កីឡា

ព្រឹត្តិការណ៍ពាក់កណ្ដាលម៉ារ៉ាតុងអន្តរជាតិអង្គរ មានសន្ទុះចុះឈ្មោះបានជាង ១ម៉ឺននាក់ហើយ

បានផុស

៩ ខែ មុន

នៅ

ថ្ងៃពុធ ២២ តុលា ២០២៥

ដោយ

ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងអន្តរជាតិអង្គរ លើកទី៣០ នៅថ្ងៃទី៧ ខែធ្នូ ឆ្នាំ២០២៥ នេះមានសន្ទុះអ្នកចុះឈ្មោះបានប្រហែលជាង ១ម៉ឺននាក់ហើយ ខណៈអ្នករៀបចំថាចំនួនអ្នករត់នឹងកើនឡើងបន្តទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពតំណាង (NOCC)

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា កាលពីឆ្នាំមុនដោយមានវត្តមានរបស់សម្ដេចបវរធិបតី ធ្វើឲ្យអ្នកចូលរួមរត់ក្នុងព្រឹត្តិការណ៍ពាក់ម៉ារ៉ាតុងអង្គរនេះមានរហូតដល់ជាង ១៤០០០នាក់ឯណោះ។

យ៉ាងណាឯកមកឆ្នាំនេះវិញសន្ទុះនៃការគាំទ្រក៏ច្រើនដូចគ្នា ពោលគិតមកដល់ពេលនេះមានអ្នកចុះឈ្មោះរត់បានប្រមាណជាង ១០០០០នាក់មកហើយក្នុងនោះបរទេសបានប្រហែល ៣០០០នាក់។ យ៉ាងណានៅមានអ្នកមិនទាន់បានចុះឈ្មោះច្រើនទៀត ដូច្នេះសូមរួសរាន់ឡើងដើម្បីឲ្យគណៈកម្មការរៀបចំងាយស្រួលដល់ការរៀបចំជាសម្ភាររត់ ឬមេដាយជាដើម។ ការចុះឈ្មោះយឺតពេលនាំគណៈកម្មការរៀបចំមិនធានាដល់ការរៀបចំឲ្យរលូន ឬបានល្អនោះទេ។

រូបភាពតំណាង (NOCC)

អ្នកជំនាញផ្នែកកីឡាខាងលើនេះបន្ថែមទៀតថា តាមការរំពឹងទុកសន្ទុះនៃការគាំទ្រនេះអាចនឹងឈានឡើងចំនួនអ្នករត់ដល់ ១៥០០០-១៦០០០នាក់ជាមិនខាន។ សូមរួសរាន់ចំពោះអ្នកចង់ចុះឈ្មោះចូលរួមព្រឹត្តិការណ៍រត់ប្រណាំងដ៏ធំប្រចាំឆ្នាំ ២០២៥ មួយនេះ។

បញ្ជាក់ដែរថា ពាក់កណ្ដាលម៉ារ៉ាតុងអន្តរជាតិអង្គរ គឺជាព្រឹត្តិការណ៍រត់ប្រណាំងដ៏ធំជាងគេនៅកម្ពុជា ក្នុងចំណោមព្រឹត្តិការណ៍រត់ប្រណាំងផ្សេងៗ។ ឆ្នាំនេះជាខួបលើកទី៣០ នៃព្រឹត្តិការណ៍រត់ប្រណាំងនេះផង ដូច្នេះការរៀបចំ និងកម្មវិធីកម្សាន្តនឹងរៀបចំឡើងកាន់តែពិសេសសម្រាប់អ្នកចូលរួម៕