្វើឲ្យមានការភ្ញាក់ផ្អើល ប៉ុន្តែមិនទាន់ទម្លាយឲ្យដឹងនៅពេលនេះទេ។

សម្រាប់អ្នកចុះឈ្មោះចូលរួមរត់នៅឆ្នាំ ២០២៥ នៅតែមានសន្ទុះចូលរួមច្រើនដដែលពីបណ្តាប្រទេសផ្សេងៗ បើទោះបីជាមានបញ្ហានៅព្រំដែនក៏ដោយ។ លោក វ៉ាត់ ចំរើន ប្រាប់ឲ្យដឹងថា ជនបរទេសមកពីតំបន់អឺរ៉ុប ជាពិសេសប្រទេសធំៗសុទ្ធតែមានអ្នកចុះឈ្មោះចូលរួមច្រើនដូចជា លេខ១ ចក្រភពអង់គ្លេស លេខ២ បារាំង និងលេខ៣ អាមេរិក ព្រមទាំងប្រទេសផ្សេងៗជាច្រើនទៀត ដូច្នេះបណ្តាប្រទេសនៅលើពិភពលោកនៅតែទុកចិត្តលើប្រទេសកម្ពុជា។

ចំណែកតំណាង ក្រុមហ៊ុន មេនូឡាយហ្វ៍ ខេមបូឌា បានលើកឡើងថា ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរវត្ត លើកទី៣០ នេះត្រូវបានកំណត់មូលបទ«រត់ដើម្បីយូរអង្វែង» ហើយក្រុមហ៊ុនបានប្តេជ្ញាបន្តឧបត្ថម្ភគាំទ្ររហូតដល់ ឆ្នាំ ២០៣០។

ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរនេះមាន៤វិញ្ញាសាគឺ មានចម្ងាយ២១គីឡូម៉ែត្រ ចម្ងាយ១០គីឡូម៉ែត្រ ចម្ងាយ៥គីឡូម៉ែត្រ និងរត់កម្សាន្ដ៣គីឡូម៉ែត្រ។

នៅពេលជាមួយគ្នានេះ គណៈកម្មការរៀបការបានប្រគល់ថវិកាសប្បុរសធម៌កាលពីឆ្នាំ ២០២៤ដល់ មន្ទីរពេទ្យកុមារគន្ធបុប្ផាទទួលបាន ៥០០០ដុល្លារ អង្គការ Cambodia Trust ទទួលបាន ២៥០០ដុល្លារ អង្គការជនពិការអន្តរជាតិ (Handicap International) ទទួលបាន ២០០០ដុល្លារ និង អង្គការបេះដូងមាសទទួលបាន ១០៥០០ដុល្លារ សម្រាប់បែងចែកបន្តដល់អង្គការសប្បុរសធម៌ចំនួន៦ផ្សេងទៀត៕

អត្ថបទ៖ វីរបុត្រ

The post ម៉ារ៉ាតុងអន្តរជាតិអង្គរវត្ត ខែធ្នូខាងមុខនេះនឹងបង្កើតកំណត់ត្រាថ្មីអ្នកចូលរួមច្រើនបំផុត appeared first on Kampuchea Thmey Daily.

លោក ថោង ខុន ថា អត្តពលិក ជឿជាក់ គាំទ្រចំណាត់ការរបស់រាជរដ្ឋាភិបាលកម្ពុជា

chean virakbot — Mon, 01 Sep 2025 03:36:33 +0000

ព្រឹត្តិការណ៍រត់ម៉ារ៉ាតុងអន្តរជាតិ ចក្រភពអង្គរ លើកទី១០ បានប្រព្រឹត្តទៅដោយរលូនកាលពីថ្ងៃអាទិត្យ ទី៣១ ខែសីហា ឆ្នាំ ២០២៥ នៅប្រាសាទអង្គរវត្ត ខេត្តសៀមរាប ដែលមានអ្នកចូលរួមជាតិ និងអន្តរជាតិជាង ៤០០០នាក់។

លោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា បានលើកឡើងថា ព្រឹត្តិការណ៍រត់ម៉ារ៉ាតុងអន្តរជាតិ ចក្រភពអង្គរ លើកទី១០ បានដំណើការទៅដោយរលូន និងជោគជ័យ ដោយសារប្រទេសជាតិមានសុខសន្តិភាព។

លោកមានប្រសាសន៍ថា ៖«អារម្មណ៍ស្ងប់ហើយ តែនៅមិនទាន់សុខស្រួលទេ ដោយសារបញ្ហាជាច្រើនត្រូវដោះស្រាយបន្តទៀត ប៉ុន្តែប្រជាពលរដ្ឋ បងប្អូនអត្តពលិកជឿជាក់រដ្ឋាភិបាល។ គាំទ្រចំណាត់ការរបស់រដ្ឋាភិបាល។ អ្វីៗកំពុងត្រូវបានដោះស្រាយជាបណ្តើរៗដែលគោរពទៅតាមច្បាប់អន្តរជាតិ។ ចំណុចនេះសំខាន់ណាស់ ខ្ញុំសូមគោរពអរគុណចំពោះស្មារតីរបស់ប្រជាពលរដ្ឋខ្មែរទាំងអស់»។

លោក ថោង ខុន បានបន្តថា ៖«កម្ពុជាទាំងមូលមានសុខសន្តិភាព ជាពិសេសនៅតំបន់ដែលយើងរត់គឺមានសុវត្ថិភាពពេញលេញ ដូច្នេះយើងឃើញថា អត្តពលិកជាតិក៏កើន អត្តពលិកអន្តរជាតិក៏កើន។ អ្វីដែលមានមោទនភាពដោយសារវិញ្ញាសាចម្ងាយ ៤២គីឡូម៉ែត្រ មានអត្តពលិកជាង ៥០០នាក់ ក្នុងនោះមានខ្មែរ ៣៧០នាក់។ ចម្ងាយ៤២គីឡូម៉ែត្រពិបាករត់ណាស់ តែយើងឃើញលទ្ធផលហើយគឺកីឡាករខ្មែរយកបានទាំងលេខ១ លេខ២ និងលេខ៣។ ការចូលរួមសកម្មភាពក្នុងវិស័យកីឡាពីមួយថ្ងៃទៅមួយថ្ងៃកាន់តែល្អ។ នេះដោយសារការដឹកនាំរបស់រាជរដ្ឋាភិបាល។ អ្វីដែលសំខាន់គឺប្រទេសយើងមានសុខសន្តិភាព។ បញ្ហានៅព្រំដែនប៉ះពាល់សតិអារម្មណ៍របស់បងប្អូនប្រជាពលរដ្ឋច្រើន ប៉ុន្តែយើងជឿជាក់លើការដឹកនាំរបស់ថ្នាក់ដឹកនាំ»។

តាមផែនការគ្រោងទុក ព្រឹត្តិការណ៍រត់ម៉ារ៉ាតុងអន្តរជាតិចក្រភពខ្មែរអង្គរ លើកទី១០ ត្រូវធ្វើនៅថ្ងៃអាទិត្យ ទី៣ ខែសីហា ប៉ុន្តែដោយសារមានជម្លោះដែនខ្មែរ-ថៃ ទើបត្រូវបានលើកពេលមកនៅថ្ងៃទី៣១ ខែសីហា ឆ្នាំ ២០២៥។ ទោះបីជាយ៉ាងណា កីឡាករ កីឡាការិនីបរទេសដែលបានចុះឈ្មោះជាង៣០០នាក់ នៅតែបានធ្វើដំណើរមកកម្ពុជាកាលពីដើមខែសីហា បើទោះបីជាកម្មវិធីត្រូវបានលើកពេល។

លោក ថោង ខុន បានបញ្ជាក់ថា កីឡាករ កីឡាការិនីអន្តរជាតិមួយចំនួនបានធ្វើដំណើរមកកម្ពុជា ដោយសារពួកគាត់កក់សំបុត្រយន្តហោះ និងសណ្ឋាគាររួចហើយ បើទោះបីជាលើកពេលក៏ដោយ។ ពួកគាត់មកទស្សនាប្រាសាទអង្គរ។ ក្នុងនាមជាម្ចាស់ផ្ទះ ក្រុមការងារក៏បានរៀបចំឲ្យពួកគាត់បានរត់កម្សាន្តក្រៅផ្លូវការចំនួន ៣៨០នាក់នៅខេត្តសៀមរាប។ ចាប់តាំងពីពេលនោះមកគឺរយៈពេលជិតមួយខែហើយដែលបានពន្យារពេល ប៉ុន្តែនៅតែនាំមនុស្សច្រើនមកចូលរួមរត់ម៉ារ៉ាតុងអន្តរជាតិចក្រភពអង្គរ លើកទី១០ នៅថ្ងៃទី៣១ ខែសីហា ឆ្នាំ២០២៥។

ទិវារត់ប្រណាំងម៉ារ៉ាតុងអន្ដរជាតិ ចក្រភពអង្គរ នេះរៀបចំឡើងដើម្បីទី១. រត់ដើម្បីសន្ដិភាព សាមគ្គីភាព និងភាពសុខសាន្ដរបស់ប្រជាពលរដ្ឋ ទី២-រត់ដើម្បីគាំទ្រ និងការពារបេតិកភណ្ឌរបស់មនុស្សជាតិ និងទី៣-រត់ដើម្បីជួយឧបត្ថម្ភគាំទ្រដល់វីរកងទ័ពជួរមុខ និងជនភៀសសឹក។ អ្នកចូលរួមចំនួន ៤២២៤ នាក់ ក្នុងនោះអត្តពលិកជាតិមានចំនួន ៣៤៦២នាក់ និងអត្តពលិកអន្តរជាតិ ចំនួន ៧៦២នាក់ មកពី ៤៧ប្រទេស លើវិញ្ញាសាចម្ងាយ ៤២គីឡូម៉ែត្រ, ២១គីឡូម៉ែត្រ, ១០គីឡូម៉ែត្រ និង ៣គីឡូម៉ែត្រ៕

អត្ថបទ៖ វីរបុត្រ

The post លោក ថោង ខុន ថា អត្តពលិក ជឿជាក់ គាំទ្រចំណាត់ការរបស់រាជរដ្ឋាភិបាលកម្ពុជា appeared first on Kampuchea Thmey Daily.

ព្រឹត្តិការណ៍រត់ម៉ារ៉ាតុងអន្តរជាតិចក្រភពអង្គរ ដើម្បីសន្តិភាព ធ្វើនៅថ្ងៃអាទិត្យនេះ

chean virakbot — Thu, 28 Aug 2025 03:51:41 +0000

ព្រឹត្តិការណ៍រត់ម៉ារ៉ាតុងអន្តរជាតិ ចក្រភពអង្គរ ដើម្បីសន្តិភាព នឹងធ្វើនៅថ្ងៃទី៣១ ខែសីហា ឆ្នាំ ២០២៥ នៅមុខប្រាសាទអង្គរវត្ត ខេត្តសៀមរាប។ ព្រឹត្តិការណ៍នេះរៀបចំឡើងដើម្បីបង្ហាញសារពីសុខសន្តិភាព និងសុខទុក្ខរបស់កងកម្លាំងការពារជួរមុខ ព្រមទាំងជនភៀសសឹក។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា កាលពីថ្ងៃទី១២ ខែសីហា ឆ្នាំ ២០២៥ ថា គោលបំណងសំខាន់៣សម្រាប់ព្រឹត្តិការណ៍រត់ម៉ារ៉ាតុងអន្តរជាតិចក្រភពខ្មែរអង្គរ។ ទី១ រៀបចំឡើងដើម្បីសុខសន្តិភាព ទី២ ដើម្បីការពារសម្បត្តិបេតិភ័ណ្ឌពិភពលោក និងទី៣ដើម្បីរួមចំណែកជួយដល់កម្លាំងកងទ័ពដែលកំពុងឈរជើងនៅជួរមុខ និងជនភៀសសឹក។

លោកបានលើកឡើងថា ៖«យើងរៀបចំនេះឡើងដើម្បីសុខសន្តិភាព ភាពសុខសាន្តរបស់ប្រជាពលរដ្ឋ។ ពីររត់ដើម្បីការពារបេតិកភ័ណ្ឌមនុស្សជាតិដែលកំពុងត្រូវបានខូចខាត និងទី៣ រត់ដើម្បីជួយឧបត្ថម្ភគាំទ្រដល់វីរជនកងទ័ពរបស់យើង និងប្អូនប្រជាពលរដ្ឋដែលជាជនភៀសសឹកពីជម្លោះព្រំដែន។ ខ្លឹមសារទាំង៣សំខាន់នេះគឺមិនមែនចេះដាក់ទេ ប៉ុន្តែសុទ្ធតែទទួលបានការណែនាំពីថ្នាក់ដឹកនាំដើម្បីសារឲ្យពិភពលោកបានឃើញ»។

ចំណែក លោក សែម ផល្លា នាយកម៉ារ៉ាតុងកម្ពុជា បានថ្លែងថា សូមបងប្អូនប្រជាពលរដ្ឋចូលរួមឲ្យបានច្រើនកុះករក្នុងព្រឹត្តិការណ៍រត់ម៉ារ៉ាតុងអន្តរជាតិចក្រភពខ្មែរអង្គរ។ ជាពិសេសសូមបងប្អូនកុំមានការព្រួយបារម្ភអ្វីទាំងអស់ ពីព្រោះគណៈកម្មការរៀបចំការប្រកួត និងអាជ្ញាធរគ្រប់លំដាប់ថ្នាក់បានរៀបចំយ៉ាងល្អក្នុងការធានាបានដល់អ្នកចូលរួមទទួលបានភាពកក់ក្តៅ និងសុខសុវត្ថិភាព។

លោកបានទទួចថា សូមបងប្អូនដែលចូលរួម កុំមានអារម្មណ៍ភិតភ័យដោយប្រការណាមួយ ប៉ុន្តែផ្ទុយទៅវិញ ការចូលរួមគឺជាកម្លាំងរួមចំណែកដើម្បីប្រទេសជាតិស្វែងរកសុខសន្តិភាព។

ព្រឹត្តិការណ៍រត់ម៉ារ៉ាតុងអន្តរជាតិចក្រភពអង្គរ នៅថ្ងៃទី៣១ ខែសីហា ឆ្នាំ ២០២៥ នៅមុខប្រាសាទអង្គរវត្តនឹងរំលេចសារសំខាន់ៗទាំងភាសាខ្មែរ និងភាសាអង់គ្លេសដើម្បីឲ្យពិភពលោកឃើញពីកម្ពុជាត្រូវការសុខសន្តិភាព។ ចំនួនអ្នកចុះឈ្មោះ ពលរដ្ឋខ្មែរប្រមាណជាង ៣០០០នាក់ និងជនបរទេស ប្រមាណ ១០០០នាក់ ដែលនឹងចូលរួមរត់នេះ៕

អត្ថបទ៖ វីរបុត្រ

The post ព្រឹត្តិការណ៍រត់ម៉ារ៉ាតុងអន្តរជាតិចក្រភពអង្គរ ដើម្បីសន្តិភាព ធ្វើនៅថ្ងៃអាទិត្យនេះ appeared first on Kampuchea Thmey Daily.

ទិវារត់ពាក់កណ្តាលម៉ារ៉ាតុងអន្តរជាតិអង្គរ Archives - Kampuchea Thmey Daily

លោក ស៊ុន ចាន់ថុល «អ្នក​ចូល​រួម​ពី ៨៦ ប្រទេស​ ថ្ងៃនេះយើង​​និយាយភាសា​តែ​មួយ​គឺ​ភាសា​កីឡា និង​មិត្តភាព»

ព្រឹត្តិការណ៍​ពាក់​កណ្ដាល​ម៉ារ៉ាតុង​អន្តរជាតិ​អង្គរ​ មាន​សន្ទុះ​ចុះឈ្មោះ​បាន​ជាង ១ម៉ឺននាក់ហើយ​

លោក ថោង ខុន ថា អត្តពលិក ជឿ​ជាក់ ​គាំទ្រចំណាត់​ការ​របស់​រាជ​រដ្ឋាភិបាល​កម្ពុជា

ព្រឹត្តិការណ៍​រត់​ម៉ារ៉ាតុង​អន្តរជាតិ​​ចក្រភព​អង្គរ ដើម្បី​សន្តិភាព ធ្វើនៅថ្ងៃអាទិត្យ​នេះ

លោក ស៊ុន ចាន់ថុល «អ្នកចូលរួមពី ៨៦ ប្រទេស ថ្ងៃនេះយើងនិយាយភាសាតែមួយគឺភាសាកីឡា និងមិត្តភាព»

ព្រឹត្តិការណ៍ពាក់កណ្ដាលម៉ារ៉ាតុងអន្តរជាតិអង្គរ មានសន្ទុះចុះឈ្មោះបានជាង ១ម៉ឺននាក់ហើយ

លោក ថោង ខុន ថា អត្តពលិក ជឿជាក់ គាំទ្រចំណាត់ការរបស់រាជរដ្ឋាភិបាលកម្ពុជា

ព្រឹត្តិការណ៍រត់ម៉ារ៉ាតុងអន្តរជាតិចក្រភពអង្គរ ដើម្បីសន្តិភាព ធ្វើនៅថ្ងៃអាទិត្យនេះ