ខាងក្រោមនេះគឺជាផលប៉ះពាល់សំខាន់ៗនៅពេលដែលអ្នកបរិភោគគ្រឿងឧបភោគបរិភោគ ឬទំនិញហួសសុពលភាព៖

១️ បង្កជំងឺពុលអាហារ ដែលអាចបណ្ដាលឲ្យឈឺពោះខ្លាំង, ចង្អោរ, ហើមពោះ / ឈឺចាប់ក្នុងពោះ, គ្រុនក្តៅ។ មូលហេតុដែលនាំឲ្យពុលអាហារ នោះគឺដោយសារតែបាក់តេរីដូចជា Salmonella, E. coli, Staphylococcus aureus និងសារធាតុ Clostridium botulinum។

២️ ការរលាកក្នុងប្រព័ន្ធរំលាយអាហារ មានដូចជា ឈឺក្រពះ, អាការៈអស់កម្លាំង, រាគរ៉ាំរ៉ៃ, ជំងឺរលាកក្រពះ ឬ ការឆ្លងមេរោគពោះវៀន។

៣️ ការបង្កើតជាមេរោគ និងពុលខ្លួនពីសារធាតុពុល ខ្លះបាក់តេរីគឺជាអ្នកបង្កើតសារធាតុពុល (toxins) ដែលមិនបាត់ទៅជាមួយការចម្អិនណាមួយឡើយ។ ឧទាហរណ៍៖ សារធាតុ Botulinum toxin អាចបណ្ដាលឲ្យ អសមត្ថភាពសរសៃប្រសាទ និងស្លាប់បានភ្លាម ក្រោយពេលទទួលទានរួច។

៤️ អាឡ័កស៊ី ឬប្រតិកម្មស្បែក ដូចជា៖ ឡើងកន្ទួល, ហូរទឹកភ្នែក / ក្អក / ហត់ដង្ហើមឬដង្ហក់។ ជាពិសេសនៅលើផលិតផលមានគីមីច្រើនហួសប្រមាណ ឬគ្រឿងទេសប្រភេទខ្លាំងៗជាដើម។

៥️ ប៉ះពាល់ដល់ថ្លើម និងតម្រងនោម ផលិតផលដែលហួសកាលបរិច្ឆេទអាចបង្កើតសារធាតុពុលសរីរាង្គ (mycotoxins) ពិសេសចំណីមានផ្សិត។ វាអាចប៉ះពាល់៖ ថ្លើម, តម្រងនោម, កើនហានិភ័យមហារីក។

៦️ ជំងឺរលាក ពុលឈាមករណីធ្ងន់ធ្ងរ បើបាក់តេរីចូលទៅក្នុងឈាម អាចបណ្ដាលឲ្យឈាមពុល និងស្លាប់ ប្រសិនបើមិនព្យាបាលភ្លាមៗ។

ទោះជាយ៉ាងណាក៏ដោយ មិនមែនគ្រប់អាហារទាំងអស់មិនមានក្លិនខូច ឬ មិនបម្លែងពណ៌គឺមានសុវត្ថិភាពទេ!
បាក់តេរីខ្លះ មិនមានក្លិន ឬរសជាតិ, ប៉ុន្តែបង្កជំងឺយ៉ាងខ្លាំងដល់សុខភាពអ្នកបរិភោគ។

តើត្រូវធ្វើយ៉ាងម៉េចដើម្បីសុវត្ថិភាព?

ដើម្បីឲ្យកានតែច្បាស់លាស់ ចៀសវាងប្រើប្រាស់ផលិតផលឬទំនិញខូចគុណភាព អ្នកទិញគួរតែ ពិនិត្យកាលបរិច្ឆេទលើស្លាក (Expiry / Best Before), មើល ពណ៌ – ក្លិន – រសជាតិ – រូបរាង, រក្សាទុកតាមសីតុណ្ហភាពត្រឹមត្រូវ។ ប្រសិនបើសង្ស័យសូមកុំបរិភោគ។ បើសិនទទួលទានរួចស្រាប់តែមានអាការពុលធ្ងន់ធ្ងរ សូមប្រញាប់បញ្ចូនអ្នកជំងឺមកកាន់មន្ទីពេទ្យភ្លាមៗ៕

អត្ថបទ៖ សាង ស្រីល័ក្ខ

ចុចអាន៖ឥណ្ឌូណេស៊ី ​រកឃើញ​ដាន​វិទ្យុសកម្ម​​ ២២ កន្លែង ក្រោយអាមេរិកបញ្ចូន​បង្គា​ក្លាសេ​មកវិញទាំងអស់

The post ទំនិញហួសសុពលភាព ប៉ះពាល់ដល់សុខភាពយ៉ាងណាខ្លះ ក្រោយទទួលទានរួច appeared first on Kampuchea Thmey Daily.

នៅ​ក្នុង​ប្រតិបត្តិការ​បង្ក្រាប​នោះ​ផង​ដែរ មានការចូលរួមសហការដោយសមត្ថកិច្ចចម្រុះ មាន​សមាស​ភាពចូលរួម សាខាគយ និងរដ្ឋាករប្រចាំខេត្តព្រះវិហារ-កំពង់ធំ , នគរបាល​ខេត្តព្រះវិហារ , អាជ្ញាធរ​ស្រុកត្បែងមានជ័យ ,សមត្ថកិច្ចប្រឆាំងបទល្មើសសេដ្ឋកិច្ច, មន្រ្ដី​ការិយាល័យផលិតកម្ម និងបសុព្យាបាលខេត្ត។

លោក ស្រេង វុទ្ធា ព្រះរាជអាជ្ញារងអមសាលាដំបូងខេត្តព្រះវិហារ បានឱ្យដឹងថា ដោយមានការយកចិត្តទុកដាក់បញ្ជាផ្ទាល់ពី​លោក ធុច បញ្ចសន្តិភាព ព្រះរាជអាជ្ញា អមសាលាដំបូងខេត្តព្រះវិហារ បានចាត់​ឱ្យរូបលោក ដឹកនាំសម្របសម្រួលនីតិវីធី ចុះ​ឃាត់​រថយន្ដចំនួន ២គ្រឿង ដែលដឹកទំនិញគ្រឿងក្នុងមាន់បង្កកចំនួន៣តោ និង៥០០គីឡូក្រាម ដែលខូចគុណភាពប្រែពណ៌មិនអាចប្រើប្រាស់បាន ចូលមកតាមច្រកកំពង់ស្រឡៅ ស្រុកឆែប ខេត្តព្រះវិហារ។

លោក​បន្ត​ថា កម្លាំង​សមត្ថកិច្ចចម្រុះ ចាប់ឃាត់រថយន្ដចំនួន២គ្រឿង ទី១ មានផ្លាកលេខ សៀមរាប 2C-6427 ដឹកគ្រឿងក្នុងមាន់(កោះមាន់) ចំនួន១,៥០០គីឡូ និងរថយន្ដទី២ មានផ្លាកលេខ ភ្នំពេញ 3D-7626 ដឹកគ្រឿងក្នុងមាន់(កោះមាន់) ចំនួន២,០០០គីឡូ បានដឹកទំនិញគ្រឿងក្នុងមាន់បង្កក(កោះមាន់) ខូចគុណភាពប្រែពណ៌មិនអាចប្រើប្រាស់បាន និងពុំមានឯកសារត្រឹមត្រូវ ព្រមទាំងដឹកជញ្ជូនខុសបច្ចេកទេស និង​បាន​ធ្វើ​ការ​ដកហូត​ដុតកម្ទេចចោល នូវទំនិញគ្រឿងក្នុងមាន់​បង្កក(កោះមាន់) សរុបចំនួន ១៩៥ កេស ស្មើនឹង ៣,៥០០ គីឡូក្រាម។

ចំណែករថយន្ដ២គ្រឿងជាមធ្យោបាយប្រព្រឹត្តបទល្មើសខាងលើ ត្រូវបានប្រគល់​ឱ្យ​សាខា​គយនិងរដ្ឋាករប្រចាំខេត្តព្រះវិហារ-កំពង់ធំ ធ្វើការផាកពិន័យតាមនីតិវិធីច្បាប់គយ៕

ដោយ ៖ ជុន កុសល

The post សមត្ថកិច្ច​ចម្រុះ​បង្ក្រាប​ទំនិញ​ខូច​គុណភាព​គ្រឿង​ក្នុង​មាន់​បង្កក​ជាង​៣​តោន appeared first on Kampuchea Thmey Daily.

សាច់បង្កកដែលត្រូវកម្ទេចចោល រួមមាន ឆ្អឹងជំនីជ្រូក.សសៃគោ.គូទមាន់ .ខ្លាញ់ជ្រូក .ស្លាបមាន់ .សាច់មាន់កិន .សាច់គោ .សាច់ជ្រូក និងសសៃជើងមាន់។ សាច់បង្កកខូចគុណភាពនេះ ត្រូវបានដកហូតចេញពីកន្លែងស្តុកសាច់បង្កកចម្រុះចំនួន ២កន្លែង និងរថយន្តដឹកសាច់ ១គ្រឿង នៅក្នុងរាជធានីភ្នំពេញ។ នេះបើតាមការបញ្ជាក់ពីលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ។

លោក ហ៊ុន សារ៉ាត់ បានឲ្យដឹងថា ការដុតកម្ទេចចោលសាច់បង្កកខូចគុណភាពទាំងនេះ ក្នុងគោលបំណងការពារសុខភាពសាធារណៈ និងបង្កើនសុវត្ថិភាពអាហាររបស់ប្រជាពលរដ្ឋ ព្រមទាំងជាការព្រមានដល់ពាណិជ្ជករ ឲ្យប្រកាន់ខ្ជាប់តាមបទប្បញ្ញត្តិច្បាប់៕

អត្ថបទ៖ សំណាង

The post សាច់បង្កកខូចគុណភាពជាង ២៦ តោនត្រូវបាន​ដុតកម្ទេចចោលនៅទីលានចាក់សំរាម ខណ្ឌដង្កោ appeared first on Kampuchea Thmey Daily.

ផ្សារចំនួន ២កន្លែងក្នុងខេត្តបាត់ដំបង ដែលមន្ត្រី ក ប ប ចុះពិនិត្យគឺសង្កេតឃើញថា មានគ្រឿងឧបភោគបរិភោគ រួមជាមួយទំនិញដែលហួសសុពលភាពត្រូវបានមន្ត្រីជំនាញដែលបានសហការជាមួយមន្ត្រីនៃមន្ទីរពាណិជ្ជកម្មខេត្ត ចុះដកហូត និងបានណែនាំឲ្យម្ចាស់ដែលជាអាជីវករ ត្រូវយល់អោយច្បាស់អំពីទំនិញរបស់ខ្លួនដែលហួសអាយុកាលកំណត់មិនត្រូវដាក់លក់ឲ្យប្រជាពលរដ្ឋទិញយកទៅប្រើប្រាស់នោះឡើយ ព្រោះវាអាចប៉ះពាល់ដល់សុខភាពរបស់ពួកគាត់។

កាលពីថ្ងៃទី១០ ខែកញ្ញា ឆ្នាំ២០២៥ កន្លងទៅថ្មីៗនេះ មន្ត្រីនៃអធិការកិច្ចម្ហូបអាហារបានចុះទៅពិនិត្យនៅផ្សារខ្នាចរមាស ស្ថិតក្នុងភូមិកោះរាម ឃុំខ្នាចរមាស ស្រុកបវេល ដោយពិនិត្យឃើញតូបក្នុងផ្សារចំនួន៩តូប និងទំនិញតាមផ្ទះដែលលក់ជុំវិញផ្សារចំនួន១២ផ្ទះ ដែលមានទំនិញ ខូចគុណភាព និងមានបង្កប់សារធាតុបូរ៉ាក់។ នៅក្នុងនោះដែរមន្ត្រីជំនាញបានដកហូតពពុះសណ្ដែកចំនួន ២,១២ គីឡូក្រាម ។

ចំណែកនៅក្នុងផ្សារបវេល ដែលមានតូបចំនួន១០តូប រួមទាំងផ្ទះដែលលក់ជុំវិញផ្សារចំនួន១៣ផ្ទះ គឺមន្ត្រីជំនាញបានរកឃើញ ទំនិញហួសសុពលភាព ដូចជា មីកំប៉ុង ទឹកក្រូច សណ្ដែកកំប៉ុង នំកញ្ចប់ ស្ករគ្រាប់ និងខោទឹកនោម សរុបមានទម្ងន់ ៧៨,១៨ គីឡូក្រាម និងឡេមានចំនួន ៨៨ កំប៉ុងស្មើនឹង ៤០,៧០ គីឡូក្រាម។ ដែលវត្ថុទាំងនេះត្រូវបានកម្លាំងអធិការកិច្ចដកហូតយកមករក្សាទុក នៅក្នុងមន្ទីរដើម្បីធ្វើការដុតបំផ្លាញចោលទៅតាមនីតិវិធីច្បាប់៕

អត្ថបទ៖ សោ និយមរ័ត្ន

The post ទំនិញផុតកំណត់ និងមានផ្ទុកសារធាតុបូរ៉ាក់ ត្រូវបានមន្ត្រីជំនាញរកឃើញក្នុងផ្សារពីរកន្លែងក្នុងខេត្តបាត់ដំបង appeared first on Kampuchea Thmey Daily.

ការណែនាំនេះ ធ្វើឡើងនៅពេលលោកអភិបាលខណ្ឌ ដឹកនាំមន្រ្តីជំនាញពាក់ព័ន្ធនៃរដ្ឋបាលខណ្ឌ៧មករា ចុះជួបសំណេះសំណាលជាមួយគណៈគ្រប់គ្រងសាលាបឋមសិក្សារបាក់ទូក នាព្រឹកថ្ងៃទី២១ សីហានេះ។ លោកអភិបាលខណ្ឌបានណែនាំដល់គណៈគ្រប់គ្រងសាលាបឋមសិក្សាបាក់ទូកត្រូវតាមដាន ធ្វើការផ្សព្វផ្សាយ និងកិច្ចសន្យាចំពោះអាជីវកររូបណា ដែលនៅតែមិនអនុវត្តតាមការណែនាំ លក់របស់របរ ចំណីអាហារខូចគុណភាព ហួសសុពលភាព និងអាចប៉ះពាល់ដល់សុខភាពកុមារ ដែលមិនគួរទទួលទាន។

លោកអភិបាលបានសង្កត់ធ្ងន់ថា បច្ចុប្បន្ននេះជាពិសេសនោះ គឺទំនិញឬផលិតផលរបស់សៀម មិនត្រូវបន្តយកមកលក់លើទីផ្សារទៀតនោះទេ ដែលយើងមិនសន្និដ្ឋានបានអាចធ្វើឲ្យប៉ះពាល់ដល់សុខភាពធ្ងន់ធ្ងរ ជាពិសេសគឺក្មេងៗតូចៗ ជាសិស្សសាលានេះតែម្ដង។

អាជីវករលក់ដូរក្នុងអាហារដ្ឋាននៃសាលាបឋមសិក្សារបាក់ទូក បានលើកឡើងថា ពួកគាត់សព្វថ្ងៃលក់ដូរតែ នំចំណី អាហារ ធម្មជាតិ ជាពិសេសនំដែលធ្វើដោយខ្លួនឯង ចំណែកភេសជ្ជៈ លក់ដូររបស់របរតាមការណែនាំរបស់គណៈគ្រប់គ្រងសាលា ដែលមិនមានផលប៉ះពាល់ដល់សុខភាព។ ពួកគាត់បានបន្តទៀតថា ពួកគាត់បានគិតគូរពីសុខភាព កូនៗ តូចៗ ព្រោះកូនគេ ចៅគេ ក៏ដូចកូនយើង ចៅយើងដែរ។

លោកអភិបាលខណ្ឌបានថ្លែងអំណរអរគុណដល់គណៈគ្រប់គ្រងសាលាបឋមសិក្សាបាក់ទូក និងអាជីវកលក់ដូរចំណីអាហារទាំងអស់គ្នា បន្តអនុវត្តឲ្យបានល្អ ដើម្បីប្រជាពលរដ្ឋ សិស្សានុសិស្ស និងសង្គមជាតិទាំងមូល៕

អត្ថបទ៖ សុភា

The post អភិបាលខណ្ឌ៧មករា ណែនាំគណៈគ្រប់គ្រងសាលា​​បឋមសិក្សាបាក់ទូក ពិនិត្យការលក់ដូរចំណីអាហារចៀសវាងប៉ះពាល់សុខភាពសិស្សានុសិស្ស appeared first on Kampuchea Thmey Daily.

ក្នុងប្រតិបត្តិការចុះបង្ក្រាបនេះ កម្លាំងជំនាញបានរកឃើញសាច់បង្កកចំនួន ២៤៤កេសក្រដាស ស្មើនឹង ៦១៨២​គីឡូក្រាម ក្នុងនោះមានសាច់គោបង្កកចំនួន១៩៤កេសក្រដាស ស្មើនឹង៥៤៣២គីឡូក្រាម និងជើងមាន់បង្កកមានចំនួន៥០កេស ក្រក្រដាស ស្មើនឹហ្នឹង ៧៥០គីឡូក្រាម។

តាមការបញ្ជាក់ពីមន្ត្រីជំនាញ រថយន្តខាងលើនេះបានដឹកផលិតផលសត្វបង្កកទាំងនេះចេញពីប្រទេសវៀតណាម យកមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់ ដឹកជញ្ជូនខុសលក្ខណៈបច្ចេកទេស នៃច្បាប់ដឹកជញ្ជូនសត្វ និងផលសត្វ។

ក្រុមការងារបាននាំបទល្មើស និងវត្ថុតាងទាំងនេះទៅរក្សាទុកនៅចត្តាឡីស័កសត្វរបស់អគ្គនាយកដ្ឋានសុខភាពសត្វនិងផលិតកម្មសត្វ ដើម្បីអនុវត្តទៅតាមនីតិវិធីច្បាប់៕

The post មន្ត្រីជំនាញបន្តបង្ក្រាបការនាំចូលសាច់បង្កកខុសច្បាប់ជាង៦តោនពីប្រទេសវៀតណាម appeared first on Kampuchea Thmey Daily.

ការស្ទាក់ឃាត់រថយន្ដដឹកត្រីបង្កកនាំចូលខុសច្បាប់នេះ ធ្វើឡើងកាលពីថ្ងៃទី៥ ខែឧសភា ឆ្នាំ២០​២៥ វេលាម៉ោង៣និង ៣០នាទីរសៀល ដឹកនាំដោយលោកវរសេនីយ៍ឯក​ យី​ យក់សាន​ នាយការិយាល័យនគរបាល​ប្រឆាំងបទល្មេីសសេដ្ឋកិច្ចនៃ​ស្នងការដ្ឋាននគរបាលខេត្ត សហការជាមួយមន្រ្តីជំនាញ ខណ្ឌរដ្ឋបាលជលផលខេត្តបាត់ដំបង និងកម្លាំងកងរាជអាវុធហត្ថស្រុកបវេល បានឃាត់រថយន្ត១គ្រឿង ម៉ាក​Hyundai ពណ៌បៃតង ឆ្នាំ២០០៥ ពាក់ស្លាកលេខ ភ្នំពេញ 3G-4732 ស្ថិតនៅចំណុច​ភូមិអន្លង់រៃ ឃុំក្តុលតាហែន ស្រុកបវេល ខេត្តបាត់ដំបង។

បើតាមសេចក្តីរាយការណ៍ ករណីដឹកជញ្ជូនត្រីគ្មានលិខិតអនុញ្ញាតនាំចូល​ គឺនាំចូល​ពីប្រទេសថៃ ហើយទំនងជាអាចដឹកចូលទៅកាន់ខេត្តបាត់ដំបង ឬក៏បង្ហួសទៅដល់ទីក្រុងភ្នំពេញ ដើម្បីធ្វើការចែកចាយ។ នៅក្នុងកិច្ចប្រតិបត្តិការនេះសមត្ថកិច្ចចម្រុះបានរកឃើញត្រី(ត្រីប្រាក្លាសេកក) ទម្ងន់ប្រហែល ២.០០០ kg និងត្រីកន្ធរបង្កក ទម្ងន់ ៥០០ kg។ចំពោះត្រី និងមធ្យោបាយព្រមទាំងអ្នកបេីករថយន្ត​ មន្រ្តីជំនាញរដ្ឋបាលជលផល ខេត្តបាត់ដំបង ជាអ្នកអនុ​វត្តនីតិវិធីបន្ត៕

អត្ថបទ៖ សោ និយមរ័ត្ន

The post មន្ត្រីជំនាញស្ទាក់ឃាត់រថយន្ដនាំចូលត្រីបង្កកពីប្រទេសថៃជាង ២តោន appeared first on Kampuchea Thmey Daily.

តាមរយៈការប្រកាសព័ត៌មានរបស់អគ្គនាយកដ្ឋានគយ និងរដ្ឋាករកម្ពុជា នៅព្រឹកថ្ងៃទី៧ ខែមីនា ឆ្នាំ២០២៥នេះថា ម្ចាស់ទំនិញបានបញ្ចប់នីតិវិធីបញ្ជូនសំបកកង់រថយន្តចាស់ៗប្រើរួចចំនួន 78,640 គីឡូក្រាម ចេញទៅវិញជាស្ថាពរហើយ និងបានបង់ពិន័យស្របតាមច្បាប់ និងបទប្បញ្ញត្តិជាធរមាន។ បើតាមអគ្គនាយកដ្ឋានគយ និងរដ្ឋាករកម្ពុជា ការបញ្ជូនទូកុង​តឺន័រកាកសំណល់ខុសច្បាប់នាំចេញត្រលប់ទៅវិញនេះ គឺធ្វើឡើងដោយស្របតាមអនុសញ្ញាអន្តរជាតិបាសែលស្តីពីការត្រួតពិនិត្យការដឹកជញ្ជូនអន្តរជាតិ និងការបោះបង់ចោលសំណល់គ្រោះថ្នាក់ ឆ្នាំ១៩៨៩ (Basel Convention on the Control of Transboundary Movements of Hazardous Wastes and their Disposal 1989)។

គួរជម្រាថា កាលពីថ្ងៃទី១៤ ខែកញ្ញា ឆ្នាំ២០២៤ អគ្គនាយកដ្ឋានគយ និងរដ្ឋាករកម្ពុជា បានទប់ស្កាត់ការប៉ុនប៉ងលួចនាំចូលដោយខុសច្បាប់នូវសំបកកង់រថយន្តចាស់ៗប្រើរួច (Used Tire) ផ្ទុកក្នុងកុងតឺន័រចំនួន ៤ទូ មានទម្ងន់សរុប 78,640 គីឡូក្រាម ពីក្រៅប្រទេស តាមមាត់ច្រកកំពង់ផែអន្តរជាតិក្រុងព្រះសីហនុ។

បន្ទាប់ពីសាខាគយ​ និងរដ្ឋាករកំពង់ផែអន្តរជាតិក្រុងព្រះសីហនុ បានទទួលព័ត៌មានអញ្ញាតបណ្ណផ្តល់ដោយក្រុមហ៊ុននាវាដឹកជញ្ជូនតាមសមុទ្រ មន្ត្រីគយ និងរដ្ឋាករមានសមត្ថកិច្ចបានធ្វើការវិភាគហានិភ័យ និងបានកំណត់មុខសញ្ញាសង្ស័យលើការនាំចូលកុងតឺន័រចំនួន ៤ទូ ថា មានផ្ទុកសំបកកង់រថយន្តចាស់ៗប្រើរួច។ ភ្លាមៗនោះ មន្រ្តីគយមានសមត្ថកិច្ច បានទាក់ទងទៅក្រុមហ៊ុននាវាដឹកជញ្ជូន និងម្ចាស់ទំនិញ ដើម្បីកាត់សៀលបើកទូត្រួតពិនិត្យទំនិញជាក់ស្តែងផ្ទុកក្នុងកុងតឺន័រទាំង៤នោះ ដោយឃើញថា មានផ្ទុកសំបកកង់រថយន្តចាស់ៗប្រើប្រាស់រួច សរុបទម្ងន់ 78,640 គីឡូក្រាម ដែលជាមុខសញ្ញានៃការនាំចូលយកមកបោះបង់ចោលនៅព្រះរាជាណាចក្រកម្ពុជា និងជាទំនិញហាមឃាត់ការនាំចូលស្របតាមបញ្ញត្តិនៃអនុក្រឹត្យលេខ ៣៧០ អន.ក្របក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ និងមាត្រា ៨ នៃច្បាប់ស្តីពីគយ ដែលប្រកាសឱ្យប្រើដោយព្រះរាជក្រមលេខ នស/រកម/០៧០៧/០១៧ ចុះថ្ងៃទី២០ ខែកក្កដា ឆ្នាំ២០០៧។

អគ្គនាយដ្ឋានគយ និងរដ្ឋាករកម្ពុជា យល់ឃើញថា ករណីនេះជាបទល្មើសច្បាប់ស្តីពីគយ ដែលតម្រូវឱ្យម្ចាស់ទំនិញត្រូវនាំចេញត្រឡប់ទៅវិញឱ្យបានឆាប់រហ័សបំផុត និងត្រូវបង់ពិន័យដោយយោងតាមបញ្ញត្តិមាត្រា ៧៤ និង៧៥ នៃច្បាប់ស្ដីពីគយជាធរមាន។

អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា ក្នុងឆ្នាំ២០២៤ នេះ អគ្គនាយកដ្ឋានគយនិងរដ្ឋាករកម្ពុជា បង្ក្រាបបានការនាំចូលដោយខុសច្បាប់នូវទំនិញហាមឃាត់មួយចំនួនរួមមាន សាច់បង្កក និងផលិតផលពីសាច់សត្វខូចគុណភាព ៣៧ ករណី ស្មើនឹង ៩៤ ០១៨ គីឡូក្រាម និងគ្រឿងញៀន (ទម្ងន់សុទ្ធ) ៦៦ ៣០០,៩៤ ក្រាម។

ជាមួយគ្នានេះ នៅថ្ងៃទី២៨ ខែកុម្ភៈ ឆ្នាំ២០២៥ អគ្គនាយកដ្ឋានគយ និងរដ្ឋាករកម្ពុជា បានរៀបចំពិធីកម្ទេចទំនិញល្មើសច្បាប់ និងទំនិញខូចគុណភាព ចំនួន ១០៧ មុខ ដែលមានទម្ងន់សរុបប្រមាណ ៥០៧ តោន៕

The post ម្ចាស់ទំនិញនាំចូលសំបកកង់រថយន្ដចាស់ប្រើរួច​រងពិន័យពីអគ្គនាយកដ្ឋានគយ និងតម្រូវឲ្យបញ្ជូនចេញពីប្រទេសកម្ពុជាវិញ appeared first on Kampuchea Thmey Daily.