មន្ត្រីជំនាញបន្តបង្ក្រាបការនាំចូលសាច់បង្កកខុសច្បាប់ជាង៦តោនពីប្រទេសវៀតណាម

ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វ កាលពីវេលាម៉ោង១០និង៣០នាទីព្រឹក នាថ្ងៃទី០១ ខែសីហា ឆ្នាំ២០២៥ បានចុះស្ទាប់ចាប់រថយន្ត១គ្រឿងម៉ាកHYUNDIA ពណ៌ស ដែលលួចដឹកសាច់បង្កកនាំចូលពីប្រទេសវៀតណាមខុសច្បាប់មកចែកចាយនៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងប្រតិបត្តិការចុះបង្ក្រាបនេះ កម្លាំងជំនាញបានរកឃើញសាច់បង្កកចំនួន ២៤៤កេសក្រដាស ស្មើនឹង ៦១៨២​គីឡូក្រាម ក្នុងនោះមានសាច់គោបង្កកចំនួន១៩៤កេសក្រដាស ស្មើនឹង៥៤៣២គីឡូក្រាម និងជើងមាន់បង្កកមានចំនួន៥០កេស ក្រក្រដាស ស្មើនឹហ្នឹង ៧៥០គីឡូក្រាម។

តាមការបញ្ជាក់ពីមន្ត្រីជំនាញ រថយន្តខាងលើនេះបានដឹកផលិតផលសត្វបង្កកទាំងនេះចេញពីប្រទេសវៀតណាម យកមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់ ដឹកជញ្ជូនខុសលក្ខណៈបច្ចេកទេស នៃច្បាប់ដឹកជញ្ជូនសត្វ និងផលសត្វ។

ក្រុមការងារបាននាំបទល្មើស និងវត្ថុតាងទាំងនេះទៅរក្សាទុកនៅចត្តាឡីស័កសត្វរបស់អគ្គនាយកដ្ឋានសុខភាពសត្វនិងផលិតកម្មសត្វ ដើម្បីអនុវត្តទៅតាមនីតិវិធីច្បាប់៕