សាច់បង្កកខូចគុណភាពជាង ២៦ តោនត្រូវបាន​ដុតកម្ទេចចោលនៅទីលានចាក់សំរាម ខណ្ឌដង្កោ

នាព្រឹកថ្ងៃទី១៨ ខែកញ្ញា ឆ្នាំ២០២៥ ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ និងសមាគមអ្នកចិញ្ចឹមសត្វកម្ពុជា ដុតកម្ទេចចោលសាច់បង្កកខូចគុណភាពសរុប ២៦ ១៦០ គីឡូក្រាម នៅទីលានចាក់សំរាម ខណ្ឌដង្កោ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាច់បង្កកដែលត្រូវកម្ទេចចោល រួមមាន ឆ្អឹងជំនីជ្រូក.សសៃគោ.គូទមាន់ .ខ្លាញ់ជ្រូក .ស្លាបមាន់ .សាច់មាន់កិន .សាច់គោ .សាច់ជ្រូក និងសសៃជើងមាន់។ សាច់បង្កកខូចគុណភាពនេះ ត្រូវបានដកហូតចេញពីកន្លែងស្តុកសាច់បង្កកចម្រុះចំនួន ២កន្លែង និងរថយន្តដឹកសាច់ ១គ្រឿង នៅក្នុងរាជធានីភ្នំពេញ។ នេះបើតាមការបញ្ជាក់ពីលោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ។

លោក ហ៊ុន សារ៉ាត់ បានឲ្យដឹងថា ការដុតកម្ទេចចោលសាច់បង្កកខូចគុណភាពទាំងនេះ ក្នុងគោលបំណងការពារសុខភាពសាធារណៈ និងបង្កើនសុវត្ថិភាពអាហាររបស់ប្រជាពលរដ្ឋ ព្រមទាំងជាការព្រមានដល់ពាណិជ្ជករ ឲ្យប្រកាន់ខ្ជាប់តាមបទប្បញ្ញត្តិច្បាប់៕

អត្ថបទ៖ សំណាង